قاموس المناصير اللغوي

تذكير بمساهمة فاتح الموضوع :

كل الأعضاء وغير الأعضاء يشتركوا فيهو.. أي واحد يجيب كلمة هنا ويشرحا.. ويبرهن عليها وهل هي كلمة محدودة في منطقة معينة في المناصير أم تستعملها المناصير كلها.. وإذا شك الناس في استعمال هذه الكلمة الحكم يكون زول كبير معمر من المناصير أو زولين كدة.. هذه نواه في إتجاه كتب يس مصطفى وأبو مصطفى
نبدأ باسم الله بكلمة
.............................. ويا ريت تكون الكلمة غير مشتركة مع جيرانا الرباطاب أو الشايقية.. وإذا اشتركت الكلمة يجب التوضيح


المنداجة: بفتح الميم وتسكين النون وفتح الدال وفتح الجيم.. تعني دكان متحرك على ظهر حمار بضاعتو في خرج ز
مكان الاستعمال:- كل أعراب بوادي المناصير، وتنتشر الكلمة في جهات البحر التي يرتادوها هؤلاء الأعراب.. زي بوني وبرتي والنعوفاب وبعض أجزاء من شري.. وعرب بوادي كبنة.. وعرب الجماميع.. ومنطقة عتمور الشرق حلة الكنيسي العرب في العمارين..هذه كلمة خالصة وخاصة بالمناصير وخاصة أعراب البوادي منهم
ومن مشتقات الكلمة:- يمندج.اي يسمسر ببضاعته هذه التي على ظهر حماره

التحيه لكما اخى ابحنه وحسن..بديت اقرا فى القاموس لامن راسى لفه صحيح اصبح قاموس عديييييل كده...اقترح ان ينزل فى كتاب ليستفيد الكل وخاصه الاجيال اللى خرجت بره البلد....
البزديق:وهى المعراكه عند الاخرين
العفينونه: الجرجيرالبقوم عشوائى خاصة فى موسم القمح.
فكة الريق:الفطور البسيط المبكر.
بايت القوى:نايم ليلا بلا عشاء.
البرادى قراصة صغيرة...كانت تقدم للاطفال عند وفاة شخص وتؤكل مع الحليب.
وتانى ايش ياربيييييييييييييي

أميرة سلامة راسك اللفا....... ها هاها..
تشكري برضو على الإضافات..
بعدين يا أميرة. أنا لاربتني حبوبتي أم أبوي ولا أم أمي... بس أنا حمتا المناصير كلها من مغربا لى مشرقا.. تسلمي

اولا سلامى سلامى صاحبى الشوش وعوده حميده ماك مخروش
وبعدين كدى ما قتلى شقيش روح قايتو فى غيابك بقينا نجدع برانا انا ودفعتى الحضره اميره وكمان الحضره انتصارتديها واحدى واحدى والمهم محاايين النار
ودحين كدى قول لى القعيده ما قربت وشايف الواطا عصرت وبدينا فى الدنفريس وانا خايفو يكمل
قايتو لقيت لى ليك وبعد تعب واحدى
لى بد انك = كلمه تحزيريه بمعنى لا تعود نفسك

حسووووووووون
والله إنت وإنتصار ودفعتك الحضرة أميرة ويمكن نجلاء محايين النار هنا.. عاد تعيشوا
..................
أنا بقول غصباً عننا أقرب للشوايقة من أخوالك الرباطاب يا حسون ليه؟
هسي الكلمي الجبتها دي مشتركة بس بين الشايقية والمناصير
لى بدنك
... كدكي عندو قصيدة بعوان لى بدنك ولى زمانك!

سلام ابو حنه وضيفوا
بالفعل نحن كمناصير اقرب كثير للشواقه رضينا ام ابينا فجد اللغه واللهجه العاميه والغناء وطريقه الاداء والرقص والمشى والكوراك وطريقه الكلام مصحوب باشاره اليداضف الى ذلك طريقه العيش المعتمده على الزراعه والتجاره والمراكب وقبيض الحوت وكمان الحسادى برضو مشتركه والشعر واهتماماته بالنساء والطبيع والبلد والام
اما اخوالى بالجد نختلف فى الكثير ونتقارب فى القليل وحتى كمان مناصير الشمخيه والعال فى كلامهم زى الرباطاب على العموم للفكره بقيه

ايد ناش =قريب-

ينضم = المعنى القريب يتكلم وايضا لدى قبيله المناصير استخدامات اخرى فمثلا يقول ليك فلان دا نضم عند ناس فلان وما ادوهو يعنى مشى تكلم بغرض الخطوبه يعنى
وما حصلت قسمه كدا اظنو المعنى واضح ولا ازيدك

حسن وأنت قبل الحكومة الحالية نضمت وين وما أدوك
...........
وأنا عارفني نضمتا وين وما أدوني!!!؟؟؟ موش ما أدوني.. عايزين يدوني.. بس ظروف؟؟؟

والله يا ابو حنه انت طبعا حضره وتنضم فى اى مكان يدوك مثنى وثلاث ورباع مش حضره خلاص الكلام يقيف
اما العبد لله نضم فد نضمه وطوالى الجباده قبضت طوالى
اها نديك حبه عند اللزوم

ماسك شباطين = اولا الشباط بمعنى الابط والمعنى الكامل يكون انسان محظوظ وماسك شقين

يتبن = يفتش
يمٍت = ينز او ظهور الماء من خلال المسامات فى التربه

يمت.. برضو يا حسن. الزير لما يمضحوه

الليلي إنتصار جاتنا ضيفة وأضافت للقاموس.. ديل منصوريات العاصمة

مجذوب أنسه عندو أغنية يا إنتصار تقول( دة ما كلامك؟)
أنا خايف يكون ده ملوك ليهو يا أستاذة!
المهم شكرا على الإضافات في قاموس أهلك

الفـَـسـْـفوسْ: الشمار
الفسفوس طلع، يعني الشمار والقوالة ظهرت للعامة

الفسًخو = اللوبيا العفن وهو دابو صغار ويتم قطعه وتقشيره ليصبح حبوب صافيه ومن ثم يوضع على نار هادئه وبعد كدا الله اداك منو هين هينين

شايفك شغال تقرع سااااااكت لكن ما عرفتك طالع فى ياتو مشرقيى ولا تموده ولا دهيسى ام بركاوى داك الطعمو حالى

التحية لك الباشمهندس ابوحنه..الخال سعاتو الحسن من ارض الفور وسبنقه وكرنوى
شايفكم ..(انتو متقابلين طعن الس )
..ودى ياحسن دايرى بابور منك ..ابوحنه بيعرف تب
وهاكم ..هلس ..فرش للرقادو الغطاء يخيطوه من يقية (الشراميل) ..الملابس المشرطه
العتنيبه..البرش بتاع الرقاد..

ها ها
علي عيسى
غبت وجبت ليك كلمي غليدي مساهمة في القاموس.. تسلم..

(يين اكشره) ماذا افعل بها.....التنقير:طريق يشق الزراعة....بعض الكلمات ما عند المناصير فقط
...مبتحش قش التناقير
ويا انتصار سيد خليفه يقول :ازيكن كيفنكم ...
وردت (جيدن جيت)في مسرحيه المك نمر:جيدن جيت يا مك قبال نموت شفناك..لكن ده ما يمنع طالما انها متداوله لدى المناصير

أميرة شكرا على الإضافات
يا ترى ناس بسوي ما عندهم كلمات كدة خاصة في اللهجة تكتبيها هنا.. اصلى شايف ناس الجيهي ديك عندهم ثقافة خاصة شوية.. خاصة ناس العشامين وشنكوكة والدغفلي..

شكلك يبحنه مابتعرف بسوي....هي حاله خاصه لم ولن تتكرر لانها مزيج من الثقافات والحضارات المتقدمه عن باقي كل قرى البلد ..ولما حصل المزيج والانفتاح على الاخرين خارج المناصير بدا من بسوي فتولدت ثقافه غييييييير...لااتعالى والله على من حولنا لكنى والله لا اعلم عنها شيئا لان بسوى اقرب للحنانين والضقوله عن العشامين....وعن موقع بسوى:في الجزيره شيري لا تحدها اى حلي من اى جهه لذا شقت طريقها واجتهدت لحالها ....فى اهلها تنوع رااااااااااااائع....وبالتالي ثقافه قممممممممه.....حول يا ابحنه مداخلتك لمن يدري عن اهل الجيهى ديك وثقافتها اكثر منى.....حتى نستفيد كلنا
يقول اهلنا الكبار( ضرعتها رجل كلب ) يعنى اكثر من (الحوامه)اى اكثر من الحركه ذهابا وايابا(زنقه زنقه ووو
وبصراحه عندنا راي في ثقافة كل الخطوط سواء شرقي ام غربي ولمن يريد الثقافه الصاااح فالينهل من ثقافة بسوي هذه للفائده...شكرا يابحنه

حبوبتى كانت لما تدور ترسلنى بتقولى :-
( الجاد ولدى امش جيب لى الحاجة ديك بكريك )

يا أميرة عشان كدة قلت ليك.. ناس بسوي عندهم ثقافة خاصة... واو العطف ده وديتي وين يا أميرة..
بمعني ناس بسوي عندهم ثقافة... وهي قريبة للحنانين
ناس العشامين عندهم ثقافة.. قد تكون مختلفة عن بسوي عن الدغفلي
أنا أعرف يا أميرة أن بسوي بعيدة عن العشامين..
ومشيت بسوي أكثر من خمسين مرة في حياتي
عرس
بكا
زيارة
ناس إبراهيم الشاعر
ناس غلام
مشينا بالحمار
ومشينا بلاندروفر
ومشينا بي لوري بسوي
ومرة بي كرعينا
كلو حصل يا أستاذة

إصْــطـَمـْـحـَنْ: إستغرب

يـَـلـْـبـِـدْ: يختفي

كوم شبر:قفه صغيره ليس لها ايدى للحمل
والقفه هى بمثابة حقيبة تصنع من السعف بغرض حمل الاشياء الكثيره مثل الخضار والقش وزمان اهلنا بشيلوا فيها متاعهم عند السفر

يشلقم = تسمع الزول دا يا خدلو شلقيمه يعنى شربه او بمعنى اخر جزء من الكل

الخال الحسن ..يشلقم ياخدلواشربه .بالدس والله دى نكتها من جووووووووووووووووووه
الدنفريس:باقى الدمعه والكسره انشاء الله ماتكون وردت
الريط :المويه العكره
اللس :هوحبل تربط به القواديس بتاعت الساقيه
وقابلنى طعن الس :تعنى ان اللس عند فتله الا بواسطه فردين يتقابلان ويقومان بالفتل والشد لان اللس حبل غليد جدا

على شكرا للمساهمة في القاموس
الدنفريس وردت.. ولكن لابأس.. لسه ما وصلنا باب التصفية والجمع والتنقيح

مـَـرورِي: بترقيق الراء..الأولى والثانية..
معناها تطلق على سبيطة البلح القطعوهو قبل ينضج..أي نضج غصباً عنه خارج نخلته.. نضوجاً أفقده بعض حلاوته..

ياهندسه الف سلام
الشكلوكه ..هى الفطير اللتلخبط وحكوه بالكوز ويرموه فى المواصه للغنم
الرغيديه :هى يغلى اللبن فى النار ثم يصوتوا معاه الدقيق يعنى اكله
البعروره :يفترنوا الكسره ويدوها شطه وملح وبهارات (شرحها لغز )وتحضرنى طرفه الخال الحسن ..فى احدى المناسبات جاء الخال عباس سليمان البلد ..وبعدين عزمن عبدالله ودابوقرون ..قالوا ياعباس دى عبور مردى لحم رخس ..عباس قالوا مردى يعنى شنوا ..قالوا مسلهبه..قالوا والله مافهمت اى شى

صديق عبدالله علي أبوحنة كتب:مـَـرورِي: بترقيق الراء..الأولى والثانية..
معناها تطلق على سبيطة البلح القطعوهو قبل ينضج..أي نضج غصباً عنه خارج نخلته.. نضوجاً أفقده بعض حلاوته..

برضو يا هندسه مرورى تعنى متندل ومليان وتسمع الواحد يقول اكلت لى فطور بى روب خل بطنى مرورى واشيل واشرب فى المويه
ود اللخت على عيسى وانشاء الله المره دى تجرلك بلى دنارى كارب يقرع الورق المعرج بالبنات دا
وتخلنا نجيك ونشلقم لينا مراره نيه بالدكوه كاربى فى القضارف

التميمى
العصايى
البطان
الكراب
العكفه
اللبدى
الخشامه الفى النوريق
يكربت
يجكجك
يعير
يعنطط
يلفخ
يقرًب
ابو حنه هل تسمعنى انتهى

حسن سليمان بهلا جنس بهله..
شوية شوية لاتكملا مرة واحدة

يا حسن.. سوي لى بنات الخرتوم ديل وولاد الخرتوم شريط ترجمة زي بتاعة التلفزيون ديك
..................
نيتف قوى..
رسالتك وصلتني.ز تشكر على الرسالة الظاهر علك مشيت أهلك النعوفاب في الإجازة.. كنت عايز أرد عليك بي مزاج خاصة أنك عمتا في خور الحنانين ولحظتها تذكرتني

يكارن:..................
يكاشن:..........................

يكارن:يلم
يكاشن:يكره

تمام يا نورة.. شرحهم كدة.ز

ود اللخت نتف قى ما قصرت تب وشرحك اغلبيتو صااح عليى العصايى ما قدرت عليها

التميمى والعصايى = مكونات الحبل رباط الحمار والبهايم فنجد الجزء الخلفى للحبل المربوط فى (( البرمندى )) اسمها العصايى ومربوط فيها التميمه مربط رجل الحمار وموصله مع بعضها بطريقه (( الشرعى )) لكى الحبل ما يتلف فى رجل البهايم وينقطع
ولا شنو يا هندسه

نوره كتب:يكارن:يلم
يكاشن:يكره

والله يا هندسه يكاشن دى عندى عليها تحفظ وعلى ما اظن تعنى طريقه قبيض السمك من البحر عن طريق الكيشين ودايما ما يكون ثوب ولا هدم كبير
نوره تكابسى على القداميى

أيوة يا حسن.. ما هي زي ما قالت ليك نورة يكر أو يجر ويكاشن لازم بالكاشانة من سعف التمر.. أولاد معينين يعرفوا صناعتها.. من جريدة النخل..
أما بالهدم أو التوب.. يقال له يفجك.. بتشديد الجيم ولا يقال له يكاشن
ودائما التوب يقبض الصفصافة العرة. يقول ليك المثل المنصوري( فلان زي العرة الفي الهدم) والعرة لمان تقبض في الهدم تخاف( وتعمل فررررررررر... كدة بي ضنبا)
..................
اما حكاية فاطر بي روب يروريك دي تمام يا حسن ولقطة منك

يحقب = يحمل او يلفح بطريقه معينه ودائما يكون الحقب تحت الابط ولكى يكون المعنى قريب نرجع للقصيده والتى يتغنى بها الفنان عادل السيد(( سدر ود عيد بى وراهن وحقب فرنيب وباراهن ارائل سارحات براهن ))
ابو حنه / اميره / انتصار / محمد نتف قى / على عيسى /وكل اهل التراث خالص تحياتى وودى

لسه في الخير يا حسون.. وعندك الكتير..

شايفين ناس بسوي كيف؟
.. زمان لمان يداعوك يقولوا ليك( شيطان بسوي)
هل بسوي فيها شياطين!
اكيد موش عارفة السبب يا أميرة!
والسبب هو
قالوا جدك غلام الرجل العالم المتصوف العابد.. المكاشف
لمان يطلع الشياطين من الناس العيانيين.. ينطلقوا الشياطين في عقبة بسوي.ز فامتلأت عقبة بسوي بالشياطين
حسب إعتقاداتهم. نحن مالنا.. ده تراث

شاى عشرات = ما هو شاى عشرات يا هندسه والحضرات المعاك (( شاى عشرات رمانى ))
فندر = ترترب فندر قعد
نفرو برا = عينه خاصه
عمبور = صدى الصوت من على البعد