قاموس المناصير اللغوي

تذكير بمساهمة فاتح الموضوع :

كل الأعضاء وغير الأعضاء يشتركوا فيهو.. أي واحد يجيب كلمة هنا ويشرحا.. ويبرهن عليها وهل هي كلمة محدودة في منطقة معينة في المناصير أم تستعملها المناصير كلها.. وإذا شك الناس في استعمال هذه الكلمة الحكم يكون زول كبير معمر من المناصير أو زولين كدة.. هذه نواه في إتجاه كتب يس مصطفى وأبو مصطفى
نبدأ باسم الله بكلمة
.............................. ويا ريت تكون الكلمة غير مشتركة مع جيرانا الرباطاب أو الشايقية.. وإذا اشتركت الكلمة يجب التوضيح


المنداجة: بفتح الميم وتسكين النون وفتح الدال وفتح الجيم.. تعني دكان متحرك على ظهر حمار بضاعتو في خرج ز
مكان الاستعمال:- كل أعراب بوادي المناصير، وتنتشر الكلمة في جهات البحر التي يرتادوها هؤلاء الأعراب.. زي بوني وبرتي والنعوفاب وبعض أجزاء من شري.. وعرب بوادي كبنة.. وعرب الجماميع.. ومنطقة عتمور الشرق حلة الكنيسي العرب في العمارين..هذه كلمة خالصة وخاصة بالمناصير وخاصة أعراب البوادي منهم
ومن مشتقات الكلمة:- يمندج.اي يسمسر ببضاعته هذه التي على ظهر حماره

سلام يا ابو حنه والشبكى عندنا اكانت راقدى واطا
يكوزم ويبوذ ومد قدومو كلها كنايه للزعل

حسن طيب مالك اليومين ديل مكوزم كدي ومحارب قاموسك ..
ليمونتك شايلي والله خلاص موسما إنتهى
والله يوم داك شهيتنا في القراصة وفقا لحيمات زي لحيمات السوق.. وجنبك صحن بصل ابيض مشقق وفيهو حريكة شطيطة وممصور عليهو ليمون
تصدق يا حسن ناس الغرب ديل زمان قبل المشاكل دي عندهم خريفات كدي صغيري صغيري لحما طاعم جنس طعوميي.. أنا مشيت بابنوسة.. والرهد.. والفولة والجنينة وارد متا.. ونيالا وزالنجي وكتم ومليط.. وجبل مرة.. زالنجي قعدت فيها 10 ايام منتهى الروعة عجبتني شديد.. صديقي كان مدير مدرسة زالنجي المتوسطة..كانت ايام منتهى الروعة.. عندو زوجتو بس تحمر وتدينا وتسلت وتدينا.. الطالبات نجحن في الدخول للثانوي كل واحدة جات شايلا ليها طبق مليان تفاح وبرتكان جبل مرة ابو صرة.. للمدير عمر صاحبي .. ناكل في الفواكه دي لامن رجعنا الخرطوم وجبنا منها معانا.. الغرب ده بس سحروهو يا حسن .كان جنة الله في الأرض زمان
اصلها ما عندها اختلاف عن خرفان المناصير . ما برضو عندهم الرعيي على الطبيعة والقش راقد. خرفانن ماهو الكبيري العويري ديك الفيها جعجري وسنام في رقبتا وكبيري وعويري كده وراسا ده ذاتو ما بيشبه راس الخروف. زي دي موجودة في البطانة. وقلب الجزيرة .. لحمها قوي.. وترعى العشر معظمها. ولحمها يوشل موية فوق النار.. ناسنا يقولك( خروف صعيد)

فهمنا يا حسون سبب الانقطاع
الشبكي كانت راقدي واطة عندكم؟

سـَـنـْـغـَانْ : يعني عشمان.. يعني حاري.. متأمل
وهي كلمة منصورية

أم بوبـَعـِـير: طائر أغبش صغير يتواجد تحت الحجار في منطقة المناصير ، صعب يقبض في الشركة، ولحمو مسيخ.. لم أشاهده في منطقة أخري غير المناصير

الـكـَمـْـــكامْ : حجارة صغيرة يجمعوها بالكونشبر ولها عدة استعمالات
1 تسد الفرقة بين الحجار في سقف القبر قبل أن يردم بالتراب
2 تجمع من البوغة وتوضع على الأماكن الضعيفة في الجدول الضكر.. تمنعه من أن ينقد
الجدول الضكر: يعني الجدول الرئيسي
3 في بوغة الصيف في البار توضع خلف ( التقنت)( التقنق) كميات من الكمكام.ز تثبت آخر حوض من جهة الجرف في بوغة البار..
البار: يعني الأرض البي تحت في السلوكة
الأرض السلوكة: يعني التي يطلعها البحر وكانت زمان الزراعة بالسلوكة في البار.. أما( اللشو) أو( الأشو) فيزرع فيه النخيل
اللَشـَوْ: ارض فوق السلوكة لايطلعها البحر في الدميرة العادية.. يزع فيها النخيل وتشرب بالنز..

الدنفريس وهو عبارة عن انواع مختلفة من باقى الاكل كسرة بيسليقة وقراصة بيدمعة وتقدم فى نهاية البواشى والاخ حيدر محمدسليمان قال هذه الكلمة جاية من الكلمة الانجليزية DIFFERENCE

ممكن يا محمد وشرحها ورد في القاموس من ابو مصطفى

ههههههههههههه والله يا ابو حنه زى ما قلت ليك الشبكى راقدى واطا وبعدين شايفك واقع فى بوقتك نقح براك وتسوى فى الكف وعوافى علييك وما عندك عوجى تب
ايضا كما زكرت الغرب بى خيراته وحتى الان لكن المشاكل تلفت كل شى
وحتى الان تجد الوجبا ت المدنكله والصينيه المقتيه بالبرتال (( الكبات )) واى امراه تجيد الطبخ تسمى ميرم كما توجد الحًكامات للغناء والشكر ولكن يمضى الزمان وتنقضى احداثه وتبقى الزكريات
كما ازكرك بان مدينه زالنجى ما زالت كما تركتها ويوجد بها الدكتور سليمان الماهل استاذ فى جامعه زالنجى وفى تواصل معى واكان معاى فى الجنينه لمده اسبوع قضينا اوقات ممتعه وسوف نحكى لك الكثير عن الغرب ولكن حتى نلتقى وبالمناسبه انت ما ناوى عوده قريب ولا شنو
ايضا اديك حاجه كدى تتمضمضبها لمن امشى واجيك
حدها النجرا = مقاسها النهائى
مع خالص ودى واحترامى

لـُـكْ: لزج
ودائماً تقال للطين... يقول ليك ده طين لـُـكْ

شـَـخـَـلـُـوُب: جزء من سبيطة النخيل المثمره، به عدد من حبات التمر..متراصة ومترابطة في الشخلوب تربطهم مع بعض وصلة وقطعة وسبلة من سبلات السبيطة المتعددة الشخاليب

شخلوب: كلمة مشتركة بين المناصير والشايقية

المـُـوشـِّـقْ : هو لحاء العبلوجي.. أو القصبة الحلويي الخضرااا..
تكون تاكل ليك في عبلوجي.. وتلحي بي خشمك في المشق.. أمك تكون شايلي قفتا بتاعة القش وماشي قدامك ،تقول ليك أعمل حسابك يا ولد الموشق ده لايجرحك في خشمك...
أما لحااا الأشجارلايقال له موشق في المناصير... الموشق لحاء القصب فقط!
شفتا لهجة المناصير دقيقة كيف!
صديق عبدالله علي أبوحنة
كبار الشخصيات









عدد المساهمات: 2012
نقاط: 7810
تاريخ التسجيل: 14/07/2010

الموضع جميل جدا ونشكر صاحب الفكره
عندى فويسيب لى وفى معزايا لبت صبيحه لمٌن فيهو خلنو ستا

واريد حلا لهذه الالغاز
(عمتى بت عابدى فى الجروف لابدى)
(براريق براريق من هنى لصعيد)

تشكر على الكليس على الاضافه
لكن هو وينو الهندسه لاخبر بجاى ولاخبر بهناك
الله يسهل طريقوا

أميرة...خبر بي جاي
..........
القامة على الكليس...تشكر يا زول على الإضافات الرائعة

عـَـكـْـرٌوتْ : سفيه.. مكار.. خبيث
كلمة مشتركة بين المناصير.. وأهل حماة في سوريا أي الحمويين.. وهنالك كثير من الكلمات المشتركة بينهم وبين المناصير في السودان
كلمة عكروت. يستخدمها بكثرة( علي ود الشونة) اي على خليفة وقد كان رئيس الغفر وشيخ الحرس لعمودية السلمات وكان ينطقها عندما يقبض واحداَ متلبساً في الجرم..
وكان ينطقها إبارهيم الشاعر
من شري
وكان ينطقها علي سلمان والد النزير على سلمان من شري
وكان ينطقها
سيد أحمد ود حسب الجابو من برتي
وكان ينطقها المادح ود حمودي من جهة كبنة
وكان ينطقها علي منصور التاجر..من الكاب
وكان ينطقها خليفة جنا ود خليفة. صاحب جزارة الكاب
وكان ينطقها ختم الفقير من الشامخية
وكان ينطقها عبد الله ود العجمي في شري لما يتأخر واحد بالليل سكران عايز يقطعوه الغرب..
وكان ينطقها محوماااد ود الخليفة ود أب شوال. جد سلمان عقيد
وكان ينطقها بابكووور ود أب دكاني من عرب ساني

يــَدود ِرْ: يدودر العصفور على الشركة.. أي يسكه وييضيق عليه الخناق من جميع الجهات إلا جهة الشركة حتى يقبض فيها
................
أو تطلق على زول عايز تغشوا.. أو تمهد ليهو لى حاجة معينة
يقول ليك( اليومين ديل الونسي عابكي.. موحومااد يدودر في عثمان على بت ناس علي. عشان ياخدا اي يعرسا..
أو لما أكشف خطتك أقول ليك... ( أيوااااااا أتاريك من قبيل تدودر في.. على الموضوع ده

ها هاها
الزعيم علي الكليس
يبدو أنو زي ما قال سلمان عقيد المنتدى سمعتو عمت الآفاق..
عشان كدة قال ليك خلي صديق يحكي ليكم الحلم..
هو ذاتو الزول ده فعلا ظاهر عليهو من ظرفاء المناصير
بالرغم من أننا في المتوسطة كنا ناس طنابير. لكن الواحد من جواهو يعتمل بالصدق والإخلاص والتدين. البلد كلها كانت في هذه الموجة..
أنا ذكائي مخلوط بالعاطفة يا علي.. عشان كدة عانيت كثيرا.. العاطفة تجرني جاي ومرة الفكر يجرني جاي..
ولو كنت جاف الفكر من العاطفة.. كان ممكن أرقى لمستويات اعلى من كدة..الحنية عطلتني كتير..لكن مع الحنية تجد عندي صرامة شديدة ولا اخلط الأوراق
يعني في صفات من صفات عمك عبد الله الحنوني
عملك عبد الله الحنوني في ليليات المديح في شري وفي عصمة وفي كبنة وفي الكاب.. في ليليات المديح يموع زي الفرصة..
وفي مواقف الضكرنة والشجاعة والرجالة اصلب من الحديد.ز يمكن في الشجاعة جبد المرحوم عمر أخوي أكثر مني ..
الوالد كان حينما لايقدر الناس على مقابلة جنايز البحر كان يتولى هو هذه المهمة..
حينما لايقوى الناس على دخيل الجنايز في القبر كان هو يقوى على ذلك.
في الصهاب والشدائد والناس متشاكلين سكرانين دمهم يمشي والعكاز يسوي يا ليل وطعن وسكاكين كان يدخل وسط المتشاكلين السكرانين وهو حاج بيت الله مرات ويقيم الليل وينفق في سبيل الله.
الوالد كان يقوى أن يصمد امام كل مستقبح
............
أنتم يا علي صمدتم على عيوب أهلكم برضو . أي الذين تصدوا للقضية
..........زز
علي عليك الله خلي أحد هؤلاء الظرفاء يديك كلمات هنا جيبا لينا لهذا القاموس

منوفلي هنالك فرق بين يضاضي وينالق
ينالق بتاعتك دي ..
مثلا لما الحمار دون مواخذه يكون مربوط في المدور.. بي حبلو إنت جدعت ليهو حزمة القش بعيدي منو وماهو قادر يحصلا.. ينالق عليها والحبل حاميو
............زز
أو مثلا تحب ليك بت في الحلي الجنبكم وخلاص عايز تخطب.. كل يوم تنالق على الحلي والناس يقطعوا فيك خاصة الحريم الجايات المغيرب من الجرف شايلات عشاء غنمهن في قفافن وطالعات على الحلي.. شايفاتنك محدر طاقيتك وكاوي جلابيتك وجاي تشرب شاي المغرب.مع أهل الحبيبة. جاي من حلتك على حلة أهل الخطيبة.. تنالق
وبعدين تنالق الحمارة لما تكون فاردي وإنت مشيت بيها بكا ءوهي فاردي جناها خليتو هناك مربوط لأنو ما بيقدر يمشي المشوار الطويل عشان كدة ربطتوا جناها في حلتكم ومشيت بيها باشي بعيدي. هنا يقال لهذه الحمارة تنالق
يضاضي يا منوفلي تختلف شوية
زول كراعو طاعناهو فيها شوكي.. ممكن تقول عليهو يضاضي
تنالق برضو لمان تشرك الشركة للعلج وللطيور البي تاكل الدودي ولا تاكل الحبي
هناك الشريييك للطيور نوعين يا شباب الخرطوم
شريييك بالشركة بالحبي للطيور البي تاكل الحبي
وشريك بالدودي دودة قصب المريق..
يقول ليك القصبة دي
مكرِّقـِي.. اي مدودي
أها.. الدودي تربطا من طريفا بي خيت.. وتخليها تنالق في الشركة المدفونة ..تنالق عشان العلج يشوفا.. أوعك تفقع الدودي في الشريييك دودتك لازم تخليها تنالق..
هذا معنة تنالق يا منوفلي
إفتكر وضح الفرق بين( ينالق) و( يضاضي)

بس خلاص يا علي.. ديل كلمات طاعمات
بالذات: يلكع.. بتشديد وكسر الكاف..
الطفل يقول ليك .. والله هسي دي ألكعك طين.. الطين الربروبي داك
أو اقول ليك لعكت جلابيتي دمعة من دمعة الباشي دي!

نعم ( ديبا) طريقة غناء معروفة
دي زماااان ديبا دي.. قبل تظهر الحفلات وتختلط الأوراق في الغناء مع الشايقية..كان عندنا خصوصياتنا في المسميات

ود برتي
إضافات جيدة من واقعنا
تشكر على المرور بي جاي

بسم الله الرحمن الرحيم وبه نستعين
اولا رمضان كريم وكل عام والجميع بالف خير
لاخوتى واخواتى من عيال منصور كل الود والاحترام والاعتزار لهذه الفتره التى انقطعت فيها وليس لى يد فيها ولكن السبب هى شبكه سودانى التى لم تمكننى من المواصله والتواصل والمشاركه معكم فى هذا الكمنتدى الرائع
ثانياً : الاخ صديق ابوحنه معزره بانى اقتحمت هذه النافذه لكى اسلم على الجميع من خلالها ولا لشى الا بانى احببت هذه النافذه واعلم بانها من النوافذ المقرؤه والمحبوبه للجميع واردت ان اطل عبرها لكى وفى البدء ان اعزى كل من فقد عزيز عليه واخص بالتعازى اسره صديقى ودفعتى عمر الفضل والذى عرفته رجلا اخو اخوان ورجاله منو يقسموها اللهم تقبله وانزله منزله الشهداء والصديقين كما اعزى كل الشرايه وفاه شباب الحادث الاليم كما اعزى فى وفاه الاستاذ محمد الحسن عون الله واعزى فى استشهاد محمد عمر السادى والحمراء وطكل الذين انتقلوا الى الرفيق الاعلى
ايضاً ابارك لكل من تزوج او نجح او انجب مولودا واخص الدفقعه اميره على كما ارحب بقدوم كل الطيور المهاجره وسفراء عيال منصور فى الخارج من الحضره النفر وودالبروى ومصباح وكل القادمين الى الوطن لقضاء الاجازه
ايضا وبى تعريجه صغيره كدى اقول ليك انا محضر ليك حاجات تنبسط منها وحا اعزبك عزاب يا ابوحنه بس خلينى استف رمضان دا واجيهو ليك جيهى شديدى وايضا بى هناك فى المنتدى الرياضى يا خال ابرار ارجا الراجيك مع السكوهه انت وجماعتك
كما ارحب بكل من انضم لهذه الكوكبه من المنتدى المنصورى الرائع
ايضا كل الود والاحترام لقادتنا فى المنتندى ابتداءا من الريس خالد عابدين وسلمان والحاج وانتصار خال ابرار ويس مصطفى والطيب محمد عبدالرحيم ونشد من ازركم والى الامام وعين الله ترعاكم
مع خالص ودى واحترامى للجميع

ياه
حسون ياخي ليك وحشة .. فقدناك في القاموس فقد شديد.. حمدله على سلامة الشوفة
وإنت ياخي تبارك وتعزي محل ما يعجبك..
بس شد حيلك على رمضان اوع يجيهك.. بدل ما تجيهو..
افطر وتعال ونحن راجنك.. وياريت يسمع الناس ويقروا تهانيك ليهم وتعازيك هنا يا زعيم.. شوق اسكت خليهو ساكت
نوع الكعب داك؟

والله يا زعامه ليك شوق شديد وكيفك والاسره الكريمه وانشاء ماعندك عوجى وانا مره كدى ضرب لى صاحبى على الحمود وقال لى انت فى الخرطوم هل الكلام دا صحيح وبعدين زى ما قلت ليك هنا فى الغرب رمضان عباره عن هدايا مجانيه لان الموسم خريف والامطار ماشاء الله تبارك الله عينك ماتشوف الشمس طول اليوم مع هطول للامطار متواصل وجو خريفى بديع ورمضان اصغر زول يمكن يجيهو تب
ايضا يمكن يمكن الناس تطل على هذه المساهمه المتواضعه المتاخره للتعازى والتبريكات
انت دحين مسعول من الخير ( نطران ) دى وردت فى القاموس عموما تعنى زول ولا بهيمه عندها بطن واسهال زى المهيبت كدى
ودى واحترامى

الاخ الكريم

حسن سليمان



عوداً حميداً للمنتدى

افتقدنا قلمك بيننا



ورمضان كريم

وربنا يقدرنا جميعاً على اعطاء هذا الشهر الكريم حقه كما يجب



والحمد لله ان الاجواء الرمضانية عندكم تمام

نطران وردت في القاموس يا حسن.ز لكن عشان ما نلعوز الناس في وردت والله ما وردت، قلنا بس الزول اي حاجة تجيه في راسو يقولا.. لسه مرحلة الغربلة ما جات..
بعدين الكلمات التي ذكرتها اميرة الحومري ما وردت
.........ز

1. سلامات وتحيات للجميع وللطيور المهاجره وانشاء الله عودا حميدا مستطابا
   ويا ابو حنه حلتك ما زالت مدنكله تب وما انطبجت (ولا شنو يااميره )وقايتو مسوين حُمد ديره جنبها وراجين نجاضا ( وشمُوما )
   وبعدين نديكم الغلوتيى دى
   الفرق بين/ يقرضم / يقرمض/ يرضرض/ رضاف / يقرًض / يضرضر/قِحف

[i]

حسن.. اشرحا لينا.. والله انتظر الناس يشرحوها.
خالد عابدين قال
فللي: وهي الجري بسرعة وتشترك معانا فيها بعض القبائل..

القامة صديق عبدالله الرجاء فك هذه الطلاسم التراثية من هذه القصيدة وشاهد اوجه الشبه بين المناصير والشوايقة القصيدة للشاعر محمد حسن أحمد نشرت فى فبرائر عام 86 ولك منى فائق الشكر .

اخوى نور الهادى سلام

انت متاكد انو القصيده دى كلها بالعربى

يعنى ما فى رطانه

والله فى كلمات قريتا ذى شفع الروضه

غلبتنى عديل اما الفهم خليهو ساكت

ويا ود ابحنه حصلنا

تقبل مرورى

والله يا نور الهادي ابدعت في اللغة واستولدتها استيلاداً.. وما ببوست الغربة بتاعتك.. تجارب أم مآسي ببعيد.. روعة الروعة
..............................................................
نجي لى قاموسنا
الرهوفي:- فطير القمح باللبن والسمن والسكر.. عواسته رهيفة لذلك سمي بالرهوفي
دي مسروقة من بوست الرهوفي لدكتور مصباح

والله لكن يا عمر.. حاجة في منتهي الروعة إضافاتك دي.. اسكت جيب اي حاجة لسه ما فرزنا العيش من الشراا.ز دابنا ندق في القندول .. اسكت قدر ما تلقى ليك قندولة جيبا هنا ولاتتردد كان وردت والله ما وردت .. بعدين بي نفرزا

بعد التحيه أهلي :الدقه : الكسبره المحروقه كماالبن وتسحن .....المسح :وهو المويه التي تعقب البوغه ...........الرقيطي : وهو نوع من التربه يضاف للزباله ليضفي عليها اللزوجه ..............إني :بتشديد النون تعني ليست علي الوجه الامثل ,,,وخاتي القول ...أي مكتمل الجوانب ..........

ها ها ها
حسن سليمان.
امسك نفسك الدنيا رمضان..
علم الحكومة تعمل ليك الرهوفي؟ بس وين تلقا ليك قمح مناصير احمر دقاق زي المحلب.. غرق في البحيرة. في قاعها