حفل تابين الشاعر

بعد ان كتبنا بعض المرثيات من هذا الحفل لبعض الشعراء فى صفحاتهم الخاصة ومنهم الشاعر/عمر الدمرى وعثمان سلمان وخلف الله كباشى بالاضافه للشاعر المرحوم/عمر لهيفان فى موضع اخر من هذا القسم نخصص هذا البوست لكتابة متبقى القصائد فى حفل تابين الشاعر الكبير والذى كان فى العام 1995م

كان حفل تابين الراحل المقيم الاستاذ الشاعر فى يوم الاحد 21/ 5/ 1995م والذى تقاطرت اليه جمع غفيرة فى عظمة يوم التروية جاءوا من كل صوب وحدب،لم يكن الحضور قاصرا على شعراء منطقة المناصير فحسب بل لاخوته وزملائه فى منطقة الرباطاب حضور مشرف وهذا دليل على علاقات الراحل الواسعة، فكانت دعوتنا اليهم جميعا عبر البطاقة الشعرية التالية :ــــــــ

ندعوك وحضورك احتفالنا يزينو
الشاعر الكبير الليله يو تأبينو
ابراهيم علم وين تانى نلقى أزينو
كم شربت عقول من فيضو صافى معينو
هبوا تعالوا كل زول اليخلص دينو
وان غاب الاسد اشبالو تحمى عرينوا

كان اوائل المتحدثين صديق المرحوم الشاعر ابراهيم دقاق وهو من فحول شعراء منطقة الرباطاب(الشمخية) ابتدر حديثه ب:ــــ(لن اطيل الحديث عن الاستاذ ابراهيم يكفى الاستاذ ابراهيم فخرا لانه تربطنى به اقوى الصداقات فى وقت كنت فيه نفر دريسه وهو اعلا القيمة يكفيه هذا الفخر فاسترسل قائلا:ــــــــــ

بى فقد الخليل طاحت علينا مصيبة
ولا يكفى النواح ودمعة بنجيبة
فقدنا ليك حار جوه القلوب آويبة
تبكيك المدارس الانت متوصيبة
مقرات والشريك ما قت ماها قرببه
اللخدم شيرى والعندى ما بكفيبه
ضراع البلد عارف اسوده وضيبة
وكل ما فيها لون قفلت منو حقيبه
قاسى على الرجال دروبك الماشيبه
يا لين العريكة يا بشاشة وطيبة
مشاكل المجتمع الديمة محتكيبه
قدام العناكب كلمتك بتجيبه
صنديد ما بتخاف قلبك حديد وقضيبه
خيول سبق الادب قوارحن ركيبة
من واقع جدودك وقمت متربيبه
الموت مو بدع حقا علينا ضريبه
مقادير الاله وكل زول راضيبه
طال اسفاى عليك تانى القوافى نسيبه
ورحمات الاله تبقى متواليبه

تمت
مع المعذرة ان كانت هنالك اخطاء املائية او غير ذلك

واصل
نحن فى الانتظار

الحاج وصل بى جاى
باقى سلمان والرشيد وخالد
شكرا الحاج على المرور

مرثية ابنه عبدالله ابراهيم على الشاعر والتى كان لها اثر عاطفى لدى الحاضرين

ابراهيم ابوى كت ركازتنا عند الحاره
كت تهينا كت توصينا عمرك ماهديتلك زول على بطاله
كت حلال مشاكل بى تفك الفى حماك حياره
راكــــــــز للتقيله ومنها آبتنضاره
قبيل دايرين تعيش تبقالنا بطل الداره
لكين القدر مكتوب مسطر منو مافى فراره
حكم المولى ما بنقدر نفسر فيه بالمزراره
يوم نفذ القدر جات الخلوق تنجاره
سافين التراب الفاتحه ما فقناله
ناس مصعب وشعيب يبكوا الدموع شلاله
لكين برضو نستغفر ونقول الدنيا اياه حاله
سالت الله الكريم ذو العزة جل جلاله
يتقبل دعاى ويستجيب فى الحاله
يرجاه القبر مفروش وفيه واسعى الحاره
ونوافذ الجنه مفتوحالو بى اشكاله
والحور الحسان تبراهو باستقباله
ويعيش فى عزه ما يتلقى اى مراره


تمت المرثية
مع المعذرة ان كانت هنالك اخطاء املائية او غير ذلك

تسلم اخوي عباس :
ازيك وعلك عافي يابحر المسور الصافي
انت الرايقك المتعافي انت الزيك مافي
كلامك سمح يفش الغبياين
من هنا وقادي اقبلنا ضيوف ::
ســــــــــــــــــلام يارايقـــــــــــــــــــي

الباشمهندس ودجيب الله مشكور على المرور
المساحه مساحتك اتوهط كويس
لولا مرورك بى جاى المقصة كان كتلتنى

الأخ عباس ---سلام

ما تقوم به عمل عظيم ---سلمت يدك ---سلم مدادك ---متعك الله بالصحة والعافية

واصل ---واصل ----حتماً ستصل وتوصلنا معك

عاجز عن الشكر

جزاك الله عنا كل خير أخى عباس ... تشكر على هذا الجهد المقدر .... الفقد كان جلل ... تداعت على إثره المرثيات التى تشيد بمآثر المرحوم .... الراحل عنا والمقيم بدواخلنا .... قدم الكثير ويستحق منا الدعاء والمدح والتبجيل .... نسأل الله له المغفرة والرحمة وجنات عرضها السموات والأرض _

لك تحياتى وودى ،،،

شكرا عباس وشعراء مبدعون ما كنا ندري عنهم شيئا والشاعر يستاهل الكثير ولي طلب اللون الأخضر صرب عيناتنه وأبعد من الكتابه به يكفينا اللون الأسود وإن كان هنالك تعليق فبالأحمر وتسلم لينا عباس وتسلم معك العطمانين جميعا.

تكفى تعليقاتكم
د/ ودعون الله
د/مصباح
القامة النفر
لم نعمل الا اليسير
مروركم اسعدنا

أيوه ياأستاذ عباس بتل حالك ده أسعل وفتش
وين مافى شعر نزلوا لينا هنى ... مع خالص تحياتى وأمنياتى ...

الباشمهندس الفكى مشكوور على المرور
ميسرة موسى مشكور على المرور بعد الغيبة الطويلة
تسلموا

تسلم استاذ عباس علي هذا السرد التاريخي المجيد المعبر عن الاحساس بالخوه والترابط الاجتماعي ربنا يوفقك ويعينك ونحن منتظرين المزيد

جزيت خيرا اخي عباس

واصل هذا المشوار وفي جميع الاتجاهات

بوركت

جهد مقدر اخي عباس نسأل الله لكم التوفيق واصل وكلنا في انتظار الجديد نسأل الله الرحمه والمغفره للشاعر ابراهيم

الاخ عبدالدافع
الاخ ابواحمد
الدكتورة عازة
سعدنا بمروركم
البحث جارى فى بوستات اخرى