كتابتكن في المنتدي كضب فى كضب

صديقي د . فضل السيد من أبناء الجعليين منطقة العالياب... بحثت عنه في بداية رمضان فهو مدير شركة الزاهر الزراعيه.. بيننا اتفاق لأصدر له بعض المنتجات الزراعيه وقد وقعنا العقد وبدأنا في التنفيذ..هاتفته تلفونه مغلق.. أرسلت له بالبريد الاكتروني ولم يرد ..ذهبت الي مقر الشركه ولم أجده ..علقت الامر.. وبدأت في موضوع اخر ... قبل يومين فجأة وبدون مقدمات طرق باب منزلي.....

سلامات حق الله .بق الله ..وين أنت يازول أنا ما خليتلك محل .. قال بعد أن تنفس الصعداء ويبدو عليه الاعياء: والله جوني أهلنا ديل فجأة وقالوا لي العربية واقفة برا نحن من هن والبلد... يا ناس عندي شغل اللخلصو وبكرة نتحرك

لا والله بس حتي شغلتك الشغال فيها دي تنفض أيدك منها

والله من المكتب وللبلد... أها هادي رجعه والبيت ما غشيتو وجيت عليك

أصلو الحاصل شنو يا دكتور الخنقة دي

والله دايماً نحن قبال رمضان بي اسبوع كدي نعمل نفير.. كل زول يلم حاجه من معارفه في الحكومه.. والمنظمات.. وديوان الزكاة

قلت له طبعاً دا بعد أشتراكات اولاد المنطقه

لا لا أولاد المنطقه من جيبن مابدفعوا ولا جنيه.. فقط نلزم كل زول يجيب من الجهة البعرفها ( استثمار علاقات يعني)

وهسع حملتكن دي جابت شنو

والله خمسة دفارات جامبو كبير ه مزروده لي ود عينها

ودا كله لي حلتكن الكلها تلاتة بيوت دي

ضحك.. والله عاد دا واجبنا.. لاننا نحن شايفين المنطقه المهمله الوحيده في قري الجعليين العالياب دي

وهسع الشئ الوديتوه دا يتكون من شنو

سكر عبوات صغيرة وكبيره 5كيلو 10 كيلو و50 كيلو باكتات دقيق قمح عدس ارز زيت صابون..يعني أقول لك شنو بصل حتي الكبريت دي

وطيب الشئ دا بتجيبه من وين ؟

زي ما قلت ليك المنظمات الجهات الحكوميه حتي ديوان الزكاه الفادني دا ما قدرنا نلم فيه الا مشينا لقاء علي عثمان في الجزيره حتي لمينا فيه وقلنا ليه بس العندك .قال لينا والله المخازن ما فيها شئ غير ذره.. قلنا ليه بس ادينا ليها ..اها دي زي ميتين وخمسين شوال ما شلناها مع الدفارات حنوديها الاسبوع دا

يعني الشئ دا لي رمضان

لالا كرتونه رمضان دي علي المعتمد معروفه سنوياً... بي تتوزع.. لكن دي حاجه نساعد يبها أهلنا في بدايه الشهر الفضيل دا

ودي يا دكتور ما مونة سنه عدييل

والله بي تديهن زي تلاته اربعه شهور كدي وتاني مفكرين نلحقن

والله ما قصرتو مع أهلكن

والله القري التانيه دي الزول ما بصرف من جيبه نهائي.. كل مستلزمات البيت بوفروها ليهم اولادن... يعني الواحد محصوله دا الا يبيعه يدخله في جيبه

كل هذا الحوار وعمي الذي حضر من البلد قاعد في التقروقه ويتصنت

وبعد ودعني وفات عمي قال لي: انت الناس ديل غرقانين !!!

قلت له :لا

قال لي نان انتو تسوا في شنو

قلت والله ولادنا الهنا غايتو مره مره يعملو قافله للبلد ومره يناشدوا في الناس والحكومه ويكتبوا في المنتدي...

فقال مقاطعاً

كتابتكن دي كضب في كضب

الشيخ محمد حبيب سلام .... القلوب شواهد ..وكلام عمك هذا أحسسناه يوم أمس

وذيلنا به آخر ردودنا هناك في منتدى الصحافة ــ موضوع المناصير يهددون باللجؤ للمجتمع الدولي

واليوم نجده هنا حديثا وكلاما معبرا

فإما ان نبادر إلى أعمال تنطق بيانا ونتاجا

أو نعيد التفكير في حساباتنا وكتاباتنا

..هنالك خصله فينا يجب ان نتخلي عنها وهذا من باب النقد الذاتي وهي موضوع الحقد والحسد

البدايه من هنا بالرغم انى لا ارى علاجا ناجع لها الا رحمه تنزل علينا من السماء ببركه هذا الشهر الكريم

مشكور سيادة العقيد(م)

لفتح هذا الموضوع الحساس
نحن من زمان بنقول الناس تتكلم عن المواضيع الجاده المفيدة
التي فيها الزبده
يمكن تساعد في نهضت البلد ومساعده الناس من الخروج من غنق الزجاج
سوا كان فكريا معنويا اوماديا
ما يكون كلام ضل ضخي
يكون ذو مصداقيه

أولاً نشكر الاخوان المتداخلون والذين طرحوا آ راء في غايه الاهميه

من عادتي أن لا أتدخل في مسار البوست أصلاً.. ولكن ما دعاني للتدخل أمران

أولاً: تم تغيير لعنوان البوست حسب ما رأت ادارة المنتدي واعلامي عبر الخاص.. وأن كان لي رأي واضح في أن أختيار العنوان هو مسؤليه الكاتب لأن تغيير العنوان يفقده المعني.. والتغيير شمل حتي من رويت عنهم فهم مطلقاً لم يقولوا كضب في كضب.. ولكن أظنها من بعض سياسة دس ما يرونه قبيحاً في ثقافتنا والرسالة التي أرسلت لي توضح أن التغيير سيكون في العنوان فقط وكلمة عمي ستكون كما هي ولكن للاسف حرفت.. والتحريف في ثقافتنا قديم

وما آفة الأخبار الا رواتها

وهذا ما جعل بعض الفقهاء يأخذون علي الامام البخاري رحمه الله أنه قبل الروايه بالمعني مما جعله يروي أحاديث تخالف ظاهر القرآن من أن الحساب يبدأ بالقبر وليس يوم القيامه..

وهذا في تقديري ما يبرر الهجوم السافر علي الاخت الفاضلة هويدا ابو شعر حينما ذكرت ان هناك عادات سالبه بالمناصير وكلنا يعلمها..

وثانياً: مخاطبة الاخ ابوسفيان خلف الله لي برتبة لم أحلم بها ولم أحملها يوماً فأنا لو كنت بهذة الرتبه لما تمرمطوا أهلي هذه المرمطة

لكم شكري ومتابعين

بعد التحيه أهلي : ما أروع النقد الزاتي وما أجله حين يكون صادقا ومن أجل معالجة قضية أمه ...فإني لا اراه إلا نقص القادرين علي التمام ...فكل فضيلة إفتخرت بها العرب إلا وهي موروثة في بني جلدتي ,,,ولكن أين تكمن العله فإني أراها عزة نفس زائده عند أغلبنا فنكره سؤال الناس حاجة أنفسنا وأهلينا .....وماعجز الطبيب عن المداوي علة إلا كفاه نية المتداوي ,,,,,,,,,,,,,,,,,,والله ولي التوفيق

لك التحية ود حبيب ورمضان كريم نحن ما فينا اى عيب غير اننا كلنا نريد ان نكون امراء وكما قيل (انت امير وانا امير ميين البسوق الحمير ) بس لو تعلمنا ووعينا ( راى صواب يحتمل الخطا وراى غير خطا يحتمل الصواب ) وتقول اى كلام فى نظر الاخرين انت مصنف مسبق ؟ ودى يا ود حبيب يحلوها كيف ؟

أخي الارباب سلمان عقيد ما كنت اريد ان اقطع حبال هذه الافكار الجيده والتي كتبها هؤلاء الذين نعتز بتوقيعاتهم علي البوست بدءاً من حازم الحازم وود المناصير الرجل الغيور علي بلده وزعيم الكلوسه الاستاذ علي والاخ المصادم الحاج شرف الدين غلام والاميره بت الحومري والاخ يوسف والذي نعتد برأيه كثيراً بالرغم من مشاركته النادره والاخ طالب العلم كرم الله حامد والاستاذه بت الزعيم أمير البرين (الرباطاب والمناصير) انتصار حجازي لتكون أفكارهم هي التي توصل الفكره ولكن اصرارك علي معرفة رايي في هذه المرحلة المبكره في النقاش_ وأنت لايرد لك طلب_

فأنا أري الفكره التي طرحها الاخوين الكريمين يوسف والاخت انتصار بالرغم من حقيقتها وانا مقتنع بها أنها صفه سلبيه عزه النفس والامتناع عن استلام من حكومه أغرقت ممتلكاتنا ومنعتنا التعويض في حقنا في تقديري يجب أن نغير هذه الذهنيه ونستبدلها بذهنية ايجابيه مصادمه

هي الحكومة بت الذين دي قالعي حقنا عينك عينك وكمان ما راضي تعايلنا!!! والاخرين ينعموا بخيراتها وكمان شايلين ضرصن فوقها السني كلها ولا فقدوا حاجي ولا غرقتلهن تمره

القصد يا زعيم من هذا البوست هو تغير هذه الزهنيه لذهنيه منتجه وفاعله

هسع عليك الله أمشي بي طريق التحدي وقبال ما تصل القدواب عاين شمالك وشوف عمدان الكهربه الموصلة دي أي بيت واصلاه كهربه والله والله في بيت برش في القدواب جنب الزلط موصلين له عامود!!! وبعد دا يشحدوا من الحكومه وديوان الزكاة وما ادراك

!!!!!

شكراً يا زعيم ونخلي الناس تعلق عشان نطلع بي رؤية

[quote="انتصار حجازي"]

اعتصام شهرين ونصف فند شماعة الامكانيات

سلام يا سادة -رغم تحفظي على توقيت الموضوع لكن ماشى!دعوني افيدكم بأمر ربما لأني ملتقى اعراق والله لم يشأ ان يخلقني منصوريا صرفا فأمي جعلية وعاشت اسرة والدي الممتدة في منطقة الدامر كما اني - ولا ازايد في ذلك على احد- فمن الأقدار في حياتي ان عرفت الأسفار ومعايشة مختلف الأجناس داخل وخارج الوطن الحبيب لذا اقول لا تقسوا على انفسكم وان كانت فينا خصلة او خصلتين سالبتين فما زلنا نتميز على الكثيرين بالكثير وما نحن في الآخر الا بشر من ماء وطين -حكاية البحث والحسد - وهو ليس قرآن منزل طبعا- فيها ايضا مبالغة او لنقل تخصيص بحسب منطقة البحث ولو رفعنا نظرنا الى اعلى مع النيل وطأطأناه اسفل لوجدنا غيرنا يشكو من ذات الإحساس والذى اخشى ان يكون في معظمه مجرد احساس بلا اساس!سأذكر مثالا للتذكير وليس الترويح فلقد كنا (اسرتنا الصغيرة)نقيم في منطقة جودة شمال اعالي النيل ولما فتح مشروع كنانةجئنا مع الوالد نبتغي رزقا من الله ولما كانت المنطقة غير معدة جيدا فلقد تعرض الكامب الذي نزلنا فيه مع مختلف اجناس من السودان الكبير الي امطار هائلة اغرقت كل ثابت ومتحرك واصبحت الناس ضيوفا على الرحمن وبعد ايام كنا الأسرة الوحيدة التى تأتيها نجدة من اهلها حيث سير المناصير من مدن كوستي وربك القريبة عربة محملة بمثلما ذكر صاحب البوست العزيز ولم نكن نعرف منهم احد خلا والدنا الكريم والذي عرف بعضهم بالشبه فوقف هاتفا (ديل مناصير!)ولأننا ولدنا وفتحنا في مجتمع جعليين كنا نسأل الوالد (يعني شنو مناصيريا ابوي ؟)فيقول (اهلكم يا اولاد!)ومن يومها عرفنا الي جانب من نكون اننا ايضا مناصير!وعلمنا ايضا ان السبب وراء تلك النجدة مهندس منصوري كان يعمل في كنانة ويقيم في كوستي والتقى والدنا سابقا ولما سمع بغرق الكامب -قال للمناصير في كوستي (في منصوري غرقان بأولاده في كنانة )وكان ما كان وكان والذي لم يزل منقوشا في الذاكرة رغم مرور السنون وكانت قيمته بالنسبة لنا كأطفال وربما حتى لوالدنا اننا وحدنا بين جميع تلك الأجناس كان لنا اهل يسألون عنا !واختم بالقول انه وربما هناك (بفتح الهاء الجميلة كما تنطقونها)اسباب موضوعية لمن يراه البعض خللا ومع ذلك بدلا من إثارة الأمر على شاكلة جلد الذات دعونا نبدأ -انا اقترح جمع الصف اولا - مين يثني؟

انا

يا ود المدني
أظن المهندس هو الفكي محمد جيب الله. من شري في بدايات مشروع كنانة كان يعمل فيه
الشخص الثاني بروضو بدرجة مساعد مهندس او مهندس هو حسن محمد سعيد من شري خال زوجة اخوكم
المهندس الثالث برضو واحد من جزيرة دماج بالمناصير إسمو محمد عثمان ساعد برضو كان يعمل في كنانة قريب عضو المنتدى ابو مصطفى

وأنا كذلك ولقد دعوت الى ذلك مرارا ً... إن لم نوحد صفوفنا اليوم فمتى يكون ذلك ؟؟ فقط نريد بيان بالعمل ... مقترحات بناءة ... تتبعها خارطة طريق ولينادى حادينا عيال منصور أن نعالوا الى كلمة سواء فالمناصير فوق خلافاتنا _

للجميع تحياتى وودى ،،،

على بركة الله

ربنا يسوي الفيها خير...

على بركة الله يا ود البكري
ولا جف يراعك

اهو نحن في الاخر سوا

....بشدة

فلنطرق الحديد وهو ساخن اذا -اقترح قيام جسم اهلي للمناصير تحت اي مسمى كان -رأسه في الخرطوم واذرعه في الولايات وخارج البلاد وحيثما كان المناصير على البسيطة - على ان تكون له اهداف واضحة وجلية - ولنكن عمليين من الآن بطرح اسماء للجسم الأهلي - ارموا او اكون اول من يرمي

بسم الله نبداء

اين مقترحات الأسماء ؟!

اقترح اسم دار ود قمر تجمعنا

أولاً عذراً للأحباب الاعزاء الذين مروا علي هذا البوست نفضوا الغبار والله ماني قايل الناس تاني رجعوله بعد تلك الشهور.. وكلوا من الهباشة بت ابشعر... والتي جعلت أستاذنا الصحفي الكبير ود المدني يدلق كل هذا المداد بلغته العذبه والتي تقرأها كأنما تشرب من سلسبيل.. ومقترحه الذي قاد هامات أساتذتنا للتعليق

الحاج شرف الدين ان يكتبها كلمة واحدة لتقف دليلاً قوياً علي مراده ...

وأستاذنا الباشمهندس ود ابحنه والذي كل ما أقرأ له كلمة في هذا المنتدي وغيره (.يطلعني شبش)..علي قول عمنا حبيب الشري عندما يسمع طنبور عيسي حامد فكلامه طاعم وود بلد أصيل.. وعامر قلبه ديمة يطفي في النيران..

وأستاذنا القامة النفر والذي حينما أقرأ ما كتب أحس بعمق الكلمة وقوتها في رجل نعرف رجاحة عقله وقوة كلماته وغيرته علي أهله ..

وأعقبهم أستاذنا ود المناصير والذي يكفيه أنه عرف نفسه بقبيلتنا كلها وكتبها جملة قصيرة معبرة ناطقه بمراده ..

وعلقت أستاذتنا المجيده نجلاء بت زمراوي تلك الكاتبه الحاملة هم أهلها (خنساء المناصير )

ثم أعقبتهم أستاذتنا الرائعة انتصار بت محمد حجازي والتي سكبت مداداً قوياً وكلمات ناصعات

وأستاذنا عبد الواحد جبريل يذكرنا أن لا ننسي العمالقه (مصطفي سيد أحمد) ويعطف بشدة فمن أقوي الكتابات في هذا المنتدي هي ما كتبه يراعه

..ثم أستاذتنا ذات الاراء القويه أميره الحومري ..

ويزدان البوست بتوقيع ود الخال الدكتور خال أبرار فأنه حفيد جدنا حمدانه ود عمر القائل ..

ود الأريل الفي وادي كبنة

وجرينا جرينا نامن سال عرقنا

ويا جنا الناس عزلو الحلو من قصبنا ..

بتعليقاتكم ولد هذا البوست من جديد .... و تور فينا ضرس الكتابة

اصلو الهبارمة ديل.خانتهم ما بتنسدا بغيرهم.. وما بيعرفهم غير العاش معاهم.. جعلهم الله ذخراً لديار ود قمر

عفوا يا سادة مقترحي كان حول اسماء لأشخاص التي ستتولى بناء الجسم الأهلي للمناصير وليس اسم للجسم فذلك عمل تالي ومظهر لا يسبق الجوهر! وان كان الحماس قد دفع الناس لتقديم خطوة على اخرى فلا بأس وعن نفسي اقترح اسم (اعز ديار) لذلك الجسم ولقد ناقشت عمنا (عثمان المقدوم) الذي يزورني دوريا في الصحيفة حول المقترح ووافق بحماس وهذا الرجل مهموم جدا بقضايانا رغم العمر واعتلال الصحة وهذا الهم والإهتمام يدفعني لأن اطرحه لكم ايضا كمقترح للمشاركة في هذا العمل الكبير

يا بكري عن أذنك كدي زح شوية غادي !!!

ليه

يا ظهر الدين بكري زحً

ريدك في القليب مازال

ههههههههههههههههههه

اليومين ديل ضرسك قايم فيك ولا شنو ؟؟؟

يا ظهر الدين مروورك اسعدني.... والله المواضيع التي طرحتها في الفتره الماضيه في تقديري كلها مواضيع مفصليه (حلوة مفصليه دي ) ...مفاصل تربط قضايا المناصير والناس وقتها كانت خاضعه لاستقطاب حاد يا معانا يا مع الخيانه ولمان ما لقو محل يختوني فيهو وعرفو انه انا لا مع فلان ولا علان فقط انشر فكرتي وادافع عنها .. رجعو يقرأوا ماكتبت وتصلني عبر الايميل والتلفونات رسائل توضح ذلك..وكان البعض لا يعرف محمد حبيب فقط يشوف العنوان اذا ما لايق معاهو لا يقرأه.. وبعدين يا ظهر أنا لا أخجل من ثقافتي ولا اعتبر مخزون أهلي المعرفي عورة يجب ان تداري... وموجعني وهاري مصاريني تغيير عنوان البوست دا... جبروني الناس الخجلانين من كلام أهلن... لك ودي يا رائع

جزاك الله خير يامحمد حبيب علي الثقة الزايدة
لكن يبقالي خلونا لي زمنن موهو دا
وحقيقة انا مستمتع بما تكتب وبالزات الاسطايل القديم داك وشخصيا فخور بيهو كتيييييييييييييييير