مرافيء وظلال

تذكير بمساهمة فاتح الموضوع :

بدءا .... اقول للجميع :

سلااااااااااااااااااااااام

ثانيا :

هي مساحة للبوح الهادئ ولكن بصوت مسموع ...

فقد طرقت كل ابواب المنتدى ووجدتها جحيما ـ أن جاز ـ هذا التعبير ... وحتى تلك التي دخلنا إليها بكلمة .. سلااااااام ... وهي كلمة واحدة نطلقها في وسط الردود عندما لا يعجبنا الحال ...

ولكن من يسمع ؟

لذلك قررت أن أنشيء مكان ـ خاص ـ ارجع إليه اناجي فيه نفسي ... وأونس براي ... وكمان أجيب نكات

وطبعا هذا الإجراء عندما يتعكر الجو ... ولا يسمع لنا صوتا ...

صحح سأتحدث هنا عن أشياء متفرقة ... وملاحظات عامة ...

من أراد مشاركتي فالباب مفتوح للجميع ... فقط المفتاح ... لا مهاترات لا تجريح

******************************

ود الطرشان كتب:اسكلا (ثانية)
والبحر دميره

أيضاً وقفه مع (هاشم صديق)

ارافع لا لقاضي الحِزب
ولا لي عَسْكر السُلطان
أرافع لي ضمير الشعب
تِحت زُرقة سما امدُرمَان
ادق طبل الغضب واصرخ
واقول كل الكَلام مليان:
مزيّف في جرايد الحاشيَه
والطغيَان
مجرّح بالكلام إسمي
من السَفله ومن الصُحبَان
مرسوم يوم تِحت لافته
ومكتوب يوم تِحت عنوان
(فيلم هندي) القصص عنِّي
(مليودراما) وبالألوان.
---------
لاتجقلب الخيل ولا شكر لحماد فانه واجب عليك هناك ..

تخريمه :
اب كباس خلاني

العريس .. أركان حرب ... ود الطرشان ... سلام يا فنان ..

لا أجاريك .. ولكن امسِخك

ما رأيك ... في إندياح الجماعة ... مع وصفة هاشم صديق ؟

بس ... حاسب ..انا لاني وارقو .. ولا أفياني ..

وهاك دي ... ممنوع الضحك .. ممنوع السخرية ...مع هاشم صديق والقرنتية ..

قرنتية ...
لادبابة برمائية
لاجاسوسة
مدسوسة
لاجندية في حركة
لامختلسة
مال شركة
لاقصفت
حدود فشلا
لا كسرت صريف كسلا
ولامعروفة ختمية

قرنتية ...
لاصعلوكة
لبست شورت
لابتعرف
شنو البظبورت
لامحتاجة
(جنسية)
هي قايلة النيل
سقف بيتها
وقايله ضفافو
(محمية)
جات منسابة
عزالصيف
قايلة الناس
بكرمو الضيف
وقايلة النيل
أمان والقيف
وقايلة (الحاضرة) 1
عصرية

قرنتية ...
جات بصغارا
دايرة الخير
لاشافت
يفط تحذير
لانزحت
تكوس توزير
لاجاطت
حركة السير
لادارت
وسام تقدير
لامستلفة
عشرين وش
ولابتعرف
تعيش بالغش
كان محتاجة
بس للقش
وجات أحلامها
دوغرية

قرنتية ...
لابلعت عديل
السوق
لانضمت
بدون طايوق
لاكنزت
دهب أو ماس
لاظلمت
بدون إحساس
لاعصرت
شباب الناس
لاكتمت
على الأنفاس
لاقطعت
عشم بي فاس
لاداستنا
زندية

قرنتية ...
لا شربت
مريسة العيش
لاضبطوها
في التفتيش
لاسجنوها
شالو الفيش
لا خانت
قسم أو ديش
لا إجتمعت
(بمستر جون)
لاأكلت
مؤنة العون
لاسدت
علينا الكون
لاسبت كتاب
أو دين
لاسامتنا حمرة عين
ولاباعتنا
ضهرية

قرنتية ...
جات مشتاقة
للخرطوم
تزور أحبابها
خايفة اللوم
تصيح وتنادي
بالحلقوم:
جنينة النزهة 2
وين يازول؟
جنينة النزهة
وين يازول؟
لقت حال
الجنينة خلا
حليل زمنها
وحليل أهلها
لاقرنتية
لاأصلة
لاصوت ككو
لابغلة
لاحلوف
لاأسداً
مهاب بالخوف
لانمراً
يشد الشوف
لاضل فيل
لاتيتل
جريهو جميل
ولاغزلان
ولاطاؤوس
يباهي النيل
لازفة
طيور ونعام
لانمراً
دفر قدام
كل الشلة
ياقرنتية
-غمضة عين-
أحالوهم
لصالح عام
تقول
(الدنيا مهدية)

قرنتية ...
جات زي ضيفة
ما غارة
لامحتاجة
لي فيزا
ولا تصديق
على زيارة
جات والشوق
دموع حارة
تجدد في العيون
الشوف
بين توتي
(وعلايل ابروف)
قايلة الدنيا
لسة سلام
ماخيم
زمان الخوف
لسة هناك
ضفاف حرة
ما مطمورة
للمرة
قايلة الناس
بعزو الضيف
ما بيسوقوهو
لي حفرة
و جوار القيف
و مابياكلوهو في
السفرة
و مصيرو مخيف
قايلة الحاضرة
ماغابة
و قايله
حقوقا محمية

قرنتية...
لا قدلت
في شارع القصر
لا حامت في وقت الحظر
لا خشت
علي المأمور
و لا نطت سلك
أوسور
لا دخلت
علي أم درمان
و لا كسرت
قفل دكان
لا دفرت
علي التلفاز
لا عضت
كراع فنان
لا ذاعت
بيان للناس
لا إحتلت
كمان حيشان
و لا نصبت
شبك للحش
جات بصغارا
كايسة القش
تلاقي القوت
صبح محظور
وخير البقعة
جوه السور
سماح
لدنيا منسية

قرنتية ....
لا بتعرف
عجن أو لخ
جات أحلامها
دوغرية
عجب...
ساقوها
جوه الفخ
عجب...
من طولها
وقعت تخ
عجب....
سلخوها صبحية
عجب..
و نحنا
بنسلخ الإنسان
كيف ما نغدر
الحيوان
عجب...
و الدنيا (عصرية)..؟!

قرنتية..
لا دبابة برمائية
لا جاسوسة
مدسوسة
لا غواصة روسية
لا جندية في حركة
لا مختلسة مال شركة
لا حزبية بعثية
.....
قرنتية !!!!

حاتم طه الافندي كتب:

قيل أن : جراحاً كان يستعين بكتاب الجراحة لاجراء عملياته.
حيث يقرأ له الممرض خطوة خطوة وهو يقوم بالتنفيذ.

كان يريد اجراء عملية تبدأ الخطوة الاولى
فيها بحلاقة موضع العملية وحينما فرغ من هذه الخطوة
وانتقل الي الصفحة التالية وجد أنها مقطوعة من الكتاب
وهنا التفت الي المريض وقال له: (نعيماً).

حاج حاتم ... سلام يا راجل يا ذوق ..

خد راحتك ... وخد وقتك ... وروح عن نفسك ... حتى لا يصدأ قلبك ..

واكرم اخوانك .. وواصل سردك ..

سلمان عقيد النعوفابى كتب:ودالمناصير-


السلام ليك وللمعاك
فى المرفا قاعدين


والضل ملان وللونسى
عاكلين


حليلنا نحنا الفوق
الدنيا تملى جارين


ظابطانا المعايش
ومانى فايقين –


وزمان ---


ياحليل زمان وكت
السنين تتجارى زى لحظة هنا


والليلة اه لحظة عذاب
تنجر زى مليون سنا


جابتنى طيبتك من هناك
اهلك ينسونى الضنا


ويسقونى من رقة شعور
كاسات نبيذة مسكنا


جاييك عشان انسى
الهموم احفر غريق فيك وادفنا


وارجع اغرد من جديد فى
كل جرح زهرة هنا


ود المناصير يازعيم –تراها
المرافئ والظلال عامرى –وعريس 2012 مبتهج ومشلق—وقالوا سوا فتحة الخشم يوم الجمعة---والناس
لازم تستعد بعدين لاننا ماشين لقبيلة ابناء عمومة ولازم الباشى تتكرب---

الأرباب .. سلمان ... حكيم الزمان .. قعقاعنا فارس الرهان ... سلام يا معتق يا فنان ..

شرف كبير مرورك بي جاي .. وانت ما بتدخل مكان إلا تكون آثار نظمك ونثرك عطر يفوح يكسي كل االاركان .. كما ريحة البرم .. والبرسيم .. وبرم الخسار الجاي من السيال .

ولسع ... لسع .. دايرنك طوالي بي جاي .. المشرق يعشرق .. وكمان ود لقاي .. ودكتور ود عون الله سريع الفزعة عز الهجعة معانا .. لا تخاف تمرا يلصق لا سوسا يضرس

اما ... العريس ... قال ... دا عرس قومي ... اقلاها يجي يشرفو علي عثمان أو البشير والجماعة ... قال إيه ؟ زواج بحضور رئاسي ... شفت الدساتير دي كيف ؟؟

و قال ... الحفلة بالبنيات التلاتة و(بت عجاج ) زيادة .. وانا قلت العشا علي انا ( عشا الفنانين ) طبعا

واهل العروس قالو عندهم شورة .!!!

جنس شبك ... جنس دستور ..جنس دلع .. جنس جن ..

ودا الجننا زاتو

م بروي كتب: كتب سلمان
لازم تستعد بعدين لاننا ماشين لقبيلة ابناء عمومة ولازم الباشى تتكرب---[/font]أقبض

ده كلام شنو؟؟؟
حالتنا قلنا ده الخبر
القالوا الليلة بقروش وبكره بلاش
ياو الطرشان
يبقالي قصايدك راحت في حق الله
ود المناصير إنت حارس شنو؟؟ لامن ينشرم منك؟؟؟
(آل إيه؟؟؟آل أبناء عمومه آل) ما كفاية ابو مصطفى وعبد الواحد؟؟

الناس من صبحا بدري ... تشرف وتندلى ..وعطر الطبيعة إلتقى ـ تواضعا ـ وازدان المكان .. والجو بشر بغيمة مدرارة .. ودعاش من ـ جنوب ـ هابة بكل أريحية ..

والنيل تمسحه ـ سكينة ـ رهيبة ... والنخيل صفق سعفا وسبيطا وتمايل كل روق ـ ملامسا ـ الآخر ..

وكان مقدم محمد بروي ... هو مناسبة المناسبة المناسبة

وركزوا ليهو السيف ... وبشر .. وهز فوق الكل ..

ألف مرحب بيك ود بروي ... انتظرناك كثيرا والله ..

فلم نتعود منك بخلا وأنت الواهب نفسك ووقتك وجهدك لأهلك .. لم نتعود منك غيابا وأنت الحاضر فينا شعرا ونثر وكلاما سمحا ونفسا وروحا ..

لا أريد أن اتناولك ـ حروفا ـ حاشا لله

فأي حروف تطاوع ؟

ولا أريد أن اتناولك ـ موضوعا ـ فأنت كل صفحات كتابنا

فقط ... لا تكتر الغياب ...

تخريمة :

بدون زعل ... برجتك دي عرجي

والناس تكورك ... تاني تاني ...كرر كرر

ننتظرك بنفس رايق لتعطر المرافئ ..وانت اصل الروعة

ابو مصطفى كتب:ود المناصير والله انت ما ريحتنى فى ظل هذه الوارفة انا لازم اقوم افتش ليك الدنيا واجوط الواطة اخير لك تجى ما رق لابره واعرفك ؟؟؟ قبال ما تتور نفسى ؟؟؟؟؟



اخيرلك تجى تقابلنى فى السلك او تدق التلغراف بتاع السكة حديد وانا بدل ارقد وارتاح تحت الطلحة دى ماشى خلاء ابو غربان ؟؟؟ متوقع منك تلغراف سريع ؟؟؟؟؟

؟؟؟؟؟؟

فى واحد ضرب ليهو واحد بى بسطونة جابو اربش فى الواطة وبعدين زولك الوقع بس رقد واتمدد فى الواطة ؟؟؟؟؟ والجماعة شابكنو يازول قوم ؟؟؟ يازول قوم ( هو اتارى خايف من الزول الضربو ؟؟؟؟ والجماعة شابكنو ليك يازول قوم ؟؟؟؟؟؟؟؟؟ اخذ مسافة وقالهم انا راقد لى فوق راى ؟؟؟؟؟؟؟؟؟؟

دحين احسن لك يا ود المناصير تجى ما رق انا راقد لى فوق راى ؟؟؟؟؟؟؟؟؟؟؟

تحياتى

ابو مصطفى

ابو مصطفى ... الشايل من بحير الحارة حرة النفس ـ ودغرية ـ المسار ..

وآخر الأخبار ... بعد النيل ينزل ـ بقى ـ بين دماج وأووس مافي فاصل ... يعني وحدة إندماجية قسرية ..

الله يجازي الكان سبب

وانا يا صاحبي من كل تلك البقاع ... جلست إلى قسريب في راس بوني .. وشربت قهوة قدالية في أوس ... ولا زلت اتمرطق ـ حلم يقظة ـ شايا صاموتيا من ـ نعيمة بت ساعد في دماج ..

فأنا من كل تلك العظيمات ... نفسا وروحا .. أصلا وفصلا ..

فلا تحملني فوق طاقتي ... فأنا أبسط مما تتصور .... واخاف من أن يتأبط احدهم بنا شرا

تخريمة :

انا القاعد فوق رأي ..

العريس أركان حرب ود الطرشان ...

وهاشم صديق ... كان قريب ...برضو

(1)
التكوين
إسمي ( خميس)
ود ( كوة) العاتي.
كان (عجلاتي) .
وأُمي ( مهيرة)
وأبوها ( بشارة)
كان ( ساعاتي) .
..........
أبوي من ( بارا)
وأمي إتولدت
في حِلّة غميسة
ما بتنشاف
في أي خريطة
بأي طريقه
بأي شطارة
كان بي عين
أو نضارة .
.........
أمي وأبوي
صدفة اتلاقو
في الدنيا الشاسعه
والرحمة الواسعه
في (قطر الهم )
الدرجة الرابعه .
.............
كانو ( عوايل)
في السفر الصُدفه
ملح ومُلاح
ونسه وعرفه
( تسالي) و( تُرمس)
وقهوه ( بقرفه ).
وفي الونسه السمحه
في القطر الزحمه
قلْب ( الوالد)
حنّ .. ورفّ
وقلْب ( الوالده)
اتخجّ وخفّ.
.........
بعد شهرين
صبحو اتنين
زوجين طيبين
اتلمو في أسره
في بيت في (البقعه)
وسط ( العرضه) .
............
أبوي فقران
لكن بدَباره
مهَر الوالده
كان (سحاره) (1)
تلاته جنيه
سعفه .. وورده
و( فِركه ) و (فرده ) .
تبروقه ومصحف
و ( بمبر).. و (مبخر)
تربيزه يتيمه
نص دسته كبابي
كفتيره قديمه
وكم (هبّابي )
بحبال مُنشَده .
جابونا تلاتة
( بتّين) و (وليد)
ربّونا ( بكسره )
كسونا السُتره
شربنا اللبن
الصافي الأصلي
ما اتمطّقنا
اللبن ( البُدره )
شَبّينا كِبِرنا
فِهِمنا نَطَقَنا
وكِسْبنا القُدره .
.........
وأنا كنت ( مقرّم )
و ( ود تفتيحه )
والدنيا دي كانت
طيبة فسيحه
سينما (برمبل)
باسطة (بَيَّن) (2)
( التُرماج )
حبوبه عجوبه
و ( النفاج ) .
قصبة سُكر
و ( عنكوليب )
( نبله ) قويه
و( قلوبيه ) (3)
شَرَك للطير .
رحلة عيد
لجزيرة توتي
أو الباقير.
شدر ( كافوري)
( سواقي الحاج )
( جنينة النزهه) (4)
( زنكي اللحمه)
السوق الزحمه
و ( قهوة نوري)
والدافوري
قيامه .. عجاج .
.............
أنا كنت حريف
والكوره شُراب
أحاوْر النمله
في ( جُحر الضب)
وأبهدّل أجندّل
أشطر ( باك)
أو ( هبّاك)
أفْرشو رَرَرَب .
روضَت الكوره
بدَل مأسورها
بقت مأسورتي
( المجنونة)
( بت الكلب) .
............
وأترقيت ( للتيم )
الأول
في ( الكُتاب )
وكبرت بقيت
مفتّل و شاب.
ءاتنورت
عن الأوطان
وإتفتحت
علي ( الاحزاب )
- (العرضة جنوب )
- ( العرضة شمال)
- ( خور ابو عنجة )
- ( بيت المال)
- ( شارع الطابية)
- ( تيم )الطاغية
- ( كار) المافيا
- (جنينة سيدي )
- سور القُبه
- (ضرايح بحري)
- (شرايف بري )
- رافع الراية
- ( تيم القعده)
والاندايه .
- ناس شاشاما
نادي شليل
- ( الحوليه )
دَقَ النوبه
في حمد النيل.
- (السامراب )
نادي ( الكاب)
……. والخ
والخ
بخّا بخ
في العجن .. اللخ .
............
ولأني حريف
وود لعّاب
سكتني عيون
من باب
لي باب .
إتسجلت
في تيم مغمور
مرقت سريع
لي تيم مشهور.
والبلد أتيام
والناس أقسام .
شارع خاص
شارع عام
( أتيام ) فارعين
( أتيام ) أقزام .
أحزاب فارعين
أحزاب أعلام .
دروب وحروب
صدام وكلام .
وأنا كنت
( خميس)
ود كوه العاتي
بقيت ( موضوع )
تصفيق وشيوع
مرات ( محبوب)
أحس بسلام
ومرات ( أتخاف )
تقول بعاتي .
مرات ( إخلاص
لشعار التيم )
مرات معدود
في الحال متواطي .
(2)
الوعي
من ( تيم ) الشوف
الضيق ضِقتَ
إتأملت الحال
المايل
وشفت الناس
في خصام وقبايل.
فكيت تسجيلي
بايدي وعقلي
وأتسجلت
في ( تيم ) الشعب
الغالي الثوري
وأنا أصلي
مصحصح
و (ود تفتيحه)
ولاعب فقري .
مرقت سريع
من ( ضيق الحاره)
للميدان الواسع
دوغري.
أنا لا ( وارغو )
ولا ( إيفياني)
لا ( ود طمبل)
لا ( مساوي)
إتسجلت
بحق طعمية
( شُراب ) مقدود
و( كداره ) هديه
وكيس تمباك
وإتفننت أكون
( رأس حربه)
وإتجننت عديل
في ( المحور)
وإتقطعت
أكون ( مسّاك )
إتراقبت كتير
بالصف
وإتكعبلت كتير
من خلف .
ولأني ( خميس )
ود ( كوه ) العاتي
أقع وأقوم
كمان ( سداري )
تقول عجلاتي .
( وقعت ) كتير
لكني ( وقفت)
(حاورت) دفرت
بعزم الشعب
وصلت المرمي
كم سددت
كم سجلت
كم دافعت
كم مررت .
كم قومت
نَفَس عرَاضه
مع اني مراقب
ديمه بلاعب
لاصق فيني
كأنو ( قراده )
ومرات ممسوك
بي زول عتّالي
جابوهو عشاني
خصوص
من ( مالي)
شعارو الغالي
لا ( باص)
لا بَصّه
يتابع يراقب
تقول مُرسال
من ( جهة مختصه).
لكني طرحتو
جمعتو .. قسمتو
جدعتو بعيد
في بره الخط
إتمدد يقنت
زي ( ضكر البط) .
.............
ولأنو ( الكوره )
والدنيا الصعبه
بحر ممدود
لا حد .. لا شط
إتعذّبت
في درب ( الواقع)
أكتر .. وأكتر
التحكيم الفاشل ياما
شَهَر في وشي
( الكرت الاصفر)
ومره ( الاحمر)
وجرايد (النَِقه)
كانت أخطر.
ألف إشاعه
وكم شماعه
سموم وحُراب
دمار وخراب .
كم سووني
بعتَ وخنتَ
أو ساومت
وإتقاعست .
( بعت قضية )
قبضت رهاب
وإتهافت عديل
لي ( والي )
أو دقيت في السر
لي ( باب )
وإتوسلت
عيون ( أرباب)
مع إني ( خميس )
ود ( كوه ) العاتي
( ود تفتيحة )
مصحصح وفقري .
مرقت عديل
من باب الحاره
الضَيّق ضايق
للميدان الواسع
دوغري.
فكيت تسجيلي
بإيدي وعقلي
وإتسجلت في تيم
الشعب الغالي
الثوري .
(3)
الجَمُر
صباح يوم داكا
يوم ما ( وارغو )
باع كرعينو
بالدولار
وسعر ( التِيوّه )
صار مليار
صحيت ( ملسوع )
قرصني الجوع
فركت عيوني
شفت الدار .
..........
صباح الخير
علي ( ماسوره)
نازله (شخير ) .
صباح النور
علي ( الأسلاك )
من امبارح
وقاطْع النور .
صباح الخير
علي ( الرادي )
وكت ورجَق
كلامو نزل
تقول حسع
رماهو جمل
في نص الخور .
صباح الخير
علي ( الثوره )
وكت صبح الهتاف
في ( الكوره )
والتحكيم .
صباح الخير
علي ( الفيلا )
علي المليار
وجيب الشعب
صام ايامو
من مليم
وصار هلكان
وياكل نيم .
...........
صباح الخير
صحيت كحيان
مشيت كسلان
علي ( الكنتين )
لقيت في غفله
زادو الشاي
( دقيق الفينو )
طار لي فوق
عديل رفرف
علي ( الهبباي ).
تبنت الزيت
لقيت الزيت
يقول يا ريت
صبح حاوي
يقيف ويرقص
عديل في ( الخيت ) .
و ( الفتريته )
رفعت راسا
واتنفشت
تقول زرعوها
في ( لاهاي )
تقول جابوها
من أمريكا .
...........
صعب أصبح
( سواد الناس )
يضوقو
الكسره بي ويكا.
............
صباح الخير
علي ( الأحزاب )
فك تسجيل
وهجرة عديل
ولعبه شليل
ضحك بدموع
ودمع الشعب
ما صافح
عيون منديل .
صباح الخير
علي ( التوزير )
علي ( التنطيط )
علي التبديل .
صباح الخير
علي ( الأمثال )
علي ( الأعراف )
علي ( الجوكيه )
والصراف .
..........
شكيتكم ءانتو
لا ( للفيفا )
لا ( للكاف )
شكيتكم للذي
ما ردّ يوم مظلوم
ولا أهمل
نصوص انصاف .
(4)
التوقيع
ءاسمي ( خميس )
ود ( كوه ) العاتي
كان عجلاتي .
وأمي ( مهيره )
أبوها ( بشاره )
كان ساعاتي .
أنا ( ود تفتيحه )
من ( الدافوري )
ولاعب فقري
مرقت سريع
من ( تيم ) ( الشُله )
علي الميدان
الواسع دوغري.
واتسجلت
في ( تيم ) الشعب
الغالي الثوري.
............
أنا لا ( ساركوزي )
لا ( أوباما )
لا ( أوبينا )
لا ( كامارا)
أنا لا ( سيدا)
لا ( مساوي )
لا (ود طمبل )
لا ( ايفياني )
ءاتسجلت
بـ( كيس طعميه)
شُراب مقدود
و (كداره )هديه
واتفننت
أكون ( راس حربه )
واتجننت عديل
في ( المحور )
واتقطّعت
أكون ( مسّاك ) .
______________________________________________
الترجمة:-
(1) السحاره : صندوق خشبي مزركش بالألوان كانت تحفظ به الملابس والأواني وأحياناً المصاغ ، اشتهر
بكونه أثاث (العروس) في الثلاثينيات والاربعينيات في القرن الماضي.
(2) باسطة (بَِين) : بَيِن هو صاحب عربة خشبية زجاجية بيضاء تدفر باليدين لبيع (الباسطة) و(الكنافة) و
( البسبوسة ) اشتهرت بجودتها وكان يتخذ مكانه جوار سينما ( برمبل ) في الخمسينيات من القرن
الماضي شرق مبني البوستة الحالي لام درمان.
(3) القولوبية : شرك أو مصيدة لإصطياد الطير كان يستخدمه الصبية وكان يدفن في التراب ولاتظهر منه
الا حبة الذرة المستخدمة كطعم للطير
(4) جنينة النزهه : حديقة الحيوانات

غايتو ود المناصير حيرنى ؟؟؟؟؟؟؟؟؟؟ حيرنى عديل ؟؟؟؟؟؟؟؟

زول عارف كل شى عن المناصير وكتاب كتابة الجن ؟؟؟ وشكلو كان فى البلد قريب حتى فى حاجات مااى زول بعرفها ويحسها الا زول المنطقة ؟؟؟؟ زى الخزان قفل المسافة بين اوس ودماج ؟؟؟ معناتو ود المناصير بعد البلد غرقت كان هنالك؟؟ وبعدين شرب القهوة والشاى الصاموتو مع نعيمة بت ساعد ؟؟؟؟؟ تلك المراة العظيمة ؟؟؟ التى دوما تقول انا ما قريت لكن راى كدى ؟؟؟؟؟؟؟؟؟؟؟

معناتو لسع عندها امل فى القراءة ؟؟؟؟ وجاء الخزان وكنس نعيمة بت ساعد بى غنمها وقفتها مليانة لوبيا وطالع على الزريبة ودايرى تخش اللبن ؟؟؟ والحكاية بقت دمار فى دمار وخراب فى خراب ؟؟؟؟؟؟؟؟؟

ونحنا بقينا لافين فى حلقة مفرغة ؟؟؟؟ وداخل هذه الحلقة التى تعج وتان وترن بالنوبات الكبيرة والدراويش والسوارىوالذكر نفتش فى ود المناصير ؟؟؟ كيف نجده وعندما نجده لازمه نضربه كتاف ونرفعه فى اقرب لورى ونضعه فى متحف السودان القومى ؟؟؟؟ لانو فى حساباتى الخاصة اسطورة من اساطير الزمان ؟؟؟؟؟؟؟؟؟؟؟؟ وتحفة نادرة ومعدنها غالى اغلى من الدولار واليورو ؟؟؟؟؟ اى والله ؟؟؟؟؟؟؟؟؟

لكن قل لى كيف واين ومتى نجده ؟؟؟؟؟؟؟؟؟؟؟





تحياتى

ابو مصطفى

اسكلا بدون (هاشم صديق)
من أرشيف مجهول الهوية عن قصد !!

حماد قام بدري سأل امي
قبّال الشاي والناس نايمين
قال ليها آيمه الناس بي كم؟
قالتلو الناس!! الناس غالين

قال ليها الزول لو دار يتباع في السوق
او كان تموين بيكون بي كم
قالتلو آآآود قول بسم الله
انتَ صِبِح محموم الليلي !!
ده كلام الجن والجان والجنبو الما طيبين
قوم صلي صلاتكـ واسأل الله ان شاء الله يعين
قال ليها آآيمة امبارح كان في البيت الفاتح في الدكان
انسان معروض والناس قاعدين
قالتلو انسان زيي وزيكـ والناس شايفين؟
قال ليها ايمة بنية حلاتا وكمان من ناسنا الغلبانين
جات شاقي الشارع ..العصر امبارح والريحة تقول زرعو الياسمين
لابساله قميص زي برنامج التلفزيون الكان في السهرة فوق للركبة وبلا ايدين ... وبتنادي الناس .. ياناس ياناس يامحتاجين
قالتلو تقول ياناس ياناس والناس سامعين ؟؟
قالليها ايمة بلا اصوات وبيناتم كان سمساري العين
قالتلو آآاود طب وين اخوانا ووينو بلدنا ووينو الدين؟؟
قالليها اخوانا ...كانو سكاري وطوالي اايمة هم سكرانين
والدين آآيمة هناك في الجامع ... بره الجامع مابسووا الدين
حماد كان عمرو يكون كمطاشر .. والوالدة تكون الكم وخمسين
شوف فرق العمر الكان بيناتم ... وبيناتم كان كم زول عايشين ..
كم زول مبيوع كم زول اتباع وكم دلالين ..وقبال ماتقول الوالدة كلام ..
قالليها آيمة شايكـ فار
قالتلو آآآود الشاي ملحوق دي انا كاتلي النار ..
قول لي كيفن مابسوو الدين !!
قال ليها اااايمة البت يايمة لو دار تتباع بس تقلع توبا وتشق الشارع ..
تقابل واحد حافظ السوق وعارف الحاصل .. وبي نظرة صغيرة وغمزة عين 
تصبح حق الولد البت وتصبح هي المجنونة وهو العاقل ..
عرفتي آآيمة الزول بي كم 
........

تخريمة:
قول الوووووووو الخط قطع

ابو مصطفى كتب:غايتو ود المناصير حيرنى ؟؟؟؟؟؟؟؟؟؟ حيرنى عديل ؟؟؟؟؟؟؟؟

زول عارف كل شى عن المناصير وكتاب كتابة الجن ؟؟؟ وشكلو كان فى البلد قريب حتى فى حاجات مااى زول بعرفها ويحسها الا زول المنطقة ؟؟؟؟ زى الخزان قفل المسافة بين اوس ودماج ؟؟؟ معناتو ود المناصير بعد البلد غرقت كان هنالك؟؟ وبعدين شرب القهوة والشاى الصاموتو مع نعيمة بت ساعد ؟؟؟؟؟ تلك المراة العظيمة ؟؟؟ التى دوما تقول انا ما قريت لكن راى كدى ؟؟؟؟؟؟؟؟؟؟؟

معناتو لسع عندها امل فى القراءة ؟؟؟؟ وجاء الخزان وكنس نعيمة بت ساعد بى غنمها وقفتها مليانة لوبيا وطالع على الزريبة ودايرى تخش اللبن ؟؟؟ والحكاية بقت دمار فى دمار وخراب فى خراب ؟؟؟؟؟؟؟؟؟

ونحنا بقينا لافين فى حلقة مفرغة ؟؟؟؟ وداخل هذه الحلقة التى تعج وتان وترن بالنوبات الكبيرة والدراويش والسوارىوالذكر نفتش فى ود المناصير ؟؟؟ كيف نجده وعندما نجده لازمه نضربه كتاف ونرفعه فى اقرب لورى ونضعه فى متحف السودان القومى ؟؟؟؟ لانو فى حساباتى الخاصة اسطورة من اساطير الزمان ؟؟؟؟؟؟؟؟؟؟؟؟ وتحفة نادرة ومعدنها غالى اغلى من الدولار واليورو ؟؟؟؟؟ اى والله ؟؟؟؟؟؟؟؟؟

لكن قل لى كيف واين ومتى نجده ؟؟؟؟؟؟؟؟؟؟؟





تحياتى

ابو مصطفى

الرائع أبو مصطفى ... سلام الزول اب قولا واحد ..

ويبقى مكتوب علينا ـــ نشولت ــ ونساسق ـ ما بين مدن كضابة .. تدعي الحضارة والحداثة .. وفي أحشائها تغيب حقائق .. وتقبر قيم .. وتروح مُثل ..

وبين ريف آخاذ ساحر خلاب ـ طبيعة ـ وإنسان رهيب عجيب يعاني .. يهاتي .. يباصر .. يعافر ..يبسها كسرة بملح .. وويكة بيضا على كسرة رهافة .. وقراصة بكل ما تجود به الساقي من ملحات ..كتان ... سبروق ..جبركولة ..ولسان طير ..خدرا .. بامية ..ام رقيقي .. والهاجمري الما بيدوهو الكري ..

ومع ذلك ... وبالرغم من كل ذلك .. لم يتغير .. لم يتبدل .. لم يتحول .. لم يتحور ..وحافظ على أصله الضارب في جذور التاريخ ..وعلى إرثه من عادات وتقاليد تحكي عزة نفس أبية ... وضمائر حية ... ومباشرة على السجية ..

كتبت علينا شقاوة الشوليت والشواليت من هناك إلى هنا ...

عذرا أخي .. فقد وجدناكم هنا في هذا المنتدى .. تقدمون مساحات من البوح الجميل ... فقصدناها ..

رأيناكم ... بيان بالعمل ... تقودون القوافل إلى البلد وتقدمون الدواء والعلاج وتزرعون الفرح والبهجة في نفوس طيبة تستحق كل طيب وجميل ..

لذلك آلينا على أنفسنا أن .. نشجعكم ... نصفق لكم ..نمدحكم .. نواصلكم ... ندعوا لكم .. وهذا جهد شحيح قليل ..

أما البلد ... فقد طفناها شبرا شبرا قبل كارثة سد الربا اللعين ... ثم ضغطنا على قلوبنا وشهدنا بأم أعيننا كيف تكون المعاناة وكيف يكون الظلم ونحن نسابق ـ سريعة ـ الموج لإخراج الناس من الجزر إلى أعالي المناطق الجبال ... ثم ضغطنا على مشاعرنا وأحاسيسنا وعبرنا فوق مراتعنا مرات ومرات بمراكب المكنة والفلاليك .. ورأينا بحير الحارة وبقية المناظر التي كانت ...

الرائع أبو مصطفى ..للأسف الشديد كنا شهود ـ صمت ـ رهيب .. ساد كل البلاد .... والآن الجميع يتجمل .. ويريد أن يكون ابا لكل خير قادم مع أن الأب الشرعي هم أولئك الكرام الاماجد الذين لا زالوا هناك ..

نعلم الكثير ... ونعرف الكثير .. ولكن يبقى هناك ــ لجام ــ مصلحة وسمعة المناصير

وآآسف جدا ... فقد أفسدت الموضوع .. وعذرا لكل الإخوة ..فقد ـ نسرح ـ مرات عن المضمون . ..

تخريمة :

وإنت راجع من إجازة العيد ... كان ما بين أن نلتقي وسفرك ... نصف ساعة أو أقل ..

وحتما سنلتقي ..

العريس أركان حرب ... ود الطرشان ... ســـــــلام ..

وما بين حميد وأزهري إمتداد نوع ومقدار نفس ومشوار :

يافطوم
فطن حميد فطمنا غنانا
لاطاطينا لاسبنا الخيول تاطانا
قدمناه امام لاضلَ لا ضلانا
ماهاب السجون مافز من سيطانا
وكت الكور حما ثابت ركز لبطانه
لكن البلاد باعت ايادى بطانه
عالجا بالرحيل مدت وراه لسانه
جربا بالعويل قلبت حديثه رطانه
حنسا بالهديل رخت الحبيبه اضانه
ذى كل الطيور دايما تحن لاوطانه
ماضاق الوطن بس كبرت الزنزانه

ابو مصطفى كتب:الاخوة المرور بالجد انا متكيف من الولد البقولو ليهو ود الطرشان ؟؟؟؟ ومعاهو ود المناصير وبالتحديد فى هذا البوست الذى اصبح واحة وريفة لنا ولكل رواد المنتدى ؟؟؟؟؟؟؟



لكن يجب ان تسمحوا لى بانى ولى ظروف خاصة جدا سوف اخذ نومة طويلة تحت ضل الطلحة دى وزول يصحينى مافى ؟؟؟؟ لانى فترت وقهرت من قومة مع الصباح ونكابس للمغيرب فى المعايش ؟؟و الخرطوم وما ادراك ما الخرطوم التى اصبحت طاردة وقبيحة ؟؟؟؟ بكل المقاييس واسال الله ان يفتح علينا بى شغل فى الريف ؟؟؟ ويا ما انت كريم يا رب ؟؟؟؟





تحياتى

ابو مصطفى

الأخ أبو مصطفى ... سلام .. نوم ... أصحى على كيفك ... وإنت زول حسابات ... وعقلك محتاج للراحة ... ونفسك محتاجة للترويح ... عشان ما يجيك واحد زي ود المناصير يقلك غايتو ويعني وبرضو

. وتسلم يا زعيم..

. أما ود الطرشان ... دا زولا راسو مليان ـ مقدود عديل كدا ـ وعقلو عبارة عن كتاب به من الصفحات ما يكفي كل المنتديات .. وأنا يا دوب أباصر عشان افتح العناويين الرئيسة ... ربنا يديهو العافية ... ويسيب حكاية المواسير دي !!



دقنا وشُنب درويشنا ... يسوق تايوتا .. تكب في الميضنة

نكات رسلها واحد صحبي قلنا نضعهم في ظلال ود المناصير الغريب انه صحبي من ناس الحكومة ؟



2/

شافع راكب مع ابوهو المواصلات شاف صورة البشير

قاليهو بابا عاين داك الزول الفى التلفزيون البتتف فيهو

كل يوم ابوهو رفعو سريع يا اخوانا فى ولد ضايع هنا ده تبع منو

حاتم طه الافندي كتب:نكات رسلها واحد صحبي قلنا نضعهم في ظلال ود المناصير الغريب انه صحبي من ناس الحكومة ؟

أستاذ بسأل في طلبته:
1/ الاول: حاجة عندها اربعه رجلين بتمشي في الارض .قال ليهو الكديسه
قال ليهو ممتاز انت أبوك شغال شنو قال ليهو دكتور.
.قال طبعا ديل أولاد الدكاتره لازم يكونو شطار كده .
.سأل التاني : حاجه عندها جناحين وبتطير .
قال ليهو البقره . .قال ليهو بقره في عينك
ياخ انت أبوك شغال شنو .قال في جهاز الامن والمخابرات . .
الأستاذ حكي راسو مساااافه قال ليهو
والله البقره لو شدت حيلها شووويه بتطير

2/

شافع راكب مع ابوهو المواصلات شاف صورة البشير

قاليهو بابا عاين داك الزول الفى التلفزيون البتتف فيهو

كل يوم ابوهو رفعو سريع يا اخوانا فى ولد ضايع هنا ده تبع منو

حاج حاتم ... سلام

شكرك لوجودك الدائم بي جاي ...

بس ... ابو مصطفى قال بي غادي .. المنتدى تلاتة ارباعو ناس أمن !!!

يعني عايز المرافئ تداس بالبوت يا حاج ؟؟

وعلى قول حميد :

لا البوت ولا النبوت .. لا التوت ولا الكهنوت

ونقل الفلاشا أفاد

وكان يحكمونا بيوت .. لو بحكمونا افراد

حارين حديث الموت ... والبعث والميعاد

كل لحظة روح بتفوت .. وكل لحظةكم ميعاد

وعلتنا يا مسخوط ..مواسم الله واحنا عباد

علتنا كيف القوت .. والجيهة والمشهاد

ما مر قطرا توت .. ما طال للبراد

الشغلو كلو زيوت .. ما يلقى زيت لا زاد

العريس القومي ... ود الطرشان ... الطعم اللذيذ وراك وراك ..

الرتينة حتت !!

والشال وقع !!

حاسب يا اخينا قدامك قطر !!

الخبر الواصل لينا ... قالوا تمسك موبايلك وياللا .. تمسكا كداري ... تفتش في الكباري .. وعدل بالكبري المملوط وتقطع ام در بالنص .. وبكبري شمبات .. وبحري جاها بلا .. وطوالي بكبري بري .. وتاني ترجع لنفس المحل ... إنت عندك هناك شنو ؟؟؟؟

انت داير ليك حرس ...والحرس عبد الرحيم م حسين ضيق عليهو الشق ..ويا زول اعصر شمال ...عوجة ما بتجيك .. وجني بقى قريب .. لكن كرش الفيل دي صعبة علينا ..

وقالوا هضاريبك عاملة ضجة وكوراك وازعاج ..صحي النوم صاحبي ما يغشاك شر

أمير الروائع ... ود عون الله ..

سمعت واللا جابو ليك ؟؟

سلام أحباب للأحباب-----نازل من سبيط بقوعي ومعصود

حزنٌ ألم ---علي فراق أصحاب ----هيلي براي---وما داير الحزن ينشر

العزال ضبحناهم زمااااااااااان------خوة أبدية ----ولابتنباع

وبعدين ماشاء الله ----عيني باردي

أخوك قصير وسمين---وكرشو كبيري ----مابيتحمل الزحمة

ود عون الله كتب:سلام أحباب للأحباب-----نازل من سبيط بقوعي ومعصود

حزنٌ ألم ---علي فراق أصحاب ----هيلي براي---وما داير الحزن ينشر

العزال ضبحناهم زمااااااااااان------خوة أبدية ----ولابتنباع

وبعدين ماشاء الله ----عيني باردي

أخوك قصير وسمين---وكرشو كبيري ----مابيتحمل الزحمة

الله ـ الله ـ الله

فرحانة بيك كل النخيل والطرفة والصفصاف واللوبا والدخن وعيشا افراق .. وقف للمتيق .. والتقي لا زالت قواسيبا تملأ العين والقموح المصوبرة ـ مونة ـ الزمن الفاجع

فرحانة بيك الطيبة .. والمثُل القبيل تاريخ اجداد وعنوان بلاد ..

فرحانة بيك .. دموع اصيلة تنزل ـ قسرا ـ عند لقاء الأحباب ..

فرحانة بيك كل المرافئ والظلال ... يا ظلنا الممدود في دواخل نفوس تعاين هيبة الكعبة وقداسة الحرم من جواها لي جواها ..وهي لا زالت في مكانا

االيوم ... نعلن حالة الطوارئ ... ونفسح المجال لناس النفس الصافي ..والقلم المعتق .. والكلام السمح ..المنمق المموسق

ود عون الله ... سلام ...

بلا رتوش ... بلا مقدمات ... بلا كلام ... فأنت اصل الكلام .. وتأتيك الحروف تنساق ـ طوعا ـ وتتخطانا ـ نحن ـ الصغار ـ في زحمة النظم الجميل

******

واحد زميلنا ... قصير ... كرشو كبيرة .. مبروم برم ..لافي معانا في السوق ... جينا جمب اجزخانة دكتور صاحب الكل ..

زولنا قال دقيقة ... !!

يا زول مالك والإجزخانة ؟

قال وانا لافي من الصباح معاكم ساكت ؟

وطوالي قال لصاحبنا الدكتور : انا عايز اعمل ريجيم !!!

وقبل ان نفيق من الضحكة ..

الدكتور قال ليهو .. كل موز

زولنا .. قال ... يا دكتور آكلو قبل الوجبة واللا بعدها ؟؟؟

يا دوب عرفناك .. وفهمنا مغزى الكلمة ..
قمت رحلت .. !!
شيخ تلوب كان حاكم صبح محكوم ...
كان سجان بقى مسجون .. ما بتدوم .. مابتدوم 
و في الختام وصية لعم عبد الرحيم الرحل تعبان..
رفعنا قضية في سواق القطر في الخلا الحمار جفل
لكن جونا العسكر قالوا.. ينتهي العزاء بانتهاء مراسم الدفن
ما تزعل يا ودالمناصير ... عارفني منك ما بقدر اخبي
و خطوة منك وخطوة ليك
ما تجي ما تجي ...
كلنا في الصف واقفين جايين عليك
انا لله و انا اليه راجعون ...

دراااابه دعائيه :
عربيتك من شخصيتك

ود الطرشان كتب:
لكن جونا العسكر قالوا.. ينتهي العزاء بانتهاء مراسم الدفن

كدا زعلتني .... تدفنوا العساكر محل ما جوكم ...ودا اجمل وفاء لعم عبد الرحيم

ود الطرشان كتب:
ما تزعل يا ودالمناصير ... عارفني منك ما بقدر اخبي
و خطوة منك وخطوة ليك
ما تجي ما تجي ...
كلنا في الصف واقفين جايين عليك
انا لله و انا اليه راجعون ...

الخبيتوا كتييير ...

ولكن ...

انتم السابقون ونحن اللاحقون

ود الطرشان كتب:
دراااابه دعائيه :
عربيتك من شخصيتك

والماشي كداري .. أوراكب .. خ 11 .. والناس تمرق من 11 وهو قاعد لي 11 وهم في الطابق الـ 11 وهو في الحارة الـ 11 ؟؟؟

والله .. ناس المرافئ ديل ... يستاهلوا حفلة كاربة كدا ..

نفتش المكتبة ونشوف ..

طيب ... الناس حقو ترفح عن نفسها شوية

الشغلانية دي لو لقت سوق بي جاي ... حا نطبق نظرية حاج نظرية ـ ود الطرشان ـ ونعلن الإنفصال

سلام روقة ----سلام إبداع ----بلا كلفة

بلاتزوير ---بلا تلميع---بلا تحوير----بلاتطبيل

المرافئ--الظلال الباردة----في عز الهجير---كبسولة مهمة جداً ---نحتاجها دوماً

شايف لي باشي رهيبة-----لكن للأسف ماعندي حق العاني

بس إن شاء الله بمشي مع السيرة لى عند بيت العروس

تخريمة-------الغيمة لا تحدد أماكن الهطول----في عرب بهايمن بى ياخدا العطش

إنفصال لاااااااااااااااااااااااااااااااااااااااااااااااااااااااااااااااا

ود عون الله كتب:سلام روقة ----سلام إبداع ----بلا كلفة

بلاتزوير ---بلا تلميع---بلا تحوير----بلاتطبيل

المرافئ--الظلال الباردة----في عز الهجير---كبسولة مهمة جداً ---نحتاجها دوماً

شايف لي باشي رهيبة-----لكن للأسف ماعندي حق العاني

بس إن شاء الله بمشي مع السيرة لى عند بيت العروس

تخريمة-------الغيمة لا تحدد أماكن الهطول----في عرب بهايمن بى ياخدا العطش

إنفصال لاااااااااااااااااااااااااااااااااااااااااااااااااااااااااااااااا

غيمتنا الهاطلة ألقا وحبا وكلاما سمحا ... ود عون الله ... سلام يا راقي

الباشي رهيبة .. السوط يجفل .. والعرق للركب .. والبطان خوف البطان .. وديبا بأديبا .. وعرضة كاربي ..ماها لعب

وقالوا .. السبب ... شن وداكم تسموا الولد على أخوالوا ناس ود عون الله .. وبقى اسم + خال ..جاب للناس الأهوال ..

الخراطيش .. تئن .. والبارود عكر الجو .. والكلاشات.. تتناتق تنالق ..تسوي الأوو ..والخبخانة طفشت القلوب الخربانة ..

والدفع ما هو عاني ... لا .. لا .. لا .. فوق راس العريس .. وبالمايكرفون الما خمج ..والزغاريد تصم الأذان ..

والهلال .. نزلوه بـ 100 حفرة تمرة بركاوي أصلي بلادو ..داك اب ـ ناتجا ـ بلا خميرة ـ يرمي في الشوك ..ـ

والريحة عبقت .. وقج السمح .. وفندك الريحي نبح نبيح .. والعطور تنسابق فتح فق هدومنا رشحت رشح

*****

واحد صاحبنا ... شبعان ... حفلات عرسو استمرت 10 ايام .. الأكل يخمو خم ..والشاي والقهوة يمين السيرمس قدر الزول .. والنسوان كملت جريد التمر عواسة

والفنانين بالصف .. وحرم وعلي الطلاق إلا أغني أنا أول !!

واحدة .. عرس ولدا بعد عرس صاحبنا طوالي ...

وقفت قدام الناس .. وكوركت يا هاشم ... شكيتك على الله ... مسخت عرس ولدي !!

يا مآذن صوتكن علا .. سمعن للناس الطُرش

اه اه اه اه
التلاجة بكم ..؟
كيس الشعرية بكم ..؟
شوال الأسمنت بكم ..؟
انا مجلوب في سوق الله واكبر .. انا بكم !؟
الفانوس بره البيعة
السيف ما للبيع

أنا زول سبابي----أنا زولاً شاري

في كل مزاد------ أرفع أسعاري

الدفع الكاش -----أوعا السمساري

ود الطرشان كتب:اه اه اه اه
التلاجة بكم ..؟
كيس الشعرية بكم ..؟
شوال الأسمنت بكم ..؟
انا مجلوب في سوق الله واكبر .. انا بكم !؟
الفانوس بره البيعة
السيف ما للبيع

أي حاجة بي تلاتة ونص ...

قرقارة المحشي بي تلتة ونص ...

البسكويت المحشي بي تلاتة ونص

فتاحة البيبسي بي تلاتة ونص

قزازة الـــ بي تلاتة ونص

وأي حاجة بي تلاتة ونص

ودي ما شغلتنا والظروف جبرتنا ..

***

الصقر كان وقع كترت البتابت عيب

والتور كان وقع بتكتر سكاكينو

واخوك كان عسل ما تلحسو كلو

وعييييك ... يا جنا .. جنك عصر شمال خالص ... قدامك كانديقة .. وكير ... سحيليهو يقابض في السهلي

ود عون الله كتب:أنا زول سبابي----أنا زولاً شاري

في كل مزاد------ أرفع أسعاري

الدفع الكاش -----أوعا السمساري

ود عون الله .. البهلو وراح اهلو

انت شغلك لا كيل لا عباري ..خم سااكت

بس أوع التخزين !!

ايام فيضان القاش الأخير ... جات طيارات من الخليج راس .. شايلة مواد اغاثة ومواد غذائية

جماعتك بقوا يخزنوا .. يخزنوا حمولة طيارة بي حالا !!

تصور بعد يومين طلعت الريحة .. وبان المخفي ...

تخيل لقوا شنو ؟؟

لقوا جماعتك مخزنين حمولة طيارة كاملة جاي من الامارات ...

كلها جداد !!! أي والله جداد

واحد عنده قفص دجاج ، كل يوم يدخل عليهم ما يلاقي ولو بيضة واحدة ..!
قال ليهم : والله بكرة أجي ما ألاقى بيض تحت الدجاجة البرفعا .. طوالي أضبحا ، اليوم التاني دخل عليهم يرفع الدجاجة الأولى يلقى تحتها تسعة بيضات يرفع التانية يلقى تحتها عشرة بيضات إتكيف شديد ، لمن رفع آخر وحده لقى تحتها بيضتين بس ..!
طلّع السّكينة وقال ليها : إنتي قايلاني كنت بهظر أمبارح ؟!
قالت ليهو : إتقي الله يا راجل أنا ( ديك )
...........
العالم ما تجي الا بالعين الحمرا
العالم تخاف ما تختشيش
العالم تخاف السيف
العالم تخاف ضو الفانوس
العالم تعيش في الضلمه

ود الطرشان كتب:واحد عنده قفص دجاج ، كل يوم يدخل عليهم ما يلاقي ولو بيضة واحدة ..!
قال ليهم : والله بكرة أجي ما ألاقى بيض تحت الدجاجة البرفعا .. طوالي أضبحا ، اليوم التاني دخل عليهم يرفع الدجاجة الأولى يلقى تحتها تسعة بيضات يرفع التانية يلقى تحتها عشرة بيضات إتكيف شديد ، لمن رفع آخر وحده لقى تحتها بيضتين بس ..!
طلّع السّكينة وقال ليها : إنتي قايلاني كنت بهظر أمبارح ؟!
قالت ليهو : إتقي الله يا راجل أنا ( ديك )
...........
العالم ما تجي الا بالعين الحمرا
العالم تخاف ما تختشيش
العالم تخاف السيف
العالم تخاف ضو الفانوس
العالم تعيش في الضلمه

جايي ليك يا نورة آفة آفة للسوس البنقر عود عشيما داخرو فيك .. واصلي لما ادور اجيك .. بجيك

ومضة توقيع إبتدائي :

الما بيعرف شليك يملخك

قبل سنوات .. كان التفاح في بعض المناطق يعد من السلعة الإستفزازية !!

والي الولاية أصر على عقد إجتماع مجلس وزرائه في محلية طرفية ..

المحلية استعدت بالجد .. حتى البلاط دا غسلوه بالصابون ابو ريحة سمحة داك .

ووفروا .. السمك + الشية + المرارة النية +واللحوم اشكال واصناف .

ثم .. الفول المدمس + الفستق المستورد + والبلح وارد البصرة . والمدينة

وبعد مضيء ساعة في الإجتماع جاء مدير مراسم الوالي ... وقال للمدير التنفيذي للمحلية :

وزير المالية قال عايزين تفاح !!!!!!!

واحد صاحبنا ـ حرقان ـ جد جد من الجماعة قال :

يا زول إنت وزيرك دا قايل نفسو في الجنة ؟؟؟

امشي قول ليهو التفاح دا ما بنعرفو كلو كلو

في حلفا الجديدة .. المستشفى طرف السوق ... يعني دايرلو جبدة كدا كداري عشان تصل ..

واحد حلفاوي جا شايلا كداري وتعبان من المشوار دا .. واثناء ما هو ماشي بالميدان الكبير لقى لمة ناس كتاار !!

جا قهوة مشهورة ـ عبده مترجم ـ وشال نفسو وختاهو وقال

يا اخوانا الناس دول شنو ؟

قالو ليهو .. صلاة الإستسقاء !!

قال والله قدر السحاب الفي دا حا يودروهو ..

ليه ؟

قال زول جاي يشحد ربُنا وجاي راكب عربية ليل علوي ؟؟

واتضح ان المعتمد جاي للصلاة بعربة صالون كرت كرتونة

نادتني أمي الحنينة عليها شآبيب الرحمة والمغفرة وانا طفلٌ أغر في السابعة من العمر --حملتني صينية الفطور--أبوك عند السيالة جنب الطاحونة ومعاه ضيف--أعمل حسابك لا تعتر---نظرت--فإذا صحن يقبع وسط الصينية كانه جبل الصالح أو جزيرة شوافيه أيام زمان--- الصحن مكشوف ليبرد وحوليه بصل أخضر من الحوض مباشرةً --نظيف لامع وقطرات الماء تداعبه في فرح---وصحن الشطة مع الليمون مع الركب يسير ---نظرت---قراصة القمح تملأ الصحن حتى القيف --أصلية وارد جرف بلادي---لون الإدام يميل

إلى الحمرة قليلاً وشرائح الطماطم تزينه----حملتها وأكوام اللحم تهتز على القمة وتتراقص طربا--لعلها فرحة لعلها مسرورة بعد أن فارقت النار وتنسمت عبق الهواء الطلق---وما درت أنها إلي حتففها تسير---ستضع بين تروس حادة تطحنها طحناً مستمتعةً بذلك ثم تقذفها في طريق ضيق

إلي ظلماتٍ بعضها فوق بعض --ثم --ثم يكون مخرجها عجيب

وصلت فإذا أبي ومعه رجلٌ من قريةٍ أخرى غرب النيل تحت السيالة منتظرين وسعن الماء من غصن السيالة يتدلى يداعبه النسيم ---بدأنا الأكل وابي يلاطف الضيف ويحلف عليه بالمزيد حتى لم يجد الضيف مكاناً لمزيد --ثم أتى براد الشاي سلطان الكيف فشربوا---وابي مستمرٌ في موادعة الضيف---ثم وضع الضيف سفةً زيادةً في المتعة وإصلاح رأس معطوب ---

وفجأةً دوى من أبي صوتاً مجلجل إصطدم بالصخر وارتد--قنبلة وانفجرت---يا راجل يا باطل تسرق دكان المادح الرجل المسكين الصالح---قال أبي كلاماً لم أسمعه منه قبلاً ولا أظنني سمعته بعداً---كلام أخفه يا باطل---يصيح أبي ويشتاط غضباً وتتسع عيونه وتزداد إحمراراً---نظر الضيف إلي عصاه ثم تراجع عنها في إنكسار عجيب---لعله هاب هذا المارد الذي تدرب علي فنون القتال في شرق السودان --صرف العصي--الضرب بالسيف واللعب بالدرقة مع أهل تلك الأصقاع---رجلٌ يحمل جوال الذرة كأنه قبضة برسيم ----تذلل الرجل بكلام مكسور ---لعله تفاجأ --لعل الحق أخرسه

واصل أبي زعيقه---ثم خفت الصوت قليلاً وقال للضيف--يا هذا نحن أناسٌ لا نغلق أبوابنا إلا للستر ليلاً او منعاً للبهائم ---نحن في بلدٍ لا تُسرق لا يوجد من يسرق---لا حرامي ههنا---الحرامي الوحيد هو الصبرة--وحتي هذه إن سرقت--نتابعها --تقبضها --نحرقها--نعدمها من الوجود

حاكم أبي الرجل وهو لم يدرس كلية الحقوق----

حاكم أبي الرجل تحت السيالة بعد أن ملأ جوفه

حاكم أبي الضيف والشاهد طفلٌ صغير في السابعة من العمر

حاكم أبي بقانونٍ أظنه قانون القيبلة --حاكمه تحت السيالة

ثم أفسح أبي الطريق للرجل ---فهب مسرعاً واختفى

ذهب بعد أن نسي عصاه وعمامته

ذهب ولم يعد ---ذهب إلى أين لا أدري

ذهب --ولم أراه حتى اليوم

بعد الاستئذان ود المناصير

سرد روائي جميل دكتور حسن

والدك رجل حكيم وعادل وكريم متعه الله بالصحة والعافية

كسر القاعدة اذا انت اكرمت الكريم ملكته واذا اكرمت اللئيم تمردا

هو لم يحاكمه وحسب بل اعطاه درس في القيم والاخلاق

والدليل انه لم يعاقبه بل اعطاه فرصة للهرب

مشكور دكتور

ود عون الله كتب:
واصل أبي وقال للضيف--يا هذا نحن أناسٌ لا نغلق أبوابنا إلا للستر ليلاً او منعاً للبهائم ---نحن في بلدٍ لا تُسرق لا يوجد من يسرق---لا حرامي ههنا---الحرامي الوحيد هو الصبرة--وحتي هذه إن سرقت--نتابعها --تقبضها --نحرقها--نعدمها من الوجود

حاكم أبي الرجل وهو لم يدرس كلية الحقوق----

حاكم أبي الرجل تحت السيالة بعد أن ملأ جوفه

حاكم أبي الضيف والشاهد طفلٌ صغير في السابعة من العمر

حاكم أبي بقانونٍ أظنه قانون القيبلة --حاكمه تحت السيالة

ثم أفسح أبي الطريق للرجل ---فهب مسرعاً واختفى

ذهب بعد أن نسي عصاه وعمامته

ذهب ولم يعد ---ذهب إلى أين لا أدري

ذهب --ولم أراه حتى اليوم

نعم العقل ... نعم الفهم ..نعم التدين .. نعم العدل ..نعم القانون .. نعم الكرم ... نعم النبل .. نعم اثبات الأجر من الكبدة الرطبة .... نعم القيم الأخلاق ..

هذه من الثوابت والأصول التي تناولناها من قبل .. وهذه من القيم الضاربة في جذور التاريخ ..

لله درك ود عون الله ... لله درك دكتور ود عون الله شاهد الأمس مؤرخ اليوم ..

وقطعا من كان والده بتلك الصفات فإنه سيكون وريث تلك القيم والأخلاق والعقل والفهم الراقي ..

تسلم دكتور ود عون الله يا راقي

حاتم طه الافندي كتب:بعد الاستئذان ود المناصير

سرد روائي جميل دكتور حسن

والدك رجل حكيم وعادل وكريم متعه الله بالصحة والعافية

كسر القاعدة اذا انت اكرمت الكريم ملكته واذا اكرمت اللئيم تمردا

هو لم يحاكمه وحسب بل اعطاه درس في القيم والاخلاق

والدليل انه لم يعاقبه بل اعطاه فرصة للهرب

مشكور دكتور

جزاك الله خيرا حاج حاتم ... فأنت لا تحتاج لإستئذان .. لانك من مؤسسي المرافيء والظلال ..

حاتم طه الافندي كتب:

إذا أهمــك أمر غيــرك، فــاعلــــم بأنــك ذو طبــع أصيــــل

و إذا رأيــت في غيــرك جمــــالا، فاعلــم بأن داخلك جميــــل

و إذا حــافظــت علــى الأخــــوة، فاعلــم بأن لك علــى منابــــر النــور زميــــل

و إذا راعيــــتَ معــروف غيــــرك، فاعلــــــم بأنــــك للـــوفــاء خليــــــل


الشعراوي

شكرا حاج حاتم ...

واصل وافتل فوق حبلك بلا فواصل .

.فعهدنا بك أنك تتقن ما تقدم وتقدم ما تتقن ..

ولا غرو أبدا في ذلك فأنت سليل اسرة الأفندي حيث العلم الغزير والفهم والعقل الراجح الكبير

تسرق ملاية ... تندقة

تسرق ولاية ... تترقى

اتمنى بالجد كدا ... أن اصلي في مسجد لا اسمع فيه موسيقى صاخبة من تلك الموبايلات الغريبة

ود المناصير كتب:اتمنى بالجد كدا ... أن اصلي في مسجد لا اسمع فيه موسيقى صاخبة من تلك الموبايلات الغريبة

صدقت اخي فكم هي مزعجه تلك النغمات ، ولفت نظري في محاولات منع تلك الظاهره عبارات عديده تكتب علي حوائط المساجد منها لاتذهب خشوعنا ، عند اتصالك بالخالق اقطع اتصالاتك بالخلق .
شكرا الرائع ود المناصير ونتمني ان تختفي تلك الظاهرة