جمعية المنتدي

صديق عبدالله علي أبوحنة كتب:اقتراح في محلو يا بت أختى عازة
 الأسباب كثيرة يا دكتورة التى تأدي لغياب الأعضاء... فيها المن إرادة الأعضاء بالكسل. وهموم الحياة.. وفيها بعضو خارج عن إرادة الأعضاء.. يدخل في باب الحريات العامة..
 لكن عموما أنا أقترح ساعة معينة في يوم معين. يجتمع فيها الأعضاء.. ويفتح بوست.. وفي اللحظة و الـتـَوْ.. كل يرمي بدلوه فيه من أي مادة يراها..
 نص ساعة يكفي.. زي ليلة القدر
 كان ممكن يكون يوم جمعة.. لكن يمكن يوم الجمعة عدد كبير من الأعضاء ما بيقدر يدخل. عشان في ناس بيدخلوا من مكاتبهم..
كان ممكن يكون يوم الأحد.. لكن يوم الأحد بيكون بداية أسبوع والشغل فيهو علينا كتير
 طالما فقدنا يوم الجمعة. إذن يكون يوم الأثنين.. يحدد الأعضاء فيه ساعة معينة. كل عضو ينفض الفي أيديو ويجمع هنا.. زي ( الفزع) بعدين شئ ونسة شئ اقتراحات عملية.. شئ تجارة.شئ شعر
 يوم الأثنين أسوة بميلاد النبي صلى الله عليه وسلم.. هكذا يولد يومنا هذا أسوة..
  أخلى للأعضاء باقي الاقتراحات

صديق عبدالله علي أبوحنة كتب:سبحان الله دكتورة
  القلوب شواهد
 في نفس اللحظة البي تكتبي فيها أنا كنت بكتب بي جاي..

اختي انتصار دائما ماابحث عنك بين الموجودين اذا وجدت اسمك اكيد هناك اضافه جميله موعودين بها تمتلكين  افكار مبتكره وسباقه دائما الي العمل الله يحفظك اختي انتصار والي الامام
.......... قالت عازة عنها

الاخت ام وضاح وجودك يعطي المنتدي جو خاص تحس وكأنك في بيتكم كميه من الطيبه والحكمه والبشاشه لا تغيبي علينا مكانك مابتسدي وفي انتظااااااااااااااارك 

عازة قالت :

اقبال بتتميز باسلوب موزون شديد ويعجبني اختيارها للمواضيع لانها هادفه من الدرجه الاولي  اول من دخلت المنتدي لفتتني مساهماتها حقيقه اختيار موفق في كل ماتكتب ابعث ليك برسالة لا تطولي علينا بجد محتاجين لحكمك ومساهماتك ربنا يوفقك اكتر واكتر
... عازة قالت عنها

 قالت عازة...
الثنائي الباشمهندس هاشم علي الجزولي والاستاذه طيبه ربنا يحفظكم انشاءلله وعيني بارده موسوووووووعه كتاباتكم تدل علي فهم واسع وكبير وعمق في التحليل نتيجه اطلاع واسع وخبره عالميه بجد رافعين راسنا دايماومهمومين بقضية اهلكم حتي الثماله وكل مااقرأ لكم احس بوضوح بالسؤال كيف نصل الي واقع افضل في بلدنا ؟ الله يحفظكم

تشدني دائما كتابات الاخت المختفيه سهام تمتلك موهبه كبيره في ربط الاحداث ولديها قدره كبيره في فهم الاخرين لا اعرف هل هي موهبه تتمتع بها ام ان لدراستها الاجتماعيه قد ثقلتها اكتر ابعث لها تحيه واقوليها بالجد فاقدنك عصيرك وزلابيتي منتظرنك لا تطولي الغيبه

عازة قالت عنها:

عازه كتب:هل نضبت الافكار واصبحت الكتابه ممله ام عجزت الاقلام وانتابها الفتور لا ادري ماذا حصل تحوم وتجي راجع ينتظرك عدد قليل من المساهمات الحاصل شنو حتي القاعديت يتاوقو ويرجعو واواحدين يكتبو بالفحم علي باب المنتدي حضرنا ولم نجدكم والضيوف كتار في الشارع واقفين منتظرين الضبايح والمواضيع الطاعمه عشان يسلموا ويدخلو انا اقترح يتفق الاعضاء علي جمعيه ذي  جمعية النسوان في الحي يجتمعو ساعه في الاسبوع يتفقدوا بعض ويدفعو قروش ورطل سكر وصابونه تقع علي واحده منهن . عايزين حاجه شبيهه لي دي نجتمع كلنا سوا في ساعه واحده في يوم في الاسبوع نتفقد بعض انا البليله والزلابيه والقهوه علي قطيعه مامعانا نكتب كلمات جميله في حق بعض لاسكر ولاصابونه ولاقروش فقط قلمك عبر به عن اعجابك بما يكتبه الاعضاء وانا ببدا ليكم يعجبني حقيقه اسلوب الباشمهندس ودجيب الله في الكتابه يختار عناوووووووووين جذابه ذي السحيلي البالعه الكديسي ههههه يجبرك ان تدخل وتقرأ هو مشروع لكاتب كبير في مقبل الايام انشاءلله  هناك كتاب كبار جدا في هذا المنتدي قامات يمكن ان ينافسوا علي مستوي العالم العربي في الكتابه والشعر والادب اترك للاخرين فرصه حتي يتكلمو عن هذه القامات التي قد امدت منتدانا بكل ماهو جميل حتي فاقت شهرته كل الافاق اللهم وفقنا جميعا يارب وسدد خطانا

صديق عبدالله علي أبوحنة كتب:الكتابات القلييييلة على قلتها . المشاترة .المرة مرة تحصل في المنتدى.. تجرح الأعضاء مرات.
 والعضو  يقول ليك ياخي مالى..
 أقفل بيتي عليا وانتهى الموضوع ..!
 بلاش وجع راس
........
 لكن بطبيعة الحال نشأ عندنا راي عام سمح في المنتدى، يشجب البوستات المشاترة في حكمة حكيمة..
 حتى صاحب البوست المشاتر ذاتو يتقبل النقد بصدر رحب
 و الراي العام يديهو الفرصة بسياسة نفوس، وحفظ ماء وجه، الراي العام هنا يديهو الفرصة يزوغ  بهدوء.. بدون جروح.
 نشأ عندنا راي عام شاجب للخطأ
 ونشأ عندنا أعضاء توسعت صدورهم، حتى لو كانت ماواسعة
 دي من فوائد المنتدى الفسيولوجية
 المنتدى هنا هو منتدى الأسرة الواحدة. تتعلم منه.. وليس تزجية فراغ... ماشفتى الحاج شرف الدين لما الناس تكلموا عن الفيس بوك. إنو أخد الناس. قال حكمة منصورية ( الفيس بوك زراعة بـِرَوِد ساكت ) كل زول يجي يطلق حمارو فيهو ويرعى ويمشى.. برود دي أظن ما عرفتيها يا دكتورة.. دي  من تراثنا لايعرفها إلا زول قاعد في المناصير أو وروهو ليها..
 كلنا نتعلم من مساهمات الأعضاء هنا
 مافي حد كبير على إنو يكتسب كل يوم خبرة جديدة في نواحي الحياة والعلم
 ونبينا صلى الله عليه وسلم قال: ( تعلموا العلم، من المهد الى اللحد) وقال ( تعلموا العلم ولو بأرض الصين )
 لذلك منتدانا ده!
جامعة مفتوحة
 ودكاترتها عندهم رواتب عديييل كدا.. زي رواتب دكاترة الجامعات التقليدية
 بس هنا الرواتب.. أجر وصحة وعافية
 وهناك الرواتب مادية..
 ولعمري رواتب جامعتنا أفضل لنا وأبرك وأحسن وأجمل وأرقى وأبهي وأروع وأنضر.. وأحلى
........
 تعرفي يا دكتورة بت الأخت
 أنتم نشأتم في القاش.. وهنالك اجتماعيات المناصير برضو سافرت معاهم..   زي البوست الهام الكتبو عبد الحفيظ محمد علي النافعابي.. وزي البوستات الشاركتى فيها أنت.. تورى  أن المناصير انتقلوا من موطن القبيلة الأم الى القاش ، وشالوا بضاعتهم معاهم.ألا وهي الاجتماعيات والـتاثير الموجب  في أي مجتمع ينتقلون اليه
( نحن من نفر عمّروا الأرض حيث ما قطنوا )
.............
 وحواء المنصورية عندنا في موطن القبيلة الأم.. كضاااب البي يقول لك المرأة هناك  ما عندها تأثير..؟ هناك هي الساس وهي الراس وهي التى تقود العمل في كل نواحيه بدون أي اعتراض من الرجل.. بالرغم من شدة بأس الرجل المنصوري..
 لكن في أمور الحياة مسلم ليها تماما
...
 لذلك موش غريب على حواء المنصورية أن تقود أعمال التطوير والتثوير والابتكار والتنويع ، هنا في المنتدى
 زي اقتراحك دا.كان زمان يتولد من أفكار العضو النشط ( انتصار حجازي)
 لكن عندما يتملئ العضو معرفة، يوزع مهامه لأعضاء مثله في الحصافة( لما حوض الراس يتملى .. طبيعي الموية تمشى القـُران ) أي الحوض المقرون فيهو.. دي ثقافة بيئة منصورية..
 بعدين يا بت أختى.. نكتب لى متين   نحن هنا تعبانين ساكت نكتب عن تراث القبيلة واجتماعيات القبيلة
 والناس على أرض الواقع تتقاسم المناصب
معتمد.. رئيس لجنة.. أعضاء لجنة..   مسميات بي رواتبها. تجيهم في ضلهم وضراهم
 هسه دي أقوم أحلف.اقول كان جماهير المناصير ما أدتني منصب.. تاني ياني الماني كاتب أي موضوع عن المناصير
( الخيل تجقلب والشكر لى حمّـاد)
 لكن ما تخافي على خالك
 أنا دوري جاي قريب في تثوير وتطوير المناصير وجعلها قبلة أنظار
 جاي
 جاي
 قريييب
..

سلمان عقيد النعوفابى كتب:الاخ صديق وعلى شاكلة ود بروى نهديك ----
يالضو قمر عشرا
انت لى منتدانا برد وحر
يالضو قمر عشرا
نلقاك من فجر
يالضو قمر عشرا
منصورى قح حر
يالضو قمر عشرا
ونحنا الليك غفر
يالضو قمر عشرا
ولى تراثنا كتب وسطر
يالضو قمر عشرا
وفى البلد ماخليت شبر
يالضو قمر عشرا
خلوة ولقدابة وحتى كر
يالضو قمر عشرا
كلامك  ماهوغريب كتر
يالضو قمر عشرا
حديثا زى الدرر
يالضو قمر عشرا
ان شاء الله تملاك العافى وماتشوف شر

ساري الليل كتب:
راودني نفس الشعور والتفكير
حتي نكون اكثر علمية وعمليه
اقترح يادكتوره عازه
الجمعة
من الخامسة حتي مغرب الشمس اسبوعا
نبدأ وشويه شويه
الفكره تكبر
تلوح في سمائنا دوما نجوم براقة لايخفت بريقها عنا لحظة واحدةنترقب إضاءتها اخي ساري الليل لقد كتبت جاهدا من اجل رتق النسيج الاجتماعي للقبيله كم كنت اقرأ تحسرك في كتاباتك ايام المحنه الاولي ولكن كنت دائما متفائل بان بكره اجمل وكلنا اهل والكسر مصيروا يتصلح وكلامك في مكانو الحمدلله والحمدلله كانت سحابة وعدت الان نحن قوي واحده جميعا علي قلب رجل واحد  اقتراحك جميل يارب يحصل ويوم الجمعه عيد ونختموا بي تبريكاتنا وبركات ان نكون جميعا معا حاتكون فرحه كبيره لاينقصها الا لبس الملابس الجديده في زمن استحالة فيه الضروريات  مااروع ان نكون اخوه واخوات معا في لحظه واحده هاهم ابناءك قبيلتي معا كما تنشدين يد واحده وامل واحد في غد مشرق 

نورالهادى كتب:شكرا دكتورة عازة لهذا البوست الرائع ووالله استمتعنا بأغانى القامة الباشمهندس صديق وفكرة البوست فى حد ذاتها رائعهة وأتمنى ان تصنفينا من الكاشفين لكذب الكيزان الفاسدين .

عباس محمد كتب:كان نلقى الرزق والفاقه
نتونس نسوى القاقة
فى ديوانا داك اب طاقة

تسلموا يارائعين
اقتراح جميل من عازة  وفى مكانه
فقط تفسيره فى الابيات اعلاه

صديق عبدالله علي أبوحنة كتب:كمان ما تنسى يا عازة
 رائدات نهضة منصورية أخر
 أميرة على
 وأميرة الحومري
 ومحاسن
 ديل من بناتنا الجامعيات.. الــ قلمهن سنين وشخصياتهم قوية..

عازه كتب:نواصل مع النجوم عنـدما ينساب القلــم و يريح في مرفـأه نــرى قـطرات الشهد
تتساقط من بين الأنامــل عندما تكتب نرى الإبــداع الحـق و
المـواهب المصقـولة نرى الفنون والجمال الذي تخطه أياديك 
اسلوب جميل وكتابات رائعه ومن القوافي والقصائد 
ومن جميل النثر .. أروعه تسلم شاعر القبيله ود بروي اسلوب متجدد ومعين من الادب والشعر لا ينضب

م بروي كتب:
دكتوره عازة
تطوق الخواطر بدين الرقة  فتعلي من شأن
أبت قدراته إلا أن يكون وضيعا
هكذا يفعل أنيقي الروح والقلب الأرق
شفيفي الأنفس سمحين الدواخل  متفردي الطبع
تقاطيع  تعابيرهم تعكس ملامح زاخرة
بالجمال والكمال وبالخير نوال
سلمت يداك

عبد الحفيظ النافعابي كتب:دكتوره عازه السلام عليكم ورحمة الله وبركاته . فكرة البوست جميله وهي في العموم تخلق نوع من التواصل بين اعضاء المنتدى وتعزز الصلات بينهم في مداومتهم في الحد الأدنى يوم في الأسبوع أياً كان هذا اليوم كما ذكر خالك صديق . البوست جاب شجر كبار فيه الصمغ ومداخلات جميله قصائد الأرباب الرائعه وتجليات خالك ود أبحنه في اللحن والغناء إبداعات غايه في الروعه وجابت شاعرنا الهمام ود بروي . تخريمه : يادكتوره كنت منتظر منك مواصلة مويتنا الفتحناها سوا في البصمه المنصوره كما أشاد بها خالك صديق وهو ما قصر ساهم فيها بكم مقدر من المقالات كانت إضافه قيمه وماذال الموضوع محتاج لمواصله وإضافات وبحث وتوثيق أرجو أن لا ينقطع . بارك الله فيك دكتورتنا الراقيه وسدد خطاك

سامى احمد محمد كتب:بوست رائع وفكرة جميلة
خروج عن المألوف وتنوع
نتمنى ان نرى اركان المنتدى عامرة بالآعضاء
وبمساهماتهم الثره
شكرا الدكتوره عازه وشكرا مرورك الكرام