انتصار حجازي الفي الصورة ده شنو؟

المترجمون يمتنعون.. كان ممكن نضيف ليكي نجلاء زمراوي، لكن عفيناها هي في الحج.. بدلا ممكن نضيف ليك أميرة الحومري. اكيد ما راح تعرفو ، إلا تسأل شيخنا ود الحوري..
غايتو جنس مناصير حناكيش بشكل!!!

يعنى نظام ورطة وكدا

انت عارف الصورة دى مرة شفتها فى الفيس بوك بس ما متذكرة قالو عنها شنو
فى واحدة من قروبات المناصير
وهسه قدر ما ضغطت تفكيري ما اتذكرت قالو عنها شنو
الغريبة هى شكلها زى القفه بس ما عارفة لية هي مفتوحه من جهتين

ما عايز اقول ليك قفة يا قفة..
أنا كلمتا صاحبي ود عون الله ما يبصصك ولايغششك..
تعال يا سلمان عقيد بتاع التراث شوف القصص دي؟

الغريبة هى شكلها زى القفه بس ما عارفة لية هي مفتوحه من جهتين.

مفتوحة من الجهتين عشان الهوااا يدخل من خلالها، والمركب تمشى ، تشق عباب النيل وتمخر الماء مخرا.. برضو لسه ما عرفتيها!
نزيدك :-
برضو مفتوحة من الجهتين عندها مهمة تانية.. توضع في البحر وتدخل العرة من خشما الكبير.. ولما تجي تخرج توكر بي شوكا في خشما الصغير، عشان معروف عن العرة ربنا سبحانه وتعالى وهبها ميزة.. وهي ما بترجع لى ورا في سيرها ، يعني تدخل بالخشم الكبير لما تمشي تلقى الخشم الصغير توكر فيهو.. ويلا عاد يجوا الأولاد يصطادوها.. معقول بعد الشرح المسهب ده ما تعرفيها!

المشكلة ود عون الله زااتو مافي
ياربي استعين بمنو

وحاسة انك بتمقلب فينى
كيف قفة وفى البحر

أيوة قفة وفي البحر.. هسي دي قفة الترمس عشان يفطر موش قاعدين يضعوا فيها الترمس ويربطوها في البحر عشان الترمس يفطر من المرارة؟ والله دي برضو ما عارفاها يمة!

طيب خليك من ده يا أستاذة..
والله أنا ما عارف بقول ليها استاذة لى شنو وهي الحكايي الفوق دي ما عرفتا
....
ايوة استاذة صحفية. قدمت معي لقاء جزاها الله خيرا
.............
طيب خليك من ده!
بصى للصورة كويس.. بي دي ممكن تعرفيها.. هنالك قطعة سوداء مخيطة على الشي البيشبه القفة كما ذكرت أنت
القطعة السوداء دي معمولة من ياتو مادة..!
وليه عاملين عليهو قطعة سوداء في الحتة دي بالذات. والباقي من السعف.. مرقوعة عليهو رقعة القطعة السوداء دي ليه يا ربي.. مهمتها شنو؟ كدة ممكن تعرفيهو عن طريق القطعة السوداء دي

لحظه لحظه
اسمها الرحل
وكان يستخدموها للماروق والواطة للبنيان زمان

وما تسالنى الماروق دا شنو


لحقت نفسي لانو شايفة الحكاية دا تقلب ضدي

والله أنا ما عارف بقول ليها استاذة لى شنو وهي الحكايي الفوق دي ما عرفتا

والشكر اجزله لفاعلي الخير

هههههههههههههههههههه
أخيرا

وانا عرفتا فاعلي الخير ديل!


بس قولي لى فاعلي الخير ديل تعالوا بي جاي على منتداكم، الناس لسانهم بحا عشان تجوا.. وقولي ليهم ( بقا يتعزز الليمون عشان بالغنا في ريدو)..
الله يجمع شمل المناصير ويخليهم حنينين على بعض محل ما يبقوا وأينما كانوا
.....................
ايوة هو الرحل..
لقد خدمتنا كثيرا هذه الآلة ولكنها ماشة في طريقها للانقراض.. حا ندخلا المتحف بعد كدة؟
الحريم البي يضفرن الرحل ذاتن مافي هسي دي يا انتصار

طيب سؤال أخير يا أستاذة ونقفل الموضوع ده!
اصلك ما حا تعرفي السؤال
لكن قولي لفاعلي الخير ديل
القطعة السوداء دي بيعملوها في الرحل لى شنو؟

شكلك فاتح الفيس بوك برضو
وشفت ناس القروب رفعوا البوست بهناك
وقالوا علشان ما تحك الحمار بين جنبتيه


بس تعرف يا ابو حنه
لو فعلا اولاد المناصير ديل فى الفيس بوك وثقوا لتراثنا بالصور وكل هذه الاشياء الغريبة لو صوروها واتكلموا عنها بيكون مفيد جداا

واكييد لا زال هناك الكثير والكثير الغريب من تراثنا موجود ولكن يحتاج لعيون كاميرا توثيقية

نشكرك يا ابو حنه
على هذه الفقرة التعريفيه

وقالوا علشان ما تحك الحمار بين جنبتيه

كلام صاح ده يا أستاذة
........
تسلمي فعلا الناس لو انتبهوا لى تراثنا.. أكيد بيكون الرابط بين الناس اقوى.. بدل ملاججات القضية الكثيرة وغميسة.. وفعلا التوثيق مهم وكمان بالصورة بيكون أوكد
ربنا يرفع شأن المناصير يا رب..

تسلم يا قريبي أبراهيم
وشكرا لإضافتك هذه القصة الظريفة..
لا لا أطمئن يا ابراهيم ما راح نهبشك. كفاية عليك الغربة البعيدة. إن شاء الله نشوفك قريب..
حكى لى عنك النذير أخوك كتير وهو معنا هنا في الإمارات لمدة سنة وقد تزيد.وزاروني بالبيت هو ووليداته. تسلم يا إبراهيم

تسلم كتيير يا ابوحنه ، فعلاً النزير متكيف من الامارات كتير.

شايفين كلمة الرحل هنا وردت كيف؟
تراثنا ما بننساهو!!
وقد قالها شاعر القبيلة هنا..
لكن الناس مروا عليها مرور الكرام ما عرفوا الشاعر يقصد شنو؟
بروي كتب:
ود الأخت الولد التُحفـه
صقراً جامح ما طير زفـة
خيــلاً حره الوعــد اللفـه
رحل الكـحل التب ما خفه
في طابور الروعه اصطف
أصل المعرفـه سيدالعِرفـه
مصدر فرحه ومنجـم طُـرفه
شجرة صندل وغيـرك طَـرفه