قاموس المناصير اللغوي

تذكير بمساهمة فاتح الموضوع :

كل الأعضاء وغير الأعضاء يشتركوا فيهو.. أي واحد يجيب كلمة هنا ويشرحا.. ويبرهن عليها وهل هي كلمة محدودة في منطقة معينة في المناصير أم تستعملها المناصير كلها.. وإذا شك الناس في استعمال هذه الكلمة الحكم يكون زول كبير معمر من المناصير أو زولين كدة.. هذه نواه في إتجاه كتب يس مصطفى وأبو مصطفى
نبدأ باسم الله بكلمة
.............................. ويا ريت تكون الكلمة غير مشتركة مع جيرانا الرباطاب أو الشايقية.. وإذا اشتركت الكلمة يجب التوضيح

المنداجة: بفتح الميم وتسكين النون وفتح الدال وفتح الجيم.. تعني دكان متحرك على ظهر حمار بضاعتو في خرج ز
مكان الاستعمال:- كل أعراب بوادي المناصير، وتنتشر الكلمة في جهات البحر التي يرتادوها هؤلاء الأعراب.. زي بوني وبرتي والنعوفاب وبعض أجزاء من شري.. وعرب بوادي كبنة.. وعرب الجماميع.. ومنطقة عتمور الشرق حلة الكنيسي العرب في العمارين..هذه كلمة خالصة وخاصة بالمناصير وخاصة أعراب البوادي منهم
ومن مشتقات الكلمة:- يمندج.اي يسمسر ببضاعته هذه التي على ظهر حماره

الليلي ما قصرت تب يا خالد عابدين في قاموس أهلك
جبت كلمات غليدي خلاص.. تشكر على المرور بي جاي

من طرف **الفكى احمد** الخميس 27 يناير 2011, 5:45 am

يَزم : يَضُم أو يلصق شيئين مع بعضهما
البـُـقل : تعنى الفىء الحار نسبة لصغر مساحته أو لحداثته وقصر مدته بعد
زوال الشمس عن مكانه .

من طرف **ابو مصطفى** الخميس 27 يناير 2011, 5:54 pm

الكادق : اناء يصنع من القرع بالتحديد قرع الريف ويضع فيه اللبن حتى يتخمر
السعن : يشبه القربه وهو مصنوع من جلد صغير الماعز( العتود او السخلة ) وفيه يوضع اللبن الرايب ويخشوه حتى تطلع منه الزبدة ولعله يوضع فى ماء بارد حتى يساعد فى استخراج الفرصة

تحياتى
ابو مصطفى

من طرف **الفكى احمد** الجمعة 28 يناير 2011, 5:02 am

يَشكِن او يجكن ، تعنى يحشر أو يحشو مع الضغط
يَجُك : 1 ـ يمشى سريعا 2 ـ يجك الملابس فى الطست ، اى يغسلها
بالضغط عليها وخبطها ببعضها .

الـوَكـَـّاي: خيط تربط به الغـُرَارَه .. والغرارة كلمة عربية فصحى
الوَشـَرَه: عقدة الحبل التي في التميمة..تجعل حداً لعقدة الحبل تمنعه من أن ينزرد الى آخره في كراع البهيمة
وتميمة: كلمة عربية فصحى
وكراع كلمة عربية فصحى
قال صلى الله عليه وسلم( من كان عنده فضل زاد فليعد به على من لازاد له، ومن كان له فضل كراع، فليعد بها على من لاكراع له)
وورد في السيرة أنه كان يقول: اللحم سيد الطعام والثريد سيد الطعام.
وكان يحب من الشاة، الساعد والكراع..

من طرف **HASSAN SULIMAN** الجمعة 28 يناير 2011, 9:10 pm

يحرجم :ــــــــــــ يزبح البهيمه بطريقه غير شرعيه
يحٌرم:ــــــ يحلف بالطلاق

من طرف **HASSAN SULIMAN** الجمعة 28 يناير 2011, 9:18 pm

يجكجك = مشى الحمار بطريقه غير منظمه

ينخجر = يحفر
يعيفر = يبعثر

كـَرَسْ: صمت أو صار هادئاً..
مثال( الهوااا كرس)
التـَلـَكـّـِي: قطعة خشب لتكسير قطع اللحم
المُـدْقـَاقـه : كالشاكوش في عملها إلا أنها تختلف عنه حيث هي مصنوعة من الخشب.. وتختلف عن الشاكوش في شكلها.. تدق بها الأشياء كالحبال [b]

من طرف **HASSAN SULIMAN** السبت 29 يناير 2011, 3:22 pm

البرم = ثمار الاشجار قبل النجاض
القطران = سايل منتج من الحنظل

سليمان القطران سائل منتج من الحنظل.. وليس القرض..
ياخي صلحة وأم هتيرة في العقبة.بي فوق بينتاهن. حوة أم بت حوة في شرري كان عندها ( ترد) تحرق فيهو القطران زمان...
كمان عندك( عريضيي) في النعوفاب أم ولاد ود عسكوريي عندها ترد عاملاهو في الدبورة القدام خشم بيتهم ترد.. هسي دي بنوا في محلو الأولاد...
هناك راجل إسمو إدريس بالقرب من الكاب( التكارنة) كان عندو ترد يحرق فيهو القطران

من طرف **HASSAN SULIMAN** الأحد 30 يناير 2011, 2:07 am

تحيه لك يا هندسه والاخوه المتواجدين وبالفعل كنت متردد بين الحنظل والقرض وبين وبينك كدى قلت الجماعه كان فيها اى خطا ما بيفوتوهو وعليه فايق الشكر والتقدير

وهاك دى

حدوقنىٌ = اى بمعى حيازه الشى والفوز به ولا شنو يا هندسه
يتغابا العرفى فيهو= ينكر معرفته بالشخص الذى يعرفه

مـَطـْـمـُوره: نخلة أو شتلة شايلة بحفرتها وسبيقتها

من طرف **HASSAN SULIMAN** الأحد 30 يناير 2011, 4:21 am

اهل بيك يا زعيم وكيفك والاسره الكريمه
وعندى ليك واحداتن قلاد قبيل مخليهن لى باكر لكن وكت صاحى لى هسع تحين هاك

مصنهرى== نصف النهار الساخن
صنى= رايحه روث وبول البهايم ويمكن البشر ايضا
العوين = الاطفال والصبيه وفى دار فور تعنى النساء
الدرافيين = العنبلك

من طرف **HASSAN SULIMAN** الأحد 30 يناير 2011, 4:26 am

وبينى وبينك كدى انا قاعد فى العقبه البننا وام هتيره الزكرتها قبيل حتى الان ومنتظر الفرج وبرضو يمكن ايجاد كلمه الُعُقاب فى هذه الجزئيه

شكرا ياحسن.. فعلاً دي كلمات غلاد
وبعضها نزل قبل كدة في القاموس. ولكن لاضير. قلنا الناس ما تتردد ..نزل والله ما نزل.. تنزل أي حاجة... بعدين مرحلة الغربلة جاية
.........ز
الدرفون: يا حسن موش العنبلوك كما ذكرت
درفون: الشفع الصغار.. درفون يعني شافع
........
لا يا حسن أنا اقصد هسي دي داخل إنترنت من وين؟؟؟

من طرف **HASSAN SULIMAN** الإثنين 31 يناير 2011, 12:31 am

الاخ صديق لك الود والاحترام
وانا داخل نت من فرمله اليد غربا
اما كلمه الدرافيين = انا كتبت عنبلك واقصد الاولاد الصغار زيى ما زكرت ولكن على وجه الشبه فقط
وهاك الحبه ده
يتنن = يتبول واقفاً
الضلاله = بضم الضاد تعنى السقف وعلى بعضها ( تنن فى الضلاله)

من طرف **HASSAN SULIMAN** الثلاثاء 01 فبراير 2011, 3:15 am

والله يا زعيم انا اطلعت على كل البوست وليقيتو ملقط لقيط شديد واقترح عليك القٌعيده وبعدها يتم حصر كل الكلمات فى مكان واحد ليسهل الاطلاع عليها وتفادى التكرار
وهذا يظل اقتراح فقط ولك الكلمه صاحب الفكره وبعدين هاك ((الكراويش دى))
جييد = كما تفول جييد جيت

الريَالِى :بكسر الراء ، هى اللعاب الذى يسيل من الفم
الرَغاسيم : بكسر السين ، هى زبد أو ماده لزجه سائله تخرج من الفم
غالبا قبل أوعقب التقيؤ .

الباشي: وليمة العرس أو الطهورة ولا تنطق بالرفع باشة على الإطلاق.ز لأن ذلك يغير معناها

الجكنوقة: محل غريق به حجار متعرجة أو مكان في البيت مظلم به اشياء مخفية
الكانديقة: محل في البحر مافيهو تيار حامي

بـُـقـْـلـَه: قـُـلـّـَه

من طرف **النفر** الخميس 03 فبراير 2011, 6:15 am

الكضوم : ممر ضيق بين جبلين

من طرف **النفر** الخميس 03 فبراير 2011, 6:19 am

الكضوم : ممر ضيق بين جبلين

يـَـفـْـلـِـي: يفلي القمل من الشعر أو اللباس أو الهدوم يفقعه باصبعي الإبهام..
ويفلي جاءت من العربية ( يفل) لايفل الحديد إلا الحديد)

الـبـُـقـَانـَة: مريسة+ مزاج
هي المريسة تقام بالإشتراك مع مجموعة.. ومعاها عشاء ولحيمات كدة .. وغالباً ما تقام مساء يوم السوق. أو الثلاثاء ,ان تتم بين شلة أو مجموعة ترابلة.. مزارعين.. واحد يجيب تمر. التاني يجيب زريعة.. الباقين يجيبوا وقة لحم من السوق.. تقام في بيت مهجور بعيد عن القرية والأسر.. يشربوا ويتعشوا. ويمشوا يرقدوا..في شكل مجموعة
والبقانة ما عندها علاقة بالبقنية لامن بعيد ولامن قريب
ممكن بيت التمر في النعوفاب.. تقول عليهو بيت البقانة
ممكن الشفخانة القديمة جنب البحر في فقاعة أو ديوان السيد ود كواب بعد ما تهدم.. ناس فقاعة كان يعملوا فيهن البقانة..
لكن مطلق مريسي لايقال لها بقانة.. وإن كان العمود الفقري للمسألة هو المريسة..
والمريسة كانت تصفى بصفاية كبيرة كدة تصنع من السعف..وتكب فيها المريسي وتمرس الصفاية شوية شوية .. لغاية ما تبقى مشك.. هسه إنقرضت هذه الصفاية.. لو طفت المناصير كلها ما تجد صفاية مريسي من السعف..

الـمـُشـُـكْ: بواقي التمر والنوى من المريسي الذي لم تصفيه الصفاية... أو بواقي فترن الكسرة + غباشة يدوهو المعوز عشان يسمنوا.. أو بواقي الشي عموماً ..يعادل في اللغة العربية( الحـُـثـَالـَة)

من طرف **HASSAN SULIMAN** السبت 05 فبراير 2011, 8:59 pm

هو سلام عليكم والشبكه كانت ضعيفه + الجيب
وردت كلمه وقه لحم من السوق فكم تساوى بالكيلو فى هذا الزمن يا زعيم
البلٌال = وهى ابيات شعر تقوم بادائها والده العريس والخالات والعمات والمتخصصات فى السيره فى يوم العرس
الضوُ خزينا = وتعنى الولد الفالح المدخور لنوايب الدهر وعاده ما تقال للعريس فى البلال سابق الزكر
الرايق عجنى =برضو شكر للعريس فى البلال
الجاسر ابو كروق = هو التمساح وعلى بعضها (ده الجاسر ابو كروق الرايق عجبنى والشتلو روق فوق روق) وهكذا تتم مراسم السيره والتى شرحت فى كثير من المواقع

حسن.. والله ياخي لازم أقابلك في إجازتي للسودان .. كما أحب وأتشوق أن ألاقى ناس كثيرين هنا في المنبر..
وسوف تكون ملاقاتي معاهم .. زي الزول القدم لى وجبة دسمة
اقول ليك حاجة ياحسن؟
ديل كل أعضاء المنبر هنا... ليه.. بدون مجاملة.. لأنهم كل زول فيهم عندو خاصية.. وفردية وتنوع.. وطعم
.....................
الوقة ياحسن تساوي كليو وربع... وكان مقاس معمول به لغاية منتصف السبعينات في المناصير
ويغنوا للوقة
الزول علي السقا
الزول منو
ولحمو بالوقة
الزول منو
.............
الوقة دي كان إلا يشتريها سادة المجتمع
تلقى الناس تشتري لحم
وقة إلا ربع
نص وقة
ربع وقة
تمن وقة
ربع عفشي
نص عفشي
أو الراس معاهو الضلفين..
............
يا حسن
الضو خزينا دي كانت بلال حسن سكينة في عرسو.. في شرري.. وكنا حاضرين العرس.. وبالليل
غنينا غنية وزين جانا عام بي صدرو
طبعا الغناء كان موش زي هسي دي
في معزل عن الحريم تماماً.. ونغني على عنقريب في البرازي.. حريم شرري بس يسمعن الصوت من بعيد..
الكورس كان
سليمان الشمباني
سليمان محمود توم
سرالختم محجوب علي القاضي
حسن محمد علي القاضي
..........حسن سكينة عاد ماهو مواصل الناس وعندو شعرة
..........
في أغنية وزين تظهر بصورة جيدة النغمة الرابعة مع الخامسة في سلك الطنبور.. تسمى الإستلاف.. وقتها. كانت نغمة جديدة على دق الطنبور..حسن سكينة قال Sad

النغمة البي تقول بُــقـُمْ دي قاعدة تشق قلبي كررر) حسن سكينة ما عندو شعرة.. وزولاً شوش
.................
الرايق عجبني
دي كانت بلال عرس.. عثمان ود شيخ الحيران في المكاب.. السلمات
عملتو ليهو أمو زبيدة
الليلي يا البلال أنا الرايق عجبني
صيدتو عالي الجيل................. أنا الرايق عجبني
ضلي جيتو مقيل ............ أنا الرايق عجبني
الجاسر أب كروق
دي كانت بلال خليفة ود بلل في المسراب
...........
يا بلال يا بلال... صديق عبـّا ساير
ده عباسي وفقير................................ صديق عبا ساير
بالإبريق يطير............................ صديق عبا ساير
ده بلال ... صديق الضبول من قرية الحسيباب عملتو ليهو أمو حرم بت الضبول.. ديل كمان فقرة من أمري ومن برتي جواا تزاوجو معنا هناك...

من طرف **الفكى احمد** الأحد 06 فبراير 2011, 5:27 am

يَفصِد: يخدش ، يجرح جرحا خفيفا و ـ الِفصَادِى ـ تعنى عند المناصير الشلوخ
وَمفًصَد ـ معناها مشلخ
حَسَا َوسَا : تعنى محاذ ومواس ، ويحاسى تعنى يحاذى ، ومتحاسين ومتواسين تعنى
حسا وسا يعنى قدر بعض ، فى الطول أو الإرتفاع مثلا .

الاخ ابوحنه فليس كل هذا الكلمات منصورية فمظمها مشتركة مع بعض القبايل السودانية وايضا خارج السودان فكلمة ربق وجدتها نفس المعني فقلت له نحن اولاد ربق يعني عايشين مع بعض ومتربين مع بعض فضحك قال لي انتو تعرفوا الربق فعرفه بنفس المعني

الغالي أبو سفيان..نعم هنالك كلمات مشتركة
......................
..................
يكوكـِـبْ: يربط وكاي الغرارة.. أي يسوكر.. يشد..

من طرف **HASSAN SULIMAN** الإثنين 07 فبراير 2011, 12:43 am

اولا يا صديق ابدالك من وين ولا وين وخلاص من كتره الكلام ما كتر لامن هفا على
القٌفل : وعاء من جلد الغنم (( عتود) يستحدم فى حفظ اللحم وقالبا ما تكون وقه كما زكر صديق
وبخصوص حسن سكينه فى الحساب خالى نتلم معاهو فى البرزيه وايضا اقرباك اولاد خير الله يبقو لى
وفعلا هو راجل نكته ولهو مواقف عديده ومضحكه
وكما قال الشاعر حبيب عثمان (نجيك يا شررى ضمينا *وهناك نلقى حسن سكينه وفنجال جبنه يكفينا)وقال كدى عيسى حامد هبك الجبنه تبقبقى ودى كانت القعده فى ديوانا قبل الغراق بى شويه الله لا يطراهو بالخير
وبعدين انت دحين يا ابو سفيان مالك متقابى فى العرفه ودحين ما صفقنا كورس مع كمبال وعلى نعمان فى القنيفاب ولا نسيت وكبرت معاك وانا حا ازكرك اكتر المره الجاييى

من طرف **الفكى احمد** الإثنين 07 فبراير 2011, 4:41 am

يَفَرحِن :مفرده يوصف بها الطفل عندما يهزىء من شدة المرض
حيث يقال ـــ مَفَرحِن ــ
قَنِيط : بفتح القاف وكسر النون تعنى أن لا حظ له ، عكس كلمة ـ مَلغُوم ـ
التى تعنى محظوظ والتى ورد شرحها من قبل .

من طرف **النفر** الإثنين 07 فبراير 2011, 5:47 am

تدودى : تطلق على النار المولعة لفترة طويلة _ ولقد وردت هذه الكلمة فى قصيدة ابراهيم الشاعر ( الله يرحمة ) والتى يهجى فيها ابن أخيه عثمان سلمان _

ضابح لى جداتن عودى
ومن يومين ونارا تدودى
كين نجضت بقت لبودى
طلقت فى بطونا البودى
والمصران ضرب جابودى

من طرف **HASSAN SULIMAN** الثلاثاء 08 فبراير 2011, 3:00 am

(يابا وراق)) ((صالح ابقرتين)) صالح السهيب’’ ((تاتيب)) كلها اسماء لاولياء صالحين عاشوا فى فترات سابقه وظلت زكراهم ومكانته محفوظه لدى كثير من اهلنا المناصير واكيد فى كثير من الفقراء لم اعرفهم واتزكرهم وخاصه ناس الجيه اللافوق يعنى ناس الريس وكده وعليه انتشرت ثقافات الفقراء وافرزت العديد من الكلمات

الفقير :ــ ((يا فقير الخلوه قوم يلاك معاى القديم يا ناس) وتعنى ذلك الفرد الذى يعالج بالقران او كواديك
كادوك :ــ او سواا او حواطه كلها تعنى معنى واحد وهو عمل متعلق بالعزيمى او قرايه القران بواسطه الفقراء او عمل خزعبلات وسحر سفلى بما يسمى بالدجال او الساحر
المحايى :ـــ قريه ايات على ماء ثم يشرب بغرض العلاج
التخريجى :ـــــــــــ كتابه ايات على ورقه ومن ثم تحرق ويبخر الميض بها والشافى الله
الحجاب :ــ ايضا كتابه تعاويز وايات ثم تربط بجلد غنم على الجسم
شخارم بخارم :ــ عفاريت كتيرى

يَنخجر : بفتح الياء والنون وكسر الجيم ، تعنى ينخر
يَقرود : بفتح الياء والقاف وكسر الواو ، تعنى ينخر شيئا
بحيث يكون محل النخر أجوف .

الـبـَـرَوِ دْ: فسحة فاضية بعد السواقة يربطوا فيها الحمير.. أو يرعن فيها الغنم..
درب السلطان: الشارع الرئيسي

من طرف **HASSAN SULIMAN** الأربعاء 09 فبراير 2011, 3:20 am

القعملى : اسم جبل بصحراء المناصير
التتق :ــ خشبه صغيره لتثبيت ارجل العناقريب
الشعفوفه :ــــ رياح شديده
الكبته :ــ رياح كثيره الغبار يصعب فيها مدى الرؤيه بضم الكاف
الحضنقال :ـــ حجر صغير مدردم يلعب به
التلى : واحده بلون مختلف
ام قرنين
عربت وقربت
اربش
يكربت : يسير بصوره منتظمه (( الابل))

يتفَرجَخ : تعنى يجلس القرفصاء
يَلكع : بفتح الكاف ، تعنى يحث الدابه على المشى أو الجرى مثلا
يَجَحِم : ينظر لشىء ما بتمعن ودون إنقطاع

من طرف **HASSAN SULIMAN** الجمعة 11 فبراير 2011, 3:31 am

حضييرى : بكسر الحاء وتعنى الفلس والحظ التعيس وتسمع واحد يقولك انا حضيرى دا مبارينى ((حضيرى ابو نعلين سعف))
كُج :: غير محظوظ وقنيط

من طرف **HASSAN SULIMAN** الجمعة 11 فبراير 2011, 3:42 am

يغنى دليب
يكٍسر فى حسوسو
يشاتر
( كل ديكا فى بلدو عوعاى)

من طرف **HASSAN SULIMAN** الأحد 13 فبراير 2011, 3:33 am

حاشودى :: احتياطى او اسبير ودائما ما تكون فى العاب الطاب (( تسمع الواحد يقولك عندى ولد حاشودى))

من طرف **HASSAN SULIMAN** الأحد 13 فبراير 2011, 3:46 am

يفنجط
يعير
ام طريريم

يـَـمـَرْمـِــتْ: يمردغ

يــَوَرْيــِـنْ : يحصد العيش.. الذرة.. ينتهي موسم الحصاد

أبْ قـَـبــِــيــِحْ: أب قبيح... عضيم الشيطان.. عصبة البهيمة في مؤخرة الساق التي يعلقونها منها للسلخ.. يطابق في العربية الفصحى المثل( كل شاة معلقة من عصبتها)

من طرف **الفكى احمد** الإثنين 14 فبراير 2011, 6:58 am

يَهَبِر : مفرده لها عدة معانى 1ـ يحصد أو يقطع قندول الذره مثلا
2ـ يهبر الشَرَك تعنى يرده إلى حالته قبل نصبه بحيث لايمكنه أن يصيد
3ـ ينهض فجأة وبسرعه . 4 ـ يكشف السر أو الخطه .
يـَرَنِق : تعنى يسعى ما استطاع لنيل شىء ما والظفر به .

الـغـَـتْ: الشيلة
يقولك... الحريم راحن يودن الغت..

من طرف **HASSAN SULIMAN** الثلاثاء 15 فبراير 2011, 8:58 pm

الكع = اسرع
انبرش = رقد واطا (( فك اخره )
مهيرت = ضارباه هيريتى
الحنبليب= بقايا العيش
زعيط ومعيط = اى كلام

القافه : بتخفيف القاف معناها الكلام عن الغير بما لا يرضيهم ، الفضيحه
{ شيل الحال}
مِتحَنفِش : واثقا من نفسه وقدراته متعجلا مبديا جاهزيته لقول أو فعل ..

من طرف **HASSAN SULIMAN** الأربعاء 16 فبراير 2011, 1:21 am

[size=24]

معولق = ما تمام
مجوبق = ملخبط
سايف = ضعيف

[/size]