زياره العضو ابو مصطفي

تكون بكره بعد المويات رايكم شنو؟

اقتراح جميل يا اخ يسين
لاننا اجلنا اتصالنا التلفونى لاخونا ابو مصطفى حتى نصل بانفسنا
وترانا فى الليله وبكره
وشارف رمضان على الوداع
نشوف بقيه الاخوان ونرجع ليك

up

الاخوان يس مصطفي والحاج شرف
لكم التحيه والتقدير
انا موافق علي يوم غد الجمعه 3/9/2010
وربنا يسدد خطاكم يامن تسعون لفعل الخيرات واعاده الاخوان

الاخوه المتداخلين الشكر لكم علي هذه اللفته انا صراحه كنت مفكر في العيد لكن مادام اقتراح الاخ حازم يوم الجمعه وبعد المويات حسب كلام الاخ ياسين يكون ممتاز يعني في حدود الساعه العاشره مساء الجمعه غدا نرجو التاكيد

شكرا الاخ يس والاخوة المتداخلين--الزيارة واجبة وانا موافق على اقتراح حازم وهاشم --ان يكون يوم الجمعة باذن الله بعد الافطار--والساعة العاشرة دى ياهاشم نكون معاه---اما التجمع --يكون مثلا فى الشهدا(عشان ناس بحرى والخرطوم)ا عند التاسعة والنصف ---وارى ان يحسم الامر خلال هذه الامسية عشان الناس ترتب امرها --وضرورى رأ ى الاخ الريس خالد---

الاخ سلمان مكان التجمع الاول في الشهداء للاسباب التي ذكرت طيب مكان التجمع الاخير هناك طرميه بنزين علي اليمين بعد تقاطع شارع الثلاثين( الحتانه) مع شارع الوادي الساعه التاسعه والنصف او محطه البنزين التي تليها علي الشمال تلفون 0912951135 نرجو التأكيد

شكرا الزعيم الكبير وعمدة المنتدى --وكده الكلام انتهى --فقط يبقى التواصل عبر التلفونات للالتقاء والتنسيق--
وللذين لم يدخلوا المنتدى الامس او اليوم واكدوا --وجب علينا الاتصال بهم --والفرصة امام الجميع عبر المنتدى او الاتصال ---وحتى موعد الزيارة--

تصبحوا على خير ----ان شاء الله على الموعد----

والله ظروف الامطار اصبحت عائقا لللقياء يااخوان
كان بودنا ان نلتقي ونتشرف برؤيه قامات نكن لها شلالات الود والتقدير
الله غالب
وحتما ستلقي ان كان بالعمر بقيه وتقبلوا اعتزاري الذي اراه انتقاصا في حقي
وياابومصطفي والله شوقنا بحر لكن البحر والامطار حالت دون ان نقالد روحك الطيبه
فلك العتبي وللاخوان
السلام حازم

التحية ليس للمبادرة الرائعة ولكم اخوتى
طبعا اول يوم ادخل المنتدى الاجتماعى منذ خمسة اوست ايام ولما دخلت البوست واقرا لمن صدعت واتاكدت انو الزيارة فاتتنى بس شكلو الامطار لغت الزيارة وربنا يكتب لينا مرافقتكم فى المرة القادمة

الأخوة الكرام سلام--جعلنا الله واياكم من عتقاء هذا الشهر الكريم ونحن فى خواتيمه—
بحمد الله لقد تمت زيارة الاخ الطيب (ابومصطفى ) وذلك حسب الموعد المحدد لها مساء الجمعة—رغم غزارة الامطار والاوحال –ولقد مثللكم فى تلك الزيارة كل من : خالد عابدين—هاشم الجزولى—الحاج شرف الدين—يس مصطفى –وشخصى الضعيف—ورغم تأخر الركب كان الاخ الطيب متابعا عبر التلفونات وقابلنا خارج المنزل بصبحة الاسرة الكريمة على راسها والده-
بعد وصولنا مباشرة تم تناول العشاء والذى خسر وتكلف اخونا الطيب فى الاعداد له—ثم دورت الونسة الجميلة فى تلك الامسية الرمضانية الممطرة ولم يشعر احد بمرور الزمن لحلاوة اللقاء وما اعده الاخ الطيب واسرته وماقام به من كرم وضيافة –وكذلك همته العالية فى تحريك الحديث فى قضايا المنطقة وكذلك رحلة العلاج فى مصر- كما كان نجم اللقاء الباشمهندس هاشم والمعلومات الهامة التى تخص المنطقة-والمنتدى-
وكنا كلما طرق احد الباب همس الجميع وقالوا (دا حازم ) وفى كل مرة يخيب الظن –وكنا على ثقة بقدومه بناء على تأكيده ولكن ظروف الأمطار واضحة –والتى استمرت حتى الفجر-
الحمد لله ونطمئن الجميع بان الاخ الطيب عاد معافا تماما بفضل الله وبفضل هذا الشهر الكريم وبفضل داعوتكم عاد لاسرته ولوطنه وللمنتدى اكثر ابداعا وهمة (بحمية ناس الجزاير)—نتمى للذين لم يوفقوا فى الزيارة التوفيق فى البرامج والزيارات القادمة بأذن الله –
---واتاسف للتأخير فى كتابة هذا التقرير لظروف معينة--الان احاول ان ارفع بعض الصور---

ياسلام عليكم يا تماسيح دايما مليانين نشاط وعزيمة وحمد الله ع سلامة ابو مصطفى والله انا كنت فاكر الزيارة اتلغت بس كدا كدا انا كنت برة الشبكة نعتذر ابو مصطفى والجميع ع فترة الخمول التى افقدتنا الزيارة فلكم العتبى جميعا...

[ندعوك للتسجيل في المنتدى أو التعريف بنفسك لمعاينة هذه الصورة]
اعلاه :-
من يمينك وللشمال - ناصر - الحاج شرف - يس -عم محمدعبدالرحيم (والد الطيب- عيني باردي) - عبدالرحيم شقيق الطيب


[ندعوك للتسجيل في المنتدى أو التعريف بنفسك لمعاينة هذه الصورة]
من اليمين للشمال- المهندس هاشم الجزولي- الطيب (المحتفى بعودته من رحلة العلاج )- سلمان عقيد - يس (يحدر في يسعدل في الطاقية ) - خالد عابدين

جزاكم الله عنا كل خير ولقد مثلتونا خير تمثيل والحمد لله طمنتونا على صحة أخونا الطيب (أبو مصطفى ).. وأنتم دائما سباقون لعمل الخير ونسأل الله أن يكتب لكم هذا العمل فى ميزان حسناتكم ,,,

الاخ خالد كيف احوالك . دخلت الموقع ولقيت فيه تبادل اراء حول زيارة الطيب وقلت ان شاء الله تكون ما قامت وعندما تابعت الموضوع الى اخره لقيت الجماعه قاعدين فى بيت الطيب . ياخالد عابدين تلفونى ما عندك . دائر اقولك عندما وصلتوا الكهرباء قطعت . انا شايف الطيب شايلو بطاريه
واخيرا اقول ماعندى قسمه فى هذه الزياره وشكرا

ياسلام عليكم ايها الرائعون والله إنكم تملو العين لمن تفضل ودايما رافعين راسنا فوق والحمدلله الشفنا الطيب نصيح وشديد

شكرا الرائعون دوما على تمثيلكم لنا
والعاقبة عندكم في المسرات .

حمدله على السلامة يا ابو الطيب
لكن حكاية البطاطير دي شني
الطيب شايلو بطاريي
وابوهو شايلو بطاريي
وكل بطاريي شكل..
هو طبعا الكهرباء قاطعي. لكن عادي الجو خريف ممكن الناس يقعدوا في الحوش ما الجرافة واسعي وحيشانا كبار
...........
وينك يا حازم
صاحبك الطيب ما بي جاي

الشكر موصول لكل الاحبة داخل السودان وخارج السودان على الزيارة الكريمة ؟؟؟
لكن انا عندى قضية كبيرة خالص خالص وسبق ان كلمت المدير وقلت اليه يا خى حازم والرشيد افندى اتصلو على وقالوا لى جاينك زيارة فى البيت بعد العودة من رحلة العلاج وناس كتيرة جات والرشيد وحازم ما جاءوا ؟؟؟ ويا جماعة داخل المنتدى وخارجه انا ما عاوز اقول خسرت خسارة كبيرة من الصباح قمت ضبحت الخروف وعذبت النسوان ؟؟؟ اعملوا شية واعملوا شنو
وجيبو الشطة والليمون وجيبوا وجيبو ؟؟ عشان فى زول اسموا حازم جايى ؟؟؟ وشخصية هامة وزول مسئول كبير ومعاه زول صحفى كبير ؟؟؟؟ وبعد خلاص الجماعة جو وجزاهم الله خير من بحرى الخرطوم ام درمان والعشاء انتهى ناس البيت وبما فيهم ابوى قال لى انت حازم القلتو وينو ؟؟؟ هو الزول دا منصورى ؟؟ قلت له اى يا بوى قال طيب انشاء الله يكون كويس ؟؟
على العموم حازم والرشيد الشكوى عند المدير مرفوعة ؟؟؟؟

تحياتى
ابو مصطفى

الاخ الطيب ابو مصطفى
حمد لله على السلامة والعيد مبارك عليكم بعدين يا اخوى انا ما اعتذرت ليك وتانى بعتذر والكلام ده موجود فى هذا البوست وشرحت ليك الحاصل بالتلفون ولا داير تشيل حالنا ساكت فى المنتدى تااااااااااانى اكرر الاعتذار .

سلام لكل الاخوه وكل عام والجميع بخير
الاخ ابو مصطفي ربنا يحقق الاماني و يمتعك بالصحه
اما بخصوص اللوم نحن مسونو تب ؟ هي الحياه وظروفها والعمل واحكامه ولكن ماكنا ندري تلك العوائق تحرمنا من المجيء الي داركم العامره وما كنا ندري ان ماينتظرنا ود وترحاب كالذي ذكرت ؟
ومادام رفعت الامر للسيد المدير انا شخصيا موافق علي الذي يحكم به ؟ والامر لله ( بس ما كان في داعي توصلها للمدير مره واحده .. كان تشوف ليك زول حنين شوي ( الحاج شرف سليمان العقيد .. الباشمهندس الجزولي ياأخي حتي الخبير اصلنا ميتين ميتين ) بعدين اصلي بخت الاخ الرشيد دا درقه . اصلوا مع المدير عندوا دريبات ومرات بيفتلوا فوق حبال بعضهم . وانا اصلي ماعندي صليح .. لكن بركزلها تب نامن تتعوج واعجبك تب نامن تنبسط ..
وبقول لاخوي الرشيد الراجل رفع الشكوي ووصلت لي ناس القامه بروي وفتح الرحمن وابوسفيان في الحرم ووصلت ليناس الخليخ لي صديق ابوحنه وفارس ووصلت لكل الخلق يبقي الصقر وكت يقع كتر البتابت عيب
ويامديرنا الهمام ماتقول دي فرصه دابي لميت في حازم وتطرق سكاكينك انا معاي الرشيد والبيتحكم بيهو اياهو فوقنا الاثنين .
وانا اصلي عارفك زولك الرشيد مابتدور تجرحوا شديد ( ولا تقولوا زي قصه صاحبنا جاتك وين يامسنوح ) وحازم اريتو بالموت
لك ياابو مصطفي التحايا اجزلها ولكل الاخوه المذكورين انفا شلالات من الود والسلام
حازم وانا في انتظار ما يحكم به صاحب الرشيد لا خالد
والسلام

والله كلااااااااااااام الله يجمعكم في الجنة قولوا امين

لكن ياطيب كبرتا عديل انا اخر مرة قابلتك فيها قبل زواجك تقربيا 2004

انشاء الله من العائديييييييييييين

السلام مطبوق من ابو مصطفى ولى عمنا فتح الرحمن محمد الحسن عون الله ولى كل اهل المنتدى وبالاخص فى السعودية بلد الانبياء والمرسلينوذلك لانى رفعت شكوى للمدير والمدير دا يبقى لى مدير قاعد ساكت لا بجدع ولا بجيب الحجار ولكن فى استئناف للقضية اذا كان المدير ما عاوز يحل المشكلة .
والمهم فى الموضوع موضوع شكوى حازم والرشيد افندى
رفعتها لى المدير والمدير ماهو جايب لى خبر ؟؟؟؟ دحين يا خالى محمد ودبروى شوف قضيتى دى وافحصها كويس اصلك زى قاضى المحكمة العليا ؟؟؟؟ اول بالتبادى الناس ديل اتصلوا على بالتلفون وقالوا لى جاينك عديل حازم والرشيد افندى وناس المنتدى ؟ وقمت من الصباح انا والمراة نقع ونقوم والبنيات ومصطفى اخوهن والحاج ابوى وطرنا فوق الخروف البسوى العاع والتكاع وضبحناه ما خلينا شى عشان قالوا حازم جاى والجماعة وفى النهاية خسرناوكيلك الله الليمون قفة من سوق ام درمان والدكوة والشطة كيلو الا ربع والبيبسى بالصناديق والشية ريحتها ازعجت الجيران ؟؟؟وفى النهاية حازم ما جاء ؟؟؟؟
دحين يا لبيب لازم تشوف الحكاية دى حدها وين ؟؟؟



تحياتى

ابو مصطفى

عاقل يامديرنا

الاخ الطيب دماج كل عام وانت بخير
والف حمدا لله على السلامه
وربنا يتم الصحه والعافيه

الاخوان الطيب –خالد –حازم –الرشيد سلام
يااخوانا الراجل لامكم لانو رادكم—وعندو حق لكن هنالك ظروف حدثت يوم الزيارة حيث نزلت الامطار الغزيرة من الافطار حتى قريب السحور—حتى ان خالد اتصل بالطيب ليجس النبض لو يجد مخرج للتأجيل ولكن الطيب حسم الامر وقال تجوا بى طيارة –مركب –طوف لازم تجوا الفطور وهذا يعنى انه قد تكلف وخسر –اما الرشيد فقد اورد اسباب موضوعية وما حدث للتلفون –اما حازم لم يذكر اسباب مقنعة وكلنا كنا فى انتظاره خاصة انه قد كرر موافقته الجادة—ولو لاحظتم فى التقرير الذى اوردته عن الزيارة
(كلما دق الباب قال الجميع حازم وصل --) وكنا فى انتظار المفاجأة ولكن ---
تداخلت هنا ليس كحكما ولكن تنفيذا لاوامر السيد المدير وليس لاصدار قرار او عقوبة لان سيد الحق ابو الطيب لم يطلب منى المحاكمة او الشكوى ---بل طلب من ود بروى--
وعلى شاكلة ابيات الراحل ابراهيم الشاعر اختم المداخلة مقتبسا (وناجرا) احيانا—
الرشيد وحازم اتلومتو بالحليل الزول لامكم وقاصدلوا خير
الخروف ماكل قش التناقير
وماهو من عرب الهواوير
عطاريب الشية من العصير
وماتقول زيارة تقول نفير
وبى تلفون واحد حسم المدير
يالرشيد الصحفى القدير وحازم الباشا المشير
لازم تطيبوا الخاطر الكسير
انا ود بروى بعدين بى نسوى الصفقة دنقير

كلامك اياها الحارينها فيك
لكن الزول دا قال ماشي صرف الحاجه دا
اه يجي متين عشات نطيب خاطر الكسير
لك ودي اخونا سليمان ولشعرك الرصين تصفيق المحبين وانا الرشيد في دي متفقين تب ( حانكون هلالاب فقط حتي مقابله الطيب )

ياسلمان مادام عينوك قاضى احكم عديل
طيييب الخاطر ماهو اعتزار وكلام انشاء
الاخوان حازم والرشيد لابد من احضار خروف والذهاب به الى الجرافه وتقديم الاعتزار امام مجموعه من المسلمين شهودا على ذلك ونقبل نحن المجموعه ان نكون شهودا فى ذلك اليوم
لو عندكم اسباب اقتصاديه ننظركم لما ترجعوا من صرف المابنسمو ديل
مع العلم نحن ماماشين لاسباب لاعلاقه لها بدعوه رفض الصرف رغم وجود اسمنا فى اعلى الكشف فى الترتيب الابجدى
استعجلواا بى نرجاكم فى صالون ابو مصطفى الماهل وواسع
ومدة استئناف هذا القرار انتهت

يا جماعة حازم دا اجاهلنى وخلانى زى الجنى الصغير واحرجنى قدام ابوى وقدام ام العيال لانى بقيت زى المجنون اى حاجة يسالونى منها اقولهم حازم ؟؟ اه حازم ؟ وبقوا يضحكوا على عندما حازم لم يحضر ؟؟؟ والرشيد معاه ؟؟ والمدير دس ورق الشكوى فى الدرج وطنش الموضوع ؟؟ دحين نشوف اللبيب محمد ودبروى يقول شنو؟؟ يالبيب انا مظلوم وخسران خروف كبير ماهو حميل وبصل اكتر من ربع ودكوة كيلو الا ربع وقفة ليمون وشطة رطل وزيادة؟؟؟ وموجعنى الطنيش من حازم والرشيد ؟؟؟؟


تحياتى

ابو مصطفى

ودبروى يالبيب ؟؟؟ محمد ودبروى يالبيب مالك انشاء الله يكون المانع خير وبالتلفون من ام درمان اتصلنا على ابو سفيان المدير وقال المشكلة تصل الى اللبيب
واكيد فى المظالم حصيف وما بسوى النضم الهبيش ؟؟؟
دحين فى الانتظار يا لبيب ؟؟؟؟


تحياتى

ابو مصطفى

سلام لكل الاخوه ولقامة بلادي الرائعه
الحاصل شنو الموقع دا كلو بقي جكانين
وغفس
الله يستر

انت يا حازم قاعد تتلوم فى الناس ومسوى الحكاية ظروف شغل واصلوا الشكوى الاخيرة ما حا نخليها الا اللبيب يدلو بدلوه فيها ؟؟؟ او تجيب خروف وتاتى الى الجرافة وتلم ناس المنتدى كلهم؟؟؟؟؟؟؟ فى الجرافة فى سهلى كبيرة اسمها سهلة الحمار قريبة من جامع الجرافة الضرب فيه عباس الباقر الجماعةومع الخروف ولوازمه كلها وناس المنتدى لى عن ناس حدورى ونيتف قيت وى وابو حجل وودعقيد سلمان والمدير وحتى نشوف الحكاية والرواية واذا لم توفى بهذه الشروط انتظر اللبيب نشوف حكمو شنو ؟؟؟؟


تحياتى
ابو مصطفى

سلام ابومصطفي
اولا انت زول ماساهل وانا شايفك مقتدر وكل امورك تمام ؟ البوديك لللغاويس والفطيس شنو؟
بعدين انا ارسلت رساله خاصه للاخ الرشيد وللتاريخ فالاخ الرشيد قالي يااخي لازم نمشي للاخ ابومصطفي واتفقنا بس كان عندي ملاحظات في تلك الرساله الخاصه للاخ الرشيد وللخصوصيها أردتك ان تطلع عليها من الرشيد
والسلام

اسع دا كلام شنو ؟؟؟ كلام رسالة مرسلة للرشيد انا ما عندى الحق اطلع على الرسالة حقة الرشيد يا جماعة شفتو حازم يتلو لو كيف؟؟؟ حازم دا داير يبقى زول بتاع لولوة وانا كلامى واضح شديد اما يوفى بشروطى او ينتظر حكم اللبيب فيه ؟؟؟




تحياتى
ابو مصطفى

شكرا الاخ ابو سفيان على المرور وبالمناسبة قابلت جماعتك كلهم فى عزاء خالد عابدين وبما فيهم السرير صاحبك السر عثمان جبريل واحمد فيلة وكثيرون يسالون عنك من كبنة والحيبة



تحياتى

ابو مصطفى

[quote="ابو مصطفى"]السلام مطبوق من ابو مصطفى ولى عمنا فتح الرحمن محمد الحسن عون الله ولى كل اهل المنتدى وبالاخص فى السعودية بلد الانبياء والمرسلينوذلك لانى رفعت شكوى للمدير والمدير دا يبقى لى مدير قاعد ساكت لا بجدع ولا بجيب الحجار ولكن فى استئناف للقضية اذا كان المدير ما عاوز يحل المشكلة .
والمهم فى الموضوع موضوع شكوى حازم والرشيد افندى
رفعتها لى المدير والمدير ماهو جايب لى خبر ؟؟؟؟ دحين يا خالى محمد ودبروى شوف قضيتى دى وافحصها كويس اصلك زى قاضى المحكمة العليا ؟؟؟؟ اول بالتبادى الناس ديل اتصلوا على بالتلفون وقالوا لى جاينك عديل حازم والرشيد افندى وناس المنتدى ؟ وقمت من الصباح انا والمراة نقع ونقوم والبنيات ومصطفى اخوهن والحاج ابوى وطرنا فوق الخروف البسوى العاع والتكاع وضبحناه ما خلينا شى عشان قالوا حازم جاى والجماعة وفى النهاية خسرناوكيلك الله الليمون قفة من سوق ام درمان والدكوة والشطة كيلو الا ربع والبيبسى بالصناديق والشية ريحتها ازعجت الجيران ؟؟؟وفى النهاية حازم ما جاء ؟؟؟؟
دحين يا لبيب لازم تشوف الحكاية دى حدها وين ؟؟؟

انا عملت استئناف للقضيه وكسبتها
والقاضي المفوض قال لابد من اعاده الدعوة من ابومضطفي
ونحن منتظرين ردك ياابومصطفي
فقط لتعود تلك الكلمات الطيبه والناس الطيبين

لاحولة ولا قوة الا بالله ؟؟؟؟؟؟؟ بالله شوف المسنوح دا اسع جاء من وين واختفى ليهو سنين ؟؟؟؟ ضرانى ؟؟؟؟ طيلت الزمن دا انا قلت خلاص محكمة وعند خالى محمد ودبروى ؟؟؟ واخر الحكاية انا بكسب القضية ؟؟؟؟؟؟

خلى بالك واستغفر الله يكون الزول دا دخل رشوة فى موضوع القضية دى ؟؟؟؟؟؟ لكن خالى محمد ودبروى ماهو من عينة القضاة البى يترشو ؟؟؟؟
ومعروف نظام انجليز ؟؟؟؟؟ ؟؟؟ اسع الحكاية دى يشكوها لى منو ؟؟؟ والمنتدى دا كان فيهو زول عاقل وكبير ياهو ود المناصير ؟؟؟؟ وود المناصير ذاتو انا قلبتها معاه فوق تحت وخسرت ود المناصير فى الاسم المستعار وما ادراك ما الاسم المستعار نامت ودالمناصير طار ؟؟؟؟طار ويمكن يطير الطيرة البى عدلها ؟؟؟؟؟ والله مسكين يا ابو مصطفى ماعندك صديق ؟؟؟؟ وحتى خالك صديق الحنونى لخبتها معاه عشان كلمة الحاكومة ؟؟؟ هى بسم الله ؟؟؟؟ الراجل من يقولك المراة قالت والمراة صالت وجالت اختى ؟؟؟؟ واعرفوا دا ماهو زولك ؟؟؟؟ والحكاية بقت ياها حكاية حازم ورفع دعوى وكسب القضية ؟؟؟ الله قادر ؟؟؟؟ انا لازم اعمل طريقة ادفع حازم كل الخسائر وترانى بشكو قلة حيلتى لى ناس المنتدى ؟؟ يا جماعة مافى زول عاقل فى المنتدى دا ويحل لى مشكلتى ؟؟؟؟؟؟؟؟؟؟


تحياتى
ابو مصطفى

غايتو الحكاية بقت صعبة جدا جدا ؟؟؟؟ تقول ود المناصير عديل رغم الاستعارة تجد استعارة كبيرة زى حازم ؟؟؟؟؟؟؟؟؟؟؟؟؟ اسع الناس دى يلموا فيها كيف ويعرفوها كيف ؟؟؟؟ ويقاضوها كيف ؟؟؟؟

اعلم تمام العلم ان هذا المنتدى مليان امنجية وبلطجية كبار وحرامية ؟؟؟؟ بس الناس ما تفهمنى غلط ؟؟؟ برضو فيه ناس رقيقة ومتعلمة وخايفة الله ؟؟؟؟ وناس اولاد ناس واصول ماها تزيف ؟؟؟؟
وناس همها المناصير وناس من المناصير داير تضرى وتكيل ؟؟؟؟؟؟ وناس متلونة بى طباع الناس ؟؟؟ وناس زى الانناس ؟؟؟ وناس لا تتبلع ولا تتلاك ؟؟؟؟ غايتو مصيبة كبيرة ؟؟؟؟اسع زى الناس ديل يخلوا ليهم المنتدى دا ؟؟؟؟ تشيل عصاتك وتحوم زنقة زنقة وحارة حارة وتسال وتضرب والله نسوى شنو ؟؟؟؟؟؟؟؟؟؟؟؟؟؟؟؟ قالوا لا لا لا بس بهداوة وبالحكمة والمنطق كل شى يحل ؟؟؟؟ الغريب فى الامر فى ناس المنطق بتاعها ؟؟؟ عكازى وعكاز وسوق النعوفاب زى عمك با قدان ؟؟؟؟؟ وما ادراك ما عمك على باقدان ؟؟؟؟ طيب زى ديل منطقهم كده ؟ اضربو عكاز ؟؟؟
زى ناس الجابيقه عندنا زمانفى بونى منطقهم عكازى وعكازك ؟؟؟ غايتو اقول شنو الله يسهل علينا وعليهم يمهل ؟؟؟؟

وما نسيت موضوعى وقصتى وقضيتى معاك يا حازم ؟؟
المحكمة لسع جارة وسوف تطول ؟؟؟؟؟

تحياتى
ابو مصطفى

اخوى ابو مصطفى سلام.

والله يا ابو مصطفى متابع كتاباتك ومن خلالها يتضح لى انك زول قلبك ابيض وضميرك صافى والفى قلبك على لسانك , قبل الخزان القلوب نضيفة وزى كلامك دا يتفهم صاح ومابيزعل ,لكن بعد الخزان اخاف يلم فيك واحد يكمشك بى عكاز يفرتك راسك ,قريبى عيسى بروى بحالو ماخلوهو والله يستر .ولكن صراحة قربت تطير ود المناصير وزى ود المناصير دا لو خلا المنتدى اظنى كلنا بنمشى وراهو .
تقبل مرورى