قاموس المناصير اللغوي

كل الأعضاء وغير الأعضاء يشتركوا فيهو.. أي واحد يجيب كلمة هنا ويشرحا.. ويبرهن عليها وهل هي كلمة محدودة في منطقة معينة في المناصير أم تستعملها المناصير كلها.. وإذا شك الناس في استعمال هذه الكلمة الحكم يكون زول كبير معمر من المناصير أو زولين كدة.. هذه نواه في إتجاه كتب يس مصطفى وأبو مصطفى
نبدأ باسم الله بكلمة
.............................. ويا ريت تكون الكلمة غير مشتركة مع جيرانا الرباطاب أو الشايقية.. وإذا اشتركت الكلمة يجب التوضيح

المنداجة: بفتح الميم وتسكين النون وفتح الدال وفتح الجيم.. تعني دكان متحرك على ظهر حمار بضاعتو في خرج ز
مكان الاستعمال:- كل أعراب بوادي المناصير، وتنتشر الكلمة في جهات البحر التي يرتادوها هؤلاء الأعراب.. زي بوني وبرتي والنعوفاب وبعض أجزاء من شري.. وعرب بوادي كبنة.. وعرب الجماميع.. ومنطقة عتمور الشرق حلة الكنيسي العرب في العمارين..هذه كلمة خالصة وخاصة بالمناصير وخاصة أعراب البوادي منهم
ومن مشتقات الكلمة:- يمندج.اي يسمسر ببضاعته هذه التي على ظهر حماره

الكر:-

بفتح الكاف.. هو مكان الأغنام.. زريبة الأغنام عند المناصير.. وينفرد بهذا الإسم المناصير دون غيرهم

الشرح:- غالباً ما يكون الكر ليس بعيداً عن الدار الأساسية، أي المنزل الرئيسي للأسرة، لأن صاحبة المنزل، تعرف صوت أغنامها وخرافها ونعاجها، وغالباً ما تكون الأغنام لحالها، والنعاج بالقرب منها، وغالباً لاتترك الأغنام أو النعاج تموج بدون ربط وتقييد، وتعزل عنها الخراف والتيوس، حتى تتم السيطرة من ربة المنزل على الوقت الذي تريده هي، لتكاثر أغنامها، وغالباً ما تعرف ربة المنزل وراعية الأغنام فترة الشبق لهه الحيوانات، أما لماذا لاتترك الأغنام والنعاج والخراف تموج في بعضها البعض؟ ذلك لثلاثة أسباب، وهي، أن كثرة الحركة والجري في بعضها البعض تهدر طاقتها وتقلل كمية اللبن فيها وقتما يحين موعد حليبها وهو غالباً ما يكون بعد المغرب، وبعيد وجبة العشاء، وغالباً ما تكون وجبة العشاء عبارة عن نبات اللوبيا، وسيقان الذرة الأخضر وبعض العوالق الأخري كالنجيلة، والنجيلة نفسها أنواع.. نجيلة المحاصيل المزروعة ومروية بالوابرو الزراعي ونجيلة الجروف. ونجيلة المحاصيل المروية، غالباً ما تكون طويلة ومتسلقة قليلاً في جذع النبات الأساسى، وهي من النباتات الطفيلية، أما نجلية الجروف تكون غالباً على نسق واحد من السمو في طولها، وتكون شديدة الخصرة غارسة الساق، ذات جذور لها رائحة ذكية، تستخدم أحياناً كمعطر ودواء ناجع لأمراض البروستات وتسمي النجيلة من حيث هي عند المناصير.

الكردي... لعلها من ( كرد يكرد كرداً)

يكرد

عند المناصير لها عدة إستعمالات

( يكرد الكردي أي يحشها حشاً)

ويكرد الحمار( أي يجرى وراءه ريثما يتمكن من قبضه، أو يكرده تجاه النيل ليأخذ حصته من الماء

ويكرد الحلاق الحلاقة؟؟ اي يشد على الموس أو آلة الحلاقة عندما تكون غير حادة المقطع أو غير حادة الشفرة

وهو قارورة الفخار التى يوضع عليها ماء الشراب (الزير)

وايضا من المصتلح الشائع ( ضق الكوز من الجر ) اى املى الكوس موية من الزير

من طرف **ahmed elfeel** الجمعة 06 أغسطس 2010, 8:25 pm

الدكل
بضم الدال والكاف
وتعني المطبخ

الخوصة بضم الخاء وفتح الواو وسكون الصاد وفتح الها ( السكين التى يقطع بها البصل ) وعادتاً ماتكون غير حاده

شكرا صديق على الافكار والاقترحات الموفقة دوما –وانا اقترح ان تكون تلك المفردات فى شكل ابواب –بمعنى نمسك مثلا –الزراعة –ونورد كل مايخص الزراعة(ادوات –نباتات –قش—مواسم—مناطق –وغيرها) كذلك المناسبات ( الباشى الطهور البكاء----) ثم الاكل (الملاح وانواعه –الكسرة ---) كذلك الانشطة اليوميه او الاشياء المرتبطة بحركة الحياة اليومية –وهكذا-----------

اديكم واحدة :

التربيقة :وهى اكلة او ملاح يعملوه من الويكة اليابسة –ويقدم اساسا فى البكاء –وفى اخر يوم –لان البكاء كان فى السابق يستمر لمدة خمسة عشر يوما نسبة لصعوبة المواصلات

من طرف **النفر** السبت 07 أغسطس 2010, 4:52 am

--(جر جاو أنتقو ارمو)--أكيد هذه الجملة لو قيلت لك بطريقه سريعة حتقول دى رطانة عديل -ومعناها زير فيه تمر الجاو جرو وأتكيه -------

--(أحشك الصليعى )---معناها حاصر وأقبض الصليعى هو طائر صغير ودائما ما يكون متواجد داخل البيوت -----

من طرف **خالد عابدين** السبت 07 أغسطس 2010, 5:14 am

التقروقة : وهي الصلاية واعتقد انها اذا كانت مصنوعة من جلد خروف او نعجة (ضان فقط) يتم دباغته بطريقة معينة ولست متاكدا ان كانت تدخل صلاية السعف المضفورة على شكل دائري مع جوانب مرفوعة تشبة الحوض ، لاادري ان كانت تدخل في هذا الاسم ام انه مقتصرا على الجلد المدبوغ فقط

قبيل الاخ احمد الفيل قال : الدكل ونحن ياود عمتي قاعدين نقول التكل بالتاء
الخس : وهو يعني التكل ايضا

دهين بارود : صغار الضفادع عندما تفقس من البيض وتكون في طور اليرقة تقريبا المهم راسا مدردم وعندها ضنب طويل )

من طرف **almansory@ooty** السبت 07 أغسطس 2010, 12:50 pm

تسلم كتير يا باش مهندس ودي المواضيع الكايسنلها زاتا _ _ _ _ _ _ _ _ _ _ _ _
أحشك الصليعي دي قطعت مصاريني بالضحك والصليعي هو عصفور دوري صغير يألف المساكن
ويعرف أيضآ ب ود أبرق
‏ ‏_ _ _ _ _ _ _ _ _ _ _ _ _
وهاكم دي
الهكعي او )الهتكي( بضم الهاء _ وتعني ألأنخفاض البسيط على الأرض أو اي سطح ) أيام البوغة يقولو ليك يا ولد المحلي دي هاكعي( أردم لك فيها كم كونشبر كدي( عشان تنعدل أي تستوي وينساب فيها المأء
‏ ‏_ _ _ _ _ _ _ _ _ _ _ __ _
الكونشبر:
أصغر من القفه وما فيهو إضنين أي حمالات ويستخدم في اللقب والغرغارات
‏_‏ _ _ _ _ _ _ _ _ _ _ _ _ _
بلمي :
بفتح الباء وكسر الميم وتعني مسيخي وما فيها ملح
تسمع الشفع في السمايات
يقولو السليقة دي بلمي
‏_‏ _ _ _ _ _ _ _ _ _ _ _ _ _
الصوره:
وتعني شجرة الدوم الصغيره )أربط حمارك في الصوره الجمب الخور ديك(
‏_‏ _ _ _ _ _ _ _ _ _ _ _ _ _
ملحوظة : أنا شايف لو ينقل
الموضوع لي قسم تراث المناصير )مجرد رأي(
تقبل مروري ooty

نعم نمشى على إقتراح سلمان.. ..والكلمات كثيرة .. ولكن كان قصدنا نخلي أي واحد يقول أي حاجة بدون تقييد ويستمر الموضوع هنا زمن.. بعدين نجي نغربلوا بدقة.. ونشوف الأشياء كلها وكل كلمات جابوها الناس نضعها تحت حاجاتها.وبابها. كان زراعة .. كان حياة يومية.. المهم أي زول عندو شئ في راسو ينزلوا هنا.. وكان مشينا بتخصص ما بطال وكان أي زول عندو كلمي شابكة في راسو وداير ينزلا ينزلا.. بعدين نذهب بالخلاصة الى باب التراث.. نحن قصدنا القاموس اللغوي وهو موضوع عام. لكن بعض ما ينجض.نمشي نطبخوا بي هناك جاهز في باب التراث.جاهز للأكل تمام.. زول عايز يقتطف منو لكتاب، زول عايز منو بحث.. ناس طلبة عايزين منو لمشروع تخرج.. زول عايز يعمل ليهو برينت آوت يحفظوا عندو.. لكن نحن هنا لسه بنطبخ في ( الخس) ولسه دابنا قطعنا البصلة وكبينا ليها الزيت ونقلى فيها
..............................................ز
نواصل في
الكر:- كما قلنا آنفاً
والكر دايما يكون بنيانه غير بنيان المنازل. يقول ليك حيطة كر. وحيطة كر يعني أي واحد تعلمجي ممكن يبني فيها ويتعلم البناء فيها، مرأة .. بنت.. ولد.. والكر قد يكون معروشاً أو غير معروش.. وحتى إذا كان معروشاً لايكون معروشا عرشا كاملا
يكون معروش بالطرور.. ويكون
رقراق:-
يعني غير مسمط به فجوات تدخل الشمس
والغنم داخل الكر قد تكون مطلوقة ساكت أو قد تكون مربوطة بحبل له وصلتين.. الوصلة الأولى تسمى
العصايي:- وهي وصلة حبل لها عقدة مربط من جهة الوتد وله عقدي فقط من جهة التميمي
التميمي:- أي تميمة وتميمة في اللغة تعني التعويذه.. وتعني الخلاصة.. وتعني الشئ المرفق، وقد وجدت هنا محلات بيع وشراء في الخليج وفي الإمارات إسمها أي إسم الرخصة( تميمة) مثلا سيوبر ما ركت تميمة وبنت إسمها تميمة.ز وهي كلمة عربية خالصة..
والتميمي في الكر تربط بشرعي( شرعة من الجهتين.. جهة مما يلي العصاي وجهة مما يلي كراع الحمار أو العنز أو النعجة.. والتميمي صعبة الصنع، لماذا، لأن لها ( وشريي) عقدة صغيرة داخل الشرعة( الشرعي) تشبه بروز الصندوق الصوتي في حلق الإنسان.. اي تمرة الفؤاد، وهذه ( الوشري) لها عمل في غاية الأهمية، وهي أن تمنع الحبل( ينزرد للآخر ) في كراع البهيمة.. وغالبا ما تكون كراع البهايم قريبة من قريب فلاتحتاج أن تحدد مقاسات دقيقة لكن رجل حيوان.. ولكن يجب أن تقفل شرعة التميمة كاملة.. لكنك بالتأكيد حينما تصنع تميمة لحمار مثلاً.. لابد أن ( الوشري) الداخلية داخل عقدة الحبل تكون بمقياس أكبر.. ويمكنك أن تجربها حتى ينزرد الحبل في رجل الحيوان ويمنع تدفق الدم في رجله وبالتالي موت الحيوان.. ولذلك أنت ترى أن هذه العقدة الصغيرة داخل عقدة المربط مما يلى رجل الحيوان مهمة للغاية، ودائما ترى أمك أو أبوك لايطمئن لأي تميمة تصنها أنت إلا بعد أن يتفقدها ويجربها ويراها صالحة والعقدة الداخلية تكون بمسافة تسمح بجربان الدم في رجل الحيوان المعني... قد يسمح لك أن تصنع عصاية مثلاً، ولكن لايسمح لك أن تصنع ( تميمي) إلا أن تكون قد حذقت هذه المهنة..
وكذلك
الكر:-
يستفاد من مخلفاته في الزراعة كسماد عضوي ناجح للغاية.. ويسمى
الكفان:- وهو مخلفات روث الأغنام والضان فقط.. ما عدا روث الحمير
والكر:- إذا كان مربوطاً فيه حمار أو أغنام يختلف الروث فيه، حيث روث الحمار في كر الحمار لايقال له ( كفان) وانما يستعمل لصنع ( السباليق) مفرد سبلوقة كمادة مثبتة مع قليل من( اللسد) مخلفات سيقان القمح) كمادة عازلة وزالقة للمياه من المنطقة التى توجد بها السبلوقة.. وكذلك مخلفات كر الحمار تستعمل في ( تزبيل) البيوت بالزبالة كما هو الحال في جميع السودان وليس عند المناصير وحدهم

الخُس:- بضم الخاء.. وهي تعني المطبخ أو التكل.. سوف نتطرق بعد قليل لثقافة ( الخس) بكاملها وماذا يوجد فيها وملحقاته ومشتقاته وتوابعها

الخُس:- وينفرد المناصير باستعمال كلمة خس للمطبخ، الشايقية يقولون له( دونكه) في الدونكه لسه ما فطر..... في قصيدة طعم الدروس. للشاعر حميد. وبعض قبائل الصعيد وناس الحضر.. يستعملون كلمة خس بمعنى مغاير
مثلا يقول ليك( إنت ما عندك خس) يعني لاتتدخل في ما لايعنيك
ولكن لو قلت لإمرأة أمية منصورية كبيرة( إنت ما عندك خس) ماذا ينبعث الى ذهنها، طوالي راح تقول ليك
أحمدالله يا يابا بى خسى وبي كري.. وراجلى أسطى طين كيف يخليني بلا خس؟ أعوس عن ناس منو نان؟)

من طرف **يس مصطفي** السبت 07 أغسطس 2010, 4:39 pm

ياسلام والله فكره عجيبه وبالجد تساعد في الكتاب ياابوحنه اديكم وحده
المراع : بضم الميم يعني ما يبس وسقط من اطراف اشجار السيال والسنط وغيرها
البقنيه : ودي ياصديق منصوريه تب وهي التمر +ماء +زريعه +يوم

من طرف **يس مصطفي** السبت 07 أغسطس 2010, 6:50 pm

يازعيم الصلايه دي عندنا اسمها التقروقه
ولً شنو يا اخونا نصر الله

أعضاء المنتدى اليكم التحايا والود

اما بالنسبة لهذا الموضوع فهو موضوع شيق ولكن يجب

التدقيق فى الكلمات وكتابتها كما نتطق وتقال فى المناصير واليكم المفردة
الربق بكسر الراءوالباءوتسكين القاف : الربق هو حبل بين وتدتين فية مجموعة من الشرع يربطوافية الحملان الصغار

من طرف **(الحاج شرف)** السبت 07 أغسطس 2010, 8:00 pm

بس عشان نشارك
فسر الجمله ادناه قبل ماتقرا التفسير
مابدو بار شى
البار الزراعه بالبابور فى مكان الجرف
والمعنى لسع مابديتو زراعه البار

يس ود أستاذنا.. إنت قلتا زايد يوم لي شنو؟ ما تخليها زايد خمسة يوم.. والله زايد خمسة يوم تبقى شي تاني؟؟؟؟

من طرف **منوفلى** السبت 07 أغسطس 2010, 11:51 pm

مشكور م / ابو حنةه علي مبادراتك و ابداعاتك
اتحفنا اتحفنا ....
.وانت بالطريقة دي ح تشدهنا من المواضيع التانية ديك
واديك جدعة جدعتين بس دايرك تشرحهم للجماعة :-
الغسال / بضم الغين
الهلس / بكسر ال ه ,ل
الدرين
الدكاج / بتشديد الدال
ملاح الكالبيق/

[size=24]والله يامنوفلي جبتا كلمات منصورية غليدي خلاص.. بس بجيك اشرحهم، طيب إنت ياخي ما عارفهم، تريحني تشرحهم للشباب دبل.. بعدين أنت ناس منوفلي بتاع المهودة والله حاجة تانية؟
.......................................
نحن هنا موش قصدنا الأعضاء براهم يوردوا كلمات..
لا
لأنو كل عضو مسجل هنا يعادل مئة منصوري ليه.؟ لأنو العضو عندو إمتدادات من أهلو الكبار وناس البيت والجيران المناصير.. نحنا ما دايرين عضو محدود..يكتب لنا هنا براهو؟ كل عضو ينشر في المجموعة التي حوله في الشغل في السكن البلد. يتقصد مجاميع كبارنا.. وعندما يجد كلمة غليدي كأنو قبض ليهو سمكة لامن نوثق لغة أهلنا.... هسه هنا نحن ندق في العيش. بعدين يجي الضريي والغربلة.تراها الهبوب قايمي لسه وسمحي للضريي... يا أخوانا عندكم ذخيرة كبيرة جدا في كلام المناصير . وهو مصر عليهو ويتحدث بلهجة منصورية دائماً... ما عارف الشغلو عننا شنو وعن المنبر ده؟ وهو أبو القاسم كروم.. ده زول مخزن في لهجة المناصير..[/size

من طرف **خالد عابدين** الأحد 08 أغسطس 2010, 4:18 am

الجاقون / اعتقد الماء السخن مع خلطه بالدقيق (ذرة) المعد لتخمير الكسرة المرة
المياصي او المواصي عند البعض / تستعمل لتخمير الكسرة المرة دقيق مع الماء مخمر سابقا
السناسن / الكسرة المرة ومفردها السنسني واعتقد انها مشتركة مع الشايقية ووردت في اغنية صديق احمد للراحل عبدالله محمد خير (ياقمرا اقلبي السنسني الحمرا )
واورد لكم هه الكلمات في شكل اغنية تهكمية سمعته وانا في الابتدائي
العريبي الدندني
شم ريحة السنسني
وقال لو ياعمي ادني

طرقة / اللفة الواحدة من الكسرة المرة (بفتح الطاء والراء والقاف)

سمبوسة / تقال لقراصة القمح

وارجو ان تشرحو معناي الاتي

الحضنقال

الكران

البشانتيق

النافحيتي او النابحيتي

المريد

الحويي

الشناط

من السلوك والافعال يقال:

اتحمط :

–جرى –بمعنى انطلق جرى—كذلك حمطه اى ضربه –ايضا مرادفه لها يتمطع—وهى ايضا خلاف (يمعط) –ينزع بقوة—(الليف—الصوف---)

يتخبل:

–بمعنى انه لم يتقن الفعل المعين ولكنه يحاول واقرب الامثلة لذلك فى تعلم –(العوم ---الطمبور---او الشعر—الصفة---الخ)

يزوزى :

ومعناها يتردد—وهى غير يزازى التى تستخدم كثيرا عند الشايقية ومعناها يكرر الفعل –مثل:

قال ود الدابى :

يزازى نقل سميحات الخليقة

وايضا نحنا نستخدمها كثيرا –ناس شررى يقولوا (زازنا بالحاجى الباردى)

وايضا ترادف (يزوزى ) او اقرب لها –يزوغ ويربط –فهى ايضا من التردد

من طرف **يس مصطفي** الأحد 08 أغسطس 2010, 7:11 pm

الحضنقال نوع من الحجاره المدردمه يلعبوبوا

الكران نوع من البوص تجيبو الدميري

البشانتيق قطعه البرش القديمه

النافحيتي او النابحيتي خشم الكرشي

المريد حبل من الصوف

.الجوله الحويي

الشناط اوالكراب موخره العنقريب

من طرف **خالد عابدين** الأحد 08 أغسطس 2010, 7:15 pm

90% تستاهل 9دولار لكن عملة صعبةمافي
الحوية او الحويي دي سرج الجمل
واصبر جاييك بي حاجات نصر الله القاعد يبصصك ذاتو يكون نساها

من طرف **ابو مصطفى** الإثنين 09 أغسطس 2010, 1:36 am

دحين بدو ابار شى ؟؟؟
يعنى الدكتور بداء يطعن فى الحقن

تحياتى ابو مصطفى
القاهرة

خالد عابدين كمل على ثقافة الخس اللى كنت نواي أكتبها.. المواصة والجاقون. الجاقون ماء حار فيه شوية دقيق ذرة يوزنوا بيوا الخمارة ودقيقها عشان يتعاس
ويقول ليك المثل المنصوري
(فلان يداوي في العجين المهرود) ومعرف عن العجين المهرود إنو لايتعاس ويشلتت بالقرقريبة ولا يتعاس بالكوز .. والعجين المهرود يستحيل يبقى كسرة الحريم البيعوسن بيعرفن الكلام ده تمام..
بعدين من ثقافة الخس.. المرة العواسة تعوس بالقرقريبة .. والمرة اللي لسه تتعلم تعوس بالكوز بي قعر الكوز...
وكسرة الكوز غلادة.. وقسرة القرقريبة رهافة.. في ناس تسأل تقول ليها كسرتك كسرة قرقريبة والله كسرة كوز.. مع الا عتذار ( للكيزان) .
والبرادي ياخالد ممكن تكون من القمح أو المريق.. برادي يعني قطعة كدة على الماشي لى زول جعان أو مستعجل ياكل لقمة و ومثل ذلك يسمونه الصعايدة ( القطر قام) والقطر قام عند الصعايدة ممكن تكون لحمة على صلصة على بصل على بهارات كلو في حلة واحدة سريع مع بعض بدون تحمير بصلة بدون حاجات أخرى ويالله على النار

كلمات في الزراعة وما حولها:-
ممكن الناس تكتب في الجزو ده لغاية ما نكملوا ننتقل لى جزو تاني.. حسب إقتراح سلمان
لكن ده ما يمنع أي زول يقول اي حاجة في أي حاجة .. حاجة نساها والقسم بتاع كلماتها اتقفل لابأس يقولا.. لكن يغلب على الجمع الآن التخصص .. برغم ورود الأقسام هنا.. لكن أكتب اي حاجة .. عشان نحن هنا في مرحلة جمع
ولمان الكبتة تجي .. والضلمة والناس تمشي تلقط التمر بالليل.. ومرات ما عندك بطاريي تلقط بيها .ز تشوف ليك ضل تمرة بالليل دهمة دهمة مرشوع رشع.ز تشوفا تجري عليهو وبسرعة قبل ما تهمكوا تلقطوا في قفتك.ز بكرة الصباح تجي تلقى قفتك نصها بعر حمير.. أتاريهو حمارة فلان ليها زمن يربطوها في التمرة دي.
أها نحن هنا في مرحلة الجمع
بعدين نجي لمرحلة جمع الجمع
بعدين نجي لمرحلة فرق الجمع
بعدين ندخلوا في الشوالات
هسه هنا ده شرك؟ظ لأي زول يقول اي حاجة

نواصل لسه في ثقافة الخُس
الهُمِّاد:-
باقي الرماد عموماً.. ولكن رماد الدوكة.. العواسة معظمها ببعر الغنم..
وبواقي
الدرين:- مخلفات الكر.. والحمير

المواصة:- هي في أصلها موية عادية لكن المرأة العادية كل مرة تغمس فيها القرقريبة عشان تكون ساهلة القرقريبة في جرها على الطرقة فوق الدوكة بسهولة. بالتالي الكورية الفيها الموية تصير مواصة.. من ماص يموص موصاً.. تبقى مخلوطة بالعجين. برضو الخمارة في آخرها لما ينتهي العجين ويغلسوا الخمارة دي مواصة.. وهي مشبعة ومغذية للأغنام وغالباً ما تعطى للغنم..
والمواصة غالباً ما يكون فيها( فترن) بتاع قطعات غير سليمة يرموها مع المواصة بعدين كمشروب مسمن ومدرر لللبن للأغنام..

كيف يتم ولييع النار في الخُس قديماً عند المناصير
بالمناسبة ما كل زول بيعرف يولع نار.. حتى النفخ نفسو. عايز ليهو جمكة خشم معينة الما بيقدر عليها يتملى رماد ساكت ويطير ليهو رماد اللدايات في وشو
يحيد النفخ ربة المنزل المنصورية المتمرسة أو البت الفتاة في البيت..
وليع النار والاستعداد له يتم كالآتي في اللدايات( الأسافي)

الأسافي هو إسمها العربي الفصيح
ويقول لك العرب( رماك الله من ثالثة الأسافي) ما معنى ذلك..
هو زمان يرعوا إبلهم عرب الجزيرة العربية. والأثافي يفترض تكون ثلاثة حجارة كبيرة توضع عليهم الحلة.. ولكن في المراعي والوديان.. يركزوا ثالثة الأثافي على الجبل.. عشان الضرا للنار.. يعني ثاثلة الأثافي جبل.. وحينما يقول لك رماك الله من ثالثة الاثافي.. هو إعجاز عربي مبين..
يعني رماك الله من الجبل................ز
أها نجي لى وليع النار عند المناصير في السبعينات والستينات وما دون ذلك
...........
وسط اللداي
1 تضع بعرة بعرتين بتاعات حمار
2 عليهم شوية ليف
3 وفوق ليهم لسد وسيقان قمح شوية
4 فوق ليهم جريدات مكسرة ناشفة بتاعات تمر
5 آخر خطوه تضع الخشب الاساسى وهو أعواد صنط أو مراع زي ما قال يس مصطفي أو عود عودين بتاعات طلح أو حطب سمر.. المهم حطبك الأساسى
وتضع عليهم كفتيرتك أو حلتك
وبالهناء والشفاء
مع أسامة السيد
بتاع المناصير

(الكبد )
ربما من اول وهله يظن الشخص ان المعنى معروف لاكن لمن يدخل فى جملة لايفهم شيئ( اقفل الكبد !!!!!)
كلام مبهم وغير واضح .. يقال الكبد للباب او الشباك من منتجات الخشب القديم .وعاة يكون كبير الحجم عن الباب الحديث الحالى
( الكشر ) الكشر اى الكاليون
والكوشر كيلون يصنع من الخشب ولدية ايضا مفتاح كبير من الخشب .
ولقت تلقيت هذه المعلومة من عبوباتنا وان كنت اكركب فى الشباك وقالتى ( ياولد ماتكركب فى الكبد وانا مااشتغلتبيها لان ماعااارف
وكررة الكلام مرة اخرى فوقفت وساءلت حبوبه قالت شنو قيلى قالتيك ماتكركب فى الباب ) ومن يومها عرفت المعلومه .

نواصل في ثقافة الخُس عند المناصير
الدَحَلُوب:-
في ناس إسمهم ناس الدحلوب
يشتمك مرات يقول ليك عامل راسك متل الدحلوب
الدحلوب له عدة إستعمالات
هو مصنوع من الطين قريب
للكنتوش:
الدحلوب يغطى به خشم الدكة من فوق.. عشان يكتم على الدخان بعد إنتهاء المرأة من الساونا. أي الدخان .. ويقتل النار لا تولع مرة أخرى
برضو.. يمنع دخول العقارب داخل الدكة.. لأنو بداخل الدكة الفحم والعقرب تحب الفحم لأنو مساعد لها في شئ معين في تكوين السم عندها.. بعدين بعد الانتهاء المرأة ترش حفرة الدخان بي موية.. يجعل الحفرة رطبة.مما يستدعى دخول العقارب هذا المكان الرطب..
وكم من مرأة منصوية ماها مغتية حفرة الدخان بي دحلوب لدغت وبعضهن مات من اللدغة
..................
الدكة زمان كانت تحتل ركن أساسي في المطبخ ويبلطوها بي بعر بقر من فوق ويهندسوها، ويجعلوا بقربها مكان في الحيطة يعلقوا فيهو مستلزمات عملية ساونا الدخان المحببة
هسه الدحلوب خلوهو واندثر.. هل في زول لسه في بيتهم بالمناصير يوجد دحلوب؟
بقوا يغطوا الدكة بي سدادة حلة . باي حاجة.. يخلوها فاتحي
الدكة ذاتها خلوها وبقوا ما يبنوها في المطابخ. صارت المرأة والعروس وغيرها تتدخن في جردل في صفيحة.. ودائماً من سخانة الجردل والله الصفيحة الواحدة تقولك الجردل شمطني في كراعي لامن بقَـقَـت
الدكة كلمة عربية فصيحة للغاية.. وجدت الناس هنا في الإمارات يستعملونها كلمة دكة. بس موش للدخان.. يجلسوا عليها.. وكلمة دكة تعني في اللغة ما ارتفع من الأرض... المكان العالي.. ويقول لك( فسلم عليه هارون الرشيد وأجلسه على الدكة)

من طرف **يس مصطفي** الأربعاء 11 أغسطس 2010, 3:21 pm

الزلومي :
الدانقه:
الرتوتي:
النقي:
معوبس:
امجرق:
الكانكيج:
الدبسي:
الكلد:
العره:
تورنقده:
الدقشوق:
السحيلي:
الصير:
العتعات:
النتيلي:
:الديقه
:الكانديقه
اخونا صديق ابوحنه هل تسمعني؟

أخونا يس مصطفى بشير سعد ود سويكت الرجل المهندس سعد ود سويكت الرجل الذي كان ينجر حلقات الساقي,, اي يصنع تروسها
يا زول إنت بس نزل نزل حاجات هنا.. نحن في مرحلة الجمع.ز اي كلمة نزلها بعدين بي ندق الحجارة ونغربل ونسوي ليها الزئبق . لامن نطلع الدهب

من طرف **منوفلى** الخميس 12 أغسطس 2010, 8:36 am

المعلاق :ويعرف بالمشلعيب
وهنالك من لا يفرق بين الكانون والمنقد وفي الخرطوم يعرف الاثنان ياسم واحد
الكانون/ له ثلاثة ارجل ويحل محل اللداي

منوفلي جبت حاجات هامة في ثقافة المطبخ وهي الفرق بين الكانون والمنقد.. وكلامك صاح هذا في ثقافة المناصير أدق من ثقافة ناس العاصمة....
اقولك حاجة هسه أنا عندي كانون هنا.. بحكي ليك بعمل بيهو شنو؟ عاملوا براي زي بتاع الحلب داك البي يقعدوا في التمر

الشملي.. وهي من الأدوات المستعملة للدخان في الخس...وقد كانت تصنع من الصوف الخالص.. صوف الأغنام.. وقد كانت تشترى من سوق النعوفاب.. يصنعها عرب البادية.. أو يؤتي بها من سوق ( الأربعاء) بالقرب من الشريك. بالغرب .. منطقة الباقير.. ومنطقة ( الكُدِّق) وكذلك تأتي من حلفا.. وتأتي من جهة كسلا ، يصنعها الرشايدة.. وزمان كان الرشايدة يجوا لافين في المناصير لجز الأغنام والضان، طبعا اكتشفوا كنز في المناصير .. وهو الأكل مجان في الخلاوي.. كذلك الصوف مجان .. على أساس إنو احلق للغنماية بتاعتي مجان. هو مستفيد من الصوف يصنع منو شمال ويصنع منو الخيم بتاعتهم كلها كعرب رحل في جهة كسلا
...........
زمان كان هنالك إشراقات داخل المناصير
يقول ليك التكارين جوو
الرشايدة أو الزبيديي نسميهم
كذلك ( الضباح) وعتود الضباح
الزول القال إنو النبي صلي الله عليه وسلم حلمني إنو القيامي قربت وإنو راح تكون هنالك كارثة
كان يمر في المناصير بس الغريبة وليس الرباطاب ولا الشايقيي.. انا قايل كترة العتان دي، هي الكفكفت دماء المناصير وخلتنا نطلع بأقل الخسائر.. ونحل مشكلتنا حلاً عصرياً ذكياً على طاولة المفاوضات
أها كلمة شملي
هي كلمة عربية فصحى( شملة) وهنا بنات خليجيات الواحدة اسمها( شملة) قلت ليها كان عرفوا عوين المناصير إسمك ده كان سيروك باشيي لى عند البحر.....
وي إسمها شمليي هاهاها
رَب.. ربَ رَب
ثقافة رب رب رب. ظهرت في شري في الستينات وانطلقت من قرية المتيرة.. من محمد محمد أحمد الشمباني... ومن حسن الحلبي ومن أحمد الماهل ومن حسن الدكيمي ومن عثمان سليم على الشاعر لقد كانت روحه شبابيه
كذلك ثقافة( وِررررر) وير وير.. وقد كانت في الستينات وقد انطلقت من قرية فقاعة وقد كان روادها عيسى بروي والقاضي الأمين الحاج.. وإدريس الصادق وانتشرت في شري كلها وضواحيها
رب رب رب.. يعني وافضيحتاه
و( وِرررر) عبارة غيظ.. يعني كلامك القلتوا اي كلام.. وِررر قد تلازمها هبشة من الشخص المستهزي بك يهبشك في فقهتك من وره محل ما يكووا الزول زمان في الفقهه يقولوا مفقوه.. ورر ساكت عادية لكن ورررر ومعاها هبشة في الفقهه من الشخص المستهزي بك هي نهاية الغيظ وتخلي المجموعة كلها تضحك؟

ثقافه المطبخ الكادق اعتقد معروف وهو وعاء لحفظ الروب
صنيعه القراصه وهو حفره في الارض يوضع فيها القحوف او الرضاف ومن ثم يصب دقيق الدخن ومعه كسار التمر ومن ثم تترك للنار واسمها قراصه الدخن دائما ما تكون عشاء او فطور في ليالي الشتاء
3- البريق وهو غرفه صغيره تكون بمثابه غرفه شتويه
هذه من ذكريات الطفوله الفتره التي عشتها مع حبوبتي الله يرحمها عشان ماتقولوا بصصوني ياخالد عابدين
رايك شنو ياصديق ما عندي عوجي

هاشم معقول دي ثقافتك؟ انا خايفا تكون ثقافة الأستاذة القضت زمنها كلو في سور.. إفتكر بصصوك يا هاشم
...........
لكن على كل حال كان دي حافظا من زمان زمن حبوبتك يكون ماشاء الله عليك..

العلم في الصغر كا النحت في الصخر ياصديق اكثر شخص تأثرت به في حياتي هي شخصيه حبوبتي بنت العطا الله يرحمها وهي والده الوالد وهي عمه المرحوم نور الهادي وأذكر من الامثال التي تركزت في مخيلتي قولها ( أحي من نارا تحتها قراصه ) بمعني الاجتهاد والصبر لتنال ما تريد

لسه ما قضينا من ثقافة الكر عند المناصير
العَنَاق:_
هي سخلة كبيرة لسه ما بقت عز.. وعناق هي كلمة عربية فصحي.. ذكرها الإمام الغزالي في إحياء علوم الدين
العتود:- هو ذكر الماعز الصغير.. شهور أو سنة دون التيس... كذلك العتود كلمة عربية فصحي
الرَقَتَه:-
غالباً هي من الضأن وهي دون النعجة أي لم تلد ولم أجدها في مراجع اللغة العربية
العَمبَلوك:- عتود كبير قرنو برم
المنيحي:-
أو المنيحة.. كما ذكر أبومصطفي هى الهدية من الأغنام، ولكن المعنى المتداول لها، هي عناق كبيرة ظهرت عليها حالات البلوغ قبل الزمن المحدد وظهر لها ضرع، قد يكون فيه قليل من اللبن

من طرف **النفر** الأحد 15 أغسطس 2010, 10:47 am

شكرا أخى صديق عبدالله على مجهوداتك القيمة فى التوثيق لهذه المفردات .ولى اضافة بسيطة هل الرقته التى ذكرتها هى العبور التى نعرفها ولا الاسم يختلف ؟؟؟

آي يا النفر ممكن تقول العبور
لكن خليني أدخلهن لك في جملة مفيدة.. سيبان فهمهما والفرق الدقيق بينهما
.........................
اقول ليك
( بت الشاعر جوها ناس علي سلمان وعبدو سليم وطولت ما شافتم فرحت ونادتا لنفر قالت ليهو عليك الله جيب سكينك تعال أضبح لى العبور دي؟؟؟
ماذا تفهم من هذه الجملة
تفهم الآتي إنو بت الشاعر جابت ليهم عبور وهي ( حملي) مدبلبة غليدي لسه ما ولدت
والعبور دون النعجي النوع أبو صوفاً يلهج داك وتتخج وتنهت.. وجنها جري ونقزي في الكر كان داير تقبضا تقوم نفسك... والله العبور دائما لحما حلو حلا يا النفر.. طبعاً ضقتا لحما مرات ومرات إنت
..............................
لكن لما أقول
إنو بت الشاعر جوها ناس علي سلمان وعبدو سليم وطولت ما شافتهم.. عندها رقته كدة راحت ضابحاها ليهم..
هنا كلمة رقته اقرب الى الماعز... ولكنها لاتمنع أن تكون مجرد بهيمة صغيرة ما وصلت لطور النعجة ولا وصلت لطور العز الوالدة..
رقته والسلام.. حاجة صغيرة.. وغالباً تعصر على الماعز.. لأنو جنى النعجي والعبور هي ثروة وغالباً لانضبحا.. لكن الرقتة اقرب الى جنى الماعز.. الرقتة أكثر تصنيفاً في خانة السخلة .. ..
ولكن يتبادر الى الذهن من كلمة رقتة لدي الوهلة الأولى.. حاجة كدة صغيرة أغلبها تكون من جنى الماعز مع قليل من الاحتمالات من جنى الضان ..

من طرف **م بروي** الأحد 15 أغسطس 2010, 9:58 pm

والله كركم ملان وزي ما قالو غنمو يتشرفن
زي ناس البنطون.
أها ياصديق هاك بالحروف كمان
الخوخيي:
ما نسجه المنكبوت
الخبوبه:
الرغوة
الخمارة:
ورد ذكرها وكذلك الخس
الخبر:الخبر إنو ده بوست توثيقي ما أروعه
تسلم ياهندسه

من طرف **ابو مصطفى** الإثنين 16 أغسطس 2010, 2:43 am

لملم الحمير من ناس الحلى ؟؟؟؟ نحن بكرة كان الله سهل عندنا :----
نوريق؟؟؟؟؟؟ النوريق طرح القمح فى التقاه فى حزم مربطة والحمير تطلع عليه وهى مربوطة صف صف فى عود النص ؟؟

الخبر:الخبر إنو ده بوست توثيقي ما أروعه
تسلم ياهندسه

محمد بروي والله ضحكتني جنس ضحك ولخمتني جنس لخمة.. الخبر دي قدر ما قبلتها لالقيتا في ثقافة الخس ولا ثقافة الكر ولا أي ثقافة.. وديتها على الخُبَر السعودية برضو ما لفقت..
بعد شوية ضحكت لامن دمعتا لامن عرفت إنو ود بروي يمدمد ثقافته القديمة بتاعة الأولاد المستهبلين في فقاعة زمان( يا حليل أحمد الفقع... في الدقيق بتسف لها ربع)

ثقافة الزراعة والكلمات المتداولة عند المناصير:-
الإنقاي... ورد ذكرها وشرها
الفريدي:-
ورد شرها
الدَيقَة:- ورد شرها
التنقير:-
ورد شرها
.......................
العيفنونة:- فصيلة من فصايل الجرجير، وأحياناً هو الجرجير نفسه... شرطاً أن يكون قايم داخل حيضان القمح

الجبركولة:- هي الرجلة
البَرتود:-
هو القرنفل.. وفي الخليج يقال له مسمار

من طرف **منوفلى** الإثنين 16 أغسطس 2010, 8:32 am

العنبلوك وجمعها عنبلك

من طرف **منوفلى** الإثنين 16 أغسطس 2010, 8:41 am

الكعدور هو الحمل الصغير الذي يجري ورا الشفع (امه نافراهو)

من طرف **م بروي** الإثنين 16 أغسطس 2010, 8:44 am

الرقته ياصديق في الماعز بس
وهي مرحلة ما قبل العناق مباشرةً وفوق
مرحلة السخلة

صاح برضو يا حمود مع الاعتبار لتمازج الكلمة بين المناصير نفسهم، اصلو التعريف دقيق.. والقصد هنا ذكر كل هذه الأشياء عشان يتأكد المعنى

التِـرِهويات:-
هى الإرهاصات
إذا واحد عايز يزرع ويبدأ في بوغة القمح لازم يراعي النجوم وبزوغها وتحريكها في مجراتها وحركة ريح الجنوب وحركة مد البحر وفيح الحر.. وهو علم يعرفه ال( السموده) عندنا مهندسي السواقي.. وسمد وظيفة أركان حرب في مسميات الساقيي( الوالدو سمد أم حس.. ماليها حبسو يكس.. قبل السموده تحس.. ده الدورا وجا يحش) هذا مقطع من بلال خليفة بلل من قرية البللاب أو المسراب لما تزوج في عام1962 القرية التالية لسوق النعوفاب.. وهو الآن يسكن بقرية أم عشر فتيح العقلين.. وقد قامت بعمل البلال حليمة بت أم جر.. مع مساعدة شلومنه بت الحسين من قرية حوش فرنيب