قاموس المناصير اللغوي

تذكير بمساهمة فاتح الموضوع :

كل الأعضاء وغير الأعضاء يشتركوا فيهو.. أي واحد يجيب كلمة هنا ويشرحا.. ويبرهن عليها وهل هي كلمة محدودة في منطقة معينة في المناصير أم تستعملها المناصير كلها.. وإذا شك الناس في استعمال هذه الكلمة الحكم يكون زول كبير معمر من المناصير أو زولين كدة.. هذه نواه في إتجاه كتب يس مصطفى وأبو مصطفى
نبدأ باسم الله بكلمة
.............................. ويا ريت تكون الكلمة غير مشتركة مع جيرانا الرباطاب أو الشايقية.. وإذا اشتركت الكلمة يجب التوضيح


المنداجة: بفتح الميم وتسكين النون وفتح الدال وفتح الجيم.. تعني دكان متحرك على ظهر حمار بضاعتو في خرج ز
مكان الاستعمال:- كل أعراب بوادي المناصير، وتنتشر الكلمة في جهات البحر التي يرتادوها هؤلاء الأعراب.. زي بوني وبرتي والنعوفاب وبعض أجزاء من شري.. وعرب بوادي كبنة.. وعرب الجماميع.. ومنطقة عتمور الشرق حلة الكنيسي العرب في العمارين..هذه كلمة خالصة وخاصة بالمناصير وخاصة أعراب البوادي منهم
ومن مشتقات الكلمة:- يمندج.اي يسمسر ببضاعته هذه التي على ظهر حماره

شاى عشرات = ما هو شاى عشرات يا هندسه والحضرات المعاك (( شاى عشرات رمانى ))
فندر = ترترب فندر قعد
نفرو برا = عينه خاصه
عمبور = صدى الصوت من على البعد

لكم الحية اخوتى
هيييييييي يابحنه الكلام ده ما سمعنابو ولا شفنا الشياطين المنتشرات فى العقبه
بسوي الخير والبركه اللى يجو لها الناس من داخل وخارج المناصير حتى يتم لهم الشفاء بايات الله وعلى راسهم الحنانين و غيرهم
وايش تسوى الشياطين فى العقبه الخلاء لجدنا الرحمه لما قدم من عمل نفع به اهلنا من الحنانين لى عامة السودان
ده كان راجل خير وكان عندو كرامات عديدة
ورثها من والدته
قالو لما كان يعمل بسنار والم بها المرض خرجت الى الخلاء نادته يااااااااغلام يقولو انو سمعها وجاء فورا والعتبه على الرواه
ولا زلت بسوي تتمتع بالخير والبركه عشان كده اعمل حسابك وانتبه بالا تصيبك اللعنه.....
الفوسيب : نبات الجروف لما يكون صغير

الغريبة يا اميرة اول مرة اعرف ان فى المناصير حته اسمها بسوي
هي فى الغرب وللا الشرق
والقرى الحولها علشان اعرف موقعها

معليش لانى اصلا ما عشت فى المناصير
بس حابة اعرف

التحيه لكى اختى ...اعرف انك يا انتصار ما عشت بكبنه ويمكن يوجد غيرك لا يعرفون اين تقع بسوي
وسبق ان عرفتها ولكن لا يضر
تقع بسوى داخل الجزيرى شيرى من الجهة الشرقيه وتعتبر من قرى شيرى وهى لاتلتصق فى الحدود باي قريه امامها البحر وخلفها عقبه صغيره توصلك لشرى المدارس والمؤسسات الحكوميه
وهذا باختصار
ونتمنى ممن يقطنوها الان الا يياسو منها لما فعل الدهر فعلته بها ولكنها تبقى ذكرى بل ذكرى جميله يا انتصار

يـَـضـَاضـِي: يخاصم ويعادي
يضاضي: يمشي غادي وجاي أي يمشى التوءده، يمشى بتمهل من أثر الكبر أو المرض
هذه من الكلمات ذات المعاني المزدوجة في لهجة المناصير

يضاضي: يمشي غادي وجاي أي
ده ينالق عدييل كده

يدقًى = بتشديد القاف وتدخيمها تسمع الواحد يقول البهيمه دى تدقى من الصباح بلا قش مالها وغالبا تطلق على صوت صغار الماعز من العنابليك والعتان والسخل
ايضا فى فنان دابو يتعلم فى الغناء وبعدين مشى يغنى فى جيهه الصفيحه ومعاهو واحد يدق الطمبور ساكت اسمو قمر وفى واحدى عجوز ما عجبا غناء الفنان وقالت جيبولنا قمرنا وامرقوا الزول البدقى دا
الكلام ليك اليمنطط عينيك

هاااااا هاااااااا
ده شنو ده ياحسن ده!!!!! تدقي فهمناها..
الفنان مالو!!!!

النـَافـْـعيـتـِـي : هي كرشة الطيور، وقتما تغسلها وتفرغها من الحبوب، استعداداً لطبخها.. وهي كلمة منصورية خالصةن لاتعرفها اي من القبائل المتاخمة لنا..
يعني نافعيتت الدجاج، نافعيتت الوزين.. نافعيتت العلج.. نافعيتت القمريي.. نافعيتت الحمامة وهكذا

السرتويى = الحديا
الكرجه = طائر قريب من الطير الخدارى

الشلتوت :باقى اللبس المقطع وماكلاهو الشمس
يقولوا ليك امش فتشلك شلاتيت وشراميل النقشبيهن البابو .

منوفلي ... موش يقشوا بيهن البابو
لا
يمشمشوهو..( يمشمش) وقد وردت في القاموس.. لاضير من تكرارها. لسه ما جينا لى مرحلة الجمع والفحص والتدقيق..
أما الشلتوت . كلمة تمام
ايك رايك يا منوفلي يشاركنا فيها المصريين!!( محمود شلتوت) ده عميد الأزهر زمان

[img][ندعوك للتسجيل في المنتدى أو التعريف بنفسك لمعاينة هذه الصورة][/img]
الصدوق
صورتك عجبتني
لكن قلت أغير فيها لتعجب أكثر
معليش لنقلها دون استئذان
جبتها ليك هنا خوفاً من أن أختها في
محل تاني وما تمر عليهو
التحايا

باسم البلد وقاموسها وضيوفا وابو حنتها نرحب بالحضره ود البروى وحبابك بى هنى فى الكاكانات الوعره دى وعارفك متمكن وكلامك طاعم بلحيل زى ما قال ابو حنه

محمد بروي شكرا على الصورة رائعة
حسون يا جنابو يا بتاع الكاكنات.. الكاكنات يعني الوكرات والجزر الفيها الوغشي ديك والبوص والقش والتماسيح
أمي الله يرحما كانت تقول لى عمر أخوي( دود الكاكنات) والدود هو التمساح عند كل السودانيين( حجر الزلط.. قالوا الدود قرقر.. الأغنية بتاعة الربوع)
أميرة الحومري.. ناس الحومري جونا..
ناس الحومري بتاعين المحلي وناس الحومري بتاعين الجيلي والكدرو وناس عبد الله علي الحومري.. تسلمي على المرور والإشادة

القاليق = وسع القاليق يا ابو حنه عشان الشدره تنقطع (( مسافه صغيره تفتح للفاس عند قطع الاشجار ما بين بوصتين واربعه بوصات حسب الحال
الكراويش = متبقى الشى

والله يا نيتف قوى
ماك ساهل... جبتا كلمات في القاموس
..........
قلتا لى مشيت لى أهلك النعوفاب... وعمتا في خور حنون الدافي... حركتا كوامننا يا رجل!!!

يدودي: يترج.. يزيدها اشتعالا.. وغالباً ما تقال للنار..

الـحـُــرَّارَه : لما يجيك ضيف عزيز في المناصير..تضبح ليهو.. وجرت العادة عشان توريه أنك ضبحت ليهو. تشيل لك لحيمات كدة من بيت الكلاوي تديهن الحريم في الخـُسْ، يقلبهن بي بعضن كدي في الطوة، او فوق الدوكة.. معاهن شوية عفشي ومرارة، دي يسموها الحرارة
الحراره: يعني اللحيمات ديل من بيت الكلاوي من أحسن لحم الخروف، يقلبوهن بي بعضن
.........
سرقتها كلمة الحرارة من قصيدة حمود بروي بتاعة الزول الضاعت نضارتو

سلامات
الونسي دي بي هني سمحي خلاس
يانتيف هاك الاجابة
الللس "دا عند نوعين واحد حبل غليد تربط به القواديس في الساقي والتاني تشكيلة بنفس الحبل لكن في شكل شيال مثل الرحل بيشيلو بيهو الحجار علي الحمير
اما اللقنين "دا العالي المنو والبحر يقولولك تمرت اللقنين دي اخر تمرة منها والحدارة وزمان كان اللقنين القيفة حقت الساقية
اما البعسيب " دا العسيس البحاحو بيهو الطير من العيش وتحديدا المريق
اماني الباقات ديك ساهلات

كيفيني ليك ماجبتها

عمنا صديق الحقي ان بقيت وقع

سلامات
عمنا صديق
ملاحظة ماعارفها وردت قبل كدا ولا لا ؟؟
العصارة يسمونها ناس شري والمناطق الحوليهاوالمعني هنا القراصة
السنة الماضية ونحن في الدهب معانا واحد من اولاد شري والباقين من ابورميلة والقناويت والكحيلة وكان عليه الميز فقال عايز اعمل ليكم عصارة الحقيقة كل القاعدين مافي زول عرف الزول دا يعني شنو بالعصارة ؟؟؟
بعد كدا بقت ليه زي اسم لود شري...
ياريت لو عرفنا اكتر عن الاسم ومان استخدامه ؟

لاله ما عندك عوجي تب يا ظهر الدين... بس أكيد في زول مرجع في بيتكم قاعد يمليك
صاح؟؟

ياظهر الدين لقيتك تمام
البقيات ديل نخليهم لناس المدن

سلامات
يانيتف الباقي خلو لي ناس المدن زي ماقلت ولقيتني كيف ماياهو المقصود
وبعدين ياصديق انا ياريت لو في زول جمبي
والله المعلومات دي من الارشيف
الحمدلله الوالد محتفظ بالحاجات دي حية في البيت

انا غايتو شامي لي ريحة مؤامرة بين نيتف وظهر الدين



شنو يا الظهوري
ما تبصصونا معاكم شي

هاكم دي
الكدبانة :
بفتح الكاف والباء زي الكعكول تسيل من الشجر وخصوصآ السلم
لونها أسود ومره شديد ما بتتوكل

ولنا عوده بإذن الله

انا باقي لي احسن نعمل لينا ثلالثي يالمقداد
ورايك شنو انت تختار الموضوع ونحن نمشي معاك
وياريت تبدأ لينا من اللقاء الاخير
واخترح ليك العنوان يكون [مناصير في ........]عدة اسماء للهند
او الانت عايزو عشان نشوف ناس احمد سليمان ومعاذ عبدالرحيم وعلي البدري الكراري والنائمين كتار
يالله قةل هب

الإنـّـِـي: نقيصة، عيب ،غلطة، رخوة، تراجع
أقول لك الحكايي ديك قالوا فيها إنّــِي)
وقال ابراهيم الشاعر
عندما تزوج ابن أخته سليمان حامد عم النفر تزوج زوجته الثانية قال فيه
يا ود اللخت سُولْمـُونـِّي
فاتت سيرتو مشت القـُـنـِّي
كلنا بي ندورا الحني
عـِـلِّ نخاف عاد من الإنــِّي

كيفنكن يا ناس ونعل طيبين
وشايف يا ابو حنه الحكايه بقت كلها حضرات
القدايى = لفافه من القماش توضع على الراس ومن ثم توضع القفه او صفيحه الماء ويمكن تكون طرحه او جزء من الثوب

اللدايى = حجز مدردم توضع عليه الدوكه او الحله ومعه اتنين ولا تلاته حجار والجمع اللدايات

اللبودى = طاير صغير

يا حسن إنت مشيت وين ياخي.. قاموسك فاقدك..!! والكلمات الطاعمي فاقدنها بي غيابك.. ياخي كلمنا وكت تغيب.. الحكومة راحت الحج مع الجماعة والله شنو؟

سلام صاحب القاموس والديوان الكبير والقدح المدنكل و(( الحُراره )) الطاعمى والمراره النيى والله قرمتنى بى حُرارتك دى وبعدين الحراره دى ايضا لها استعمالات اخرى يبقا لى بعد الاذن طبعا وهى وجبه سريعه تقدم عند ولاده النسوان برضو
وبعدين نحن فى بلدا طيرا عجمى وبعيدين من المركز والشبكه اضعف مما تتخيل لذلك فى جهجه فى الاتصال بالنت

أيوة يا حسن.الحـُـرَّارة عند ولادة النسوان برضو
أم البت الولدت تكون فرحانة هاشة باشة بتها خلصت بالسلامي. تجيكم مارقي برة في البرندة إنتو الجيتو ديل تتحمدلوا السلامي تقول ليكم
( لاتمشو .. وحات أبوي ترجوا الحرارة.. مرقت أها تراها دي فوق الدوكا,.. بس نقلب ليكم لحيمات كدي بي بعضن سريع سريع..
والله لحيمات الحرارة دي طاعمي جنس طعوميي يا حسن ... واااي
بعدين ملاحظ يا حسن خروف المناصير موش زي خروف الصعيد..
خروف المناصير ما بيوشل موية في النار لحمو.. عشان يقولوا معظم اكلو لوبيا... وخروف الصعيد عشان بياكل العشر وساقنو ملح.. وبطنو مكورري لحمو فوق النار يرغب ويوشل موية حتى كان شويتو فوق الصاج
راحت وين هسي دي الخرفان دي يا حسن..!!
قالوا ماتت لما ودوها مناطق التهجير... يبدو أنها عبرت عن حزنها على الفراق..
لاحظت زمان وانا عندي بيت في كوستي.. إنو الزعيم جعفر عثمان وفتح الرحمن والشاعر فتح الرحمن حسن عمر وعمر يس وناس برتي الفي كوستي . قبل عيد الضحيي يجيهم لوري من البلد فيه على الأقل عشرين خروف.. يرسلوا ليهو من البلد عشان لحم البلد طاعم..
هسي دي افتكر اللحم بحيرة وبس.. والله شنو؟ والله شكلها اتغير

القليه = بتخفيف القاف وهى دمعه كاربى معموله بى بصله وزيت وبهارات وما فيها لحم وتلقالا قراصه قمح الله اداك

القليى = برضو بتخفيف القاف هى تسالى من حب الجُرم ويتم خلطها مع تمرات بركاوى وغالبا ما تقدم فى مناسبات الولادى وتوكل بدون تقشير ((تنقرش قرش ساااك))

الجلندى = خيط قطنى قليد ويتم تشحيمه ليوضع على عمود طلمبه البابور لدم تسرب الماء والهواء

الجابى = ترعه ممتده من البابور حتى البحر
والله يا هندسه قريت كلامك الطاعم دا بعد تسجيل المساهمه وبالفعل فقدنا خروف الضحيه الكان يجينا من البلد ومدوعل بالنوى واللوبيا وفيهو مراره زى السم ما تدى الجمبك وخاصه تلقالا بصلات بيضاء ودكوه وليمون وشطوط وبقينا فى الجهجه دى ولكن خروف البلد ما زال يحتفظ بكل الميزات ولكن معدوم وغالى ويمكن يفوت ال500
وبعدين الجماعه حجوا معاى 2008م وما راحوا

أبوك زمان كيتاً على ناس شرري ما بيشتري لحمو بتاع السوق إلا من عبدالله الحنوني.. وطوالي يشتري كيلو..
يقول انفع عبد الله صاحبي.. وابوك مصر على إستعمال القفل.. لما كبر صار يرسل القفل مع واحد من أخوانك ما عارف إسمو منو.. ومرات مع عجايز يرسلو
مرة وانا حاضر رسل قفل وفيهو قزازة سمن بلدي هدية لصاحبو حاج عبد الله..
وابوي عارف ابوك زول رسمي جدا وحساس شديد ومرهف.لو ابوي ما مسك حق الكليو من المرة... وخلاهو مقابل قزازة السمن.. كان ابوك يظل يبكي لامن يجيهو ابوي من الحنانين يسكتوا.. لايحب ابداً يفهم خطا ابوك.. عشان كدة صداقتهم دامت لامن رحلوا.. زمان نص شتلنا المزروع بي فوق ابوي جايبو من شرري من صاحبو ابوك.. الجنينة بتاعتنا الفوق دي .. فيها تمر ما ننطق إلا تمرة سليمان ودنصر الدين.تمرة محمد اللت سليمان ود نصر الدين.. كل اخواني وولاد اخواني والبنات ينطقوا كدة.. لمان ينزلوا التمر يلقطوا لينا تمر للجبنة.
بعدين ابوي يوم السوق يملا ليهو خرتايي ليمون من ليمونتو ويديهو الناس الماشين صلحة.. يرسلوا لابوك..
ناس شرري الجزارين في سوق النعوفاب يزعلوا... ليه سليمان ود نصر الدين يشتري لحمو من عبد الله الحنوني...وما يشتري من جيرانو جزارين شرري!
ناس محومااد ود دبيليب بي هزعتوا ديك وكراعو المفكوكة عندو جزاري في السوق
الطهوري بي عراقيهو الوسخان داك عندو جزاري في السوق.. ياخي الطهوري ده عندو بت تقرا في الجامعة لقيتا عند أهلنا بتاعين فتيح العقليين يجوا يقضوا الخميس والجمعة وبنات كتار من شرري قمة الأدب. ما بدوي الدقير محمد حمد باشا من شرري وبعدين مناسب الحنانين متزوج بت عمتي فاطني بت عاشة بت اب حنة في وقر.. أها ولد فاطني يس بدوي ده زول مسكين كدة وما فايق للناس. لكن متزوج مديني فاطنى بت عمتي عمة مديني مديني دي المتزوجا ود بدوي من شرري ومن هنا بقت علاقة الناس المن شرري..
قالت لى أنا بت الطهوري.. قلت ليها الطهوري أحمر.. وإنت صاح تشبهيهو زيو شكلا لكن طلعتي خضرا كدة شوية يمكن امك سمراا.. برضو ناس شرري كتيرين في أم عشر فتيح العقليين وبي هناك محمود تاج السر وغيرو وغيرو..
وناس محوماااد العويد وناس سليمان العويد عندهم جزاري في سوق النعوفاب
اها يزعلوا لمان ابوك يشتري لحمو من صاحبو عبد الله الحنوني..
بعدين تبقا
القـَلـِيي.. وفيها القمح المحمص والجرم المقلي البي يقرشوهو قرش داك.. دي حلاوة النفسي زمان .. نأكل مما نزرع.زهو الجرم داك ما جرم منصوري خالص . موش النوع البي يتقشر. كان داير تقشروا ما يتقشر

والله يا ابو حنه زكرتنا بايام خالدات لا يمكن ان تنسى ولا حتى تتكرر وايا م سمحى بلحيل ونحن حضرنا القليل ولكن الكتير لا نتذكره بعامل السن ووالوالد له ود خاص مع عمنا عبد الله الحنونى كل الذى ذكرته صحيح وخاصه الشى الذى اذكره والدكم رحمه الله عليه كان يجي للوالد رحمه الله عليهم جميعا واذكر تماما خرتايه الليمون وكان عمنا ابوحنه يتوكا على عصا ونحن نمشى نربط الحماره فى التمر والوالد يقول حشوا البرسيم نص النهار وودوهوا للحماره وهذه ايام وعلاقات واجتماعيات لا تنسى ابدا بين الاسرتين نامل ان تدون هذه العلاقات المتينه الممتده
ايضا كل هذه الموروثات من اصاله وسماحه وارث وتاريخ وعلاقات وود وتواصل وعادات وتقاليد نادره وطيبه وطيبات وخير وخيرات وذكرى وذكريات كل هذا جعلنا نتمسك بالبلد عسى ولعل ان نعود بهذا الزمن الجميل الى سيرته الاولى سيره الاباء والاجداد ونورثه للاحفاد من بعدنا
نسبه لان الشبكه تقيله فى التحميل لم استطع المجاراه فى الردود بالزمن المطلوب
ايضا عندى شجرات ليمون فى البيت مشيت قطعتلى ليمونات ووزعتها على الجيران ومنتظر القراصه بالدمعه وفوقا لحيمات ضان وبصل وشطوط
مع خالص ودى وتقديرى لك والاسره الكريمه
(( وعندى حبل شعر دابى باديهو ودايرك تفتل فوقو ))

ها ها ها حسون
أمشي علي قراصتك ديك بالهنا والشفا
باي

صديق ابو حنه
وحسن سليمان
جوعتونا عدييييل

شكلي اقوم انسخ مشاركاتكم الاخيرة دى والصقها في مطبخنا ولا شنو

أنسخيها يا انتصار
بس أملوا لينا القاموس من الجماعة!!

ويا انتصار ما تنسى بعد تنسخى هذه المساهمات وتجيبيها المطخ
تسويلك فوقا خيط وكنانه (( دى على تسعلى ابو حنه بيوريك )) وتدى معاك كل الحضرات الجمبك

سـَـخـَـمـَـهْ: رخمة أي الزول الغبي البليد المغفل الأبله الساذج

والله يا مُحُمد ماك هين لكن بينى وبينك التومى ما ادتك دفره

تـَـمـُـقْ: تلسع ولانقولها للعقرب.. إنما نقولها لأم جرق( البردة) سمكة البردة لمان تضربك كهربتا في البحر
اقول ليك أم جـِـرِّ ق مقتني
ودي كلمة منصورية مية المية

شكرا أميرة علي للإضافات التمام
زيدينا زيدينا مما زادتك حبوبتك

سلام يا ابو حنه والشبكى عندنا اكانت راقدى واطا
يكوزم ويبوذ ومد قدومو كلها كنايه للزعل