مرافيء وظلال

من طرف **ود المناصير** الأربعاء 14 مارس 2012, 4:44 am

تذكير بمساهمة فاتح الموضوع :

بدءا .... اقول للجميع :

سلااااااااااااااااااااااام

ثانيا :

هي مساحة للبوح الهادئ ولكن بصوت مسموع ...

فقد طرقت كل ابواب المنتدى ووجدتها جحيما ـ أن جاز ـ هذا التعبير ... وحتى تلك التي دخلنا إليها بكلمة .. سلااااااام ... وهي كلمة واحدة نطلقها في وسط الردود عندما لا يعجبنا الحال ...

ولكن من يسمع ؟

لذلك قررت أن أنشيء مكان ـ خاص ـ ارجع إليه اناجي فيه نفسي ... وأونس براي ... وكمان أجيب نكات

وطبعا هذا الإجراء عندما يتعكر الجو ... ولا يسمع لنا صوتا ...

صحح سأتحدث هنا عن أشياء متفرقة ... وملاحظات عامة ...

من أراد مشاركتي فالباب مفتوح للجميع ... فقط المفتاح ... لا مهاترات لا تجريح

******************************

من طرف **ود عون الله** الخميس 17 مايو 2012, 11:04 pm

أنا حلمي أعيش

أقرض بكابة أو حتة عيش

أسكن في عويضة وليها حويش

أعيش مستور ونضيف الفيش

وانا حلمي أعيش

درشت دريش

كملت الجامعة بالكربيش

وجيت الأول ماني الطيش

وحلمت حياتي تكون فرفيش

سعادة كبيرة وأزيد قريش

انا حلمي أعيش

وعند اللجنة لقيت الناس ملمومة جيش في جيش

إسمك مين---الإسم عطية --الكنية عليش

يا زول تعبان الجابك أيش

أنا جاي مهرول وحقي أعيش

إتلفت داك وسمع وشويش

من زولاً أملس وليه كريش

الناس من بدري جونا دغيش

الدرب ممهد مافيش تفتيش

دفعولنا كتير غطولنا الريش

الزول غلطان الزول درويش

خانات مافيش --واسطات ما فيش

وأنا الأول جابوني الطيش

يا زول معليش

واسطات ما فيش

زاد الدقيش

في الشيش والبيش

واسطات ما فيش

أحرت تربال أو أمش الديش

واسطات مافيش

شغلك في السوق --شغلك ورنيش

يا زول معليش

معليش معليش

من طرف **ود عون الله** الخميس 17 مايو 2012, 11:10 pm

عمري العشرين ساوى الستين---لزم التقريش

من طرف **ود المناصير** الجمعة 18 مايو 2012, 3:40 am

ود عون الله كتب:عمري العشرين ساوى الستين---لزم التقريش

ونحن كمان ـ كنا ـ نحلم بالفرفيش

ودغيش في دغيش

حصدنا العيش

طلعنا مُطالبين الخيش

من طرف **ود المناصير** الجمعة 18 مايو 2012, 3:54 am

محمدمحمودانقا كتب:اخد دلعك من هنا علينا جااااااااااي حسب مهنتك

1- الكيميائي : يا احلى تفاعل

2- الفيزيائي : ذرات حبي

3- المهندس : يا مثلث عمري

4- الرسام : يا اجمل لوحه

5- التاجر : يا اغلى بضاعه

6- الموسيقي : يا احلى نغمه

7- الطبيب: يادواء القلوب

8- الصيدلي : يا بلسم الفؤاد

9- رجل العقار : يا ازين استثمار

10- العسكري : يا سندي ودعمي

11- الصائغ : يا عقد ثمين

12- بائع المكسرات : يا لوزه

13- الفلكي : يانجمتي

14- المحامي : يا سجن قلبي

15- الشاعر : يا قصيدتي

16- الموظف : يا راتبي كله

17- البقال : يا عسل

18- الخباز : يا ناري

19- بائع العطور : يا دهن العود

20- النجار : يا مسمار قلبي

ناثر درر المناصير .. عبر الأثير

ود محمود ٍسلام يا انقا يا كبير

كم تمنينا إطلالتك عبر المرافئ .. وأنت كعهدنا بك ـ دائما ـ تكون في الميعاد

توهط ـ وسط الجماعة ـ الشراب من السعن والوكاي بسيط

الأكل ـ ود لقاي طوالي من السبيط

من طرف **ود عون الله** الجمعة 18 مايو 2012, 4:15 pm

صديقي سلام---سلام مجنون والدنيا جنون

شيل الجوز دا قاسي كدي ؟؟

ياربي الضهر بقي لين---طيب ممكن الواحد يشيل قدر قدرتو

ياربي الناس قالت أبيت---طيب ما تبقى واضحي وليه الدسديس

أوعى تكون حسادي والراس يابس زيادي

الباشي إنتهت والموية وردوها غير

صديقي نحن قداااااااام -----الموية بقت مواسيييييييييييييييييييييييييييييييييييييييييييييييييييير

هلـــــــ هل الجنون معدي ؟؟ ـــــــــــــــــــــــــــــــــــــــــــــــــــــــــــوسة

من طرف **ود المناصير** السبت 19 مايو 2012, 8:07 am

الناس .. الضياهم راح .. والناس الضميرهم غاب

البايعين غلاوة النيل .. والخرابين بلدنا خراب

الماكلين حقوق الناس .. ورافعين في الأسنة كتاب

طول كفك أملأ حرام ..وقصر كفة الجلباب

الفاكين دروب الصاح .. وماسكين شريعة الغاب

وكل ظالم وكل جبار معلقة في رقبتو رقاب

وياك من كاتم الأنفاس وشارب من دمانا شراب

ديل باكين مع البكاي .. وفرحانين ورا الأبواب

العينان

ترمشان معاً

وتتحركان معا

وتبكيان معاً

وتريا الأشياء معاً

وتنامان معاً

ومع ذلك لاترى احداهما الاخرى

إذا المـرء لا يرعـاك إلاَ تكـلـفـــــا
فـدعه ولا تكثر عليه التأسفــــــا

ففي الناس أبدال وفي الترك راحة
وفي القلب خير للحبيب ولو جفا

فما كل من تهواه يهواك قلبــــــــه
ولا كل من صافيته لك قد صفــا

إذا لم يكن صفو الوداد طبيعـــــــة
فلا خير في ود يجيء تكلفـــــــا

ولا خير في خليل يخون خليلـــــه
ويلقاه بعد المودة بالجفـــــــــــــا

وينكر عيشا قد تقادم عهـــــــــــده
ويظهر سرا بالأمس قد خفـــــــا

سلام على الدنيا إذا لم يكن بهـــــا
صديق صادق الوعد منصفــــــا

من طرف **ود المناصير** الإثنين 21 مايو 2012, 5:05 am

حاج حاتم ... سلام

جزاك الله خيرا

واصل ـ بلا فواصل

وانت واحد من أعمدة المرافيء

تسلم يا حاج

من طرف **ود المناصير** الإثنين 21 مايو 2012, 5:12 am

ود عون الله كتب:صديقي سلام---سلام مجنون والدنيا جنون

شيل الجوز دا قاسي كدي ؟؟

ياربي الضهر بقي لين---طيب ممكن الواحد يشيل قدر قدرتو

ياربي الناس قالت أبيت---طيب ما تبقى واضحي وليه الدسديس

أوعى تكون حسادي والراس يابس زيادي

الباشي إنتهت والموية وردوها غير

صديقي نحن قداااااااام -----الموية بقت مواسيييييييييييييييييييييييييييييييييييييييييييييييييييير

هلـــــــ هل الجنون معدي ؟؟ ـــــــــــــــــــــــــــــــــــــــــــــــــــــــــــوسة

تسلم ود عون الله ـ يا راقي ـ

يكفي ـ نفسك ـ وتكفي روحك ـ

شيل الجوز ماهو قاسي ـ لكن الزول الهميم دائما يكون عجلان

متعك الله بالصحة والعافية

سأوافيك ببعض التفاصيل ـ

وحتى ذلك الحين ـ دعنا نحلم ـ أحلام يقظة ومنام ـ ونشوف مناصيرنا تمام التمام

تكافل ـ تراحم ـ ترابط ـ تواصل ـ وئام وسلام

من طرف **ود المناصير** الإثنين 21 مايو 2012, 6:00 am

بي غادي ـ الهجرة قالوا بقت لشارع البلدية

والهجرة إلى جودابي

فمن كانت هجرته إلى الله ورسوله فهجرته إلى الله ورسوله ، ومن كانت هجرته إلى دنيا يصيبها أو إمرأة ينكحها فهجرته إلى ما هاجر إليه

نسأل الله ـ الثبات ـ

هجرتنا ـ للناس هناك ـ ناس السجية الصافية والضمير الحي ..للذين لا زالوا على نيتهم البيضاء ـ لم يلامسهم دنس ولا وسخ : ..

ولا تفاهات الحضارة

لا عفاريت المدينة

لا العمارات السوامق

لا الألوف الطمطمية

لا البرندات الوسيمة

لا البنوك المخملية

من طرف **ود عون الله** الإثنين 21 مايو 2012, 6:19 am

صديقي سلام---سلام أعذار

قرنا مويتنا ونسيناها --جينا لقيناها ملت الحيضان وإتكسرت في التناقير

أخدتنا غفوة والبابور نسيناه شغال

********

أواااااه----آآهٍ---آآه----ديل با عونا بيع الشاه

حسبونا زي طير الصليعة يطير وكتين يكورك عاااه

الحق المن زمان ثابت تحت ضو الكهارب تاه

شاهنشاه

نحن رجال --نحن أولاد بلد بالجد --نحن نباه

شاهنشاه

يا مظلوم ليك إله

ما بنتغشا للفتان والتواه

رسم أحد الظرفاء حمارا
على عباءة صاحبه
فلما رأى ذلك صاح بالحاضرين :
من الذي مسح وجهه بعباءتي ؟

من طرف **عباس محمد** الأربعاء 23 مايو 2012, 8:06 pm

ودالمناصير سلام

كل مرة ناخد تيويقة نحوالمرافىء والظلال الوارفة

لنجد مايروى ظمأنا

ولكننا وجدنا انفسنا لانستطيع معكم ان نحمل الجوز ونملأ

زير واحد فى هذه الظلال

من طرف **ود المناصير** الخميس 24 مايو 2012, 5:05 am

نحن غنانا للولد البشوف قدامو

للبنت البتسند حيلو شادة حزامو

ونحن غنانا للبلد البراشى غمامو

نطرى جمايلو حميدو وجميل اياموا

جيت ناس فلتكان ختونا فى غوغايا

قالولنا السلام زيت البلد هو الغاية

(شيشانا) القبيل غنونا بالهوهايا

ولدولنا السلام ولدة حبل بالداية

المهدى القبيل ولدا قدل فوق عزة

و(الشيشان) سكوت لا زول عرض لا هزة

يا نص العصا اللاكرة فيك لا فزة

بوش وبلير واخوك ختونا فى قد بزة

من طرف **ود عون الله** الخميس 24 مايو 2012, 9:46 am

نحن نهاتي للولد الكسانا مسرة

لا أكل الحرام في حلقو كسع الجرة

صائب راي حلال الشبك والوكرة

أفقو وسيع وفهمو كبير ثاقب نظرة

نحن نهاتي للبنت الأصيلة الحرة

تبابة الرجال عند البرود والحرة

عند الشورة ما نقصت يمين فد نمرة

نحن نهاتي للبلد الجميلة الدرة

نهوى هواها نحمي حماهانربطا بالوريد والسرة

شوف ناس زعيط جابولنا راياً عرة

واثقسمت بلد مابين كتابة وطرة

لا نلنا السلام لا نلنا دهب الجرة

واتكالبت أعداء صوت الكلاب إنجرة

نفديك يا وطن بى دم رجالاً حرة

وعزك عازة يشمخ جوة يشمخ برة

من طرف **ود المناصير** الأحد 27 مايو 2012, 3:54 pm

كـان تـنـصــحـو يـشـوفـلـو طـــــريـقـة

مـن بـدري الـحـرقـتـو حـــريـقـة

حـسـاسـا نـفـيـسـتـو رقـــيـقـــــة

وصـدمـة مـتـل دي مـا بـيــطـــيـقـا

من طرف **ود عون الله** الثلاثاء 29 مايو 2012, 1:33 am

صديقي سلام ---سلام شورة

أما آن لركاب المركب المبحرة بين النخيل والأشجار عند شط المنتدى أن يترجلوا---بالمناسبة عددهم كم

لو كانت سفينتهم سفينة نوح لأتاها الحمام حاملاً غصن الزيتون واستوت على الجودي

********

اليوم فرح صاح----رتوتي لامن يجيب الترى---برجي وعرضة وكمان بطان---والسيوف الناس تتخاتفه

النقي يسوي الدي---والمكرفونات شقت العقاب ---والناس جاها الظار---والشبال يكتح --والعريس ود بروي

****************

ود لقاي سوا أم نص وأم راس --سوا المعصود---وصاحبو سواهو وقف--أخرتوا سااااكت--أعزموا الغاشي وماشي الدرب

كفاكم من الدفيق والمغمول

**************

صديقي الدعوة نقدمها للريس وأعضاء حكومته --برلمانه---ومجلس الشوري--دعوة عاجلة ومستعجلة

الضيوف الكبااااااااااااار يفرزولم براهم ---يكرموهم ---وما يخلطوهم ---مكانم لازم يكون واسع--جميل وواضح

يا ريس أكرمو الخريطة وصاحبها

من طرف **ود المناصير** الثلاثاء 29 مايو 2012, 5:27 am

ود عون الله ـ سلام

صدى صوتك ـ سيكون جوابك

( عنبور سااكت )

صدقني يا صاحبي ما في زول حا يسمعك .. وحتى لو سمعك ما حا يفهمك .. وحتى لوفهمك ما حا يعمل حاجة

دا ما تشاؤم ـ لكن المتابعة والتجارب علمتنا الكتير

سنوات ـ نهاتي ـ من الحجرة نكورك ـ من القيف ننده ـ وسط الموج يا جماعة هووييي

يا عالم وينكم ـ صلوا على النبي يا جماعة ـ

وكل زول في وترتو ـ ويقل ليك ـ نعالج ـ نكرم ـ نوثق ـ

والناتج ـ صفر وصفر كبير كمان

وفي الصباح أنظف من هناك لي هناك

عفوا صاحبي ...

أبدا ـ لن نبدو كأولئك الذين على رصيف الجامع الكبير في قلب الخرطوم ـ يرددون ـ صلو على النبي يا جماعة ــ

ولكن ....

صل اللهم وبارك على سيدنا محمد صلى الله عليه وسلم

من طرف **ود عون الله** الثلاثاء 29 مايو 2012, 7:24 am

تاتا تاتا

أرفع إيديك تا تا

بى بشيشي على السباتا

البنيي واحلاتا

تتعلم المشي من خواتا

تتعلم البنا والحراتا

تا تا تا تا

تا تا بصات شركة تا تا

بى عراها وبى رباطا

بى حدادة وبى خراطة

أوعاكي من ناس ديك تاتا

المكاجرة والسواطا

والفهم مليان عباطة

للجرح ما فيش خياطة

تبقي تا تا تا تا

تا تا نعلين شركة باتا

ودعون الله وووووووو ود المناصير

سلام يا رايعين

وبالجد ليكم متابعين

شيتن نفهموا وشيتن ما فهميين

اعزرونا لو مقصرين

من طرف **ود عون الله** الثلاثاء 29 مايو 2012, 7:39 am

القلادة

هي الزيادة

مصنوعة من الماس قلادة

الخريطة هي القلادة

الخريطة هي الزيادة

أحلى من الماس زيادة

تزين الحسناء وزيادة

إنت بيها تبقي غادة

أحلى من أول زيادة

من طرف **ود عون الله** الثلاثاء 29 مايو 2012, 8:09 am

أميرة الأميرات سلام

الفهم منك يقسموه والباقي كمان يختوه تيراب

يا أختي أنا أشخبط على وجه الزمن الصاري واتكن كلماتي على تقاند تجاعيده المتعرجة وأسقيها من العرق النازل

ألهث وراء صديقي ود المناصير --لعلي أدنو منه----ولكني دائماً المحه عند منتهى الرؤيا بالكاد

شكراً أميرة ماعلمت أن شخبطتي تستوقفكم لحظة

شكراً أميرة على التشجيع

من طرف **ود المناصير** الثلاثاء 29 مايو 2012, 8:06 pm

هم وغم وآخرتها دم
صنقع عاين شوفن كم
يا مستهلك اوعك تهلك بالتخدير
زيت ابو سمكة للتحمير
وانت بتحلم يا عبدالله بموية الزير
شفع ستة
وساكن حتة
وبيتو ضلمة كقاع البير
فكوا دربنا وجعتوا قلبنا
وحتى كلبنا اكل جرجير

من طرف **ابو مصطفى** الثلاثاء 29 مايو 2012, 8:43 pm

جينا للباشى لى عشانا ؟؟؟؟؟؟؟؟؟؟؟؟؟؟؟؟

لاغرض لا ودتنا عانه؟؟؟؟

السليك الختو ولو زانه

المهندس يقلب رطانة ؟؟؟

تحياتى

ابو مصطفى

من طرف **ود المناصير** الأربعاء 30 مايو 2012, 6:22 am

لقطة الفيديو دي ـ قطعت مصاريني ـ تورت المصران العصبي ـ هيجت القرحة ـ

بالله عليكم زول زي دا ـ بالإبداع دا ـ بالألق دا ـ بالطرب دا ـ بالحضور دا ـ بالروعة دي

يعطلوا مسيرتو ـ ثم يماطلوا في علاجه ـ ويتناسوا تكريمه

من طرف **ود المناصير** الأربعاء 30 مايو 2012, 9:19 pm

في القهوة

محمد الحسن سالم حميد

في القهوة قاعد ضيف
قدامو شاي وتمر
القهوة فوق القيف
والقف جروفو جمر
باين يعاين كيف
في النيل عيونو حمر
بين بالو ضرع طيف
وأيام أبت ما تمر
.. ... ..
قبل علي الباجور
و انذكر الساقي
أرقوق معافي يدور
والموية دقاقي
في حوض بلا طنبور
روقينو صقاقي
.. ... ..
المشرع ال بينين
من قبلي من بحري
سوق شنة والكنتين
والسكر المصري
لاصرمة لاتموين
لا هو الزمن فقري
لاجبر باسم الدين
لامن كسر عشري
تقلب شمال ويمين
تجلب تبيع تشري
باشتك وافندي امين
عمدة وصمد دغري
.. ... ..
كان مرة شيطاني
نتف حبال صبري
وفي ورطة خثاني
عوافي أنا الدخري
ماب أنكر الجاني
للعسكر آب أكري
السمحة تاباني
بخدو السجن قدري
.. ... ..
نشتاق متين الليل
قمراتو من بدري
شفع تكوس في شليل
نلقي ونقوم نجري
.. ... ..
ياعاشقينو حليل
فاقتنا والبكري
وكيف رجعتنا الخيل
ساقتنا ما ندري
.. ... ..
شيخ خلوة والحيران
متلمي فوقو تقول
هو الشيلو القرآن
هو الرسلوهو رسول
من نفحة الايمان
في النفس لما تجول
تروي وتضوي كيان
ماروق قلوب وعقول
.. .. ..
النوبة لما تدق
تابي البيوت الناس
إلا الحماهن عق
والنفس الجلاس
زغرودة لما تطق
في راس تميرا" ماس
نور الرتينة يبق
إحساس ولاب ينفاس
.. ... ..
كان زول زمانو لوي
الإيد دوم في الإيد
ليل ماانفرقنا سَََوي
الجف يدورلو غميد
الفينا هو .. هو
في إندابي ولا مسيد
.. ... ..
تشتا ونبيته قوي
بالفي تكولنا أكيد
أولي الفراشو حوي
اغراب وعربان بيد
نلفح قدحنا هوا
لي ضيقنا نرتي شديد
" وجابلي التمرجي دوا
أكل إنت ماني شديد"
.. ... ..
نمشي الرعية سوي
نسرح بعيد وبعيد
مالين قربنا روي
والفي الكواري جديد
في الوادي هب هواء
بقت الرحاطة جريد
حالاً رويسنا لوي
وعينينا غادي تحيد
بنوت فريقنا نوا
وكركارته إحنا أكيد
النفسو فيها هوى
داير المحنة تزيد
.. ... ...
ياأمو روح وين
شن شال سنين العز
مين جرح البحرين
جنح حنين الوز
.. ... ..
وينا البلاد أم زين
خيرا يهز ويرز
الشي التوالفو العين
ياكم فراقو يعز
.. ... ..
لكنها الدينا ..
وبالله ومن والاه
لابد من غنية
تطلع بكان الآه
بالراحة بالبنية ..
لابد ما معناه
الانسخت منية..
زي ما انخلق عدناه
.. ... ..
فتح حدر في النيل
والواطة بي شهوة
صفق يدين بتشيل
في كفتن ملوة
قنديلي تحت الخيل
ترميها بي نخوة
ياحليل زمان الشيل
بعضنا ... خت قهوة
.. ... ...
صلي الضهر ضهرين
واتحسس الفروة
كان طوله فوق صبرين
كشت بقت بروة
.. ... ...
في الدومي والعينين
مشدوهة .. للذروة
ضرب الارض في اتنين
والدم روي الدروة
الدم ملا الدروة

</BLOCKQUOTE>

من طرف **ود المناصير** الجمعة 01 يونيو 2012, 3:16 am

عفوا سيدي الحجاج
كلابك والأفاعى الحايمة
من روتانا لى امواج
كاورت البلد بى حالها
ماخلت فضل فى حاجه .. لى محتاج
ولا لقت البقول لها "جــر"
فى ناس جعانة
ما قلبت حرف فى صاج
فى ناس عريانة مالفحت
هدم فى الزيفة
ماطالت ايديها رغيفة
والسبب المعكر كيفها
دق بنوتها بالكرباج
ناس غلبانة بس دغرية
مابتعرف تخت طاقية فى طاقية
والدين الحنيف فى شرعها الحرية
زدتها فى الحرج إحراج
وزدتها فى الدجل دجال
عوج شفناهو ماسمعناهو
فى قولة قال
بنات دقوها دق العيش
ولاد ما اندقو فى شبال
وبقت فى غصة الأيام
قيم غنيتها ياقدال
قيم شلناها عِمة وتاج
رقيص الشامة بت حمدين
وخت الحنه ليات من حضور ضفرين
ونمّات العديل والزين
ورقصة جون مع اوهاج
مشينا نقدم البنوت على ضو الرتاين
خفت وهج الغناء الوهاج
رحل صوت المغنى حزين
رطن سوط العنج هرّاج
سقط فى غفلة نون النسوة
اخوان البنات والنخوة
ستّار العروض أب رسوة
شيال الحمول أب عاج
فيا حجاج ..
أُكل نارك و اتلفح بشاكيرك
مع طلعة شهر ذو الحجة
احرم حاج ..
وطوف فوق الجثث طاوؤس
وشعبك لا أكِـل لا علاج
وحاج فى شنو !!
إذا كل البلد هاصت
و فار نحل الجباية و هَاج
فيا فالق نواة الحبة يــــا فراج
و ياباسط عجائب الاسراء والمعراج
ويــــا خالق الخلايا الحية
أمشاج ابتلت أمشاج
طحنتنا طاحونة الفقر
دهستنا سنواتها العجاف
يــااا الله تلهمنا الصبر ،
السُترة ، والعيش الكفاف
وترحمنا من صَرة وشِي
فى وش وليداتنا الضعاف
غرقان ويرقص منتشي
ووطنا مقطوع من خلاف
بسم الله ماخلانا شي
و فَضَلنا فى آخر المطاف
ياناسي أقدار الرجال
ماتخشى غضب الله وتخاف !
كتر عوج الكلام والميل
وتحت الجزمة مليون ميل
تحت الازمة طاحونة حوافر الخيل
سقط تلت البلد عفواً
سقط نص البلد لهواً
سقط كل البلد سهواً
فهل صحاك ضمير الأمة
فى هجعة هوايد الليل
على زبد الغناء الممحوق
شنو الخّلاك تنوم تحلم
على خرطة وطن فى السوق
وطن مسروووق
وطن اشتر
مرق من ذمة التاريخ
على ذمة كلاب الحر
ينوم بجبة الدرويش
يقوم ببدلة العسكر
فيـــاااا ويلك فى يوم الويل
تقوم تحتك قيامة الناس
أفواج الضحايا يجوك
ستات الكجيك والشاى
والناس البعرفو شليل
حشود الطلبة والعمال
وبنوت الغياب والليل
طفوله مشردة ونازحين
وكم حجاج يجيك من ديل
وديل اولاد شوارع عوووووك
المعدَّمة ومعدومه
من كل فجه يجوك
يومها التسوِّد يومها
قطامة وقرضمة وراندوك
لماضة وطرّقت حلقومة
ناسات حكومة الجن
ناس جنها الحيكومة
ماطال الشوارع فِي
فى ولاد بعرفو القومة
اولاد الحلال راقديين
اولاد اسمها المايقوما
ديل اولاد شريعة قوش
المستضعفين فى الارض
يبنو ويهدو عروش
لا الكل بخون البعض
لابتشتريها قروش
فى كل حتة وراك
تمرق تلاقى جيوش
اصدق لسان الحال
من نضمك المهبوش
نفس الولاد جايين
من طين حضاره كوش
حافظين شعر حميد
فاهمين قصايد الدوش
ماتمشى يامحجوب
عاوزين نظبط بوش
ياداااب عرفنا الصاح
دخل الكلام الحوش
وشكرا سيدى الحجاج

أزهرى محمد على ..

ارقع جبتى اولا ارقعها..
اطرزها من اللالوب..البسها على المقلوب
اخلعها...على كيفى
انا لم انتخب احدا..
ومابايعت بعد محمد رجلا..
ولاصفقت للزيف..
لماذا اعلنوا صورى؟
لماذا صادروا سيفى؟
انا ماقلت شيئا بعد حتى الان..
حتى الان اسلك اضعف الايمان..
ما اعلنت ما اسررت ما جاوزت فى الاوبات..
سرعة زورة الطيف
اهرول بين تحقيقين..اصمت عن خراب الدار
عن غيظ مراجله تفك مراجل الجوف
سئمت هشاشة الترميز
مابعد الزبى ياسيل من شىء
لمن ياطبل والخرطوم غائبة وامدرمان والنيلان يختلفان
والاطفال فى الخيران والحرب الدمار الجوع
كيف الحال ؟ لا تسأل عن الكيف ..
حبيبى أنت ياوطن النجوم الزهر .... سلهم كيف ؟
سل عنى..
لماذا لم يخلونى على كيفى .؟
أنا والله ضد نخاسة الاحرار باسم الدين
ضد الضد والضدين
ضد جهاز خوف الأمن ... ضد الأمن بالخوف
أنا فى هذه الدنيا على كيفى ..
إلى أن تكمل الأشراط دورتها
بمهدى حقيقى لينقذنا من الدجال والتمثال
والأشراك والحيف
سأبقى ما حييت أنا على كيفى
إلى أن تطهر الدنيا وينزل سيدى عيسى
لأن طريقتى فى الحب ياوطنى
على كيفي

الكتيابي

‎

خذها نصيحه مني:
انسى الاسامي اللي مضت..و اللي تكدر ذكرياتك..
... ... و اكتب على قلبك اسامي ناس تستاهل غلاك..
انسى البشر..
اللي قسوا..
اللي جفوا..
ومن جديد ابدأ حياتك..
و خلك مع ناس يقولون لك.."العمر مايسوى بدونك"..

لا احد يستحق ان ترهق تفكيرك به،
فمن يريدك لذاتك،لن يخذلك ابدا،
و من يحترمك،لن يجعل ما بينكما مسرحيه لمن اراد الدخول.
لا تحزن على من جعلك اضحوكه بتهمة الوفاء
لا تحزن على من اشعرك بأن طيبتك غباء امام خبثه.،
لا تحزن على من كان يعني لك الجميع،واكتشفت انه لا شيء،
لا تحزن على من استأمنته بكل شيء،و كان اول ما فرط به هو "انت"..
لا تحزن على من عرف نقاط ضعفك و تفنن في اسقاطك،
لا تحزن،لم تخسره،فقد كسبت نفسك امامه ابتسم فانت لم تخسر شئ
(عائض القرني )

من طرف **ود المناصير** الأحد 17 يونيو 2012, 5:28 am

يا مناقيش العدالة
بتنا فوق الصّبر عالة
يا تعاويذنا وعَزَانا ..
خلِّي نور الفرحة يطفُرْ
من عوينات الحزانى
صخرة الأحزان تقيلة ..
واحنا ما بنملِكْ سِوانَا
قولي هيلا هوب معانا ..
من على الشّارع نشيلا
سكّة العمر الطويلة ..

من طرف **ود المناصير** الأحد 17 يونيو 2012, 5:38 am

تلاتة كباري وشارعين وسد…
قديتونـــــا قصــادهــــم قــــد…
لو جينـا لكشف حساب وجرد…

أمسك واحد أول بدء:
سرقتو وطن واسع ممـــــتد…
فكفـكتوهــــو…
وزعزهتوهو…
وأرهقتوهــو…
وبشتنتوهــو…
وهديـــــــتوهو هــــدا هــــد…

وهاك التاني أمراً أد :
حكمتو شعب كان زي الورد…
أفقـرتوهـــــو…
وشردتوهـــو…
وجهجهتوهو…
وعنصرتوهو…
وقطعتو حبل كان واصل ود…

أُخد التالت لو ترتد:
وجدتو مصانع لقيتو مزارع…
وسكـــة حديـــد جد بالجــــد…
عطلتوهـــا…
وفرتقتوهـا…
ووقفتوهــا…
وشلعتوهـا…
وقطعتو رزق عمـال من حد…

أحسب رابع وتابع العد:
وين تعليمنا ووين ترنـيمــنا؟
وين آدابنــا ووين كتــابنــــا؟
وين رياضتنا ووين ريادتنا؟
مرمطوهـا…
وأخرتوها…
وأفشلتوها…
وطيشتوها…
وخلفـــتوها جهـــل عن قصد…

شوف الخامس أخذ ورد:
كيف وحدتنا وكيف دولتـــنا ؟
كيف عيشتنا وكيف حالتــــنا؟
ووين ثرواتنا؟
ووين أموالنا؟
وين غيرتنا؟
وكيف سمعتـــنا؟
خرمجتوهـا…
وبشتنتوهـا…
وبـددتوهــا…
ولوثـتوهــا…
وبي سمعتنا مسحتو الأرض…

.
هاك السادس ونفسك سد:
((رئيساً راقص)) رقصاً شين…
مسئول ((مزواج)) ركاب سرجين…
وزارة تجارة وبياعين…
ناساً عايشة ومبسوطين…
جضوم منفوخة ملمعة زين…
كروش ممدودة متر مترين…
أيادي طرية نعومة ولين…
طالعين ماكلين نازلين بالعين…
مناشر تنشر مطحونين…
بفقه السترة محميين…
ومندسين ومدسوسين…
بفقه ضرورة وقوة عين…
نهابين ومغتصبين…
فساد شفناهو رأي العين…
وشميناهو أبو العفين…
وناس بهناك دايشين دايخين…
بطونهم خاوية وما لاقين…
وجوهم هايمة وفقرانين…
وعينهم طالعة وكمان صابرين…
وليه ساكتين؟؟
ولي متين ساكتين؟؟
بإسم الدين الخداعين…
خلو حياتنا زفت وطين…
تجار الدين الأفاكين…
ملعونين ملعونين…
ملعونين لي يوم الدين…
غشيتونـــا…
وبشتنتونـا…
وعذبتونـــا…
وجننتونـــا…
وبكيتونا دمع ودم ولطخة خد…
وتقولي كمان!!!!!!!
تلاتة كباري وشارعين وسد!!!
بس يــا ود…
حيلك شـــد…
ويد علي يد…
كلنـــــا ضد…
ضد العسكر وحكـــم الفرد…

******************

ضد الظلمــة ومــن أفســد…
نضال وارثـنو أب عـن جد…
أكـتوبر أولى لــنا بتشــــهد…
وأبريل التانية أعادت مجد…
والتـالتة قريبة وما بتبــعد…
خليك واثق واتأكــد…
للأحلى حيكون الغد…
للأفضل راجنو الغد…
للأجمل حنبني الغد…
للأحلى حيكون الغد…
للأفضل راجنو الغد…
للأجمل حنبني الغد…

محجوب شريف ـ وفيها اكتر من قول

من طرف **ود المناصير** الأحد 24 يونيو 2012, 7:48 am

الله لينا ـ حنين يا قلبي انا

الله لينا ـ انا بالسلاح إن رصصوني

انا بالحديد إن كلبشوني

انا قبة قبة إن حلفوني

انا ما بسيبن الوالفوني انا

من طرف **ود المناصير** الأحد 24 يونيو 2012, 3:08 pm

المرازاة ... والمزازاة

ابدا لن تخنق لنا صبرا

ولا زالت جمرة صبرنا على كفنا

فاحذرا يا انت من ـ المرازاة والمزازاة ـ والجهل الذي يحيط بعنقك

فلا انت ولا موقعك ـ يمعنك منا

ود المناصير كتب:المرازاة ... والمزازاة

ابدا لن تخنق لنا صبرا

ولا زالت جمرة صبرنا على كفنا

فاحذرا يا انت من ـ المرازاة والمزازاة ـ والجهل الذي يحيط بعنقك

فلا انت ولا موقعك ـ يمعنك منا

ود المناصير سلام

مرافئ وظلال مالك داير تقلبها هجير

بلد مضروبة في ركبا

منو البقدر يزيل كربا

بلد مصيرا في اوربا

وصابي عليها جام غضبا

الدولار قطع قلبا

وجناها الكان بيمشي حبا

الدقن دايرالا مسحة

والكرش دايرالا زحة

العباية الفوقا طرحة

البلد ما سكاها قرحة

لا في صحة ولا مصحة

يا الله هون علينا

وللباسقات سهل مشينا

البلد ما شاء الله

السمك راااقد ـ

والتجار قاعدين

والأسعار تمام

والناس زراعين ـ مخدرين ومورقين وللإله شاكرين حامدين

لا في جرورة ولا سداد دين

ـ قال أزمة إقتصادية ـ قال

بلد من جبل مناي لي ام سفاية ما فيها شحاد ولا دناع

قال لي صاحبي ..

يا اخي عندكم ناس عجيبين خالص خالص !!

كيف ؟

قال مشى المناصير ـ كره حاجة اسمها لحم وحاجة اسمها سمك !!

ليه ؟

اي زول داير يعزمك لا زم يضبح

وأي زول جيت تسلم عليهو يتفنن في طباخة السمك

ولكن أغرب ما قابلني ... جابو لي سمك ـ تهبش السمكة اللحم يجي في يدك والشوك يفضل في الصينية !!

وحاجة طااعمة جدا !!

يا ناس دا شنو ؟

قالو واجهتنا مشكلة في الزيت ـ وبقينا ننجض السمك بالفرن !!!

ومرة بالدوكي

سبحان الله ..

إنه شعب المناصير الخلاق

اليوم دار حوار بيني وإبني ( سابعة ) إبتدائي )

يا زول جيتو بدري مالكن ؟

فكونا

ليه ؟ في شنو ؟

قالوا في مظاهرات

مظاهرات شنو ؟

يا ابوي انت طاشي شبكة ؟

يا ولد !!

يا اخي البلد مولعة نار من الاسعار .. وانت ما جايب خبر ؟

اها ؟ ودي علاقتا شنو بمجيكم بدري ؟

المظاهرات قايمين بيها ناس الجامعة والثانوي ـ ونحن قالو صغار

طيب كدا ما كويس !!

كويس كيف ؟ ـ انا جهزت منديلي ورشيتو بالموية عشان البنبان وعايز امشي مع الناس

سبحان الله !!

دي ثقافة شنو دي الجابوها لينا ناس الحاكومة دي ؟

يعني ما بعيد الاطفال يعملو مظاهرات في البيت لو الاكل ما عجبهم

وما بعيد ـ الثقافة في المدرسة في مقبل الايام تتحول لعمل سيء يبنى على الرفض والمظاهرات

اغرب تصريح خلال هذين اليومين كان في التلفزيون ـ من كمال عبيد القيادي بالمؤتمر الوطني :

قال دولة الجنوب لم تستطع ان تؤثر علينا ـ الحرب واحتلال بعض المناطق لم تستطع ان تؤثر

وبقفل البلف ـ بلف ـ البترول ـ ما قدرت تأثر فينا

يا رااجل ؟؟

وطيب الكوراك في شنو ؟

وتخفيض الصرف والدستوريين لي شنو ؟

والواك واك دا شنو ؟

يا عالم الناس دي بتخاطب في منو ؟؟

زماان في جهة بربر ـ في واحد عندو تراكتر وتعطل عليهو ـ والمكنيكية يتعززو عليه

زولنا اتوكل وفكفك التراكتر حتة حتة ـ وغسلو بالجاز وربطو تاني

في حديد فكاهو وما عرف تاني يربطو وين

ومع كدا التراكتر دور واشتغل

الجماعة سألوه .. ونان الحديد دا شنو ؟

قال ليهم ـ الخواجة داقس

** الله يستر من دقسة الجماعة

الغالي قابلته في محطة الغالي

سالته من الصائم عمل نائم

شكله فهم غلط وقطع الظلط

قرب قريب ما تبتعد

ممكن تفهم الحكاية

حاتم طه الافندي كتب:الغالي قابلته في محطة الغالي

سالته من الصائم عمل نائم

شكله فهم غلط وقطع الظلط

قرب قريب ما تبتعد

ممكن تفهم الحكاية

الحمد لله على السلامة يا حاج حاتم

وينك يا استاذ ؟

بالله لا تكتر من غيابك ـ فالمنتدى ـ يميل إذا اختل ركنه

مخطيء من يزعم أن الفرعنة قد إنتهت بهلاك الفرعون الأول

فالفرعنة ـ ظاهرة ـ ممتدة عبر التاريخ

من طرف **عباس محمد** الأربعاء 04 يوليو 2012, 5:37 pm

البلد عامرى مساكنها كلهن خلوهن برش
مافى دين ينتهك الحقوق صاحبو لايظلم لايغش
نحن للخالقنا شاكين الظلم خرب كم عرش
ربى ليك رفعنا الأكف انتف الظالم ليو كش

من طرف **ود المناصير** الخميس 05 يوليو 2012, 3:51 am

عباس محمد كتب:البلد عامرى مساكنها كلهن خلوهن برش
مافى دين ينتهك الحقوق صاحبو لايظلم لايغش
نحن للخالقنا شاكين الظلم خرب كم عرش
ربى ليك رفعنا الأكف انتف الظالم ليو كش

لذلك قلنا إن الفرعنة ظاهرة ممتدة عبر التاريخ

واعلم يا استاذ عباس ان الضمائر الحية لا سلطان عليها إلا سلطان رب العزة

وهذا كسبنا ـ وهذا تميزنا ـ وهذه بضاعتنا ـ نراهن عليها ما دام فينا عرق ينبض دما

تسلم يا عباس يا راقي

من طرف **عباس محمد** الجمعة 06 يوليو 2012, 1:44 am

هذا واضح يا ودالمناصير
من شكيمة اهلنا بالخيارالمحلى حيث لاشىء
وتجد الراحة والسكينه
اى
البساط مفروش احمدى وفوقو تتمدد بارتياح

من طرف **ود المناصير** الأحد 08 يوليو 2012, 4:00 am

[ندعوك للتسجيل في المنتدى أو التعريف بنفسك لمعاينة هذه الصورة]

من طرف **ود المناصير** السبت 14 يوليو 2012, 3:21 pm

المرافيء والظلال ـ فقدت ود عون الله

الزول دا وين ؟

الزول دا خلانا في نص الدرب وفات ..

يا زول نخاف ـ

نخاف من الدعت ـ العقارب ـ الدبايب

السهايب والنهايب

نخاف من نفسنا ـ مننا ذاتنا

نحاف نخاف

يا سندنا ودرقنا ضد الخوف ـ يا قدوتنا ـ واصل حكايتنا ـ وينك ؟

وينك يا عاتي يا شلال ودعينة ـ العرقو لاوي

وينك ـ وينك يا عالي ـ كالفعال وبوني والباقدان ـ تداري تضاري ـ تحن ـ تفزع ـ تصادق تخاوي

وينك يا غالي ـ بين صهاديب التعب ـ نوخت دابك ـ ختيت رحالك ـ ـ لكنك خليتنا ـ مالك ؟؟