شاعر المناصير الأول على ود سلمان

ونحن نوثق للشعراء بالمنطقة لابد ان نفتح بوست للشاعر الكبير على ود سلمان وهو اكبر واشهر الشعراء بالمنطقة واسمه-على سلمان على العوض-لديه الكثير من الاشعارفى كل المجالات الغزل والمدح والهجاء وغيرها وهو شيخ الشعراء وقد استعان به العمدة فى حل بعض النزاعات المرتبطة بالهجاء.كما ان له الكثير فى البادية ومعاناته فى سنة البقارة عند وداعه لمنطقته وفى الشايقية وعند عوته- وكذلك المناظرة التى اوردها الطيب محمد الطيب مع الشاعر ودكمدكى -ومعظم اشعاره محفوظة لدى كثيرا من اهالى المنطقة-

اورد هنا بعض الابيات واناشد الجميع بان يشاركوا بما عندهم 0

1-فى رده على احد ساله عن حاله فقال:

اتنعما ان كان فيها انعام

واحمد الله روّح عمرى قدّام

مافيش حد ينال اعمار ابى سام-(يقصد سيدنا نوح
ويقول :

اتانا اخر زمن زاد القلوب حر

بكان ماتزرع الطيب يقوم شر (بكان تعنى مكان )

عرفناك يازمان الساعةعصّر

2-فى رده على الحاج عبودة وهو زميله فى الساقية وحوار دار بينهم فى ان الناس سافرت وجابت الحاجات الجميلة ولابسين الطواقى الحمر ونحنا قاعدين فى الساقى فقال الشاعر:

ياعبودة كان هزونا البتل ديل

نقيف بالنهار ومانرقد الليل

لقيت كسبا بلا ام قادوس هواويل (ام قادوس الساقية)

ست حيضان ولااردب شواويل

ندفن المات وللحى وصاصيل (وصاصيل –يصل ويزور الناس)

ننزل فى دقيس ننزل على النيل

جنوب الرحمة من ايات مكاييل

من الواحات تدق حتى الدقاقيل

نتونس مع ادريس ابو الفيل

سيبك من طواقى ومن مناديل



صل وسولك سبيلا ليهو شربوق (الشربوق اناء لشرب الماء)

ان مشيت فى سنجة الصعيد فوق

اصلو مابرزق الماهو مرزوق

رزقك رزقك ان سويت مشى الطير

رزقك رزقك ان سويت جرى الخيل

وان رح محل العيش بلا كيل (يقصد القضارف)

فى العندو الكتير وفى العندو قلّيل

واكرر مناشدة الجميع فى الجمع للشاعر الكبير واشكر الاخوان النذيرتاج السر وعثمان سلمان

اخي ود عقيد لك التحيه واظن تكمله البيتين
الشايقيي بلدا مو غالاتا
تمرق العيش بلا مارووق واطاطا
وناسن ديمي في دي الانبساطا
ويا نفسي في ويدك الخيط والخياطا

ويحكي انه سألوه السني دي البحر ما مشي (اي ما دمر وماؤه قليل ) فرد عليهم
لا لا ببل المريسي (اي كل الهم ان تتبلا المريسي) وناسا ديمي في دي الانبساطا ولكم شكري

داير انزل لكم كلام ود كمدكى فى المناظره
كان فى بيت الحاج قيلى جد النزير يس فى بهيه وكان ودكمدكى ضيف عندو فقال لهم اديهو اشئله اذا ماجاوبه مايغنى تانى تب تب
فكانت الاسئله.
ورنى عجب العجيب والزرع المابخيب والطفل المابشيب
والبحرم باليل ويحل بالنهار
والبحرم بالنهار ويخل بالليل
فقالو
حواء وادم عجب العجيب
والصلاه الزرع المابخيب
والكتاب طفلا مابشيب
والبحرم بالنهار شراب المويه فى رمضان
والبحرم بالليل طلوع عرفه يارمدان
بعد داك جات من تالا الرباطاب فى ود حرامت بان

ابن الأخت استاذنا سليمان عقيد لك التحية والعشرة مباركات وسلامة المعاك وربنا يكتب السلامة تأثرت جدا وسيكون لي اتصال معك اليوم. الذي تتحدث عنه هو الشاعر الكبير علي سلمان وأرجو ومن آداب البحث أن نكتب عنه مقدمه تعريفيه والله في بداية الأمر ما كنت أظنه أنه الشاعر الكبير إلا بعد أن قرأت قصته مع الحاج ودعبوده والحاج ود عبودة هو والد بنت الحاج والدة الاستاذ الكبير المنصوري وطبعا متزوج من جدتنا نسأل الله لهم الرحمة ونحب أن يأتينا الكثير عن هذا الشاعر وهذه ياسلمان مطمورة كبيرة عايزة عشرات البالات من الشولات لأن شعره غزير ورصين واستعن في ذلك بذريته ومن دربك ده روح على الجيلي واغشى الكدرو معاك.

الشكر للاخ سلمان والاخ نادر
اخى سلمان وجدتك موسوعه فيما تتلقى من شعر اجدادى
والذى يعبر عن تاريخنا التليد
ولك هذه من شعر على ودسلمان ان لم تخوننى الذاكرة

كرس ودعينه ماجقلب
وتمرعثمان هناك هبهب
طاع للملكى واتأدب

كما ذكرت فى موقع اخر شجعنى للكتابة فى هذه البوستات الاخ عباس –
واكتب هنا ماقاله شاعرنا الكبير فى ندهه للاولياء والصالحين-:
اب تيران أبوي يا المحن عتاق

ياشيخ ودحمتو ويابا وراق

وياودشمة من دار المحوس شاق
وياتاتيب دا جاركن خشمو نقناق

وسريع ودعيسى ابوى ادى ميثاق
انتونوركم ياالحواجقيل فى القلع باق
تلمونا الزمان قوداب وفراق
سالك ريدا فى شان زولى صاداق

بخاف من حبهن عذرا على حاق
ثم
يقول:

من الحواجنير غاشى ملفوف
ناده ود حمتو ونادهو مردوف
ياتا تيب داجاركن حالو مكشوف

سريع ود عيسى مالى الفيه مظروف
والتور ود حجازى الطرشو مشيوف
ورايح ود قنيب الحالو موقوف

وعلى مقرات وقف دقيقة شلوف

جات تيران دبر تتماشى زاحوف
يالصلاح جميع جيتكن لى فزع ماجيت محلوف
تلم الرايدو لى حاس قلبى مرجوف

وانا اخير منى البعوم فى بردة الفوف
والحى فى العبوس بى يرا ويشوف

انا دا تحصل لى قصة جحا السوالو شادوف

شكرا اخى سلمان
ما اضفت من قصيد شى جميل ورائع يحكى عن تاريخنا وتراثنا المندثر عبر السنين
وجاء منتداكم هذا لينفض الغبار من حوله ولكن اقول لك عند التاكد من الكلمات بانها
لجدنا على الشاعر الكبير فلابد من اعادة كتابتها فى البوست الذى يخصه والمفتوح من قبل الريس
خالد وهو الان فارغ المحتوى فهلا جمعنا له ذلك
تحياتى بالكوم