قاموس المناصير اللغوي

تذكير بمساهمة فاتح الموضوع :

يقول ليك الكورة قوقلا وشوتا. اي اضعها على كوم صغير من التراب ، لكي تكون ساهلة في الشوت.. مهوية من الارض

من طرف **HASSAN SULIMAN** السبت 11 أغسطس 2012, 10:13 pm

نـِـنـْـجـَارط :نتقاسم
إستعمالها: ماهن كتار الألف جنيه إنت 200 وأنا 200 وعثمان300 وعلي 300 ننجارطن مع بعض...

..................
حسون.. هههههههه ح دي شنو؟
ح
حسون
ح
حلوة
ح
حليييوة
والله شنو؟
الليلة فطور رمضان كارب والله شنو؟

نـِـتـْـوارَرِن: أي نتقاسمن:
اقول ليك براد الشاي باقي فيه قدر كبايي نتوارَرَا بيناتنا. اي ده شوية وده شوية
..........
معليش ننجارطن مافي ..
في نتقارطن

الدّلاّح ـ الحُدُر / الإنحدار الشديد

تعيش يا ود المناصير
الدلاح موس برضو سعف دوم الخلاء؟؟؟
انا قايل في حاجي زي دى
..............
فارطني: اي اختلفنا في مكان اللقيا..
مشيت ازوروا لقيتو فارطني طلع عقبة حوه. سبقنى

تسلم يا باشمهندس

سعف دوم الخلاء أوسعف الصور / اسمو الدلال يا باشمهندس

الكاشان / وهي عملية دفن تيراب القمح بعد ـ كتحو ـ في الحوض وهي كانت تتم بالطورية

الزايع / او الذايع :/ الشره الاكول الذي لا يشبع بسهولة

من طرف **الفكى احمد** الثلاثاء 21 أغسطس 2012, 5:35 pm

ناهى :مثلا أهلنا يقولون ـ البضاعة دى ناهى ـ أى غير متوفره ويصعب الحصول عليها ...

من طرف **الفكى احمد** الخميس 23 أغسطس 2012, 6:21 pm

يَخَالى :ـ هذه المفردة تعنى يهمس فى أذن مستمعه

يَخَاليك تعنى يهمس فى أذنك

خَالاهُو أى همس له فى أذنه

وهى من إختلى به للحديث معه

دون غيره والله أعلم ...

شـِـدِقِْ.... خد.. وجنة.. كاحل.. جضم..
................
الغريبة وجدتها في كتاب قديم.. أنها كلمة عربية فصحى مندثرة
بالله شوف مناصيرنا ديل كيف؟
يبدو أنهم من العرب.. زمااان خالطوهم العرب النصااااح من الجزيرة العربية موش أي عرب ساكت

الحـَـرِيــمي: بتفخيم الراء..
طفل أمو تحمل فوقو وتولد قبل عام.. ما كمل لبن رضاعتو ..وجاء أخوه التاني.. يصبح معلعل وغيور على أخوه.. مرات تبلغ به الحالة إلا يجيبوا ليهو مصباح جد مصباح يعزم ليهو .. والله يودوهو بسوي غلام يعزم ليهو فوق راسو( ما تجي تسمعنا أميرة علي.. تشتغلنا) وتقون تركتوا المستشفيات ورحتوا الفقرا... نحن هنا ناس تراث نروي التراث كما هو ..
معلعل: يبكي بلا سبب من جراء الغيرة على أخوه الجا قبل ما يكمل رضاعتو.. ومعلعل هي عند المناصير غير مدلع..وجايز يكون معلعل من حاجات أخرى برضو..

من طرف **الفكى احمد** الأحد 16 سبتمبر 2012, 4:49 pm

القـافَه :ــ {القاف يمنيه} تعنى الكلام ، الأخبار ، الكلام عن الغير
عَـــاوِل :ــ قديم ، منذ عام مضى ، مثلا يقال التمر ده عاول ، أى
ليس من إنتاج هذا العام وإنما من الأعوام السابقه ...

ندخل القافه في جمله مفيده

المنتدي اليومين ديل في قافه ما ليها حد,,,,,ان صحت الجمله

من طرف **الفكى احمد** الإثنين 17 سبتمبر 2012, 5:27 pm

تسلمى أستاذة نجلاء جملتك صحيحة ، ما فى أكثر من القافه فى المنتدى ...

جملتك صحيحة يا أم وضاح
.................
الفكي عاول الليلة دي بحتها من وين؟
وغالبا ما تقال للتمر.. السنة دي عاول من الشيل ما شال.. أو ضكر التمر السني دي مافيهو قروعة عاول

من طرف **الفكى احمد** الإثنين 17 سبتمبر 2012, 6:41 pm

يَــلادى ؛ــ يرد بمثلها على من يسبه أو ينهره ...

يا بت ما تلادي الناس الكبار... يا الفكي
................
المسابلة: العزاء
يسابل يعزي

من طرف **الفكى احمد** الأحد 23 سبتمبر 2012, 5:23 am

الوَسَـــر :ــ تعنى الهيئه ، الشكل ، اللون . كأن يقال : والله اليوم
فلان ده وسرو ماعجبنى . أوكأن يقول أحدهم للآخر ، جلابيتك دى
وسرا ماهو سمح ماتمرقبها ...

دَاجى :ـ بفتح الدال وبالشده المكسوره على الجيم ، تعنى فيما تعنى دائما باستمرار ...

راو: روم.. أطلال.. بيوت مهدمة قديمة

غـَـاغـَـه : تراها زي الحاصلة دي اليومين ديل زي حكاية الزول الشتم الناس ده وراح.. ويلا البوستات كلها ملاني غاغة
غاغة: يعني.. هيصة.. حجي.. كوراك.. في الفاضي والمليان..
( دي لقيناهنا عند ود عون الله..)
قطعناها بي جاي جبناها من القاموس هنا في التراث ضهرها مكشوف عشان الناس يشوفوها

من طرف **نجلاء زمراوي** الأحد 14 أكتوبر 2012, 2:19 am

جنس غا غه الله ستر!!!!!!!!!1

دخلنا غاغه في جمله مفيده

من طرف **نداء** الأحد 14 أكتوبر 2012, 3:11 am

تحياتى لأساتذتى الكرام . الكلام دة تجيبو من وين ؟؟؟

نداء
هلا
ومرحب الانضمام لمنتدانا العامر
......
الكلام ده لغة أهلكم
.......
أستاذة نجلاء.. أنت أهل الصفح والعفو( أهلي وان جاروا على كرام)

من طرف **نجلاء زمراوي** الأحد 14 أكتوبر 2012, 3:18 am

صديق عبدالله علي أبوحنة كتب: نداء
هلا
ومرحب الانضمام لمنتدانا العامر
......
الكلام ده لغة أهلكم
.......
أستاذة نجلاء.. أنت أهل الصفح والعفو( أهلي وان جاروا على كرام)

عشان خاطرك وخاطر الطيبين المحترمين...نصفح ونعفو....

اللهم اجعلنا من الكاظمين الغيظ والعافين عن الناس

الـمـَـجوج : المسافة
استخدامها: لاتطـوِّل المجوج أي لاتتأخر.. لاتطول المسافة.. لاتسهب في الشرح..

قـَـبـُـلا.. وَحـَّـدا : أي لا أتمنى حالها؟
أو قبلو وحدوا: لا أتمنى حاله..

دُوُدِى بين حـَـجـَرين : عبارة تطلق حصحصة الخبر أو الأمر.. الخبر اليقين .. بحذافيره
.......
استعمالها : والله ما شاء الله حكيت لينا كل حاجي ما خليت دودي بين حجرين

( الناس الأها.. أها ) أي علية القوم، اصحاب القدر والمكانة الاجتماعية

الـبـَـنـْـبوُن : عظمة مؤخرة السلسلة الفقرية مع عظمة الحوض
استعمالها : يا ولد اقعد ساكت ما تنط من فوق الحيطة ، بي تقع تكسر بنبونك

عـِـضـيم الشيطان : عظمتى مؤخرة الساق مكان التقاء عظمة الساق مع الرجل..

بـُـكـّـَابــَــة : زوادة السفر زمان ، تصنع من القمح المخمر.. والحلبة والتمر المفشق.. وتخلط مع قليل من السكر.. ثم تعاس على الدوكة.. وتمسح بالسمن البلدي والسكر...
تاكل فيها لامن تصل الخرطوم، وناس البيت الماشي ليهم كمان ياكلوا فيها ، لابتعفن ولابتجيها عوجي..

من طرف **الفكى احمد** الجمعة 26 أكتوبر 2012, 3:37 am

يَلهض :ـ مثال ذلك إذا رتعت بهيمه فى زرع فتأكل هنا وهناك
وتدوس على الزرع وتطرحه على الأرض، فيقال لهضت الزرع ، وأحيانا تكون إحدى النساء مثلا مع الغنم فى الكر
أو الزريبه ولا تنتبه لثوبها أو طرحتها وقد لاكتها إحدى البهائم محاولة أكلها فيقال البهيمة لهضت ثوب أو طرحة فلانه ..

يَفنِن :ـ يفنن الحجر أى يجدعه أو يرميه بعيدا ...

بَتنو بَتِن :ـ أى ضربه ضربا مبرحا ...

نخيل حـَرْبـِـي : يعني قايم براهو نواية بلا زول يزرعو

من طرف **الفكى احمد** الخميس 01 نوفمبر 2012, 1:41 am

يتعتع :ــ بفتح التاء الأولى وكسر الثانية ، تعنى يترنح

الفكي مافي حاجة بي تخلي الزول يتعتع إلا المريسة..

قـَـدْر الـكـَـتـْـلـِي : كبير
استعمال : حسن قبض لو حوتي قدر الكتلي

من طرف **HASSAN SULIMAN** السبت 03 نوفمبر 2012, 10:13 pm

مهما طال الزمن وبعدت المسافه لابد من غشوه ديوان صاحبى الكارب وربنا يعمروا بى اهلوا وضيفانو من الصعيد والبندر ونا س تحت ( والناس الناجعين ) وانا قلت يمكن القالى شويه ربيت مفضل من الضحيه ام خروفا ( مدبلب) بى نصف باتيل كوفتى ولا لبتن مدنكل وبعدين اكوع واشوف باقى الاخبار شنو

سلام وعوافى وشوق ومحبه يا راقى

تسلم يا حسن تراكا تكمرق بي جاي.. يديك العافية.. لابد من زورة لكم ومشاهدة. سوف نخبرك بذلك في حينه

من طرف **الفكى احمد** الأحد 04 نوفمبر 2012, 7:08 am

مَجـَـاوَق :ــ تعنى غير منتظم أو ليس كما ينبغى ــ عنقريب مجاوق ــ يعنى شكله منحرف وغير مربوع ..

مَـكوزم :ـــ تعنى صارى وجهه من الزعل أو بسبب أمر صعب .
بَاطــَا :ــ فاشل ـ الولد السنه دى طلع باطا أى فشل ولم ينجح .

من طرف **الفكى احمد** الخميس 08 نوفمبر 2012, 5:32 am

يا عَمــــلات :ــ تعنى كما قال ، كأن تقول ياعملات فلان القضية دى عويصه
يعنى حسب قول أو كما قال فلان القضيه دى عويصة ...
عَوِيصَه :ـ مستعصيه ، صعبة

الـقـَـاقـَـة : بتعطيش القاف.. الونسة والهـَبـَـداب
الهـَـبـَدَاب :الونسة
يـَـهـَـبـِّـد : يونس
الغاغة : الحجي والكوراك والهيصة في اليسوى وما يسوى
الصـَـلـَّـبـَـة : الحجي والكوراك
العـَـوَّ ة : الهياج والكوراك والجوطة والفدغيبة
الفدغيبة ك العراك
الكـُـمـَاج : الوطيس. الضرب بالسوط.. الجلد

ضـِـبـَـيـْـتـُـوْ باللهْ : أي لعنة الله عليه... الباء في ضبيتو فتحة مائلة تنطق ولاتكتب..
....... بالله هنا مفخمة وليس ترقيق.. والهاء عليها سكون ضروري. غير التفخيم والسكون في آخر إسم الجلالة . الكلمة تختل ولاتعطي معنى....
ما تستهينوا بي لغتكم.. هي اشرف اللهجات وأقربها للعربية.. التفخيم والترقيق يؤثر فيها

الــنــُــغـَـا : الهظار
تناغ.. أو تناغي.. يعني تهظر

يـَتـَــوِّكْ .. يعني يعـوِّق... أو يفلق.. أو يضرب
أقول ليك أعمل حسابك الشافع ده شال الساطور ده بي يتوكك بيهو..
.........
لغتنا لغة المترادفعات..
برضو ينتوّك عندها معنى تاني
.. أقول ليك.. فالا عليها قبل وليدا الجابتو ده!
كانت منتوِّكي ليها على وليد جاء ميت..
يلاحظ هنا انتوكت بمعنى أجهضت..
هنا للمرأة
.........
أما بالنسبة للحيوان مثلا.. أكرمكم الله
النعجة والحمارة ما بنقول انتوكت... نقول طـَـرَحـَتْ... انتوكت بس لبني الإنسان
...........

هنا الكبار

والماعندو كبير يشوفلو كبير

والدانقة دى ملانى عناقريب وضلها رهين وفيها اربعه طاقات وبابه واج

وقدامه كرقة ضلها رقراق على هواها سمح بلحيل وفيها سعن جديد مويتو صاقتى بلحيل وطعمو لليلى قرض قرض

اها السعن ده معلق فى رهبان والشربوق مختوت فوقو

كمان الونسى لاتحك ، ولداً لى ابحنه وولداً للطنبورى منجضنها نجاض

كان جيتن غاشى يخربو خدمتك ويقطططعو مصارينك من الضحك والقرقراب

تسلموا يا رائعين

ودمتم لنا لننهل من علمكم ونستزيد

من طرف **الفكى احمد** الخميس 22 نوفمبر 2012, 5:36 am

ماعندك عوجى ياسامى قسيبتك فيها كتير من التمر العاول دحين كدى كارن من قعَرا
وكان لقيت فيها حتى اكان كرموشه أمرُقا لينا لى بره ...

.......................................

التَخوخ : يقصد به الغيم أو السحاب الخفيف المتقطع ، المُفرد ــ تَخوخه ، تَخَـايى أو تخايه .
تــُخَـه : تعنى ثخين أو ممتلىء أو سمين وغالبا مايوصف بذلك الشخص الذى
لا يعول عليه بالرغم من كبره وحجمه ..

تسلم يا سامي وسامينا على هذه الإضافات المشرقة.. إنت ذاتك ما ساهل
..................
الـهـَـجـْـوَلـَـة : الانزعاج بدون ما يظهر الهدف.. أو الجري شمال يمين.. شرق غرب بدون ما نحصد فائدة تذكر
...
ومن مشتقاتها : اتـْـهـَـجـْـوَل : اتـْهـَـجـْوَلـْـنا
استعمالها : قالوا لينا تعالوا لى حقوقكم في الدامر نصرف ليكم.. يا زول اتهجولنا ساكت. ما لقينا حاجة
أو...
يا زول هـَـجـْـوَل الناس ساكت.. الناس قايلنو ضهب في الخلاء. القفر قام وراهو.. ما يظهر إلا بعد يومين عند أختو ديك الفي الكنيسي.. موسوالو قليلة يشرب فيها..

من طرف **الفكى احمد** الخميس 22 نوفمبر 2012, 6:21 am

يـَلــَـكِـع : تعنى يَمـسح بشىء (يجلبط) كأن تقول ياولد ماتمشى حفيان عشان ما تلكع
كرعيك بالطين ، او عشان كرعيك ماتتلكع بالطين .

تتلكع :ــ تعنى أيضا تتلكأ أو تمشى ببطء ، ياأخى تتلكع كدى مالك ماتمشى سريع ...