قصائد متفرقه

واى انا الملدوغ ومالاقى حواى
واى انا المكسور وملاقى لى كواى
القرين ديس الخوى الزاغ فيو نواى
وجعك بى هنا ويخفسنى بى جاى
......................
ينوم مالاى انا المن امو مفرود
ينوم مالاى انا الفى عينو مترود
ينوم مالاى انا السقد البرى الدود
ينوم مالاى انا التلفونو مجبود
............
يامسيكه البارى الجروف
السقدو سوى الجنحين سيوف
عاقلن يرقص بالكتوف
ناس انا وناس الدار يشوف
نتهجك هجكا للخفوف
......
النهار فى الحاره واقفين
الجونا ناس الجنى مارقين
الخلو ناس طه مدسترين
الحلف قال مانى مارقين
الا جودى كبارة واقفين
......

خطير يانادر
تسلم

شكرا الخبير على المرور . ويديك العافية

يديك العافية يا نادر
والمركز ما جاب خبر؟؟

ها دى الشوره ياصالح الغلبنى دليلا

الاخ نادر لك تحياتى وانت كل يوم تجيب لينا قصائد جميلة لكن ما قلت لى من هم شعراء هذه القصائد ولكن على ما اظن الاولى للسيد ود الحسين لانه معظم قصائده تبدأ بالواى ومنها واي انا المصرانى اتلوى
والثانية احتمال تكون لحمد ود ضقولى لانه ذكر كتير فى قصائده التلفون .والآخيرة احتمال لسليمان ود نصرالدين والله اعلم .
الاخ نادر قدر ما تقدر اجمع بعد داك تحديد الشعراء ساهل .

شكرا ابونا نورالهادى على المرور زى ماقلت النكتب وده المخوفنى اسى فى قصائد كتيرة لكن ماعارفين شعراها بالضبط لكن.
القصيده التانيه نقلا من عثمان سليمان حفيد سيد ودالحسين نسبه لى جدو .
اما الاخرتين سمعته فى تسجيل لى الرضى الحسن .
وهاك وديل كمان
ياقشيش النيل الغلق
وانطبق سلكو مع الورق
الكبير كان لحق انزلق
وصادفو العرق الموج كرق
ومره يغتس ومره يشرق
لومنى تانى ان باصر مرق
.............
فى ملم ام دومى الضحى
وقلت فى روضه الجدى
قلبى فارق وميتى كرعى
ياغزال الشام اصغى لى
ترعى سانى وتردى كربى
كين تعرسى رسلى لى
بس عمار فضيتك على
صبعا هو كبر ماتدورو .داير يعمرلها فضيته

ابداع والله يا نادر انت عارف انا كان عندى شريط للرضى وهو يقول الاشعار فى شك توبيت وضبعا الرضى تربطه علاقة حميمه بخالنا سلمان وكان كل يوم احد يبيت عندهم وكنا نسهر معه وهو يطربنا باشعاره وكانت بعض الاشعار لود نعوم على العموم انت اكتب وما تلاوز تحديد الشعراء ساهل القاسى الجمع .

الهادى اخوى انت زاتك ما عندك الكثير من الابداع بس تشبك فى الناس ابداع ابداع انت وينو ابداعك لا زلت اذكر القبل اتعوجلى دروبا شقيش امشى وتانى عاين النفس جنها وحاجات كتيرة زمن الزمن كان زين

ياقشيش النيل الغلق وانطبق سلكو مع الورق
الكبير كان لحق أنزلق وصادفو العرق الموج كرق
ومزه يغتس ومره يشرق لومني تاني ان باصر مرق

الله يستر ياالرشيد من حب الكبير او ما يعرق باالمراهقه المتأخره غايتو من الكلام اعلاه المباصره مافي ليها طريقه بعد الوقعه اخير الناس الكبار في أسوء الحالات يكتموه جو القلوب لكن نور الهادي في هولندا ما عنده مشكله زي قصه صاحبنا أفو في الصين ما داير ليه مباصره لانو ما سأل لكن ناس السودان وناس الخرطوم اخير من مجتمع المناصير ماهو مسأله التقليد وقتل الاحاسيس تولد مثل هذه الابداعات عند الناس المرهفين ومحبي الجمال بغض النظر عن عامل السن شكرا الابن نور الهادي

شكرا هيثم ونرالهادى وهندسه والرشيد على المرور وهاكم
انا انجلح ياخوانى اول ماتختاى
والله لى وهندى اقوم اركبلى هواى
شان يدينى عودا لى جنا الصيد يبقى سهاى
الفطيم عنز الخلاء الماحاشا راعاى
انا اكان قادر الصبر ماقلت واى وار
ياعبليج الدرو الفوقو المى نوناى
البشيل براقو نامن قامو للشاى
..وساناق قال
الصبر كلو اقدرو لكن فى البنات لا
والشيب عقل وانا نيتى تابه .
استغرب يشيل من السبيب اسود ويجب لى ابيض بتل ده
وبعدين يانورالهادى عندو صوت رهيب وطريقه متفرده فى الدوبيت منتظر واحد واعدى بى تسجيل ليهو .

يا نادر غني العتامير دا جبتو من وين وعنز الخلا الما حادا راعاي دي عجيبه بلحيل...
عندما كبر شاعرنا وكان صيادا في صباه أدي بندقيته لي نسيبه اب امني زوج ابنته الجاز وكان كل ما يجي اب امني للبيت بتو الجاز تجيبلو لحم الغزال مع الشاي وعادة العربان أكل اللحمة مع الشاي التقيل.. مره اب امني جاب الغزال لكن ابي يدي نسيبه منها- الصباح مر علي بتو الجاز قالها دحين اب امني ما ضرب غزال شي قالتو ضرب واعقد اللديك لحيمات فعرف ان نسيبه ما عاوز يديه فقال

أجاد مرسالي شد الدومتو أمباز
واروح عنز الخلا الماحادا جزاز
وأضربها محل اللامه تنحاز
أرد لي اب امني دينه واشبع الجاز
وتقبل مروري

شكرا محمد حبيب ويديك العافيه ودتومامى قال
ياوداختى خالك دابو نجض نيو
وشاف قشيش صوباالخلاوى الحاجرو صيو
من الشوتيبه ينترد جديو
الخلا قلبى شريحه ينالب حديو
السمح رادو الله انا الشين مالى بيو
اليروح ناس امو يسرح ويردى ميو
والله يخلو على الراب يندفق ريو

جدنا عبد القادر الهبيرمي في عرس عمنا يس بشير في جوراء بعد الناس شبعوا لحم وشربوا البقنيي (وكان أحمد عمر الرباطابي رحمه الله جا من البحر عشان يغني فيه) بقي جدنا عبد القادر يغني براهو

واي انا اللادغاني ام جنيب
واهلي حاوشين العنقريب
فيها أموت فيها أصبح كعيب

جدنا حسن الهبيرمي صاحب (الكومر) الذي غني له ابراهيم ود جني قال
أب خفيفات الما قرم
كل يوم أصبح لي في هم
من مشيريبه علي أب سلم

ابداع والله يامحمد فيها اموت فبها اصبح كعيب افتش فيها من بدرى خلاص تراك جبته .يديك العافيه
ياقشيش ارض العفا الفوقو المى يومات
البرقو شلب شلب للشرقه ما بات
البشيل من ام حوايه على الرقيقات
الصبر حار والفراق مريازريره البمرور فات
البلبسولك رسمى نظار المحطات
البضربولو التلافين والائشارات
قال لى رشرش عينه ماخود بالمقاسات
ةالله زى حطب السلك عند الملفات

الاعراب لهم وصف عجيب لمان يتبسطوا والخريف يجي والتبس يسوي (المشع) والغرز يخدر للحمير والسلم ينقر للبل

سنيناتك سنينات البكر والشباب دابن مجدات
والعكش نجم العصي لللعيني قالعات
والوجيه قمار رجب كت يبقي سبعات

قال يمدح جمله
اب عنفه البسلم سيدو بى ساقيو
حرت الفنقه كضاب البقيس الفيو
حس خاويهو تعالا يسيل ميو
وقال ياقشيش اب سيح وام سرح
المطرو سوت كتح القمح
يالمبنى كفيلو انطرح
اناغلبى شن بديك ياسمح
شوف الوصف فى المطرو سوت كتح القمح

الاخ هيثم شكرا علي المرور القلب ان يقي اخضر هناك علامات حمراء وانت اكثر زول عارف البنت في الجامعه وهناك أمور اخري اخير نستفيد من الطاقه في البحث المعلوماتي والمتابعه لقضيه المناصير
ماهو برضو حب وحب اسمي لان نتائجه تنعكس ايجابيا علي عدد كبير وعلي مستقبل اجيال قادمه وحب الجمال نحوله الي حب الطبيعه ونجتهد لزرع الجمال في النفوس

جدنا عمر الهبيرمي زعل من زوجته الحاجي بت شعوري شديد وركب وقالها أنا ماشي لي امي في التلاتاء وما في زول سأل فيه مشي قيل في دومة الضان والعصير جا نازل البحر راجع (وطبعا الشعوره كلهم شعراء وما قدر عليهم الا عمنا ابراهيم ود جني رحمه الله والد ابن الخاله نصر الله ابراهيم المدير المالي لشركه البرجوب) فقال أحدهم

الفقير غلدله المداد
وبقت لك بلود ناس امك بعاد
والبلد سدت لك سواد
شربت النقعات جاها صاد

شكرا محمد حبيب قال
يالقشيش الضله الهرع
الفوقو وابل العينى انتبع
السيلو من سيح لى سبح يقع
خاف ياقليب سويتلك بدع
كل مااكسيك هدمك يقع
انا شفته والشوف مانفع
الا زاد الجرحات وجع
تحياتى

كم حدينابك بكارا نايبك بقول سيك
وكم بشرنابك فوق بنات وكم هزينابك دلاليك
يا الكعدور كرعينك بقن ركاريك
بقيت عكاز عشر ساكت نهز فيك

شكرا محمد حبيب
ختيت سرجى فوق ضهر البخيت واتوعه
وكرغرزو جاريت سيرو نامن نعه
قشيش الدورن قالن فهيدن رعه
بسوقك يوم على ام ضحكا بسم ماقعه

شكرا يا نادر يا رائع ومزيدا من الإبداع ..
و يا محمد حبيب خليت القرآن وقلبت غنا ؟
يا اخي ما ترفع لينا تلاوة عطرة بصوتك الجميل داك .

كمدوج ام لجام بقي في نميم وغناوي
عربا ضيفها يصبح في الحديده يلاوي
لي جبد النميم شن جابه كان مي بلاوي
ما عارفانا قوما جردها الدقناوي

لك التحيه يا ود المناصير وما زال بالصوت نداوة ولكن ساعه بساعه فان الانصار يعجبهم اللهو والغريبه يا ود المناصير حتي مناصير العراق يعجبهم شعر الباديه والمجادعات غايتو شئ كدي جاري في دمنا لك شكري

استمتعت كثيرا و انا امر على هذا البوست الجميل
شكرا لكم جميعا و انتم تتحفوننا بهذا الشعر الجميل
وواصلوا بارك الله فيكم

ثمارن شفتو فى تسنى
عفيف ومردفلو الرى
انا العانيتو من عينيعو ماهو شوى
اصعب مايكون الحال ده مره على
اناقبيل مكوكو وتانى خلفو الكى

نادر أها جينا للتصويب
الأبيات دي تمامتا كالآتي.... وهي يرقص فيها العرب على أنغام الجابودي
ترقص البنورة ناس كتلونه واقفات
يادي ناس باريني فوق الجفني عاقلات
إنت فاطرك غرة اللخد المكافات
والعلى أركان الحرب مكناتو جارات

ياقشيش ارض العفا الفوقو المى يومات
البرقو شلب شلب للشرقه ما بات
البشيل من ام حوايه على الرقيقات
الصبر حار والفراق مريازريره البمرور فات
البلبسولك رسمى نظار المحطات
البضربولو التلافين والائشارات
قال لى رشرش عينه ماخود بالمقاسات
ةالله زى حطب السلك عند الملفات
..................
لاحظ الثقافة الجيدة للمناصير
لاحظ كلمة أركانحرب التي لايعرف معظم الناس لليوم معناها

ايوه كده يااستاذ الله يديك العافية . كدى عاين للباقات تمام والله فيهن لخبته.

المناصير لهم رؤيه عجيبه يا باشمهندس لاحظ عرب في الخلاء وواحد جمله وحل في الطين جا يشرب في الغدير وكان جد السادة الضروسة الهسع عاملين خلاوي علي نهر عطبره ديل فوق الغدير يسقي في غنمه وقال له يا زول تعال ارفع معاي الجمل دا وصهين منه ونادي الحريم الفوق الغدير وعادة عربان المناصير يسموا الابل والبهائم مثلا كان معوز امي من اسمائهن غرير - تليع اللبن-بريق -الرب يجودألخ..أها صاحبنا دا جمله اسمه (البريق شلع) الملاحظ كل الشعراء يندهون ويستغيثون بالاولياء المحليين اما صاحبنا فقد اسثغاث بأهل البقيع مباشرة
فانشد قائلا
ناده الصالحين الفي شروق ناس مكة
البريق شلع من الوكار ينفكه
ود ضريص أخوي أخير منك حريم الدكة

ولكم شكري

الرشيد طه كتب:الهادى اخوى انت زاتك ما عندك الكثير من الابداع بس تشبك فى الناس ابداع ابداع انت وينو ابداعك لا زلت اذكر القبل اتعوجلى دروبا شقيش امشى وتانى عاين النفس جنها وحاجات كتيرة زمن الزمن كان زين

اخونا الكاشف انت كلامى ده ما شوفتو ولا عملت نائم

شكرا النادر .شكرا الجميع .
وين غزال بربر ياصلاح
مالا نفرت وابت المراح
اللبيب بالليله ماارتاح
بيه تسع وتسعين جراح
داك يبره وده يزيد فتاح .
يانادر ده سمعتها منك مره حدثنا عتها .

شكرا المتداخلين .
جات وزينى فارى جناحه
من المويه سنت براحه
وقال بابكر ودالضكير
دبلتا مفروده قبل الغيبه ترجم
يادويسه اترم القبل المهدم
انا تومى فره جناحو لاقى رفيقو سلم

........................ز

عمنا الرضي الحسن قال:

وين غزال بربر ياصلاح
مالا نفرت وابت المراح
اللبيب بالليله ما ارتاح
بيو تسع وتسعيين جراح
داكه يبره وده يزيد فتاح
لاتواخذوه الشعرا المزاح
السمح مخلوق من سماح

اولا: غيابي عن المنتدي لاسباب مني واسباب من المنتدي فقد حاولت الدخول عدة مرات فلم استطع وقلت الجماعة ديل عملو العملوه مناصير الشارقة مع الكباني !!!
ثانيا :عند دخولي المنتدى فوجئت بالخبر الحزين انتقال والد الاخ خالد عابدين الى دار البقاء (مشى قدامنا ) تعازينا الحارة للسيد المدير فقد ملك قلوب المناصير ..
ثالثا: يا خالد ان عمنا ابراهيم ود جني رجلا يتنفس شعرا - ذكرت في مكان اخر من هذا المنتدي أن الهبارمه يسمون أبناء بناتهم المتزوجات من خارج الهبارمه بأسماء البنات فيقولون أولاد جني لأولاد محمد ود جبرين وأولاد فاطني للحليباب وأولاد مريم للبكوره - فقد جاء في اخر ايامه مستشفيا
وقد زرته في منزل أخينا نصر الله فسالته عن ابن أخيه عبد الله أحمد محمد جبريل فقد تزوج وذهب بزوجته الي واو فسألته عن خبره فأجاب :
ضرب بها بلد العبيد
لا خبر لا جواب يفيد
لاحظ سرعة البديهه .... وسوف أذكر ثلاثة نمازج في المدح والهجاء والوصف
أولا المدح :
حبوبتنا بنت كرم الله والدة أولاد الهبيرمي بشير وخلف الله وسليمان والطيب وعبد القادر وعمر وحسن
كانت مريضة بالرباطاب منطقة السبيل غرب أبو هشيم وكان أولادها معها ولما طال مرضها سافر سليمان الي المناصير وقال لهم امي دي لو ماتت ما تدفنوها هني جيبوها لي ندفنها في دومة الضان وبعد مدة من سفره ماتت فحملوها علي جمل وسارو بجمالهم ولما رأي جدنا حسن الهبيرمي السير بطيئا نزل الجنازة وحملها علي بعيره (الجنازة بصفحة ويعدلوها بتراب بالصفحة الاخري) وتحرك سريعا فسبقهم فوصل الجماميع صباحا وهم وصلو بعد العصر فقال ابراهيم ود جني في جمل خاله حسن

الات الهبارمة الفوقن القول
الفي الزمن الصعب صبحها بالربنطول
مشيك الكومر الاشرلك الصول
العند الخال حسن في قنة أبسول
ما بجيبن ميسو ان كان جن من الجول

الجول هي منطقة بالقرب من الباوقة اي انهم لايستطيعو اللحاق به ولو كانت نقطة الانطلاق من الجول ...و ظاهر تشبيهه للجمل بالكومر...
اما قوله في الزمن الصعب صبحها بالربنطول فقد ذكرت في هذا المنتدي سابقا جزء منها وسوف أذكر تفاصيلها مرات أخر انشاءالله

ثانيا: الهجاء
عند ما هجا الشعوره جدنا عبد الخالق استغاث بابن أخته ابراهيم ود جني فقال عمنا ابراهيم :

دا البوم الكرت دايرين نزره
فيهن الصبرة البي تلم الزق تصره
وفيهن ناس العز غرير لا شحم لا لبنا تدره
تبلبص للتيس ساكت تضره

فأتوا معتذرين

ثالثا: الوصف

من عادة الاعراب ان ينزلوا في طرف الوادي في القلعة بالقرب من شجرة ظليلة لاستخدام ظلها نهارا.. وكانت هناك امرأة يأتيها الر جال ..وكان القمر في نص السماء فأتي محجوب من الرجيلاب وحينما أراد الدخول سمع صوتا بالداخل فلبد في طرف البيت وجاء عبد الله ود العريبي ولما قرب شاهد حركة محجوب في طرف البيت ولم يتبينها ودخل تحت الشجرة حتي لا يري وجاء عمنا محمد بشير وطوالي علي البيت ودخل تووش فقال فيهم عمنا ابراهيم ود جني في قافية تقيلة (تشديد الياء وبعدها اللام):

حليل زينوب جدي أمات سوييل
ودويسه ألفوق رويس أبدوم منييل
وبخيتي العن عمر ما شد عييل
يا خدار الصيف ما بدوك قلييل
ويا شاي الصباح العليك الجوف يمييل
محجوب متل كساب همييل
وعمي العبدول في ضل القمار مقييل
ود خالي الحمود عطشان مطول
فقد وصف بخيتي بانها شريفة مثل جمل عمر ود رباح فقد قيل انه ما حمل علي ظهره امراة.. اول ما تجي مرة تركب طوالي يقوم
وقد وصف محجوب بانه مثل الكلب متل كساب وكلب العرب دائما يرقد في صفحة البيت
وعمنا ابراهيم له مقدرة تحيرك في قص الاتر وتلك نحكي عنها لاحقا انشالله

ودمتم

مرحبا بك مجددا الاخ محمد--ومكانك كان شاغرا مع احترامى للجميع--
والخانة دى عندنا فيها اتنين اساسيين انت ونادر --ونادر اخدلو غييسة فى الدهب
اما الاشكال من المنتدى مثلك لاتغلق دونه الابواب والافقدنا المبدعين--
فمزيدا من الابداع----

الاخ الفاضل سليمان عقيد ..كيفنك..والله أنا زي ما قلت قبل دا المنتدي دا بالنسبه لي زي هبوب العافي ... ولمان نحنا وأنتم كنا نعافر في هذا المنتدي وعددنا لم يصل الخمسين بعد ..عرفناك غيورا علي تراث أهلك المناصير كل مرة تطرقلك باب نحن نتطفل عليك لمان عينا قوت ولقينا الدارة فاضي بقينا نبرج..وأنت مجهودك واضح في توثيق شعراء المناصير...(وبالمناسبة دي عندي قصيده للشاعر ود فضل ورد من الشاعر أبو القاسم يمكن أن تساعد في مسعاكم لردم الهوة بين المناصير)..أما ما دعاني لظني داك..في شبكة المناصير ..ولما كان عسكوري مشرفا دعاني للكتابه باعتبار أنني أمثل وجهة نظر أخري غير اللجنه وغير المحسوبين علي السد فوافقت وبدأت بسلسلة مقالات تحت عنوان (قضية المناصير ضبابية الرؤيا ووضوح الهدف) وعندما وصلت المقال الرابع وذكرت فيه محاسن بعض الذين أختلف معهم أنا ويحاربهم هو... أوقفني !!!!
ومن الدروس التي تعلمتها من تلك الواقعة..ان لا أتحدث في السياسة في منتدي يضم المناصير ولا أتدخل في الامر السياسي لقضية المناصير..وقريبات دي ...زي ما بقولو ناس الخرطوم...طلب مني والي الولايه الحالي (بحكم علاقته الوثيقة بي )أن أعد ورقة لحل قضية المناصير...لعلمه بالورقة التي أعددتها للصديق الطيب ابراهيم محمد خير والتي أصبحت أساسا فيما بعد لما يعرف في أدبيات المناصير( باتفاق قاعة الشارقة) فرفضت أن أدخل هذا الباب مرة أخري بحجة ان للمناصير مؤسساتهم الرسمية والشعبية التي يمكن ان يستشيرها..لذلك تجدني يا سليمان يا أخوي أهرب للكتابه الاجتماعيه وأنا أعترف بأنني تلميذ مبتدئ ومنكم نتعلم وجزاك الله في الدارين يا ود عقيد قلت في كلامن غلاد بلحيل
يا أسد الكدادة الفي خلاك رزم
ومابتحلف تقول غير استريح حرم
لك شكري ومازال شوال التمر الجابو لي لوريكن ما كمل الله يخدر ضراعكن

شكرا اخوى محمد---
والله انا ذاتى وصلت لى قناعة من البارح وجاى--حاولت اسوق (الشمار )مع الناس ديك بى غادى ولقيتم يسوى فى التيرن ويرن--حد ما اكتب ووضح نضمى الفى الراس فى الراس--ودحين داير ارجع واصد لى سياقة الصيف واخلى (الشمار) --
وتدونى قطعة معاكم ---وسياقة الشمار اخرتنا كتير--لانو كان عندنا مشاريع توثيقية كبيرة لعدد من الباحثين فى التراث وكمان من غير المناصر وفى وزارة الثقافة والاعلام وغيرها--لكن كل ما امر على الناس بى هنالك روحى تحرقنى اقوم احفر معاهم --ونقوم نتكاجر لانه عندهم اتجاه واحد وراى ثابت لايتغير او يلين مهما كانت مصلحة البلد ---
عشان كدى بقالى اخير اسلك طريقك انتهج اسلوبك فى التحول--
وزى ماقال ودبادى فى معاناته للمدينة وكلية الطب--فى رسالة لوالدته-
جات سايقانى حرة جوف وانا اتحديت مجالا مو مجالى
سلاطين العلم يايمة ينسوا العشرة فى فد يوم يدفروك بره زى دفر الطبالى
وخايف من اجيك مرفود وفوق اضنى ملويات حبالى
وهوالقائل:
دا مو كتير على ولدا مربى على ضفاف النيل
وكت ولدوه دفنوا ابواتو سرتو فى مراكز الخيل
سواقى تسوق تلوت الليل
ونخلو متكى شايل العجوة والقنديل
دحين يامحمد -
اخير اصد لى محلى القبيل
واتكرف النسام العليل
فى ونسة سمحى بلحيل
وانا مالى ومال ناس عمر بليل
----لك تحياتى مجددا ولى عوده ان بقى فى العمر مهلى-------

وخايف من اجيك مرفود وفوق اضنى ملويات حبالى

والله يا سلمان دي الخايفين منها كلنا وحقوا ما في حاجي تشغلك من التوثيق

قال قولو للحداد ده دقلك قيد لى اخوك
والله تم معروفك الجنوى بجوكه
سبى من قصيبه الهنبروكه
اللعب بى قلبى تدقتبو الدلوكه

قال قولو للحداد ده دقلك قيد لى اخوك
والله تم معروفك الجنوى بجوكه
سبى من قصيبه الهنبروكه
اللعب بى قلبى تدقتبو الدلوكه

نادر يارائع ليك الشكر مطبوق
عمنا سليم ود حسن الهبيرمي عنده بكره عاجباهو بلحيل وكانت في باشي في النقعات (ومن عادة الاعراب ان لا يكندرواالا بالجمل الضكر)ولكن شداها بالكور والفروة والدير المزركش فقال فيها احد الشعورة مادحا:

يوم الباشي في النقعات سليم شداها

وكتين بالرساني قناها

زى ال بالمطار لفاها

ودي القمر الصناعي براها

صاروخ روسيا ما ساواها

شكرا ود هبرم وبركح الجينا بعد غيبه
الحداد قال
القلب واهمو من فرقت حبيبو
والقلب واشوقو من البندى طيبو
ياحليلو الذكرو مابقدر اجيبو
الاامتل فيهو بى قلبى واسيبو
ياضهيبه الكافر العبد الصليبو
هو منى مرتاح وانا مرضان مبتليبو

شكرا شكرا والله كلام
عمنا بابكر ود مقام ترك الدراسة وهو صغير أبوهو وداهو الخلا مع العرب فقال في وصف حالهم:
أنا اتسجل مع الأعراب
فروشي (هلس )وضلي (حقاب)
(هوهن) في (الفرز) و(الباب)
دابن في ناقتي( سديد) وجملي انا( ناب)
فقد وصف طريقة حياتهم وصف دقيق فهم يفترشون الهلس وظلهم الصخرة وكل هواهم في وسم الابل فبعضهم وسمه الفرز وبعضهم الباب أما سديس وناب فهي سن الابل
اذا لم يكن الشرح وافيا يمكن الاستعانة بصديق!!!
مع مودتي

يا ياقـــوتة الحضري الحضارمي زبونك
عازة وغالية وطلعن في الترية تمونك
عالية أرداف وضامرة هاف وقارن نونك
انكال بالجمــــال لامن دفق ماعونك
يا تمرة كــريمة القـــاد سبيط عرجوك
ذاكي فمـــك من غير سواك معجوك
ربي كســـاك بالهيبة وصــدر قانـــونك
مهوس بيك وذنبي عليك بقيت مجنونك

ابداع يا نادر ومحمد حبيب