مرافيء وظلال

تذكير بمساهمة فاتح الموضوع :

بدءا .... اقول للجميع :

سلااااااااااااااااااااااام

ثانيا :

هي مساحة للبوح الهادئ ولكن بصوت مسموع ...

فقد طرقت كل ابواب المنتدى ووجدتها جحيما ـ أن جاز ـ هذا التعبير ... وحتى تلك التي دخلنا إليها بكلمة .. سلااااااام ... وهي كلمة واحدة نطلقها في وسط الردود عندما لا يعجبنا الحال ...

ولكن من يسمع ؟

لذلك قررت أن أنشيء مكان ـ خاص ـ ارجع إليه اناجي فيه نفسي ... وأونس براي ... وكمان أجيب نكات

وطبعا هذا الإجراء عندما يتعكر الجو ... ولا يسمع لنا صوتا ...

صحح سأتحدث هنا عن أشياء متفرقة ... وملاحظات عامة ...

من أراد مشاركتي فالباب مفتوح للجميع ... فقط المفتاح ... لا مهاترات لا تجريح

******************************

ود لقاي عاول--لا قروعة--لا دفيق ---لا مغمول---لا صفوري ---حتى السيس والكرموش إنعدم--يا ناس هووووي ود لقاي يبس

السعن يابس---القربي يابسي---موية باردي مافي ---إلا تشرب من البحر---والبحر دربو بعييييد وكرنكي والموية ريط---أشرب واستمتع بالقارضيا والدسنتاريا

كان الضل بارد ---ود لقاي مدندح--السعن مويتو بااااردي والقربي وكاية مرخي--كان عامر --ونسة --توثيق---إقتراحات بناءة ---نكران ذات---القداحة ملياني طالعة نازلي---براريد الشاي والقهوة ما تديك الدرب ---وصاحب المحل مخليه وقف

آه من دموعي الما قادر أحبسه----ود لقاي يبس

لن تتوقف الدموع--دوام منهمرة---لن يتوقف العويل---لن يتوقف النحيب---أيها الحبيب---لن تتوقف السكليبة ---حتى يعود صمد الساقي

صمد الساقي الكبير---الرجل الخبير---إستصلح كل الأراضي البور--حتي الخشخاش حتي الحصحاص ---حتي الدبورة والفرسيب---والواطة العطرون---خم الكفان --جاب الماروق ---جاب السماد---

ودلقاي عطشان --ود لقاي يبس---ود لقاي ما بيخدر إلا من مويتاً يقرعه ود المناصير--الرجل العفيف ---الشفيف الحريف--الغيور --الجسور---والفهم--قيزان كيمان---ماب يكمل من التوزيع

قالوا ود المناصير دا منو----وما قالوا بي يسوي في شنو

قالوا ود المناصير دا من أرج--دماج --دربي--شري---الكراع----سابوا الراس ومسكوا في الكراع

قالوا ساكن وين--شغال شنو--شكلوا كيف--يركب حمارة ولا يركب باص----تركوا العام ومشوا الخاص

ود عون الله كتب:آه من دموعي الما قادر أحبسه----ود لقاي يبس

لن تتوقف الدموع--دوام منهمرة---لن يتوقف العويل---لن يتوقف النحيب---أيها الحبيب---لن تتوقف السكليبة ---حتى يعود صمد الساقي

ود عون الله نحس بفقدك الاليم لن يعود الفرح للمرافئ ما لم يعد صاحب المرافئ كان بوست طاعم وجميل استمتعنا بالون والتو بينك وبين الزعيم ووقفنا متفرجين ننهل من المعين

ياااااااااااا صمد الساقي تعال فرح ليالينا

ود عون الله كتب:قالوا ود المناصير دا منو----وما قالوا بي يسوي في شنو

قالوا ود المناصير دا من أرج--دماج --دربي--شري---الكراع----سابوا الراس ومسكوا في الكراع

قالوا ساكن وين--شغال شنو--شكلوا كيف--يركب حمارة ولا يركب باص----تركوا العام ومشوا الخاص

ليتهم تركوه في حاله ود عون الله لو في مكانه لاتيت حبوآ بعد كلامك ده

الأخ الرشيد الأديب الأريب---سكبت ماءاً بارداً على جسدٍ يغلي---بدأ الماء يغلي وما برد الجسد---واصل--واصل 000عسى ولعل

عفواً يالرشيد لا نستطيع إكرامك كما ينبغي000ود لقاي يبس---بس أخد لك شعالات وكروقات000أهو برضو تنفع في العواسة

لن نسأم---لن نمل---سنظل ننادي---نهاتي

ود المناصير ... ماذا دهاك ؟

كيف تغيب وتترك منتداك

نحن فى فد يوم فقدناك

أظلم المنتدى بيى وراك

عاد كيفن بنقدر نقعد بلاك

لا تغيب مازلنا.. نرجاك

وفى إنتظار إطلالة بهاك

والكل يمنى النفس بلقياك

إنت يا الشامخ فى علاك

والخلوق تصطف لمحياك

والجميع حباك وإصطفاك

والمنتدى سيظل منتداك

ودعك من دا وداك وداك

وإحتسب للمولى الهداك

وإنطلق لا تنظر وراك

والمرافىء حارساك وراجاك

*********************

الأخ سامي سلام ---سلام إعجاب

ركضنا وراء كتاباتك في تناقير المنتدى فوجدنا أدباً وتأدباً--صلاحاً وإصلاحاً--كدينا --كدينا وقفتنا دايماً تصيح هل من مزيد

شكراًًً --سامي --على الإحساس المرهف--وما مستغرب على زول زيك---إحساسك بالمصاب خفف علينا شوية

الأرباب سلام ---سلام ملخبط---شكر وعتاب

لقد تابعنا بنهم ما زرعته في فرايد المنتدى المختلفة --شعراً ونثراً---في حق ود المناصير--ماقصرت--والرجل يستحق أن يعض المرء قميصه في فيه ويخلع نعليه ويعدو خلفه ركضا حتي يتشبس به ويعيده إلى المنتدي --عزيزاً مكرماً--راضياً مرضيا

عذراً يالأرباب 000هذا القميص مفصل علينا نحن الأعضاء000هذا ليس مقاسك---فأنت من طاقم السفينة وقبطان الطائرة

كنا ننتظر دستوراً محكما أو منشوراً واضحا00يؤسس لحكم راشد000

كنا ننتظر مقص سنين00حاد00جاد---مقص حلب----يقطع ويقتطع كل الترهات00ويقذف بها إلى المذبلة

يجب أن تتبنوا سياسة صارمة --منضبطة---لننعم بحوار راقي00جميل ----حتى يستطيع كل من يكتب00يكتب وهو مطمئن00لا تأتيه درابة أو حجر 00تفلقه 00تجرحه---فإن رد جهل وإن كظم أفسح للجاهل أن يسود000وحسب الجاهل جهلاً أنه علي صواب

أسرعوا بالثورة التصحيحية000 صححوا المسار 000 حتى لاتجدوا المنتدى بروداً لا يصلح حتي للسائمة

أوووووووه اللبيب بى حالو بى جاي000النفر شخصياً

هسع الواحد يرد عليك كيفن---قدر مالواحد يتور نفسو ---يلقى نفسو قدامك صغوووير

تشكر أمير الروائع

فقد ازدادت دهشتنا الاخ سامى
عاجز عن التعليق

سلمان عقيد النعوفابى"]الزول البكون بيناتنا لابد من يطول بالو

يسمع فى الكلام الشين مهما قلنا قالوا وقالو
معروف ود المناصير فى المنتدى مافى مثالو
ومعروفين كمان القلة ماسابوه تب فى حالو
ود ابحنة جاب اخبارو وكيف وصف الرماد الكالو
والزول مهما يطول فى فراقو لابد يوم يحقق الفى منالو
بس لابد من تعود اليوم ويرجع لى منتدانا جمالو


\\\\\\\\\\\\
ياود عقيد ياريع
انت ياود المناصير قلبك ده من
حجر
صخره صماء
لا يحن ولا يعرف الحن
والله لوكان الكلام السمح ده
لي انا
اسوي الجلوبية
جمبلوق
توش توش جوه الجب

؟؟؟

كل يوم نجي بى هني00تلفحنا السموم والكتاحة 000والعرق سايل لامن عراقينا يلصق في ضهرنا000والرماضة تحرقنا000نصيح 000نكورك0000نسأل الغاشي وماشي الدرب00ما شفتوه زولاً لي000ودرتو00وطشيت الدرب

تنتحر الإجابة000ما شفناه زولك دا

تنزل دميعات الهجير

تجري وتسيل00طول المسير

نتمتم بى كليمات مخنوقة

بعادك طال

ود المناصير بعد دا كلو
الناس دي اتجرست خلااااااص
لو كنت ماشي عشان تجيب لينا الفرح والمستحيل
ارجع تعال ماتسيبنا للحزن النبيل
الناس دي باقلي بقت على الفُراش

تشكري يامحاسن000نحن ندري أن الذين يمرون من هنا 000أهل الوفاء----قلوبهم شخب الحليب الصافي بى رغوتو

يا محاسن مرحلة الجرسة فتناها ضحى---مرحلة الدروشة ولبس المرقوع وسبحة اللالوب--وقرش القرضة --فتناها--

القيد ختوه في الليد---والكلام بقى طربقة0000جنينا000وبقينا نغنى ما شفتوه زولاً لي

سلامتك يادكتور من الطربقه
ياود المناصير تلحقنا وتنجدنا
طربقه الدكاتره دي كبيره شديد وعلاجا صعب
كمان بعد ود المناصير نبقى في ود عون الله
دي عيناً حاااااره حامت بي هني
ياحافظ ياحفيظ

الى صاحب المرافى :-

ما الآيام من حسّك حسها
لما تغيب
بيغيب إحساسها
والأزهار فى بعدك ذابلة
وفاقدة ألوانها

والغيمات رحلت شان غبتا
ورافضة معاودة
حتى النسمة
مسارها إتغير

تممت علي الزيت00الجاز--البلف----ودورت البابور--أقصد فتحت المنتدى

وفجأة يرن الهاتف

طبيب سوداني من المستشفى--مناوب--يتحدث

ضروري 00وعاجل

وسودانية وضعت الساعة الثالثة والنصف بعملية صعبة وخطيرة

ونحن نزح ونزحف من دغشاً بدري

وأخصائي النساء والتوليد يسبقنا ويقع في خطأ فادح غير مقصود

شرح للحامل العملية ومخاطرها قبل أن يخبر الزوج

وأم ساريا في الركب تسير00مؤازةً وتطمينا

والحامل تنهار بالكامل

ودموعها تتشابك وتختلط بدموع زوجها فيعم الإنهيار

ونحن بينهم وبين الأطباء نسير ويارب جيب العواقب سليمة

وتنجح العملية

والمولودة تخرج صغيرة 00صغيرة --فقط سبعمائة جرام لاغير

والمولودة تعاني من مشاكل في التنفس

وأخصائي الأطفال يتولى المهمة

نجحت العملية وتنفسنا الصعداء

رجعنا بيتنا ودورنا البابور

كان العشم أن نتنفس مع الرائعين

ونبحث علنا نجد زولنا المفقود

ما شفتوه زولاً لي

والطبيب السوداني يتصل

مطلوب بسرعة

والمولودة حالتها في تدهور

والحوجة ماسة لنقل دم--عاجل جداً

والفصيلة نادرة

ومدير بنك الدم صديق

ويبذل مجهود خرافي

ويجد زجاجات من الدم من نفس الفصيلة 00مر عليها بالبنك أكثر من أسبوعين

والمولودة لا تتقبل إلا دم فريش

وجماعات السودانيين تتري

وتكشف السواعد

والفصيلة نادرة

لاشئ

والحالة خطيرة

ومدير بنك الدم يستخرج دفتراً

واسماء كثيرة مدونة ومعها أرقام هواتف

ومدير بنك الدم يضع أصبعه على أحد الأسماء

والدفتر يناول لعم المولودة

وجرس الهاتف يرن

وصاحب الإسم والفصيلة على الجانب الآخر يرد مرحبا

والسيارة الفارهة تطوي الأرض

خمس دقائق لا غير يدخل شاب وجيه متبسماً

شاب سعودي في الثامنة والعشرين من العمر

ووالد المولودة لا يعرفه

والشاب يتوجه مباشرة للمرضة ماداً ساعده

وقطرات الدم الصافي تنزل بسهولة ويسر--كأنها تتسارع لإنقاذ المولودة

شاب سعودي ينقذ حياة مولودة سودانية لا يعرفها

ينقذ حياتها والبسمة لا تفارقه

لا معرفة --لا قرابة---لا مصلحة

شاب سعودي ينقذ حياة مولودة سودانية لا يعرفها

ينقذ حياتها والبسمة لا تفارقه

لا معرفة --لا قرابة---لا مصلحة

يا الله كويس انك ذكرت الواقعه
والله دوما تعجبنى قصص الشهامه والمروءة
اعجبنى موقف الشاب جدااااا
ناس تبحث عن الخير وتسعى له
اتخيل ناس تضع رقم تلفوناتها فى بنك الدم واسم الفصيلة
وعند النداء للتبرع يلبي ويركض .... صراحه قمة الفهم فى عمل الخير

بضيف كمان يا ود عون الله
قصة صديقك السعودي الذى ارسلتم معه مساهمتكم المالية للاردن واعطيتوه العنوان
وعرفتم لاحقا بانه ساهم ايضا معكم
يعنى اضاف مبلغ منه مع المبلغ الذي اوصله

فعلا هذه الدنيا بها اناس الواحد يتقازم امام ما يفعلونه من عمل خير
ربنا يجعلنا على نفس هذه الخطى النديه ... نسير

مشكووووور يا ود عون الله

الى الرائع دوماً ود المناصير :-

غنيناك اى غنيناك....

ما ظنينا نغنى سواك.....

ناديناك فى الصوت الفات ما جانا صداك.....

الايام فى غيبتك طالت خوفى عليك تطول مأساتك.....

دى كم ايام من انت مغيب وما جرينا النم فى غناك.....

ولا إتآسينا بعد ما فت ولا ضمضنا جرحنا وراك....

يا هو الليل بي غبنه يعدى وياك مترهبن فى منفاك .....

الرائعين دوما ....لكم الف سلام
انشاء الله يعود صاحب المرافئ ويجدها مخضره ومزهره



قايتو يا ود المناصير الناس كلهم بقو شعراء… رائع اخي منوفلي

فضلنا وحااااااااتك منتظريييييييييييين
لو وشوش صوت الريح في الباب يسبقنا الشوق قبل العينين
ونعاين الشارع نعاين المنتدى نلقاك ماجيتنا


كسره
العيد قررررررررب

انت وين ياودالمناصير
خلاص ماشفتي عوض ياساري الليل
اتفقد الامل؟؟؟؟

ود المناصير كتب:طهر البرسيم ... ورق الخدرة .. اعزق .. كيدب .. اشتل .. اقرع .. أفتل .. قرّع ... كرّع ..

لم الكاويق .. خم الكفان .. شتت الماروق ..

امسك حبل الواسوق .. جر بالابرل .. كادن بالطورية .. وخم بالكونشبر

ود الطرشان فتحا في الكُشُمْبا وفات ؟؟

** الترجمة مع الدكتور

الترجمة مطلوبة لناس المدن الوهيطة

ود المناصير كتب:

ود عون الله كتب:هوي ياجني---أكبر شوي---لا تبقى ني---سويها العليك ---سيب العلي

الحظ القنيط---انا زولاً عبيط ---من شلة زعيط---الأرض الرقيط--النضم الكتير لا جمع البرم لا لم السبيط

الراي التلف----الفتح البلف----الناس التلف---النضم الكتير والمولود لقيط

تكريم بروي ؟؟؟؟؟؟؟؟؟؟؟؟؟؟؟؟؟؟؟؟

مبادرة ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

مشاريع؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

لميناهو .. جُرُم .. لقطناه فلس ..حتيناه بالمحجان برم .. كشكشناهو خرُوم .. جمعناهو لوبا قرون ..تناولناه بشيشي حُنبُق ..خميناهو تمر هبوب ..

شلناها لحمة شموم .. اكلناهو دنفريس ..شكيناهو جراد .. علقناهو شرموط .. ولغفناهو روب

وقلنا ... يا ناس هوي .. سووا النجيض ما تقوموا فوق الني ... الني للنار ..والنار نار عويش .. واللكد الكبار مافيش ..

قلنا وثقوا ... وبدينا زولا قال لينا عوافي ما في

قلنا الحقوا ود بروي في المستشفى .. الناس ما قصرت .. لكنها جات وقفت

قلنا .. الزواج الجماعي .. طلع كواسير وبواقي

قلنا .. الخريطة .. الإنتظار طال طال

قلنا .. الأصول والثوابت .. لا زال السيف مركوز في أووس

قلنا .. إذاعة .. لا زالت ـ إضنينا ـ تسمع حرامي القلوب تلب ..

قلنا ..وقلنا ... هو اللسان فيهو عضم ؟؟؟

شكرا ود عون الله .. تورت نفسي !! في كلاما كاد يتنسي

المفردات دي هل هي موجودة في كل البلد ؟ ام تختلف معانيها في بعض المناطق ؟؟

مرسال التكل

الساقية خرباني

وموسم الزراعة على الأبواب

والبصير --مهندس الساقية يحدد العطل

الساقية محتاجة للتكل لتدور

واحدهم يسافر عشان يجيب التكل

يتأخر كثيراً والموسم يدخل

والبصير يباصر ويصلح الساقية

والمزارعين يفلحوا الأرض

والزرع ينمو---يكبر --ويبلغ موسم الحصاد

ومرسال التكل لا يحضر

والزرع يحصد --يقطع يدق ---يضروه كمان --ويصوبر في التقي

ومابين عطل الساقية ومرسال التكل--والعيش المكوم في التقي سنة كاملة

وعند الكيل يحضر مرسال التكل

هاكم تكلكم

نظر إلى العيش

حرم علي بالطلاق ---عودى آخدوا كاااااااااااااامل

*****

أرسلناهم---مشوا---غابوا---وما جابوا

ود عون الله كتب:صمد الساقي الكبير---الرجل الخبير---إستصلح كل الأراضي البور--حتي الخشخاش حتي الحصحاص ---حتي الدبورة والفرسيب---والواطة العطرون---خم الكفان --جاب الماروق ---جاب السماد---

ودلقاي عطشان --ود لقاي يبس---ود لقاي ما بيخدر إلا من مويتاً يقرعه ود المناصير--الرجل العفيف ---الشفيف الحريف--الغيور --الجسور---والفهم--قيزان كيمان---ماب يكمل من التوزيع

اما آن لهذا الصمد ان يشمر عن سواعده يكفكف العراقي المهرمد يمسك طوريته ينزل علي زرعه يحسس ويسند ويسقي

يا صمد الساقي عووووك ود عون الله فتر ما عرف يزرع ولا يتشرف يعاين يكورك هووي يا ناس صمد الساقي فيكم

الرائعين--الخرافيين--في الزمن الخرافي---الرشيد وسامي--سلام --العيد مبارك عليكم

ولى زولي دااااااااااك --القابع هناك---ونحن في ملالة---رغم الصدود --رغم الجفاء---عيدك سعيد

طلقنا الموية--تواصلاً--عيدية---ولكن للأسف--كان الجدول وسخان ---مليان قش --دايرلو كيدين--الشبكة طاشي والزول طاش

سنعاود الكرة--حتى تصل الفرة

أصلو اليوم حيلنا مهدود ---ما بنقدر نكادن

تعبنا من المساسقة على مراكب السفار--اللواري والبكاسى --حتى الناس الجابن القطر --ووصلوا كداري وبالحمير

نسساق طول اليوم بين العدوي والبحر

الناس أهلن جو وأنا زولي ما جاء

إتنخجت--إتهرست --إتخمدت --شالتني نومة كلها كوابيس

***********

تعال

التكل قنعنا منو

وعودك حرم تاخدو

الشوالات كمان علينا

*********

وأنا صغير أمي تحرسني أختي زبيدة--والبت بكاية---أمي تشيل صفيحه--وتقول أنا ماشي أردي

كانت تتأخر شديد---لعلها كانت تقضي أغراض أخرى---أو تزور لها ناس

المهم كانت تتأخر --كانت تطول --وانا أعاني من أختي الغلباوية

ثم تأتي

تفضي مويته

تقلدني وتقلد أختي

يمة مالك إتأخرت كدي

و

يا ولدي ناقة حاشي وردت البحر---شربت--شربت --والبحر بقى بعييييييييد

أنا لا أعرف ناقة حاشي دي شني--يسرح خيالي شوي---ولكن عودة أمي تغطي علي كل شئ

رحمك الله يا يمة بقدر ما كنت تجلبي لينا الفرح

*********

حبوبتنا بت جودابي---كان عندها ولد إسمو الياس

الياس سافر زي خلق الله واستقر في كسلا---هكذا سمعت

الناس يمشوا ويجوا

والياس كسر ركبة في كسلا--لبد ---لا حس لاخبر

ماب يجي زي خلق الله

وحبوبتنا --تهاتي --تنادي --تنده --تدعو

يا ربي تجيبك يا الياس

يا ربي أشوفو قبل ما أموت

بعد زمن طويل جا الياس

البلد إتقلبت فرح --عيد --عرس --بت جودابي كرمت--وشرقت من الفرح

حتى نحن الصغار إنبسطنا

***********

أنا ما عارف اليومين ديل --أمي وحبوبتي --يرارن لي---يزاولن لي

********

ألا رحم الله أمي وحبوبتي الحنينااااات

جننتونا
عثمان احمد سعيد



كل زول عامل عزه حبيبتو
وياهو براهو البيغنيله
وياهو العارف سر اوجاعه
وعارف كل اوزان ترتيله
بس ما عرفنا
عزة منو البيغنو ليها
وقادين راسنا بكل وسيله
دي عازه البحتت بى كرعينا
تراب السوق ودروب الليل
أم عازه التانيه الكانت هانيه
وكانت اسمها عازه خليل
ياخ جننتونا
لو بتغنو لعازة السمحه
البت القمحه
ست الناس المافى مثيله
عازه الكانت لمن تعشق
تعشق راجل عندو خسيله
وكان الشوق لما يفيض بيها
كانت تغزلو وفى منديله
طيره و ورده وحرف صغيِّر
يمكن بعض الشوق يهديله
عزه الكانت صوتا مخبّى
زي داساهو وبيهو بخيله
وهسع شاقِّى الصوت الحِته
كان فى الرادى وكان فى ليله
والصبيان الكانو بحرسو
آخر الليل يبقوله دليله
زى ما شايف انت بعينك
الصبيان دايرين توصيله
عزه دى تاهت ما لقيناها
جينا نكوس لىى عزة بديله
جينا نفتِّش لى أُمّاته
أُمها قالت عزة حليله
قلنا هى ماتت ؟؟؟؟
لا ما ما ماتت
بس دى طباعه بقت ما هيله
عازة الكان متْقَنِّعَة دايماً
ما شافوها الناس فى جيله
هسع ماشه وناسيه هدومه
او متلفحة بى منديله

يمكن ديل قاصدين العازه
الغنّاله حبيبه خليل
عازه الحارب ود حبوبه
شان فى ترابه لَمَحْلُو دخيل
الإتْمَرْدَغ فيها تجانى
مَجَّد فيها السحر النيل
خليفة المهدى إتمدد فيها
ودلق الركوه قصاد السيل
ناس إتسجنت
وناس إتشنقت
وناس فى المدفع ماتو عديل
وينو شفيعا
وين قرشيها
وين الكتبو كفاح الجيل
وين تاريخنا المن ترهاقا
هل دا حقيقة ام تضليل
وهل الناس الهسي بغنُّو
بعرفو عازه بتعنى شنو
ولّا بغنو عشان ما يقبضو
وما هماهم عازة منو
غايتو بقول بصراحه شديده
فتشو عازه الدايره غناكم
عازه اللتنا دى ما هماكم
عازه اللتنا تراب ممتدى
حلفا تلودى جنينه وشندى
عازة اللتنا النيل والمطره
والجمام الرملو مندِّى
عازه اللتنا دى حاجه براها
دوم ونخيل لالوب وتبلدى

حبالنا الجوة ما تخنت ...
حبال السما المدود ...
حبال الصوت وكت يرجع ...
يجيب الخاطر المردود ...
تعالى نشوف ...
غنيواتنا البقت الدنيا ما بتشوف ...
تعالى نشوف ...
حروف البكا الجواها ما في حروف ...
تعالى نشوف ... تعالى نطوف ...
على المدن البقت أشباح ...
علي الجوع القعيد مرتاح ...
على الكلمة البقت في الجوف ...
تفتش سكة الأفراح ...

منو البقدر ...
يخاصم طفلة صبحت هازلة ...
فوق مد الأسى الحراق ...
يا غنوتنا ما تفوتي ...
يا كلمتنا ما تموتي ...
ونتمشي فوق ضمير الكلمة ...
عن وترا رحل فراق ...
وعن بلدا رحل فراق ...
وعن ولدا رحل فراق ...

الأخ أحمد عبد الوهاب---سلام

خير الأسماء ما حمد وما عبد

ما خذلت إسمك أبداً

زرتنا---وقصرنا----عرضت علينا بضاعة---فأدخلنا فتاشتنا في جوالات مكتنزة ---ممتلئة

وجدنا بضاعةٍ عجبا

ذهبنا لنوفر لك النقد---فإنا أناسٌ لا نتعامل بالشيكات

أعيانا تدبير النقد---وقد كان قبلاً في متناول اليد---حين كانت الأرض خضراء مثمرة يانعة

وكان صديقي ود المناصير---صمد الساقي وتاجر الجملة--- يكفينا إقراء الضيف وتدبير النقد

كنا زمالاً

الآن دبرنا النقد

لم نجدك أخي أحمد

أين أنت يارجل

حبينا --ودبينا ---وبركنا---على ركبينا

لم نكن قد بلغنا سن الدراسة بعد

كان الزمان فصل الصيف الدافئ

والنيل ضامر الخصر--ناقٍ---صافٍ---يتهادى في دلالٍ وتيه

والنيل معشوقنا الأبدي---ودنيتنا الحالمة

أشجار النخيل تغازل النيل ---تومئ إليه بجريدها وسعفها---دون إستحياء--أن تعال-تعال

والنيل لا يستمع إلي هذه المراودة

اللوبيا والسعدي --تجرات واقتربت حتي قبلت النيل

والنيل لاه---متمنع

الزمن تحاريق النيل

والوقت منتصف النهار

ونحن وسط النيل نسبح

رأيناهن

نساء القرية ---في كامل زيهن وزينتهن---وعلي رؤوسهن أواني الطعام مغطاة

نساء القرية يقتربن من النيل إفراداً وجماعات

وضعن الطعام علي الرمل على شاطئ النيل

ونساء القرية لا يعملن ولم يعملن هذا من قبل

كان المكان مشرع شلنبو قرية الكراع

ومشرع شلنبو يطرح رملا باردا نظيفا متلألاً

والنيل عنده ضحلاً غير عميق---باجاب

رأيناهن

تعجبنا

ونادانا المنظر الفريد

نادانا الطعام---فالسباحة تجعل للبطون سلطة وسطوة

إنا نحبهن

لا نخافهن

عكس أولئك الآباء الذين يحبونا بطريقتهم وعلي طريقتهم العجيبة---يمنعونا معانقة النيل---خوفا من الغرق

نخافهم

هرعنا حيث نساء القرية ---أمهاتنا

كلهن أمهاتنا

وصلناهن ووقفنا قربهن

وهن على غير العادة عنا لاهيات

جثون على الرمل

بركن علي ركبهن

وفي إيقاع فريد تقدمن نحو النيل

كن يشدين بصوت جميل ونسق فريد

حبينا ودبينا وبركنا علي ركبينا

سرن حتي لامسن الماء---خضن فيه حتي إبتلت ملابسهن

وانا في عجب من هذا

تمتمن بكلمات داخل الماء لم أتميزها

ثم رجعن القهقري بذات النسق والإيقاع

كن كأنهن في محراب أو دير ونحن في عجب

رجعن ---فتحن أواني الطعام--بعد أن أهدين النيل منها

كان الطعام في معظمه--ذرة باللحم---بليلة--

قدمن لنا الطعام-

فأجهزنا عليه---كان لذيذا بصورة غريبة ---حتي لم نبق علي شئ

غسلن أوانيهن

ثم دلفن إلي بيوتهن

أدين واجبهن

كان ذلك بإمر من إمراة يقولون أنها صالحة

رات حلماً--مناماً

روته لهن كاملاً مكملاً---حتى الأهزوجة التي لم أتبين منها إلا حبينا--دبينا---وبركنا علي ركبينا

علم ---ونفذ

هل كان ذلك تصديقا لها---جلبا للبركة ---ربما

هل كان ذلك جهلا --لا أدري

أم كانت تلك عادة فرعونية إستدعتها تلك المرأة---لا أدري

************

حبي حد الثمالة لنساء قريتي---أمهاتي

مشيمة بيضاء يميل لونها إلى الداكن قليلاً--تتهادي --تتمايل بين السماء والأرض

وخلال حبلها السري جادت بترياق الحياة --ماءاً---إمتصتهالأرض---فتلقفته أجنة تكمن في بذور الإنبات القابعة في رحم الأرض

دبت الحياة في النبات فأطلت وريقاته علي الدنيا وكست البادية بثوب أخضر جميل

خرج المولود إلي الدنيا

وسحابات مثخنات --وأخري خفيفات حجبت عنه حبال الشمس وسياطها

أحيل غيظ الحر ربيعا

والراعي ملك البادية في غبطة وسرور

جلس تحت شجرة بعد أن أكرم ماشيته إشباعاً ورعيا

وعلي الشجرة يتدلى وعاء مصنوع من جلد الماشية يمنح ماء الحياة للراعي

وماشيته حوله قطيع كبير قلة واقفة ومعظمها رقود

والماشية تفتح أفواهها وتغلقها في نسق عجيب----إجتراراً وتسبيحا

جلس الراعي تحت الشجرة وحوله قلة من صغار الماشية تتلاعب

وأعواد الحطب إستسلمت للنار وخمد أوارها وتحولت إلي درر حمراء ساكنة بعد أن كانت لهبا

وضع الراعي إبريق القهوة علي الجمر-- والإبريق ضغط علي نفسه حتي حيل لونه واكتسي بلون السواد--لم يئن --صبر تجلد وتحمل

وسحب مزماره فأرسل لحنا شجيا

كان ذلك وقت راحة الراعي وقيلولته

وفجأة

دوي في الأفق أزيز سيارة فارهة لاحت في الأفق

إقتربت السيارة من الراعي

جزعت الماشية وطلبت النجاة هروبا

ناداها الراعي بلغته ولغتها

هدأت ورجعت

نزل من السيارة رجل قسيم وسيم أنيق

سلم علي الراعي وجلس

ناوله الراعي كوبا من الماء ---فالماء ههنا أول إكرام الضيف ---وهو ذو قيمة عالية

رفض الرجل الماء ودلف إلى سيارته واحضر قواريراً بها ماء بارد

أخذها الراعي في نفسه وكظمها

هؤلاء لايعرفون قيمة الماء فهو متاح عندهم

صب الراعي للضيف كأسا من القهوة

جلس الضيف مع الراعي

واهل البادية لايستعجلون

لم يسأله من أنت ولماذا أنت هنا

والبدو يعتمدون علي الحدس والفراسة

الضيف وإن كان غريبا فهو غير تائه ولكنه كيف يهتدي في هذه البراري

أسئلة جالت بخلد الراعي المكدود

تشاغل عن ذلك وبدؤوا يتسامرون

وفجأة سأل الضيف الراعي

أتعرف كم عدد ماشيتك

يا هذا ما هذا

أنا أعرفها كما أعرف عيالي---عمرها ونسلها --متي ولدت ومتي تلد--صغيرها وكبيرها --أعرفها أكثر من نفسي

قال الضيف

أتعطيني خمسا منها إن أخبرتك بعددها في غضون خمس دقائق من غير أن أحسبها

أهذا رجل معتوه أم به مسة من جن

والبدو لا يستعجلون

نعم قالها الراعي المسكين وهو في دهشة وحيرة

والبدو لايفرطون في ماشيتهم أبدا--يحرسونها ويفتدونها بأنفسهم

خير للبدوي أن تضربه من أن تصيب ماشيته---فسرقتها أو ضربها دونه الرقاب

قال نعم

أخرج الضيف من جيبه جهازا وتمتم بكلام لم يفهمه الراعي

ثم أنبأه بالعدد الصحيح

أمن الراعي وازدادت دهشته

أعطاه خمسا فالبدو لايحنثون

والبدو سريعي البديهة

وخسارته طغت علي فضوله

فقال

أتري إن أخبرتك من تكون أترجع لي ما أعطيتك

قال الضيف نعم

قال أصدقني فقد صدقتك

ألست مستشارا

عقدت الدهشة الضيف وقال نعم

رد له ما أخذه منه

ثم قال

كيف عرفت

إن أخبرتني كيف عرفت عدد الماشية أخبرتك فقد كنت السابق

قال إنه في غاية البساطة

إتصلت بهذا الجهاز علي صديق يعمل بناسا وخلال الأقمار الصناعية المنتشرة في الفضاء عرف وأخبرني

ثم قال وكله دهشة أخبرني كيف عرفتني

البدو لا ينمقون الكلام ولا يزينونه

أولا انت سألتني عن شئ أنا أعرفه تماما--لم أطلب منك أن تخبرني كم عدد ماشيتي

إستعرضت علمك في رجل مسكين --رأيت هيأتي بشعري الكث الطويل وثيابي البالية الرثة-إنتفخت أوداجك وقلت هذا صيد سهل ثمين

أعطيتني معلومة لم أطلبها وهي عندي معروفة

أنت لاتعرف الماشية من كلاب الصيد --فقد أعطيتك خمسا من كلاب الصيد--فلم تعرفها

ولكن أسمع يا هداك الله --فأنت لص محتال

يا أخي حتي اللصوص الذين نعرفهم يبذلون مجهودا في السرقة--هم غلابا---وقد يعرضون أنفسهم للخطر

أما أنت فلص من نوع آخر لم أراه في حياتي

أردت ان تسرق وتستولي علي ماليس لك حتي بدون مجهود

معك حق إن تورمت أردافك واتفخت بطنك واكتنزت شحما ولحما --نعم رياشك وفاحت عطورك---تطاول بنيانك وعظم مالك وركبت أحسن الدواب سيارات فارهة

نعم أنت لص

وإن لم تغرب عن وجهي لأجعلنك وجبة شهية لكلابي

عجزنا فوقفنا ،،
انتو ياود المناصير وودعون الله وسامي وود الطرشان وكل الجماعة البي جاي ـــــــــــــ قاعد تجيبوا الكلام دا من ويييين ؟؟؟؟؟
انا غايتو كل ما اجي بي جاي ــــــــــــ ارجع افتش الكتب واقرأ من جديد ـــــــــــ جهجهتونا ــــ توهتونا ...
الله يجزيكم خير ويديكم العافية

سامي

تمتلك ناصية الكلم والكلمة

شرحت ---نقدت---فأبنت

صدقني أنا كاتب هذه المبعثرات لو أردت شرحها لم ولن أصل إلي عشر معشار ما هديت ووفقت فيه

زنت المبعثرات وأضفت إليها الكثير حتي كدت أن أصدق نفسي

*********

تسلم ملك الروائع

أحمد عبد الوهاب---سلام

عاد أحمد

والعود أحمد

شيم الكبار التواضع ---فما أظنك قد عجزت فتوقفت

فإنك رجل يدخل الكلمات فرن الإنصهار فيحيلها سبائك ذهبية يتدافع الكل لإقتنائها

أما ود المناصير وود السمعان وسامي فهؤلاء يلعبون بالكلمة كيف شاؤوا---تأتيهم طائعة مختارة منقادة

ولكن ود المناصير ---فقدناه---وجعل الأرض بعده بورا ---قالوا شافوه هناك---الله يجازي الكان السبب

بح صوتنا من مناداته---مناجاته---ولكن لن نسأم ---لن نمل ---حتي يعود

ود السمعان تاه بين منقة الجعليين وجبال تسني ---وبقي صحيح ود الطرشان---زاغ بي عدلو --يمكن لقي عدلو ---غايتو ماعارف

البركة في سامي والذي لو لا لطف الله لكان هو الآخر في مكان آخر

أما أنا فإني علي أثرهم أسير

آليت علي نفسي أن أنتظرهم هنا ---حتي يعودوا

أخي لا تقف بل---إتفرجخ عديييييل---كوع واضرب الهبداب

أمسك إحدي المجاديف فقد خارت قواي ---والنيل بعد ما كان صغير بقي بحيرة---عدي عدي--أصلو نحن حتي الآن حق مركب الفايبر ما لقيناه

واصل أخي لعل وعسي تخدر شتلة من ود لقاي

تسلم أخي أحمد