قاموس المناصير اللغوي

تذكير بمساهمة فاتح الموضوع :

كل الأعضاء وغير الأعضاء يشتركوا فيهو.. أي واحد يجيب كلمة هنا ويشرحا.. ويبرهن عليها وهل هي كلمة محدودة في منطقة معينة في المناصير أم تستعملها المناصير كلها.. وإذا شك الناس في استعمال هذه الكلمة الحكم يكون زول كبير معمر من المناصير أو زولين كدة.. هذه نواه في إتجاه كتب يس مصطفى وأبو مصطفى
نبدأ باسم الله بكلمة
.............................. ويا ريت تكون الكلمة غير مشتركة مع جيرانا الرباطاب أو الشايقية.. وإذا اشتركت الكلمة يجب التوضيح

المنداجة: بفتح الميم وتسكين النون وفتح الدال وفتح الجيم.. تعني دكان متحرك على ظهر حمار بضاعتو في خرج ز
مكان الاستعمال:- كل أعراب بوادي المناصير، وتنتشر الكلمة في جهات البحر التي يرتادوها هؤلاء الأعراب.. زي بوني وبرتي والنعوفاب وبعض أجزاء من شري.. وعرب بوادي كبنة.. وعرب الجماميع.. ومنطقة عتمور الشرق حلة الكنيسي العرب في العمارين..هذه كلمة خالصة وخاصة بالمناصير وخاصة أعراب البوادي منهم
ومن مشتقات الكلمة:- يمندج.اي يسمسر ببضاعته هذه التي على ظهر حماره

فى جَــــلات : تعنى من أجـل ، أو لكى ــ عشان ــ

من طرف **تاج الدين** الأربعاء 30 نوفمبر 2011, 9:42 pm

شكرا صاحب القاموس عمنا واستاذنا صديق ابوحنة
عشنا خارج المناصير فترة طويله وعند احدي زيارات حبوبتي لنا كانت تختبر علاقتنا ببعض المعاني والكلمات المنصوريه العاديه في التعامل العادي ونحن لا نعلم عنها شيئا فعلي سبيل المثال الحنقوقه والخوسه والخس تعبنا في ذلك الزمن ونحن نبحث عن هذه الاشياء التي طلبتها ممنا حبوبه بعد ان بعثرنا جميع اغراضها في البحث . قدر الله لنا بعد ذلك ان نعيش في البلد ونعرف الكثير من الكلمات والمعاني .
بهذا العمل الرائع عمنا صديق لن يجد اي احد منا الصعوبه في التعرف علي اي مفرده منصوريه من قاموسك الممتع .
نسال الله ان يعين الجميع في هذا العمل الجميل ودمتم ذخرا ومفخره لبلادي .

تسلم يا تاج الدين.. اكيد أمك وابوك بيعرفوا شخصنا الضعيف!
خليهم يدوك شوية كلمات أدعم بيها القاموس يا التاج

من طرف **HASSAN SULIMAN** الأربعاء 30 نوفمبر 2011, 11:51 pm

الاخ صديق سلام وقلنا نكمرق لينا شويه كراويش من الجماره دى والله العظيم شايل كلمه فى جلات وجيت جارى عشان اكتبها قمت لقيت الاخ العزيز الفكى منزلهاله التحيه عبركم

فتش الجمارة تاني يا حسون . يمكن تلقى ليك كرموشة. أوعك شوك الجمارة يطعنك. باقي طعنة شوك الجمارة للزول البي يكمرق حارة خلاص!

من طرف **HASSAN SULIMAN** الخميس 01 ديسمبر 2011, 1:28 am

هههههههههه والله حقيقه كل شى نى ودابوصغيرون و مفتح طعنتو حااااره
ما تنسنى ((يجُعُر)) بضم العين البكاء بحرقه

من طرف **HASSAN SULIMAN** الخميس 01 ديسمبر 2011, 1:31 am

شلاطيم= تسمع الواحد يقول للاخر وهو يزمه بكبر الفم ورخى الشلاليف عان شلاطيمو

من طرف **الفكى احمد** الجمعة 02 ديسمبر 2011, 5:19 pm

عراديم عراديم : تعنى أكداس أكداس أو مجموعات كبيره

من طرف **الفكى احمد** الخميس 22 ديسمبر 2011, 1:19 am

ينجُوغَر : تعنى يشرب ويعب عبا

يَغُر : يسقى ، يَغُر الحليب أو الدواء للطفل تعنى يسقه له مباشرة فى حلقه

زَبـْـلـَـعـَةْ : أي أمور فاضية.. وغير جادة.. وهزل.. يستعملها المناصير وهي كلمة عربية فصحى ولها أدبيات في الدولة العباسية. وهي جاءت من الزبالعة وهم قوم لهم أدبياتهم الخاصة كما اشتهر ذلك في التاريخ الإسلامي
المناصير يقولون( زبلعة تزبلعك) أو زبلعة فاضية.. أو سيب الزبلعة

الطَرُومِى : تعنى الشفتان ، فمثلا كثيرا مانقول ــ فلان مادِ طَرُومْتوُ ــ كناية عن عدم رضاه أو إستحسانه أو زعله ...ا

يـَـلـْـفـَخْ: تقال للحمار فقط حينما يضربك برجله.. أو يكون الحمار في حالة هيجان.. العز لا يقال لها تلفخ. ولا النعجة.
إذا عايز يداعيك زول يقول ليك( حمار يلفخك!)

من طرف **الفكى احمد** الإثنين 02 يناير 2012, 5:08 am

تِمَاْ : بكسر التاء وتعنى ـــ كاملا ، بالكامل ، كله ــ كأن تقول مثلا {هذا الشىء لايوجد مثله فى الكون تِمَا } ...ا

يـَـتـَـكـْـرِنْ: اي يذهب ويمشي.. وهي مأخوذة من التكارين.. أي التكارير.. وهي قبيلة تشادية معروفة. التكارين اي التكارير مشهورين بالمشي بالارجل وبيع الخرز في القفة وهم ماشين.. وكانوا يجونا في البلد كتير يبيعوا غويشات البلاستيك والريحة والأمشاط والمرايات وفرش الشعر بتاعات الحريم. يجي شايل قفة مخيشة بي قماش من تحت، عشان ما تتشرط ومشبك به حاجات شايلو بي يدو التانية. وكانت المناصير دون سائر قبائل السودان محبوبة للتكارين، حيث الأمان والمأوى... ياكلوا مجان ويبيتوا في الخلاوي

مـَـشـَـلـِّـقْ: اي مرفوع الهامة
في جملة:
( ود حوماااد الحسن شَـلـَّـقْ ، دخل الجامعة)
مـَـشـَـلَّـقْ : اي معمولة له عملية عيون... وهي كلمة مشتركة بين الشايقية والمناصير
بس شوف الدقة. الكسرة والفتحة في نفس الكلمة تؤدي لاختلاف المعنى جملة وتفصيلا
بين
مشلـِق ومشـَلّق. الشلوقة هي عملية العيون عند دكتور العيون او البصير الشلاق الذي يشلق الناس

حـِـمـْـبـِـرْ: الشخص المدعي أو المتحذلق وهو لايفقه شئ

يـِـتـْـجـَلـْـجـَـبْ: يتعلق بشدة ويحب ويريد
يقول لك: الولد ده! مـِـتـْـجَـلْـجـِبْ ابوه أكتر من أمو!

مَـضـَـكـْـلـَمْ: محسحس.. مواسى.. محشوش للآخر..

الرويل .... بفتح الراء مشددة وكسر الواو ..........وهي الخوي

الرويل:نحن لافوق نقول ليها
الشختور يا ود المناصير.. الرويل دي عاد إلا يكون عندكم لاتحت..
أو نقول يلها الخوي عديل كدة
الخـَوِيْ

يـتـْـعـَـلـْـعـَلْ: مدلع . يبكي بلا سبب. وتقال للطفل لما قدر ما يدوه حاجة يرفضا ويظل يبكي
الـحـَرِ يـِـمـِيْ: بتفخيم الراء وليس ترقيقها.. الطفل لما يفطموه ويبدأ يتعلعل. والله يكونوا مترادفين أمو قامت من النفاسي وبعد شوية جابت واحد فوقو وبعدين فطموه من اخوه الجاء بعدو وهو مقارب له في السن وفطموه قبل مواعيد الفطامي عشان يقول ليك ما يشرب لبن أخوه، يبدا يتعلعل ويبكي بلا سبب ويحرد ويغير شديد من أخوه الاصغر منو ، الإحتلا مكانتو، ومرات يرفض الأكل إلا يعزموا ليهو! وعايز مراعاة خاصة وحكمة حكيمة من ناس البيت وامو خاصة ،حتى يخرج من هذه المرحلة الحرجة. لأنو بيفتكر إنو اخوه الاصغر منو صادر محبة أمو منو.. وخاصة الطفل لما يولد يفتكر أن كل الوجود هذا ملكه، إلا شوية شوية لى قدام يعرف إنو بعض طلباتو مجابة وبعض طلباتو مرفوضة وان هنالك حقوق للآخرين غيره في هذه الدنيا يجب مراعاتها.

عـَـلـُـوُقْ: حبات عيش ومعاهن فوترن كسري تديهم الحمار من الصباح كعليقة أو فكة ريق أو وجبة، قبل أن يأكل القصب
بـَـطـّـَانْ: حبل يربط من عكفة السرج الأمامية ويدخل من تحت بطن الحمار ويربط في نفس العكفة الموازية عشان يثبت السرج على ظهر الحمار
الـسـَـدّ َارْ: غالباً يكون من الجلد في شكل حزام البنطلون يربط في وسط السرج تحت البردعة أو البردحة.ز ليزيد من أمان تثبيت السرج على ظهر الحمار
الضـَـنـّـَابْ: حبل أو سير يربط في العكفة الخلفية للسرج من جهة ويدخل تحت ضنب الحمار ويخرج من الناحية التانية ويربط على الجهة الموازية من العكفة الخلفية
عـَـكـَفـَـهْ: راس السرج الذي يمسك به الراكب على الحمار وشكله راسي شبه دائري أو اقرب للمثلث

الكـيــدَبانة : مصطلح من أعراب بادية المناصير
وهو حفرة في أرض ( صوح) غير ذات مسامات بالقرب من المساكن( رفف) العرب يملوها موية. يشرب منها ناس( الباشي) او ناس البكااا. تقوم مقام البرميل والأزيار زمان . عشان عدد الوليمة كبير ولا توجد في العتمور أزيار أو براميل زمان

أ ُم بــِـغـِـغ ْ: يعني شبعان للآخر..
اقول ليك يا زول قوم أكل معانا! تقول لى شبعان ام بغغ.. وممكن كمان يصاحبها هذه القولة غالباً حركة فعلية وهي، تبل أصبعك بي راس لسانك وتضعوا على تفاحة آدم في الحلق من الخارج! كناية على انك مليان حتى حلقك!.. وهي عبارة خاصة بالمناصير.. والبي يسمع كلمة أم بغغ هذه قبل ما يعرفها يقول دي طيرة! دي حيوان! دي شنو دي!
خاصة انتصار حجازي ونجلاء زمراوي ( ناس سعيت لى عز لفختني ! )واميرة الحومري!
أما اميرة علي بتعرفها وهي متربية في المناصير. وسلمان عقيد فايتي قعر اضانو بي غادي! وود حاج بي يعرفا تمام..

يــَـلـُـوبْ: اللوبة هي الدوار.. دوار الراس.. بفعل الحمى أو المرض.. وأيضاً تستعمل استعمال آخر عند المناصير قريب من هذا..
أي أن يقول لك( راسك لايب) اي طماع..أي عايز زيادة أكثر من حقك
ودي لقيناها من القامة محمد حبيب هبرم ذكرنا بيها

يــَـشــْـغـَـا: تقال للشئ لما يطفو على السطح وهو كمية من نوعه.. وغالباً ما تقال للسمك في زمن الدميرة والموية العكرة البي تعمي عيونو وتسدد خياشيمه التى يتنفس بها. أو شدة الانحدار مع المياه الجارفة الواردة من النيل الأزرق من الحبشة.التى تدع السمك يطفو على السطح. الظاهرة تعرف في المناصير ب( الحوت العفن) جاااا

السـَـلا َّلْ
أفرع شجرة البامية صغيرة مزروعة في الجرف.. أو الملوخية يسلوها من قعرا بدون حش أو اللوبيا الطيب، يطبخوها ملاح.. ويقول ليك( الليلي غدانا بي ملاح سـَـلا ّلْ) وما أطعم ملاح السلال لأنو مركزه فيهو القيمة الغذائية الكبيرة

من طرف **محاسن** الأربعاء 02 مايو 2012, 5:16 pm

تسلم ياهندسه
راجع (‏‎(Sudan100@live.com

تمام يا استاذة محاسن

الـمـَـجوجْ: فتح الميم.. ضمة مائلة على الجيم لاتكتب
وتستعمل في جملة
اقول ليك( ما تطول المجوج تعال بسرعة)
أو اقول ليك( ما تطول المجوج قول من الآخر)
زي ما بيقولوا المصريين ( على بلاطة)
يعني جيبو من الآخر
يقول ليك المناصير
ياخي قلت ليهو تعال سوق معانا الصيف في بابورنا.. غلبتو البوغة ويحفر لامن العيني فاتت وطوّل المجوج لامن سقينا العيني فاتتو بعدين عيشو ( كـَـرّ َقْ ) كلو
عيشو كـَـرّ َقْ.. يعني اصابته الدودي.. بالرغم من إنو القصبة المكرقي لما كنا أطفال فيها لينا فايدي ونفرح لما نلقاها. ونعرف شكلها من بره كان مكرقي والله عديلي. عشان بي نلقى فيها دودي غليدي نشرك بيها للطيور. وفي طيور تشرك ليها بالحبي.. في الشركة حبة المريق الغليدي. وفي طيور تاكل الدودي تشرك ليها بالدودي

من طرف **الفكى احمد** الجمعة 04 مايو 2012, 5:45 am

مَتوتل : مصفوف أو مرصوص فوق بعضه ..متوتل توتيل ، تعنى مرصوص رصا

أو مصفوف صفا صفا ...

يَهَجِر : بكسر الجيم تعنى يضغط أويضع ثقلا أو حملا

الهـَـيـَـدْ: زخة رزاز باردة مع قطرات الندى
هيد الجروف: لما الحريم ينزلن الصباح يحشن في الجرف. الجرف يكون بارد يحمل قطرات الندى على أوراقه مع نسمة الصباح في الجروف.
نكتة:-
منصورية جابوها العاصمة راجلا عامل مكيف في غرفة النوم، وكانت لاتعرف شئ عن التكييف.( مكيف مائي)
قالت: سجمنا هيد الجروف ده شنو!صـَـقـَـطِيـِـب.. صقطيب الأوضة!( كان ذلك في الستينات) هسي دي عرفن المكيفات..
....................
قال شاعر البادية المنصوري:-
ضاربي هيد ساني مع الخريف
ياحلاة القدلة في الزيف
فـَـرّ ُو شخب اللبن النضيف
فارقت دار ود ناس عـِريف

الـنـَـطـُعْ: تجلس عليه المرأة في حفرة الدخان
شرحه:-
مصنوع من السعف مثل المصلاية بتاعة السعف لكنه دائري بالكامل ومخروم في النص.. والنطع في اللغة العربية هو أيضاً فراش من القماش يوضع تحت الشخص المراد إعدامه بالسيف..
رأيت مائقيها فقالت هلم تفضلا.. ونادت بنطع وسيف ثم قالت ،تـَرَجّـَلا

من طرف **الفكى احمد** الأحد 06 مايو 2012, 3:23 am

يَجوجى : مفرده يوصف بها اللبس الواسع والطويل عن صاحبه أى أكبر من المقاس ...

مَفوشِش : تعنى غير مربوط بإحكام

الليلة يجوجي دي جبتها من وين يا الفكي
ضحكتني جنس ضحك
دائما ونحن صغار لما نلبس جلابية العيد بلا فش دابا جديدي تجوجي.. يقول ليك جلابيتك تجوجي

من طرف **الفكى احمد** الإثنين 07 مايو 2012, 6:55 am

الكَلكال : الكلكال بفتح الكاف الأولى والثانية ، هو شعيرات فى الغالب بنية اللون توجد فى أطراف سعف الدوم كان أهلنا سابقا

ينقعونها فى الماء حتى يصير لون الماء أحمرا وتقطر فى العيون لمن يعانون أمراض العيون ومرض الحسبة بصفة أخص ...

من طرف **amira ali** الإثنين 07 مايو 2012, 3:52 pm

طولنا من القاموس
_مبدول _مبدوله مبدل
بتسكين حرف الباء ليست بمعنى استبدال او تغيير انما بمعني شخص غبي
(انت الود ده مبدل اوو(o(
اوو كلمة تنطق كالحرف الانجليزي _o

مشاركة رائعة يا أميرة علي.. واستعانتك بالحرف الإنجليزي أوO
لشرح الكلمة أعطاها معناها مضبوط

من طرف **الفكى احمد** الإثنين 07 مايو 2012, 11:39 pm

البَهَم : يقصد بها صغار الماعز أو الضأن

يَردَح : مفردة تعنى مداومة فعل ما أوإستمراريته ردحا من الزمن مثال ، لايجب عليكم أن تردحوا فوق جرف الناس أو فوق طينهم .أى لا تكثروا من اللعب والحوامة فوق جرف الناس وطينهم . ومثال آخر الليلة البهم كان مطلوق يردح فوق أماتو للصباح ،يعنى كان يرضع طول الليل .وهذه المفردة تستعمل أيضا فى دول الخليج ....

من طرف **الفكى احمد** الإثنين 07 مايو 2012, 11:44 pm

ومن معانى كلمة يَردَح أيضا : كثرة الكلام عن شخص ما مثلا يقال : الناس اليومين ديل يردحوا فوق فلان ردح ...

عــَيـَـرْ: كبير.. واسع
عار: بترقيق الراء: اي انطلق من عقاله..
ولعل القرية العار الشهيرة في المناصير المقصود بها هذا الشئ.. أي ماردا انطلق من عقاله.. ولغة الترقيق والتفخيم تفرق في لهجة المناصير.. العار بتفخيم الراء تعني الفضيحة كما هي في اللغة العربية.. ونظرا للخلط بينهما فقد بدل المناصير اسم قرية العار الى العال( العال)
وإن كان قصد المنصوري القديم في تسميتها لاغبار عليه
فهي العار بالترقيق ترقيق الراء.. أي هذه القرية العظيمة التى انطلقت من عقالها في التنمية والاجتماعيات
...
وعار بالترقيق تطلق فقط عند المناصير للحمار الذي ينطلق من عقاله أو الحمارة
ولاتطلق لاي حيوان غيره
لانقول للجمل ولا للضان ولا لأي حيوان آخر عار..
( عايري ومدنها سوط!)

يـَـقـُـوْقـِـلْ: بتعطيش القاف الأولى والثانية.. يجلس ويستند كله على رجليه وصلبه مهوي من الارض..
والله نحن المناصير ما شاء الله لهجتنا. انا قايل كلمة( قوقل ) بتاع البحث بتاع الإنترنيت دي جايبنها مننا. يعني مسروقة من المناصير.. ما اصلو الناس اتعودوا يسرقوا مننا.. وفعلا مرات قوقل ده يقوقل بيك خمسة دقائق ما يفتح معاك..
...............................
البـُـقـُـلْ : بتعطيش القاف. تعني الحمو او الحرارة

-------

[ندعوك للتسجيل في المنتدى أو التعريف بنفسك لمعاينة هذا الرابط]

الـبـُـوُبــِــيــِـيْ : المركب
المركب ذات السواري والشراع
غير كدة لاتسمى بوبيي