مجادعات الشاعر والدميرى

ولما علم ابن عمتى النذير قميرى بقصيدة الشاعر ارسل مشتكيا الى الاستاذ/العبيد طه الشاعر(ابن اخ الشاعر) والى اخواله فى كير ودبلى والى والدة الشاعر فى بسوى :ـــ

داير اروح لى ضابط الامن
ولى عبيد طه انا بطمن
واظنو عمك داير يجن
لاعتود لاطاسة سمن
لادخن لاقلبا يحن
نحن كم سوينا تفنين
من ملابس ومن صوابين
وكلو راح فات داك ياالخزين
بى نجددوا ليك عاد دحين
كان تبطل داك الرطين
تشهد الدبة على الكسا
وتشهد الداخلة بنفسها
كم عزومات انجزتها
وكم مشاكل حلحلتها

يا العبيد القول دا مثبوت
ونحن كم قدمنا السبوت
بس جزانا تراهو نبوت
بى نفوتا دحين البيوت
ليه يكون صافينا مصيوت
مويه عكره وريحة الحوت

داير اروح لاخوالى فى الكير
امشى لى سلمان ابو السرير
وطه يسلم لينا اب جدير
وامشى بسوى ادق النفير
داير ام الشاعر الكبير
وتبقى قامت منو السرير
وترعى فى النعجات العصير
واحكى اقول ليها انشاء الله خير
شاكى من شاعر المناصير
شوفى شن سوالو النذير
مره يرميهو من الحمير
ومرة يعملوا للسيف جفير
نحن كم قدمنا الكتير
والمكضب فى المناصير
يسأل القاضى أوالبشير
كان بقيت عشمان يا امير
والله ابشر ليا بالخير
بى تزاز العمى حدير
والحرير تصقعلو جرجير
وكله اصله عليك مو كتير
والعشم حبلا مستدير
وبرضو عشمان فيك النذير
راجى من خالوكتير كتير
كان دخن كان شىء للفطير
او حمل مو طالب بعير
لومى لى عثمان الصغير
وشكرى لى جار ودالحفير
يا العصم خالك فى الهجير
اصلو من عمك مستجير
كين وقف ود خالتى الدمير
ما تسووا الصفقة دنقير


مع المعذرة ان كانت هنالك اخطاء املائية او غير ذلك

رد الاستاذ/ ابراهيم الشاعر على قصيدة النذيرقميرى مستنكرا فيها شكوته على ابن اخيه دون اخوته :ـــ
يا المهندس جنيت اظن
وداير السلسل فيك يرن
الفريق تشكو على الامن
بى يقوم يزعل يكلبن
وما بمرقك منو السجن
انت كين غائب بالسنين
ما تعدو مع الكادحين
وتدو عمى انكان ضراعين
ما نكرت انا للصوابين
شلتهن فى خرجى اتنين
اما قولى الهدوم وين

وكم سنه الدبة القلتها
وحتى للداخلة ذكرتها
والعزومات عددتها
داك عهدا فات وانتهى
وللجديد خالك اشتهى

اما بت كرباش يا امير
كين حكيت لها لومى الاخير
حمرت فى عينى حمير
وقالت انت وليدا صغير
ليش بتتعزر للنذير
ان بقيت داير للحرير
تلقى راقد فوق الدمير
التسوى صنقيع ودنقير
قدلة زى ملك السنانير
انت معروف عند النمير
ليش بتتعزر للنذير
قتلها الزول داك صباح خير
وراجى من خيراتو الكتير
انت يا الدابى اب غراغير
جنبو ما بترعى امان بعير
جدولك حدرتو حدير
وجارى زى بابور القرير
غلب القراع القدير
وانبهل طق التناقير
وفوقو هبهب للحوت بدير
تجينا انت انشاءالله بالخير
قولوا للشماتة والصير
امانى ما اتحشرتو حشير
النذير جايبلو تقرير
وخالو دا يكسى كسا الوزير
واللا كسوة فهد الامير
جيتو من عن راس الجزير
يضرب الكركون صفافير
القمح يرجاك مطامير
والسمن زى موية الغدير
ونجتمع قدام القمير
وكل زول كباية عصير
ونتبسط والضحكة قرقير

مع المذرة ان كانت هنالك اخطاء املائية اوغير ذلك

حياك الله رائعنا عباس ... وااااااا صل التوثيق ... مجادعات رائعة لقامات سامقة ... أثرت مجتمعنا بالأدب الرفيع والإرث القيم .... نسأل الله أن يغفر ويرحم موتانا ويحفظ ويرعى أحيائنا _
لك تحياتى وودى ،،،

متابعين المجادعات
واصل
تسلم عباس

استاذنا عباس لك التحية والتقدير وماشاء الله الشعر جميل واقترح أن يتبعه نوع من الشرح لبعض العبارات والكلمات . ما كل الناس تعرف بت كرباش وما كل الناس تعرف ود الحفير وبالشرح يكتمل التوثيق وتوضح الصورة وتعم الفائدة .

وبعدين ياعباس ده كنوز وثروة ضخمة والذي يملك مثل هذه الكنوز ما يبعزقها مرة واحدة شوية شوية وكل يوم أدي الناس جرعة لتضعهم في موضع المشتاقين والمتلهفين لمثل هذه الدرر المنصورية الشروية . كانت فعلا ساحة نزيهة للمجادعة من استاذنا الكبير الذي لا ننسى فضله استاذنا إبراهيم الشاعر وقريبي وجاري الدميري. تسلم لينا عباس.

تشكر أخى عباس على هذا النشر لروائع زمن مضى مع من مضى من هؤلاء الأفذاذ
المرحوم والمربى الكبير إبراهيم الشاعر والمرحوم أحمد الدميرى الذى له من الشعر الكثير
وفد رأيت عنده كراسه فيها الكثير من شعره ، رحمهما الله بواسع رحمته ...

روائع

بعد اذنك عباس وتحيته على الروائع
بت كرباش هي والدة ابراهيم الشاعر
اما الخبير جار الشاعر ببسوي ورجل كبير في السن انذاك
(0اذكره )
اما ود الحفير هو صالح يزوره الناس زمان بشري ان صح كلامي




9

مشكورين الجميع على المرور
وما مروركم هذا الا الشمعة المضيئة التى تلهب حماسنا
الاخت اميرة مشكورة على المداخلة السابقة بان جدعتى معانا جدعة جدعتين وكانت فى موضعها الصحيح
وهذا ما اراده الدكتور مصباح وسناتى اليه فى نهاية الحلقات

قمة الابداااااع
واصل يا عباس
متابعين وفى قمة الاستمتاع

رد الشاعر على الاعتذار رقم (3):ــــــ

البحر حمر واتكرب
خلا هدامو يسوى رب
موجو بالزمارة جقلب
جاب معاهو القش والحطب
قام رجع كين بطل السبب
دابه مويتو صفت وانشرب
تانى انا ان قت فوقك كعب
بينى بينك شدرة نسب
الا مرة الزول بيضهب
وفى الضهاب فى واحدا صعب
صاحبو ما بمرق منو تب
وما بتقول الزول اتغلب
الا ساكت طايع الادب
احترم لى خالو وحسب
كين عرف غلطك وانسحب
الكلام الفات مشطب
ولى اعتذارك الف مرحب
غير حكم لبينا الطلب
كيف يكون البينا اتخرب
ومن قديم الخال قالوا اب


مع المعذرة ان كانت هنالك اخطاء املائية او غير ذلك

روائع من أدب المناصير الشعبي ابننا عباس لك التحية والتقدير واستمر في جمع هذا التراث وألحق الناس الكبار قبل فوات الأوان واجمع ما بقي منه وعليك بابن الأخت الشاعر عثمان سلمان وشوي خرم على استاذك الدمري و ما تنسى خالك سليمان وكمان الكدم عنده الكثير وما تنسى استاذك سليمان توم واستاذ الكل محمد المنصوري بالمكابراب و....... والقائمة تطول وبعدين ممكن نصنفه معاك نلم شعر المدح براه وشعر الهجاء براه وما ننسى شعر الغزل رغم قلته بالمناصير وربنا يوفقك ويشد من أزرك.

ماشاء الله أميرة شرحت بعض الألفاظ الغامضة وللمعلومية ود الحفير ( حسب ما شفناه زمان هو صالح أبو بيان في قرية الدمورة وهي قرية الشاعر الدميري ) وأكرر شكري لك استاذنا عباس.

شكرا المرور الكرام
مصباح- نور الهادى - سامى السامى

الاخ سامى مشكور بتوفيرك لنا جهد الرد بالمعلومة على السفير نورالهادى

ونواصل

الشيخ عباس كل المجادعات وجدت المتابعة والآن قرأها أكثر من 200 شخص ولكن أنت عارف الناس تقرأ ولا تقول عوافى , واصل والجميع متابعين .وشكرا لك يا شيخ وللأخ سامى فى التوضيح بخصوص الجمير والظاهر الواحد بدأ يمسح , والذاد الطين بلة أنا كنت أشاهد عوض فى العصير دائما مع حبوبتنا بت حسب الله يجلسون على سرائر أمام الدكان يتونسون . وكنت حينها أنا رئيس لجنة الطعام للداخلية فى مرحلة الأساس والخال القميرى كان المتعهد ودائما ما كنت أزوره بهذا الخصوص .ولذلك تخيلت أن الجمير عوض .الحبيب سامى أتمنى أن تسأل الشيخ عباس عن سبب عدم الشيب ؟ وسأعود مرة أخرى لهذا الموضوع الرائع .

بالله شوف الكلام الجميل دا ---أناس عظماء لا يجود الزمان بمثلهم

تشكر شيخ عباس علي هذا المجهود الرائع

تكفى تعليقاتكم
نورالهادى
ودعون الله
ابراهيم حجازى
ابو مصطفى
مما يدلل على ان هذا المجهود قد جنيت ثماره
نسال الله ان يوفقنا بان ناتى بالجديد الذى يدهش الجميع
وان لايبخل بقول كلمة عوافى حتى نقدر ثما ماناتى به

تسلم عباس على التوثيق


ولى عودة
تحياتى
ابو مصطفى

تسلم الخال عباس على هذا المجهود الرائع والتوثيق والمجادعة الشيقة
انا كل ما اقراء واحدة اشتاق انو يكون فى رسالة تانية
وتسلم كتييير على المجهود الخرافي اللى بذلتو ودايما سباق بالخير ونحن نشكرك علي ذلك وشكرا

مشكور قريبنا عبدالدافع على المرور
رغم حداثة العهد بك هنا

تسلم يا عباس على هذا التوثيق الجميل من الاندثار ولك التحيه وجعلك الله من المحافظين على هذا التراث الجميل

مشكور ودقطر  على مرورك الجميل رغم تاخره

والله قمة الرؤعه والجمال رجعنا لزمن القديم