قاموس المناصير اللغوي

تذكير بمساهمة فاتح الموضوع :

كل الأعضاء وغير الأعضاء يشتركوا فيهو.. أي واحد يجيب كلمة هنا ويشرحا.. ويبرهن عليها وهل هي كلمة محدودة في منطقة معينة في المناصير أم تستعملها المناصير كلها.. وإذا شك الناس في استعمال هذه الكلمة الحكم يكون زول كبير معمر من المناصير أو زولين كدة.. هذه نواه في إتجاه كتب يس مصطفى وأبو مصطفى
نبدأ باسم الله بكلمة
.............................. ويا ريت تكون الكلمة غير مشتركة مع جيرانا الرباطاب أو الشايقية.. وإذا اشتركت الكلمة يجب التوضيح

المنداجة: بفتح الميم وتسكين النون وفتح الدال وفتح الجيم.. تعني دكان متحرك على ظهر حمار بضاعتو في خرج ز
مكان الاستعمال:- كل أعراب بوادي المناصير، وتنتشر الكلمة في جهات البحر التي يرتادوها هؤلاء الأعراب.. زي بوني وبرتي والنعوفاب وبعض أجزاء من شري.. وعرب بوادي كبنة.. وعرب الجماميع.. ومنطقة عتمور الشرق حلة الكنيسي العرب في العمارين..هذه كلمة خالصة وخاصة بالمناصير وخاصة أعراب البوادي منهم
ومن مشتقات الكلمة:- يمندج.اي يسمسر ببضاعته هذه التي على ظهر حماره

من طرف **amira ali** الجمعة 26 أغسطس 2011, 1:29 am

اياك جبوريه او سهومه تقال الكلمتان
للشخص الغبى
يتداولها كبار السن

أميرة على.. عاد ما قصرت.. اضافت..

يـَلـَـحـْـفـِـضْ:
يبعثر الأكل على صدره.. وغالباً تحصل عند كبار السن.. أو الأطفال لما أمهم تلقمهم الأكل..
هي يرمي الأكل مع دفرة لسان لباقي اللقمة المتلحفضة على الصدر..
وايضاً تقال للحمار.. ويكون لايزال في فمه باقي أكل، وعايز يشرب في المشرع.ز أول حاجة يلحفض الأكل الفي خشمو .. بعدين يبدأ يشرب.. وهي عادة معروفة عند الحمير دون مواخذه..
هى كلمة منصورية خالصة الصنع

يـَـطـْـهـَـمْ: ينده أو ينبه أو ينادي من وسط مجموعة ولكن بهمس أو بإشارة..
والتمثيل لها في لهجتنا:-
( يا ولد كدي أطهم لى ابوك من وسط الرجال، عشان يديني عانة الحريم عشان أدفعا)
يلاحظ أنه في الفرح أو الباشي هنالك عانتين
عانة يدفعها الرجل وتسجل في الكشف
وعانة تدفعها المرأة لصاحبة الملم، ودي تكون غماتي تحت تحت بلا كشف حريمي
شايفين نحن نتكاتف كيف في السراء والضراء..
موش المرة خلاص تقولي راجلي دفع أنا تاني ما بدفع؟؟!!

يـَـطـْـهـَـمْ: ينده أو ينبه أو ينادي من وسط مجموعة ولكن بهمس أو بإشارة..
والتمثيل لها في لهجتنا:-
( يا ولد كدي أطهم لى ابوك من وسط الرجال، عشان يديني عانة الحريم عشان أدفعا)
يلاحظ أنه في الفرح أو الباشي هنالك عانتين
عانة يدفعها الرجل وتسجل في الكشف
وعانة تدفعها المرأة لصاحبة الملم، ودي تكون غماتي تحت تحت بلا كشف حريمي
شايفين نحن نتكاتف كيف في السراء والضراء..
موش المرة خلاص تقولي راجلي دفع أنا تاني ما بدفع؟؟!!

مـَـلاجْ:... ملجأ... وسند.... وعون ... (هو صاح الرجل المنصوري له مكانتو وليهو وضعو واحترامو عندهن
لكن هن شيالات التقيلة شديد عشان كدة الرجل المنصوري القديم مقتنع عملياً إنو ما عندو ملاج غير مرتو .)

من طرف **HASSAN SULIMAN** الثلاثاء 30 أغسطس 2011, 10:10 pm

كل عام والزعيم وضيفوا الفى ديوانو بالف خير

يبعزق / يمحق/ تعنى بدون ترشيد

حسن أوع تبعزق ماهيتك ساكت!!
مبروك عليك العيد يازول.. ابقى عشرة على صحبة سليمان ود نصر الدين وحاج عبد الله الحنوني..

الـكـَـلـْبـَـانْ: عودين مخلوفات ومربوطات بي حبل.. يستعملوا زي الشعبة.. أو ربطة بين عودين في شكل زاوية قائمة وقد يكون تحتهم مسند أولا..
..............
مرة راكبين قطر كريمة، جايين المدرسة المتوسطة في ابوحمد.. معنا العامل سليمان .. من شري والد ناس غلام العامل.. والركوب طبعاً درجة رابعة..
العامل قال: ( فتشوا لى الكلبان بي وين ياجماعة أنا لولقيت أقعد في الكلبان زي كأني قعدت في قمرة في القطر.. وهو يقصد يقعد في الكنبة ركن من جهة شباك عربية القطر وضهرو مسنود على جهتين من الخلف الكنبة ومن اليمين أو الشمال جسم عربية القطر.. وكدة يقدر نوم وهو قاعد، ويقدر يبزق السعوط والسفة بالشباك، ويقدر يمصمص بالشباك، ويقدر يعاين.. وقد شبه هذه الحتة بالكلبان..

مزغول: غير أصلي

أ لـْـوَتْ: تصعب معالجته
زول ألوت: يعني يهبر الكلام.. مشاتر.. شديد العوارة والحماقة

البعامي: هي النعامي... أو النعامة..
وعادة قلب الحروف عادة قديمة موجوده حتى بين لهجات أهل اللغة العربية في جزيرتهم

نـَـصـْـلـِي: أي غير ثابتة في عودها ومتحركة لاتصلح للنقح
و في لهجة المناصير تقال للطورية وللفاس وللسكين..
............
ينقح: اي يحفر الحفر للزراعة إستعداداً لرمي البذور فيها..

قديح الجور: قوز قزح
وأحياناً يطلق على الشيمة والتيار الملتوي للمياه في لجة النيل

من طرف **ود المناصير** الخميس 08 سبتمبر 2011, 9:21 pm

آه ... تبنا وفتشنا في كل المنتدى عشان نلقى مكان بااارد وهواه سمح وجنوبو هابي ما ليقنا

قلنا نشيل جراحنا وهمنا ونمشي نشكي لعمنا ود ابو حنة وناخد رقدة في ديوانو داك البارز وباين

مشينا في شمشا تصر العين ... تقلي الحبة .. و سكة عمي ..درب يا كافي البلا لا زول لا غنماي لا دهلمي ولاهمبول يقابلنا ؟

ولما نزلنا من العقبة في اول الحلي لقينا جوطة وحجي ... شنو يا جنوي .. قالوا قبضنا وزيني بكداريكا ..وحشكناها في الترعة وما قدرت تطير او الكداريك تغطس لامن لمينا فيها وجنحناها

ولكن الترعة فيها سمك ولما فجكنا ليهو وكاوشنا بالطرقي والتوب والكواشة ام جريد محجوب ضربتو ام جرق وقمنا جارين شايلنها في حنكاتنا جري شديد

والترعة وين قالو عن حجر القاريق ..ودا الحجر الفي البحر لما يمرق الناس يزرعو لوبا طيب وعفن وتاني ما في خوف عليهو من مشي البحر

المهم واصلنا ... لامن وصلنا الديوان .. لقينا الجراري مليانة تنقط ومغطية والشربوق فوقا من فوق

شربنا وبردنا ودخلنا لا داخل

السراير مفرشة وكل حاجي جاهزي حتى المصلاي والابريق.. جنس نضافة جنس هدوء جنس كرم حسيناهو قبل الزول يجينا

ولما جا عمنا صيق كانت الحلي كلها تنصابق برادي وبرادك جبنتي وجبنتك .. وحرم إلا تشرب ... وعلي الطلاق إلا تطبق .. وليه ما تضوق شاينا

ويا زول حرم ما تقول حاجة

وهاك يا ونسي وكلام سمح علم وادب ودوبيت وعلاج وكورة وزراعة وبحر وتمر وشدر برم وعلف سنط والقرض وفايدتو والعلاج

وعرس .. وكما دبيل حريم يعني حاجة تخوف كدا

ولما جا الغدا .. كل الديوان صواني مغطة بالكبابيت وبي الطبقية وصحاني تنشابه بس في انها ملياني حدها النشرا

اكل طاعم .. وحلو .. وبرضو الحليفي والطلاقات شوف دا وزح داك

اصلو عمنا ساقتو كبيري ومعاه مزارعين كلهم صمدا ما فيهم زول اضينة ساكت .. عشان كدا الحلي كلها زول واحد وجسم احد

وحلفو الناس قالو السنة دي القمح الجابو يكفي البلد كلها

نورق على تلاتة مراحل

ولسع في واحد مصوبر في التقا

والقيساب حزمو كبار ينشاف من اول الحلي

يا زول جيب دقاقة كتلت الحمير بالنوريق والحريم بالضريي والنضيف والشفع بالسياقي يومن كلو ورا حمير النوريق

قال ان شاء الله النيي في وبجيبا دقاقا يابانية ومن ابو ظبي كمان لكل البلد

وبعد داك قمنا شكينا لي عمنا

يا عمنا .. شنو الحصل في البلد .. اي زول جاي توش خاشي بقول داك عمل وداك فعلتو وداك تركتو ؟

شنو الحكاي ؟ متين نبقى واحد زيكن كدي وكلامنا يبقى واحد ؟

زمان والله الراجل ولي امر الحلة كلها

اسع اخوك يعاين ليك بطرف عينو

الحل شنو

والعمل شنو

ونسوي شنو

قال كلام واضح ..

بيضو النية ... وامسكو حبل الله قوي .. وخلو ثقتكم في اخوانكم قوية .. وسيبو الظن الكعب .. بعدين اعذرو بعضكن لان السنة قالت اكتر من سبعين عذر

واهم حاجي بياض النية .. النية السوداء تودر سيدا

وكمان شوفو انتو دايرين شنو ؟ ابدوا فيه ..

يعني الكوراك ما بينفع ..

العمل بس ابدوهو وربنا يتمو ان شاء الله

لك الله يا رائع ود ابو حنة وانت تتحفنا في كلامنا وثقافتنا وحتى في أحلامنا

شكرا يا راقي

جميل ود المناصير
الصور جميله والسرد جميل والمضمون اجمل

بياض النيه اهم شئ
كما اتحفتا القاموس بكلماتك الحمراء

من طرف **ود المناصير** الجمعة 09 سبتمبر 2011, 3:20 am

هويدا ابوشعر كتب:جميل ود المناصير
الصور جميله والسرد جميل والمضمون اجمل

بياض النيه اهم شئ
كما اتحفتا القاموس بكلماتك الحمراء

شكرا استاذتنا الجليلة هويدا ... وكل سنة وانت طيبة والأسرة بخير

واظن ما في أفضل وأجمل من ديوان ابو حنة دا عشان نقول ليك

صافية لبن

والعفو والعافية

الدنيا زايلة

من طرف **amira ali** الجمعة 09 سبتمبر 2011, 8:20 pm

ود المناصير لعلك قيلت في ديوان اب حنه الرائع الذي يتدفق كرما ورميت هموم الدنيا ووجع الزمن للحظه
كل سنه وانت طيب
وربنا يزيدك ابداعا وتالقا
ارجو ان يتحلى ويقتدى الجميع بروح التسامح والتواضع وطيبة القلب
التى تتجسد فيك ايها الرائع ود المناصير
[ندعوك للتسجيل في المنتدى أو التعريف بنفسك لمعاينة هذه الصورة]

بعد الراحه لا بد من تشيل سوق النعوفاب
تشيل او شيل يعنى امشى -يذهب

من طرف **هويدا ابوشعر** السبت 10 سبتمبر 2011, 1:52 am

فعلا ما فى اجمل من ديوان ابحنة فى هذا المنتدى
وسبق ان ذكرت هو الهدف الفعلى والجميل للمنتدى الذى يوثق حياة المناصير الاجتماعيه والثقافية والاقتصاديه من خلال هذه الكلمات الخاصة بنا كمناصير وهو يجمعنا حيث تفرقنا السياسه وما ابغض السياسه.
وكنا نتمنى ان يجتهد اخوتنا فى توثيق خريطة وقرى المناصير وبذلك نستطيع ان نقول ان للمنتدى اهداف توثق للمناصير بجانب الخدمات الاجتماعيه الجليله التى يقدمها المنتدى.
وكل سنة وانت طيب اخونا ود المناصير
وندعو الله ان يجتمع اهلنا على كلمة الحق

أميرة علي..وهويدا.. وود المناصير، اثروا البوست هنا
وفعلا الثلاثة ديل قامات كل في مجاله
الله يزيدكن يا بنات
والله يزيدك الشهم ود المناصير
فكرتك رائعة للحد البعيد يا ود المناصير.. وحقو يكون ديدن في المنتدى
زي ما الناس ينقدوا الشئ الكعب بحسن نيه
كمان يشكروا الشئ السمح ويدوه حقو
فكرتك في أن تدخل الكلمات المنصورية في قطعة أدبية رائعة المستوى.. أو يوم حياتي من حياة المناصير.. فعلا يدي الكلمات طعم
انا كنت أستعين بالشرح بجمل.. ولكن بنص كبير راقي زي ده؟ ما حصلت منى ولامن اي أحد في أعضاء المنتدى، وهذا إن دل على شئ إنما يدل على تفردك وذاتيك وفرديتك في محبة وقضية أهلك..
ولكن أنت هنا أدخلت نظاما في قمة الرقي وهو قطعة أدبية شعبية
نور الهادي عقيد قبل كدة ادخل قطعة شعرية .. قصيدة شوايقة شعر..
وأنت هنا أدخلت شيتاً منصوري خالص... في شكل نثر رائع وجميل العذوبة وحلو المذاق
والحمدلله الجيت ياجنا قيلت في ديوانا هنا..
أبهجتنا جدا
كما ابهجتنا مداخلات الأخوات الكريمات جداً أميرة علي وهويدا..

من طرف **ود المناصير** السبت 10 سبتمبر 2011, 7:53 pm

استميحك عذرا باشمهندس صديق ... ونحن لا زلنا في ديوانك العامر

وأقول للأميرات الرائعات ... أميرة علي .. ام عمار ... شكرا لك فإنت احد مفاخر المنتدى وكل بلادي

وهويدا ابو شعر ... شكرا لك فأنت أحد عقول بلادي

وبكن يزداد الإنسان زهوا وفخرا وفرحا

مع شكري وخالص تقديري

من طرف **ود المناصير** السبت 10 سبتمبر 2011, 8:03 pm

الباشمهندس الرائع صديق ود ابو حنة ... سلام ... فمنك تعلمنا كيف نكتب وكيف نراجع ونتراجع نعتذر ونأسف لأخطائنا

تعلمنا فن الصياغة وسرد الكتابة ..

من يكون معكم ولا يتعلم يا باشمهندس يكون قد فرط في وقت ثمين وفاته خير كثير

اما أنا ... من هناك ...

حيث ملاح الكالبيق ... والسبروق .. والكتان ... ولسان الطير .. والجبركولة

و ... الهاجمري ... ودا الما بيدوهو الكري

لذلك عندي بعض الإضافات

إن شاء الله نلقى الفاقة

وعذرا باشمهندس

لاحظت ان هناك بعض الفروقات في نطق بعض الكلمات بين ناس فوق ( إن صحت التسمية ) وناس الجزاير

زي كلمة ... النافحيتي

عندهم تنطق

المافحيتي

لك شكري وجايك راجع

[ quote] بعد الراحه لا بد من تشيل سوق النعوفاب
تشيل او شيل يعنى امشى -يذهب.
][/quote]

النافحيتي.. أو النافعيتي.. برضو ناسنا يا الرائع عندهم ليها نطقين.. وناس لاتحت وناس لافوق مافي إختلاف كتير يذكر.. إلا في جر التاء المربوطة الأخيرة..كلنا نجرها زي الشايقية..لكن هناك جرة طويلة وجرة قصيرة.. وجرة تشبه الشايقية في الميلان المنحرف في آخر الكلمة.. أنا قبل كدة في هذه الاختلافات الطفيفة جدا قسمت المناصير لثلاثة أجزاء مع ضمان الوحدة طبعاً... الله لايقسمنا ابداً.. لكن دي اخلافات صغيييرة نرصدها للتأريخ الدقيق..
ناس الجزاير لغاية سور.. ميلانهم واحد في النطق في آخر الكلمة
بعدين من مشارف سور وحتى مشارف الكاب دي وحدة ثانية.. بعض المناصير في هذه الجهات يضيفون بعد آخر الكلمة كلمة ( أو) أو( يو) مندلي يو..
بعدين من الكاب وحتى حدود الرباطاب دي وحدة ثالثة.. والتلات وحدات مهمات في سبحة المناصير المعقودة..زي التسبيحات والتكبيرات والتحميدات.. يربطهم خيط سبحة واحد..
الآن في التهجير انقطع خيط السبحي وانتثرت حبوب السبحي
محاولين نعمل خيط ونشك فيهو حبات السبحي من جديد على النمط القديم الجديد، بصورة تجمع القبيلة الواحدة الشوية

من طرف **عادل شرري** الثلاثاء 13 سبتمبر 2011, 3:34 am

واصلوا يارايعين

ودابوحنة وود المناصير

دمتم

مدومس: حالة شبه النعاس يرافقها كسل.. كلمة مشتركة بين المناصير والشايقية والرباطاب..ولكن هي لهجتنا

يكوكر: يربط

من طرف **amira ali** الإثنين 19 سبتمبر 2011, 4:00 am

تعلقت جدا بحبوبتى لابى (سليمة الفحيلى)منذ صغرى فحفظت قصصها واحاجيها وحتى اغانى زمنها فكل ما اتذكر مصطلح من مصطلحاتها
اهرع لقاموس المناصير للرائع ابحنة فكانت تحكى لنا عن البرام والكشنة والملمات زمان
البرام تعنى القدور الحلل اعتقد انها من الفخار

شكرا أختنا أميرة على ....علَى الإضافات
والله ياما جبتي عزيز.. فعلاً البرمة.. وجمعها برام.. وهي كما ذكرتي من الطين، نسيناها تماما والله..
دايماً العمل البي تكتر فيهو الأيادي بيكون تام
والكشنة البصلة المحمرة وريحتها لمان تفوح..
ما بتسمعي واحد يقول لى واحد( تعال لى بي جاي.. عشان أوريك المكشن بلا بصل؟؟؟) يعني عايز يدقو

بَـعـَـجـِيْ: طائر البجعة
يبعلج: يشرط أو يقد
اللقبة انبعجت: اي محبس الحوض الترابي إتقدا
يبعج كرش الخروف: اي يشرطها ويقدها

[size=18]

كيفنكم أعلكم عافى بحمد الله رجعنا أخيرا لمنتدانا الذى كم إفتقدناه وبالخصوص ركن قاموس المناصير المضمخ بعبق التراث ولسان

التخاطب الذى ساد ردحا من الدهور. وقد بدأت بعض مفرداته وألفاظه بالإندثار والإنحسار عليه نأمل أن يلم المنتدى ويوثق ما أمكن ذلك

ومعذرة إذا تكررت بعض المفردات بسبب إنقطاعى وعدم مواكبتى طيلة السبعة أشهر الماضية ..وزى ماذكر ودأبحنه بعدين جايى غربلة

الهيريتى : هى السوسه التى تفسد الحبوب ... متمحن أو محنان : تقال لمن يحتار ولا يدرىمايقول أو يفعل حيال أمر ما .. يقهم : القاف يمنيه ، تعنى يربك أو يفاجىء

الفكي رجع للقاموس ابشروا بالإضافات الطاعمي..

مـُدْوَرْ:مربط الحمير.. أو الغنم والنعاج

من طرف **الفكى احمد** الخميس 22 سبتمبر 2011, 2:04 am

البَرتود : هو القُرنفل

يَجغَم : يرتشف أو يشرب جُرعة ...جُغمَة :رشفة أو جرعة

الفسفوس :الخبر أو السر المكتوم .... فسفوسك طلع ، تعنى خبرك فشا

من طرف **HASSAN SULIMAN** الجمعة 23 سبتمبر 2011, 2:46 am

الفكى احمد حمدلله على السلامه وعودا حميدا

وكل اهل المنتدى والاحباب وشايف ديوانك عامر يا هندسه عناقريبو وتقروقتو مفرشات
ومنور بى القلم الكارب ود المناصير والامورات بنات المناصير ابو قلبا حار
وشايف لسع (( تسفنج )) او تكروش فى الكلمات وما قضيت لسع

من طرف **الفكى احمد** الجمعة 23 سبتمبر 2011, 7:03 am

لك سلامى وخالص تحياتى أخى حسن سليمان والله يسلمك من كل سوء

وهاكم بعض المفردات:ـ

يهوش : ينفعل أو يطرب أشد الطرب ويقال فى ذلك { جاتو الشعره}ا

يمت :بكسر الميم تعنى يجم الماء مثلا وينبع ولكن ببطء. وتعنى بالفصحى ، ينتمى

الجَمام :بتشديد الميم ، هو المكان الذى يجم الماء أى ينبع فيه ويتجمع

صُوح :صلد أو قوى ، يقال للحجر صُوح أى صلب ولا مسام فيه

من طرف **الفكى احمد** السبت 24 سبتمبر 2011, 3:51 am

يلغلغ : من اللغو ، يتكلم بكلام لامعنى له ولا طائل

يكدُم : يعض

لكَدَ الشىء : أى لمسه أو {دقشه أو هبشه} والفعل ، يلكد بكسر الكاف

من طرف **ود المناصير** السبت 24 سبتمبر 2011, 6:19 am

يدولق : لقيط قرون اللوبا

يدولق.. يا ود المناصير .. اضيف ليها الدخن برضو.ز يدولق
وأحياناً الدخن نستعمل لها مفردة خاص وهي( يـَكُشْ)

أما قطع قندولة الذرة لانقول لها يكش.. أو يدولق..
نقول لها ( يـَهـَـبـِرْ)
ونقول ( الهـَبـِرْ) الحريم راحن الهبر.. وهنا طوالي حتى الطفل في المناصير يفهم مكان الهبر هو قطع قندول الذرة في موسم الصيف؟ وليس الدخن ولا اللوبيا..
شفتا الدقة دي كيف في لهجتنا؟
المهمة واحدة ولكن اللغة تختلف في المخاطبة ، عشان يسهل للمستمع أو المتلقي الأوامر، يفهم بسرعة ويحدد مكان الهبر.. ومكان الدوليق.ز لأنو مرات تجد العمل مشترك هنا وهنا في نفس الزمن..
عشان كدة يحدد المرسال دقة المكان.. عشان جايز محل الهبر يكون خمسين كيلو من الشخص المارد به الذهاب اليهن.. ومحل الدوليق والكش يكون كيلو واحد؟
عشان كدة لو ادوهو فطور يشيلو فوق الحمارة ويقولوا ليهو ودي الفطور ده للحريم البي يهبرن.. طوالي يكون هو عارف ويتوجه الى حيث مرساله بدون ما يغلط

من طرف **amira ali** السبت 24 سبتمبر 2011, 5:39 pm

برضو يقولو الحريم راحن (الكدادا)بضم الكاف وهى نظافة نبات الذرة
من الحشائش المتطفلة خاصة النجيلة
والله يعين الحريم زمان(كين)كما وردت فى قصيدة غمر الدمرى تعنى لحظة اوساعة

تمام يا أم عمار
الكـُداَدْ.. تمام كما ذكرت أنت.. نظافة العيش من الحشائش..
شوفي لغتنا دي دقيقة كيف يا أميرة
الكداد والكـَـدَّادْ.. فرق شاسع بينهما..

من طرف **الفكى احمد** الأحد 25 سبتمبر 2011, 2:02 am

[size=18]

الأخوة ود المناصير وودأبحنه السلام عليكم ، تقال مفردة { يدولق } أيضا لإلتقاط وجمع سنابل القمح التى تكسرت وسقطت أثناء عملية الحصاد ، والمعروف أن الحصاد يتم بعد يباس وجفاف القمح ، عليه تكون السنابل أكثر عرضة للكسر ويكون الفاقد ليس بالقليل ، وتسمى العمليه برمتها { الدوليق} ا

هههههههها
يدولق.. زي يكمرق يا الفكي مع إختلاف المحصول ده تمر.. وداك قندول قمح موقع
يكمرق يمكن جايي من الكمروق..

من طرف **ود المناصير** الأحد 25 سبتمبر 2011, 3:01 pm

الزاية .... محفظة تستخدمها النساء لحفظ القروش

الزاوي يا ود المناصير

من طرف **ود المناصير** الأحد 25 سبتمبر 2011, 7:05 pm

تشكر يا راجل يا موسوعة على التصحيح

ولكن برضو في الجزاير ينطقوها زايي

من طرف **ود المناصير** الأحد 25 سبتمبر 2011, 7:07 pm

الكعدور :

ودا تقريبا العتود او السخلة الامو نفرتو او ماتت ورضعوه في واحدة تانية

[size=18]

عشان كده ياود المناصير أهلنا يقولوا للشىء الناقص النمو أو القليل الحجم { كعدور أو مكعدر } ا

يَخفج : يعجن

البَرُود : الإغتسال أو الحمام ، يتبرد تعنى يستحم

عوافى ياناس القاموس
متابعين بس ما قادرين على المشاركه معلوماتنا بسيطه فى لغه الاهل
تقبلو مرورى

ولايهمك يا أميره ، وكونك تتابعى ماعندك عوجى تب ، لامن تلقي لك كلمة وللا كلمتين

تسلم اخوى الفكى والف حمدلله على السلامه
ونحنا من يوم لقينا المنتدى تانى ما مرقنا ما صدقنا لقينا وسيله سهلا تلمنا بهلنا
فكيف ما نتابع.