الشاعر حمد ودضقولي

[quote="خالد عابدين
[/quote]
ده كلام سليم وصاح لك التحية خالد عابدين

أحاول هنا أن اعقد مقارنة بسيطة لاحظتها بين أشعار شاعرنا حمد ودضقولى وشاعر بربر إبراهيم ود الفراش لا أتطرق هنا للنشأة والبيئة ولكن من خلال الأشعار وبعض الأشياء والأوصاف التي تطرق لها الشاعران ، كذلك الثقافة العالية والعمل بالجندية –واكبر ارتباط واضح كان عشق حمد ود ضقولى لمحبوبته (حوضه ) وود الفراش لمحبوبته (الدون) وتشابه حال الشاعرين بعدم توفيقهم بالزواج والاختلاف بين الأسر سواء كان من أسرة الشاعر أو أسرة المحبوبة – وكان ذلك للنظرة الاجتماعية وخاصة لشاعرنا حمد ود ضقولى-كما تشابه شعرهما بذكر البادية ووصف الخضار والقش وغيره إلا ان شعر والفراش تميز أكثر بوصف الجمال والرحلات والمأموريات التي يقوم بها بحكم عمله فى الجندية وكان الاتصال بالجمال-
أما الملاحظة الأخرى هى إن الشاعرين قالا أفضل وابلغ أنواع الشعر الغزلي كل في محبوبته وبعد الاختلاف تحول الأمر لهجاء ووصف ذميم ولاذع – أورد هنا بعض النماذج لماذكرته:
يقول حمد :
حوضة حوضة الكوثر الفى الجنة ممتد استغفر الله العظيم انأ لانى كافر ولانى مترد
ويقول أيضا:
حوضة حوض ناس على الكم شق عيدان
للبكر البكير( سيدو الله غضبان)
كم جنزر ملوك------(لااتذكر هذه الشطرة)
الشق إيوان كسرى صبح قصرو خربان
ياضهيبة الانجليز الحارسا الجان
بعد هذا الوصف والاببيات الجميلة يكون الهجا ء وقد أوردناه في منتدى اخر لاباس ان أضعه فى آخر الموضوع؛
أما ودالفراش ذكر فى محبوبته (الدون) الكثير اذكر منها:
صغير فى السن تنى وفى أصله جاهل
فطيمة الفوقن الضهراوى باهل (الضهراوى مطر وقت الظهيرة وغزير)
كتر للناس قسا وانا لى ساهل
وأيضا يقول :
كل ما أقول أنوم أخد لى هجعة
أحس بالليل كلاى يدينى وجعة
بعدنا من البلد ونجعنا نجعة
على البرّيب متين ياربى رجعة (البريب مفردها بريبة وهى الظبية الصغيرة)
ثم تغير الوضع وجاء الهجاء واتى بنفس قوة الغزل حيث يقول :
كم شوميت بين عقبة ونتيلة (شوميت أظنه تعنى انه اجتهد وتعب)
بريدك من زمن مددا طويلة
خسارة حبى فى الخادم الرزيلة
وأيضا:
لاتجالس الخدم ليهن تقرب
وتبقالن حبيب للمال تخرب
يقيدن سمعتك فد يوم تغرب
ولا تسال طبيب اسأل مجرب
واختم هنا بهجاء حمد لوالدة محبوبته بعد الاختلاف والتى ذكرتها فى موضع اخر انزلها هنا لتكملة الموضوع بالإضافة لجمع اى بيت شعر لشاعرنا حمد ود ضقولى
أمك الضبع وفى حنكو نايبين
أمك اكّالة الأمانات وتنكر الدين
أمك غدرت بى غدرة ناس ودسليطين (ويعنى سلاطين باشا)
المصلى وراء الخليفة وما أيد الدين
نط جاب الانجليز وألمانيا ماشين
قطرو ماشى بين التريا والموازين
أمك ان جات فى المقابر ناس منكر ونكير يرجوها قاعدين
وبى سندالة الحديد يدوها الفين بعدين بى تعرفنى انا حمد سمح زين
ولى عودة باذنه تعالى000

استاذ سلمان والله انت خطر عديل وموسوعة فى مجال الشعر مبروك وماشاء الله ارجوك ان تفتح بوست للشاعر عمر الدومرى فهذا شاعر يطربنى جدا

الأخ النعوفابي سلام
لك التحية وانت تطرق هذا الباب وياريت تفتحوا لينا باب سرقة إسماعيل حسن للشعر المنصوري
ولك هذه من ود الفراش
يا طه الرسول الفي شروقوا
جنا الفراش يبس بل ليهوا شوقوا
يروح بربر شويم الحم يضوقوا
يشوف شجراً كبار في النيل عروقوا

الاخوان خال أبرار ويس مشكورين –اصبر لى شوية وحا اوريكم قصة مطعم شرى السياحى بالتفاصيل –

لكن ياجماعة اكرر عا يزين التفاعل مع الموضوع ومن ساعة ما أنزلت ملخص وفحوى الاجتماع –ومتابع الليل كلو ومن قلعة النجمى قاعد فى الجهاز مالقيت زول علق او ابدى ملاحظة ----

أما اللقاء فكان رائعا وعلى هامش موضوع ودبروى تمت عدة مناقشات لأمور كثيرة خاصة بالمنتدى –والواحد شعر باعتزاز شديد بالتطور الذى حدث للمنتدى وبالنقلة الكبيرة كيف لا وهو أول لمنتدى لأبناء المنطقة ويتم التخطيط والتنسيق والإعداد عبر الشبكة العنكبوتية ومن ثم اللقاءات والمقابلات والزيارات وغيرها فهو لعمرى قمة التطور والمواكبة--



الإخوة الأعزاء أناشد الجميع بالإسراع بسداد المساهمات المالية –

الأخ خالد عبابدين نشكرك على هذا البحث في شعر المناصير ونتمنى أن يتكاتف الجميع في توثيق شعر المنطقة و أن يتم تطبيق إقتراح الأخ / الرشيد الأفندى وان يتم كتابة القصيد كاملة لو أمكن

......

أولا التحية والتجلة لك أخي خالد ولكل الأخوة الذين ساهموا وشاركوا في انشاء هذا المنتدى الجامع لأهل المناصير وعلى رأسهم الاخ سليمان العقيدوالاخ حاج شرفوالاخ الرشيد الافندي الذي اتمنى ان يكون حلقة وصل بين كل اعضائه داخل وخارج السودان أنا عزالدين محمد علي ضقولي وبالفعل الشاعر حمد ود ضقولي جدي لامي ونشكر لك مساهمتك في عرض شعر وتراث المنطقه وان شاء الله سوف تكون لنا مساهمات في المنتدى في القريب العاجل

ملاحظه التعليق الاول كان من اطفالي فالمعذره^_^

كلام جميل واتمنى ان يكون التوثيق عميقا حتى يستفيد الجميع

شكرا الصدوق
برضو فى سياق المضمون
حمد قال :
النط جاب الانجليزوالمانيا ماشين
قطرو ماشى بين التريا والموازين
ودى يقصد بها الحرب العالمية

الشرح عاد كيفنو يا سلمان مع كلمة (عيلي)
دي؟
ماهن براهن ناس حمد ود ضقولي
حتى حاج الماحي قال:
في القبة اليلوح قنديلا
قال: ( دينك راح جبال العَيَلة) يقصد انتشر الدين الإسلامي حتى جبال النوبة

توثيق رائع فى حق القامة حمد ود ضقولى
واصل ود الخاله ونحنا متابعين

انت يا سلمان الكلام القديم الجديد دا
تجيبوا من وين حيرتنا عديل كده
واصل مالك وقفت
فبوست الشاعر هذا مفتوح من الريس خالد بطريقه جديده
ولكنه فاضى نامل ان يسحب هذا البوست
وينقل كل مافيه لبوست الشاعرالجديد الفاضى
ولكم تقديرى

عباس محمد كتب:انت يا سلمان الكلام القديم الجديد دا
تجيبوا من وين حيرتنا عديل كده
واصل مالك وقفت
فبوست الشاعر هذا مفتوح من الريس خالد بطريقه جديده
ولكنه فاضى نامل ان يسحب هذا البوست
وينقل كل مافيه لبوست الشاعرالجديد الفاضى
ولكم تقديرى

الشيخ عباس كلامك صاح . وصدقنى الأخ والصديق عزالدين دوره سلبى جدا وكان من المفترض هو الذى يتولى التوثيق لجده وأنا ما دائر أقول النار تخرأ الرماد ولكن مازلنا نعشم فى الأخ عز الدين أن يتولى أمر هذا البوست والا سيكون كلام العمدة فنان حقيقة قال لى أخوالى ناس الضقولة خذلونى فى تثبيت الخيار المحلى والآن ولا واحد منهم خياره محلى !!!! فيا أخى عز الدين ألم تكتفى من تلقيط تمر الهبوب ؟؟ أتمنى أن تنظر لهذا البوست بعين الاعتبار !

ود الروفاب كتب:كلام جميل واتمنى ان يكون التوثيق عميقا حتى يستفيد الجميع

ابن عمى شايفك عامل صور هنود ما انت خلاص بقيت من ناس الضقولة تحياتى لك و لأستاذة الأجيال وحفيدة محمد الدرى المنصورى فجدها توفى على صدر والده وهو يقتل بنيران الأنصار وحكت لى حبوبتى فاطمة بت سليمان بأن هذا الجد قام باطفاء نيران البارود من قميص الصبى قبل ما يفارق الجد الحياة .وجائيك راجع يا جنابو .

جميل جدا الريس خالد أن شمرت وغصت لإقتلاع مثل هذه الكنوز لشاعرنا حمد ودضقولى رحمه الله . وهذا بالتأكيد قيض من فيض ، وليتنا ننقب ونبحث لجمع وتوثيق مايمكن من أشعار ودضقولى وغيره ، مؤكد وللأسف أن ماضاع أكثر ...عليه لابد أن نستدرك لنلم ونجمع ونحفظ ونوثق مايمكن قبل إندثاره وضياعه فى غياهب النسيان ... والبركة فى أساطين البحث والتنقيب فى تراثنا من أمثال الأستاذ سلمان عقيد ود. صديق ونور الهادى وعباس محمد والرشيد والريس والحاج وغيرهم من أساتذتنا الغيورين على تراثهم . وكل من يستطيع أن يدلى بدلوه ...
فى سياق حديثه عن ــ الريله ــ ذكر الأخ نور الهادى أن عمر حستن عبادى هو من علم وردى الطنبور ، والحقيقة أن والد عمر هو من علم وردى العزف على الطنبور . وفعلا قد تمت سرقة الكثير من أشعار المناصير سواء بالحذف منها أو بالإضافة إليها أو تقليدها والنسج على منوالها ... ولكن النظم والإيقاع المنصورى الأصيل لاتخطئه أذن أوعين وأينما كان يعرف ...وللأسف لم يفطن مثقفونا ممن سبقونا وهم قلة آنذاك إلى حفظ وتوثيق أشعارنا من الآباء والأجداد الذين عاصروا أولئك الشعراء أمثال على سلمان الشاعر وودضقولى والسيد ود الحسين أو من الذين عاصروا من عاصرهم . إذن العبء ثقيل وعلى الجميع أن يتكاتفوا ويبحثوا وينقبوا مثل تنقيب الذهب هذه الأيام . وقد يكون هنالك ممن يعرفون ويحفظون الكثير أمثال أستاذ الأجيال أمد الله فى عمره محمدمحمد صالح منصورى وغيره قد يرفدونا بالكثير ...تحياتى لكل الأخوه المشاركين والمساهمين فكل ماذكر يستحق التأييد والتقدير والقبول ....

الشكر الجزيل للاخ خالد عابدين ولكل المبدعين الذين حالوا جمع ترات المناصير لشعراء القبيلة واشكر اخوي نورالهادي علي كلمتة في حق الضقولة واعرف ان غيرتك ومحبتك وحرصك علي جمع المزيد عن حياة  جدنا هل التي جعلتك تكتب هذا الكلام .
 الشاعر حمد ود ضقولي هو جدي لامي ولد  في قرية الضقولة  قبل الاستعمار الانجليزي وتزوج من جارة الخير بنت نعمان ود بدر اخت الشيخ ود شمهروت جد الشاعر الكبير محمد بروي كان يشتغل بالصياغة سافر الي مصر في شبابه وبقي فيها لعدة سنوات ثم رجع الي المناصير ثم ذهب الي الحسانية لزيارة اهل لنا هنالك  وبقي فيها فترة من الزمن . كان  شاعراً غزلياً من الطراز الاول لم يكن يهتم بالمدح او الهجاء كان معظم  شعره  في الغزل  وخاصة في محبوبته حوضه في الجزيرة شيري . توفي رحمه الله عن عمر يناهز ال 80 عاما . الوالد حضر وفاته وقال عندما اشتد عليه المرض  اعطي  ابن اخيه عمي الفكي فلوسا مربوطه في صرة وقال ليهو سو بيها البكاء  وشدو حبلكم  ولا تنجرسو وتوفي بعدها رحمه الله .

التحية والتقدير لك الذين ااهتموا بشعراء القبيلة .
كما تعلم اخي  نورالهادي  أن الدراسة قد ابعدتني عن اهلي كثيرا وعندما كنت بينهم لم اكن وصلت العمر الذي يجعلني افكر في اهيمة ما قاله جدي رغم  اني كنت  كثيرا ما اسمعهم يترنمون بأشعاره ويحفظون منها الكثير أمثال خالي عثمان ود حمد وعمتي مديني بت محمد خير ولكن عند غيابي غاب الاهل ورحلوا عن هذه الدنيا رحمهم الله . ورغم ذلك  سأحاول البحث  لئثراء المنتدي والتوثيق  .

ه هو حبوبتك أم أمك يا عز الدين برضو إسمها جارة الخير..!!!
 وكمان أم ناس الفكي علي ضقولي اسمها جارة الخير.. وقد حضرناها ونحن  صغار.. جارة الخير..
 أنت تعرف عمك الفكي  تزوج ثلاثة نساء.. منهم أثنين واحدة عمتي وواحدة خالتي..
  وبالتالي أصبح لهم حق  في جرف الحنانين . قطعة الترس.. أها وأنا صغير ألقط في الدفيق.. شفت هذه العجوز نص النهار تنقح في الجرف وترمي التيراب.. وهي جارة الخير أم الفكي والناس مقيلة ومافي زول حايم.. فأشفقت عليها.. وقلت مسكينة... يجب أن أساعدها في الحفر بالطورية.. وأنا لسه صغير لا أقوى على حمل الطورية... فساعدتها وأجتهدت أن أنقح معها.. وأنا أحفر وهي ترمي التيراب.. لما شارفنا على النهاية ضربتني الطورية في منتصف ظهر رجلي.. وسال الدم.. غسلتو في البحر وما وقف.. جاء أبوي سوا لى ليهو صعوط وربطو.. ولكن الجرح اتنوسر وعمل صديد ولزمت الفراش أسبوع..
وجات أمك وخالتي يزوروني.. ويضحكواا.. وكلموا الناس كلهم قالوا ليهم صديق  حن عليها أنت مالك ومالا العجوز.. حن عليها وقال كل الناس مقيلين وهي تنقح..
 لايزال هذا الأثر في رجلي الشمال غائرا

اخي صديق اسف  سافرنا ورجعنا سفر داخلي طبعا اليومين ديل معاي الوالد وانشاء الله يؤدي العمرة
ويرجع بعد العيد اذا الله مد في الايام .
صاح حبوبتي ام ابوي برضو اسمها جارة الخير  , جارة الخير بت حمد  من العمارين اخت خليفة ود حمد ابو ناس البقاري وعباس ود خليفة
واليمن بت خليفة يعني ناس العمارين اهلنا وكمان ناس المهوة برضو اهلنا ناس  حسن بشير  ود عمت ابوي .
فيك المروة يا صديق من صغير وان شاء الله   ربنا يوقوي ضراعك و يجعلك  دائما ذخرا للاهل .

أسمع سلم على أبوك وقول ليهو صديق يسلم عليك وأقرا ليهو القصة دي يا عز الدين

الاخ صديق / الوالد قلت ليهو صديق عبدالله يسلم عليك قال لي الله يسلمو وين صديق الزمن ده طولت ما شوفتو قلت  ليهو في بلد ذي بلدنا دي قال لي يا ولدي ربنا يرد غربتكم وتلقو ليكم رزق في بلدكم ........ اللهم آمين .
حكيت ليهو القصة تأثر كثيرا بذلك الزمان وقال زمان الناس حنينين وفيهم المروة صديق جايب المروة من ابوه  شبابيك بيتنا داك والابواب  مصلحهم لي عمك عبدالله الحنوني وكنت لما البابور يغلبني ادورها اكوركلو والله ما كان بتأخر يخلي الفي ييدو ويجي يساعدني رحمه الله . اولاد الحنانين وولادنا  شئ واحد  حتي ام غلط واحد ودقيتو ما في زول بقولك دقيتو مالك لكن  ولادة الزمن ده ولادة حاجي مروة ما فيها تكورك للواحد يعمل ما سامعك واذا سمعك يطرطش  لك الكلام. رحم الله زمان كان الناس فيه اشد تراحم وتواصل يا اخوي صديق .

نعم نعم يا عز الدين كان هنالك تراحم وتربية شديدة في كل المناصير..
 الوالد ربنا يديهو طولة العمر.. خلوهو يقعد معاكم شوية الأيامات دي السودان حر شديد..