قاموس المناصير اللغوي

تذكير بمساهمة فاتح الموضوع :

كل الأعضاء وغير الأعضاء يشتركوا فيهو.. أي واحد يجيب كلمة هنا ويشرحا.. ويبرهن عليها وهل هي كلمة محدودة في منطقة معينة في المناصير أم تستعملها المناصير كلها.. وإذا شك الناس في استعمال هذه الكلمة الحكم يكون زول كبير معمر من المناصير أو زولين كدة.. هذه نواه في إتجاه كتب يس مصطفى وأبو مصطفى
نبدأ باسم الله بكلمة
.............................. ويا ريت تكون الكلمة غير مشتركة مع جيرانا الرباطاب أو الشايقية.. وإذا اشتركت الكلمة يجب التوضيح


المنداجة: بفتح الميم وتسكين النون وفتح الدال وفتح الجيم.. تعني دكان متحرك على ظهر حمار بضاعتو في خرج ز
مكان الاستعمال:- كل أعراب بوادي المناصير، وتنتشر الكلمة في جهات البحر التي يرتادوها هؤلاء الأعراب.. زي بوني وبرتي والنعوفاب وبعض أجزاء من شري.. وعرب بوادي كبنة.. وعرب الجماميع.. ومنطقة عتمور الشرق حلة الكنيسي العرب في العمارين..هذه كلمة خالصة وخاصة بالمناصير وخاصة أعراب البوادي منهم
ومن مشتقات الكلمة:- يمندج.اي يسمسر ببضاعته هذه التي على ظهر حماره

[size=24]

معولق = ما تمام
مجوبق = ملخبط
سايف = ضعيف

[/size]

يكشت = يمشى ورجليه تلامس الارض وتصدر صوتا (( جاى من هناك يكشت ويسوى فى الكشت

مَعَنفِش ومَغَنفِش :كلمتان مترادفتان بمعنى واحد وتعنيان أن شيئا ما غير مرتب
وغير منظم أو غير مشذب أو ليس كما ينبغى أن يكون . كأن يقال :
فلان دائما شعره معنفش أو مغنفش ...
عَكُوكِى : معناها ذو طعم شديد الحلاوة . مثال فى حالة إضافة سكر أكثر من اللازم
على المشروبات حينها يكون هذا المشروب عكوكى ..

الهجكى : الإنهماك فى عمل شىء ما مع الإتقان _ ودائما ما تطلق على اللعب ( الولاد هاجكين الصفقة ) _

ربروبى :- تطلق على السائل الذى صار سميكا ً وكثيفاً _

ياصديق ابو حنه انت المناصير هنا في الامارات اصلا من وين

مناصير الإمارات يا المعز.. اصلاً من اليمن.تداخلوا وتناسبوا في قطر.. اختلفوا على نياق.. حرب بيناتهن..نفوا جزء منهم الى المنصورة. ما عجبتهم هاجر جزء منهم الى مناصير السودان.. وجدوا اسم المناصير قبلهم في السودان من المناصير الكوشيين اصلاً مناصير النوبة.. اختلطوا معاهم بالعرس زيهم زي هجرات العرب للسودان.. وجدنا هذا التأريخ مكتوب هنا عند مشيخة المناصير في مدينة العين

النٍقى = وردت بمعنايين الكلام الكثير ومعنى اله الطمبور
الرتوتى = طمبور = صفقه قطع سنط
ينقرش = بمعنى يقشر او يعزف مقاطع موسيقيه على اله الطمبور
يوقف حالو = يجيده ويتقنه
قروض اوحاف = عيش او كسره بدون ملوح
بعروره = كسره مره + شطه + دقه + ملح +جوعه

يبرجس = ياكل بنهم واخفاء

صلاه النبى عينى باردى = يقلنها النسوه عندما يشاهدن حاله يخشين من دخول العين فيها

حسن سليمان قال:صلاه النبى عينى باردى

طيب يا حسن ود اليمني قال: صلاة النبي عيني باردي على الفاجي الصفوف واردي..دي جملة موش منصورية بس..؟؟
قلنا كلمات ياحسن كلمات ..
أو جمل غريبة شوية.. دي عادية
حسن.. ( أنت فتا المدينة ليل!!) دحين يا حسن إنت فتا المدينة ليل
عندي عمتي الله يرحما إسمها آمني بت أب حنة يقولون لها القليص.. شان كانت قليصة.. لما الحكاية تفوت حدها تقولك( إنت فتا المدنية ليل) أو تقول لك( حكايي تحير السفها) أو تقول لك( الحكايي حكاية الشريفي البشرب الشاي!!)

الدَهـْـدَهـَه: التأخير... كلمة مشتركة بين الشايقية والمناصير
اندهدهت: تأخرت
إندهده ك تأخير
الدِهـْديه: التأخر
عشان كدة أنا بقول في حاجات كتيرة جداً مشتركة بين الشوايقة والمناصير. بغض النظر عن القبائل الأخرى..
إستعمال الكلمة في الواقع
1.ز ( عليكم الله أقعدوا أرجو الفطور)
2 ش( مشوارنا طويل والله وخايفين من الدهدهه)
3ز( لاله ما بندهدهكم.. القلية جاهزي تغلى في الحلة.. وقطعة قراصة زي البرق اقطعا)
شئ من الكرم المنصوري
يعزموك على الفي وعلى المافي
تقول ليك ست البت ما بخلي الضيف يفتشني.. تلقا نص الطاسي اللت السمن مركوزة في الخس. والويكي الناشفي قاعدي طول السنة.. قد ما ياكلوا من السمن، لكن يختوهو للضيف..

سلام اااهندسه وزكرتنى بكلمه

الدودهيه = اللمه
الكونيه = الزاويه الضيقه
ساساقا = غدؤ ورواح يعنى ماشى وجايى (( الدرب الزمان سويتو ساساقا))
وبعدين يا هندسه عدم الماخذه نحن نتخبل ساكت وبعدين الفرز اليجى ويستبعد الموو نافع ولا كيف
الهُتٍكى =المكان المنخفض

صورتك +شالك +عمتك = الا ليت الشباب يعود يوماً فاخبره بما فعل المشيب))

صورتك +شالك +عمتك = الا ليت الشباب يعود يوماً فاخبره بما فعل المشيب))

المناسبة يا حسن.. تخمينك غلط.. زمان تكلمنا في الموضوع ده أنا ومحمد بروي.. الناس قالوا إنتو محافظين.. الصورة دي قبل أربع سنوات بس.. يعني متزوج وعندي أربعة أطفال.. كان داير صورتي هسي دي بجيبا ليك..
إنت كنت وين لما جبنا المسجل فيه مدائح القبب البي يحبها أبوك.. وجينا باللنش بيتنا معاكم.. أبوك رسل محمد ود دبيليب.. قال ليهو أنا مشتهي صاحبي القديم عبدالله الحنوني ومشتهي مديح ولاد حاج الماحي.. والرطوبة عقلتني بقيت ما بقدر اتحرك.. دحين ياحاج عبد الله جيب لنشيك والمسجل وتعال.. أبوي لمان سمع الكلام ده من ود دبيليب بكى في السوق.. وقال يلا.. جينا بيتنا معاكم...
وأنا لقيت أغنية في أمريكا عند واحد باحث في تراث المناصير تقول( عودا الناجرو ود أب حنة... هي يا ناس خلوها تصلنا) دي من كلمات سليمان ود نصر الدين.. والغنية عندها قصة ما بقدر أحكيها..

سلااام اااهندسه وانشاء الله طيب
انا فعلا قدرت بانك الشقيق الاصغر لصديقنا المرحوم عمر وبنيت على ذلك وفعلا انت تتذكر كلام الوالد الى ود دبيليب ومبيتك مع والدك فى شررى فيمكن ان نحسبها ببساطه
كالاتى
الوالد توفى سنه 1978
حضوركم فى شررى 1973 تقريبا
عمر الانسان وهو يتذكر ما حوله ويتزكر ركوب اللنشى 18 سنه تقريبا
18 سنه +39 سنه =57 سنه وهو العمر التقريبى لك
ويعنى خشيت الزون وما صغير لكن محافظ دى بعد ما نقابلك فى العوده الى الخرطوم او ادراج صوره حديثه
وبعدين زى ما قلت لازم نتقابل عشان تورينا منو دى العودا ناجرو ود ابو حنه وتلك الايام
مع رفع الاكف عاليه للمولى عز وجل ان يسكنهم فى فسيح الجنات مع الصديقين والشهداء
وانا اتذكر والدكم جيدا وهو يتوكا على عصاهو وفعلا كان صديق للوالد وكان بجينا طوالى ونحن صغار ويجيب معاهو الليمونوالقرين والبرتقال من جنينته




0(

ما شاء الله يا حسن.. فعلاً بيتنا معاكم سنة 1973 وأنت صغير.. لكن أنا ما عمري 57 اقل من كدة بكتير يا حسن..
أنا من شرري قدر
عبد الحفيظ محمد على الشيخ
وقدر سليمان الفكي محمد أحمد
وقدر محمود تاج السر البشير
وأكبر من الزعيم عبد الغني الحسن أحمد نصر الدين بي سنة. لأنو عبد الغني كان الدفعة الورانا طوالي
أنا أصغر من أختكم المتزوجة في سلم بلالبي بي خمسة سنين..
محمد سليمان هو نديد عمر أخوى
ياحسن ما تنكت المواجع..
وأنا اصغر من عبد الله سليمان في شرري بعشر سنوات
وأصغر من عبد الله محمد علي الشيخ
وأكبر من عمر على عميري من شرري بي ستة شهور
وأكبر من عبد المطلب على الحاج من شرري بي ستة شهور وكدة

]والله كما توقعت ولكن قلت ابدالك من الكبشيه عشان اركز الحنانين والذين ذكرتهم فما زالوا شباب ولكن الشقاوه تكبر الزول قبل ما يكبر وخاصه عبد الله سليمان اللهدى وعبد الحفيظ وعميرى وعبده الشيخ اما سليمان الفكى ومحمحود تاج السر فما زالوا شباب وعلى العموم فوق ال53 سنه وكى لا نخرم شديد من موضوعك الاصلى ولكن هذا المواضيع اقترح عليك فتح بوست باسم شريط الزكريات او من الامس ونديك الحبتين دوول
يلوص ويبوص ويزوزى = يحوم جاى وجاى بدون موضوع
الكونيى = الزاويه

يا صديق عمنا أحمد عوض الكريم أخو علي الاصغر منو لمان نقوله يا عم أنت كبرت خلاص يردد بعض ابيات من التراث:
ماني عود الشيب غار علي
كنت يوم البارح جني
وأمي رابطي السنادة لي

منِيحى = العز او النعجى التى تحلب لبن كثير وباستمرار

شكرا ياصديق ابوحنه وحسن سلمان على المعانى الجميله والله فى كلمات اول مرة اسمع بيها منكم جزاكم الله خير الجزاء

المعز عبدالرحمن خليفه كتب:شكرا ياصديق ابوحنه وحسن سلمان على المعانى الجميله والله فى كلمات اول مرة اسمع بيها منكم جزاكم الله خير الجزاء

خارج النص :
الولد ده يا صديق ود اختى طوالى يعمل معاكم هناك فى الامارات تعرف عليه واستوصى به خيرا يا هندسة .

تشكر الاخ المعز وهذه فعلا تقاليد وثقافات لابد ان تظهر لجميع الناس وبالاخص من هم ولدوا خارج ديار من منصور واصبحوا ولظروف بالخارج واقول ليك حاجه انا قبل كدا اخترحت على اخونا ابو حنه القعٍيده وان نقوم بالتصفيه ولكن بعد الكلام دا كروشتا كراويش كتيرى ولسع الغريق لا قدام

المسحاني =عباره عن حجرين بمواصفات معينه لطحن العيش ودا كان قبل الطواحين
راس السكر =هيئه السكر زمان فى شكل لفافه متماسكه ((مكعبات))(( جيبلى راس سكر وتمنه شاى نصو للبنوت المعاى ونصو لى امى حبيبه قساى بلالى بتين يجى يا يمه)) اغنيه لصديق احمد كاربى
البلنجه = حديده زى حديده الفندك الحاليه يكسر بها راس السكر المزكور عاليه

e]واقول ليك حاجه انا قبل كدا اخترحت على اخونا ابو حنه القعٍيده

يا حسن إنت في الحقيقة إخترعت دق الشلوفة.. وأنا خفتا شديد من الخوض فيها.. عشان كدة الخمسي فوق التنين..
أنا لما اتكلم في حاجة ما عندي مسكة عصايي من النص..بجيب الحاجي بي عروقا.. وقلتا ياخي حسن ده عايز يدخلني في بير والله شنو..! خفتا
بالرغم من أنو عجبتني شديد مساهماتك الطاعمي في القاموس..
....................................
الرشيد مرحب بي ود أختك ياهو ولدنا.. وظاهر عليهو زول منصوري جد..

ياصديق حابب اتعرف عليك دا تلفونى0501224061

تمام يا معز رنيت رنة واحدة بالليل خالص عشان قلتا أكيد نايم.. أنا أكاد لا أنوم الليل..نومي بالنهار شوية شوية.

الركوكى = عشاء ولا فطور بى رهوفى مملح بى لبينى وفوق سكيكر وعليها خيط سمينى بلديه وتبقى فى نهايه القدح وتزيد اللبينى ويبقى اسمه الركوكى وتسمع الواحد يقوليك ركركو كدى والقفو او اشربو

حفله دكيكينيه = خاصه جدا على الاهل والاقرباء

التٍلح = تسمع الزول دا تلحو كتيرى خلاص
قشيش بنات = حبيب وكل البنات يعجبن به
قنديف = مهتم بهندامه
سلام يا ابو حنه البيكم تطيب ايامنا تتهنا
وشايفك مشرك جباتك بى رتيله وعامل ليها هبار وحارسا

((دهلله)) والله يا ابو حنه انا تب ما سمعت بيها والبعرفو لللمه والوجطه (( دودهيه)) ولا شنو

وبعدين يا زعيم عندى بوست بعنوان توم وجيرى فى المنتدى العام دايرك تشوفوا وتديهو شرابيق

اليومين ديل الزعيم القزافى مضًااااايق وشابك الناس بيت بيت دار دار زنقه زنقه
فدحين يا الحنونى زنقه دى تبقالى حقنا تب لكن بمعنى اخر

رقراق = ضل راكوبه وتتخلله اشعه السمش الحارقه
هنتيك = زول مانافع وما فيهو فايده

HASSAN SULIMAN كتب: صلاه النبى عينى باردى = يقلنها النسوه عندما يشاهدن حاله يخشين من دخول العين فيها

صلاة النبي فوقك يا حسن نكتها من يين دي