دكتور حسن عون، وحرمه القامة انتصار حجازي وأطفالهم همزوا أبوظبي جد

ما شاء الله مابتقصر ياهندسة ويابختك الزمن أمداك لتقديم الواجب نحن جونا لمحة بصر وسوه لينا في السوق والله يحبس عنك السوق.

ماااابتقصر تب...والعجب الحكومه والوزراء..
عاد ما ك عمده...تودع وتستقبل ساااكت.
انشاء الله يصلو الي ارض الوطن سالمين غانمين

تسلمي بت مشايخ الربع العاصي..
لزورتكم طعم وفردية ولونية
ولزيارة عون الله وانتصار طعم ولونية وفردية
وأكيد لزيارة اي قادم آت طعم ولونية وفردية
نحن ملك للمناصير ما بقى فينا روح أو رمق
.......

السوق حاولنا نقلل زمنو يا دكتور مصباح..اصلو الحريم يحبن الأسواق

الليلة اليوم كلو قضيناه سواجة معاهم في أبوظبي..

يا بختهم بيك ويا بختك بيهم واتمنى لهم اوقات جميله كجمال اخلاقهم ومعدنهم فهم نعم الاهل وهى نعم الصديقه

تسلمي بت الحومري..
بس اصحابك لما شافونا إتخلعوا خلعة شديدة.. بالجد يعني؟
قلت ليهم ليه؟
الواقع اختلف بمشاهدتنا، أكثر مما كنا نتكاتب في المنتدى والله شنو؟
قالوا آآآي كنا متوقعنكهم أكبر من كدة بكتير؟ خاصة سيدة
يبدو إنو الزمن لم يمر عليكم..
المهم سعدنا بهم.. وناس ما ساهلين والله هم..

ماشاء الله ياهندسة أنت من المحظوظين كما لم يتوقعوكم بهذه الصورة أيضا وجدونا كما لم يتقعوا ولكن الصورة عندنا مقلوبة طبعا الإنسان الطيب الدمو رايق ياصديق ما بكبر وعندنا أمثال كثيرة في البلد أدام الله طيبتكم وترطيبتكم وما شاء الله.

كما لم يتوقعوكم بهذه الصورة أيضا وجدونا كما لم يتقعوا
أأيوه يا دكتور مصباح أنتم كذلك.. انا ماشفتك قريب لكن الناس الشافوك قالوا دكتور مصباح لاتبدو عليه عوامل الدهر..
 ويمكن البساطة.. وما شايل الدنيا تقيلة.. أو يمكن اثر العبادة الموروثة من الأجداد أو المكتسبة منكم

الصورة المقلوبة عادية.. مستعدلة بمشيئة الله

دكتور حسن يا صديق لو داير تبسطوا شوف له عشرة ويستى تكون حارى واعمل حسابك ما تجى فية سيك الدق بلم فيك

ايوه يا هندسه انا طبعا النقل عندى مباشر اول باول
اندهشا شديد ربنا يزيدكم من نعيمو

اهلااااااااااااااااااااااااا بصديق ابو حنه
كدا الواحد بعدما شافك على ارض الواقع يقدر يركز كويس ههههههه

جاياك للبوست دا
بس خلينى افضى
ومذيعه الربط على قولك ح تحللك تحليل هههههههه
بس تحليل كويس طبعا

احلى شئ اميرة الحومرى معاى دايما بالاسكايب او الواتس اب
وبحكى ليها اول باول ... يعنى بقيت معاها زى مراسلين التلفزيون

وبديت احكى ليها بانبهار عن الامارات والا قطعت حديثى واقول ليها اسكتى ما قابلنا اهم شخصية فيك يا الامارات
ابوحنه

للحديث بقية لاحقا

البارح الجماعة ديل قلعناهم قلع من النذير أخو انتصار وجبناهم بيتنا من الصباح إلا اتفارقنا بالمساء الساعة تمانية..
 وكمان زاد البهجة والفرحة أخونا  الباشمهندس نصر الدين أبو زيد حامد كرار. جاء للسلام ورد التحية على الدكتور حسن عون الله وانتصار ..جاء نصر الدين وحرمه وعندو بنيتين صغار حلاتن .قضينا وكت أكثر من رائع مع بعض

يسلم المرور الكلام سلمان ومحمد الحسن طيفور.
 تعرف يا محمد الحسن.. هههههههه هنا حسن الوستي طارت ليهو في راسو.. ماهو فاضي من الجري..
..........
 شخصيا شعرت بأن هذا المثل ينبطق على حسن.. المناصير يقولوا ليك في وصف الزول الراقي الطيب المسامح، الخلوق، الذكي ، اللماح. الحساس، يقولوا ليك  لما تسألهم عن زول.. أها الزول ده لقيتو كيف؟
 يقولوا ليك أهلنا ( تاكل وتقش إيدك في طرفو)
 بالجد وجدت حسن من  النوع ده!
 زمان في المنتدى وحسب ما نكتب كانت صورتي عنه مختلفة..  وأنا طبعا زمن طويل ما شفتو.ز يمكن من زمن هم  طلبة في الكراع..
 لكن حسن مغمور بمحبة المناصير.. زول ذكي.. زول ود ناس ناس.. زول يعرف المعروف ويقدرو.ز حتى لو معروف صغير.. زول حتى كلامو لا يزال بلهجة المناصير.. بالرغم من اغترابو في المملكة ومخالطته مع جنسيات تاني..
 يعني مثلا لما تتكلم معاه ويكون الكلام وقع ليهو يقول ليك بلهجة المناصير... اييي أيي.أيي.يكررها مع ضحكة حسن المعهودة..

ادام الله المعروف والمحبه بين الاهل
يسلم اولاد بلدي الطيبين

تسلم أم وضاح
 وأنتو كمان زياراتكم.. الأولى والتى بعدها طعمها الخاص.خصوصية خاصة لايزال طعمه في حلقنا..
 وكل زول في المناصير له صفحة كراس  في قلبي. نكتب فيها ولا أحد يقدر يمحوها
........
 استني شوية يا أم وضاح بحكي ليك عن قصص صاحبتك انتصار معانا أنا وود عون الله.. خلي المحل بتاع الكتابة ده يتعدل شوية.. حا تضحكي لامن تدمعي

تسلم ياعمده..
اصلا العباقره والمفكرين قليلي الكلام كثيري التفكير والتامل...نحسبك منهم ابن عمي...

تسلم اخي ابوحنة علي روح الاخوة الطيبة 
انشاء الله ربنا يدييييييييك الصحة والعافية ودمت رمزا وعلم شامخا لي اهلنا المناصير
في كل مكان سواء في المناصير او ابوظبي 
بالرقم من الاخوان الضيوف ليس بيننا وبينهم سواء مئتين كيلو في شمال المملكة ولم نحظا بزيارتهم 
انشاء الله يصلو ارض الوطن بالسلامة 
(من لم يشكر الناس لايشكر الله وانا اشكر القايمييييين علي امر هذاء المنتدي لانو حقيقة عمل
 ترابط بين اسرة عيال منصور انشاء كلكم ربنا يديكم الصحة والعافية)

نغير البروفايل تبعا لضيوفنا وأخوتنا الكرام.. ( ود عون الله وصديق وسولارا عون الله)
صورة[ندعوك للتسجيل في المنتدى أو التعريف بنفسك لمعاينة هذه الصورة]

حسن عثمان الحسن عون الله وسارية عون الله  في ديارنا[ندعوك للتسجيل في المنتدى أو التعريف بنفسك لمعاينة هذه الصورة]

تصحبهم السلامة... ودعناهم الآن في طريقهم للسودان. تحفهم العناية وتشملهم البركات.. بعد برنامج جد حاااافل مع مناصير الإمارات جميعهم...
 ركزنا ليكم السيف.. يا الأرباب سلمان.. و يا ود شيخنا غلام.. وبقية العقد الفريد وجميع أعضاء المنتدى.. وناس الباسقات
 أمي طيبة بت حبيب الله يرحما.. لما يجينا ضيف ويقعد معانا.. وبعدين يودع... تقوم تبكي وتقول : ( يا حليل الضيف أب فراشاً مطوي)  يعني كدة كدة رايح مخليك الضيف! وتبقى في اجترار الذكري والأيام الطيبة القضاها معاك.. قال تعالى ( الْأَخِلَّاءُ يَوْمَئِذٍ بَعْضُهُمْ لِبَعْضٍ عَدُوٌّ إِلَّا الْمُتَّقِينَ ) نسأل الله أن يجعلنا منهم

بالسلامة ؟؟؟؟؟؟؟؟؟؟؟

ربنا يكتب سلامتم وين ما حلو ...
والله ما قصرتا يا هندسه الزمن دا البلاقى الضيف ويديهو وقت قصير من زمنو ما قصر تب  لانو المشكله كلها بقت فى الزمن ...
ربنا يديم التواصل بيننا ...
الغاليه انتصار بعد ما قابلتكم وشافه ثمار المنتدى اتلصت على على طول اميره لازم ترجعى المنتدى نحنا بالجد لقينا اهلنا فى المنتدى ما تنقطعى تانى والله لو شفتى ابحنه كانو بنعرفو من يوم اتولدنا .................... تيت الخط قطع ههههه

فعلا اميره كلام انتصار ميه ميه..
وليس من راي كمن قرا........!!!!!!

هههههههه
والله ضحكت ضحك للخط قطع دى يا اميرة .... يعطيك العافية
تسلم يا ابو حنه الله يديك العافية ومشكور ماقصرت يعلم الله .... ويوم شكرك مايجي
طبعا نحن هسة فى مطار الدوحه لان الرحلة مرورا بقطر وبانتظار رحلة الخرطوم بتصفح المنتدى بالجوال لأن طائرتنا اليوم المساء
تخريمة
يا اميرة الحومرى ااااخ لو يخلونى هسة اطلع برة المطار دا اشوف قطر بالمرة

يابت مدى راسك ساكت قالو قطر دى من محلك تلفيها ......

الخط لازم يقطع علشان ما يسمعوا باقى الكلام........

الان نحنا مع الشهاده السودانيه ادينى خبرك لمن تصلى ,

عين الله ترعاكم وفى حفظه ـ  بالسلامة إن شاء الله

يابت يا انتصار اوعك المنتدي مايخليكي تسمعي النداء....ركزي ماتجهجهي الدكتور ...
تصلو بالف سلامه

دعوة للإستماع برضو.. هنا
..........................
 خلانا وكت تجي...... تذهب الذكرى الموحشة ويبقى ذكر القول الشجي
.............
 فوقو ود عون الله اللقول........ إنت زولاً بي تترجي
إنت ياكا الزول الخلوق ....... وديمة ذكراك متأججي
...................................................
 بي زيارتكم لينا تم ............... المراد الكان في الحجي
 لسه ما فارقنا الولف........ وتاني لى دارنا متين تجي
...................................................
 العجب سولارا النضم ........... والفصاحة ومتحججي
 يا عجو الشام الفي الفروع ....... لينة لسه ما بتتعجي
.................................................
 والعجب عِــن ْ سارية القول .......... الولد عامل بلطجي
 ما عرف لى لغة الأهل ......... وموية البار متبعجي !
.........................................
 أمهم حرم الله الأمان ......... ليهم الآداب درجي
 فرحونا وفرحوا الأهل ........ يلا في السودان هججي
..............................................
 إن شاء الله ما يغشاكم ألم........ وما تقابلكم عوجي
.............................................
 يا ديار منصور القبيل ..... يلا للأجيال خرّجي
 منتدانا ولمّ الشمل ........ دامت العرفي الموجبي
..........................................
 كلمات ولحن وأداء
 صديق عبد الله
[ندعوك للتسجيل في المنتدى أو التعريف بنفسك لمعاينة هذه الصورة]


[ندعوك للتسجيل في المنتدى أو التعريف بنفسك لمعاينة هذا الرابط]

الله عليك يا ابو حنه
وانت يوم شكرك يا خوي ان شاء الله ما يجي

اخجلتم تواضعنا بجميل صنيعكم معنا
هل تعلم انى تحدثت لاهلى عن انبهارى بمناصيرنا في الامارات اكثر مما تحدثت عن الامارات نفسها

تبقى لى فقط
ذكريات حلوه لبلد جميييييييييييل ... ومناصير اجمل واجمل

حفظكم الله في حلكم وترحالكم .... وربي يخليك اخى ابو حنه لعين ترجيك

أن تري في بلاد الغربة سوداني تحس بالطمأنينة
أن تري فيها منصوري تصاب بالفرح الشديد
أن تقابل فيها صديق---دي عاد تبقي حاجة تانية خالص---تصاب بلوثة الفرح الهستيري حتي تضحك خلايق الله عليك وإنت ماهماك ماقابلت صديق
     هي الإمارات دي جايبي سماحتها من وين ---ما من وجود صديق وعائلته الراقية ربنا يحفظهم من العين
أنا لو علي يسوك رئيس الإمارات  ---جد تستحق
عمدة بالجد والعموديي ذاتا شوية
زول عليك الله محل البيوت ضيقة والإجار مولع نار ---نص أبو ظبي ديوانو يسع قبيلة
لن أقف عند الكرم الخرافي دا شيتا راجيهو من الجدود
لن أقف عند الذوق الراقي والراقي جدا والتي أرضعها ابو حنة اولادو
لن أقف عند الملكة ست الدار وبشاشتها ---تخدمك حفياني ---تحس بأنها ولدت معك وتربت----الطيبون للطيبات
لن أقف عند هموم الرجل البتحتا زي الشرا يفوق التصور في تعبه للإسعاد
لن أتوقف عند رجل حام بنا وطاف بنا أبو ظبي كراع كلب حتي حفظناها عن ظهر قلب
لن أتوقف عند رجل يتابعك بتلفوناته علي مدار الساعة ---يا اخوانا إن شاء الله كويسين ---اعل الجو ما غير معاكم ---يا اخونا ناقصاكم شئ  -----رجل حنييييييين
لن اتوقف عند رجل يترك معايشو ---ياخدك بي سيارتو ----يلف بيك محل ما داير----رجل نفسو وسيارتو وما يملك يجعلها تحت تصرفك
كتير وكتير ----شيتا يشبهو معدوم
إنسان من كوكب تاني
********
     الناس في الجنة يكونوا كلهم في عمر الشباب
صديق شاب في الثلاثينات في العمر 
   لم يستطع الشيب أن يغزو رأسه ----من يرانا سويا حتما سيقول أنني أكبره سنا
******
      أعرف أن صديق يعرف من الخلق الشئ الكثير ----أعرف أنه موسوعة ---الوفاء يتدفق منه كشلال ود عيني
في معرض حديثي معه  أخبرته أن جارنا رجل كبير من قوز أبو حمد وذكرت له الإسم ----قال إنه يعرفه ---إندهشت 
وإذا بي عند الرحيل يعطيني صديق خطاب وهدية قيمة لذلك الجار
سلمت الهدية والخطاب للرجل ---طار بالفرح ----وقال في صديق كلام شئ عجيب
******
     عذرا صديق فما يحس أكثر بمراحل وفراسخ مما يكتب
******
       حبي وتقديري

لما تكتب تكتب بسخاء أنت يا زول..
ساكت بت ود خالتي دخلت وتسجلت المنتدى قدامك؟.. الذوق والكرم والأخلاق أنت سيدا يازول..
نحن في الحقيقة مهما أكرمناكم برضو مقصرين.. تعليقك على حكومتى وطيبتها صحيح.. لكن هي دائما تكرر العبارة دي حتى الآن..( كنت عايز أتفرغ تماما لى صاحبك وقريبتك.. لكن كنت في قمة مشغوليتي في العمل.. وكل مرة أسرق الزمن شوية شوية لأكرمهم)
مرة تانية قالت لى: ( صديق تم الناقصة منى.. وأكرم أهلك ديل..) وكانت تقول ذلك عندما تكون هي في العمل..
........
رحتو ولسه ما شبعنا منكم.. لأنو في البرنامج كان باقي لينا بيت المشروع كمان.. ولأنو بعيد من المدينة قدر ما حاولنا نهيئ له برنامج، أهو يجي برنامج غيرو .. ونفضل البرنامج الغيرو عليهو..
كدي الله يوعدنا بي جية تانية..
أنا دائماً أشوف نفسي مقصر..
الحقيقة أنتم أهل بطعم تاني. ملئ بالعوافي
كل عام وأنت بخير يا زول ووليداتك ورقبتك..
وبرضو نكرر وصية دكتور مصباح الشايقي جارو لما شافكم !قال ليهو ( جماعتك ديل أمسك فيهم قوي)

أخي باشمهندس صديق لك التحية وأنت علم في رأسه نار  لم تترك لنا شاردة ولا واردة إلا وسبقتنا وادليت بدلوك فيها الأخ دكتور حسن رجل قامة  كتبت له رسالة بعنوان من الجوف إلى الجوف قبل أن اطلع على هذا البوست لكنه يستاهل أكثر من ذلك فله منا خالص التقدير

حالتي لما شفت البوست قلت بالله شوف الناس ديل تاني رجعو فتحو خشمن في ابوظبي اتاريهم عشان كدي انقطعو عن الكتابه