صور وانطباعات عن اللقاء الاسرى والتعارفى الاول لمنتدى المناصير بلدى

الاخوة الكرام –سلام –
رغم ان ضيف شرف اللقاء الاخ ود الفكى قد احتكر كما قال الصور لابد من ممارسة هوايتى المحببة فى السرد والكتابة عن برامج المنتدى والتى دائما مايسمح لى الاخوة الاعضاء بان ابدا—ثم ياتون بعدى ويضيفون الكثير(ود زى امام خبطة العيد يضبح اولا ثم يتبعه الباقون)—
فى جناين الحلفايا –جناين المنقة الكثيفة جدا والظليلة كان اللقاء التاريخى—(المناصير ينظمون يوما جميلا تم التخطيط له والاعلان عبر الشبكة الالكترونية )---
لقد كان يوما ترفيهيا تعارفيا اسريا جميلا حافلا ضم الاعضاء والضيوف والاسر—
ابتدأ الحضور من الصباح واستمر حتى المغرب –حضر من الشعراء –لاستاذ الشمبانى –الاستاذ—خلف الله كباشى –الباشمهندس عطا الكنيبلى—وقدموا فقرات جميلة –حضر ود الفكى مبكرا من (الضبح والقطيع ) وقد دخل الحديقة خلسة وبدأ التصوير فسأل الجميع من هذا –وما ان عرف نفسه حتى قام الجميع يحضنونه وكانت لفته بارعة –نفذ ابو مصطفى ما خطه يراعه والتزم به –الخروف –السكين-حبل التيل-
وكانت قمة السعاده والفخر وصول اعضاء المنتدى من عطبرة والمكابراب –اسامة هاشم الحسن –سلمان الحومرى –حسن عثمان الزين-كما حضر من الدمازين العضو محمد عمر(والذى يعمل بمدنى)—هؤلاء تكبدوا المشاق لحضور هذا اليوم الجميل—
من الاعضاء الحضور—حازم –جبريل-هاشم الجزولى –صالح –-عبد الواحد ابراهيم -حسن عمر –د-حجازى–موسى الامامى –عادل شررى-هناء-
اترك تفاصيل البرنامج لبقية الزملاء—

من ضيوف الشرف ايضا والد الاخ فارس –والشيخ بروى –
والكثير –
شعرنا بالسعادة تغمر الجميع واحسسنا باننا حققنا انجازا كبيرا مما اعطانا دافعا للتخطيط للقيام بالمزيد من البرامج وفى القريب العاجل باذن الله—بعد ان نلتقى لندرس السلبيات والايجابيات—
---لى عودة ------------

كما وعدت عدت--
رغم انى لم استطع النوم ليلة امس لهموم هذا اليوم والتعب اخذ منا ولكن الان المعنويات فى السماء والليلى الانشرقا (تر)
ازدان الاحتفال بالزعيم الكبير الاستاذ على خليفة عسكورى والذى اشاد بالمنتدى وحث الناس بالمضى قدما فى التوثيق والترابط--كما حضر ايضا --الاخ على الكليث والاخ نميرى والاخ عبيد الله-والاخ حسن خليفة والكل دعى للاستمرار فى هذا المنتدى وان نبقى عشرة عليه --قالوا ذلك من التداخل فى الفقرة المفتوحة او فى الحديث العادى خارج البرنامج-
الم اقل لكم انه يوم تاريخى--الصور كثيرة --وهنالك عدة كاميرات وثقت لهذا الحدث ولكن نترك شوية للاخ الكتور ود الفكى ان يتفسح شوية لكن لازم يسرع لاننا سوف ننزل مالدينا ونفرح ناس فارس وودبروى والنفر والفكى وصديق وبقية الطيور المهاجرة--تذكرت ايضا فى انى ذكرت فى كلمة المنتدى تحايا الاخوة بدول المهجر بالاسم والمنطقة وذلك كما طلب الاخ صديق --
---تانى جاييكم ----

من طرف **native guy** السبت 04 ديسمبر 2010, 4:41 am

يالله والله كلام دا يخلي الزول ما ينوم عديل من كترت شوقووو للصوره واتمنيت لو كنت حاضر(لكن زي ما قلت لكم بعد المسافه ) ... فالحمدلله نجح اللقاء لذلك من فضل الله كما قولت سوف يكون يوم تاريخي
فلكم الشكر جميعا كل من دبر وخطط وبذل وفكر وجتهد الله يتقبل منكم ربطوا الابناء مع الاباء فكم خالص الشكر . واسال الله ان يتقبل منكم
والله فرحان الليله فرح عجيييب الله يديم الفرحه .. مستنيين الصور بالله في اسرع فرصه حاولو بكره نزلوها

فمشكورييييييييييييييييين جميعا مدراء واعضاء

تقبلو تحياتي native guy

من طرف **(الحاج شرف)** السبت 04 ديسمبر 2010, 4:41 am

الم نقل لكم اننا نختلف
شعارنا
ارض عرض ماللعرض
حب الارض سنه وفرض
لو قالو لابد ننطرد بى حالنا دونك ننقرض
خلفيه خطها يراع مبدعنا محمد بروى واتخذناها شعارا مع موسيقى السلام الجمهورى منصورى موقد نار
ننتمى الى منتدى المناصير بلدى
واليوم قد بدينا اولى خطواتنا فى تحقيق اهداف المنتدى وهى
رتق النسيج الاجتماعى والذى تجسد اليوم فى الحضور التلقائى لاعضاء المنتدى وفى معيتهم اخوه من خارج عضويه المنتدى احترمنا فيهم فهمهم الراقى لتوصيل رسالتهم متخذين لغه الحوار نهجا ومسلكا
اذن البدايه ليست صعبه و ليست مستحيله مادامت تصب فى ايهما انجع لمعالجه الجراح وليكن عدونا شخص لا ينتمى للمناصير
ومن اهداف المنتدى ايضا التوثيق لكبار شخصيات المناصير ومن كان لهم دورا فى الحياه الاجتماعيه والسياسيه والثقافيه ولشعراء المنطقه قديمهم وجديدهم
استرداد ما سرق منا من شعر وانتسابه لاخرين من خارج المنطقه
ادخال تاريخ المنطقه الى دائره الضوء وخروجها من منطقه الظل التى لازمتها منذ العهد الانجليزى مع استمرار التهميش فى كل الحكومات المتعاقبه
وايضا سنواصل فى زياراتنا الاجتماعيه لشخصيات كان لها دورها فى المنطقه والوقوف على احوالهم
ومن مستجدات برامجنا ايضا اقامه ورعايه ندوات تثقيفيه تعريفيه للمنطقه فى الجامعات والانديه هنا فى العاصمه والاقاليم
ختاما نشكر الحضور ونعتزر عن بدايتنا المتاخره للبرنامج
وحقيقه كنا غير متوقعين هذا الحضور الكبير المميز مما ادخلنا فى ربكه جعلتنا نسابق الزمن لنرضى الجميع

من طرف **خال ابرار** السبت 04 ديسمبر 2010, 5:03 am

فرحتى كبيرة بنجاح هذا اليوم وحسرتى اكبر ع الغياب ع امل اللقاء فى لقاءات اخرى
مشكورين سلمان والحاج وكل الاداريين ع الترتيب والتنسيق وعذرا ع التقصير.
نتحرق شوقا للصور نرجو الاسراع

تمام تمام يا سلمان.. سعدنا بهذه الجمعة الكريمة.. إن شاء الله دايما تامين ولامين
..........
بس عندي إقتراح صغيروني كدة يا سلمان..
وهو
حسب اعتقادي لازم اللجنة المنظمة تكون ناقشتو
وهو:-
نحن هنا في المنبر.. نكون جاذبين غير منفرين. متواصلين غير منقطعين أو مقاطعين.. نراعي بعضنا.. نراعي خصوصيات بعضنا.. في ناس بتخجل من قولة الحق.. ويخجلوا من المواجهة. تلقاهم بسبب ما كدة شوية شوية إنزووا من تصرف ما..
ولذلك أري.. أن لاتنشر اي صور للعوائل والأخوات العضوات.. إلا بعد الإستئذان منهن.. أو شخص يرى لاضير من نشر صورته.ممكن تنشر. يعني الديمقراطية المباشرة يجب أن تكون متوفره
مع علمي أن الناس عايزين يعرفوا بعض.. لكن بالتشاور والرغبة يتم كل شئ بالتراضى
وهذا مني مجرد إقتراح...

من طرف **sheery51** السبت 04 ديسمبر 2010, 6:24 am

شكرا عيال منصور وربنا يوفقكم ويوحد كلمتكم ويزيد فى محبتكم ويلم شملكم
هذه ضربة البدايه والله فرحته ليكم فرح شديد كانى كنت معكم متخيله الوضع
وكمان زادت فرحتى بدعوة الخال الشمبانى فهو زول ما عادى ابدا
تمنيت لو كنت معكم اخوتى لكن الله غالب فى انتظار الصور
لكم كل الاحترام والتقدير
اختكم شيرى

من طرف **النفر** السبت 04 ديسمبر 2010, 6:39 am

تغمرنا الفرحة ونحن نسمع بالنجاح الباهرالذى حققه منتدانا اليوم فى برنامجه التعريفى والترفيهى والأسرى بجناين الحلفايا _ ونشيد ونثمن الجهد الكبير الذى بذله القائميين على أمر هذا المنتدى الرائع بإخراج هذا اليوم بهذه الروعة والجمال _ كما نشيد ونرحب بالإخوة الحضورمن المنتسبين للمنتدى ومن خارجه ونتطلع لمزيد من اللقاءات والنجاحات_ وتجدونا نتلهف شوقاً للصور التى تصور لنا جمال وروعة هذا اليوم _

تقبلوا تحياتى ،،،

جزالكم الله عنا خير الجزاء ايها الأخوة الكرام والله هذا مجهود جبار جدا نشكركم عليه وياريت لو كنا معاكم بس الحقونا بالأخبار والصور

من طرف **الرشيد طه** السبت 04 ديسمبر 2010, 1:56 pm

كان يوما تاريخيا ومفصليا فى بداية المسيرة الهم الذى سيطر على ادارة المنتدى فى انجاح هذا اليوم كان كبيرا لكن بفضل الله نجحت ضربة البداية .
ابو مصطفى كان شعلة من النشاط حضر باكرا يحمل الخروف ومستلزماته ويستقبل الضيوف.
الحاج شرف الدين شكت عربته من كثرت المشاوير اشرف على راحة الضيوف حتى توفير الكوتشينة .
الريس خالد عابدين يقف على رجليه طوال اليوم يراقب ويشاور ويناور ويساسق .
يس مصطفى يجرى من هنا وهناك ويسأل من الناقصة دائم الحركة والسؤال .
سلمان عقيد يتجول بين الحضور ويشرف على تريبات البرنامج ويطمان على امور الضيافة فى كل لحظة .
حازم حضر باكر فى كامل اناقته انسرب من بيننا دون ان نشعر وحضر بحافظة مليئة بالثلج والماء البارد .
ود الفكى دخل علينا بالدهدهة متل كتاباته لكنه ادخل السرور والبهجة وكانت الفرحة بقدومه كبيرة .
حضور الاخوان اسامة هاشم وسلمان الحومرى وحسن عثمان الزين من عطبرة خصيصا لهذا اليوم كان لها وقع خاص ووجدت التقدير من الجميع وسأل بعض الاخوان وقال حدورى مالو ما جاء .
الاخ محمد عمر اصر على الحضور رغم الارهاق وقدومه من الدمازين مدنى الخرطوم .
نتابع

التحية والتقدير لكل الاعضاء الذين ساهمو فى اخراج هذا اليوم التاريخى بهذة الروعة والجمال بالرغم من عدم حضورنا لكن احسسنا بجمالة من خلال متابعتنا عبر الهاتف

من طرف **م بروي** السبت 04 ديسمبر 2010, 3:35 pm

أولاً الشكر لصاحب الفكرة
وثانياً لكل من تعب في التجهيز
لهذا اليوم الجميل الذي (بسطنا غاية البسط)
الشكر لمن اقترح ومن كتب عبارات اللوحة
فهو بذلك اسدى لي جميلاً أحسسته من خلاله
بحضوري وبعزة الأهل التي تزيد الزول شبرين طول.
الشكر لصديقي الحبيب الفاضل(ود الفكي)
ما عارف أرد ليهو الجمايل دي كيف؟؟
لن أنسى الشكر لخالد عابدين ذلك الرائع المبدع.
الشكر للإخوة الذين تكبدوا مشاق الحضور
وعندي شاكر خاص وتحايا للزعيمين الكليس وعسكوري .

ليس من سمع كمن رأي هذه المقولة تتجلاي في اسمي معانيها عندما اطلقها علي ما شاهدته وعايشتة امس ،حيث روعة المكان وعذب الحديث وروعة التنظيم.

من طرف **ود القيايل** السبت 04 ديسمبر 2010, 3:55 pm

غايتو حاجي مامنظور مثيلا
اخوانا الجنوبيون لما تعجبهم حاجي يقولوا ( فوتو ننقو)
يقصدوا حاجي زي سماحتها خلاقي
غايتو انا بس اسال واعاين مبسوط انبساطي ماعندها حدادي ؟ اصور بس ؟؟؟
انت ياجنا الزول داك منو اللابس عراقي بلدي ويمجهد في الناس وفيهو كبرياء ووقار اهلنا الزمان ؟
ياجنا الزول دا عجبني زي التقول اللمه دي في بيتوا ؟
منو ياجنا ؟
دا ماعرفتو ؟ دا ما الرشيد ؟ يازول الرشيد الافندي زاتو ؟ والله ماشاء الله هميم
انا اعاين اه ياجنا الزول داك البيجري غادي وجاي داك منو؟
اللابس جفيره في ضراعوا وشايف الناس تتلم وتتفرق معاهو ؟ اصلوا صلبه دا ماختاه في الواطه دي ؟
كدي قولي ياجنا منو؟
انا بقالي دا فارس ؟ ياجنا قول بسم الله فارس الله يرد غربته ؟
الزول دا فيهو شهامة المناصير وفراسه ابواتنا الكبار ؟ عليك الله ياجنا كدي شوفو لي
نان صورتو اصلوا مامرت عليا في المنتدي
الزول دا فيهو اتزان عثمان النفر ورقه وحنان محمد بروي وشايف الناس تريدو ومجمعه عليهو زي صديق ودابحنه ؟ وشهم زي نور الهادي وطيب زي الفكي زول ليبيا
كدي ياجنا شوفو لي واسعل لي منو ؟
اسعل الناس تقول علي شنو يقولو ود القبايل مابعرف الناس افو؟ ياجنا كدي النراغبوا ؟ نان الزول دا صوت ماعندو كلامو براحه ونضمه زي عد القروش وهادي ؟ ياربي دا منووووو؟
ايوا شايفوا جا للبنيه ديك (اظنو ابوها ) كدي خليهو لما يروح ونجي نسعلها ؟
تعالي يابت اسمك منو؟ اسميييي ممممممم ممم ؟ يابت ماعندك اسم ؟
اها اسم ابوك منو يافالحه ؟
اتيب ؟ اتيب ؟ تقصد الطيب ياود القبايل ؟
نان الطيب دا منو ياجنا ؟ مافي زول اسمو الطيب في المنتدي والله صح يابتي ابوك دا شكلوا طيب ورزين ؟
ياجنا دي يحلوها كيف ؟ هوي يابت جدك اسمو منو قولي اسمك كلو ؟ مممموممممو اتيب محمد ادرحيم
لا حولااااااا يابت انتي بت ابومصطفي ؟ يابتي انتي اخوك اسمو مصطفي ؟ آآآي
بت الذين فركوا العدس ؟
ياجنا الزول دا معقول يكون ابومصطفي ؟ اصلوا مابصدق ؟
يااخي دا نضمو في المنتدي كلو عكازي وعكازك ؟ والله دي حاجي عجيبه ياسلااام يامنتدي المناصير ؟ امبقي كدي كلو الكلام الكتبوا غير الزول دا ؟ ياجنا دا دسترتني وماخليت فيني راس ؟ حكمتو بالغه ؟
الله يحفظك يابومصطفي كنت شمعه وروعه وعليك الله ابقي زي برا المنتدي ؟
اه ياجنا الزول داااك منو
وداك المقلوز العمه
وداك الغناي
وداك
عييييك واحد واحد جايهم بس اصبروا علي شوي ؟

ود القيايل كتب:غايتو حاجي مامنظور مثيلا
اخوانا الجنوبيون لما تعجبهم حاجي يقولوا ( فوتو ننقو)
يقصدوا حاجي زي سماحتها خلاقي
غايتو انا بس اسال واعاين مبسوط انبساطي ماعندها حدادي ؟ اصور بس ؟؟؟
انت ياجنا الزول داك منو اللابس عراقي بلدي ويمجهد في الناس وفيهو كبرياء ووقار اهلنا الزمان ؟
ياجنا الزول دا عجبني زي التقول اللمه دي في بيتوا ؟
منو ياجنا ؟
دا ماعرفتو ؟ دا ما الرشيد ؟ يازول الرشيد الافندي زاتو ؟ والله ماشاء الله هميم
انا اعاين اه ياجنا الزول داك البيجري غادي وجاي داك منو؟
اللابس جفيره في ضراعوا وشايف الناس تتلم وتتفرق معاهو ؟ اصلوا صلبه دا ماختاه في الواطه دي ؟
كدي قولي ياجنا منو؟
انا بقالي دا فارس ؟ ياجنا قول بسم الله فارس الله يرد غربته ؟
الزول دا فيهو شهامة المناصير وفراسه ابواتنا الكبار ؟ عليك الله ياجنا كدي شوفو لي
نان صورتو اصلوا مامرت عليا في المنتدي
الزول دا فيهو اتزان عثمان النفر ورقه وحنان محمد بروي وشايف الناس تريدو ومجمعه عليهو زي صديق ودابحنه ؟ وشهم زي نور الهادي وطيب زي الفكي زول ليبيا
كدي ياجنا شوفو لي واسعل لي منو ؟
اسعل الناس تقول علي شنو يقولو ود القبايل مابعرف الناس افو؟ ياجنا كدي النراغبوا ؟ نان الزول دا صوت ماعندو كلامو براحه ونضمه زي عد القروش وهادي ؟ ياربي دا منووووو؟
ايوا شايفوا جا للبنيه ديك (اظنو ابوها ) كدي خليهو لما يروح ونجي نسعلها ؟
تعالي يابت اسمك منو؟ اسميييي ممممممم ممم ؟ يابت ماعندك اسم ؟
اها اسم ابوك منو يافالحه ؟
اتيب ؟ اتيب ؟ تقصد الطيب ياود القبايل ؟
نان الطيب دا منو ياجنا ؟ مافي زول اسمو الطيب في المنتدي والله صح يابتي ابوك دا شكلوا طيب ورزين ؟
ياجنا دي يحلوها كيف ؟ هوي يابت جدك اسمو منو قولي اسمك كلو ؟ مممموممممو اتيب محمد ادرحيم
لا حولااااااا يابت انتي بت ابومصطفي ؟ يابتي انتي اخوك اسمو مصطفي ؟ آآآي
بت الذين فركوا العدس ؟
ياجنا الزول دا معقول يكون ابومصطفي ؟ اصلوا مابصدق ؟
يااخي دا نضمو في المنتدي كلو عكازي وعكازك ؟ والله دي حاجي عجيبه ياسلااام يامنتدي المناصير ؟ امبقي كدي كلو الكلام الكتبوا غير الزول دا ؟ ياجنا دا دسترتني وماخليت فيني راس ؟ حكمتو بالغه ؟
الله يحفظك يابومصطفي كنت شمعه وروعه وعليك الله ابقي زي برا المنتدي ؟
اه ياجنا الزول داااك منو
وداك المقلوز العمه
وداك الغناي
وداك
عييييك واحد واحد جايهم بس اصبروا علي شوي ؟

يعي ود القبايل كان حضور !!!

من طرف **ود القيايل** السبت 04 ديسمبر 2010, 4:36 pm

والله ياجبرين
عايت فيك معاينه
بس اقول ماشاءالله
سعلت منك قلته ياجنا الزول داك منو الظريف ؟ وساااكت بس يعاين في الخلق دا منو ؟
شايفو مستغرب ؟ الجنا قالي دا يمكن يكون النزير العوناب ؟ قلتو يازول النزير في كريمي ؟ بس طوالي انتظرت التعارف اشوفلك صاحبك قال انا اسمي جبريل عبد الرحمن ؟
ماشاء الله اوع ياجنا من يسحروك شيل معاك جبات بتاعت الحبه السودا اكشحها ياجنا في جيبك ياجنا بتصد العين ؟ ؟ المناصير فيها ناس سمحين خلاص )

ماكنت عاوز اعلق علي موضوع الرحله واترك هذا لبعض الاخوان مع المغتربين وكنت عاوز اقترح للرحل الجايات اقتراح عجبني ( لاني انا ما صاحبوا بصراحه هي فكره الحكومه ونحن في العربيه علقت علي هذا اليوم واصرت ان تكون هناك رحله كل شهر او شهرين وان تكون يوم السبت بدلا من الجمعه وان تحضر كل اسره معها وجبه الغداء من المنزل مع حافظه بها ماء وان تتشاور النسوان فيما بينهم من اجل التنسيق مثلا واحده جاينه كسره بي ملاح واخري نوعيه ثانيه وهكذا وكذلك الشاي )
اما موضوع الرحله صراحه كلام ود القبائل هو الذي جعلني اكتب علي تعليقه وفعلا هناك اشخاص ذكرهم بصراحه كانوا شعله ابو مصطفي كان له القدح المعلي ( الولد خال ) وكذلك خالد ومصطفي
اما الرشيد وسلمان فكانوا هم الملهمين للاخرين ولقد كانت الكلمات ممتازه والقاء الشعر من خلف الله وشمباني وكانت المفاجأه في انشاد الابن نادر نور الهادي الذي امتع الحاضرين بصوته الجميل واختياره لكلمات شعراء مناصير معروفين اني اجزم لو كان ود بروي وصديق حضور لانفعلوا وصاحوا صيحه أقرب الي الكوراك وهذه المناسبه سوف يكون لها مابعدها من تجويد واقتراحات جديده تسهم في تقويه الروابط خاصه الاخوه المغتربين سوق يصروا علي مثل هذه اللقاءت عند حضورهم في الاجازات لقد كانت لفته بارعه من المنتدي الف شكر للشياب والف شكر للقائمين علي امر هذه الرحله ويا ابو مصطفي الله لاجاب يوم شكرك زي مابقولوا

من طرف **منوفلى** السبت 04 ديسمبر 2010, 5:30 pm

شكرا للجميع ومبروووووووووك لللقاء .
ونرجوا منكم مزيدا من التفاصيل يا ود القبائل وجبريل وسلمان والحاج اخوي
وكذلك انطباعات المدير والنائب و..... الي حازم وابومصطفى !!!!!!
وماخرج به اللقاء من توصيات .

جيتكم راجع—
شكرا للجميع الذين تداخلوا وعلقوا—
من الصباح انا بقرأ فى التعليقات وزى ماقال ودبروى اطول شبرين—وكمان انبسط لى بساطى زايدى على القوانين—
بعدين ياود القبائل طالما ما انك لم تقم بالتعريف (باليوسر نيم) لم نعرفك والا ذكرتك فى الحضور—فانا متأسف لعدم ذكرك ولكن الحمد لله كنت حضورا –وعلى ذكر اسماء الحضور بالنسبة للاعضاء تذكرت عضو المنتدى (على الحمود) –وتمنينا ان يكون جايب معاه الطمبور—وبمناسبة الطمبور—شعرنا بحوجة للفنان بعد ان سارت الامور واطمأنينا على سير البرنامج—(درنا السلك)—خاصة وان هنالك فالاش فى جهاز مكبر الصوت به عيسى حامد نشغله فى فترات التوقف-وكذلك اشعار الاستاذ حبيب بابكر—درنا الطمبور عشان ناخدلنا نقزة (نفسى صغرت ودرت المبيت)
اما البرنامج فبدأ بالقران الكريم –ثم كلفت بان اقدم كلمة المنتدى –ذكرت فيها نشأة المنتدى واهدافه والبرامج والانشطة التى نفذها والمقترح تنفيذها –كذلك حياديته ككيان قائم بذاته وليست له علاقة باى جهة كانت –فقط المناصير –وننتقد ونوجه كل من حاد عن الطريق او اراد ان يضر بمصالح المنطقة –ومن اراد المساعدة نساعده ---ثم نقلت تحايا الاخوة المغتربين والدور الذى يقومون به والمتابعة الدقيقة للبرنامج من قبلهم وتشجيعهم الدائم لنا –
ومن ثم كانت فقرة التعارف لجميع الحضور –
ثم كانت فقرة الشاعر الاستاذ خلف الله كباشى والذى قال عدة قصائد نالت استحسان الجميع –ثم قدم الاستاذ الشمبانى ايضا قراءات فى الشعر المنصورى والاشياء البلاغية فيه والحكم والرمزية –وقال بعض قصائده وذكر ان له دراسة او كتاب سوف يصدره وسوف يمنح المنتدى نسخة منه –ثم كانت هنالك فقرة مفتوحة للاستفسارات والروىء حول المنتدى والمقترحات –والتى كانت جميلة –ومنها مداخلات –عسكورى-د.حجازى –على الكليس –اسامة هاشم –ابومصطفى-يس
وكانت اجملها من الاخت هناء والتى قدمت مقترحات جميلة –واحيانا كان الاخ الريس خالد يقوم بالرد واحيانا نساعده—
ثم قدم ابنى (احمد ) قصيدة عن المناصير –ثم قدم مرة ثانية الاستاذ الشمبانى بعد ان طلب الحضور ذلك –وكذلك خلف الله—ثم قدم الاخ نادر قصايد جميلة بلحن حنين ورائع –
ثم كان الغداء (والصوانى دورت)—تخلله نغمات عيسى حامد- وود الفكى لايترك اى شىء الا صوره –لاننسى ان مقدم البرنامج الاخ الرشيد الذى اجاد فى التقديم--
طيلة هذه الفقرات لم نستطع الجلوس شايلين الهم رغم نجاح البرنامج—
والطيب بالجد كان نجم اللقاء دون منازع فكان يزرع ارض الجنينة جيئة وذهابا بين مكان الاحتفال ومكان الحلل والطبيخ –وسكينه فى ضراعه زى ماقال بدليل اننا عالجنا اسلاك التوصيل فاحتجنا لتعرية الاسلاك فسألنا عن موس فقال موس شنو—فكشف عن ضراعه واستل السكين –بينى وبينكم خفت من زول الجزاير دا يعملنا مشكلة—ولكنه كان مستمتعا بذلك الجهد وتفانى فى عمله كما ينبغى حتى بان عليه الارهاق فى نهاية الحفل—
الاخ صديق ملاحظاتك مكان اهتمام وزى ماقلت سوف نعقد اجتماع ونناقش فيه السلبيات والايجابات والبرامج القادمة باذن الله-- الاخ هاشم سبقنتى باقتراحك بان تكون هنالك رحلات شهرية لذلك المكان الرايع --
جاييكم –ان الله مهل فى الايام--------

من طرف **الرشيد طه** السبت 04 ديسمبر 2010, 6:14 pm

جبريل عبدالرحمن كتب:
يعني ود القبايل كان حضور !!!

اى والله يا جبريل كان حضور لكن ما فى زول يسألنى منو تب .

من طرف **خالد عابدين** السبت 04 ديسمبر 2010, 7:34 pm

الحمد لله الذي بنعمته تتم الصالحات
كان يوم أمس الجمعة يوما مباركا مشهودا -
لا أريد أن اكرر ماذكره الاخوان وصفا وشكرا
ولكن يعجز اللسان والبنان ان يلهجا ويسطرا اسمى آيات الشكر والعرفان والتقدير قولا وكاتبة عبر الكي بورد لأولئك الحضور الذين تشرفنا بهم والجلوس معهم
ود الفكي
مليون سلام وتحية وتقدير
يعجبني من يأتي بدون تكلف أو تعزز - فالدار تسع الجميع وكلنا في الهم واحد
تشرفنا بك عزيزنا ود الفكي وبالابناء (الشخايت ) حفظهم الله ورعاهم
عظيم الشكر والتقدير والامتنان لاساتذتنا واعمامنا واخوانا واخواتنا المبدعين في بلاد الغربة وهم يحرصون على المتابعة سواء عبر الهاتف او عبر المنتدى - احسسناهم معنا بارواحهم واشواقهم وان بعدت المسافات
تحية خاصة وتقدير وقساسيب شكر لاخوانا الذين حضروا من عطبرة والمكابراب ومدني والدمازين ومن هاتفوا من داخل السودان وغابوا لظروفهم الخاصة والعملية
وشكر كيمان كيمان لاخواتنا وخالاتنا وبناتنا وابناءنا على الحضور المميز الجميل
وعظيم التقدير لكل من فات علينا ذكره في هذا التعميم

سلمان والحاج والرشيد وود القبائل كمان ماخلو حاجة

وللذين يودون التعرف على ودالقبايل ستجدون صوره عبر الصور التي ستاتي من ودالفكي -
ما أصلو ودالفكي من دخل مكبر نظاراتو ومقلوز العمة -وقع فينا شلب شلب وفلاشات وخفس على اليافطة - وتاني في جماعة قاعدين ماتبعنا غادي منننا برضو اخدلو خفسة عليهم
بصراحة حيرنا
الزول ده تبعنا ولا تبع الناس التانين - حتن تاني جاء راجع علينا
حازم ذاتو انا قايلو يعرفو - لقيتو اسكه غالبنا بي غادي
الغريبة هو جايب معاهو الوليدات الصغار ماشاء الله وخاصة الصغير (المحترب ) البي يحترب مع ابوهو - ان كنتم تذكرون قصته مع الحترب وشاي اللبن
-
ابو مصطفى - كل مرة يتبن في سكينو ويعاين للزول البصور
الزول ده منو البي يصور ده
الزول ده انا مابعرفو
تعرفو منو واللا امشي عليهو
عكاز بلال عفن ذاتو - بقى مافي - سكين في الضراع تاكل بلمي
يا ابو مصطفي ياخي الزول ده تقريبا اليسع
نط سلمان طبظا - قال لا - دا ماهو
ابو مصطفى - يحلف انا ماقتلكم الزول ده ضهبان
طيب ياخي ضهبان كيفن ؟ هو شاف اللافتة وقراها وصورا وبرضو ضهبان
ياخي اقوللك قولة د تقريبا حاج الزين ابو فارس
اخيرا ابومصطفى - ايوا اي قوللي -

بعدين الجماعة اتعارفوا وانت من ندي وانا نسابتي من الشريك وجروا الحن يازول واتبادلو التلفونات والايميلات - واخيرا استقرت السكين في الضراع
ضراعك اخضر ياحبيبنا

بقى داير انبهكم وان بعد الظن اثم
اعملوا حسابكم من صور ود الفكي
اي زول يتحمل مسؤليتو شاف صورتو ياكل ولا يشرب واللا غيرو
في مقالب جايه واللا صح مابعرف
خليكم عاديين ماتشفقوا
ننتظر ود الفكي بعد التحميض والمنتجة
فات علي ان اقول تشرفنا بحضور الاساتذة الشاعر الشمباني والشعر خلف الله كباشي والذان عطرا اللقاء عبر الكلمات الشعرية والتراثية وايضا -دكتور حجازي وعسكوري وحاج الزين - والد اخونا الهميم فارس والكليس والشيخ بروي والنميري وعبدالواحد عضو المنتدى وعبيدالله وجابر هذا غير الاخوة الاعضاء والضيوف

ناس ودالفكي وحازم ويس والرشيد - دوروا الكشتينة من بعد الفطور - لامن نفخت المايك - أف تست
الغريبة حازم والرشيد لاعبين زملاء - شفتو الجلسة دي كيف - جلسة مامنظور مثيلا
يس تسبب في هزيمة ود الفكي - لانو مرات خارج الشبكة -
خالك هاشم الجزولي واحمد قمر واتاني منو - قالو لن ولادكن راحو البحر - الجماعة جروا يفتشوا - ود الفكي ذاتو لحقن اخد لو خفسة فوق المحترب
الحاج شرف وفر عربية زيادة على العندو لنقل الموية والتلج - وفي الاول الصبارتين بس لي عند الفطور نشفن - الاطفال وقعو فيهن شراب - الا لحقنا حازم بي صبارة كبيرة متلجة من البيت - انا خفست عليها قلت الشي دا يكون فيها عصير واللا شربوت
نسيت اقول الصباح جينا عند الجنينة لاقينا الحاج وشويتين حصلنا ابومصطفى -
بتاع الجنينة - شوية كدي قفلة وطاش شبكة (نتيجة حادث حركة قديم )عافاه الله كما افادنا الحاج - الزول دابنا ننزل في الخضار والحاجات - شبكنا ليك طلعوا العربات بره - وقفوهن جمب الباب مابعرف كيف - نزلوا حاجاتكم هنا - انا ماداير اسمع ساوند - ما داير غنا - ماداير اطفال ينططو
اللهم طولك ياروح
يالحاج شرف - ياخي تعال باصر زولك ده - واللا خلينا نشوف جنينة تانية -
الحمد لله شويتين وجو ناس تانين - الزول مشى اندرع فيهن ونسانا - الا تاني شفتو بعد الصلاة قال انتو مشيتو صليتو الجمعة واللا مامشيتو ؟

دي شوية صور ونجي راجعين باذنه تعالى

[ندعوك للتسجيل في المنتدى أو التعريف بنفسك لمعاينة هذه الصورة]

من طرف **ساري الليل** السبت 04 ديسمبر 2010, 9:23 pm

بكره شمس الفرحه تشرق وينجبر لقلوبنا خاطر ,,,,ماأجمل لوحات التصافي ,,, ماأجمل التلاقي ,,,معاني كتيره مابتقال ولكن يظل الاحساس هو سيد الموقف ,,, مأجمل ان يخط كل من شارك في هذا اللقاء بقلمه انطباعه الشخصي ,, تتجمع تصاغ لتصبح فكره ثم يتلاشي كثير مما ظل عالق بالنفوس ,,, نسمع كثير ممن يدعو لرتق النسيخ الاجتماعي هي عبارات ماأجملها ولكن (كيف يتم ذلك ) حاجه تلقائيه من ابناء المنطقه في مشاركاتهم الاجتماعيه من سراء وضراء وبرامج رحل ترفيهيه هي جزء من السير في الاتجاه الصحيح ,,, لو اختلفتم معي في الراي فلا تلومني فاختلاف الراي بيننا لايفسد للود قضيه , التحيه اولا واخيرا لكل القائمين علي امر هذا المنتدي وهم يحملون هم اهلنا المناصير اجتماعيا والتحيه لهم وهم قمه في السلوك والرقي والمعامله الكريمه مع بعضهم ومع اهلهم , وخدمه اهلهم ,, تحياتي وشكري للجميع بدون فرز ,,, ودمتم ,

من طرف **عادل شرري** الأحد 05 ديسمبر 2010, 4:48 am

تحياتي لاخواني بني منصور وهم يعطرون بوجوههم جناين شمبات لقد حضرت الجزء الاخير من اللقاءلظروف طارئه وقررت الحضور ولو ثواني مع هؤلاء النجوم
فقد كان لقاء احبة اعزاء تعاملنا معهم عبر الرسايل الطائرة ولم نري معظمهم ولقد وجدتهم هم كالذهب لايصدئون وعند لقائهم يتناسون اختلافاتهم فلقد وجدت المناضل عسكوري وجماعته واحباء من الذين رحلوا عن الديار الي المكابراب ولقد وجدت خالد الزعيم وجماعته .
شكرالفاكهة القاء ودالفكي وتناقشت مع حازم كثيرا وقابلت ولا ول مرة الرائعين يس جبريل ومحمد عمر .
تحياتي للشعلة التي لاتهدأ ابومصطفي والاستقبال الحار من خالد وسلمان والرشيد وهاشم الجزولي والحاج وحسن عمر وجميع البقية المتفردة
ولنا عودة

لم اتمكن من الحضور لهذه الرحله الرائعه كما علمت من احد الاخوه الذين حضروها. وقد كنت مبيت النيه للمفاجاه
شكرا لكل الاخوه الذين عملوا علي انجاح اليوم
اسفت جدا للحرج الذي تسبب فيه الاخ الرشيد - حسب محدثي - لعدم ترحيبه ببعض الضيوف الامر الذي تسبب في حرج كبير وشكرا للاخ حازم الذي قام بتصحيح الامر
ارجو ان تتكرر مثل هذه الاجتماعيات حتي يتعرف الجميع علي بعضهم البعض

من طرف **خالد عابدين** الأحد 05 ديسمبر 2010, 3:28 pm

ونحن ناسف لعدم حضورك اخ محمد سليمان
لتكون على الطبيعة صورة وصوت وحتى ترى بعينك وتسمع بأذنك وتستمتع بحرارة اللقاء وسمو الجميع فوق الصغائر
نأمل أن نراك معنا في المرات القادمات بإذنه تعالى

الاخ محمد سليمان لك التحية وياريت لو حضرت لتكتمل الفرحة –
لكن ماعارف محدثك الذى قال لك ان الرشيد لم يستقبل الناس—ارجو ان تتأكد منه ولاتفسد تلك الفرحة التى مازالت مستمرة حتى الان ولازلنا نستقبل الاتصالات من داخل وخارج السودان –
الاخ الرشيد كان وقوفا من الصباح ويستقبل معنا كل الحضور –وخاصة الذين اتوا من بعيد –والكل كان مسرورا ومبتهجا ايا كان توجهه وميوله –وكان يوما اجتماعيا لم يشبه اى شائب –واقسم ان الرشيد لم يقم بما ذكره محدثك—وكل الضيوف الذين قد يقصدهم محدثك اخذوا فرصتهم فى الحديث وذكر الملاحظات والروىء المستقبلية للمنتدى والاشادة به –
اتمنى ان يكون القصد من ذلك الدعابة فقط للاخ الرشيد –والا سوف نسألك ان تخبرنا من الذى حدثك ومن الشخص الذى لم يتم استقباله –لنتخذ ماهو مناسب حيال الاخ الرشيد اذا بدر منه ذلك –او نحاسب الشخص الذى نقل اليك الكلام فى حالة عدم اثبات ذلك –لان هذا المنتدى يسع الجميع وهدفه الاساسى تقوية الصلات الاجتماعية كما كان فى ذلك اليوم –والذى جلست فيه قبلنا الاسر وتم التعارف من برتى ودربى ودماج وسور وشررى والنعوفاب وشرى والكير والكراع وكبنه وحتى حجر البيضاء –تعارفت النساء والاطفال –وتعارفنا نحن –الجميع اشاد بذلك اليوم وتمنى ان تكرر تلك الرحلات –وكان احد اهم عوامل النجاح –كما هو شعارنا دايما المناصير وبس---لو كنا ندلف للسياسة والتهافت للمناصب التى من خلالها يتم المساومة او بيع الذمم والقيم والارض والانسان حتما سنختلف—وانت ادرى –
الاخ محمد سليمان اكرر اتمنى ان يكون ذلك من باب المناكفة والدعابة –
لك احترامى وتقديرى طالما انك عضوا فى هذا المنتدى وطالما يجرى فيك الدم المنصورى الحار وهدفك مصلحة البلد --

--لك وللجميع تقديرى واحترامى----------

من طرف **ابو مصطفى** الأحد 05 ديسمبر 2010, 3:47 pm

حقيقة وما خيال :---------------
ناس بتمشى سنين كتيرة وما بتوصل وناس بدون ما تمشى توصل --- منتدى المناصير بلدى وصل خطوة من الميل وتحرك فيها وصال وجال عمليا بعد الاستكانة امام الاجهزة والكتابة التى انت منها الكيبوردات وبكت كثيرا منها ؟؟؟؟
كان اللقاء الاسرى جامع وطيب طيبة اهله البسطاء ؟؟؟ وكانت تزينه نجوم من كبارنا وصغارنا من كبارنا كان ود الفكى ومن صغارنا كان احمد سلمان وكان عبادة هاشم الجزولى ومن نسائنا كانت الاخت هناء واتكيفت اربعة وعشرين قيراط لانى كنت مشغول شوية ونسوانا كانن بعيد مننا شوية وخفت من اشياء ولكن الاخت هناء طمنتى بمشاركتها ؟؟؟ واكدت وجود الشق الاخر بكامل حضوره على الرغم من ضيق الوقت ؟؟؟
اللقاء كان حافل وكسر حاجز القبلية والعنصرية ورتق النسيج الاجتماعى والله كان طيب شديد واجمل ما فيه الاطفال الصغار واجمل ما فيه سال واحد عمك انتم من ؟؟؟؟ وكيف التقيتم وحقيقة هى الشبكة العنكبوتية التى تجمع ولاتفرق بين كل الاحبة والله انا اليوم الثانى وهو يوم السبت جاتنى حمى لانى كنت خايف من الفشل وهذه ضربة البداية للمنتدى ؟؟؟
يعنى بصراحة والله زى الزول العندو باشى ؟؟؟ خلاص المغرب لمن جاء والناس اتغدت شعرت بانى جسمى خف وعرقى وقف ؟؟؟ وبقيت اكورك يا بت يا بت انت وين ؟؟؟ وهى مرام بنتى الكبيرة التى صاحبتنى للرحلة وكان شقيقها مريض (مصطفى) ؟؟؟؟ ولعله من الصباح كانت فى شكلة فى اللبس ؟؟ ما ابو مصطفى عاوز يكون اسرة محافظة والبت عاوزة تلبس الجنز وانا عاوزها تلبس الفستان الطويل لى عندعضم الشيطان وكان هنالك جدل وفى النهاية قلت لها امشى ختى الفاس وسكين الضبح والتلكى والشوال فى ضهرية العربية
والحمد لله مشت وهى تان وتصرح ليس هنالك ديمقراطية
والشغلانة ماها رجالة وديكتاتورية ؟؟؟على العموم مرينا على الحداد وجهزنا حالنا وعندما وصلنا وجدنا يسن والمدير قد سبقونا فى موقع الرحلة ؟؟؟
واتى حازم الذى يحزم الامور ورجع جاب الثلج والحفاظات للمياه وبداء الناس يتقاطرون من كل فج عميق ؟؟ اتى ود الفكى يصور والله انا قاعد اقطع فى اللحم والزول دا يصور ومافى زول عرفوا وفى نفس الوقت بالقرب منى رجل جاء وجلس وفطر معانا وفى نفس الوقت قال لى انت المسعول قلت ليه ايوه ؟؟ قال لى نحن ناس خلوة وين ماعارف ومابنقدر نرجى غداكم دحين ادونا لحم هنا ؟؟؟؟ والله زهجت زهج قلت ليهو ياخى اقعد ارجى الغداء ونحن ناسنا ديل احتمال يجو واحتمال ما يجو ؟؟ ولكنه اصر واخذت بعض من اللحم فى كيس واعطيته اليه وفى نفس الوقت جاء الزول الطويل وبى نضاراتو ويصور (ود الفكى ) وبينى وبين نفسى والله الله يستر تانى الزول الطويل برضو حا يقول ما بقدر ارجى الغداء .. وعاينت فيه شديد وقالى انا بصور لزوم التوثيق ؟؟؟؟ ولانى عاينت فيه شديد لحمى اكلنى بعد مسافة مشيت عليهو وما بعرفو ؟؟؟ وقال لى انا ود الفكى وحتى اغطى خجلتى قلت ليهو انت خال البت دى باقى امها من الرباطاب ؟؟ اتفضل ؟؟؟؟ حبابك عشرة وفى هم وغم بينى وبين نفسى الناس بى يجو ام لا ؟؟؟؟ وكنت خايف ؟؟؟ من عدم الجية ؟؟؟؟ واتى خالى هاشم واولاده والشعراء ناس شمبانى وحلف الله كباشى وبعد الصلاة اتى وفد عسكورى وجماعتو ووفد اسامة هاشم من عطبرة وجماعتو ووفد محمد عمر من مدنى والدمازين والحكاية عمرت وبقيت ادخل وامرق وخايف حكايتى ما تقضى الناس واضرب لى يسن وخالد وشوفوا الحكاية ؟؟؟؟ والحمد لله الحكاية عدت على خير ؟؟
لكن عندما قرات مداخلات الاخوة اى زول جاء المنتدى عرفتو لكن ود القبائل عمل لى وجع راس كان حضورا ولم اعرفه على العموم كل الاخوة ابو مصطفى بقول ليكم عندكم جائزة لمن يعرف لى من ود القبائل الذى كان بين يدينا وفر مننا ؟؟؟؟ على الرغم من انى حافظ كل الحضور ؟؟؟؟

ولكم ودى وشكرى

ابو مصطفى

جيتكم راجع—
ابو مصطفى اوفيت اليوم كما ينبغى –ولكنك لم توفى نفسك ومجهودك –فانت النجم الاول للقاء بشهادة الجميع –رغم ان العمل متكامل والادوار موزعة والكل ادى واجبه—
ايضا فى ختام البرنامج والذى ختمه الاخ يس بحديث جميل واتى فى النهاية بعد ان سعد بالحفل والجمع—وايضا شكر الاخوة المغتربين الذين تابعوا الاعداد لليوم ومنذ ان كان مقترح فى البوست –كما قدم بالغ الشكر للاخ فارس الفارس الذى تكفل وبالكامل بنفقات هذا اليوم الرائع –ووعد بان تتواصل البرامج والانشطة للمنتدى— ايضا لا انسى مشاركة الخال احمد قمر خليفة واسرته والذين بذلوا مجهود مقدر وجعل من منزله الذى يقع قريب من الكبرى ومكان الاحتفال غرفة عمليات لنتم اى حاجة تنقص—فله الشكر--

بعده وقف الجميع وكان التصافح والونسة حتى نسى الناس انفسهم ثم جاءت لحظة الوداع –
--برضو جاييكم راجع---

من طرف **خالد عابدين** الأحد 05 ديسمبر 2010, 6:02 pm

هاكم لقطات من الغداء

[ندعوك للتسجيل في المنتدى أو التعريف بنفسك لمعاينة هذه الصورة]

من طرف **ودالبلد** الأحد 05 ديسمبر 2010, 7:40 pm

كنت امنى نفسى بحضور هذا اللقاء الجامع الاول والفريد فى نوعه لاسرة المنتدى الذى نجح فى وضع اللبنة الاولى لجمع صف المناصير جميعا ولكن ظرف طارئ تمثل فى وفاة والد احد زملائى بالعمل صبيحة يوم الجمعة اقتضى سفرى الى ولاية الجزيرة منطقة المناقل حال دون حضورى لهذا اليوم المشهود وواضح انه ليس من راى كمن سمع من خلال متابعتى لتعليقات وانطباعات الاخوة الحضور.
والشهادة لله انه التجمع الاجتماعى الوحيد فى ظروف طبيعيه غير الاحزان الذى شهد اجتماع اطراف لها خلافاتها فى مسار قضية المناصير وسيرها فقد اجتمعت مجموعة على عسكورى واللجنة الام ومجموعة المكابراب وبقية الحضور من هنا وهناك
ولا استطيع ان ازيد او اعبر اكثر من انه النجاح بعينه اعان الله الجميع على تكملة المشوار وان تكون هذه ضربة البداية.
الشكر للاخ خالد - سلمان - الحاج - ابومصطفى - حازم - ياسين -ولكل من ساهم فى انجاح هذا اليوم والاجر عند الله ان شاء الله.
ودرب المنتدى اخضر ان شاء الله

من طرف **هناء** الأحد 05 ديسمبر 2010, 8:05 pm

تحياتي لكل الحضور في البوست ده
وانا ح أقول رحلة ما منظور مثيلا
جد كان يوم تاريخي وزي ما توقعت ضم عدد كبير من الحضور بكل انتماءاتهم .
وزي ماإقترحت عليكم نتمنى إنو يتكرر اللقاء ده ويكون برنامج شهري ثابت .

كامل إحترامي

من طرف **حازم** الأحد 05 ديسمبر 2010, 11:22 pm

وتاني سلام لكل الحضور وسلاااام مربع للاخوه المغتربين نساله ان يرد غربتهم فقد كنتم والله بيننا طيله سويعات الاحتفال وهنا لابد من الشكر الجزيل للاخ فارس الذي لم تقف تسائلاته عن الحضور والترتيبات الاداريه
وصاحب السلام الجمهوري بروي قامه بلادي الرائعه والباشمهندس صديق ابوحنه وكل الاخوه خارج حدود الوطن
حقيقه ماكنت اريد ان استزيد سطرا علي مداخلات الاخوان لانهم شموع من الاخ الشاب الخلوق خالد عابدين والادارين الذين اخجلونا بهمتهم العالية وتفانيهم في ان ينجح هذا اللقاء الذي اعتبره قمة الروعه
الاخ سليمان العقيد والاخ الرشيد والاخ يس والاخ ابومصطفي والاخ الحاج شرف
كلهم كانو والله شموعا فقد حفروا في دواخلي صورة نقية تقيه تحكي عظمه الاخوة والاخوان فلكم شلالات الود والمحبه
الذي دعاني للكتابه تعليق العضو احمد سليمان يااخي روعة اللقيا واصرار الجميع علي التلاقي والحب الذي فاض وروي جناين الحلفايه اكبر من الهنات
فوالله الذي لا اله الا غيره مااحسست بان هنالك من تخطاه السلام والترحيب من الاخ العزيز جدا الرشيد فمثل هكذا كلمات يااخي لا تروغ همتنا التي تحترم وتوقر كل ماهو اصيل
والذي ذكره ود القبايل تفوح منه عمق الالفه وروعة اللقاء
فالاخ الرشيد ترك فينا حبا غايرا لاتهده هنات القائلين فانا والرشيد جمعنا حب البلد وانسانها
واذا كان قد نسي شيئا مما قلت فانا اعلنها من اللحظه الرشيد اخوي ونحن مكملين لبعضنا واحيطك علما اخي احمد سليمان فان الاخ علي عسكوري قد اعطاه الاخ الرشيد لكي يتحدث ؟ اليس ذلك كافيا ؟
اخيرا انا كتبت هذا الموضوع مرتجلا وحتما سأعود
لأني أصابتني الحسره عند قرائتي لتلك المداخله التي حسب راي قد جانبت الحقيقه تماما ؟
والسلام

شكرا اخى حازم لقد انصفت--وبردت علينا مثلما حملت الماء البارد بسيارتك--
بالضبط كما ذكرت فقد روى الحب جناين الحلفايا--حتى ان صغارنا لم يستطيعوا اللعب مماجعل ولد ود الفكى ينام على الكرة--وكنا عايزين نروي تلك الجنينة الجميلة (بالنقزى)--حتى يتساقط العرق--وزمان ناس برتى يعملوا اللعب فى( البرود)--فى الشمس الحارة بعد ان يرشوه بالموية--
-اخى حازم زى ماقال خالد --عايزين شهادة من شهد اللقاء --وكيف بنا ان ننقل خلاف مارأينا--
بعدين ياجماعة عايز طريقة ارفع بيها اغنية نادر نور الهادى الجميلة باللحن الرائع(الله ليل الليل لينا) -(فيديو)-منها:
ياعبيلج الدرو الفوقو المى نوناى
البشيل براقو لامن قامو للشاى
---------------------
ياقشيش النيل الغلق انطبق سلكو مع الورق
الكبير كان لحق انزلق وصادف العرق الموج كرق
مرة يغتس ومرة يشرق لومنى تانى ان باصر مرق
--تانى راجع ليكم ---

من طرف **sheery51** الإثنين 06 ديسمبر 2010, 6:44 am

شكرا يامبدعين وجد تعجبوا وتملوا العين وانا والله فخوره بيكم
وشعرت بالفرحه والسعاده وانا اقرا هذا البوست كم انتوا رايعين
وانشاء الله دايما مجتمعين على الخير وربنا يفرج كربتنا ويريح اهلنا
ويتم حل قضيتنا
والشكر موصول للاخ فارس الزين اشهد انه فارس وكمان زين
والشكر لكل من ساهمه لانجاح هذا العمل المبارك
اخوتى لكم منى عاطر التحايا وكل الاحترام والتقدير
اختكم شيرى

من طرف **النفر** الإثنين 06 ديسمبر 2010, 8:48 am

نشكر كل الأخوة الأعزاء المتداخلون على هذا السرد الوافى لهذا اللقاء الرائع والجمع الميمون ولقد شدتنى مداخلة ود القبايل الذى يملك موهبة رائعة فى السرد والتحليل والتصوير الدقيق _ وهذه رمية إرتجالية منى أرجو من شعرائنا أن يرمو عليها _

من جناين الحلفايا وبين جروف النيل
منظر بديع خلاب سحرعيونى عديل
والهمبريب نسماتو تشفى كل عليل
اللقاء كان روعة وما فى ليهو مثيل
من صباح الجمعة ولى دخول الليل

---------------------------------------------

كما أشيد مرة أخرى بالجهد الكبير الذى بذله مدير وإدارى وأعضاء هذا المنتدى الرائع _ كما لا يفوتنى أن أشكر الأخ فارس الفارس على هذا الدعم المتواصل والغيرة والحرص على تحقيق أهداف المنتدى _ فله منا الشكر والعرفان وإن شاء الله فى ميزان حسناته _وكذلك الشكر والعرفان للأخ الطيب ( أبو مصطفى ) الذى كان نجما متألقاً فى لقاء الجمعة وذلك على شهادة وإجماع الحاضرين _ نسأل الله أن يدوم التواصل وتتعدد اللقاءات والتى حتماً سنجنى ثمارها لاحقاً أم آجلاً وسيكون لها
مردود طيب على عيال منصور _

تقبلوا تحياتى ،،،

من طرف **ود الفكي** الإثنين 06 ديسمبر 2010, 1:36 pm

عواسة آبري الصور عطّلتني عشان كده جيت متأخر ...
ما بقدر أجاري السبقوني في كتابة تسلسل الأحداث و أبطال اللقاء...و أنا ذاتو ما حافظ الأسماء الكتيرة و بخاف أغلط و أبقى في دق...
بكتب انطباعاتي الخاصة بطريقتي الخاصة....
الإنطباعات دي مريحة لأنو ما في زول بيغالطك في انطباعاتك و يقول ليك ما تنطبع كدي واللا كدي...
و كل زول حر في إنطباعياتو....
_________
أصلي كنت مدبّر "ماهو دبر الحمير يعلم الله" إني أحضر بدون إعلان و معاي وليداتي...
أم الوليدات كانت جاية و قالت يمكن تلقى صاحباته المنصوريات القرن معاها في مدرسة عتمور الثانوية...و لكنها نطت نطة فجائية تشابه نطة دحيش ود بروي الرماهو فوق الجدول....
قمنا قسمنا كيمان الوليدات بيناتنا...أنا سقت معاي الصغيرونين الظراف و خليت ليها الكبار المتل الزراف...
من ما وصلت الجنينة قمت بعملية مسح و إستكشاف للموقع...
ناس الرحلات قاعدين كويمات كويمات...
علا جماعة المناصير ما غبيتم من بعيد من القماش الشارينو فوق المنقاية متل توب الناليق فوق الكردة....
مشيت عليهم و كنت أصوّر جاي و جاي و أصلي ما قبّلت عليهم عشان جايي أعمل ليهم مفاجأة تصوير وهم مسترخين....
إتلبدت متل الداير أقبض لي جرادة...
و قبّلت عليهم أصور في المجموعة القاعدة تاكل في الفطور...
و كان ما أخاف الكضب حتى صحن الفول صوّرتو...
الجماعة قالوا لي إتفضل يا زول أفطر معانا...
قلت ليهم شكراً و أنا أنقنق بيني و بين نفسي:
"دايرني إتملي بالفول الكعب دا عشان تاكلوا خروف أبو مصطفى براكم؟..يا حلات لقلق كان تقدرو تغشوني"...
و مشيت على المجموعة القاعدة تقطّع في الخروف...
و قبل ما أصل جماعة الخروف مريت على المفارش القاعدات فيها النسوان...
يعلم الله و لأني حويط و حذر, أصلي ما قبّلت على النسوان..أديتن ضهري و أنا ماشي معووج على جماعة الخروف....
معقول أقبّل على نسوان المناصير و أنا ماشي على جماعة شايلين السكاكين و يقطعوا في اللحم؟!!...
يا روح ما بعدك روح و العمر ما بعزأة يا قول الحلب المصريين...
وقعت ليك في جماعة الخروف تصوير من عدة زوايا...
و حد ما إختار لي زاوية تصوير ألقالك واحد كدي يقيف من قطيع اللحم و يرفع السكين و يعاين لي كدي....
معاينة أنا فهمتها تهديد...قرقرقرقر
يا زول زول السكين المرفوعة دا القاعد يحدرني قلت أخير إتكافى شرو بعد شفتو وقف لا طولو و شايل السكين...
عاد كان وقف وقفة عادية مش أكان يخت السكين في الصينية؟...قرقرقرقرقرقرقر...
مشيت عليهو كبستو ليك بي سلام من النوع أبو كديس...
وهمست ليهو في اضانو "ود الفكي"...
الزول جدع السكين و طايبني مطايبة فايتة الحد لامن إستغربت ذاتو و قال لي "أنا أبو مصطفى"...
نفسي الأمّارة بالسوء و تضخيم الذات قلت يمكن المطايبة دي دليل على أهمية مزعومة لود الفكي...
عامنّو ود الفكي دا في المنتدى "ضيف شرف" و أكيد بيكونو مفتكرني أخو الحاج شرف...
لكين يا فرحة ما تمت...
الراجل قال لي أنا متزوج من عندكم من الشريك بت فلان الفلاني...و جاب لي بنتو الظريفة الحلوة و قال ليها سلمي على خالك...
اللتاريها مطايبة خوف من أهل الحيكومة حقتو..قرقرقرقرقر...
و رجعت تاني على جماعة الفول...
و تاني قالوا لي إتفضل معانا فطور...
التقول الفول قاعدين يعزمولو...قرقرقرقرقرقر...
و وقعت تصوير فيهم من جديد...المرة دي بقيت أصوّر في الأشخاص و بديت بي واحد أحمراني كدي و عندو عمة غليدة....
الزول دا في الصورة حادرني حدرة مبالغة مبالغة مبالغة أكتر من شامبيون ذاتو...
التقول أنا صوّرت أوباما ما الحاج شرف....
و الغريبة بعدين داير يعمل لي فيها قرّب يعرفني...غايتو الحاج شرف دا عندو جنس كضب..قرقرقرقرقرقر.
و سلمت على الحاضرين بعد أن عرّفت نفسي...
و حلفوا عليّ إلا أقعد في الفرشة النضيفة مع إنو كل الفرشات نضيفة...
و تاني عزموني فطور السجم و الرماد دا للمرة التالتة..قرقرقرقرقرقر...غايتو جنس غتاتة عليهم..قرقرقرقرقر
و طوالي دخلت فيهم شمال:
- الكشاتين وينه يا ناس....دي رحلة دي و اللا بيت بكاء...قرقرقرقرقر...
و نواصل بعدين في الإنطباعات الإنطبعتها دي...

من طرف **م بروي** الإثنين 06 ديسمبر 2010, 1:54 pm

وتاني منك لله
قطعت مصارينا
سلمان سلام
والله جبت شعر ليهو ضل
حازم
سعدت كثيراً بمحادثتك
رائع صديقي النفر سليل الشعراء
كلام مايخرش الميه

من طرف **ود القيايل** الإثنين 06 ديسمبر 2010, 2:01 pm

تشكراتي للناس كلهم فرد فرد
والفرحه مالي عضامي نامن مفضلي
بعدين ياود القبايل مالك ماعرفت بنفسك زي ماقال الرجل الوقور سليمان ؟ ياجنا انا نضمي كتر وفهمي كتر وشكلي زاتو كتر بقالي كان عرفوني الجماعه وبالذات ناس دكتور اليسع حايقول الزول دا من الزمن البعيد ويصلح للتراجيديا الحديثه الحزينه لتمثيل واقع أليم غمرته احزان الصابرين
ياجنا كدي خلني اوري الناس الضاربين الهويد (الغربه اعني ) خبر الرحله واللمه السمحي
بعدين قلتو ياجنا الرشيد شايفو نده وقال الآن مع الاخت هناء
ياجنا في زول اسمو هناء ؟ ايواه هناء بتنا الفي المنتدي السرقو الكامرا بتاعتها ( والله موجعني لحدي هسع )
كدي ياجنا النسمع لي كلامها
ماشاء الله ياجنا بت اصول اصلوا تب مادنقرت وكلامها دقررري وكلوا في السمح والعديل ياجنا البت دي نجيضه نضاحا نامن مدفق ربنا يخليها
ياود القبايل دي ماكلي حلال وشاربي حلال البخليها تدنقر شتو وبعدين الناس ديل كلهم اخوانا علي بالتلاته اتمنيت وليداتي يطلعوا زيها
ادب وعلم وشهامه فوق وشها باين
ياود القبايل البت دي جامعيه وبعدين شغاله مع الناس البذكروا الرسول ليل نهار
انا غايتو مبسوط منها تب وعلي بالتلاته امبقيت جبت لي بت عله اسميها هناء الفارسه المنصوريه
ياود القبايل انت قبل كدي قلت امبقيت جبت درفون بسميه فارس وتاني قلت اسميه بروي وتاني الحنوني وتاني النفر ؟ انت ياود القبايل حا تسمي البلد كلها ؟ ولا تاااني ناوي,,,,,,) هوي ياجنا أقرص اضانك ) انا اصلي جمهوري تب في الحاجات دي ؟؟؟؟
والله ياجنا الناس كلها عاجبني عجب شديد وكمان ياجنا داير اسمي الرشيد وخالد واتيب وحاج شرف ويس والفكي واليسع وحازم ونادر ( والله الجنا غناي غنا رقيبتو زي الزرافه ويجيب الغناء من قرونو زي المركابي المدردح وعادل والنزير ووحدين اسماهم بالانجليزي غلبني اقراها عاجبني خلاص اتمنيت اشوفهم ) الناس دي النجاضه مكملينها تب ياجنا الدنيا فايتي كدي شوف ابواتنا الكبار وينون ؟ ياجنا الكلام الطيب صدقه والناس ديل كلهم معدنهم اصيل ؟
كدي ياجنا خلني من نضمك المترفك دا ؟ ورني داك منو الزول اللابس العمه والوجاهه لابسها تب وقاعد فوق الكرسي بس يضحك وصوتو فيه بحه ودائما يضحك ؟ دحين ياود القبايل مابقالك زول القرقراب الرجل ابقلبا اخضر ؟لا لا الرباطاب فيهم الخضره الدقاقه والزول دا اسمر شوي مااابقالي دا ود الفكي ؟ اه طيب منو ؟
الزول دا فيهو عصارة تجارب النقانيق وهجير شمش اللباريق ام اباريق ؟
اه ياود القبايل قمت علي دساتيرك ؟ خلاص جاتك الحضره ؟
كدي ياجنا اللشرب شاي صاموتي وأتم الباقي ارجاني بجيبلك خبرو وخبر وليداتو ؟

شكرا الاخت –شيرى –ادرى مرارة الغربة وربنا يجيبكم سالمين غانمين—شكرا الشاعر وسليل الشعراء النفر-
ود القبايل الاديب والروائى والذى يثبت كل يوم انو كتّاب وسوف يساعدنا فى الكتابة بالعامية مع المبدع صديق—
الاستاذ خلف الله كباشى(ابوحفصة)—قدم عدة قصائد فى اللقاء واكراما له ومناشدة الاخ مصطفى عمر بان نوثق له
اسمحوا لى ان اكتب له قصيدته (راكب الحورية ) والتى القاها ضمن قصائده الاخرى فى اللقاء –كما ذكر ان كل الناس افتكرت الحورية هى اسم لحسناء وحتى ان الناس ذكروا عدة حسناوات زعموا انها قيلت فيهن –ولكن ابوحفصة قال المقصود بها عربة (لورى) اعجبته فى شكلها وفى سرعتها –
فقال:
راكب الحورية الحبيب لا جاء ودعنى ولا سلام
تجرى من عينه الدموع وفى اليمين خاتيه خمخام
اطلق الصفارة انذار والمساعد بلغ تمـــــــام
ما نظر لى حالى الحزين اصلو عشّق وطوالى قام
جنن ابو حفصة وبهدلو حتى عينى جفت المنام
بى قصاد هجانى لفه احكم السير مسك الزمام
فى ام سرح ختالا اربعة وشفتو جارى وفاج الغمام
فى دقايق حالا وصل لى جبل شيكابى قدام
انا ليك يابسرجين جيت وقيع قولى سمحة تصل بالسلام
قولى توصل من دون الم لاصداع لاغى لاطمام
عن محمد على طه جات وشفتو قام قابلا باحترام
قنبت طال بيها الحنين وفى البلد تانى عقيلا حام
واصلت سيره(سيرها) من ابو سباع والمدوت وصلتو دون كلام
قبل ما توصل فى ابقطب فوق عطا المنان طيف حام
لما فى بربر عاد وصل الوداع يانسل الكرام
بنحضن الريد لمان تعود نحضن الاسى نحضن اَلام
بنقره(نقرأ) فيها حروفك ونعيد نقره(نقرأ) مابين السين ولام
التحية للشاعر الكبير الاستاذ خلف كباشى –(وبقالكم الشى عربية )
---سوف ننقلها وغيرها من قصائده للبوست الذى فتح باسمه-

من طرف **هناء** الإثنين 06 ديسمبر 2010, 5:53 pm

ود القبايل إزيك

شكرا علي الكلام القلتو في حقي
وإن شاء الله ابقى قدرو يا رب

وليك علي حق السماية .

[ندعوك للتسجيل في المنتدى أو التعريف بنفسك لمعاينة هذه الصورة]
الباشمهندس هاشم الجزولي -جلابية وعمة - والشاعر المهندس عطا الكنيبلي
نبدا بالصور

فى حضره جلالكم يطيب الجلوس .والله الواحد اخد جرعه معنويه تقعده سنه لقدام .كان يوم رائع التقينا فيه بناس كنا زمن متمنين لقاهم .وحتى الناس الماقابلناهم قبل كده الواحد ذى البعرفهم بالسنين .حنيه والفه وحميميه. يالها من لحظات جميله نتمنى ان تتكرر كثيرا وقريبا ونرجاهاتامين ولامين .الشكر اجزله لك من جعل هذا اليوم واقعا معاش ..

الحمدلله الذى بنعمته تتم الصالحات
اليوم اكتمل علاج اللاب توب وخرج من مشفاهو بعد ان هد حيلنا من الجيهتين
وحرمنا من المشاركه الطازجه لفعاليات الرحله والتى بدت فعالياتها منذ اسبوع
وحقيقه كنا نخاف عقباهو
ولكن اتى اكله قبل ان تشرق شمس السبت
ووصلتنا عده مكالمات من اخوه بعضهم يشيد والبعض الاخر يلوم
على عدم دعوتنا له
ولكن تفهمو ان الامر لم يتم عبر الدعوات الشخصيه وانما عبر المنتدى بطريقه تاكيد الحضور وكان الامر مختصرا على العضويه مما شجع بعضهم ان يقوم فورا بالانضمام
للمنتدى
وانا هنا بقدم اعتزارى لكل الحضور من اعضاء المنتدى والاخوه الضيوف
وحقيقه كل الحضور كانو مميزين
بدايه من ضيف الشرف ودالفكى واطفاله ود حجازى وعقيلته وعمنا الزين على محجوب ورفيقه فنى التخدير جنابو عطاالسيد عبد المجيد والسيد عبيدالله على خليفه والرفيق على عسكورى ورفاقه الكليس والصحفى عبدالواحد ونميرى واحفاد شعراء المناصير الاستاذ شمبانى وخلف الله كباشى والشيخ بروى
والاخ رجل الاعمال دفع الله عوض الكريم
ومن تكبد مشاق السفر اخوانا اسامه هاشم و نائب رئيس اتحاد المزارعين بالمناصير الجديده سلمان الحومرى وحسن عثمان الزين ومن الدمازين الاخ محمد عمر محمد
ومن الاخوات الاخت هناء وشقيقه الاخ فارس
اما البقيه فكانو هم اصحاب الدار واصحاب الدعوه الذين ورطونى فى مهام حرمتنى ان اكون حاضر ذهن
لانى اتورطه مع العيش والتلج والناس الملت الجنينه والخروف التانى اللسع ما جاء والمويه الكملت قبل ما الغدا يطلع
التقول ودالفكى ده جاى لينا زول نسب ماهو عضو منتدى

ماقلنا ليكم مليون مره اكدو حضوركم فى البوست فى داعى للجهجهه دى
المره الجايه ح نجيب شندوتشات او نطبق اقتراح الباشمهندس هاشم الجزولى

افو ياالحاج اخوي سندوبتشات شنو ؟ يقولوا علينا شنو الناس ؟ يقولو المناصير بخيلين ولا صرمانين ؟ ياجنا كلامك ماااعجبني وانا ود الفبايل البعد المايل متبرع بالخروف تب ؟ ومحل رهيفي تنقد؟ اصلنا ميتين ميتين نموت واقفين وسمعتنا فوق ؟ ياجنا نحن عيال ودقمر المرخيه مابندوره ؟ اوعك يااخوي الحاج تسعلني تقولو لي نلقاك وين ولا قشرانك كم ( التلفون ) سو اليوم وخلي الاخوان يتفقو عليهو يصلك في المحل الدايرو . والبحتير مافي داعي ليهو ياود الشيوخ ؟
عارفنك ما استمتعت بالرحله زينا لكن يااخوي المجاهيد السويتا خلت الناس كلها طرباني ؟
ياالحاج نحن اقتراح أختنا ( حكومه الباشمهندس الجزولي ) عجبنا خلاص وانا اتشاورت مع الجماعه وقالوا اقتراح في محلو ديل الحريم البعجبن والبيعدلن المايل ويسترن الحال والله ياالجزولي اريتا حكومتي ؟ ربنا يحفظها ويخضر ضراعا وزي ماقالو النسوان شقائق الرجال ونحن حريمنا بيتحزمن ويتلزمن ويقرعن المويه كمان وفيهم جنس فراستا تكيل نامن تفضل
انا ياجنا كنت عاوز اكمل ليك بعد شربت الشاي الصاموتي لكن بقالي كلامي اتسولع وبقي كتير واخير اقيف هني ياجنا وجاي رااجع للزول اللابس العمه والجيهي مكملها ؟

افو ياالحاج اخوي سندوبتشات شنو ؟ يقولوا علينا شنو الناس ؟ يقولو المناصير بخيلين ولا صرمانين ؟ ياجنا كلامك ماااعجبني وانا ود الفبايل البعد المايل متبرع بالخروف تب ؟ ومحل رهيفي تنقد؟ اصلنا ميتين ميتين نموت واقفين وسمعتنا فوق ؟ ياجنا نحن عيال ودقمر المرخيه مابندوره ؟ اوعك يااخوي الحاج تسعلني تقولو لي نلقاك وين ولا قشرانك كم ( التلفون ) سو اليوم وخلي الاخوان يتفقو عليهو يصلك في المحل الدايرو . والبحتير مافي داعي ليهو ياود الشيوخ ؟
عارفنك ما استمتعت بالرحله زينا لكن يااخوي المجاهيد السويتا خلت الناس كلها طرباني ؟
ياالحاج نحن اقتراح أختنا ( حكومه الباشمهندس الجزولي ) عجبنا خلاص وانا اتشاورت مع الجماعه وقالوا اقتراح في محلو ديل الحريم البعجبن والبيعدلن المايل ويسترن الحال والله ياالجزولي اريتا حكومتي ؟ ربنا يحفظها ويخضر ضراعا وزي ماقالو النسوان شقائق الرجال ونحن حريمنا بيتحزمن ويتلزمن ويقرعن المويه كمان وفيهم جنس فراستا تزيد وتفضل
انا ياجنا كنت عاوز اكمل ليك بعد شربت الشاي الصاموتي لكن بقالي كلامي اتسولع وبقي كتير واخير اقيف هني ياجنا وجاي رااجع للزول اللابس العمه والجيهي مكملها ؟

وسكتنا عن الكلام المباح الى حبن يدركنا الصباح

[ندعوك للتسجيل في المنتدى أو التعريف بنفسك لمعاينة هذه الصورة]
مواصلة فى الصور-
--جبريل (بالطاقية )--الكنيبلى (بالقميص والبنطلون) --هاشم الجزولى[ندعوك للتسجيل في المنتدى أو التعريف بنفسك لمعاينة هذه الصورة]
الريس خالد وابتسامة رضاء--وهو يمسك الكاميرا[ندعوك للتسجيل في المنتدى أو التعريف بنفسك لمعاينة هذه الصورة]
الابناء احمد الرشيد ---واحمد سلمان---بعيدا عن اجواء الاحتفال--

من طرف **خالد عابدين** الخميس 09 ديسمبر 2010, 4:12 pm

نواصل في الصور
[ندعوك للتسجيل في المنتدى أو التعريف بنفسك لمعاينة هذه الصورة]

من طرف **خالد عابدين** السبت 18 ديسمبر 2010, 6:58 am

بعض الصور

[ندعوك للتسجيل في المنتدى أو التعريف بنفسك لمعاينة هذه الصورة]

من طرف **ود الفكي** الأربعاء 22 ديسمبر 2010, 6:11 pm

ود الفكي كتب:
عواسة آبري الصور عطّلتني عشان كده جيت متأخر ...
ما بقدر أجاري السبقوني في كتابة تسلسل الأحداث و أبطال اللقاء...و أنا ذاتو ما حافظ الأسماء الكتيرة و بخاف أغلط و أبقى في دق...
بكتب انطباعاتي الخاصة بطريقتي الخاصة....
الإنطباعات دي مريحة لأنو ما في زول بيغالطك في انطباعاتك و يقول ليك ما تنطبع كدي واللا كدي...
و كل زول حر في إنطباعياتو....
_________
أصلي كنت مدبّر "ماهو دبر الحمير يعلم الله" إني أحضر بدون إعلان و معاي وليداتي...
أم الوليدات كانت جاية و قالت يمكن تلقى صاحباته المنصوريات القرن معاها في مدرسة عتمور الثانوية...و لكنها نطت نطة فجائية تشابه نطة دحيش ود بروي الرماهو فوق الجدول....
قمنا قسمنا كيمان الوليدات بيناتنا...أنا سقت معاي الصغيرونين الظراف و خليت ليها الكبار المتل الزراف...
من ما وصلت الجنينة قمت بعملية مسح و إستكشاف للموقع...
ناس الرحلات قاعدين كويمات كويمات...
علا جماعة المناصير ما غبيتم من بعيد من القماش الشارينو فوق المنقاية متل توب الناليق فوق الكردة....
مشيت عليهم و كنت أصوّر جاي و جاي و أصلي ما قبّلت عليهم عشان جايي أعمل ليهم مفاجأة تصوير وهم مسترخين....
إتلبدت متل الداير أقبض لي جرادة...
و قبّلت عليهم أصور في المجموعة القاعدة تاكل في الفطور...
و كان ما أخاف الكضب حتى صحن الفول صوّرتو...
الجماعة قالوا لي إتفضل يا زول أفطر معانا...
قلت ليهم شكراً و أنا أنقنق بيني و بين نفسي:
"دايرني إتملي بالفول الكعب دا عشان تاكلوا خروف أبو مصطفى براكم؟..يا حلات لقلق كان تقدرو تغشوني"...
و مشيت على المجموعة القاعدة تقطّع في الخروف...
و قبل ما أصل جماعة الخروف مريت على المفارش القاعدات فيها النسوان...
يعلم الله و لأني حويط و حذر, أصلي ما قبّلت على النسوان..أديتن ضهري و أنا ماشي معووج على جماعة الخروف....
معقول أقبّل على نسوان المناصير و أنا ماشي على جماعة شايلين السكاكين و يقطعوا في اللحم؟!!...
يا روح ما بعدك روح و العمر ما بعزأة يا قول الحلب المصريين...
وقعت ليك في جماعة الخروف تصوير من عدة زوايا...
و حد ما إختار لي زاوية تصوير ألقالك واحد كدي يقيف من قطيع اللحم و يرفع السكين و يعاين لي كدي....
معاينة أنا فهمتها تهديد...قرقرقرقر
يا زول زول السكين المرفوعة دا القاعد يحدرني قلت أخير إتكافى شرو بعد شفتو وقف لا طولو و شايل السكين...
عاد كان وقف وقفة عادية مش أكان يخت السكين في الصينية؟...قرقرقرقرقرقرقر...
مشيت عليهو كبستو ليك بي سلام من النوع أبو كديس...
وهمست ليهو في اضانو "ود الفكي"...
الزول جدع السكين و طايبني مطايبة فايتة الحد لامن إستغربت ذاتو و قال لي "أنا أبو مصطفى"...
نفسي الأمّارة بالسوء و تضخيم الذات قلت يمكن المطايبة دي دليل على أهمية مزعومة لود الفكي...
عامنّو ود الفكي دا في المنتدى "ضيف شرف" و أكيد بيكونو مفتكرني أخو الحاج شرف...
لكين يا فرحة ما تمت...
الراجل قال لي أنا متزوج من عندكم من الشريك بت فلان الفلاني...و جاب لي بنتو الظريفة الحلوة و قال ليها سلمي على خالك...
اللتاريها مطايبة خوف من أهل الحيكومة حقتو..قرقرقرقرقر...
و رجعت تاني على جماعة الفول...
و تاني قالوا لي إتفضل معانا فطور...
التقول الفول قاعدين يعزمولو...قرقرقرقرقرقر...
و وقعت تصوير فيهم من جديد...المرة دي بقيت أصوّر في الأشخاص و بديت بي واحد أحمراني كدي و عندو عمة غليدة....
الزول دا في الصورة حادرني حدرة مبالغة مبالغة مبالغة أكتر من شامبيون ذاتو...
التقول أنا صوّرت أوباما ما الحاج شرف....
و الغريبة بعدين داير يعمل لي فيها قرّب يعرفني...غايتو الحاج شرف دا عندو جنس كضب..قرقرقرقرقرقر.
و سلمت على الحاضرين بعد أن عرّفت نفسي...
و حلفوا عليّ إلا أقعد في الفرشة النضيفة مع إنو كل الفرشات نضيفة...
و تاني عزموني فطور السجم و الرماد دا للمرة التالتة..قرقرقرقرقرقر...غايتو جنس غتاتة عليهم..قرقرقرقرقر
و طوالي دخلت فيهم شمال:
- الكشاتين وينه يا ناس....دي رحلة دي و اللا بيت بكاء...قرقرقرقرقر...
و نواصل بعدين في الإنطباعات الإنطبعتها دي...

نواصل:
- لكين يا ود الفكي باقيلك الكوشتينة بي تنفع هني.؟!..
- ليه مابتنفع..!..أصلو دا جامع و اللا رحلة...
- خلاص يا زول حسع نرسّل ليها...
و إتخابتت التلفونات و الوصيات..."جيب معاك جوز... جيب معاك جوز"....
أنا من سمعت "الجوز" قرّبت أقول ليهم ما تنسوا تجيبوا المحّارة و الطورية....
أها...
الكوتشينة وكت جات ,,زولي الغليد الكيشة داك أول واحد قعد و فرّش عمتو...
و دخّل إيدو مرق جزلانو و خمش منو قروش كبّاهو قدّامو....قرقرقرقرقر

- يا زول القروش دي لي شنو.؟!...
- إنتو مش قلتو دايرين تلعبوا بوكر؟...قرقرقرقرقر
- يا زول بوكر شنو كمان....نحن بنلعب وست....
- الوستي طاير ...لكين برضو بنلعبوا معاكم...الله بس يمرقكم مني..
و فعلاً زولنا أخدلو سيك في قبولو....
و بلا كتير جانا واحد طويل و نحيف و ضاحك ومقلوز عمتو و لابسلو مركوب و صديرية....
بس ما تمّ سلامو عديل, بلا وقف فوق المسجل الكبير داك العاملنّو بدل الساوند سيستم...
- النصيبي الزي الرادي الكبيري دي شن نفرا؟..
- دي يا الشيخ بروي مسجل و تشتغل بالكهرباء و البطارية و عندها مايك لاسلكي و ممكن تشتغل بدل المكرفون و ممكن تشتغل بالفلاش....
- كدي دوّروها لي....
و فعلاً دوّروها ليهو...و إشتغل الطمبور يلعلع من سماعات الجهاز الكبار ديك...
زولنا تبارك الله ما نسحروا أظنوا في زمانو كان بتاع حفلات جد....
رفع أيدينو الإتنين لافوق و فضّل يضرب في الواطة مع إيقاع الدليب...
- عليكم الله توروني الداهيي دي جبتوها من وين و بي كم؟...
- جبناها من عمارة كذا و بي تلتمية و خمسين جنيه....
- أكنها رخيسي كدي..!!..نان أنا من باكر دي شايل قروشي و ماشي عليها...شوفوا لي ماركته شنو...
و فعلاً بروي أخد الماركة و كتبها في نوتة مربوطة بي استكة...قرقرقرقرقر...
بلا بلحيل بلا "النصيبي" يا قول بروي كضمت براها بدون أيتها سبب...
غايتو الناس كابسوا بروي و حجزوهو منها ....
- يا ناس فكوني عليها أنا حسع بصلحها ليكم...
- تصلّح لها شنو يا بروي و إنت أول مرة تشوفه حسعتيه...
- عان ديل..ما بتكون يا قطعت جاز و يا كمان الفونية إتقفلت....
- يا بروي إنت الشي قايله رتينة....الشي دي مابيعرفولا علا ولاد الخرطوم..
و جو الجماعة المنظراتية الخرطوميين و كل واحد يدلو بدلوه لا يبالي بشي:
- بتكون البطارية خلصت...
- تخلص كيفن و أنا تلاتآيام رابطه في الكهرباء...الشي دي الكهربه الرضعتها تنّور المناصير من حدها لا حدها...
- خلاص يمكن في زر إتدّاس بالغلط....
أها من جات سيرة الزر المديوس بالغلت, الجماعة إتحاوطوا الجهاز...
كل واحد مسك لو جنبة من الجهاز و قعد يدغّس فيها....
مافي شيتاً مارق لا بره ما دغسوهو أو فتلوهو....
مافي حفرة في صفحة الجهاز ما دخّلوا فيها أصبعن...
و يخرب...
الجهاز في صمّتو....
واحد من ناس بابورات اللستر قال ليهم:
- جيبوا لي المفك و المنفلة , حسع أخليهو ليكم زي الطلقة...قرقرقرقرقر....
يا جهاز السجم و الرماد دا حد ما ساوطوهو ما إتعدل....
و الناس قنعت منو....
بلا براهو قام يلغلغ تاني بدون ما يهبشوا زول....
غايتو بعد ما بدأ البرنامج, شايفن ربطوهو في بطارية موتر...
الموتر ذاتو عندو تلاتة كرعين و يشبه الرقشة...لكين موترنا دا ضكر و الرقشة إنتاية....
و جابو المايك اللاسلكي و ربطوهو مع الجهاز و عملولو test بتاع رضعة من أمو....قرقرقرقر
الصوت المارق منو ماشاء الله عليهو يجيب الضهبان...
لكين بعد بدت فقرة التعارف قام الصوت جابلو قطّيع....
واحدين قالوا يمكن تكون الشبكة ضعيفة...نطّوا عليهم تانين و قالوا الجهاز الجديد ما ممكن تكون شبكتو ضعيفة..
واحدين قالوا لأنو المايك بقى بعيد من أمو...التانين قالوا الأجهزة الحديثة دي بتكون مداها على الأقل كمطاشر متر...
أنا أصلي بحكم خبرتي الطويلة في السعية و البهايم كنت عارف سبب الصوت المقطّع دا....
الصوت النفر دا بيكون لأنو الرضعات الأولى بتطلع "لبى"...
و كان الناس ديل مثقفين متلي كانوا خلوا المايك يرضع يومين تلاتة في البيت قبل يجيبوهو الرحلة...

أنا ما حدّثتكم بي حكاية نسيبنا أبو مصطفى...مش؟!....
أبو مصطفى بعد شاف الناس الجو الرحلة ماشين في زيادة جاني و قعد جنبي:
- باقيلك يا ود الفكي ما أخير أجيب الخروف التاني و أضبحو و أقطعو للناس ديل...
- ما أظن بيلحق بعد دا...
- نان نسوى شنو كان الناس ديل كترو أكتر من كدي...
- أقعوا جدول الموية داك...
- أفو أفو....يا زول الموية عندنا في الصبارات ديك و فيها تلج...
- نان موية التلج دايرة تبقالكم أكل...
- نان موية جدولك بي تتّاكل؟..واللا إنت دايرنا نجيب للناس سعدة من الجدول ياكلوها...
- قرقرقرقر...يا مساختن عليك...!!!.. ياخ أنا قاصد تغرفلك جوزين تلاتة و تكبهن فوق حلة الملاح و تطنبجو موية تخليهو chـــرورة...
- قرقرقرقرقر...الله يطمسك يا المطيميس...كان ما تقول الجدول ممكن يملح لينا و لي جيرانّا ديك...
و ذهب أبو مصطفى يروي حكاية الطنبجة لكل من دبّ على وجه الرحلة....
و نتخارج من الإنطباعات لا يجينا عكاز طاير و نبقى في غلطان المرحوم...
مع إنو كل الحكايات أصولها صحيحة و لكن أخرجناها في قالب آخر مناسب...
تحياتي..