جــــــــــــــــرف روكــــــــــــــــة

من طرف **م بروي** السبت 31 يوليو 2010, 4:03 am

تذكير بمساهمة فاتح الموضوع :

لأني أتهوب فتح بوست جديد ويبقالي زي الزول الماسك المويه...مويه شنو؟؟ المويه ممكن الواحد يقرنها ويزوغ..أو زي الواحد الشرك جباتو وكل مره دا يشوفها قبضت واللا لا..
لذلك نستأذن ريسنا الرايع بأن يكون هذا البوست (جرف روكه) حق الناس كلها وكل زول تخطر بباله خاطرة يجي يدق سلوكتو في الجرف دا وما ملزمين بالرد..وتانياً في خواطر صغويري ما تستحق يفتحوا ليها بوست براها أها دي محلها جرفنا ده.
الخاطره الأولى من أخوكم..
لو إنت منصوري ..تقرأ هنا وتمرق وتتمتع بوظيفه عاليه أو مقاماً رفيعاً وحاسي إنك أكبر من أن الدخول هنا والمشاركة معنا ..فمعليش نقولك يا صاحبنا غلطان..فنحن أهل وكلنا في الهم و الآمال شرق.
خاطرة تانية/:
لاقيت صاحباً لي منصوري جايي عمره من السودان ...قال لي والله نحنا المعرسين من برا المناصير ديل تعبانين خلاص..قلت ليهو:ويعني نحنا المرتاحين؟؟؟ نحنا بس فايتنكم باربعه حاجات:
1ـالصبر
2:عشان عين تكرم ألف عين.
3:مرتاحين من قصة(أهل الراجل وأهل المرا) لأنهم واحد.
4:لما الباب يدق ويجوا الضيفان ... نحنا مرتاحين من تعارف الضيوف الجداد مع القاعدين جوه
ما طوالي تقع المقالده وبعدها الخزان واللجنة والبحر شرد وأزيار بغجور و البقوعي مرق وموقع خالد ونضم سلمان البعجب وجارو ابو حنه السردو جميل وحازم ده منو؟ ولو إنت مرهق ممكن تديها نومه وهم براهم بجيبوا أكلن وشرابن
.ونواصل

من طرف **sheery51** الجمعة 11 نوفمبر 2011, 6:26 pm

سلام اهل الجرف وعيدكم مبارك
سلام اخوى النفر وعيدك مبارك وربنا يجمع الشمل ويرد الغربه
ويديك طول العمر
بمشى واجى القت لى ورق ملاح للغده شافى جرف ود البروى
مفرهد ولوباه اخدر وكمان اشيل لى حدجات من النز الليل سلمان ود عقيد
بس انتو سامحونى لانى اتجاوزت حدودى ودخل جرف العباقره والشعراء
ولكم كل الود والاحترام اخوتى
وكل سنه وانتم تامين وسالمين

من طرف **النفر** السبت 12 نوفمبر 2011, 7:45 am

لك كل الود والإحترام أختى شيرى ويا هلا ببت شيوخ القبيلة .... كل عام وأنت طيبة وربنا يرد غربة الجميع ...مشكورة على المرور والمداخلة الرائعة ... جرف ود البروى مخليهو روكة للجميع ... سبيل للماشى والغاشى ... الجايى للونسة والخبار والجايى يسلك ويزرع والجايى يتعلم العوم فالجرف يســـــــــع الجميع _
لك تحياتى وودى ،،،

من طرف **م بروي** السبت 12 نوفمبر 2011, 4:09 pm

النفر كتب:العيد يا أخوان ... عدا فات

ويا حليلى الضارب الشتات

ليتو شتات العبيدية والقمبرات

ساكن وحيد وسط الجاليات

لا أنيس لامعايدة لا زيارات

عيدى كلو .. قضيتو آهات

ومرة مرة .. أديها قحات

وعقلى تايه مع الذكريات

تانى توبة ولن أكرر الفات

إما أمشى أحج وأقيف بعرفات

ولا أسافر وأعيد مع الوليدات

وأشوف الفرحة فى عيون البنيات

التملى يسألن ... ودايما حنينات

وللأرحام والأقارب أجدد للصلات

أصلو العمر تانى كتيرو ... فات

**********************

إنت عيدنا الفيهو السلات
وصباح صلاتو وحسن الصلات
شعيريتو ـ ريحتوـسلامو وقلدات
وضحكة الأخوان والنكات
وكلامن الطيبين ودعوات
ولي نفرنا الغالي بالذات
نرسل العيدية دعوات
يحفظك والعافية درجات
تبقى في العاليات ودايمات
وكل عيد الجايي والفات
يبقى طيب أبو البنيات

من طرف **م بروي** الأحد 13 نوفمبر 2011, 7:12 pm

sheery51 كتب:
سلام اهل الجرف وعيدكم مبارك
سلام اخوى النفر وعيدك مبارك وربنا يجمع الشمل ويرد الغربه
ويديك طول العمر
بمشى واجى القت لى ورق ملاح للغده شافى جرف ود البروى
مفرهد ولوباه اخدر وكمان اشيل لى حدجات من النز الليل سلمان ود عقيد
بس انتو سامحونى لانى اتجاوزت حدودى ودخل جرف العباقره والشعراء
ولكم كل الود والاحترام اخوتى
وكل سنه وانتم تامين وسالمين

كل سنة وأنتم بألف خير
بمرورك فرهد وأزهر وازدهى الجرف
مقامك أسمى فوق هام السحب
وما تسميهم العباقره والشعراء
تتضاءل دونكم مقاماتهم المتواضعة

الخضار الشال وبدع
كان في قسمه داكان خضاره
اصله مماقمت ازرع ماحضن سيدابه غيري
والله جرف بروي غلبني اعرفه
المواسم والتواريب
لانه البحر عير مواسم الزراعونوع الزراعه
لكن بزرع
الزارعه الله تقوم فوق خشم الكدوس

أستاذنا القامه ....ودبروي....
السلام ليك وللي معاك في الغربه قاعدين؛؛؛
السلام من أبها لي بلاد الصين ؛؛؛
طبعا ياخوي الجرف في الشتاء دا يكون عامل عمايل؛؛
وأكتر وصف ليهو غنية الجزيري بقت مخادة لصديق أحمد
بس أنا ماحافظا أتمنى تنزلا هنا؛؛؛

من طرف **م بروي** السبت 07 يناير 2012, 5:21 pm

أبو سفيان
سلام
البي تقوم فوق خشم الكدوس دي ما الجمرة

تعجبني يا ابراهيم روحك المرحة
(ونسه ساكت)
فهذه مواصفات الإنسان الذي لا يُمل
الجرف يا ابراهيم في الشتاء يكون
ملان كلتيب ماشفتو لامن طار وملأ كل البوستات التانيات زمان بيقولوا فلان
(ميت كلتيبي)كناية عن العشق الزايد
مصطلحات شاخت وراحت.

من طرف **الفكى احمد** الأحد 08 يناير 2012, 5:06 am

السلام عليكم ياناس الجرف ، طبعا الأيام دى ما فى زولا فايق ينزل لاتحت على الجرف ومن غير الكلتيب والبرد السبب الرئيسى الناس والقبايل كلها مشغولة فى الباشى ــ عرس المناصير الجماعى بالدامر ــ واللعب هناك عاكل عكله ليل نهار والفنانين والشيالين آخر إبداع والناس جو من وين وين والكفايى راقدى رقاد ، بس الناس حارسين القعيدة ...

من طرف **م بروي** الثلاثاء 10 يناير 2012, 6:52 pm

الفكى احمد كتب:
السلام عليكم ياناس الجرف ، طبعا الأيام دى ما فى زولا فايق ينزل لاتحت على الجرف ومن غير الكلتيب والبرد السبب الرئيسى الناس والقبايل كلها مشغولة فى الباشى ــ عرس المناصير الجماعى بالدامر ــ واللعب هناك عاكل عكله ليل نهار والفنانين والشيالين آخر إبداع والناس جو من وين وين والكفايى راقدى رقاد ، بس الناس حارسين القعيدة ...

شكراً ياباشمهندس
فرهد الجرف بوجودك ونور
تتذكر لما قبضوا تمساح قالوا تساعي
وسلخوهو في جرف المتيرة
وكنا نمسك في قطعه صغيرونه في مؤخرة
ضنبوا ونضغط عليها فيهتز التمساح بشدة وهو مسلوخ؟؟
والرجال ينهرونا ونجري ونرجع تاني
نعصر القطعة ويهتز التمساح وهكذا
قام الحلبي لفحنا بي درابات
جات واحدي في ضهري يليلي تشح.

من طرف **ابو مصطفى** الثلاثاء 10 يناير 2012, 7:04 pm

السلام لى سيد الجرف السلام مطبوق من بونى وحجارها والسلام مطبوق من كل الجزائر وحتى من اطراف الصعيدية شى سلام وشى كلام وحاجات كتيرة بس مشتاقين لامتين نلاقى سيد الجرف ونحكى ليهو الحاصل فى العقاب والسنى دى سنة محلى بالحيل والرجال ماهم فى كلهم قالوا قاعدين فى الدامر والحريم قالن نحن ما بنقدر نزرع جرف ودبروى وربنا يسهل ويجيبهم تامين ولامين من دامر المجذوب وبعد داك نسوى الكرامة ومحمد الشاعر يقول جدعة جدعتين فوق هادى السنة المحلى ؟؟؟؟ وعليك يا الله اتوكلنا ويا ربى تنصرنا ؟؟؟؟؟؟؟؟؟؟؟؟؟؟؟

تحياتى

ابو مصطفى

سيد الجرف ... وسيد الإسم ... وسيدالبلد...وسيد الشعر كلهن ديل؛؛؛
.........سلاااام عليك.........
ياخوي ياحليل الكلتيب قطع نفاخ النار ومرقا في الشايقيييي وفي دنقلا؛؛؛
ياخوي بإختصار كدي بقا كرزاي ورحل خلا البلد؛؛؛
قلنالو رحلت مالك قال شلال ود عيني دا حد ماحرستو أبا يمرق ومشيت خليتو؛؛؛

من طرف **م بروي** الإثنين 16 يناير 2012, 3:07 pm

أصدقائي الباشمهندس الفكي والزعيم النفر وصديقي ود عقيد
سلام
أجزت المدارس ولقيت لي فريقه
قلت أمشي أشوف مجادعات صاحبي النفر
المكتوب فيها شنو وأقوم أساهم معاهو لو قدرت
لقيتو كاتبلو قصيدة قال نشرها في الجرف
ووالله لم أمر على هذا المكان أصلاً.
جريت طوالي للجرف وفتشت ولقيتها ولقيت معاها روائع ود عقيد
والباشمهندس الفكي والله يعلم كم أحب هذا الثالوث وأقدره
شفت التاريخ لقيتو أيام الضحية وكان معي النافعابي
ولم نجد فرصة للدخول للمنتديات في ذلك الوقت
لما رجعت افتكرت قصيدة النفر في البرجوب والحمود دي آخر شيء
لأني سمعتها من قبل واتاريهو مداخلاتكم قبلها
ووالله وأنتم تعلمون بأني ما بنط زول في الردود أبداً
واللوم يجي بالغفلة وسوف أرد على قصايدكم في الجرف
وأبدأ بود عقيد
ولكم العتبى أحبتي حتى الرضا التام

___________________

الناس معادن فضه وحديد
والدهب سلمان ود عقيد
سبيكه ما لبسوها في جيد
المختم ماهو تقليد
إنت نيلنا الطامح شديد
ومشرقاُ شال فدع الجريد
القمح والنخل النضيد
ونحنا جنبك عيش الصعيد
اتلومنا ما شفناهو الجديد
واصلوا لوم الغفلات شديد
البيسرح زولاً بليد
الكدوهو بعوداً غليد
بي تسامح محري وأكيد
وتاني في الغفلات ما بنزيد

شاعرنا المحترم محمد بروي
مرارا وتكرارا احاول ان افتح هذا البوست ولكني اتراجع ...والسبب بيني وبينك <لم افهم معني جرف روكه>اوعك يلم فيها ابراهيم يمسكه لي زله
وكن عندما قرات ما يحتويه البوست من كتابات العباقره ومجادعات الامراءاثرت الانسحاب والتعليق من علي البعد,,,,,,,,لانني امام عمالقه
دمتم زخرا يا ابناء بلادي

تخريمه عبد القادر والاسره بيسلمو عليك

من طرف **م بروي** الإثنين 16 يناير 2012, 3:47 pm

ابو مصطفى كتب:السلام لى سيد الجرف السلام مطبوق من بونى وحجارها والسلام مطبوق من كل الجزائر وحتى من اطراف الصعيدية شى سلام وشى كلام وحاجات كتيرة بس مشتاقين لامتين نلاقى سيد الجرف ونحكى ليهو الحاصل فى العقاب والسنى دى سنة محلى بالحيل والرجال ماهم فى كلهم قالوا قاعدين فى الدامر والحريم قالن نحن ما بنقدر نزرع جرف ودبروى وربنا يسهل ويجيبهم تامين ولامين من دامر المجذوب وبعد داك نسوى الكرامة ومحمد الشاعر يقول جدعة جدعتين فوق هادى السنة المحلى ؟؟؟؟ وعليك يا الله اتوكلنا ويا ربى تنصرنا ؟؟؟؟؟؟؟؟؟؟؟؟؟؟؟
تحياتى
ابو مصطفى

قلت لياسين وخالد
والله المناصير ديل بقوا يلدوا ولادي سمحي خلاس
لأني شفت وليداتن وولدك في الباسقات
هسع شوف ود ابراهيم حليو كيف وكذلك أولاد الأميرات
و نجلاء كما قال الزعيم أب حنه وحكيت لهم قصة القال حج بالجمال.
أرجو يا صديقي أن لا تغيب كتير قدر كده
فأنت لك أحبه هنا ينتظرون ما تكتب بلهفه

من طرف **م بروي** الإثنين 16 يناير 2012, 4:06 pm

ابراهيم محمد سليمان كتب:سيد الجرف ... وسيد الإسم ... وسيدالبلد...وسيد الشعر كلهن ديل؛؛؛
.........سلاااام عليك.........
ياخوي ياحليل الكلتيب قطع نفاخ النار ومرقا في الشايقيييي وفي دنقلا؛؛؛
ياخوي بإختصار كدي بقا كرزاي ورحل خلا البلد؛؛؛
قلنالو رحلت مالك قال شلال ود عيني دا حد ماحرستو أبا يمرق ومشيت خليتو؛؛؛

\

ابراهيم الظريف
سلام وتقدير
هو الكلتيب براهو البطير
أنا مراهن هنا بأنو حايجي يوم قريب ما تلقى في
المناصير ولا حجر واحد صغيروني تجدعبوا العز
لأن طبيعة المستقبل القريب التطور السريع
مما يفرض أن تتغطى كل المساحات بالمباني والزراعة
ولأن الشيء يظهره الضد والأشياء تظهرها أضادها
فنحن لأنو أتيحت لنا مشاهدة أراضي كالحة تعتبر
حجارنا بالنسبة ليها ميدان كورة وأحالتها الظروف لحدائق غناء
نعم نحن لانملك إمكانياتهم ولكن ليس مستبعد ظهور الدولة المقتدرة
وإن لم تظهر فإن إرادة أهلنا ظاهرة ...
غداً التحول الكبير وما ذلك على الله بعزيز
واتمقلب الكلتيب
صدقني يا ابراهيم أنا ارتاح لما تكتب
خاصةً لما تشاغل صاحبك الكراري.

من طرف **م بروي** الإثنين 16 يناير 2012, 7:16 pm

نجلاء زمراوي كتب:شاعرنا المحترم محمد بروي
مرارا وتكرارا احاول ان افتح هذا البوست ولكني اتراجع ...والسبب بيني وبينك <لم افهم معني جرف روكه>اوعك يلم فيها ابراهيم يمسكه لي زله
وكن عندما قرات ما يحتويه البوست من كتابات العباقره ومجادعات الامراءاثرت الانسحاب والتعليق من علي البعد,,,,,,,,لانني امام عمالقه
دمتم زخرا يا ابناء بلادي

تخريمه عبد القادر والاسره بيسلمو عليك

الأستاذة الفاضلة
سلام
الجرف هو الأرض المنحدرة وعندنا المنطقة بين النيل والنخيل
وسميت جرف لأنها منحدرة(جرف هار)
كما جاء في القرآن
يقول الله سبحانه وتعالى: "أفمن أسس بنيانه على تقوى من الله ورضوان خيرا ممن أسس
على شفا جرف هار فانهار به في نار جهنم والله لا يهدي القوم الظالمين" صدق الله العظيم.
ولكن الصورة عندنا تختلف فجرفنا وقفه فوقو ترد الروح
زمان الناس حاولوا الربط بين بعض القرائن في القرآن الكريم
وأحداث 11/9/2001وانهيار الأبراج في منهاتن
قالوا
1-مكان برجي التجارة اسمه (جرف هارد)
2 سورة التوبة تأتي في الجزء (11) من القرآن وهو يوم الانهيار.

3ـ سورة التوبة رقم (9) في القرآن وهو (شهر) الانهيار.
وهكذا الخ
أنا لا أومن بهذه الخزعبلات وديننا لا يحتاج لمثلها ليبرهن معجزاته
شكري وتحياتي للزعيم عبد القادر والأسرة الكريمة الفاضلة

من طرف **رجعنالك** الثلاثاء 17 يناير 2012, 1:48 am

لك كل التحايا شاعرنا محمد بروى وتقبل تحايا

من طرف **م بروي** الثلاثاء 17 يناير 2012, 5:29 pm

رجعنالك كتب:لك كل التحايا شاعرنا محمد بروى وتقبل تحايا

رجعنا للجرف واسعتدنا رجعنالك
مرور أنيق يبسط أهل الجرف
وتتداعى لأجله الأحرف لتكون
كلمة شكراً على المرور والتحايا

من طرف **م بروي** الثلاثاء 17 يناير 2012, 5:33 pm

النفر كتب:مالو ود بروى ما ظهر

وموهو سائل فينا بالمر

يا أبو سفيان أديهو الخبر

قلو جرفك بقى فى خطر

وبقى عديل يلفت للنظر

دخنو طال ولوباهو نور

وكل زول شافو إنبهر

الله يكف عين البشر

والله يحبس منو البحر

************************

الجرف صاح فوق البحر
والبحر صاحبنا النفر
نغمة حالمة هدية وتر
الرحيق وعصارة زهر
كلمه منو تزيل الكدر
والحديث البمحى الضجر
يعجبك لو خط ونثر
ويطربك لو نَظَمْ وشَعَر
منتدانا بلاك في خطر
إنت نورو وضوو الظهر
وانت سمعوا وانت النظر
من عرفناك صادق الخبر
لاظم في يوم لا فجر
المحل يمحاهو المطر
والأمان ممحاة الخطر

الجرف سبروقو ملح

هدية بسيطة لسيد الجرف واللوبي المفرهد يدينا قارن قارنين

رحلة الباسقات ومحمد وين

[ندعوك للتسجيل في المنتدى أو التعريف بنفسك لمعاينة هذا الرابط]

من طرف **النفر** الأربعاء 18 يناير 2012, 7:31 am

[quote="م بروي"]أصدقائي الباشمهندس الفكي والزعيم النفر وصديقي ود عقيد
سلام
أجزت المدارس ولقيت لي فريقه
قلت أمشي أشوف مجادعات صاحبي النفر
المكتوب فيها شنو وأقوم أساهم معاهو لو قدرت
لقيتو كاتبلو قصيدة قال نشرها في الجرف
ووالله لم أمر على هذا المكان أصلاً.
جريت طوالي للجرف وفتشت ولقيتها ولقيت معاها روائع ود عقيد
والباشمهندس الفكي والله يعلم كم أحب هذا الثالوث وأقدره
شفت التاريخ لقيتو أيام الضحية وكان معي النافعابي
ولم نجد فرصة للدخول للمنتديات في ذلك الوقت
لما رجعت افتكرت قصيدة النفر في البرجوب والحمود دي آخر شيء
لأني سمعتها من قبل واتاريهو مداخلاتكم قبلها
ووالله وأنتم تعلمون بأني ما بنط زول في الردود أبداً
واللوم يجي بالغفلة وسوف أرد على قصايدكم في الجرف
وأبدأ بود عقيد
ولكم العتبى أحبتي حتى الرضا التام

[color=darkblue][center]___________________

الوجه الصبوح ... شفيف الروح ... جميل البوح ....الشاعر والأديب الأريب ود بروى ....ليس هناك عتاب بين الأحباب ...الجرف للدردشة والخواطر والونسة والقرقراب ...لقد وهبت جرفك روكة للجميع فأنت معفى عن الردود ...نحن نقدر الظروف ونتوق ونسعد بطلتك البهية بيننا ...
تقبل تحياتى وودى ،،،

صح الناس معادن فضة ونحاس
وانت ضهبا صافى الخلاس
وانت فارسا صعب المراس
للبلد دقيت للساس
وللقبيلة باقى نبراس
نحنا دابنا نتعلم فى العواس
دابنا فى الكرعين مابنلحق الراس
بس الجرف باقينلو حراس
لوبا عامر وكفى للناس
مافترناغلبنا النعاس
مافى لوم ماتبقى حساس
بس مابندور غيبتك فى الاساس

من طرف **م بروي** الأربعاء 18 يناير 2012, 7:10 pm

خالد عابدين كتب:الجرف سبروقو ملح

هدية بسيطة لسيد الجرف واللوبي المفرهد يدينا قارن قارنين

رحلة الباسقات ومحمد وين

[ندعوك للتسجيل في المنتدى أو التعريف بنفسك لمعاينة هذا الرابط]

خالد عابدين ..واحد وعابدين ...اتنين وعابدين تلاته وعابدين
قارنين وعابدين

هديه ليها ضل
من رجل ضلنا وضرانا

من طرف **النفر** السبت 21 يناير 2012, 3:19 am

م بروي كتب:
النفر كتب:مالو ود بروى ما ظهر

وموهو سائل فينا بالمر

يا أبو سفيان أديهو الخبر

قلو جرفك بقى فى خطر

وبقى عديل يلفت للنظر

دخنو طال ولوباهو نور

وكل زول شافو إنبهر

الله يكف عين البشر

والله يحبس منو البحر

************************

الجرف صاح فوق البحر
والبحر صاحبنا النفر
نغمة حالمة هدية وتر
الرحيق وعصارة زهر
كلمه منو تزيل الكدر
والحديث البمحى الضجر
يعجبك لو خط ونثر
ويطربك لو نَظَمْ وشَعَر
منتدانا بلاك في خطر
إنت نورو وضوو الظهر
وانت سمعوا وانت النظر
من عرفناك صادق الخبر
لاظم في يوم لا فجر
المحل يمحاهو المطر
والأمان ممحاة الخطر

الليلى ود بروى شرف وصل

بالجرف زين إتبختر وقدل

مرحب حباب الشاعر الفحل

وتعظيم سلام للقامة المبجل

النجمو متألق حد ما أفل

وعم نورو الوديان والسهل

ألق بهاهو يبهر للمقل

وخيرو عم كل الأهل

بالكرم يضربو المثل

عمرو لا ضن ولا بخل

دا البشوش حاشاه الزعل

بالخلق والطيب مجمل

بالأدب والذوق مكمل

نضمو ديمه ينقط عسل

للبلد مجد ... وجمل

وللتراث وثق وأصل

بيشعر محفوظ ومسجل

يدندنبو الصغيروالشاب والكهل

بيهو شاع صيتنا فى كل محل

يا خى بيى غيابك بالنا إنشغل

وفى كل مرة عنك بيى نسأل

الليلى بيقدومك الكل إحتفل

وعمت الفرحة فى كل محل

ود عقيد ليى شعرو إرتجل

جاب شعر بالحيل مدنكل

والحضور كبر... وهلل

والنفر فى القعدة إتعدل

دا الجرف إزدان حلل

فوقو رامى ضل النخل

دى قعدة تطرد الملل

فى حضرة الأخوان والأهل

إن شاء الله عاد يتلم الشمل

والونسى تعمر والفرح يكتمل

*****************

من طرف **م بروي** الأحد 22 يناير 2012, 7:02 pm

الفكى احمد كتب:
سلامى لأِهل الجرف الفريد
ولى عيال منصور كلهم ، القريبين والمن بعيد
وللفى أبها ركنا العتيد
ندعولهم الله نبارك العيد
ولينا إنشاء الله يبارك يزيد
عافى ، صحه وعمرا مديد
بالصلاح والسير الحميد
والدرب ممدود سير مريد
وكل زول ياخد مايريد
وياالنفر القاعد وحيد
إنت توزن جبل الحديد
الفرج قرب مو بعيد
وتنعم الأيام من جديد
وإنشاء الله بالإثنين تانى عيد
يطل علينا النور ودعقيد
يهنأ سلمان ويشكر السِيد
تصفى العيون تلقى غِميد
{تبقى لمه وكل زول سعيد}

المهندس خلقه صنديد
جاب دروس في نظم القصيد
من زمان أنا محسوب مريد
عندي ريده وحباً شديد
للمهندس ونضمو السديد
في مسيد ود عيسى العتيد
بق نورو وبق المسيد
يرشد الناقصلو ترشيد
ومنو كل الناس تستفيد
زمان نشوفو ونفرح شديد
لما نترسل للبريد
نلقى منو العلم الأكيد
منو ننهل ونطلب مزيد
لاهو غالات لاهو العنيد
لاهو سكير لاهو عربيد
وفي الأدب والأخلاق فريد
يجمعنا رب الكون من جديد
تاني نضحك ونفرح شديد

من طرف **م بروي** الأحد 22 يناير 2012, 7:32 pm

النفر كتب:[quote=
[color=darkblue][center]___________________

الوجه الصبوح ... شفيف الروح ... جميل البوح ....الشاعر والأديب الأريب ود بروى ....ليس هناك عتاب بين الأحباب ...الجرف للدردشة والخواطر والونسة والقرقراب ...لقد وهبت جرفك روكة للجميع فأنت معفى عن الردود ...نحن نقدر الظروف ونتوق ونسعد بطلتك البهية بيننا ...
تقبل تحياتى وودى ،،،

نظم يشكك في قدراتنا وحديث برائحة جراب القروعه يسعد القلب المعنى
ويطرد جحافل الهم المقيم ويبرر الوجود ...وجود يرفع الشأن ويجبر
على الجلوس احتراماً و مهابه... النفر القبيلة ...جبر الله خاطرك

من طرف **م بروي** الأحد 22 يناير 2012, 7:40 pm

سلمان عقيد النعوفابى كتب:صح الناس معادن فضة ونحاس
وانت ضهبا صافى الخلاس
وانت فارسا صعب المراس
للبلد دقيت للساس
وللقبيلة باقى نبراس
نحنا دابنا نتعلم فى العواس
دابنا فى الكرعين مابنلحق الراس
بس الجرف باقينلو حراس
لوبا عامر وكفى للناس
مافترناغلبنا النعاس
مافى لوم ماتبقى حساس
بس مابندور غيبتك فى الاساس

كل زول محسوب مع الناس
ود عقيد محسوب مع الماس
كل شيء عندو أساس وراس
يا سمانا الماليك مقاس
كل ميدان ليهو فراس
وإنت فارساً عاصي المراس
كل زول عندو خمس حواس
وإنت كلك كتلة حواس
كل زول يشكر بي حماس
يملأ شكرنا ألف كراس

almansory@ooty كتب:إتعربنا : أستاذنا م.بروي والله نحنا برضو بقينا نهز في الرؤوس زيهم
ناس الخليج بيسخرو من معظم الأجانب خاصة الهنود
لكن شعب طيب ويتعاشر
وقريبآ حيصبحو قوة عظمي وناسنا ديل خليهم في الكبسة

يا المقداد شكلك بقيت هندي مالك احمد

من طرف **م بروي** السبت 28 يناير 2012, 7:38 pm

شكراً الباش مهندس ود جيب الله
على المرور بالجرف الأخضر
صديقي الغالي النفر
أخوك مزنوق شوية وبجيك
بإذن الله فوجودك يسعدنا
وينشر فينا فرح مقيم

من طرف **الفكى احمد** الإثنين 13 فبراير 2012, 7:15 am

إلى شاعرنا المرهف المبدع محمد بروى
لك ودى وسلامى ....يااخى .....
بعد غيبه إمتدت زهاء {التلات ديران }عن المنتدى لظروف خارجه عن الإراده ، تصفحت بتلهف أمس واليوم
صفحات المنتدى وكان المرور على الجرف من الأولويات . كعادتى عند عودتى للبلد بعد كل غيبة ، كنت أول
ما أقوم بعد ـــ السلامات وحق الله بقا الله ـــ ، هو المرور على الجروف .
والآن وبعد هذه الغيبه :
لقيت لى هدية بى تلمع وترقش
من شاعر رقيق فنان ومدهش
ولقيت الجرف أخضر ونوارو يرقش
لا ناموس ولا كلتيب منو تهرش
وعلى مد البصر ماهو المكنش
يسبى جمالو للناظرنو يدهش
قول ماشاء الله يااخوى لا تلبش
تعاين فيهو عينيك تابى ترمش
من حسنو وجمالو تكوس فيهو وتفتش
وتديهو وتشيل منو تخمش
وعلى كيفك تذوق منو تهبش
فيهو جميع صنوف عناب ومشمش

الاخ محمد لك التحية والود ، نحن ما عندنا طين نزرعه وجاين عرب رحل وأراكم رفعتوا سعر الطين شديد والجريدة بقت بالشي الفلاني لما نزلتوا فيه بثقلكم ونحن سوف نقعد ونتفرج ونتسلى .

الكلام الأول للمداعبة يامحمد ياحليل جرف زمان المفرهد لوباها والمخدر دخنه وزهوره المتفتحة التي كنا لا نعنيها شديد بس نشوف الدنانين تحوم فوقه تلك التي كانت تنتج قرون اللوبيا الطيب التي كان جزء منها يخرتوه لين ويغلوه في النار وياسماحة ديك القرون واللوبيا العفن وبليلته المميزة وكش الدخن هل تذكره وما أصعبه عاوز ليه قومة الدغش حتى أصبح مثل للذي يصحا من النوم بدري ( يازول قايم بدري ماشي تكش الدخن) كان لنا جرف في بليش ودقيس وكير ودبلي أرضها تميل للرملية وكان أهلنا يزرعوها دخن وكان إنتاجه وافر وما أجمل مديدة وعصيدة الدخن باللبن ، وحتى الجرف كان نجد فيه البوش ( الذرة الشامي ) لأنها حبة حبتين تجي مع تيراب اللوبيا وما أحلى بوش البلد الذي يسمى في البلد بعيش الريف . وتذكر رائحة الزهور وكل شئ في البلد كانت ليه رائحة حتى الطين ليه ريحة والنار ليها ريحة والحلة المشيطة طبعا رائحتها تسيل اللعاب (وعفوا على هذه الفقرة وأنا عارف حالتك ) جرفك هذا ذكرني بجرف البلد والله يعطيك العافية وطيلة العمر.

من طرف **م بروي** الإثنين 13 فبراير 2012, 6:43 pm

الفكى احمد كتب:
إلى شاعرنا المرهف المبدع محمد بروى
لك ودى وسلامى ....يااخى .....
بعد غيبه إمتدت زهاء {التلات ديران }عن المنتدى لظروف خارجه عن الإراده ، تصفحت بتلهف أمس واليوم
صفحات المنتدى وكان المرور على الجرف من الأولويات . كعادتى عند عودتى للبلد بعد كل غيبة ، كنت أول
ما أقوم بعد ـــ السلامات وحق الله بقا الله ـــ ، هو المرور على الجروف .
والآن وبعد هذه الغيبه :
لقيت لى هدية بى تلمع وترقش
من شاعر رقيق فنان ومدهش
ولقيت الجرف أخضر ونوارو يرقش
لا ناموس ولا كلتيب منو تهرش
وعلى مد البصر ماهو المكنش
يسبى جمالو للناظرنو يدهش
قول ماشاء الله يااخوى لا تلبش
تعاين فيهو عينيك تابى ترمش
من حسنو وجمالو تكوس فيهو وتفتش
وتديهو وتشيل منو تخمش
وعلى كيفك تذوق منو تهبش
فيهو جميع صنوف عناب ومشمش

ألف حمدلله على السلامة يازعيم
والله افتقدناك بشدة
وافتقدنا خيالك الواسع وتصويرك لحال الجرف(شوف عين)
وافتقدنا الشعر الرصين الموزون الذي فأجأتنا به
وربما ناس البلد كلهم ما عارفين النقطة الهامة دي
تحياتنا للأستاذة فقد افتقدناها أيضاً
كرمز للنقاء والصفاء وجمال الروح
شكراً للأبيات الرائعات كروعة الشاعر الفذ

من طرف **م بروي** الإثنين 13 فبراير 2012, 7:09 pm

مصباح محمد مصباح كتب:الاخ محمد لك التحية والود ، نحن ما عندنا طين نزرعه وجاين عرب رحل وأراكم رفعتوا سعر الطين شديد والجريدة بقت بالشي الفلاني لما نزلتوا فيه بثقلكم ونحن سوف نقعد ونتفرج ونتسلى .

الكلام الأول للمداعبة يامحمد ياحليل جرف زمان المفرهد لوباها والمخدر دخنه وزهوره المتفتحة التي كنا لا نعنيها شديد بس نشوف الدنانين تحوم فوقه تلك التي كانت تنتج قرون اللوبيا الطيب التي كان جزء منها يخرتوه لين ويغلوه في النار وياسماحة ديك القرون واللوبيا العفن وبليلته المميزة وكش الدخن هل تذكره وما أصعبه عاوز ليه قومة الدغش حتى أصبح مثل للذي يصحا من النوم بدري ( يازول قايم بدري ماشي تكش الدخن) كان لنا جرف في بليش ودقيس وكير ودبلي أرضها تميل للرملية وكان أهلنا يزرعوها دخن وكان إنتاجه وافر وما أجمل مديدة وعصيدة الدخن باللبن ، وحتى الجرف كان نجد فيه البوش ( الذرة الشامي ) لأنها حبة حبتين تجي مع تيراب اللوبيا وما أحلى بوش البلد الذي يسمى في البلد بعيش الريف . وتذكر رائحة الزهور وكل شئ في البلد كانت ليه رائحة حتى الطين ليه ريحة والنار ليها ريحة والحلة المشيطة طبعا رائحتها تسيل اللعاب (وعفوا على هذه الفقرة وأنا عارف حالتك ) جرفك هذا ذكرني بجرف البلد والله يعطيك العافية وطيلة العمر.

تمنيت لو ما وقفت من الوصف يا مصباح
شكراً دكتور مصباح(فرق الحضرة من الحضرة)صدقت ياعمر
بالله حتى كلمة البوش متذكرها..حقول من دهب
لكل هذا الجمال أنا كنت رافض حكاية خزان من أساسه
ويتضح ذلك في قصيدة كتبتها في عام 2003 ونزتلها هنا في المنتدى
يقول بعضها]
تمر مافوق اللفتي
وفوقو قماريهو قوقو
لا لافينا الضهب ليفو
ولا كروقنا كروقو
لا دايرين طعم تمرو
ولافي زولاً بضوقو
حوضاً ما ساقو أبونا
ولا بنتحمس نسوقو
وقمحاً ما سقنا فيهو
ستين داهية التسوقو
وسوقاً ماهو النعوفاب
أخوكم تب ماهو سوقو
[size=24]خلاياً ماهو عتمورنا
وهناك ما لاحت بروقو
ودرب ماجابنا بيساني
وما هدرت كبار نوقو
ودرب ماشق حويلي
قدم حر مابمشي فوقوsize]
ماذا أفادنا هذا الخزان اللعين
غير التشرذم والفرقة
ياسلام على جروفنا وروعتها
ضحكني واحد ينكت قال لرفيقو الجنوبي
اسمك زي جري الكلب في اللوبه
تحياتي حكيمنا الوقور

الأخ محمد لك التحية الجرف كان يأتي منه الكثير ، منه الفوسيب وقت دابة الغنماية تلدي يجبوا له قبضات فوسيب وياحلات اللبا داك، الجرف كان منه ملاح الكداد، كان منه ملاح السبروق، كان منه الجبركولة، كان منه بلايل اللوبيا بأنواعها و... ومنه الكثير.

ذكرني اللبا لحس الحلل وكان أيام البوش الذي تصادف باشته رياح وغبار يقولوا لاحس الحلل. وما أحلى لحس الحلل، حلة باقي اللبا، حلة باقي السمن، حلة باقي اللحيمات ، حلة باقي الحليب المشيط، حلة باقي الكستر، وحلة باقي المديدة و ماأجمل بواقي الحلل وزي تقول ينطبق عليها قوله تعالى ( ختامه مسك) ولنحكى هذا لأبنائنا عشان مايبقى حكاوي زي نار العرب ونار السحارية . لأني لا أجيد الشعر سوف أكون من المشترين للجروف وشراء الجروف يذكرني واقعة ليس هذا مكان لسردها تخص صديقين عزيزين عندي ، لك كل الود أخي محمد.

محمد بروي ..... سلام

الجرف السني دي عاول ؟

وينك وجماعتك ؟

من طرف **م بروي** الأحد 26 فبراير 2012, 4:48 pm

مصباح محمد مصباح كتب:الأخ محمد لك التحية الجرف كان يأتي منه الكثير ، منه الفوسيب وقت دابة الغنماية تلدي يجبوا له قبضات فوسيب وياحلات اللبا داك، الجرف كان منه ملاح الكداد، كان منه ملاح السبروق، كان منه الجبركولة، كان منه بلايل اللوبيا بأنواعها و... ومنه الكثير.

ذكرني اللبا لحس الحلل وكان أيام البوش الذي تصادف باشته رياح وغبار يقولوا لاحس الحلل. وما أحلى لحس الحلل، حلة باقي اللبا، حلة باقي السمن، حلة باقي اللحيمات ، حلة باقي الحليب المشيط، حلة باقي الكستر، وحلة باقي المديدة و ماأجمل بواقي الحلل وزي تقول ينطبق عليها قوله تعالى ( ختامه مسك) ولنحكى هذا لأبنائنا عشان مايبقى حكاوي زي نار العرب ونار السحارية . لأني لا أجيد الشعر سوف أكون من المشترين للجروف وشراء الجروف يذكرني واقعة ليس هذا مكان لسردها تخص صديقين عزيزين عندي ، لك كل الود أخي محمد.

ياسلام يادكتور على لحس الحلل المشيطي
والقرون الكنا قاعدين ننجضها بعد ما نكون شبعنا منها نيي
تسلم زعيم المغتربين

من طرف **م بروي** الأحد 26 فبراير 2012, 4:57 pm

ود المناصير كتب:محمد بروي ..... سلام

الجرف السني دي عاول ؟

وينك وجماعتك ؟

والله مشغوليات يا صاحب القلم المورق
تعال نديك جريدي ازرعها.. التيراب والسلوكه من عندنا ملح

من طرف **معتصم علي** الخميس 22 مارس 2012, 7:04 pm

الجرف حشوه وطلقهوه للرعيه
والبحر جاهو وشرد
اللجامه مابدت ولا شنو
يااهل الطين تعالو القسيم ورمي العود

من طرف **ابو مصطفى** الخميس 22 مارس 2012, 7:28 pm

والله يا سيد الجرف مشتاقييين شديد وضارب الحضرة يا سيد الحضرة ؟؟؟؟؟؟؟؟؟؟ دحين داير اسعلك ؟؟؟؟

هى دى شنى ؟؟؟؟ لاتتباع فى البقالة ولا تتوزع هدية ؟؟؟؟؟؟؟؟؟؟؟؟

عوافى عليك يا شاعر القبيلة ؟؟؟؟؟

تحياتى

ابو مصطفى

من طرف **الفكى احمد** الجمعة 23 مارس 2012, 6:25 pm

السلام عليكم ناس الجرف عوافى وأعلكم عافى

وينكم ما باينين ، زمان الباشى كانت شاغلاكم هسع الشاغلكم شنو؟

يللا تعالوا ننجَم ونروح النفوس شوية فى خضرة الجرف

ونضارتو ونعبى صدورنا من نسيمو المنعش العليل والهابى

من تالا النيل الصافى وسمح بالحيل .

هسع أخونا أبو مصطفى شايفو سبقنا وإندللا لاتحت

يللا هياكم نلحقو ...

من طرف **م بروي** الأحد 25 مارس 2012, 7:07 pm

شكراًً للزعماء معتصم و الطيب
والمهندس الفكي
جاييكم برواقه

من طرف **ود عون الله** الإثنين 26 مارس 2012, 7:07 am

شاعر البلد سلام---وللجماعة القاعدين معاك سلام
من زمااااااان أناقاعد أجي منسرق وانزل بى تحت عند القيفة واخد لي عومة وألقط لي ملاح سبروق من الجرف المفرهد دا وآخد لي قرون ويكي وأطلع على حوض الساقي واقلع لي كم بصلات وقرون شطة خدراء وليمونات .ملاح أخدرملايق تشوف فيه حبات الويكي البيضاء ومطعم بى لحم شرموط مايخلص تاكل فيه لامن تعرق والشطة تحرقك في لسانك ودميعاتك ينزلن ون---تجري .وبعد داك الوحد يديها نومة --الله الله
غايتو ختينا البياض دحين أقبلوه

من طرف **م بروي** الأربعاء 28 مارس 2012, 5:21 pm

معتصم علي كتب:الجرف حشوه وطلقهوه للرعيه
والبحر جاهو وشرد
اللجامه مابدت ولا شنو
يااهل الطين تعالو القسيم ورمي العود

سلام ياهندسه
مشكور على المرور والتعليق الظريف
يازول الجرف مفرهد تب طالما شرفتو إنت
زمان قلت ليهم الجرف ملك للكل وكل زول
عندو خاطره يكتبها هنا لكن جماعتك ديل
رمينا العود وماهن دايرين يزرعوا
بارك الله في الزعيمين النفر والفكي
والله ما قصروا
تسلم يا زعيم

من طرف **م بروي** الأربعاء 28 مارس 2012, 5:31 pm

الفكى احمد كتب:
السلام عليكم ناس الجرف عوافى وأعلكم عافى
وينكم ما باينين ، زمان الباشى كانت شاغلاكم هسع الشاغلكم شنو؟
يللا تعالوا ننجَم ونروح النفوس شوية فى خضرة الجرف
ونضارتو ونعبى صدورنا من نسيمو المنعش العليل والهابى
من تالا النيل الصافى وسمح بالحيل .
هسع أخونا أبو مصطفى شايفو سبقنا وإندللا لاتحت
يللا هياكم نلحقو ...

سلام يا هندسه
نورت جرفك
زمان أخوك كان تحت الجروف دايماً
تلقاهو يحفرويفتش في دقيرات الطين وكنت محظوظ في جمعها
ومرات ألقى كم رتيلة معاها لكن لي يومك ده ما قبضت
لي حوتي.. الحظ كلو دقيرات بس..حظ منيل.
أعفو لينا جروفكم ديك كلها هرسناها
بالمشي لما نجي من السوق
تحياتي للأستاذة العظيمة بنت الفقرا ء

من طرف **م بروي** الأربعاء 28 مارس 2012, 6:08 pm

ود عون الله كتب:شاعر البلد سلام---وللجماعة القاعدين معاك سلام
من زمااااااان أناقاعد أجي منسرق وانزل بى تحت عند القيفة واخد لي عومة وألقط لي ملاح سبروق من الجرف المفرهد دا وآخد لي قرون ويكي وأطلع على حوض الساقي واقلع لي كم بصلات وقرون شطة خدراء وليمونات .ملاح أخدرملايق تشوف فيه حبات الويكي البيضاء ومطعم بى لحم شرموط مايخلص تاكل فيه لامن تعرق والشطة تحرقك في لسانك ودميعاتك ينزلن ون---تجري .وبعد داك الوحد يديها نومة --الله الله
غايتو ختينا البياض دحين أقبلوه

الزعيم ود الزعيم بيحالو نزل الجرف
إيه الهنا ده؟؟
أخوك ليهو سبعة يوم يحش عشى غنمو براهو والسبب
المرا ليها زمن تقول لي لازم تودينا الرياض
وأنا رافض رفضاً باتاً لأني عارف العواقب
قبل أسبوع لقيت في مكالماتها الصادر(د مصباح)
وهسع لي أسبوع أكنس وأمسح وأورق في الملوخيي
وكمان كل ليل حايم بيها في الأسواق وآخر خمخمة
ما المرا (نفسها أمارة بالسوق)
عشان كده يا صاحبي بعد تطلع من الجرف أنا فاكلك الإذن
من حيضاني اللات الملوخية المطرفات ديك
حش لك قبضتن عديلي شيلها معاك
وفي برندتك الما خمج ديك اتفرجخ بي عراقيك
وورقها كويس أوعك ترمي في الموكيت..
والبصلة قطعها سمح ما تسوي ليها
قطيعك بتاع المرة الفاتت تدمع وتخرمج فيها
تستاهل أكتر من كده إنت البوديك تحوم بالرياض
عند صاحبي مصباح شنو؟؟؟
وكمان تشرب العصير الجابو ليك؟؟؟
هسع شوفلك قفةً واسعي ومنجل الحلب الجديد
وألحقني على الجرف
تسلم أيها الرائع الجميل

ود بروى سلام ان شاء الله طيبين

وسلام مطبوق لى كل المزارعين

حد مانقول نجيكم ونزرع الطين

ترانا فى دروب العيشى يومى جارين –

--جاييكم بعد روقة--

سلام كيفنكم شداديين
اتاريني طولت من الجرف طول وحدين مايعرفوا يخشو
والمناجل الميته تخرب القش
مايقوم سمح وحدين يشوفوا العامر مابمشوا الحش بانظام
همهم يملوا قفتهم وماهماهم في الباقين
ويعصروا علي العامر
انا اصلي بنظر بس كان تحش من هنا احسن ودا للغنم الوالدات كويس
دايما بجيب معاي زول واقعد انظر
لان ماعندي خضره ملوخيه ياودبروي اورقه ولاعند تلج اكسره
ولااحد يقولي تلت التلاته كم بمزاجه اطلع واندلي علي كيفه
اهه اناماشي فتكم بعافي زول شال قشه وطلع

من طرف **م بروي** السبت 31 مارس 2012, 1:52 pm

ابو مصطفى كتب:والله يا سيد الجرف مشتاقييين شديد وضارب الحضرة يا سيد الحضرة ؟؟؟؟؟؟؟؟؟؟ دحين داير اسعلك ؟؟؟؟

هى دى شنى ؟؟؟؟ لاتتباع فى البقالة ولا تتوزع هدية ؟؟؟؟؟؟؟؟؟؟؟؟

عوافى عليك يا شاعر القبيلة ؟؟؟؟؟

تحياتى

ابو مصطفى

القزازي
قرقرقرقر
والله يا الطيب أسعد جداً بمداخلاتك
لمحبة كبيرة لقلب رقيق الحاشية
رباطاب سلام

من طرف **م بروي** السبت 31 مارس 2012, 2:11 pm

سلمان عقيد النعوفابى كتب:ود بروى سلام ان شاء الله طيبين

وسلام مطبوق لى كل المزارعين

حد مانقول نجيكم ونزرع الطين

ترانا فى دروب العيشى يومى جارين –

--جاييكم بعد روقة--

يا سلمان أخوي والله طيبين
إلا شوقاً زاد وتب فات القوانين
زي بحراً متسب ماهو بالهين
قدر من أبها لحدي الحنانين
حليل لمتنا في الباسقات وباسقين
مع أخوانا أجمل ناس وزينين
خالد والرشيد والحاج وياسين

من طرف **م بروي** السبت 31 مارس 2012, 2:17 pm

أبوسفيان خلف الله كتب:سلام كيفنكم شداديين
اتاريني طولت من الجرف طول وحدين مايعرفوا يخشو
والمناجل الميته تخرب القش
مايقوم سمح وحدين يشوفوا العامر مابمشوا الحش بانظام
همهم يملوا قفتهم وماهماهم في الباقين
ويعصروا علي العامر
انا اصلي بنظر بس كان تحش من هنا احسن ودا للغنم الوالدات كويس
دايما بجيب معاي زول واقعد انظر
لان ماعندي خضره ملوخيه ياودبروي اورقه ولاعند تلج اكسره
ولااحد يقولي تلت التلاته كم بمزاجه اطلع واندلي علي كيفه
اهه اناماشي فتكم بعافي زول شال قشه وطلع

شال القفه وطلع
والله ياود حاكومه
(زيها في الحريم معدومه... من حد دار جعل للزومه)
شكلك بعدين حتورقها وريق صاح
وكمان تسعلها
وريقي سمح؟؟؟
سعدنا بوجودك في الجرف

القامة محمد بروي لك التحية شغلتنا النجومية بعد ماسوتنا انتصار نجوم في المنتدى وقد سئلت أسئلة لم يرد فيها حكاية الوصف وكنت متوقعك أن تسأل هذا السؤال عشان نحكي شوية في هذا الموضوع والشجرة تظل تحتفظ بثمارها الطيبة مالم يأت من يقطفها ولكن الظاهر سوف تأكله الزرازير . وكمان ما تنسى أنه مسكة العكفة موسقه ايدنا الثانية شوية . ياخوي محمد سفيان ده يعرف نضم البلد والله موه قاعد يعرفه عشان يديك جرعات شوية وما يبقى نضمك في جدة وعسير . شكرا لك اخ محمد وتقبل مروري الخصوصي.