اللقاء الاسرى الخامس للمنتدى الجمعة 28 يونيو

بإذن الله فقد رأينا ان يكون اللقاء الأسرى الخامس للمنتدى ولاستقبال الطيور المهاجرة يوم الجمعة الموافق 28 يونيو الجارى (دور الجمعة الجاية ) بمنتزة الباسقات –وذلك بعد التشاور بالأمس مع الأخ محمد بروى وتوافقا مع برنامجه وتحركاته---قد حاولنا جاهدين فى ان نجد مكانا غير الباسقات ولم نجد وذلك اما لان كل الحدائق مفتوحة للعامة او انها ليست بها كهرباء أو بعيدة من المياه---اما بالنسبة للزمن فوضعنا فى الاعتبار وصول الأخ ود عون الله والأخت انتصار ونهاية إجازة الأخ محمد بروىوهى خمسة عشر يوما فقط-وبالتشاور كذلك مع الاخ النفر-—فكان هذا هو التاريخ الأنسب—
أيضا—أخذنا في الاعتبار ملاحظات الأعوام  السابقة فى ان أعضاء المنتدى لم يجدوا الفرصة المناسبة فى الحديث والتعرف على بعضهم البعض—فرأينا ان يكون الحضور للأعضاء عند الساعة التاسعة صباحا بينما يبدأ البرنامج العام بعد صلاة الجمعة—
اما بالنسبة للمساهمات والاشتراكات –فسوف نحدد افراد لجمعها وحسب المناطق—
نجيكم راجعين لمزيدا من التفاصيل--

كنت اتمنى ان اكون من ضمن ا لحضور ولكن باختياركم للباسقات فقد حرمتونى ان اكون معكم المكان بعيد خالص

تسلم عمنا واستاذنا علي هذا التنبية المبكر كدي اي زول بيلقة الخبر من بدري ويحضري شعورة 
ربنا يوفقكم انشاء الله 
معذرة علي الرد لي اختي سهام اذا انت موجودة داخل ولاية الخرطوم وترينة ان الباسقات ببحري بعيدة عزراااااااا
بقول ليكي انا لوكان في جدة لكنت جيت وحضرتة هذا البرنامج لكن الاسف انا في شمال المملكة حدود العراق وسورية 
وبعد ذلك بقوليكي للناس ظروف خاصة بهم والنية واصلة تسلمي انتي وجميع حواء المنصورية وكل اعضاء المنتدي

اخى عبد الدافع المسافات تقصر عشان ود بروى لكننى ذهبت للباسقات قبل كده هى ممكن تكون رحله جميله جدا للشباب والعزابه ويكون عنوانه استقبال فقط ولكن لا يحمل معنى لقاء اسرى واذا بقت على يا عبد الدافع انا كنت بمشى لكن حا القى الاسر المنصوريه قليله وسؤال اخر هل زرت الباسقات بدون مؤاخذه دورات المياه تعبانه خالص والحضور حايكون من الصباح يعنى اليوم كله وثانيا ليس بها شجر كثيف وفى الحر بتاع اليومين ديل مولعه نار حتى الصاله المكيفه الساعه عشره تسخن عشان مويه المكيفات بتكون كملت انا مشيت قبل كده وبى عربيه خاصه ومكيفه ولكننى حين ريت هكذا عرفت فى كثير من الاسر حاتتخلف واكراما لك اخى عبد الدافع وللضيوف الكرام سوف اذهب عندما يعود من ذهب للعمره انشاء الله عشان ايجار امجاد من الكلاكله الى الباسقات سوف يكلف تقريبا 500 جنيه لم تكن فى الحسبان

المشوار ده انا حاجزو
ح امشى البنك اطلع امجاد سلفيه وابدا بيه
ثانيا الباسقات اختنا سهام  مكتمله الخدمات   مسجد تقام فيه صلاه الجمعه
دورات مياه مفصوله  سايفون
3 صالات مكيفه
اكثر من عشرين شاليه مجهزه بالمقاعد والكراسى والسراير  وحافظات المياه والمراوح الاستاند حسب الطلب
مطبخ مكتمل بمعداته من الشوكه والسكين وحتى المفراك
اطقم عشاء وشاى وقهوه حسب الطلب
جناح العاب للاطفال
مقهى بلدى واخر افرنجى
ممر مخصص لركوب الخيل والجمال
مسلخ للذبيح
بجانب مسرح اماسى الباسقات
الان لو اردتى ان تحجزى بالباسقات عليك ان تنتظرى كم خميس وجمعه
اخر لقاء اسرى اقيم بالباسقات اقامته اسر شركات سيقا  ولمده ثلاثه ايام لم نتمكن فيها من دخول الباسقات
انا شخصيا اذهب الى الباسقات اسبوعيا مع اسرتى
مايميز الباسقات ايضا الامان لك ولاطفالك ولاتحتاج ان تراقبهم كما يحدث فى منتزهات وحدائق العاصمه المفتوحه
الان الاسر تذهب الى السبلوقه وجبل اولياء ومسافتهما من العاصمه اكثر من 50 كيلو
الاخت سهام  كونى فارسه واركبى الصعاب   وجازفى  حتى بلوغك ارض الباسقات  ولمره واحده هذه المره واعتبرى نفسك ذاهبه الى جزيره دربى
فلو عملنا هذا اللقاء بجبل اولياء سيكون قريبا جدا من منزلكم  ويبعد عن اهل الكدرو والثورات والحاج يوسف

على بركة الله يا زعماء

يا الله على الباسقات وجمال البااسقات ورقيها  ولا اظن ان يكون هناك  مكان تجتمع فيه كل تلك الاوصاف
وجمال المحتفى بهم وروعة المحتفلين والمستقبلين
بالامس كنا بالباسقات اقصد العام الفائت  مر وكانه  كان امس قضينا اجمل يوم في اجازتنا  وقابلنا  اعز الناس وتعرفنا عيانا بيانا باخوة واخوات  منتدى المناصير بلدي
فوجدناهم اكثر روعة  وجمالا
دائما تمر الايام الجميلات بسرعة دون ان نحس بها .... وااااااا اسفاي علي انا   الما كنت بينكم
نتمنى ان تستمتعو بهذا الملتقى
واقول لى سهام لا تخافي حواء اكيييد موجودة وبكترة
ونحن جاهزين برضو

الأخ الحاج شايف الزعيم إبراهيم عبد الحفيظ إعلاناتو فى كل القنوات..
أوعه تكون شغال لى صاحبك ..
عموما نحن جاهزين.بالتوفيق يا حبان.

سمعا وطاعه يمكن معاكم يكون عندها طعم خاص فانت بين الاهل والاحباب والصعاب انا ما بخاف منها بس خفت على العيال

ياسلاااااااااااااااااااااااااااااااااااام لوكنت عارفه فى بوستان >ى دى كنت كل يوم دخلت المنتدى سلمت يداك استا> سلمان ايوه كده عايز نسمع بحاجه تفرح ........وعزيزتى سهام اساسا اساسا انتى ح تضيعى بين حضور حواء الكبير وانا وحده من الناس المشيت المره الفاتتت الللقاء الاسرى وكان فى الباسقات والعيب الوحيد الكان فيهو الزمن مشى سريع...(لاتحرمينا من رؤية ملامح عضوتنا الجميله سهام)

بس عاد يااستا> سلمان المره دى عندنا حاجات كتار نتفق عليها من بدرى بدرى...لى عوده

يا بختكم بلمه الاهل والاحباب والصحاب والباسقات جميله وهادئه واختيار موفق وخصوصيه كمان
تخريمه
سهام يا اختى مالك متحنكشى يا بت امى عبنول ياختى جينا وما شفنا كلامك دا حتى وليداتا اتكيفو شئ لعب وشئ حصين امشى ساكت العوجه ما بتجيك

من اجمل الحدائق العائلية التي زرتها حديقة الباسقات  وهي كما قال اخونا الحاج شرف الدين متكاملة وتحلو فيها الجلسة مع الاهل والاصحاب الله يبارك في ضراعكم اخوتي القائيمين علي مثل هذه الرحلات  التي تجمع الشمل وملتقي للاحبة  وتتواصل فيها  الارحام

ماشاء الله ماشاء الله الحاج عمل دعايه للباسقات لامن انا زاتى غيرت رايى يا الحاج اخوى محتاجنك فى الدعايات السودانيه لكن والله ياجماعه دى بالظبط الحصلى فى الباسقات فى الفتره الصباحيه الشفع الكبار ديل اتبسطو لكن الشافع الشياله هو الكرهنى فى الرحله لكن لما الفتره المسائيه جات بقى الوضع افضل بعدين ما بعيد تكون زى كوريه عزه بتاعت المديده الانقلبت مويه وكن جميلا ترى الوجود جميلا وبين الاهل والحبان نشوف الصحراء خضراء وربنا يديم التواصل ويحبس العوارض واهم حاجه الجرارى مكانه فى والا مافى

تسلمي اختي سهام علي تراجعك مبكرا عن رايك لانو لسع مافات الاوان 
والله  عمنا الحاج شرف ماقصر تب دعيوتي خلاص 
انا افتكرتو اشتغل مع ناس الدعاية والاعلام
علي العموم بختكم ونتمنانا ان يكون لقاء اسري جامع وحافل بي اهلنا المناصير ولكم التحية نتمني ان تقضو يوما جميلا وممتعا ومتحفا للغاية  
              ولكم شكري مكررررررررررررررررررررررررررررررا

جاهزين وللتكليف منفذين....


تاني التووووبه  ويا مواصلات  جاكي  زول
في دي المراه  كان فاس مابتقطع الراس....اعتراف .....لكن في نقطه معينه وجزئيه محدده.....المره السابقه ربطت كل اجزاء العاصمه مع بعضها البعص...اللستك ضرب..البنزين خلص...قرررربت  اخليها في محلها وامشي...

عاد اكان بقت في المناصير ود بروي ما بخلي....

إن شاء الله معاكم

عندي إقتراح

زي ما عارفين الباسقات حتة مقطوعة من المواصلات وبقترح توفروا عربية من آخرة محطة (دردوق) عشان توصل الناس الجايين بالمواصلات للحديقة  

رأيكم ؟؟

نو فرا
 سلمان يا أرباب.. إتصرف ودق لى تلفون

شكراَ أستاذنا أب حنة

نجلاء إنتي قايلاها الكلاكلة انا ما بهديكي تجي بالمواصلات لأنو ما حتكرريها تاني ولو سألوك الباسقات بي وين تقولي ما عارفة أسألي مجرب

طلبك مجاب  هناء بس ح يكون الانتظار ممل  احسن ليك ركشه  ولو فى نيه رياضه  الباسقات  من اخر محطه اقرب من عقبه شيرى
غبرو اقدامكم هذه المره

هههههههههه    وقعلكم كلامى عشان ماتقولو سهام متحنكشه انا وبت زمراوى دى نقرش الباميه نيى من جرف بروى وانا عارفى ود بروى بعد ماشاف صور الرحله الكاويته بى اكيد روحو بقت فى الباسقات ماعنو يكابر ويقول دا لحم عتود لكن تلقى بى هناك يتمطق عشان رغبه بروى نحن اتنازلنا ويا هناء بتتحلا انشاء الله انت زوله شابه ونشيطه الحكايه نحن المكركرين الشفع وانا حلها عندى هين لكن دايما دايما بعاين لى غيرى

مشكور الحاج شرف
أنا ما كنت عارفة في ركشات وبكدة المشكلة إتحلت 

الرياضة أنا ما من ناسا 

ويا سهام القصة ما قصت شباب بس المسافة طويلة تقريبا من دردوق للباسقات ده قصدي

ونحنا حنسق سوا ما في مشكلة

ماوريتونا..الاهم.......
الاشتراكات...كم...وطريقه الدفع..كيف....؟؟؟

مشكور ياشاب علي البوست بعدين برضو ابوصديق حيجي من السعوديه زول التكريم نجض شغلتك بالله ماتنسي زول بعدين الحاج شرف اي زول مالقي مواصلات حيكون تلفونو للطواري يعني مافي اي مشكله مواصلات يوم مفتوح للاسر من الصباح انشاء الله

بسم الله ضربة البداية---



1-الزعيم الحسن سليمان نصر الدين ---مبلغ 150 ألف جنيه  --(زغرتن )

سلامـــــــــــــــــــــــــــــــــــــــات
عندي كلام كتير ماعارف من اين ابتديء
كنت أتمني تغيير الموقع واختيار موقع اخر
ولكن نحن مع أجماع الاغلبية
بس في حاجة مهمة داير اقوله ( دائما ماتكون برامج المنتدي ارتجاليه )
وربك يسخر لها مايسخر لنجاحها
أتمني
أتمني
أتمني
ان يتم التخطيط والترتيب ووضع جميع الخطط البديلة والتحوطات لاي طاري قد يحدث .
مادايرين أخفاقات المره السابقة ان تتكرر
دايرين توسيع دايره المشوره
والترتيب المبكر
والالتزام بالحضور
دايرين عدم الاتكاليه
دايرين كل ناس السامراب والدردوق يشكلون حضورا
دايرين المشاركة الفاعله من الجميع
((((( عند حضوري لاخر لقاء قلت تاني التوبه التــــــــــــــــوبه من اللقاء الاسري بتاع منتدي المناصير )))))
(((( ليس الموصلات وحسب كما ذكرت سهام ونجلاء ولكن كميـــــــه من الاخطاء المتكرره ))))))
جاييكم راجع ......

اغرب حاجه ياسلمان من يشتكون بعد المكان هم اصحاب الدواب  المستورده سهام ونجلاء وسارى الليل
اذا سالتونى عن رحله قمت بها مع اصدقاء جاؤا من خارج السودان امتدت من الخرطوم  حتى دنقلاء العجوز ومن ثم دنقلا المدينه ومنها عن طريق  الشرق حتى كريمه ومنها الى مدينه عطبره ومنها الى الخرطوم مرورا  بالمدينه الملكيه والبجراويه ومنها الى النقعه والتى تبعد عن طريق الاسفلت 35 كيلو ومنها الى المصورات على بعد 19 كيلو من النقعه  كل هذا فى 24 ساعه  صاح ياسارى الليل
ولتسهيل الحضور 
اقصر طريق لوصول الباسقات
للقادمين من  الخرطوم
القادم جهه شارع الستين  يتجه الى كبري المنشيه بعد الخروج من الكبرى  تاخد الاتجاه الشمال اى على يدك الشمال بعد الاشاره  بالصينينه الاولى وتتتجه شمالا حتى وصولك شارع الحاج يوسف  وتقطعه وتستمر حتى قفل الشارع امامك ومن ثم تتجه شرقا ثم شمالا حتى وصولك طلمبه بتروناس وتواصل السير شمالا حتى مخطط نبته السكنى ومن ثم تكمل مشوارك شرقا  حتى تفوت سوق داردوق والباسقات يمينك  الزمن ليس اكثر من 20 دقيقه
القادم من كبرى القوات المسلحه  يستمر على طول شمالا حتى  وصولك اول تقطع به اشاره مروريه ومن ثم تتجه شرقا  حتى طلمبه بتروناس وتتجه يمينك وتواصل حتى مخطط نبته  الزمن ليس اكثر من 20 دقيقه
القادمين من امدرمان  نقطه البدايه كيلو 8 اذا كنت قادما من كبرى الحلفايا او اتجاه بحرى  تتجه شرقا حتى الباسقات 
القادمين بالمواصلات
تركب مواصلات السامراب شرق اخر محطه ومنها الى الباسقات  بالركشه او الاتصال حسب الحاله
متعه الرحله المعاناه لكى تعرف ان البيت افضل مكان للراحه

حضرت لبرنامج اللقاء بالحلفايا الثاني والباسقات الثالث
من عطبرة مباشرة
حديثي

عن السلبيات المتكررة في كل لقاء
ولاحياة لمن تنادي

تنويه اى زول عندو مشكله مع زول يخليها فى البيت ويجى وليكن شعارنا فى هذه الرحله وخيركما الذى يبداء بالسلام وتكون جلسات الاهل مابلحزبيات يعنى شكوهم فى بعض  واى واحد يخت فى باله مصلحه القبيله والشعار الذى نريد ان نحمله من اجل الوحده حتى نكون قوه وان لا نبكى ياقول نجلاء على اللبن المسكوب وهمنا الاول رتق النسيج الاجتماعى وانا متاكده لو حصلت لينا شكله من بره انو الناس حاتقيف مع بعض وليكن شعارك انا العاقل دوما وليس ان عدتم عدنا حتى تحقق اكبر ربح اجتماعى وياسلمان ليك التحيه وانت تبذل هذا المجهود

الزعيم الحسن نصر الدين ليك التحيه وانت اول المبتدئين

الحاج شرف...
شكرا لك ...
لا والله انا لم اشتكي من بعد المكان...لكن المره السابقه اتيت للرحله من اقصي اقصي ام دمان ولم اعرف المكان واخدت الفلف من شارع لي شارع ...يعني مسكتني عقده ...من المكان..
لكن خلاص المره دي انشاء الله وربنا يحبس العوارض ..الطريق اصبح واضح...

نبشرك ياسارى الليل هذه المره برنامجنا يحتوى على مفاجئات 
كنا فى السابق نهتم بامر الضيافه اكتر ولانكترث للبرنامج الا فى اللحظات الاخيره
هذه المره بدينا بالترتيب والاعداد للبرنامج
اولا بدينا بحجز المكان بالباسقات وقد تتطلب ذلك مقابلتنا للاخ صاحب الباسقات ابراهيم عبدالحفيظ  لان يوم 28 هذا يعتبر من  الايام المزحومه جدا لكثرت القادمين لقضاء ايام العطل التى تسبق رمضان 
ثانيا حجزنا مسرح اماسى الباسقات وقد تعهدنا بان يكون البرنامج مكتمل  لان مسرح الاماسى درج على تقديم برامجه لزوار الباسقات بصوره يوميه
تم الاتصال والاتفاق مع  اتحاد الطلبه بالجامعات للمشاركه فى البرنامج
الان نحن فى حاله اتصال مباشر مع بعضنا لمزيدا من التجويد
وهمنا هذه المره البرنامج قبل الوجبه
ولوربنا سهل والامور مشت  على مانريد سيكون كل ذلك مكتملا 
للمقترحات
نرجوا الاتصال باقرب من تراه قريبا منك من ادارى المنتدى
الاشتراك سيكون مفتوحا دون تحديد حد اعلى او ادنى كل حسب امكانياته ولاحرج فى ذلك  فالقصد ان نلتقى
مع العلم بان ايرادات الاشتراك فى العام السابق قد تبقى منها مبلغا  محفوظ لدى الاداره الماليه سندخله ضمن برنامج هذا العام

على بركة الله وتلقونا قدامكم انشاء الله؛؛؛
الناس ما تنزعج للاخطاء لانو النجاح في جمع الناس وليس في البرامج؛؛؛
ياسهام انتي العشرة سنة خلتك بقيتي حنكوشة ههههه؛؛
لكم ودي ؛؛؛؛وانضمولنا في القروش لانو المال عصب البرامج؛؛

الإخوة في إدارة المتدى بارك الله فيكم وسدد خطاكم ونتمنى أن نذوق حلاوة هذه اللقاءات الأسرية التي جمعت كل الأعضاء وطبعا مثل هذه البرامج عاوزة الهمة تكون عالية والتصميم والمثابرة شعارا والحكاية ليست بالساهلة كما يتصورها البعض ربنا يوفقكم ويسدد خطاكم ومن على البعد نتمنى نجاح البرنامج.

نكن من الحضور ان شاء الله 

اتمني ان اكون معكم اخوتي اخواتي اشارككم هذا الفرح الانيق هذه اللمه المنصوريه الاصيله  سدد الله خطاكم وماتحرمونا من الصور

القادمين بالمواصلات
تركب مواصلات السامراب شرق اخر محطه ومنها الى الباسقات  بالركشه او الاتصال حسب الحاله


برضو خلي تلفونك  خط ساخن للطواري مابتقصر ياود شيخنا

الاخوه السادة : أداري المنتدي
والساده منظمي اللقاء الاسري
رغم كل الهنات والسلبيات السابقة جاءت البرنامج بصورة جميلة جدا جدا
هذا لايعني الترتيب الجيد ولكن شاءت مشئية الله ان تخرج البرامج النهائي بصورة مرضية جدا جدا
مثلا ( تعطل الساوند ) حضر رجل المهام الصعبه الحاج شرف الدين وبتنسيق منه مع ابراهيم عبدالحفيظ ب(ليالي الباسقات )
فكانت بمثابة لوحة جمالية اجبرتنا علي المشاهده رغم تاخر الوقت
@ الاتكالية وعدم المشاركة من جميع الاعضاء ( كنت أتمني مشاركة اكبر عدد ممكن من الاعضاء ) في الخدمات والبرامج
أقتراح : - الزام الاعضاء بالمشاركة في البرامج والخدمات .
@ البرامج : - كانت اللقاءات السابقة يقع العبء الاكبر في اعداد البرامج والترتيب ( سلمان عقيد ) .
أقتراح :- توسيع دائره الاشراف وترتيب البرامج مثلا اقترح الاخ ابراهيم محمد سليمان يكلف بهذه الجزئيه ويلزم بها .
@ الخدمات :- في كل اللقاءات السابقة دائما مايقع عبء مسئوليه اعداد والاشراف علي الوجبات ( الاخ عبدالحفيظ ) .
أقتراح :- تحديد وتعين شخص اخر بجانب عبدالحفيظ لتلك المهمة .
@ الترحيل والمواصلات :- أقترح توفير ترحيل للعوده للخطوط صاحبه اكبر كثافة ممكنه ,اقترح ان يكلف بهذا الامر الاخ يسن .
@ الماليه :- وهذا هو مربط الفرس
أقترح ان نكون أكثر عملية في هذا الامر ويبدأ جمع المالية من اللحظه وتحديد مناديب في كل المناطق , والاسراع الاسراع في جمع ماليه البرامج حتي تكتمل الصوره .
@ ختاما جاهزين ومستعدون لاي تكليف .

ياخى تعالى يا بت ياولد تعالوا ؟؟؟ مافى مشكلة ؟؟؟؟ تعال قابل محمد ودبروى على الطبيعة ؟؟؟ تعال قابل العمدة الكيسو فاضى ابو مصطفى ؟؟؟؟ تعال شوف الخلق وشوف الناس والحكاية ببساطة شوف برنامج الناس ديل ظبط معالك اوكى ماظبط معالك برضو اوكى ؟؟ تعال فرق شوية ؟؟ طيب ادارة المنتدى قالت فى ترحيل ؟؟؟ وبرضو ابو مصطفى بى عربيتو شغال ترحيل ؟؟؟؟ ما فى مشكلة عيال وحروم وناس عاوزة ترحيل نرحلهم ؟؟؟؟ والله نحن نرحل الزول ان بقى ساكن فى جزر كورينا ؟؟؟ خليك من جزر القمر ؟؟؟ انتو تعالوا ؟؟؟ وشاركونا هذه الفرحة
فرحة احتفال بى شاعر القبيلة ؟؟؟؟ فرحة كبيرة ؟؟؟؟ لاتدع الفرصة تفوتك ؟؟؟
تخريمة :-------------------+++++
اسع زى ناس عبد الغنى نصر الدين ومصباح ؟؟ الواحد يقولك انا مابقدر اجى ؟؟؟ لى احتفال باسقات ؟؟؟؟ بسم الله ؟؟؟ يا راجل كدباس ؟؟؟
الواحد ما ياجر طيارة لى يوم واحد ؟؟؟ كلها بى 12200000 ريال سعودى اسع دى مشكلة ؟؟؟؟
على الحلف انا جانى الاسبوع الفات واحد من ناس شررى بايت معاى قال لى انت صاحبك عبد الغنى ود نصر الدين ؟؟؟ قالوا القروش العندو النار مابتاكلها ؟؟؟ ان ولعوها فيها من الصباح لى صباح باكر ؟؟؟؟ دحين اجار الطيارة شنو ؟؟؟ بسم الله انت العمدة دا بقى مبدل ؟؟

تحياتى
ابو مصطفى

الف حمد الله علي السلامه  العمده  ابو مصطفي....
نجي برانا ولا معانا الوفد المرافق!!!!!!!!!!!!!

مرحب رجل المهام الصعبة
ابومصطفي
انشاء الخروف والسكينه
جاهزه

تمام التمام
وان شاء الله حضورنا للسودان يوم الاحد وكدا مناسب معانا
وحضوور ان شاء الله وامد فى اعمارنا

بس اتمنى حاجة
ياريت لو واحد منكم عندو امجاد ويكون متواجد بالرحلة نتفق معه يرجعنا وكله بثمنه
لانى المرة الفاتت اخوانى رجعوا بدرى والرحلة كانت حلوة وما بتتفات

والجية بالنسبة لى مافيها مشكلة المشكلة الرجعه ... يعنى عاوزة كلام نجييييض علشان ما اتجهجه فى الرجعه ويكون السعر مناسب كمان
واهو نفيد مناصيرنا احسن ما نفيد غيرهم ...

(الحاج شرف)
متعه الرحله المعاناه لكى تعرف ان البيت افضل مكان للراحه

ههههههه بالغت يعنى نقعد فى بيوتنا

والله يا الحاج عندك مداخلات بتخليك تنفع جدا تشتغل فى مجال الدعاية والاعلان

تكرمى الاخت انتصار
كل الجايين اهل   ومافى اى مشكله 
سيكون فى الاعتبار رجعه الناس