صور وانطباعات عن اللقاء الاسرى والتعارفى الاول لمنتدى المناصير بلدى

ود الفكي كتب:

نواصل:
- لكين يا ود الفكي باقيلك الكوشتينة بي تنفع هني.؟!..
- ليه مابتنفع..!..أصلو دا جامع و اللا رحلة...
- خلاص يا زول حسع نرسّل ليها...
و إتخابتت التلفونات و الوصيات..."جيب معاك جوز... جيب معاك جوز"....
أنا من سمعت "الجوز" قرّبت أقول ليهم ما تنسوا تجيبوا المحّارة و الطورية....
أها...
الكوتشينة وكت جات ,,زولي الغليد الكيشة داك أول واحد قعد و فرّش عمتو...
و دخّل إيدو مرق جزلانو و خمش منو قروش كبّاهو قدّامو....قرقرقرقرقر

- يا زول القروش دي لي شنو.؟!...
- إنتو مش قلتو دايرين تلعبوا بوكر؟...قرقرقرقرقر
- يا زول بوكر شنو كمان....نحن بنلعب وست....
- الوستي طاير ...لكين برضو بنلعبوا معاكم...الله بس يمرقكم مني..
و فعلاً زولنا أخدلو سيك في قبولو....

ود الفكي كتب:و بلا كتير جانا واحد طويل و نحيف و ضاحك ومقلوز عمتو و لابسلو مركوب و صديرية....
بس ما تمّ سلامو عديل, بلا وقف فوق المسجل الكبير داك العاملنّو بدل الساوند سيستم...
- النصيبي الزي الرادي الكبيري دي شن نفرا؟..
- دي يا الشيخ بروي مسجل و تشتغل بالكهرباء و البطارية و عندها مايك لاسلكي و ممكن تشتغل بدل المكرفون و ممكن تشتغل بالفلاش....
- كدي دوّروها لي....
و فعلاً دوّروها ليهو...و إشتغل الطمبور يلعلع من سماعات الجهاز الكبار ديك...
زولنا تبارك الله ما نسحروا أظنوا في زمانو كان بتاع حفلات جد....
رفع أيدينو الإتنين لافوق و فضّل يضرب في الواطة مع إيقاع الدليب...
- عليكم الله توروني الداهيي دي جبتوها من وين و بي كم؟...
- جبناها من عمارة كذا و بي تلتمية و خمسين جنيه....
- أكنها رخيسي كدي..!!..نان أنا من باكر دي شايل قروشي و ماشي عليها...شوفوا لي ماركته شنو...
و فعلاً بروي أخد الماركة و كتبها في نوتة مربوطة بي استكة...قرقرقرقرقر...
بلا بلحيل بلا "النصيبي" يا قول بروي كضمت براها بدون أيتها سبب...
غايتو الناس كابسوا بروي و حجزوهو منها ....
- يا ناس فكوني عليها أنا حسع بصلحها ليكم...
- تصلّح لها شنو يا بروي و إنت أول مرة تشوفه حسعتيه...
- عان ديل..ما بتكون يا قطعت جاز و يا كمان الفونية إتقفلت....
- يا بروي إنت الشي قايله رتينة....الشي دي مابيعرفولا علا ولاد الخرطوم..
و جو الجماعة المنظراتية الخرطوميين و كل واحد يدلو بدلوه لا يبالي بشي:
- بتكون البطارية خلصت...
- تخلص كيفن و أنا تلاتآيام رابطه في الكهرباء...الشي دي الكهربه الرضعتها تنّور المناصير من حدها لا حدها...
- خلاص يمكن في زر إتدّاس بالغلط....
أها من جات سيرة الزر المديوس بالغلت, الجماعة إتحاوطوا الجهاز...
كل واحد مسك لو جنبة من الجهاز و قعد يدغّس فيها....
مافي شيتاً مارق لا بره ما دغسوهو أو فتلوهو....
مافي حفرة في صفحة الجهاز ما دخّلوا فيها أصبعن...
و يخرب...
الجهاز في صمّتو....
واحد من ناس بابورات اللستر قال ليهم:
- جيبوا لي المفك و المنفلة , حسع أخليهو ليكم زي الطلقة...قرقرقرقرقر....
يا جهاز السجم و الرماد دا حد ما ساوطوهو ما إتعدل....
و الناس قنعت منو....
بلا براهو قام يلغلغ تاني بدون ما يهبشوا زول....
غايتو بعد ما بدأ البرنامج, شايفن ربطوهو في بطارية موتر...
الموتر ذاتو عندو تلاتة كرعين و يشبه الرقشة...لكين موترنا دا ضكر و الرقشة إنتاية....
و جابو المايك اللاسلكي و ربطوهو مع الجهاز و عملولو test بتاع رضعة من أمو....قرقرقرقر
الصوت المارق منو ماشاء الله عليهو يجيب الضهبان...
لكين بعد بدت فقرة التعارف قام الصوت جابلو قطّيع....
واحدين قالوا يمكن تكون الشبكة ضعيفة...نطّوا عليهم تانين و قالوا الجهاز الجديد ما ممكن تكون شبكتو ضعيفة..
واحدين قالوا لأنو المايك بقى بعيد من أمو...التانين قالوا الأجهزة الحديثة دي بتكون مداها على الأقل كمطاشر متر...
أنا أصلي بحكم خبرتي الطويلة في السعية و البهايم كنت عارف سبب الصوت المقطّع دا....
الصوت النفر دا بيكون لأنو الرضعات الأولى بتطلع "لبى"...
و كان الناس ديل مثقفين متلي كانوا خلوا المايك يرضع يومين تلاتة في البيت قبل يجيبوهو الرحلة...

خالد عابدين كتب:

ود الفكي كتب:

نواصل:
- لكين يا ود الفكي باقيلك الكوشتينة بي تنفع هني.؟!..
- ليه مابتنفع..!..أصلو دا جامع و اللا رحلة...
- خلاص يا زول حسع نرسّل ليها...
و إتخابتت التلفونات و الوصيات..."جيب معاك جوز... جيب معاك جوز"....
أنا من سمعت "الجوز" قرّبت أقول ليهم ما تنسوا تجيبوا المحّارة و الطورية....
أها...
الكوتشينة وكت جات ,,زولي الغليد الكيشة داك أول واحد قعد و فرّش عمتو...
و دخّل إيدو مرق جزلانو و خمش منو قروش كبّاهو قدّامو....قرقرقرقرقر

- يا زول القروش دي لي شنو.؟!...
- إنتو مش قلتو دايرين تلعبوا بوكر؟...قرقرقرقرقر
- يا زول بوكر شنو كمان....نحن بنلعب وست....
- الوستي طاير ...لكين برضو بنلعبوا معاكم...الله بس يمرقكم مني..
و فعلاً زولنا أخدلو سيك في قبولو....

غايتو الكلام ده الا قريتو هسع هنا - معقوله حصل فيها خرت ؟
والا ود الفكي ده طلق ؟ وكتر في الشربوت واتخيل المنظر
ياالجماعة الباقين الكلام ده داير لو شهود واثبات !!!!

تديني الأمان يا زعيم أجيب ليك الإثبات بالصورة؟. ..

ود الفكي كتب:

تديني الأمان يا زعيم أجيب ليك الإثبات بالصورة؟.

الرشيد طه كتب:

ود الفكي كتب:

تديني الأمان يا زعيم أجيب ليك الإثبات بالصورة؟.

ما فى داعى يا ود الفكى انت الكبير
دافننو سوا قرقرقرقر
حمد لله على السلااامة

خالد عابدين كتب:أظهر وبان وليك الامان
وصورتك الخايف عليها !!!