قاموس المناصير اللغوي

تذكير بمساهمة فاتح الموضوع :

كل الأعضاء وغير الأعضاء يشتركوا فيهو.. أي واحد يجيب كلمة هنا ويشرحا.. ويبرهن عليها وهل هي كلمة محدودة في منطقة معينة في المناصير أم تستعملها المناصير كلها.. وإذا شك الناس في استعمال هذه الكلمة الحكم يكون زول كبير معمر من المناصير أو زولين كدة.. هذه نواه في إتجاه كتب يس مصطفى وأبو مصطفى
نبدأ باسم الله بكلمة
.............................. ويا ريت تكون الكلمة غير مشتركة مع جيرانا الرباطاب أو الشايقية.. وإذا اشتركت الكلمة يجب التوضيح

المنداجة: بفتح الميم وتسكين النون وفتح الدال وفتح الجيم.. تعني دكان متحرك على ظهر حمار بضاعتو في خرج ز
مكان الاستعمال:- كل أعراب بوادي المناصير، وتنتشر الكلمة في جهات البحر التي يرتادوها هؤلاء الأعراب.. زي بوني وبرتي والنعوفاب وبعض أجزاء من شري.. وعرب بوادي كبنة.. وعرب الجماميع.. ومنطقة عتمور الشرق حلة الكنيسي العرب في العمارين..هذه كلمة خالصة وخاصة بالمناصير وخاصة أعراب البوادي منهم
ومن مشتقات الكلمة:- يمندج.اي يسمسر ببضاعته هذه التي على ظهر حماره

التِـرِهويات:-
هى الإرهاصات
إذا واحد عايز يزرع ويبدأ في بوغة القمح لازم يراعي النجوم وبزوغها وتحريكها في مجراتها وحركة ريح الجنوب وحركة مد البحر وفيح الحر.. وهو علم يعرفه ال( السموده) عندنا مهندسي السواقي.. وسمد وظيفة أركان حرب في مسميات الساقيي( الوالدو سمد أم حس.. ماليها حبسو يكس.. قبل السموده تحس.. ده الدورا وجا يحش) هذا مقطع من بلال خليفة بلل من قرية البللاب أو المسراب لما تزوج في عام1962 القرية التالية لسوق النعوفاب.. وهو الآن يسكن بقرية أم عشر فتيح العقلين.. وقد قامت بعمل البلال حليمة بت أم جر.. مع مساعدة شلومنه بت الحسين من قرية حوش فرنيب

الإندويات:-
إتجاه الكلام أو إتجاه الحديث، ومايرمي اليه الحديث، زي ما بيقولوا أخوانا المصرين( على بلاطه) يعني جيبو من الآخر ما تلف وتدور.. مايرمى اليه الحديث
يقول لك المنصوري مثلاً( حديثك ده يازول إندوياتو ماشى على ياتو إتجاه.

الريشان
رف من الخشب توضع عليه الأشياء.. والريشان كلمة متداولة من ثقافة السلطنة الزرقاء.. وقد وردت في كتاب الطبقات لود ضيف الله( ريشان الخلوة، توضع عليه اللمبة والمصاحف)

التيلان:-
الشربة التالتة للبوغة من الماء.. وقد هبهب النبات فوق الحفر مليان عافي وخضرة يبشر المزارعين ملوحة التربة إن كانت ما كتلتو.. ولا الحمام أكل البذور ولا الأرضة ولا السوسة آفة التيراب المسوس.كل الحفر شبت على سطح الأرض تهبهب وريقاتها مع نسائم الصباح وريحة الكفان تزكي الأنوف هذه الرائحة المميزة عندما يكون العيش مسقي من عشية..مخلوطة برائحة الدخان من على صويحبات من يقمن بتنظيفه من الحشائش الضارة،فصار كل ذلك عبق الجروف.. وإنت ماري فوق الزراعة والتنقير يلفح وجهك بشرهن وتمتطى روحك بركة الحقل والدعوات بالتوفيق في الدراسة( بعد زرعنا بعد سقينا... جا الجداد نقدك علينا حنين يا قلبي أنا ..الله لينا)
التيلان الشربة التالتة للنبات المزروع
يتلاقوا في البوش. يقول لرفيقو. اها السمودة عيشن وصل وين؟
يقول ليهو والله عيشنا بقى تيلان
ما شاء الله ما شاء الله.. إنتو عندكم السمد عتمان زرع ليكم مع النجمي
نحنا دابنا سدينا البوغة..

العَـبْلُوجِي:-
قصبة من قصب المريق..الذرة حلويي .كشان قصب السكر. يأكلها الأولاد والبنات..تتخلل الحقل الزراعي..الأذكياء يعرفونها من شكلها.. هل سوف تكون حويي والله لا..

قَـفَّــه:-
وليس قُـفَه
قفة بفتح القاف أي لا ماء فيها وطعمها مر.. ولبها من الداخل غير متجانس هذه العبلوجي
قفة تخس العبلوجي فقط.. ولاتستعمل في اي شى آخر عند المناصير... قصبة قفة عبلوجي قفة لايمكن تستعمل كلمة قفة بفتح القاف في اي شئ آخر غير هذا الاستعمال.. وقفه بفتح القاف كلمة خاصة بالمناصير لايعرفها جيرانهم الشايقية ولا الرباطاب

السَرِيخ:-
لام شمسية+ سين مشدده مع فتح السين وكسر الراء
يشبه ( المراع) ولكن السريخ من شجر الطلح فقط.. ليه. واحدة ما قادرة تكسر حطب دخان من لوكدي كبيري بالفاس. تلجأ الى السريخ وهو رؤوس فروع شجر الطلح الناشفة يستعمل للدخان. أما المراع ممكن يكون رؤوس فروع شجر السنط او السيال أو السلم.. لكن السريخ هو رؤوس فروع شجر الطلح فقط ويستعمل في الدخان أو مجازاُ لكفتيرة الشاي يتردوهو بيها

من طرف **mohamadali** الثلاثاء 17 أغسطس 2010, 4:48 am

هو صحن من الحراز

يا صديق ذكرتنى العبلوجى--بعض النباتات والحشائش منها :
الويد--وهو نبات مزهر يقوم داخل الحيضان--
الكوش--ودا يزرع فى التقانق فى زراعة القمح--وهو له شوك ونوار اصفر ولعل من اسمه --نوبى--
القضب--بفتح القاف والضاد--وهو يوجد فى الجروف وهو قاتل للبهايم
بصل الكلاب--وهو يوجد ايضا داخل الحيضان وله اوراق رقيقى ويشبه البصل

من طرف **الفكى احمد** الثلاثاء 17 أغسطس 2010, 7:31 am

[size=18]ياسلام عليك ياصديق أهو ده الكلام فلابد من التوثيق لكل ماهو منصورى وكل واحد يدلى بدلوه ويكمرق ويلقط حتى اكان من
الدشى لامن مشرارنا يكتر وبعدين نعزل كل نوع براهو طبعا بعد لم الكرموش والمفشق وهسع أنا دلوى فيهو مرحاكة والحيب تابعها والدراش واللهاق والدوكة والواقوود من شعال وكمروق ودرين وكمان فيهو المسحانى والقرد وباقى الدلو لى بكرة بقدرة الله تعالى 0
الفكى أحمد

[/size]

من طرف **بت الماحى** الثلاثاء 17 أغسطس 2010, 11:11 am

بوست رائع و مفيد يديكم العافية و إليكم مساهمتى

الكشمبير: و ديل تلاتة عيدان مقرونات مع بعض و مغروزات فى الارض و يلعقوا فيهن السعن او القربة بتاعة الموية

العمبلوك : و دا العتود الكبير شوية باقى لى

البزتيق أو البستيق : حسب النطق - قطعة قماش غالبا من الدمورية تمسح بها الدوكة للعواسة مع شوية زيت ويكون لونها اسود من كثرة المسح
الشكلوكة : مايتبقى ويلتصق من القراصة على الدوكة بعد قلبها ويتقرمش عند اكله
البكابه : بضم الباء وفتح الكاف المشدده وفتح الباء الاخيرة وهي الفراصة التي يتم عجنها بالتمر وتعمل للمسافرين سابفا (الزوادة )

الرابان:-
تلاتة أعواد مغزوزة في الأرض ورأسهم راس مثلث من فوق يتدلى السعن أو القربة من بينهم
الدَمِـير:-
عود أو قناية أو جريدي يربطوها في روسينها بحبال معلقة في الغرفة ويضعون عليها الملابس. بدل الشماعة زمان.. هل في زول لسه في بيتهم دمير!!
معليش خليها بيت حبوبتو.. هسه دي بيوتكم ما بقى فيها حاجات ما بتتعد

من طرف **الرشيد طه** الثلاثاء 17 أغسطس 2010, 5:47 pm

بت الماحى كتبت:
الكشمبير: و ديل تلاتة عيدان مقرونات مع بعض و مغروزات فى الارض و يلعقوا فيهن السعن او القربة بتاعة الموية .
صديق كتب :الرابان:-
تلاتة أعواد مغزوزة في الأرض ورأسهم راس مثلث من فوق يتدلى السعن أو القربة من بينهم .
هناك ثلاث احتمالات :
1/ كلام الاثنين صحيح .
2/ كلام بت الماحى صحيح .
3/ كلام صديق صحيح .

الأفندي.. هو الكشمبير ده غير موجود لافي المناصير بحر ولا المناصير عتمور.. أرجو أن تسأل أختنا بت الماحي والدتها وهي التي عاشت بالمناصير.. والله أيه رأيك يا سلمان عقيد موش هو الرابان..
هو اصلاُ انقرض إلا قليلا وصارت القربي أو السعن يعلقوها في كروقة تمرة أو يدقوا ليهو مسمار في الحيطة... ولكن لاحظ أن البرودة في الرابان اكثر عشان الهواء بيجيهو من جميع الجهات الست.. شمال يمين شرق غرب فوق تحت وعشان كدة موية السعن وفيها شوية ريحة قطران وريحة قرض وتكون باردة تشيل الحمى والم البطن بتاع الطيب عبد الرحيم ود أختى.. ما أروع السعن البارد معلق في ضل بوغة بين التمر جنب حوض ملوخية سادرة في غيها ومفرهدة وجنبك ود لقاي شطرها متدلى فيهو أم راس وام نص.. 0 عصمة يا جارة الوادي، وجارة سلمان عقيد)أما يا بت الماحي ( العمبلوك دي كلمة موجودة وما أحلى لحم العنبلوك.. أو العمبلوك

السعن
والقُـفُل
والجراب
والقربي

السعن والجراب والقربة معروفة على نطاق السودان وخارج السودان
أما كلمة قُــفُل:-
فهي كلمة منصورية سائغة وخالصة
والقفل زي السعن لكن قوي شوية وغير مضاف اليه قطران بعد دبغه كشأن السعن والقربة. والجراب
لو تلاحظ السعن لين وطري وينضح بالماء. ليه؟
عشان ضايفين ليهو قطران في عملية الدبغ. عشان يبرد الموية. القربة والسعن لينات عشان يبردوا.. عملية الدباغة ليهم ذاتا دقيقة تأخذ ثلاثة مراحل من التشميس والتمليح والدبغ والشد والدلك بالقطران
أما القفل وهو توضع فيهو قزازة السمن عشان ما تتكسر.. او توضع فيهو لحمة السوق.. زمان الناس مواعينهم ( قفل) مافي داعي تتعب في القفل والجراب في عملية الدبغ والتدليك لأن مهمتهما محدودة.. اما القربة والسعن. يحتاجان لرجل معرفة في فنون الدباغة موش أي واحد يعرف يدبغ قربة او سعن. يقول ليك قربة يدبغا فلان دي قطع شك راح تبرد حتى ولو أديتو جلد تور يخليهو ليك يبرد.. هي فن وإجادته هسه نحنا عندنا في الغرب( مبلول ود كسبة) القربة البيدبغا اكيد تكون تلاجة بس..
في شري الماحي ود العريبي برضو زمان القربي البي يدبغا ما بتتعقب.. جنب ناس الطيب أبو مصطفى في دماج منهم لاتحت هنالك جزيرة إسمها( دنكو) هذه الجزيرة فيها واحد من النعوفاب معرس تلاتة حريم.. إسمو عسكوري.. أو حمود ود عريضيي برضو راجل دباغ في القرب

من طرف **النفر** الثلاثاء 17 أغسطس 2010, 10:32 pm

الدقة:- تنطق بضم الدال وفتح القاف المشددة وطريقة اعدادها (يحمص الدقيق مع شوية ملح وبهارات) وترفق مع البكابه التى تم ذكرها سابقا كزواده للمسافرين..

السحارة:-
صندوق كبير له تلبيسة من رقائق الحديد من الخارج للرونق. إما برونزي فضي أو مذهب يلمع..
كان العروس لما تُرَحل لازم يجيبوا ليها سحارة.. وكمان العريس يقول لى عروسو.مزاجك سحارة مذهبة والله مفضضة.. وما كان في طريقة يسوقوها عشان تختار سحارتها، لأنو السحارة مستوردة وتجي من مصر عن طريق الباخرة وتباع في ميناء حلفا القديمة.. يعني كان البي يجيب لى مرتو سحارة ومعاليق قدح دبكر سوداء تزين بها غرفة النوم إن كان هنالك غرفة نوم عند المناصير. اصلو من شدة الأدب عند المناصير لاتدري متى يتم اللقاء عند أهلك اللقاء الديني المشروع لغاية ما بقينا رجال ما عارفين اي حاجة في اي حاجة كترت الأدب طرشتنا.. هسه عليك الله الشافع مع أهلو عمرو أربعة سنوات يعرف اي حاجة في اي حاجة.. ياخي ابوك زمان كان قعد في العنقريب إنت ما بتقعد جنبو ، تعتبر قلة ادب لو قعدت جنبو.. لو قعد في العنقريب إنت تقعد في الواطه.. ولو مشى في الطريق لايمكن تمشي قدامو ولاحتى جنبا لجنب معاه في الطريق، تعتبر قلة ادب.. بل تمشي وراه..
أها السحارة :-
ومعاها المعاليق زي غرفة النوم الهسي دي عند ( المحاميد)
السحارة يختوا فيها الحلة الفيها الدهن المقلوب.. اي الدهن الغسيب
ويختوا فيها السمن والدلكة وممكن ربيت الضحيي
وبعض أغراض النساء. كحل حجري .ما كان في روج والله مروج زي هسي دي
هذه هي سحارتهن
منو لسه الفي بيتهم سحارة؟
اقصد بيت حبوبتو

[sizeمقق........... بفتح الميم.. وفتح القاف وتعطيش القافين.. اي قاف يمنية
هذه كلمة منصورية خالصة لايعرفها جيراننا
والمقق تطلق هي ما بين المر والحامض والمسيخ، لا الحامض تعطي معناها، ولا المسيخ تعطي معناها ولا المر تعطي معناها.. لايعرف المقق إلا من يتذوقه، علم ذوق يعني
.....................
وشاعر المديح الفذ حاج الماحي يقول في قصيدته المشهورة
من عنا لك وانسرق... يا أم قلة دوب... الحسارك لى حرق
الى أن يقول:- بي تفلو كم حلا المقق
.......................
وحاج الماحي أصوله البعيدة جدا جدا جدا هي من قرية العقيدة في الجعليين، ولكنه على كل حال في حدود المناصير، هذا إذا لم نقل حسب معطياته الشعرية أنه منصوري قلباً وقالباً، وقد وجدت كثر من الباحثين من يعضد رايي هذا ويسندني فيه
صديق عبدالله علي أبوحنة
كبار الشخصيات

--------------------------------------------------------------------------------
عدد المساهمات: 208
نقاط: 847
تاريخ التسجيل: 14/07/2010

=24][/size]

البُـتِّـق:-
بضم الباء وتشديد التاء وكسرها
هو ما تبقى بعد حش الذرة.. المريق، تاني الجذور أو الجضول تقوم تنمو
الجضول:-
أي الجذور

الفزع:-
ليس معناها الخوف كما يتبادر الى الذهن
وإنما معناها النفير

الجابي
أو القَـوَتّي
الجابي هي مربط طلمبة وابور الزراعة مكان ما تتدلي الماسورة وبلفها في المياه، وعند التخصيص تطلق الجابي على مكان حفرة الوابور والقوتي تطلق على مكان الساقي حيث تتدلى القواديس في البحر في حفرة عميقة
قادوس:-
من مسميات الساقية وهو قلة صغيرة أو مجموعة قلل ربطت بإحكام على الللس كسبحة
الللس:- حاضن القواديس يبان كما خيط المسبحةويصنع من الحبال المغلظة المفتولة، وهو كسير طنبور الدينمو في السيارة

الاخ الصدوق ماقدرنا نجاريك حتى بالقرايى—(مالك كاردا كدى) –اما الرابان فهو الصحيح ولكنه قديم جدا—وفى ناس يقولوا الكانجال –اما فى الساقية فمعظم المسميات –نوبية—وكما ذكرت انت سابقا—ومن قبل ذكرت انا هذه الاشياء ولم يعبرنى احد واوردها الان طالما انت ذكرت (القوتى):
1-التبشوقة—وهى اداة مصنوعة من السعف يسحب بها الطين من القوتى للسماح بدخول الماء –وهو الامر الذى يتتطلب –(الفزع –مصحوبا بالضبيحى والمريسى )—كما انها مثل حيث يقال فلان كراعو زى التبشوقة—لكبرها—وانا دايما بربطها ب (الكاشانا) –
2-الكلاتودا—وهى ساقية صغيرى –تشغل عندما تكون الساقية الكبيرة فى الصيانة—وهى نوبية—حيث ان (كلا)هى الساقية—وتود هو الولد بالنوبية—وكذلك البنت عندهم (برو)—حيث يقال –برو اشرى—يعنى بنت جميلة—
اكرر ان هذه الاشياء اوردتها فى موضوع اخر بالمنتدى فى بوست (الامثال والعبارات الشهيرة بالمنطقة) كررتها عشان تفتح للصدوق مفردات اخرى

سلمان عقيد عتمان
واحد منصوري مرتو كانت تساهر معاهو في الكلتودا بعدين حن عليها وهي تعباني ومساهري
قال ليها:
الكلتوده مصت دمك
أخديلك شهير عند أمك

الكَنْـتُوش:-
هو حلة من الفخار يشدوا فيها كرامة الحب.. الذرة.. يقولوا تكافي البلاء

من طرف **الفكى احمد** الأربعاء 18 أغسطس 2010, 9:12 am

انا سمعت يا صديق زمان يقولوا الفرهودة مصت دمك اخديلك شهير عند امك والفرهودة هى ارخص انواع الذرة فى زماتها
وكان الراى السايد بعدم احتوائها عناصرغذائيه كافيه حيث كانت تجلب من الصعيد وتسمى احيانا عيش الصعيد ويقال ذلك
لست البيت التى لا يتوفر عندها عيش غير الفرهودة بان تعود لبيت ناس امها السايقين القمح ومريق البلد وتقعد لها شهر
حتى تتغذى وتعوض ما فقدته من اكل الفرهودة
الفكى احمد

أيوة أيوة يا الفكي ذكرتني كلامك صاح
هي الفرهودة وليس الكلتودة.. وهنالك فرق بينهما
كما ذكرت أنت الفرهودة هي نوع رخيص من الذرة.... كانت ترددها عمتي آمني بت أ بحنة( آمنى القليص) رحمها الله

القَلْتِي:-
جكانيق في الوادي تتجمع فيها مياه السيل بعد أن تتوقف الأمطار وغالباً تكون وسط مجموعة حجار
..................
تاني يوم الصباح نجي نعوم فيها نلقاها ناقعي وساقطي ناقعي جنس نقعة حتى تشوف للقاع فيها عكس موية السيل اللي كانت البارح مثلاً.. يفرح أبناء القرى المجاورة بنات وأولاد يطلعوا الوادي يتنسمون نسيم الخريف وحينما يرون قلتي يقلعوا هدومهم بنات وأولاد ويسبحوا فيها جميعاً وهم زي ما خلقهم ربهم لباس التقوى يغتيهم( ولباس التقوى ذلك خير) كل زول ما يعرف التاني ولا ينظر للتاني ونحنا ولاد كبار وبنات كبار... هسه عليك الله الناس بقوا ما بيأمنوهم على أرحامهم القريبة بنات أعمامهم وبنات خالاتهم بقوا ما بيتأمنوا عليهن ... شوف بالله الأدب ده زمان كان كيف؟

دهن غسيب:-
دهن غنم جامد في الحلة كمادة خام جاهز للتصنيع والتعديل
دهن مفتوق:-
ده خلاص جاهز للمسوح وأضافوا ليهو الريحة والبرتود أي القرنفل وجاهز لمسوح الشعر ومسيح الجسم وهو بلغة ناس الصعيد دهن كركار
هامات منارات أماتنا.. عمرن ماقالن عايزات كريم ديانا والله كريم تبييض والله قدر ظروفك.. ربن رجال وعاشن حريم صميمات من آخر القبيلي لى أول القبيلي تراهو ده مسوحن.. موش متخلفين نحنا ، لكن ده حال أماتنا اللي كان.. ونحن هنا نوثق لتاريخهن.. طول عمرن لاشكن ولابكن وشعرن طوال وما عندهن عوجي.. بنات القبيلي وأنا شاهد عمرا مافي مرة وقفت في محكمة المناصير محكمة عون الله بسوق النعوفاب، عمرا مافي مرة وقفت قدام المحكمة طالبت بحق نفقة، والله طلاق والله نشوق والله هجر.. ولا سجلت المحكمة حالة واحدة ودفاترها تشهد على ذلك.. كلها قضايا مرجلة وطين وجروف حواء المناصير منها بعيدة وعيب واحدة تشتكي ود أعمها أو ود قبيلتها حتى.. عاشن صابرات صامدات بالفي والمافي.. التحية لهن..

الاخ الصدوق ذكرتنى القلتى الفى مديسيس--قصادنا وكذلك فى خور الرتج--وخور الحنانين (وادى شرى)--
وبرضو القلتى --حيوان صغير كالضب فى الشكل ولكنها اصغر --ولها القدرة على القفز --وهى عضتها قاتلة

آه يا سلمان!!!
أيام ذكرتني قلتة خور الرتج وفوقا صالح ود عسكوريي
وقلتة المديسيس
إنت عارف هذا الوادي أسمو المديسيس ليه؟
هو اجمل وادي والمشع والتبس فيهو بيكون أخضاااار لفترات طويلة
سموهو مديسيس فعلاً عشان بيقع بين واديين عظيمين
هما وادي خور حنون ووادي الشلال..
ياخي وادي خور حنون ده لما يسيل زمان يومين يمشى. ناس شري ديل كلهم يتلموا يتفرجوا فيهو في حجيرة البحر.. ونحنا هنا في الغرب ممكونين لأنو بيكون السيل شال العيش بتاعتنا الفي حلق الخور.. وشال( الدرو بتاع البابور) عشان كدة أنا خططت للوالد نظام الخرطوش يكون مدفون بي تحت السيل ما بيقلعوا بل يزيد ردم..

التَـمَـدِ يِ:-
حفرة تحفر في الوادي عشان تجيب الموية الناقعي وغالباً تكون في الخلاء بعيدة عن البحر
الجمام:- حفرة تحفر في الوادي عشان تجيب الموية الناقعي.. وتكون قريبة من البحر وتكون في موسم الدميرة
ويلاحظ الفرق الدقيق بين الجمام والتمدي

الرِ قـيطِي...
تستخدم في ترسيب الطمى من الموية في زمن الدميري.. وناس تطلق عليها إسم الدرابي للتعميم بدل التخصيص بالإسم المعني

من طرف **ahmed alkhabir** الخميس 19 أغسطس 2010, 3:14 pm

الاخ صديق سلامات
مشكور علي هذا الابداع
ياخي انت حقو تكتب لينا رويات تنطلق من من مجتمعنا المنصوري الجميل وزي ماقال نجيب محفوظ الطريق الي العالمية يبدأ من المحلية والله ما طالبني حليفة لكن كأني بقرأ في رواية للطيب صالح ، لا لا مش كدة العفو انت كتاباتك اجمل من حقت الطيب صالح بس لي زمن طويل هنا في السودان الكتابات الجميلة بيقولوا زي الطيب صالح

المُـحْـجَانْ :-
آلة مصنوعة من الخشب طويلة رأسها يشبه حرف الحاء.. تستعمل في هز الأشجار لرمي العلف للبهايم التي ترعى تحت الأشجار شكله هكذا
حـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
يحت البرم والخروم والعلف جنس حت، لأنو راسو الزي حرف الحاء ده تركبو في فرع الشجرة ويلا تهز.. والله ما يفضل في الشدرة أي شي إلا يحتوا ليك...
بس تعمل حسابك أثناء إنت ما تهز تبعد شوية من تحت الشجرة. لأنو مرات الأولاد يكونوا مفلعين الشدرة بي حجار والحجار دي تكون وكراني في فروع الشدرة فوق أول ما تهزها بالمحجان تجي واقعي فوق راسك تجيب خبرك.. استخدام المحجان فن برضو وعايز خبرة موش ساكت اي زول بيعرفوا.. والعجيبة إذا إنت بتهز وتعاين لافوق على الشدرة وفاتح خشمك! والله يقع فوقك حجر من فروع الشجرة دي يحت ليك سنيناتك يقطعن الواحدي.
والله قبل كدة المحجان ده راميلو حجر من فوق كاسرلوا سن بت عندنا كانت سمحي سماحي للليلي خلى ليها سنها شرمة. إلا راحت الخرطوم عملت ليها سن
.................
برضو مع إنو ده عربي متمرس ولد سعد ود عمر العربي الفي أبو سباع. مرة العتمور محل عليهم.. بعدين عزمهم أحمد الحسن القانون. قال ليهم تعالوا بي غنمكن اقعدوا في جزيرة أترم في شري جزيري كدي قريبة من ناس ود النفر.. أها سعد ودعمر جاء.. الكلام ده كان في أواخر التمانينات كدة..
أترم الجزيرة دي ناس كتار عندهم فيها حق من ضمنهم أحمد الحسن عثمان القانون. يبدو إنو اترم ما نفعت معاهو.. المهم جاب غنمو وجاء قعد في خوي كجار الذي يفصل قرية أم لقاديب عن الجزيرة كدر في شري.. هناك في غابة شدر سيال وطلح غابة سمحي خلاص الناس يرعوا فيها عاصري على قرية كروم أكثر من أم لقاديب هذه الغابة. المهم جاء قعد هناك الناس رحبوا بيهو لأنه رجل فارس وكريم سعد لما العربات تجيهوا في الخلاء كان يلاقيهم بالأكل ومرات يضبح ليهم. زول فارس لما يزعل شنبو ده يقيف سبيبي سبيبي.. عندو شنب طويل زي بتاع النعام آدم... مع إنو سعد ده وبالرغم من فراستو دي الناس لاموهو سنة1967 في الكتلة الحصلت في الخلاء خليفة ولد نعمة بت العريبي كتل ولد ود تومابي. قالوا سعد ده مفروض يدخل واسطة يصالحن ما عمل شي لامن خليفة كتل ولد ود تومابي.ما كان حاضر يوم الكتلة لكن القصة من زمان كان مفروض يبعدوهن من بعض.. ... خليفة سجنوهو في الدامر فترة طويلة بعدين فكوهو
...................
أها
سعد في المحل جاء قعد في الغابة دي بتاعة كروم.شدرها فيهو جنس برم.. المهم سعد ده عندو ولد.لقى ليك الطنابير والرتوتي في البلد الولد قام إشترى مسجل من القوز و معاهو عشرين شريط طنابير موت.. وجاء يشغل المسجل كل مرة بالليل.. سعد راجل حساس برضو ورقيق مع فراستو دي
قالو يا ولدي هسع الحكايي دي كيفنها؟ نحن قاعدين لينا فوق ناس، وإنت عشيي عشيي تفتح مسجلك ده! صوتو ينسمع لى أم لقاديب ولى الودة.. اقفلوا ياولدي والله نرحل من فوق الناس؟
بالصباح الولد شايل المحجان ويخبط للغنم وقع حجر كبير أخو بنات من فرع الشدره جادعنوا عوينن مسختين وقع ليك فوق المسجل هرسو هرس لحقو ليك أمات طه.. وزعلة الوالد كعبي
وهزة المحجان وخشمك فاتح لافوق كعبي كمان

درب السلطان :- يعني الشارع الرئيسي..
شرح:- ولاينطبق هذا الوصف على الشارع في المدينة على الإطلاق.. يعني ماممكن منصورية خرطومية تقول والله لى شارع الموردة الخرطوم مثلا درب السلطان ابوى سايق سيارتو في درب السلطان..ما ممكن كدة؟؟؟؟؟
درب مقدود واحد لمشي الناس الراكبين حمير وكدة ودرب طريق رئيسي غير مسفلت شرطاً يكون رابط قرى حلال كثيرة مع بعض ده هو درب السلطان المعني

من طرف **الفكى احمد** الخميس 19 أغسطس 2010, 7:24 pm

الصنقوعى هى مؤخرة الرأس
الجضم بضم الجيم والضاد هو الخد أوالشدق
المخروقة هى عظمة الفخذ العليا
الزلومى هى المكان البارز
العتعت هو المكان المرتفع
العوين يقصد بها الاولاد الصغار ؛ الشفع بضم الشين وتشديد الفاء
العسكار يقصد به الدخان
البعاسيق يقصد بها الدخان
الفكى أحمد

من طرف **الفكى احمد** الجمعة 20 أغسطس 2010, 12:42 am

الهبيدى :هى مكان هرس وتكسير فروع ومراع الشجر وتنظيفها من الشوك قدر الامكان لترعى فيها البهائم .
القيروانة :هى الصفيحة فى زمانها والتى كانت تستعمل وعاء حاويا للزيوت أو الجاز ونقل الماء وقد حل الآن البلاستك
الذى تصنع منه الجركانات محلها واستخدمت أيضا كمعيارأومكيال .
القسيبى :وعاء لحفظ المواد التموينية وتصنع من عجينة روث الأبقار دائرية الشكل مثل البرميل تماما خفيفة الوزن سهلة
النقل غالبا تكون فى القطيع {مخزن ناس زمان}ويمكن الاستفادة من بقاياها اذا تكسرت كوقود للنار .
اللمينى :مايسند به المرق وقد تكون من شجر الدوم أوالنخيل أوعود شجرة أوماسورة وخاصيتها تامين السقف .
الفكى أحمد

التميم:- مرحلة سبيطة التمر قبل الدفيق يا دوب فتحت السبيطة بعد القروعة وصارت بها براعم خضراء
الدفيق:- صار أخضر وحجمة كبير ولكن لون التمر في السبيطة كله أخضر
الصفوري:- صار لونة اصفر وممكن يؤكل والحلو منه هو ثمر ود لقاي وثمر المشرق أما الجاو وهو اصفر يكون مراً
الطيارة:- بدأت تكون واحدة في الشطر صفراء ومحملة بالصفار وباقي السبيطة أخضر
الدغوسي:- في طريقها الى أن تكون أم راس
أم راس ظهر عليها الإستواء في راس كل حبة تمر.. وفي هذه المرحلة تبدا الطيور تنزل على سبايط النخل
أم نص..إتنقرت في نصها بالاستواء
البقوعي:- ظهرت حالة الاستواء على التمر كل حبة فيها بقعتين او ثلاثة مستوية
المعصود او المهرود أو الهرودي:- مرة إستواء كاملة لسبيطة النخيل

الدَ نْـفَرِيس:-
بواقي الأكل في الباشي تجمع في قدح وتعطى للأطفال على السليقة فقط بدون لحم احياناً
هذا وقد علمت أن الكلمة مشتركة مع الرباطاب.. ولا ادري غن كان الشايقية يعرفونها أم لا
الكَـلّكاب:-
بواقي كسرة الباشي تشر على بروش وتجفف وتسحق في اليوم التالي على نار هادية وتؤكل وهي ثقافة أعراب المناصير
الـشَمُوم:- تجي شايلاه في كمشه المرأة التي تشرف على توزيع الطعام في الباشي وتقسمه على الأطفال حتى لايتصارعوا على اللحم والكبير يظلم الصغير، أما بالنسبة لشموم الكبار فهو يوضع على الصحن نفسه
الجَـبَا:- هو نفس الشموم لكن بكمية كبيرة ويكون يوم الباشي في بيت المراسة او بيت الفقرة ناس البقنية عندما يعطي صاحب الباشي كل بيت خروف يقومون بذبحه بمفردهم في بيتهم ومعظمه شواء على جريد النخل والباقي يضعونه على قدر كبير كسليقة يرش على الكسرة كغداء على أنغام قرعة المريسة، والجبا دائما يكون من المشويات على جريد النخل وهو لكل شخص عندو عانة وهي الإعانة لصاحب الوليمة..

الـقِـعَييده:-
هي لحظة تتويج العريس وغالباً تكون بعد الرابعة عصراً

السبوع:-
هو سبوع العريس من أول يوم في العرس، وتكون فيه احتفالات بمرور أسبوع على العريس، وإذا قصر العريس في إكرام الضيوف، قد يكون فيهو( حدريبة) بالشعر للعريس، شعر هجاء
الشُوف:-
تجمع أم العروس حريم الحلة والحلال المجاورة وتذهب بهم الى بيت بنتها بعد ما يرحلوها في بيتها، وهو تقليد خاص بالنساء فقط، والنساء المدعوات لازم كل واحدة تكون شايلة حاجة
طقم كواري
طقم صحانة
طقم كبابي أو اي شئ من هذا القبيل.

إتْـكَلّل
:-
يعني إتفنقل، يعني أب صايد داون.. ولازم يقع إبتداءاً من الصلب. أو زول جالس..
الزول الواقف ما بنقول إتفنقل ولا إتكلل. ممكن نقول إتشقلب..
الشَنْـقَلوتي:-
لعبة أطفال.. خشبة طويلة في منتصفها وتحتها حجر كبير. كل طفل يجلس في ناحية.. وتبدا اللعبة بالصعود والهبوط
يمكنك أن تراها اليوم في حدائق الاطفال بصورة محسنة وصورة عصرية.. حديقة حي الرياض بالخرطوم وإن طالع من مطعم( سيدي بيه)

من طرف **النفر** الجمعة 20 أغسطس 2010, 10:22 pm

الاخ /صديق عبدالله:-
الله يديك العافية ويحفظ لك هذه الذاكرة الحديدية--لقد قرقرت جنس قرقير عندما طالعت مفردات البوست أعلاه ،قلت الزول ده الكلمات الموكره دى يجيبها من وين وما يثير الدهشه الكلمه ومعناها (اتكلل يعنى اتفنقل ) هذه المفرده الموكره وشرحها الموكر لو اطلع عليها جيل اليوم حيقول دى مبالغة وجناس تام وما أدرى أيه ولقد فسر الماء بعد الجهد بالماء؟؟؟
تقبل تحياتى ومرورى ،،،

النفر لايتذوق الطاعم إلا الطاعم.. إنتو ذاتكم أسرة الشاعر ما طاعمين.ز ومساهمين في الحياة العامة
أولا الخلاني ملم بهذه الأشياء.. الخلوة بتاعتنا وأنا اشيل الأكل.. ناس قبلي ناس بحري ناس عرب ناس خلاء. ناس فوق... بعدين عندي حمارة زين فالحي زي البابور حمارة حاج عبد الله حمارة زرقاء عالية تشبه الحصان وذيلها زي الحصان.. سريعة عندها ميز أخرى ذكرها سلمان عقيد.. أها ابوي بيكون مشغول باللنش.. انا مفرغ مرات للبكيات للأفراح للمناسبات مناصير عرب وبحر.. ثانياً الفترة الزاهرة في شري كنت انا موجوداً فنرة الستينات والسبعينيات موجود بشري
ثالثاً أصلي أنا معجون من تراب البلد واهلها وحبي لهم عظيم للغاية..

عشان ما نمر ساكت على القاموس نقول كلمة
القَدَح :-
قدح البكاء قدح المأتم.. وكان زمان عيش ذرة.. أما الان صار كشف وقروش

ألْـوَتْ:- يصعب السيطرة عليه
يقول ليك الزول ده زولاً ألوتْ.. يعني لما يقوم لما يهيج يخرب الأول والآخر( ديك عدة)
يعني لما يزعل يفقد خصائصه الإنسانية كلها ويتصرف كأنه تور هائج تصعب السيطرة عليه..

كَـدوكـِي :-
هي القشرة الخارجية التي تقي بذرة شجر الدوم

التِلْـقِـيِحِي :-
خارج البحر قد تكون نفس الأعصاير لكن لايقال لها تلقيحي.. التلقيحي تلم فيك في نص البحر.هبوب تحرك الموج ليس لها إتجاه ثابت.. إذا كان عندك مركب فيها شراع يتكجرك عليك ويتلولو ما تعرف إتجاه الهبوب جاي من وين، وإذا تعدي في مركب بدون شراع وتلم فيك تلقيحي في نص البحر، تقطع قلبك بي عداا المركب تعدي لامن عرقك يتخارت ما تركز الحجرة.. يقول ليك فلان زي التلقيحي لاتعرف أولو من آخرو
التلقيحي:- مجموعة أعاصير متمازجة مربوطة بحالة المد والجزر والتبخر والمناخ.. وغالباً ما تكون في موسم الصيف

من طرف **ALIHADOWRY** السبت 21 أغسطس 2010, 2:30 am

ابن جدى رمضان كريم مشكور على الجهد التوثيقى للغة قبيلة ركب على سنامها فى غفلة من الزمان وحقو تطرح فكرة موقع كامل للتوثيق.

علي حدوري عندي ليك مفاجأة.. بس لازم تدفع قدح الدرب كان ما دفعتو حا تشوف؟
وقدح الدرب هو ترسل 300 الف جنيه الى بنت أختى سيدة بدوي
قدح الدرب:- مبلغ عيني أو نقدي شبيه بالبياض