جــــــــــــــــرف روكــــــــــــــــة

من طرف **م بروي** السبت 31 يوليو 2010, 4:03 am

تذكير بمساهمة فاتح الموضوع :

لأني أتهوب فتح بوست جديد ويبقالي زي الزول الماسك المويه...مويه شنو؟؟ المويه ممكن الواحد يقرنها ويزوغ..أو زي الواحد الشرك جباتو وكل مره دا يشوفها قبضت واللا لا..
لذلك نستأذن ريسنا الرايع بأن يكون هذا البوست (جرف روكه) حق الناس كلها وكل زول تخطر بباله خاطرة يجي يدق سلوكتو في الجرف دا وما ملزمين بالرد..وتانياً في خواطر صغويري ما تستحق يفتحوا ليها بوست براها أها دي محلها جرفنا ده.
الخاطره الأولى من أخوكم..
لو إنت منصوري ..تقرأ هنا وتمرق وتتمتع بوظيفه عاليه أو مقاماً رفيعاً وحاسي إنك أكبر من أن الدخول هنا والمشاركة معنا ..فمعليش نقولك يا صاحبنا غلطان..فنحن أهل وكلنا في الهم و الآمال شرق.
خاطرة تانية/:
لاقيت صاحباً لي منصوري جايي عمره من السودان ...قال لي والله نحنا المعرسين من برا المناصير ديل تعبانين خلاص..قلت ليهو:ويعني نحنا المرتاحين؟؟؟ نحنا بس فايتنكم باربعه حاجات:
1ـالصبر
2:عشان عين تكرم ألف عين.
3:مرتاحين من قصة(أهل الراجل وأهل المرا) لأنهم واحد.
4:لما الباب يدق ويجوا الضيفان ... نحنا مرتاحين من تعارف الضيوف الجداد مع القاعدين جوه
ما طوالي تقع المقالده وبعدها الخزان واللجنة والبحر شرد وأزيار بغجور و البقوعي مرق وموقع خالد ونضم سلمان البعجب وجارو ابو حنه السردو جميل وحازم ده منو؟ ولو إنت مرهق ممكن تديها نومه وهم براهم بجيبوا أكلن وشرابن
.ونواصل

من طرف **خالد عابدين** الأحد 27 مارس 2011, 7:35 pm

الجرف ماشاء الله عليهو منور والفراش حايم فوقو وفوق نوارو وزهورو
ود البروي صاحبك النفر والله حيرنا - أنا ذاتو السكناب ده قلت الشي ده شنو - يعني قرقراب - هسع انت جبتلك فيها (جوغير) كمان
وياأستاذ مصباح والله ضحكت جنس ضحك في نكتة عمنا الماهل عليه الرحمة والمغفرة
تشكروا على كتاباتكم الرائعة وذكرياتكم الجميلة

الأخ محمد صاحب الجرف لعلك بخير شفقتنا والحكاية شنو أراك انقطعت عن الجرف ولعل المانع خير وأخشى أن يكون ده تمر الهبوب (والله محمد أحمد الملاريا مو فايق لها ) وتمر الهبوب شوي قننه وأنت ما شايف الناس الطيبيين ناس النعوفات والحنانين ما بيلقطوا تمر الهبوب وما شايف أخاك صديق وسلمان عقيد. تتذكر يامحمد لما كنا نقطع للسوق أيام الدميرة والتمر نجيض تشوف التمر في الحنانين مالي الأرض من هبوب البارح ولا تجد واحد يجي يلقط تمرة ما تمرته وناس شري ونحن منهم والله الواحد يقوم هجايع الليل بالبطارية ويملأ الغتاية شئ تمر وشئ بعر وشئ كدندي وشئ ... غايتو كل أسود يتم التقاطه في الغتاية عشان تمتلئ والسخت أصله موجود الما سخته الخليفة ود حمتو سختو ودعيسى والما سختو ودعيسى سخته ود الحفير وأنت عارف ود الحفير وين يامحمد لو ما عارف مكانه أوضحه لك أو ساخته تاتيب أو ودحجازي. أقاويل كانت تقال ودحضها شيخنا على الحسن رحمه الله وكانت فرصة بالنسبة للنوبة استفادوا من حطب الخليفة ود حمتو . لك الشكر يامحمد ولو لا تمر الهبوب كنا رجعنا زمان.

من طرف **م بروي** الثلاثاء 29 مارس 2011, 7:12 pm

خالد عابدين كتب:الجرف ماشاء الله عليهو منور والفراش حايم فوقو وفوق نوارو وزهورو
ود البروي صاحبك النفر والله حيرنا - أنا ذاتو السكناب ده قلت الشي ده شنو - يعني قرقراب - هسع انت جبتلك فيها (جوغير) كمان
وياأستاذ مصباح والله ضحكت جنس ضحك في نكتة عمنا الماهل عليه الرحمة والمغفرة
تشكروا على كتاباتكم الرائعة وذكرياتكم الجميلة

الريس وصل
سلام واشتياق
بعد ما أصابتنا احباطات عدم مشاركة أخواننا بالكتابه
جونا الرائعين مصباح وصديق وخلو الجرف زي واحة عنترة
(وخلا الذباب بها وليس ببارحٍ ...هزجاً كفعل الشارب المترنم
غرداً يحك ذراعه بذراعه ..فعل المكب على الزناد الأجزم)
وكما تعلم يصف عنترة واحة مخضرة في الصحراء
وبمناسبة الزناد دي
قالوا في مرا غليدي ركبت مع بتاع الرقشه
وعذبتو بمشوار طويييييل يسل الروح
ولما وصلت دفعتلو 500(حديدي)
قالها ده شنو يا حاجة؟؟؟
500؟؟؟
قالت ليهو
ما قالوا الجالون يكفيكن 15 يوم
قالها
15يوم؟؟؟ أنا سايق زناد؟؟؟ وقرقرقرقر
دي نكته ياخالد نحنا سمعناها في منفانا ده..معناتو قديمي قدم السنسني

من طرف **م بروي** الثلاثاء 29 مارس 2011, 7:29 pm

مصباح محمد مصباح كتب:الأخ محمد صاحب الجرف لعلك بخير شفقتنا والحكاية شنو أراك انقطعت عن الجرف ولعل المانع خير وأخشى أن يكون ده تمر الهبوب (والله محمد أحمد الملاريا مو فايق لها ) وتمر الهبوب شوي قننه وأنت ما شايف الناس الطيبيين ناس النعوفات والحنانين ما بيلقطوا تمر الهبوب وما شايف أخاك صديق وسلمان عقيد. تتذكر يامحمد لما كنا نقطع للسوق أيام الدميرة والتمر نجيض تشوف التمر في الحنانين مالي الأرض من هبوب البارح ولا تجد واحد يجي يلقط تمرة ما تمرته وناس شري ونحن منهم والله الواحد يقوم هجايع الليل بالبطارية ويملأ الغتاية شئ تمر وشئ بعر وشئ كدندي وشئ ... غايتو كل أسود يتم التقاطه في الغتاية عشان تمتلئ والسخت أصله موجود الما سخته الخليفة ود حمتو سختو ودعيسى والما سختو ودعيسى سخته ود الحفير وأنت عارف ود الحفير وين يامحمد لو ما عارف مكانه أوضحه لك أو ساخته تاتيب أو ودحجازي. أقاويل كانت تقال ودحضها شيخنا على الحسن رحمه الله وكانت فرصة بالنسبة للنوبة استفادوا من حطب الخليفة ود حمتو . لك الشكر يامحمد ولو لا تمر الهبوب كنا رجعنا زمان.

أخي المصباح
سلام ومحبة
شىء بعر وشىء كدندي وشىء جُحر (دي نسيتها)
والله ود الحفير ده نسيتو تب..وين يامصبا ده؟؟؟
حطب الخليفة قبل النوبة قام عليهو عمنا القاضي رقدو سلطه
ولاد أم لقاديب ما مساخيت زي ولاد فقاعه ..ديل نصت نهار يقطعوا البحر
ويمشوا يخرتوا ليمونة الفكي في الضقوله .
تمر الهبوب أنت ما مجربو يا مصباح؟؟ ما شفتو هنا طاعم كيف؟؟ يفك الزنقه
وعندما نلقى لينا فرقه وقت شووويي نباري الأخبار ..وزنقه زنقه والظاهر بقت زقه زقه
وهاك الهديه دي..
[ندعوك للتسجيل في المنتدى أو التعريف بنفسك لمعاينة هذه الصورة]

الأخ محمد الحكاية كلها بقنت زنقة زنقة زنقة زي مازنق القذافي لك تحياتي وللأهل.أنت عارف يامحمد برضو غير الجحر في شئ ولكن خليه مستور . أما ود الحفير ألا تذكر ياشاعرنا مجادعات الشاعر والدميري رحمهم الله وكلمة علي الطنطاوي كترت عندنا كثير قالوا ساختك ود الحفير. وأظن يمكن يكون شاعرها الدمري في مجادعات الدمري وعمنا الدميري رحمه الله. ود الحفير صالح بالقرب من الدمورة يقع بين خلوة الدمورة والتمر ولي مع المسيد هذا ذكريات وأنا صغير ولكني لا أنساها. وخلوة الدمورة ده ماتت مع موت عمتنا زينب عبدالله وزمان أولاد حاج الماحي. وشكرا لك محمد ومعليش وفاة حبيب مأثره علينا كثير.

من طرف **النفر** الأربعاء 30 مارس 2011, 3:07 am

سلام وعوافى على كل الأخوة المتداخلين والقاعدين بجرف ود البروى العامر _ الأخوان ود بروى وخالد عابدين سألوا مستفسرين عن معنى كلمة ( السكناب ) التى وردت بمداخلتى السابقة وعفوا الكلمة منتشرة بشرق السودان وتتداولها فرقة تيراب الكوميديا وتعنى الشمارات والأخبار _
لكم تحياتى وتقبلوا مرورى ،،،

من طرف **م بروي** الثلاثاء 24 مايو 2011, 7:14 pm

مصباح والنفر
سلام لكم أيها المجملين صدر بلادي
بشخوصكم الجميلة وروحيكم الناضحة
أدباً وعلماً وخلقاً ووضاءةً ونقاء
والله ما مجاملة وكذلك ثالثة الأسافي دحسين
وأنتم كما قال ود كرب (عصارة القمح).
يرحمه الله عندما قال بأن الحريم مرات
خسهن يمرق قراصة القمح ومرات مريق
كناية على أنهن يلدن ولادةً زيني وولادة (كاكه)
بالرغم من أن كل ناسنا سمحين بالحيل
زمان كانت في قصيدة يقول بيت فيها
(وود كرب في الكاب مسوي الخزنة شايي)
لأنه كان تاجر في الكاب وكان يربط
حمارة في خزنتو الخاتيها في الرملة
بالله مافي زول عندو باقي القصيدة دي؟؟

الأخ محمد فكرت كثيرا قبل يومين وقلت وين جرف ودالبروي أظنه غرق مع جرف فقاعة وأم لقاديب ولكني أراك ظهرت الآن ولك التحية وإن شاء الله جرفك دائما عامر وأحبتت أن أكتب ولكني أري هنالك دعاش وأظنه سوف تأتي كبته ومعها رياح عشان كده الآن شايل غتايتي ونازل على التمر وربنا يعنين وإلى متى نحن مع تمر الهبوب الذي أرتاح منه أهلنا في المناصير.

من طرف **م بروي** الأحد 29 مايو 2011, 7:34 pm

الزعيم مصباح
سلامات
تمر الهبوب قروشو زي حلاوة قطن
واللا زي الزول داك الجيعان
وقالوا الجزار أداهو نص كلوي
ختاها في خشموا وعاوز يأكلها بمزاج
لكنها اتبلعت غصباً عنه
وقالها (الله يلعنك يالمافي الرزق)
الزعيم عبد الغني قلت ليهو كتر
من تمر الهبوب زي ما قال مصباح
زمان في بداية اغترابه لم يوفق في إيجاد
شغل بسرعة ..فقلت ليهو ياخي إنت رجل
إقتصاد وخريج أجعص الجامعات
ماتلقى شغل كيفن؟؟؟
قام قالي
(ما اكتشفوني)
لك وله التحايا
تسلم يازعيم

شكرا صاحب الفكرة على الروعة
وانا قاعد فوق المسيق اعاين ساكت لامن القالى تيراب واجيكم بى سلوكتى ادونى معاكم جريدى

من طرف **م بروي** الثلاثاء 31 مايو 2011, 7:59 pm

وجودك في هذا الجرف
خلاهو فرهد وانتعش
جريدي واحدي؟؟
جرايد جماعة ومعاها تيراب كمان
شكراً قمر الشرق الساطع

من طرف **م بروي** الأربعاء 08 يونيو 2011, 7:06 pm

خاطرة
_______________
المشاغبة ضارة
ذهبنا من هنا لبلاد الغربة
وسكنا قرب المستشفى وكنا
خمسة عذابه منهم د/عثمان سعد الكليب
وثلاثة أطباء من ولاد الخرتوم وأخوكم
الطبيب العمومي يسمى GP
وهي اختصار ل(GENERAL PRACTIONER)
وأنا كان عندي مركوب جلد بقر عاجبني
كلما ندور نمرق ونجي عند الباب ونبدأ
نلبس في نعليننا
أقوم أشاغب وأقول ليهم ياخوان
وين الGPبتاعي)
يزعلوا ويقولوا لي ليه تقول للمركوب جي بي
أقلهم ياناس ماتزعلوا
أنا مركوبي جلد بقر واختصرو GP
يوم مرضت شديد
قالوا ما بنوديك المستشفى
خلي ال جي بي بتاعك ده يوديك.

يا ود بروي سيبك من المراكيب
نحن لسه في الجرف الروكة في فقاعة القطعي التحت السنطة البي تنطوا منها القرو.. القطعي التحت لى ناس بيوت أب حريبة.. القطعي الفاجيها مشرع الحلي. شايف قرون اللوبا الطيب عمرت فيها من جديد من الغرب شايفا وشايف لى مره تهبر في القرون من الغرب أعاين ليها لابسي ليها طرقي وبعد ما خلصت أعاين ليها قلعت الطرقي وقعدت بس فساتنا وصارت تجك في الطرقي عند حجيرة البحر وتنقز فوقا لامن نضفتا وانا أعاين ومصرتا وشالتا تهبب فيها في الجرف ولبستا وطلعت مشت تسلت قرون اللوبا الطيب ده. قرون رخسة كدي لسه ما عملت الحب الكبار داك.

من طرف **علي الكليس** الثلاثاء 26 يوليو 2011, 4:53 am

أخي محمد البروي لك التحيه والتقدبر واحييك واحي فيك هذا الايداع الجميل وأتمايل طربا بكل حروفك شعرا أونثرا وأستمتع بكل مداخلات الاخوه الاعزاء ..يس المشكله نحن بقينا زي أولاد الرطانه يفهموها لكن مابقدروا يتحدثوها ..عشتم طفولتكم كامله في البلد وكانت هذه الذكريات الجمبله أما نخن فلنا الله ضيعنا زمنا مابين العبيديه والقمبرات ومع ناس أيش تبغي ...سلام وعودا حميدا باذن الله

من طرف **م بروي** الإثنين 08 أغسطس 2011, 6:16 pm

شكراً أستاذنا الكليس
سعدت كثيراً بمقابلتك بعد غيبة طالت
وكنت ناوي اتونس معاك زيادة لكن
زحمة برنامج الحفل لم تتح لنا ذلك
كان آخر لقاء جمعنا بمنزلكم العامر
بمكة المكرمة بصحبة الأخوان هاشم
الحسن ومحمود تاج السر.
نسأل الله لك دوام التوفيق والنجاح المضطرد

الأخ محمد بروي ألف حمدا لله على السلامة وكم كنت وكم كنت متأكد بأني سأجد زمنا كافيا في الإجازة عشان نتونس في الخربانة ولكن حدث ما حدث وكأننا لم نذهب للإجازة ذهبت الأيام سريعا ولم نقابل بعضنا إلا تلك البرهة الصغيرة والتي جمعتني مع إدارة المنتدى وكم كنت محتاجك في موضوعات جمة ولكن غير مصدق حتى الآن وكأنني في حلم أن تنتهي هذا الأيام بهذه السرعة وفي الحقيقة المشغولية كانت أكبر وربنا يجمعنا في ساعة خير والحمد لله عدت للجرف وسوف نأكل منه السبروق وملاح الكداد وشكرا لك

من طرف **م بروي** الثلاثاء 09 أغسطس 2011, 7:38 pm

سلام دكتور مصباح
نسوق التهاني حارة مرة أخرى لهذا الإنجاز الذي
أنت أهله والسار للأهل وكل من يعرفك وأنت تتدثر الخلق الرفيع
وإن جئت هناك متأخراً لأني ما قاعد أحوم بمكان التهاني خالص
وقدر الرقة كانت في العزاء والاجتماعي.
نعم مثلك أخي كنت أمني النفس بونسة وحديث متصل لايمل مع
شخصك الحبيب ولكن الإجازة تحركك في الإتجاهات التي ترغب
هي وليس ماترغب أنت وعادة ماتزدحم بمشاوير ما كانت على البال
وتترك غصباً زيارات ومجاملات حكمها فرض عين لذلك أنا اسمي اجازتي هذه
(إجازة اللوم) فقد استطعت أن أجمع أكبر قدر من اللوم (في البلد في عشرة
في عطبرة في المكابراب في مدني في الخرطوم) حتى أحياناً أقول ليتني لم أذهب
حتى صاحبك حسين كان طلب مني انتظره وننزل البلد سوا ونرجع سوا والحصل ماشفتو
طوال الاجازة.والسبب إني عملت خيانه وسافرت خليتو.
خيرها في غيرها يازعيم

من طرف **م بروي** الثلاثاء 09 أغسطس 2011, 7:42 pm

طرفه
قلت للدمكي وقد أجرى عملية مويه بيضاء
ياخوي أنت لسع صغير وما بقيت على عمليات المويه دي
قال لي
كلو من اسامه ده
ملأ المزارع مويه
وملأ البيوت مويه
وملأ العقبه مويه
وعيوننا دي ذاتها ملاها مويه

من طرف **الفكى احمد** الأحد 09 أكتوبر 2011, 5:03 am

السلام عليكم ياأهل الجرف ، هوى إنتو يااللاتحت ناس ود البروى والمعاهو ، كيفنكم وأعلكم عافى ، من زمان قلنا نندللا عليكم لكن المشغوليات أحمتنا وترانا فى الليلى وفى باكر لامن ربك سهلا الليلى . وكمان عشمان وجايب تيرابى معاى قلت ألقى لى قطعةً سمحى أزرعا كان بلقى لى وسطكم فجيج ــ أتاريكم لاقين الروكه والهوبللى ده من بدرى وزرعتو المحلات السمحى كلها الما فيها هدام ولا حصحاص والما فيها سِعدى وللا عصبا ـ وما شاء الله شايف القواريق أسكت ساكت والزرع كلو مهبهب ومفرهد واللوبا شايل وشاعق فى بعضو وفى العنكوليبات وقصيبات الدخن القايمى ومسوى الشَرَا، وشايف أبجليجل وبرره حايمات بى فوقن وعينى باردى فوق داك البتيخ والشمام والعجور المشرشر ورامى وحتى الجرم والحدج منو لافوق لكن الحمدلله ماجاهو بُور الظاهر عليهو مزروع فى عينتو وفى النز ومسوين ليهو حفيرات للسقى عشان كدى مَخدِر ـ ولا جوه هناك وسط اللوبا فى شيتا أحمر يرارى ، ياربى ده شنو ؟ آآ الشى اللتاريها بينضوره محمرى ،، ياسلام على بينضورة الجرف أمانى ماها طاعمى طعوميى وحلوى حلاه كلها لِبى وحتى وسرا ده سمح لامن ريقك يجرى فيها جرى وشايف فى مساحةَ كبيرى البحر شارد منها ماها مزروعه يدودرن فيها الكروريات ، حدقونى بيها بس أديها يومين تلاته لامن تقَوى شويى ........ا

من طرف **abuahmed** الأحد 09 أكتوبر 2011, 1:53 pm

مبروك الفكي ود احمد انا ذاتي جايى متاخر ما تشاركنى معك في الفجيج اللقيتو

أهلا وسهلا بيك وحبابك مليون ياأبو أحمد إنت تشرف، بس ود البروى ده البجيبو لينا شنو ، أخير يحضر معانا ويورينا قطعة ًماجاها زول ، هو أصلو ماعندو مانع ومدِى الإذن لأى زول داير يزرع ، هسع أناحالتى دى كلمتلى عوين عند جيتى دى يكوركولو من لا فوق . دحين على بال مايجى تعال نتمشى على حجيرة البحر ........ا

ياود بروى عوووووووووووووووك في ناس راجنك بي تحت ......

التحية لكل الذين جو نازلين بي هنا ..........

وتحية خااااااااصة جدا جدا جدا للرائع دوما ود بروى......

وياود بروي عندي طلب دايرك تصدقوا ليٍ::

شفت دارك ديييييييييك الجنب المشرع ؟

جنبها رمله دايرنك ماتزرعا ..لأنو البرد جا ...

دايرين نندفن فيها كين نبرد من العوم.......

ياود بروى جرفك دى حشو جت وإنت ماجايب خبر!!!!!

من طرف **م بروي** الإثنين 10 أكتوبر 2011, 6:55 pm

بالله أنا أسوي في التُمبُز بين العبيدية والقمبرات
وكل الرائعين ديل هنا؟؟؟ يخدرون الجرف وتزهر أوراقه طربا.
الزعيم الفكي لو الواحد واقف في نص الجرف مايوصفو وصفك ده
هذه قدرات شاعر لسن أو كاتب ثاقب الرؤى
تسلم يا هندسه
الرائعون أبواحمد وابراهيم وجودكم هنا زاد الجرف
إخضرارا ونداوةً وسعدت بحضوركم كثيرا
وأهدي لكم قصيدة انهيارات القيم
والتي طلبوها مني في السودان
اليوم وقلت بالمره أنزلها هنا

____
ونهيارات القيم
____________________

الصحافة زمان ليها قيمة
مبــادىء و قيماً قـويمـه
حارسها ميثاق مقدس
أخــلاق المهنـة العظيمـة
تقدس كل مواثيقها
رجـالاً صادقــة وحكيمه
نظاماً ما اختل أبداً
و لا اتـلوث بالشـتيمـه
تمجد كل القبايل
صحافـةً واعيـة وعليمـه
تقدرو ولد القبيلة
تنمي في داخلو الشكيمه
وهسه شوه وشيها
وجــوهـاً شينــه و لئيمــه
شتيمة المسلم خيانه
وخيانة الأخلاق جريمه
كيف يسمح لك ضميرك
تـسيء لي ناسـاً كـريمـه
قبيلة القيم المورث
في الأدب والأخلاق زعيمه
رجالاً تاريخها ناصع
تعاف الخوف والهـزيمه
قبلك شاتمنا تافه
الخبيث سـراق الغنيمـه
وزيراً خايب مخنث
ضحكـه خبيثـه ولئيمـه
مصير الظلم النهايه
ونهاية الظـالم وخيمـه
يا اسحق جيب أضانك
أحقن الدم في الدميمه
جماعة بوني لو عرفو
اللحــم يتقسـم وليمـه
الرِشا مال السحت خلو
بـيرمي عليك الهديمـه
من يسيء لقبيله بيحالها
أقـل الأوصــاف بهيمـه
وتقول ما قاصدنا نحنا
نقول لك يابوم قديم

تخريمه
تأسر النفس صورة الطفل الوسيم يا ابراهيم

من طرف **يس مصطفي** الإثنين 10 أكتوبر 2011, 7:30 pm

سلامات شاعرنا ود بروي
وحـــيش وحــاشه وحـــــــوش
وشكـــــلو بلا الدحـــــــــــوش
وفي مـــــــــكاتب السد يدوش
عشان ملاليم وشــــويه قروش
اظنـــو جعان ول مهـــــروش
براه المســــــكين جانا مقموش
وقع ماسمي ضربان الكرموش
خصــــر قبيله اصيله وشموش

الساعه 3 صباحا بتم الباقي اخر الليل

من طرف **م بروي** الإثنين 10 أكتوبر 2011, 8:20 pm

الزعيم ياسين ولد شوش
الظريف الراقي البشوش
ليه يشتم لينا الفشوش
المملس قالوا حنكوش
عينو كاحله مركب رموش
وبرضو في ناس قالوا كنتوش
وشو زي كرموش في البروش
وزي جلد مدبوغ ومرشوش
وزي حمار رابطنو في حوش
النضم زي نشل القروش
والشكل زي عنز العشوش

الله يخضر جرفكم ويخضر قلمكم

والله واحد مع كتابتكم وقصايد شاعرنا محمد بروى ينسى الغربه ومتاهتا

تسلموا اخوانى ومتعكم الله بالصحه والعافيه

وتقبلوا مرورى

من طرف **abuahmed** الثلاثاء 11 أكتوبر 2011, 1:23 pm

والله رايع يا محمد بروى وماشاء الله علي الشاب ياسين

اول امس شايف الجماعة في السوق العربي شايلين القصائد النظموها شعراء المناصير في الزول المكاجر ضلوا ده وقالوا منتظرين قصيدة ود بروي عشان يطبعوا الكتاب

اسع بدل قصيده بقن ثلاثه قصايد

لله درك محمد بروي

من طرف **م بروي** الأحد 30 أكتوبر 2011, 6:42 pm

الأميرة وأبو أحمد
لكم التحايا والشكر الجزيل
نأسف للتأخير في الرد
وذلك لزنقة العمل
قال تعالى
(وهدوا إلى الطيب من القول
وهدوا إلى صراط الحميد)
صدق الله العظيم
فمثلكم يأتي بطيب الكلم
من واقع الإرث الطيب من منابع
الذوق والخلق الرفيع
هكذا أهلنا الصارين بخور الباطن
الناشرين عبير الخير
متعكم الله بالصحة والعافية

من طرف **الفكى احمد** الأحد 30 أكتوبر 2011, 7:09 pm

هـووووويى ياناس الجرف كلكم كيفنكم ، حالتى هسعيتى دى جيت مندلى بى تحت قُتَ أشوف الجرف والقواريق ، سمعت لى حِس طوريتا تحفر ، أللتاريهو ده زولى زاتو ود البروى ، والله الزول اللسمو إسحق داك ماخليتولوا جنبا يرقد عليهو وطيرتوهو لى أبعاسوما {ليوم البعث} تعابير منصوريه زى السكر ، أهامعاكم سلامى ، خايف إندهده باقى مودى عيشى للطاحونه ، خايفا تقيف الواطه بقت الصنتنهار ....ا

من طرف **م بروي** الإثنين 31 أكتوبر 2011, 1:43 pm

ياسلام عليك ياهندسه
ياخي اب عاسومه دي نكتها من وين
كدنا ننساها
إنت أكثر زول محتاجين لوجودو هنا
لترفد بمكنوز التراث وعلى الأقل
لنطمئن على سلامتك وسلامة الأستاذة
وكل عام وأنت بألف خير
قالوا الخرفان عندكم رخيسي
والله هنا مولعه نار

من طرف **على عيسى** الثلاثاء 01 نوفمبر 2011, 3:16 am

القامه ودالبروى صاحب الجرف
السلام عليكم ورحمة الله وبركاته
انى لاجد نفسى تتوق للمشاركة فى هذا الصرح الممرد بريشات اقلام قامات بلادى
فيعترينى االخوف فيجف مدادى ويتمرد فكرى وتخاطبنى نفسى الى اين انت ذاهب فاجيبها الى حيث يرد المبدعين والكتاب والشعراء والراوين الى الجرف واطلالته النيليه
انا الواقف كتير فى الباب ومنتظرك تقولى حباب
ودبروى سلام يازينة الاصحاب
فى الجرف المخدر وبحروا ديمه تساب
ميو زلال خدرة فاقت العناب

بعد الانتظار الطويل والترددوالوقوف خلف الكواليس علنا نحظى بنصيب فى هذاالجرف ..جدعه ...جريدى ..مسوق ..اصل ....

من طرف **م بروي** الثلاثاء 01 نوفمبر 2011, 4:01 pm

على عيسى كتب:القامه ودالبروى صاحب الجرف
السلام عليكم ورحمة الله وبركاته
انى لاجد نفسى تتوق للمشاركة فى هذا الصرح الممرد بريشات اقلام قامات بلادى
فيعترينى االخوف فيجف مدادى ويتمرد فكرى وتخاطبنى نفسى الى اين انت ذاهب فاجيبها الى حيث يرد المبدعين والكتاب والشعراء والراوين الى الجرف واطلالته النيليه
انا الواقف كتير فى الباب ومنتظرك تقولى حباب
ودبروى سلام يازينة الاصحاب
فى الجرف المخدر وبحروا ديمه تساب
ميو زلال خدرة فاقت العناب

بعد الانتظار الطويل والترددوالوقوف خلف الكواليس علنا نحظى بنصيب فى هذاالجرف ..جدعه ...جريدى ..مسوق ..اصل ....

يا جنابو كبير الجناب
إنت صاحب البيت والباب
إنت نيلنا الصفى للشراب
وإنت قمراً فوق السحاب
والمطر هتان ما سراب
وإنت ولد الأسد المهاب
الجرف جرفك مع الساب
ليه بتحرس قولة حباب؟؟

يا سلام على (د/محمد عيسى)
قابلتو في المركز الصحي
وكانت بنت المقبول مريضه
فالرجل متكرب كأنها بنتو
والله راجل راقي وظريف
سيظل لساننا يلهج بشكره
بلغه تحياتي

من طرف **ابو مصطفى** الثلاثاء 01 نوفمبر 2011, 5:32 pm

سيد الجرف المخدر ديمه لوباه سلام عليك والعيد مبارك ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

تحياتى

ابو مصطفى

من طرف **م بروي** الثلاثاء 01 نوفمبر 2011, 7:10 pm

ابو مصطفى كتب:سيد الجرف المخدر ديمه لوباه سلام عليك والعيد مبارك ؟؟؟؟؟؟؟؟؟؟؟؟؟؟؟؟؟؟؟؟؟؟؟؟

تحياتى

ابو مصطفى

سفيان قال
لم يقابل من هو أكثر من الطيب
وضوحاً وصراحةً ومناصراً للحق (ورجالةً)
وحباً لديار منصور.
فبصمنا معه بالعشرة
كل عام وانت بألف خير يالطيب الطيب
وتحياتنا لبنت الشريك وبناتها ومصطفى الصفاق الظريف

[ندعوك للتسجيل في المنتدى أو التعريف بنفسك لمعاينة هذه الصورة]سيد الجرف بركة بالعودة –

انا قاطع العصير بى مركبى ركزت لى عن حرازة كير ود عيسى –والضل قطع البحر
بالغرب وفات تمر الحنانين لافوق-ربطت المركب ومريت من خلال اللوبا العامر ولم تسلم
ارجلى وملابسى من ان تمرك باللون الاخضر –عاينت جهة (الزلومى ) الجهة المقابلة
للحرازى لكير ودعيسى ولقيت الجرف عامر بالناس الذين يقلون نظرة تلقائية للاتى من
بعيد او جايى بالمركب واحيانا يهمسون لبعض وكأنى سمعت احدهم يتساءل الزول دا منو
فرد عليه الاخر –دا ولدا لى عقيد ثم واصلوا عملهم وواصلت انا مسيرى وباريت تمر
المتيرة متأملا فى هذه اللوحات الجمالية الاخاذة للجروف وعديت من تحت مواسير بابور
المتيرة وتحسست الماسورة فوجدتها باردة ثم القيت نظرة لجزائر الدميرى وهى تكمل
اللوحة وتوجهت للشيو وعبر تمر المتيرة احيانا واحيانا اخرى اجد نفسى تداخلت للجرف
رغم غزارته ولكن افضل من التمر والشتل لانه درب شائك –وتداخلت اصوات بابور المتيرة
مع بابور اخوالى المصابيح –وعند وصولى للشيو وهنالك سطع ضو الشمس –وسعدت لانى شعرت
ان الزمن مازال معى –اما ظهور ضوء الشمس هنالك مساحة ليست بها تمر نسبة للمشرع ونسبة
لوجودبعض الصخور—عندها التفت للغرب وشاهدت الجروف عامرة بالناس من النعوفاب حتى
المسراب وأكاد أميز معظمهم وبالتأكيد كلهم عرفونى لأنهم تابعوا المركب من رميتا
وكما ذكرت هنالك فترات للناس تعاين جاى وجاى وتتابع الذاهب والاتى ولم يقطع هذه
التفكير والتأمل الا التفاته لارى الضل مجددا وفى خدرة ممتدة حتى الخوى تفاجأت بجرف
كجار المفرهد والعامر ويمتد حتى صفحة الخوى-شعرت بسعادة كبيرة --لاتساويها الا سعادتى بعودة سيد الجرف من جديد
وعدت ادراجى من جديد-
شكرا الباشمهندس الفكى

والله ياود البروي
ماشاء الله جرفك اخضر يسبسب
يتخيل لي مالحقت القسيم حق الجرف
وهو دابه البحر نزل منه
لكن الجماعه مايقصروا
يشوف لي حصان ولاحصانيين
عشان اعشي بيهن حماره
واكشه مع الكتبه

[ندعوك للتسجيل في المنتدى أو التعريف بنفسك لمعاينة هذه الصورة]شفت المركب رميتا من وين --من مشرع الرملة قبل كير الحنانين

من طرف **النفر** الأربعاء 02 نوفمبر 2011, 12:52 pm

حباب ود بروى حباب
عودا ًحميدا ًمستطاب
ولا تكرر تانى الغياب
الجرف من غيرك خراب
لا جليس لا أنيس لا قرقراب
مافى زول قاعد فى العقاب
والبمر ما بيى يلقى ترحاب
شوف بقدومك هلو الصحاب
ناس الفكى وود النعوفاب
وكمان جا عليهم شلة شباب
وعمرو الدار بعد اليباب
والجرف فرهد يا داب
لون خضارو يخامر اللباب
وأريج دعاشو الليلى منساب
يسعد الروح ويهدى الأعصاب
وبيى جوارو بحرنا منساب
والمراكب شاقى العباب
شايلى تومين وشايلى ركاب
منظرجميل وبديع وخلاب
عاد كترو الطلات يا صحاب
ونحنا يا دوب خاطرنا طاب
ولا تكررو تانى الغياب
والله يحفظ لينا العَقَاب

******************

هُـــوى ياأهل الجرف كيفنكم ، والله ماشاء الله عينى باردى ، فعلا الجرف منظرو بديع وخلاب يا أستاذ النفر بفضل مشاركة الأحباب السمحين العليهو ديمه مارين . وشوف خُدرتو دى خلاقى ، شِق ماتعاين كان بالشرق وللا الغرب تلقاهو متمدد من الجار للجار ، يبهر المارينبو إنبهار ، الصغيرين وللا الكبار ، يجبُرُن بالفرجى إجبار، من حلاتو وزينتو الخدار ، ودعقيد شاقيهو كدار ، بالمتيره وحَدُو كجار ، للعصير وغياب النهار ، وحينتو راجع تانى مشوار ، ماشبع مَل الإنتظار ..ماشبع مل الإنتظار .... ا

من طرف **ابو مصطفى** الأربعاء 02 نوفمبر 2011, 7:28 pm

سلام شاعر القبيلة سلام

سلام جنى ودبروى سلام

سلام الحضرة سلام

سلام وتانى سلام

ولاتكتر الغيبة والله انت بقيت عندنا زى شاى اللبن فى المغربية عندنا نحن المناصير ؟؟؟؟؟؟؟؟؟؟؟؟؟؟؟؟؟؟

تحياتى

ابو مصطفى

الجرف تانى ازداد عمار
شب لوبا وعما نوار

وانشبك سلكو مع الخدار

غطى من الحجرة للبار
الفكى والنفر والزعماء الكبار

ختوا فى كل عقدة منشار
وانصحوه القاصد الكجار
لايجدع لايجيب الحجار

كترو الطلات الكتار
الصغيرين حتى الكبار

مابنفارقو جرفنا مهما صار
سيدو قال من برتى للعار

من طرف **النفر** الخميس 03 نوفمبر 2011, 5:50 am

سلام للفكى وليى ود عقيد

ولكل شبابنا والعقد الفريد

دا الجرف بقدومكم سعيد

لوباهو نور وفرهد فرهيد

وعبق زهورو يفوح من بعيد

عاد ياهو منتجعنا فى العيد

مهرجان وكورال ونشيد

وللشعر نعشم فى المزيد

وكل زول يبدع بالجديد

تبقى لمة وكل زول سعيد

ويبقى عيد للماعندو عيد

زي أنا... القاعد وحيد

****************

الجرف فرهد من جديد

وسيدو ياهو صاحب القصيد

للقبيلة باقى صنديد

بالقيم والماضى التليد

ومنو نطمع ديمة المزيد

وفى الكلام الزين لينا زيد

وكل زول لازم يملأ ايد

وايد على ايد تجدع بعيد

النفر يا أب رأيا سديد

وفى الشعر نافس ناس لبيد

وديمة جايب النضم المفيد

مابنسيبو جرفنا نسكن الهويد

حبو ساكن جوه الوريد

منتدانا يردد نشيد

ما الدنيا بهجة ومقلوبة عيد

من طرف **الفكى احمد** السبت 05 نوفمبر 2011, 3:38 am

سلامى لأِهل الجرف الفريد

ولى عيال منصور كلهم ، القريبين والمن بعيد

وللفى أبها ركنا العتيد

ندعولهم الله نبارك العيد

ولينا إنشاء الله يبارك يزيد

عافى ، صحه وعمرا مديد

بالصلاح والسير الحميد

والدرب ممدود سير مريد

وكل زول ياخد مايريد

وياالنفر القاعد وحيد

إنت توزن جبل الحديد

الفرج قرب مو بعيد

وتنعم الأيام من جديد

وإنشاء الله بالإثنين تانى عيد

يطل علينا النور ودعقيد

يهنأ سلمان ويشكر السِيد

تصفى العيون تلقى غِميد

{تبقى لمه وكل زول سعيد}

من طرف **النفر** الأحد 06 نوفمبر 2011, 12:10 am

وينو يا أخوان سيد الجرف

مالو بقى للطلات يخفف

لا بيمر ولا كمان يهاتف

تلقى عاد بالسوق يلفلف

ولا قاعد مع ضيفو يسولف

دا الجرف فات حد الوصف

لون خضارو ينصف نصف

لوباهو أثمر وبقى للقطف

وشعرانا أبدعو فى الوصف

إن شاء الله يا حمود تشرف

وتدى بسى طله على الجرف

*******************

من طرف **النفر** الأحد 06 نوفمبر 2011, 12:33 am

مالو ود بروى ما ظهر

وموهو سائل فينا بالمر

يا أبو سفيان أديهو الخبر

قلو جرفك بقى فى خطر

وبقى عديل يلفت للنظر

دخنو طال ولوباهو نور

وكل زول شافو إنبهر

الله يكف عين البشر

والله يحبس منو البحر

************************

مالو ود بروى ما ظهر

جرفو فات لى حد البصر

يالفكى ويالشاعر النفر

وانت ياعبد الغنى جيب الخبر

وخالى مصباح شوف القفر

ماها عادتو يسيبنا بالمر

الا شيتا قاسى وكتر

ان شاء يسلم من كل شر

وتانى لى جرفو جديد غفر

ونظم الكلمات والدرر

اصلو وراء فتنى مابينجر

باقى تمساح وغيرو الورر

الباقى تراع وهو البحر

وفى المسور ان عب حمر

موجو للجيهتن يطفر

من طرف **النفر** الإثنين 07 نوفمبر 2011, 7:02 am

فى آواخر الثمانينات كنت وقتها فى جدة قد لا أتذكر السنة بالتحديد ... لقد جاء حاجا ًفى ذلك العام الزعيم حمدانى ( البرجوب ) والرجل أخ عزيز وصديق حميم ... زاملته بثانوية كريمة ثم إقتصاد الخرطوم وجاء حاجا ً معه فى ذلك العام التاجر المعروف الحمود الحلبى وقد صادف الحج جمعة ولما سمعت بالخبر هللت وكبرت وقلت بالحرف الواحد ( دى حجة مشهودة ) لكن الإخوان الذين كانوا معى ساعتها الله يسامحهم حرفوا كلامى وأسمعوهم على سبيل المزح والفكاهة كلاما ً آخر ... الأخ حمدانى والحمود تقبلاه وضحكا حتى كادا أن يسقطا من الضحك لكن الحمود بعد ما أفاق من ضحكته عاد أدراجه وتمعن فى الكلام وظهر عليه عدم الرضى وقال ود أخوى ما كنت متوقع منو الكلام دا !!! وعندما بلغنى الخبر نظمت فى التو مقطوعة شعرية تدعم ما تفوهت به وترد التحريف لناقله :-

الكلام القلتو فى زعمانا محدود

عندى إثبات وعندى الشهود

قلت حج الجمعة مشهود

حضرو حمدانى والحمود

والله يبعد عين الحسود

والكلام الجاكم مزيود

وليى خشيم القايلو مردود

*******************

من طرف **النفر** الثلاثاء 08 نوفمبر 2011, 1:06 pm

العيد يا أخوان ... عدا فات

ويا حليلى الضارب الشتات

ليتو شتات العبيدية والقمبرات

ساكن وحيد وسط الجاليات

لا أنيس لامعايدة لا زيارات

عيدى كلو .. قضيتو آهات

ومرة مرة .. أديها قحات

وعقلى تايه مع الذكريات

تانى توبة ولن أكرر الفات

إما أمشى أحج وأقيف بعرفات

ولا أسافر وأعيد مع الوليدات

وأشوف الفرحة فى عيون البنيات

التملى يسألن ... ودايما حنينات

وللأرحام والأقارب أجدد للصلات

أصلو العمر تانى كتيرو ... فات

**********************

من طرف **sheery51** الجمعة 11 نوفمبر 2011, 6:26 pm

سلام اهل الجرف وعيدكم مبارك
سلام اخوى النفر وعيدك مبارك وربنا يجمع الشمل ويرد الغربه
ويديك طول العمر
بمشى واجى القت لى ورق ملاح للغده شافى جرف ود البروى
مفرهد ولوباه اخدر وكمان اشيل لى حدجات من النز الليل سلمان ود عقيد
بس انتو سامحونى لانى اتجاوزت حدودى ودخل جرف العباقره والشعراء
ولكم كل الود والاحترام اخوتى
وكل سنه وانتم تامين وسالمين