جمعية المنتدي

من طرف **عازه** الأربعاء 05 فبراير 2014, 8:51 pm

تذكير بمساهمة فاتح الموضوع :

هل نضبت الافكار واصبحت الكتابه ممله ام عجزت الاقلام وانتابها الفتور لا ادري ماذا حصل تحوم وتجي راجع ينتظرك عدد قليل من المساهمات الحاصل شنو حتي القاعديت يتاوقو ويرجعو واواحدين يكتبو بالفحم علي باب المنتدي حضرنا ولم نجدكم والضيوف كتار في الشارع واقفين منتظرين الضبايح والمواضيع الطاعمه عشان يسلموا ويدخلو انا اقترح يتفق الاعضاء علي جمعيه ذي جمعية النسوان في الحي يجتمعو ساعه في الاسبوع يتفقدوا بعض ويدفعو قروش ورطل سكر وصابونه تقع علي واحده منهن . عايزين حاجه شبيهه لي دي نجتمع كلنا سوا في ساعه واحده في يوم في الاسبوع نتفقد بعض انا البليله والزلابيه والقهوه علي قطيعه مامعانا نكتب كلمات جميله في حق بعض لاسكر ولاصابونه ولاقروش فقط قلمك عبر به عن اعجابك بما يكتبه الاعضاء وانا ببدا ليكم يعجبني حقيقه اسلوب الباشمهندس ودجيب الله في الكتابه يختار عناوووووووووين جذابه ذي السحيلي البالعه الكديسي ههههه يجبرك ان تدخل وتقرأ هو مشروع لكاتب كبير في مقبل الايام انشاءلله هناك كتاب كبار جدا في هذا المنتدي قامات يمكن ان ينافسوا علي مستوي العالم العربي في الكتابه والشعر والادب اترك للاخرين فرصه حتي يتكلمو عن هذه القامات التي قد امدت منتدانا بكل ماهو جميل حتي فاقت شهرته كل الافاق اللهم وفقنا جميعا يارب وسدد خطانا

من طرف **عازه** الأحد 09 فبراير 2014, 4:25 pm

سامى احمد محمد كتب:بوست رائع وفكرة جميلة
خروج عن المألوف وتنوع
نتمنى ان نرى اركان المنتدى عامرة بالآعضاء
وبمساهماتهم الثره
شكرا الدكتوره عازه وشكرا مرورك الكرام

ان الكرامة في المواقف عزتي
والمجد يرسم في المونئ وثبتي
شمسا وبحرا من ضياء
تسلم كتير جنابو سامي علي المرور ربنا يوفقنا ويوفقكم في تقديم كل ماهو جميل

من طرف **عازه** الأحد 09 فبراير 2014, 4:32 pm

خال ابرار كتب:غبنا وجينا وعازه مازالت معين الافكار الذى لا ينضب...
مقصرين فى المنتدى وفى الاعضاء التمسو لنا العذر وسنحاول التواجد بقدر الامكان..
تقبلى مرورى يادكتورة..

[ندعوك للتسجيل في المنتدى أو التعريف بنفسك لمعاينة هذا الرابط] مرورك اسعدنا الدكتور خال ابرار كم اسعدنا ذلك الخبر الجميل وربي يتم ليكم ونفرح بيكم رينا يسعدكم سعاده غير محدوده دكاترة المنتدي لقد كانت عيادتكم محطة امل للتعرف علي كثير من الامراض التي نجهل نٍاسل الله ان يكون الجميع متعافي ولكن وجودكم انت والدكتوره تماضر يبعث فينا مذيد من الراحه والطمأنينا لاتطولو الغيبه دعو افراحنا تكتمل بكم

من طرف **عازه** الأحد 09 فبراير 2014, 5:32 pm

يا من إلى الله تدعو *** وترتجي منه أجرا
لك المدائح تترى *** شعراً وإن شئت نثرا

تحية لمن فجر في حياتنا ينابيع من التفاؤل والامل الجميل بلغته الراقيه والجميله انه ذلك المنصوري الغيور علي اهله ودينه ولغة الضاد الدكتور مصباح مرورك فخر لنا

وفق الله الجميع لما يحبه و يرضى و نسأله جل و علا المزيد من فضله أنه جواد كريم و الحمد لله رب العالمين

من طرف **عازه** الأحد 09 فبراير 2014, 6:48 pm

علي الحمود كتب:السلام عليكم جميعا..
كان لزام علينا أن نمر من هنا لنرى هذا الجمال..
نحيي كل الأماجد(الناس القلوبا رهيفة وحنينة)تنضح وفا وعرفان وحب للناس كل الناس..
تحية تبجيل للدكتورة عازة..
تحية مبدعة متفردة للأديب الفاخر الأرباب سلمان..
تحية تقدير وإجلال للخال..
وكل المرور الكرماء..
تقبلوا أشواقنا حقا وتحايانا..

تحلق الطيور مغردة في سماء الكون عبر فضاء تملؤه نجوم لامعه مثلكم اخي علي الحمود كما عهدناكم ال الحمود شيمتكم الطيبه وكرم الاخلاق وحب الوطن الصغير المناصير الجميله بأهلها لاجف قلمك اخي سباق دوما الي الخير ولا تخاف بالحق لومة لائم وفقك الله وسدد خطاك مروركم اعجبني

من طرف **عازه** الأحد 09 فبراير 2014, 7:21 pm

عرفان بالجميل ورد معروف نابع من خلجات القلب
الصادق لكل المرور الكرام ضيافتكم واجبه والعيد علي الابواب استميحكم عذرا للذهاب الي سوق المنتدي انه يعج بأفخر انواع الحلويات الواصله يادوب من وراء البحار وسأحمل معي مذيد من الدقيق والسكر والسمن واعبر المالح مره اخري الي ست الحلي والفطائر اميرة الاميرات حتي يأتيكم معروض العيد بأجمل ما تشتهون ولدينا مفاجاءة كبري ستنزل في ايام العيد ويفجرها المبدع دوووووووووووما ابو حنه . انتظرووووووووووونا بدار الجمعيه العيد القادم وسيكون البرنامج حافل ومليان ابداع والضيافه من هسع خرووووووووووووف كبير اولوية الحضور ستمكنك من حضور المشويات والمراره اخواتي وصديقاتي منتظراكن علي احر من الجمر عارفات شغل المطبخه عايز الايادي شئ وليع فحم وغسيل عدة ونضافة كمونيه وقطيع اللحمه وقديم المعروض اتمني يكووووووووووون عيد ابداع اخوانه واخواتنا يتألقو بتقديم كل ماهو جميل ومالتوفييق الا من عند الله شكرا ادارة المنتدي ثاني وثالث ورابع والعيد الكبير سنحتفل بأذن الله بعيد منتدانا الذي جعلنا اسره واحده وسيوحد جميع ابناء وطني الصغير بأذن الله وتوفيقه

بعد كدا عايزين تحديد لى لمتنا..
تكون يوم كدا الساعة كدا... أي واحد ينكت الفي يدو ويجمع هنا.. زي طابور الجيش... تكون زي ربع ساعة
عشان نشوف ولأول مرة في تاريخ المنتدى.
تقرا تحت عدد الداخلين يوفق المائة. أو مئة بالطريقة الجديدة اللطيفة بتاعة دكتور مصباح ( مئة ). ونسجلها في قامة جينس في أنها أول حالة تتم في المنتدى منذ افتتاحة.. وتكون فكرة سامية لم تعرفها جميع المنتديات على الشبكة..
والتحية والقومة للدكتورة بت أختى...
قولوا ماشاء الله ما تسحروها..

من طرف **عازه** الأربعاء 12 فبراير 2014, 4:28 pm

كلمات جميله قد سجلتها بالصفحه القامه وصاحب الزووووووق الرفيع الباشمهندس صديق نسأل الله ان يتلمي الجميع ومجهزنه البخور عشان مايسحرونا كلنا امل في اللمه عايزين منتدانا ينتعش وياربي نتوفق وتتحدد الساعه حسب رغبة الاعضاء يقولو عايزين العيد يوم كدا انا جاهزه خابزه وخروفي مربوط

من طرف **الرشيد طه** الأربعاء 12 فبراير 2014, 9:04 pm

حضرنا ولم نجدكم
فكرة هائلة بسيطة ممتازة محفزة
وايه الدنيا غير لمة ناس في ساعة خير

من طرف **عازه** الخميس 13 فبراير 2014, 6:31 pm

مرورك اسعدنا الاستاذ والمحلل الرشيد طه كم يعجبنا ان تمر قامه مثلكم علي هذا البوست الذي ينتظر الفرح الكبير وذلك بلقاء اكبر عدد من الاعضاء ويسعدنا ان يكون بوست للتعبير عن اعجاب الاعضاء بكتابات بعضهم البعض كما هناك مبدعون وكتاب وشعراء يحتاجون الي التشجيع والمسانده اراهم يوم ورا يوم يتزايدون يحتاجون الي وقفه منا والا ستفتر الهمم

من طرف **عازه** الخميس 13 فبراير 2014, 6:34 pm

فلنا في كل يوم ملتقي مع نجوم سطعو في سماء مندانا العامر واليوم نجمنا قد تقدم من علياء السماء اسم نقش بالذهب علي قلوبنا وحضور يبعث الاريحيه الي ارواحنا كلمات كثيره تتدافع للترحيب بالاستاذ يسين الحاج قيلي مدير عام وزارة التربيه والتعليم ولاية كسلا فأأأأأأأأأأأأأأألف مرحب جعل الله كل حرف تكتبه في موازين حسناتك تمنياتي بالاستمرار والتواجد بيننا

من طرف **عازه** الخميس 13 فبراير 2014, 6:40 pm

من الكتابات التي اعجبتني هي كتابات المبدع المووووووووووووووهوب الدكتور عبدالواحد ابداع يفوق حد الدهشه انا بعتبرو كاتب كبير ولكن طشه طريقه الي الطب مااجمل ان يزين منتدانا امثاله سير وعين الله ترعاك ونصيحتي احتفظ بكل حرف تكتبه

من طرف **عازه** الخميس 13 فبراير 2014, 6:51 pm

هناك نجوم كثر اقرأ لهم باستمرار في هذا المنتدي لا يمكنني حصرهم ولاتسعفني الذاكره ان اكتب عنهم جميعا ولكن البوست مفتوح لكل الاعضاء سجلو ماتجددونه جميل
تلفت نظري خطب عامر يارب وين هو هههههههههه لم اتفق معه كثيرا فيما يكتب ولكن حقيقه يعجبني اسلوبه لم افوت له خطبه واحده تتملكني الدهشه له قدره كبيره علي ربط الكلمات وادخال الصور التشبيهيه الجميله والمفردات الابداعيه في اللغه كدي دكتور مصباح يراجع كتاباته ويعطينا نظره تحليله ورأي اللغه عندي مشكله كبيره مع اللغه العربيه لاني نشأت مع من يتحدثون غير العربيه لساني وقلمي عاجزان ولكن تبهرني الكتابه التي تتميز بالابداع شكرا عامر وطلتك تذيد منتدانا القا

من طرف **عازه** الخميس 13 فبراير 2014, 7:10 pm

القامتان ابو احمد وعلي الكليس المهمومين بقضايا الاهل كم يعجبني تفانيكم في خدمة الاهل لدرجه تبعث فينا الراحه والطمأنينه وقبيله اتت بكم تستحق ان نفخر بها قدمتم الكثير ولازلال العشم معقود عليكم بانجاز الكثير والكثير ايديكم في ايد بعض وخلفكم كثر من النجوم اجعلو ارضنا جنه واهلنا في نعيمه وليس ذلك ببعيد عليكم لانكم تمتلكون القدره علي ذلك لكم مقدره علي التخطيط والنظره الشامله وطول البال واهم حاجه شايلين هم اهلكم والقدره علي المتابعه في الواقع سيرو وربناا يوفق الجميع اجد كتاباتكم كلها ماشه في الدرب الصاح الا وهو اسعاد اهلنا وتيسير امرهم ولكن من زوايا مختلفه

بعد كدا حقو نخش في الموضوع يا بت اللخت
تحديد اليوم وتحديد الساعة عشان نلتقى كلنا...

من طرف **علي الكليس** الخميس 13 فبراير 2014, 7:33 pm

تسلمي دكتوره عازه وانت تنثرين الدرر والعطر الفواح والكلمه الطيبه والالفه والمحبه بين اعضاء المنتدي وتتفقدينهم اناء الليل واطراف النهار كالام الحانيه علي بنيها ..نحن سعيدين بهذا التواصل الجميل وهذه الروح الطيبه .نتابع كل ماتكبين ونكن لك الاحترام والتقدير ونثمن غاليا مجهوداتك ..راجعلك بس في ايدينا شغله دايرين ننجضها وستشرف المناصير (القبيله )

من طرف **عازه** الخميس 13 فبراير 2014, 7:46 pm

صديق عبدالله علي أبوحنة كتب:بعد كدا حقو نخش في الموضوع يا بت اللخت
تحديد اليوم وتحديد الساعة عشان نلتقى كلنا...

انا حته سكنيي مسنناها للضبيحه لكن الاعضاء متفرقين ماشاءلله علي بقاع الدنيا كلها والتوقيت يفرق من حته لي حته منتظره اقتراحاتكم وكان يوم الجمعه وافقو عليهو بجد يعجبني ويسرني رغم انو كهربتنا بوابر في ذلك الوقت ستكون غير متوفره الكهرباء بمنطقتي الا اهاجر ليها لكن مستعده علي الاقل الزووووووول يقشر بي هدوم العيد ويمشي يعيد في منطقه اخري هههههه يبقي عيد حقيقي لكن برضو في ناس بتدخل من مواقع العمل ماننساهم انا في انتظار المذيد من الاقتراحات او التثنيه علي الفكره المطروحه

من طرف **عازه** الخميس 13 فبراير 2014, 7:50 pm

علي الكليس كتب:تسلمي دكتوره عازه وانت تنثرين الدرر والعطر الفواح والكلمه الطيبه والالفه والمحبه بين اعضاء المنتدي وتتفقدينهم اناء الليل واطراف النهار كالام الحانيه علي بنيها ..نحن سعيدين بهذا التواصل الجميل وهذه الروح الطيبه .نتابع كل ماتكبين ونكن لك الاحترام والتقدير ونثمن غاليا مجهوداتك ..راجعلك بس في ايدينا شغله دايرين ننجضها وستشرف المناصير (القبيله )

كم هو فرح ان تمر قامتكم علي هذا البوست المتواضع متابعين معاكم وفخورين بمجهودكم وربي يوفقكم رافعين راسنا ديمة

من طرف **عازه** الجمعة 14 فبراير 2014, 2:01 am

الاخوه نادر نور الهادي ومحمد محمود انقا وميسره موسي الاحمر هنيئا ومبارك لكم التميز لقد اتحفتونا بكثير من الروائع نتمني ان يتواصل المشوار اظهروا علينا منتدانا بكم يتألق

أقترح اللمة تكون يوم الإثنين من كل شهر الساعة 12 منتصف النهار بتوقيت السودان لمدة ثلث ساعة.. مين يثني.... لغاية خمسة أعضاء مؤيدين يفوز الاقتراح.. وإلا يسقط ونشوف غيرو.. عادي

من طرف **عازه** الجمعة 14 فبراير 2014, 2:22 am

اقتراح جميل الباشمهندس المواعيد مظبوطه ويوم الاثنين خير وبركه لان بداية الاسبوع ونهايته دائما تكون زحمه الاثنين مناسب تماما ننتظر اقتراحات بقية الاعضاء واثني فكرتك للتصويت ربنا يوفقنا انشاءلله ونجتمع كلنا اكبر عدد واكبر مساهمات في كل ارجاء المنتدي لكن ضروري تدخلو بيت حبوبتكم تباركو العيد ههههههههه

إن الكرامة في الموالد عزتي
ضبحوا العتود الأصهب المـُبـَطْبـطي
نأكل ونشبع كلنا وعترتي
كانت الكرامة في المناصير شهوتي
لمـّة كبار.. لمّة صغار تحت ضوءِ اللمبتي
حَبْ الذرة مخلوط بلحم الرّقتتي
تلك العـَنـَاق الفارعْ المتبرقطي
لحمها شهيُ ُ مثل لحم غزالتي
إتقمـبتت كيمانها حسب البيوت والحـِـلّـتي
كان للكرامة طعمها في قبيلتي
حتى أتى ذاك الغراقُ فـَـحـَسْرَتي
ضاع الأمل ، ضاع العمل يا عازَتي

أضحكي ثم أضحكي فـَتـْـفـِتي
ضاعت حضارات تحت سطح المويتي

من طرف **عازه** الجمعة 14 فبراير 2014, 3:09 am

صديق عبدالله علي أبوحنة كتب:إن الكرامة في الموالد عزتي
ضبحوا العتود الأصهب المـُبـَطْبـطي
نأكل ونشبع كلنا وعترتي
كانت الكرامة في المناصير شهوتي
لمـّة كبار.. لمّة صغار تحت ضوءِ اللمبتي
حَبْ الذرة مخلوط بحلم الرّقتتي
تلك العـَنـَاق الفارعْ المتبرقطي
لحمها شهيُ ُ مثل لحم غزالتي
إتقمـبتت كيمانها حسب البيوت والحـِـلّـتي
كان للكرامة طعمها في قبيلتي
حتى أتى ذاك الغراقُ فـَـحـَسْرَتي
ضاع الأمل ، ضاع العمل يا عاز

ابداع جميل هههههههههه يالخال شعر حلمنتيش ظريف تسلم كتير
ياربي دايما متلميين ومبسوطين في سمحنا كلنا انشاءلله وفي سمح منتدانا العاجبنا وكرامات اهلنا المناصير اهل بالعزه مدوني واصل الباشمهندس ا انت مدرسه قد تعلمنا الكثير والكثير من يراعكم وذلك القاموس الذي يزخر بما يعيننا علي فهم مافاتنا

من طرف **عازه** الجمعة 14 فبراير 2014, 3:20 am

يسمع منك الله
نتجمع ونتلمه
وفي الجمعيه نتجمه
مالو الشعر ابي يجي
خزلني خزله ههههههههههه ربي يجي شاعر ماري بي جاي ويرد ليك وتبقي مطارحه شعريه نستمتع بها اصلا منتدانا بقي كلو مبدعين

من طرف **ساري الليل** الجمعة 14 فبراير 2014, 5:24 am

صديق عبدالله علي أبوحنة كتب:أقترح اللمة تكون يوم الإثنين من كل شهر الساعة 12 منتصف النهار بتوقيت السودان لمدة ثلث ساعة.. مين يثني.... لغاية خمسة أعضاء مؤيدين يفوز الاقتراح.. وإلا يسقط ونشوف غيرو.. عادي

أعترض

المنصورية الغالية عازة صاحبة انامل ذات بصمة واضحه بيننا
لم اقابلك يوما ولكن بصمتك الحنييينة بيننا جعلتنى اشعر وكاننى اعرفك من زمن بعيييد
مشكوووورة فيما قلته عن الجميع ويعلم الله لم تقصرى فى حقهم .... دمتى اخت عزيزة وغالية

وجمعيتك دى قريتا من يوم كتبتيها ونويت المساهمة فيها بس مشغوووليات كتيييرة منعتنى عنها

صديق عبدالله علي أبوحنة كتب:تعرفي يا دكتورة عازة
أهو بت اللسد سمعت ندائك
........
الحقيقة لما كتبا شاعر القبيلة بي هناك.. أنا كنت قايلو يقصد( بت اللسد) بتاعة العبابسة في شري.. المعرسا إحمودة ود كرار
لأنو ديك طوالي الناس ينادوها بي بت اللسد.. وهي اسمها أمونة..
الناس نسوا إسم أمونة وبقوا ينادوها طوالي بي بت اللسد.حتى الناس نسوا أسمها ذاتو
....................
أتاريهو القصيدة السمحة دي من شاعر القبيلة قاصد بت أسد أب سباع... وهي تستاهل.. وهي ذاتا صاحبة الحكمة الشهيرة ( أمشى عدل... يحتار فيك عدوك )
........
كلمات شاعر القبيلة محمد بروي
لحن وأداء : صديق عبد الله
.........
القصيدة تفتح براها بدون تحميل ... بس انتظر شوية..
[ندعوك للتسجيل في المنتدى أو التعريف بنفسك لمعاينة هذا الرابط]

مهما غبنا عن المنتدى وبعدنا فهناك اناس رائعون يجبرونا على ان نوقن ان غيابنا لظروف قاهرة وحسب
فمكان به اناس مشبعون بالروعه يجبرك على ان تكون دوما متواجدااا وبكثرة
منتدى به امثالك اخى صديق ابو حنه وامثال قلمك المشبع بحب القبيلة قطعا سيجذب الكثيرون من القراء والزوار

فصديق ابو حنه دينمو للمنتدى يبث به روح النشاط كلما انتابته حالة ركود
لا احد ينكر ان اغلب المشاركات المفيدة بالمنتدى لك نصيب الاسد فيها

نجى للقصيدة الرائعه
والتى الجمتنى عندما نثرها شاعر القبيلة
والان تلجمنى ايضا عندما يلحنها ويؤديها قمة منصورية اصيلة مثلك
لا لا لا انا تانى راسي الا افتشو ههههههه

والله ماعرفت اقول شنو ولا شنو
ياخ مشكووووور شكرا حدادي مدادي
وربي يحفظك لاهلك وللمناصير
واذا كنت اقول دوووووما انى استفدت اجتماعيا من منتدى المناصير بلدي
فاروع فوائده ان عرفت قمم منصورية كثيرة كنت اتشرف فقط بسماع اسمائهم والان ازددت شرفا بمعرفتى بهم وانت منهم

صراحه فكرة البوست جميييلة يا عازة
والروح المشاعه فيه ايضا اعجبتنى
تسسسسسسلمى بت بلدى وعازة بلدى المناصير عاااازة
وفعلا المنتدى ملئ باعضاء رائعين جعلو منه واااحه ظليلة
وركن جميييل يحوى كل ماهو رائع عن المناصير

مشكوورة مرة اخرى عازة فيما نثرته فى حق الغالبية من روائع الكلام اكرمتى فى حقهم وهم يستاهلون

من طرف **عازه** الجمعة 14 فبراير 2014, 4:14 pm

انتصار حجازي كتب:المنصورية الغالية عازة صاحبة انامل ذات بصمة واضحه بيننا
لم اقابلك يوما ولكن بصمتك الحنييينة بيننا جعلتنى اشعر وكاننى اعرفك من زمن بعيييد
مشكوووورة فيما قلته عن الجميع ويعلم الله لم تقصرى فى حقهم .... دمتى اخت عزيزة وغالية

وجمعيتك دى قريتا من يوم كتبتيها ونويت المساهمة فيها بس مشغوووليات كتيييرة منعتنى عنها

احلي مفاجاءه طلتك علي اختي انتصار كم هو عيد لي ان يتشرف هذا البوست بقلمك الميمون هذا اليوم مبارك بالنسبه لي وكيف لايكون كذلك وانتي معنا هنا في جميعة المنتدي ويصادف يوم الجمعه الجامعه والكلمه السامعه شكلو ربنا استجاب لدعواتي من الصباح كم اشتاق ان التقيك بعد ان عرفتك بمنتدي المناصير قعلا اختي انتي انتصار كبير للمرأه المنصوريه اسأل الله ببركة هذا اليوم ان يحفظك واسرتك ويرعاك مع امنياتي ان يدوم التواصل في هذا الصرح الشامخ وما سطره يراع الشاعر وقام بادائه الخال فانتي تستاهلي حقيقه هذا الابداع ودمتي واحه ظليله لمنتدانا العامر

من طرف **محاسن** الخميس 20 فبراير 2014, 5:28 am

بت ياعازه انت بس اقطعي اليوم والزمن
واضبحي وابدي اشوي الناس براااها بتجي علي ريحة الشيه
وكتري السراير بس تاني ماعليك بالباقي
والناس القالو اعترض مايحومو عليكي
خليهم ياكلو اعتراض
والوقت كل مااتأخر كويس يعني من 12 ولا غادي
عشان الناس ااكبارينومو قرقرقر
الصباح ترجاهم العضيمات بس

انتي مسؤله من الخير خالك دا شايل طوريه ولا مسطره
الحفر كدي يوووووو
تخجلو براكم بي هنا هبي الشيه خلي الناس تقعد

من طرف **الفكى احمد** الخميس 20 فبراير 2014, 7:10 am

السلام عليكم يااهلنا البى جاى
أختنا عازه كلامها فى محلو ، فعلا تحس بأن الناس مشتتين وللا ماهن فايقين أحيانا كثيره
وللا ملوا وخلاص زهجوا وللا معينهم نضب وللا تمر الهبوب بى غادى شغلهم كتير وبقوا
قاعدين يكوموا فى المشارير ؟
الإقتراح بتحديد يوم معين يلتقى فيه الجميع حاجة سمحة لكنه صعب شويه ، وحتى إذا أمكن
ستكون هناك زحمة مواضيع وردود فى فترة زمنيه وجيزه ، عليه أقترح أن يكون الأسبوع
الأول من كل شهر كاملا هو الوقت الذى نحاول أن نلتقى خلاله بقدر الإمكان وللا أيه رايكم ؟...

محاسن
ههههههه
دي طورية المناصير الجديدة بعد الإغراق
ما عارفاها ..يو...

جمعية المنتدي

جمعية المنتدي

رد: جمعية المنتدي

رد: جمعية المنتدي

رد: جمعية المنتدي

رد: جمعية المنتدي

رد: جمعية المنتدي

رد: جمعية المنتدي

رد: جمعية المنتدي

رد: جمعية المنتدي

رد: جمعية المنتدي

رد: جمعية المنتدي

رد: جمعية المنتدي

رد: جمعية المنتدي

رد: جمعية المنتدي

رد: جمعية المنتدي

رد: جمعية المنتدي

رد: جمعية المنتدي

رد: جمعية المنتدي

رد: جمعية المنتدي

رد: جمعية المنتدي

رد: جمعية المنتدي

رد: جمعية المنتدي

رد: جمعية المنتدي

رد: جمعية المنتدي

رد: جمعية المنتدي

رد: جمعية المنتدي

رد: جمعية المنتدي

رد: جمعية المنتدي

رد: جمعية المنتدي

رد: جمعية المنتدي

رد: جمعية المنتدي

رد: جمعية المنتدي