دا شنو الفي الصورة دا؟

أنظر الصورة لما تفتح معاك[ندعوك للتسجيل في المنتدى أو التعريف بنفسك لمعاينة هذه الصورة]

انت ياهندسة دا تنصم الناس----الملاحظ للصورة يمكن تشير لحاجتن اولا كسير التلج ودا بالشاكوش --ثانيا اذا تقصد ادوهو شاكوش دا يكون بطرف الشاكوش او وجهه الامامى وليس الخلفى --عشان كده دا كسير تلج---

هههههه
 جبتها في محلها يا أرباب
 لذيذة كلمة كسييير تلج دي؟
 صاح
 وبالعربية يسمونها
 تدليس
 تمليس
 مسخ جوخ
مداهنة
 رياء
 تملق
.........
 وبالسودانية
 دهنسة
 طبطبة

 وبالمنصورية
 يشـَرّك ويحاحي
 يـَـبـَـرِّد
 يـَـدودِرْ
..........
 لكن كلمة كسيير تلج دي فاتت الأول والآخر.. مع الجيل الحديث دا؟ سمحة موش
.........
 ومافي زول بيفهما غير السودانيين.. وفي السودانيين الجيل الحديث..
...........
 مرة واحد  شامي جاء سألني..
 قال لى أنا كنت قاعد جنب أسرة سودانية في مسرح.. بعدين فجأة البت قالت لى أمها
( الله... ورقبتن )
 معناه شنو الكلمة دي ؟ ما فهمتها
 قلت ليهو يعني تقصد.. ليس معهم أحد
.............
 قال والله يا السودانيين حيرتونا
 الجاب الله مع الرقبة شنو؟
 قال لى ياخي تقصد رقبة  يعني عنق؟
 قلت ليهو نعم
 لكن في دي ما بعذرك..
لأنو رقبة كلمة عربية فصحى وواردة في القرآن رايك شنو..
(  وَمَن قَتَلَ مُؤْمِنًا خَطَأً فَتَحْرِيرُ رَقَبَةٍ مُّؤْمِنَةٍ وَدِيَةٌ مُّسَلَّمَةٌ إِلَىٰ أَهْلِهِ  )
( فَإِذَا لَقِيتُمُ الَّذِينَ كَفَرُوا فَضَرْبَ الرِّقَابِ  )

تلج شنو يا سلمان البكسرو
الناس بقت تكسر الماس 
وتنفخ الجمر
وتلقط الحصى
وتربط عقد الحرير
وترش الرمله
وتمشى فوقه حفيانه
وحبينا ودبينا  وتصد راجعه

السودانيين برضو متأخرين شوية في نظام الحياة العصرية.. وأساليبها.. حتى الذين يحاولون السباق.. تلقى عثرات
 مثلا..
 الدكان أو السوبرماركت زمان في السودان.. تلقى بتاع الدكان  عامل درابزون في وجه الدكان من الباعة.. بسلك وبس فاتح شباك صغير كدا.. قدر ما تمد يدك.. تديهو القروش وشيل حاجتك..
هو عايز قروشك.. لكن خايف منك تسرق
 عشان كدا أن تتفحص حاجتك العايز تشتريها مستحيل.. أن تقلّبها مستحيل.. خايف منك تسرق.. أن تدخل الدكان بي جوة مستحيل.. مرة لقيت بتاع عطور في المحطة الوسطى أم درمان.. كاتب ممنوع  التعطير... الشم فقط ممكن..
لأنو لو خلاها ليهم يبخوا منها.. ممكن عادي ناس السودان يجيك واحد شايل تراب أم بده الحمرااا دي في ضهروايكمل ليك فتيلتك ويكون ما عايز يشترى..
.......
  بتاعين الملاحم
نادر زول يقطع ليك لحمتك حسب المواصفات.. بج بج بج يكسرها ليك تمشى تقطعا أنت في البيت بي طريقتك؟ هو فاضي ليك يقطعا ليك حتة حتة..
 بالله تعال شوف هنا بتاع اللحمة دا بيعملوا فيهو جنس عملية البائعين؟
 قطعا كدا
 عايزا كدا
 قطع دي
 أفرم دي
 شيل لى منها الدهن
 شيل لى منها العضم
 هنا في أبوظبي كدا في محل متخصص في التياب السودانية زي ألف دكان جنب بعض في مول كبير.. واحد سوداني جايب أبوه زيارة من الأقاليم.. نوع الكبار ديك البي يتعكزوا بي عصايتهم.. اشتروا اسرة ولدو تياب وجابوا ليهو كرسي وشاي في الدكان .. قالوا ليهو يا حاج عندك الرطوبة ما بتقدر تلف .. أرجانا هنا.. أنا جيت عايز لى عمة.. لقيت ليك زول ونستوا حلوة واقف فوقو ويقطعوا لى في عمتى.. جات كورجة بتاعة حريم كدا داخلات.. أسمع أديني الطاقة ديك.. نزل الحرير دا؟ دا حرير أصلى والله تقليد؟ لو أصلى قالوا التوب كلو ممكن يدخل من الدبلة ويطلع بي غادي دي آخر موضة لكشف الحرير المزور.كدي يا سوسن أديني دبلتك نجربوا بيها.. أسمع نزل لى طاقة التياب السويسرية دي؟ دا توتل والله كنيبو؟ وفجأة طلعن وما اشترن وخلن ليك الهندي دا ؟ على الأقل عندو 15 طاقة قماش على بنك الدكان؟
 لقيت ليك الراجل دا جنبي غفل خالص عن ونستى دي وخلى شراب الشاي.. وقعد يتابع في الحريم ديل بي نظرو.. وفجأة رجف كدا.. ودمو غلا
 فجأة ألقى ليك صاحبي فلت منو العيار.. وفجأة نقر عصاتو في بلاط الدكان وقال: حريم.. قليلات أدب... ما عندكن وليان.. أماّ قلت أدب بتاعت حريم؟ هسه الراجل دا مسكين تلعبن بيهو كدي؟ وما تشترن؟ كم طاقة نزلا من الرف؟ أماّ قلت أدب
 ضحكن فيهو ومشن ( سجمي دا شنو دا؟
 خلنو ليك يغلى..
 دا نوع الناس الأصيلين الجايين من الأقاليم  الى أبوظبي .. ما مروا بالعاصمة في الخرطوم خالص.. كان ممكن يهدأ شوية لو عاش في العاصمة
..........
 يعني حكاية تتسوق وتدخل بي جوه في السيوبر ماركت دي جديدة جدا في السودان وفي محلات بالعدد.. الرياض.الطائف .. محلات زي دي..
 الإجازة الفاتت قلت للمدام والأولاد السودان بقى زي أبوظبي في سيوبرما ركتات تدخل بي جوة وممرات داخل السيوبر ماركت وكمان عندك عجلة تجرها تتسوق  بيها.. زي الرياض وأبوظبي ودبي
 قالوا لى ما معقول
 قلت ليهم نعم
 في الرياض في شارع الستين.. واحد عامل سيوبر ماركت كبيييرة وفيها ممرات من جوة تدخل.. 
لقينا ليك عامل تلاجات كبيرة تمام.. زجاج من فوق.. لحمة مغلفة بالبلاستيك تختار القطعة الأنت عايزا.. رجل.. يد.. كتف.. خروف بقر .. زي ما عايز..
لكن بالرغم من أن صاحب الدكان من حلب السودان ويفترض فيهم يكونوا نجيضين نوع الناس ديل
 لكن
 سارية فيهو حالة السودانيين في السبهللية
 مغلف وكاتب عليها ( رقبة )
 والقطعة التانية كاتب عليها ( مخروقة ).. جماعتي يضحكوا جنس ضحك.. ياخي الخرطوم ما عادت مقفولة على السودانيين. فقط.. في أجانب.. شنو حكاية رقبة ومخروقة دي
......
 بعدين هو برضو مسكين.. سيوبر ماركت زي دا  حديث.. ما عايز الكهرباء تقطع منو 24 ساعة.. لكن مع ذبذبة كهرباء السودان دي؟ اللحمة كلها سايحة ودمها سايل في البلاستيك... وحالتا تغني عن السؤال
 هسه في الرياض وأبوظبي مثلا.. في لحمة خاصة المفرومة الملفوفة يفترض تكون مجمدة 100% .. لو هبشتها بي يدك ساكت لقيتا سايحة شوية.. طوالي تتقزز وما بتشتريها..
...........
 حكاية للشم فقط  وليس البخ
 هنا تعال شوف الناس داخل مول التسو ق يتسابقوا عليك إنو يشمموك  عشان تشتري. وأنت تتعزز وتقول لالالالا تعمل لى حساسية كترة الريحة... لالالالالا عندي أزمة.. يجري عليك عايز يشممك وأنت تجري منو ما عايز... غايتو الشي لما يكون متوفر... سبحان الله... يا اخوانا متين نحن نصل المرحلة دي؟؟؟؟. نماذج من كل نوع معروض مفتوح للبخبخة فقط..

يا ارباب.. فهمتا الطعـيـّن ليك بتاع الحاج شرف الدين دا؟ الحاج دا بي يشتغل غمـّاسي تحت تحت

صديق عبدالله علي أبوحنة كتب:. يا اخوانا متين نحن نصل المرحلة دي؟؟؟؟. نماذج من كل نوع معروض مفتوح للبخبخة فقط..

وصلنا ياياباشمهندس
الان فى الاحياء الطرفيه بالعاصمه توجد السيوبرماركت والهايبر ماركت والمولات ذات الطوابق والسلالم الكهربائيه
كما توجد خدمه التسوق الالكترونى والادارات المتخصصه لخدمه العملاء
الان يمكنك استلام طلباتك اليوميه لحاجيات المنزل عبر ال اس ام اس بنظام الدفع الاجل او المباشر
فقط عليك ياباشمهندس ان تكثر من الدولارات والريالات والدينارات والاسترلينى وتسكن وسط البلد وتخلف رجل على رجل وتشم هواء ظبيانى وانت فى قاردن سيتى
او الخرطوم واحد
اما ان ذهبت بك الاقدار الى كافورى والمجاهدين والمنشيه  وام ضريوه فلا يغرنك عماراتها ودورها ومتاجرها فانها تبيع الويكه والزيت بالرطل فقد سكنها اولاد الريف وقد لاتجد بالعماره غير العناقريب وسبات البلاستيك لزوم التخلص من السفه