قصائد فى الهجرة

دى ماها بلد
حلفت يمين دى ماها بلد
حواشتك فى البطانه بعيد متل نصب الحصان وابعد
وناسا فيها جارى تملى لاتسمع سلام لارد
وفاقدى العطف والتحنان وقلوبها من الحديدى اشد
ودى الدينها فى الدكان دى سنتين دينها ما اسدد
وهناك سيد اللبن والفول وتانى الجمرة والجزارتشوفوتملى يتلبد
وتتوالى الهموم فى الراس بعد مافوق سريرو رقد
يحاور كيف يحل دينو نص الليل قعد صنقر
سموما بالنهار لفاحة وبالليل تانى جاتو بعوضة حس جنحيها ليهو رعد
يساهر طرفو طول الليل والنوم من سريرو شرد
خضارو السايقو فدانين عطشان ما ختا التقند
يجيك كاش الحمار عجلان تقول والله زولى فقد
من يوم ما وصل انا فيها ما حسيت لى يوم بى سعد
لا حس القمارى يقوقى لاحس البلوم غرد
اخيرلك بلدك الموروثة لوتانى زاد اسامة السد
اخير لك بى بليله هناك ومرة سليقة من دبسى ومرة كلد
وتسعد بى حنان بلدك عزيزة وانت بيها فخورتقول للدنيا عندى بلد

مع المعذرة ان كانت هنالك اخطاء املائية او غير ذلك

عفوا هذه القصيدة للشاعر/ حسن جبريل وليس الدمرى

ونواصل لاحقا

قصيدة اخرى

قولى يا التوم اخرجنا كيف لى حياة الذل والهوان
وين نقبل وشقيش نروح والعدم لابسنو تيبان
والعطش ساكن فى البيوت والخلا الراجنو عطشان
والصغير يسرح من الجوع والكسيرى ملانى ضبان
والكبير شال همو ومرق يجرى زى الماسو شيطان
وراسو شغال طاحونة هواء فى مصيبتو الجاتو محنان
وما هو عارف نفسو لابس والله ساكى الدنيا حفيان
ويجى اخر الليل منتهى لابشوف لا سامعى الاضان
والكريعات ابت المشى والراس جايبلو دوشان
كلو فعل الجوع يارفيق اصلو قالوا زيادتو كفران
والسبب ديل نحنا يا التوم ما قعدنا مسكنا المكان
يوم نبحت كلاب السد كانت لحظة التوهان
كلاب كان جايبا الفرعون وحارسا الهامان
وكت كتر النباح طشينا جينا على خلا امدرمان
وبهرتنا الكهارب عاد وكم بيت فى الخلا الصنان
ولاقتنا الحقيقة المرة كانت مندسى فى الحيطان
ناس قعدت تعزى وتبكى وناس فرحانى بالديوان
وقاعدين فى الديوان ولادا نحلف تقول حيران
واتفقدت معانى الخوة ضاعت كلمة الجيران
والكرم القبيل موروث ودر من جملة الودران
والقيم الزمان حايطانه رحلت سكنت الوديان
واتفشى الكضب بيناتنا اصبح لى بعض عنوان


مع المعذرة ان كانت هنالك اخطاء املائية اوغير ذلك
عفوا هذه القصيدة للشاعر /حسن جبريل وليس الدمرى