قاموس المناصير اللغوي

تذكير بمساهمة فاتح الموضوع :

كل الأعضاء وغير الأعضاء يشتركوا فيهو.. أي واحد يجيب كلمة هنا ويشرحا.. ويبرهن عليها وهل هي كلمة محدودة في منطقة معينة في المناصير أم تستعملها المناصير كلها.. وإذا شك الناس في استعمال هذه الكلمة الحكم يكون زول كبير معمر من المناصير أو زولين كدة.. هذه نواه في إتجاه كتب يس مصطفى وأبو مصطفى
نبدأ باسم الله بكلمة
.............................. ويا ريت تكون الكلمة غير مشتركة مع جيرانا الرباطاب أو الشايقية.. وإذا اشتركت الكلمة يجب التوضيح


المنداجة: بفتح الميم وتسكين النون وفتح الدال وفتح الجيم.. تعني دكان متحرك على ظهر حمار بضاعتو في خرج ز
مكان الاستعمال:- كل أعراب بوادي المناصير، وتنتشر الكلمة في جهات البحر التي يرتادوها هؤلاء الأعراب.. زي بوني وبرتي والنعوفاب وبعض أجزاء من شري.. وعرب بوادي كبنة.. وعرب الجماميع.. ومنطقة عتمور الشرق حلة الكنيسي العرب في العمارين..هذه كلمة خالصة وخاصة بالمناصير وخاصة أعراب البوادي منهم
ومن مشتقات الكلمة:- يمندج.اي يسمسر ببضاعته هذه التي على ظهر حماره

من الصميم يا ود الخبير..
العدوي عندنا

تِر = بكسر التاء وتعنى زح او تحرك الى الخلف (( يا خلايق تروا وزين جانا عام بى صدرو وزين))

داجى = باستمرار
تملى = تعطى نفس المعنى عاليه ((الاكل يبقانا زى حنظل وتملى شرابنا كينيا الليلى يا ناس كم بكينا))

داجي.. يا حسن مشتركة مع الشايقية
( اصبح داجي اساهر وين.. حتى الطيف رحل خلاني)
تملى.. مشتركة مع معظم القبائل السودانية.. ومشتركة مع المصريين..
المصريون يعرفون كلمة تملي.ز كما عايشناهم هنا في الخليج
وكذلك يعرفو كلمة( رِمـّـَــه)
يقول له( روح يا رمة)

تُولا = تسمع الواحد يقولك (( الزول دا بقالى فى تولا ))يعنى فى رقبتى او فى العزيزى
يوقف حالو = يحكمه ويجيده

قلتنا = تعنى حرقتنا وتسمع الواحد يقولك الشمس قلتنا وعموما مشتقه من القلى او النجاض

تفسي=يعني تكذب

محمود... ها ها ها
ده شنو الجبتو ده؟
نحن الكلمات التحت تحت دي قاعدين نخليها وإلا عندنا في لهجتنا المنصورية منها الألوف..
لكن لغاية هنا معقولة كلمتك دي يمشي الحال.. مافيها شئ يقال، عادية يعني، لكن ضحكتني لامن دمعتا..
لكن أنا خايف من الغريق..لى قدام.. أوعك من الغريق
تمام كدة

الكدوب = الاوساخ على الجسم
سولعيى = اونطه ساكت

الـقـُـبـَـرَه: إناء شبيه بالكادق يوضع فيه السمن..

الجبركوله = الرجله
الجروره = الدين من الدكان
جوو = تعبير عن السقوط فى الماء بصوره عنيفه (( نط قرو جوو ))

سلام هندسه وشايفك زى الزول المشرك جبادتو ومطعمه بى رتيله وعاملها هبار وكل مره تنتق
ارسلت ليك رساله بى قادى وصلتك ولا لسع

وصلت الرسالة...
الرسالة دي إسم مرأة
بخصوص الرسالة.. أشعار الوالد كتيرة، ومافي أحد يدعي إنو حافظا كلها.. المهم العندي برسلوا ليك لامن تظهر الصورة متكاملة

الرساله وصلت يا ابو الرسائل
عليى الصوره متكامله هذا الشوره يا طه الغلبنا دليلا

يكرد = يسك او يجرى ويركض خلف الشى (( اكرد الدحش قادى من الزراعه))

يكرد: يا حسن برضو.. لما واحد يحلق ليك في البلد والموس ميتي.. تقول ليهو أكردا .. أكردا.. اسكت أكردا بي تحلق!
يكرد: هنا بمعنى.. يضغط ويصر.. ويجر... شايف بلاغة اللهجة بتاعتنا كيف!
يكرد عندها عدة معاني
أو اقول لك
فلان يـكـْـرُدْ في الكـَرَدِي.. أي يحش في النجيلة
والكردي هى النجيلة الفي البوغة.. ولكن غالباً ما تكون الكردي هي نجيلة الجرف القايمة بين اللوبيا
شايف يا حسون
يكرد عندها ثلاثة معاني
معني واحد جبيتو إنت مشكور
ومعنيين جبتهم أنا
تمام كدة يا باشا
وبرضو يكرد في العصيدة أو الحلة دي معناها مرادف للكرد بتاع الحلاقة..

والله يا هندسه الكرد دا وقفت حالو ضما وانا قلت الكلام دا عشان اجيب ضما دى والتى نشترك فيها مع الشايقيه وهم يستعملونها اكثر منا وتعنى (( شديد او نهائى كدى ))
كدى كدى = تسمع الواحده تداعب فى
طفلها وتقول ليه كدى كدى ولدى فوقو يكبر يشيل همى ((كلمه لزوم التدليل))
طنق طنق = الواحد جاى من هناك مدلدل ايديو طنق طنق وما شايل حاجه معاهو (( ابو حنه المعنى وصل ولا تزيدو شويه من عندك))

حسون طنق طنق دي بي تقولا المرة لمان راجلا يكون مطمم بطنا

اهههههههههههههههههه والله ضحكتنى
يعنى الراجل يكون (( غرز )) ولا فلس ولا شنوو
سلك ملك = برضو تعنى مطلق ايديوهو سااااكت

أيوة يجيها داخل وجاي من الشغل طـَـنـّـِـقْ طنق..
يعني دايراهو يجي داخل شايل بطيخة
شايل كيس موز
شايل كليو لحمة
شايل ليها فستان يقول ليها يا حبيبتي لقيت الفستان ده في السوق وعجبني.. وشعرت إنو ممكن يكون خايل فوقك..
تجي داخل ومحمل بالأغراض لامن تدفر باب الحوش بي كراعك، لأنو يديك محملات بالأكياس
المرة تكره الراجل البخيل.. حتى لو بقا وسيم!
ولو بقا قبيح ولكنو كريم سخي اليد.. تشوفو سماحتو بري منها..
المهم المرة جنها وجن الراجل البخيل...

وبعدين معاااااااك يا عمننننننننننننننا
بس قولى الشنا دى يعالجوها كيف ؟؟؟؟؟؟؟؟؟؟؟؟؟ظ

الشنااا يا حسون يعالجوها بالكرم الفياض..
عندي واحد صاحبي شين شناااا مرة.. شفاهو الله مبروص كلو... وهي والله العظيم سمحة سماحة نوع الكعبي ديك. مافيها عيب نهائي.. هي تحب راجلا ده لدرجة الجنون ولاتشوف غيرو ابداً ابدا
هذا الرجل ينفق ويعطي عطاء من لايخشى الفقر.. ربنا فاتح عليهو رزقو مدرار شديد..
أعرفهم عن قرب شديد..
نجي للسماحي الكعبي
مرة محمد العويد في السوق سأل قال يا أخوانا السعوط الناجم نلقاهو عند منو؟؟؟؟
الطهوري من شرري قالو
تلقاهو عند حسن القاضي
جاهو
قالو حسن سعوطك كيف؟
حسن القاضي قال ليهو
نوع الكعب داك!!!
العويد قال ليهو( نان الكعب وين نودي.. ماني دايرنو. الكعب نسويبوا شنو عاد!!قبيل قلتا ألقى لى خمس ترطال أخلتن مع نمرة اتنين أبيعن في شرري
والعويد عمل نفسو ماشي لفح ضهروا بي طريقة استهبال العويد ديك..
حسن القاضي خاف البيعة تفوت منو
قبضو من قميصو قبل ما يمشى قالوا لا لا ناجم ناجم شديد
العويد يضحك قالوا نوع الكعب داك عرفتها براي داير ألعب عليك عشان تنقصني في السعر

لو تلاحظ وبدون قصد دخلنا فى كلمات مركبه يستعملها المناصير ويمكن ذكر الاتى
فد طقاق = تعنى الضعف والهزال وتسمع الواحد يقولك الزول فيه فرد طقاق وما يقدر يسوقلو قمح

الكلمات المركبة برضو مقصودة يا حسون.. وهي بصدد القاموس..
موش الكلمات المركبة! الجُمل برضو مقصودة وهي بصدد القاموس..
وعندما نجي مرحلة الجمع والتوثيق كقاموس مقروء مكتوب في كتاب، سوف نجعل للجمل والكلمات المركبة باباً خاصا
..................
يقول ليك( على الخلا ... والريح تشيل..) اي واحسرتاه
الشرح:-
يعني مافي شئ. وكمان الريح تشيل

دردرب = وقع دردرب (( داير انط الحوش دردرب وداير اشوف ام عكشن ضهب ))

يطربق ويخرمج=يقول كلام غير مفهوم

( أرعى بالوتد)
قولة منصورية.. يعني ألزم حدودك..
وعادة لما يكون البـَـرَوِدْ حشوهو من القمح. وما عايزين الحمار دون مواخذة يرعاهو كلو ويخرمجوا. يقوموا يدقوا ليهو وتد.. يرعى جزو معين.. قدر ما يمد ليهو الحبل.
أو عندك جرف الفوقاني محشوش وفيهو جضول كدة داير الحمار يرعاهن وما يصل اللوبا.. تدق وتد وفيهو الحمار بحبل وتحدد بي ذهنك قدر طول الحبل إنو ما يصل يرعى اللوبا.. يرعى الجُضُول بس..

( أضان الحامل طرشاني!) أي أتمنى أن لايحصل هذا الحدث أو يتكرر

ضـَـهـَلانْ: مجنون.. أو ما راكب عدلوا.. أو غائب الفكر والذاكرة...

صقط لقط = كنايه عن بعد المسافات

القسيبا = ايناء لحفظ الذره والمحاصيل يصنع من مواد محليه كالطين وروث البهائم وفى دار فور تسمى الدبنقا ولها مثل مشهور (( دنيا دبنقا دردقى بشيش بشيش))

السفوفه =كسبره مقليه ومسحونه+ سكيكر او اعشاب بلديه تسحن ويعالج بها

العم هندسة صديق عبدالله وابن عمي حسوووووووووووووووووووون
تحياتي لكم متابعكم
وضحكتونا كثير لاعبين رأس؟؟؟؟؟
هذه كلمات تحفظ للتاريخ جزاكم الله خيرا
واصلوا........................

ابن عمي حسون غدا ذاهب الي البلد لزواج شقيقي حامد وهاشم
وسوف يكون العرس يوم 5/5
لك ودي

راسو لايب = زول يحب الاكل
زايع = برضو زول يحب الاكل
ملهوب = برضو يحب الاكل


هندسه اين انت هل تسمعنى فى الغربه وما ظاهر وطول ما شفتك وضم هافى منى انشاء الله المانع خير

يسانق = يسانق الجباده من البحر اى يجرها ويخرجها
يقانى = يجر الشى عليه ودايما ما تكون مركب ويتم جرها من البحر على ضفه النيل
يكض = تعنى المعنى عاليه

يضاير = يضاير الشى اى يغيره من مكان الى اخر

يجابق = يقوم بحش الحشائش والقش من العيش وفى الغالب هذا القش من نفس صنف العيش لكن ضعيفه الساق وسايفى
سايف = ضعيف

موترن =زول ماسكلو فى شى ومابى يفكها يعنى شابك شبكه شديده ودائما ما تقال عند الحديث او الكلام (( ابو حنه وحسن موترنين فى القاموس ))

حُمد ديره = لعبه يوديها الصبيه فى قبيله المناصير
كركعيت = نفس الشرح عاليه
كعود شلع = شليل وينو

ابو حنه هل تسمعنى
اين انت يا راجل
طول ماك باين
انشاء الله المنانع خير

مقوبل
مصنقر
مقعمص
مقوقل
كلها كلمات تعن الجلوس وبطريق مختلفه ونشترك مع بعض القبائل العربيه

شكلك ربتك عجوز يا ابحنه ...عشنا فى البلد لكن منكم نستفيد.....نسيتو الخوسه والله انا غلطانى

سلام يا كرام.. زباين القاموس.. ود نصر الدين والفكي ويا حليل الفكي
وأميرة علي.. الدخلت في غيبتي دي منو يا ربي.. ظاهر عليها زولة نجيضي تب.. والخوسة ما نسيناها يا أستاذة لو بحتي في القاموس في الأوراق الأولانية بي تلقيها

عوافي
علشان جيتك يا قريبي ابوحنه
عوافي كلمة منصورية معناها الترحيب

واعل طيبين
معناها = ان شاء الله كويسين

أيوة يا إنتصار عوافي كلمة ترحيب منصورية..
خاصة إذا كان في فزع بوغة.. ويردفوها هكذا( عوافي.. عوافي.)...
..............
نعمل خيط ترجمة تلفزونية
بوغة.. وردت في القاموس.. وهي يحفروا الحيضان ويجهزوها ليرموا فيها التيراب .. زراعة
فزع.. وردت وهي النفير

التحيه لكما اخى ابحنه وحسن..بديت اقرا فى القاموس لامن راسى لفه صحيح اصبح قاموس عديييييل كده...اقترح ان ينزل فى كتاب ليستفيد الكل وخاصه الاجيال اللى خرجت بره البلد....
البزديق:وهى المعراكه عند الاخرين
العفينونه: الجرجيرالبقوم عشوائى خاصة فى موسم القمح.
فكة الريق:الفطور البسيط المبكر.
بايت القوى:نايم ليلا بلا عشاء.
البرادى قراصة صغيرة...كانت تقدم للاطفال عند وفاة شخص وتؤكل مع الحليب.
وتانى ايش ياربيييييييييييييي