بالحزن والأسى ننعى منتدى المناصير بلدي

إنا لله وإنا إليه راجعون . بمزيد من الحزن والأسى ننعى منتدى المناصير بلدي . هذا المنتدى الذي كانت له صولات وجولات. هذا المنتدى الذي لم شمل المناصير ومن خلاله تعرف الكثير على بعضهم. ألا رحم الله الفقيد رحمة واسعة. على الجميع إقامة تذكار للفقيد ووضع بعض البوارق على قبره حتى يزوره العاشقون والمرضى والخائفون للتبرك.

إنا لله وإنا إليه راجعون ، سبحان الله أليس هذا هو المنتدى الذي تتقاطر إليه وفود شباب وكهول أبناء المناصير زرافات ووحدانا في لقاآته الأسريه سنوياً بالباسقات ، وحدائق الحلفايا والساحه الخضراء وفي كل مناسبه تجمع الأهل تجد أعضاء المنتدى بارزين لهم دور واضح ومرموق وفي كل قضايا المناصير لهم بصمتهم الرياديه ... أين نحن من ذلك الآن ... للاسف تجدهم في الفيس يتحدثون عن شكر منتدى المناصير ، لماذا الفيس ؟ لماذا لا يكون هذا الحديث من داخل المنتدى الام ؟ لماذا لا يتم التواصل من خلاله ؟ إنه حقاً لشي محزن للغايه ولك الحق يا خال مصباح أن تنعيه ولكن لمن ننعيه لانك لن تجد من ترفع معه الفاتحه ، إلا أن ننعيه لانفسنا ، إنا لله وإنا إليه راجعون

ابن الاخت المهندس عبدالحفيظ لك الشكر والتحية سجلت مع الشباب في قروبات المناصير وجلست اتفرج لم اساهم ولا بكتابة سطر واحد أرى أنها نزوة شباب تركوا المنتدى وذهبوا للوجبات السريعة الوات والفيس مناكفات ومشاحنات وكلام في الانتخابات وغيرها. نسأل الله أن يعود الجميع.

والله كلامك صحيح ي شيخنا المصبح فعلا الفيس وجبات سريعه لاكنها لاتترك اثر في النفس فهي وجبه تنتهي مراسم الاطلاع

لكن الوضع هنا يختلف

المشكله ي شيخنا
انا مثلا كل يوم افتح هذا النتدي ولكني لا اجد

مصباح او صديق اوخالد اوسلمان اودكتور عبد الواحد اوعبدالحفيظ

ولذلك ارجع للفيس والخلاف والاختلاف في الفارغة
غايتو الله يكون في العون

لك ودي ي شيخنا

سلام ياعلي خليفة أفتح المنتدى وأكتب ما طاب لك جميع الموضوعات متاحة للكتابة فأكيد لك اهتمامات في هذه الحياة أكتب وغيرك الذي يفتح يكت وكذا يحيى المنتدى بكم. الكتابة لم تخصص لمصباح ولا صديق عبدالله ولا دكتور عبدالواحد الكل يكتب. والناس تقرأ لك التحية علي خليفة.

سووا الصفقه دنقير ---ابروا الاقلام ---حبر ودواية ---الواح وكراسات ---علي خليفة إيديك معانا ---إيديك للوطن ---ويلا هووووب---البجي غاشي اليخت البياض----تعريفة وقرش---مصلاية وبرش---ابريقا يرش---الناس بعدين بي تجي ---الكتابة هنا لها نكهة خاصة ---تغذي البدن ---ماتكتبه تجده مخزون في حرز حصين ---لا سوسا يجي ---لا يملاهو طين ---

حاضرين وملبين للدعوه    كيف ودعون الله ومصباح وعبد الحفيظ  علي العين والراس  واول الغيث قطره سوف اعطيكم خبر مهم ومفرح جدا

السلام عليكم الاخوة الاعزاء
اقسم بالله انه لشي محزن ان ينفض سامر هذا المنتدي الرائع بهذه الطريقة وبعدم المبالاة هذه 
ليس هناك اعتراض علي وسائل التواصل الاجنماعية الاخري ولكن الاعتراض كله علي هجر هذا المنتدي الرائع الجميل بروعة 
اهله وشبابه ومواضيعهم الشيقة ....وانا شخصيا حريص كل الحرص علي زيارة هذا الصرح الجميل كل يوم تقريبا حتي وان لم 
اسجل دخولي ...فاتمني ان يعود الجميع الي ظلال المنتدي الوريفة 
ولكم فائق التقدير

شكرا لك محمد علي وشكرا على هذا الشعر الرصين نتمنى أن نراك دائما في المنتدى والشعر مورد الأدب الرئيس.

تراه دكتور حسن قال المتدى زي شجرة الفأس نأمل أن يكون ذلك وأن تكون الضربة خفيفة. هنالك معارك في الفيس والوات ليس لها فائدة

الله اغفر له وأرحمه رحمة واسعة إلى يوم الدين. والله و الله انا اكثر شخص حزنت عليه لأننا افتقدنا الأستاذة ام وضاح - نجلاء زمراوي.. وما عارف اخبارها شنو.
كان لها دور كبير والله. اضافة إلى اخونا العزيز العمدة أبو مصطفى .. يحفظه الله.. وثم ود المناصير.. الذين كونوا هذا المنتدى.
شكرا شيخنا مصباح على التذكير وتحياتي للعقد الفريد: المشاركين والمتحمسين: الشيخ عبد الحفيظ وهاشم ود. حسن والدنقلاوي و علي خليفة

لكم تحياتي ،،،،، والسلام

شكرا للمتداخلين أن يعود الجميع لمنتداهم والدار دارهم والمساحة وافرة للكتابة

والله ياجماعه انا ماعارف مسكون ومشغول وقلق  علي اهلنا في الاغتراب  دائما  افكر فيهم  وفي كيفيه وجود حل لهذا الاغتراب القبيح الكريه انا الان وهناك من هم مثلي اعني الفئه العمريه  الان سن المعاش  وتفكيري منصب  في وجود تغير في طريقه حياتي خلال الثلاث سنوات القادمه  واهتديت الي ان اعمل في الزراعه  في وواسي وفي بربر وفي البلد  البدايه ستكون في وواسي وبربر  وبصراحه ياجماعه انا بكون معاكم صريح وواضح  تكلفه الارض ماغاليه  رخيصه  تبقي تكلفه التشغيل طيب وواسي المويه والكهرباء دخلت المنطقه (اشتريت قبل اربعه سنه مساحه صغيره هي عباره عن قطع 4 قطع مساحتها الكليه 2400 متر الفكره عمل شتول فيها ) بربر مساحه 10 فدان ايضا سعرها كان رخيص لكن التشغيل  كا الاتي  حفر البئر الارتوازي في حدود اربعين مليون =  4500 دولار  الطرميه الغاطسه مع ملحقاتها في حدود  26 مليون = 2800 دولار  الكهرباء اذا كانت الكهرباء داخله بتدفع مبلغ معين  يترواح مابين  20 الي 30 مليون = 3000 دولار واذا ما داخله تشتري مولد   الجديد  120 مليون جنيه  والمستعمل 60 مليون جنيه = 13 الف الي سته الف دولار 
بعد السؤال  والتمحيص وجدنا ان خمسه فدان  موالح تدخل سنويا  600 مليون جنيه  يعني 66000 دولار سنويا
طيب انا الان بدايت وسوف اتابع معاكم  ونشوف  وبعدين جميعكم من الشمال  اذا في طريقه لقطعه زراعيه امسكوا فيها اليومين ديل الاتجاه زراعه واعطيكم مثالين  واحد اماراتي اشتري  اراضي في التراجمه وعمل ليه ري محوري وواحد اخر من سلطنه عمان  بتاع السلطنه ده هسع عريس ويصدروا برسيم مجفف عائد الرشاش الواحد في السنه مليار جنيه سوداني  يعني 100 الف دولار
واحد باكستاني  عندو 8 فدان في شندي صدر بطيخ في 3 اشهر بمبلغ 1.5 مليار  يعني 166 الف دولار بطيخ بمواصفات معينه الي الامارات  الخلاصه ياجماعه  فكروا عند حضوركم في الاجازات بطريقه مختلفه واستفيدوا من الاجازه
قبل حضوري نهائي للسودان كنت في الاجازات عندي تاكسي اعمل عليه وكان الهدف الاساسي من هذا التاكسي معرفه الامور يعني دراسه جدوي  بيان باالعمل زي مابقولوا ناس الجيش  وفعلا كانت تجربه جيده وفعاله
ختاما اتمني ان  تتوفقوا في مشوار الحياه القصير
 والواحد يلقي ليه فرقه بعد ان ينتهي من موضوع التزامات الاولاد يلقي ليه فرقه للصياعه ويكون خالي مسؤليه وتصيع بمزاج

لك التحية الباشمهندس هاشم الجزولي وأنت تفكر بطريقة سليمه وتشيل معك هم الناجعين في بلاد الله أشتاتا 
 البروف محمد عثمان علي حجازي قال نحن قربنا علي المعاش وقال ناوي يقضي باقي العمير في البلد --يزرع ويسوي ليهو غنيمات لزوم اللبن والضبايح --وقال الواحد كان لقى ليه بنيه صغيرونة  زي سرير النوبة يعرسا تبقي الحكاية آخر حلاوة --البروف جادي --بس اوعي ياهاشم تكون تفكر في سرير النوبة بعد المعاش  
 ياهاشم انا لي خبرة لا بأس بها في الزراعة فقد إشترينا مزرعة بكنور منذ الثمانينات --زرعناها بنفس الفهم القديم --معظم المساحة زرعناها نخيل ونخيل السودان الذي نفتخر به للأسف أنواعه سيئه إذا قورنت بالتمور في الخليج --يعني لايصلح ولاينافس كصادر وقد إنخفضت أسعاره بعد إنفصال الجنوب ---قالبلتنا أيضا مشكلة كبيرة في التسويق --فعندما يكون الإنتاج عاليا تنخفض الأسعار بصورة مذهلة --وأظن أن هذه كانت إحدي مشاكل الزراعة في السودان إذ لم تهتم الدولة بالزراعة الحديثة ولم تفتح أسواق خارجية للصادر --الآن الوضع تغير عندما فتح الصادر ----أخي الزبير إستفاد من هذه التجربة إمتلك مزرعة قريبة من مزرعتنا وبدأ الزراعة بطريقة حديثة وترك النخيل واتجه صوب البستنه - 
 ياهاشم الغربة داء لعين ولكن السودانيين إتخذوه إستيطانا والوليدات تعودوا علي هذه الحياة الرخوة وماهم دايرين يرجعوا --الله المستعان 
     واصل أخي هاشم في هذا الموضوع الجميل 
            ولنا عودة

شكرا يا دكتور  بخصوص حديث البروف  ما اظنيت يقدر علي سرير النوبه لكن  انا مفكر اقضي المعاش  مابين البلد  وبربر والخرطوم  يكون عندي راس خيط بي مزاج  اما عن هم الاولاد  ماشين كويس  قربنا بتفك منهم  (زي لعبه الوست  تقوم تاخذ اسنا   عمرها ما تتفك  عشان كده بدري بدري المخارجه ) باالرجوع لموضوع البروف  اذكر لاول مره عند ذهابي لبربر بخصوص شراء المتره  قالوا لي يازول  نديك مره من بربر عشان العلاقه تمتد  جيت حكيت للزوله  هنا   الطريقه التفكني ما لقيته انا خايف بعدين سفر بربر يجيب مشاكل قدر ما تقول ياجماعه نحن في المعاش  دايرين نستمتع بما تبقي لنا من عمر بدون صداع والواحد يموت موته مجيهه

غايتو أنا الجابني هنا... سريير النوبة بتاع دكتور حجازي الرواهو ود عون الله

أوووووه  ود العمي على خليفة حسين... صحن.. الحمد لله البقيت عضو مسجل بعد قارئ جيد...
 تجدنا  في المنتدى إن شاء الله
..............
 علي الصحوني زمنك راح
 واخد الدغفلييي صباح
............
 دي أغنية يا جماعة زمن الزمن سمح.. لما كان علي خليفة  يسوق الساقي في ساقة الجعل في فقاعة..
 وللما بيعرف
 علي خليفة حسين.. هو شقيق الزعيم عثمان  خليفة حسين صحن..
 وشقيق المرحوم  العقيد  طيار أحمد خليفة حسين
 ومحمد خليفة حسين
 وأختهم الوحيدة بت العمي زهرة أطال الله عمرها

سرير النوبة ده لا أنت ولا أنا و لاهاشم ولا بروف حجازي انتبهوا الجماعة ديل دفعه ممكن يتكتلوا مع بعض وبعدين نروح فيها.

ههههههههههههههههههههههههههههه   دكتور

والله يامصباح   بي حليفتها  انا من الاول قلت راي  لكن انت ما كتبت الزول الجاب النضم ده مالك  الموضوع ده كتبو الدكتور ود عون الله  وانا عارف قوه حكومته  
انا اليومين ديل عزابي  قالت ماشي عطبره انا خايف تكون مشت تفتش بي جهه بربر  الله يستر

ياجماعة سرير النوبة دا خلوهو للبروف ---امسكوا في اللبودي

يا اخوانا إنتوا مسعولين من الخير بارك الله فيك --عفوا صاحبنا عبد الحفيظ وينو اعل ماهو قاعد يفتش في سرير نوبة ---اصلوا زول كلس وسرير النوبة قاعد يعرف يقبضو ---والله إشتقنا لو

هو ود الاخت عبدالحفيظ زمان قبض سرير النوبة لكنه طار منه. لك التحية دكتور حسن ونسأل الله ان لا يحوجنا لسرير النوبة واصله سرير النوبة مافيه فائدة . زمان عمر الدمري قال : فرق الحضرة من الحضرة زي فرق الصقر من طرير سرير النوبة
لماذا سمي بسرير النوبة ؟ نبحث عن إجابة !!

شيخ مصباح سلام 
 المشي جنب الحيطة سمح بس ماتجي مطر شكشاكة وترمي الحيط 
كلمة سرير النوبة أثارتني من زمن بعيد ولم أجد لها تفسيرا ---لعلها حكرا علي المناصير فقط ولاتنتشر في مناطق السودان الأخري 
هل لها علاقة بالنوبة سكان المنطقة الغابرين ؟ ---هل أطلقها العرب عندما إستقروا في هذه المنطقة ؟ هل لها علاقة ما بتاريخ المنطقة وسكانها الأوائل ؟ ربما هذه أو تلك وربما لا هذه ولا تلك --فعلا تحتاج لبحث  
هاشم الجزولي وأبوحنة ربما يفيدوننا

في يوم الجمعة الماضية اتصل علي أخي طلحة وفي أثناء المكالمة أخبرني بأنه أشتري أرض  في مشروع الأمن الغذائي وعندما سألته عن السعر قال أن سعر الفدان يتراوح بين العشرين والخمس وعشرين  مليون حسب نوع الأرض --خصوبتها  وموقعها 
 الأرض تروي من المشروع وهي مياه من النيل وتكلفة ري الفدان في الشهر 58 الف جنيه لا إسبير ولا جاز ولا زيت والري منتظم 
 يبو يا هاشم فعلا ان الناس بدأت تتجه نحو الزراعة ---وقد أفادني أن هنالك إقبال علي الشراء وأن الأسعار في إرتفاع مستمر --ايضا قد أدخلوا الحيوان في الدورة الزراعية كما إهتموا بزراعة البساتين والبرسيم

كلام جميل يا دكتور كلنا الزراعة دايرين خبرها

اعنقد ان هناك خطا في السعر يادكتور  ده سعر المتره وليس سعر الفدان قبل اربعه شهور  والمتره فيها عشره فدان  الان في زياده ولكن لن تكون كما ذكرت يعني ترتفع المتره الي 35 مثلا يكون سعر الفدان   3500  جنيه تكون الزياد ه في حدود مليون جنيه للفدان  او الف جنيه  او  400 ريال سعودي  ياجماعه اني لكم من الناصحين اسمعو الكلام وفكروا في الموضوع
طبا شراء الاراضي الزراعيه لازم معرفه  انا طبعا زول الله في بلد الله  خدمتني الظروف وطبيعه العمل  مابعرف اي حاجه  ما زي ود عون الله   نجيض  وكمان حكومته تنجضه زياده  انتصار طالعه لي ابوها زول تاجر  عشان كده البيت منجض تب
  علي ذكر الحكومات  اليومين ديل في الواست نكته متدواله  عن الحكومات
 واحد عنده صديقه   التور نطح مراته  وماعنده خبر  شاف الناس ملموين في البيت  قال الحاصل شنو كلموه  قال ليهم المراه هسع كيف  قالوا ليه قالو كويسه مشي لجوه البيت في الزحمه  لم في صاحبه المراه انشا الله كويسه  قال ليه يازول المره ماعندها حاجه شديده   طيب الناس ديل ملموين لي شنو  الناس ديل دايرين يشتروا التور

لك التحية ياهاشم نحن جادين شوفوا لنا خبر الأراضي الزراعية سوف اتصل إن شاء الله بالدكتور حسن وأشوف خبرها بس بسعره زي ما قلت غالي جدا.

الاعزاء الكرام المشاركين الافاضل الخال مصباح والاخوان ود عون الله وهاشم الجزولي ، لكم عاطر التحايا وأطيبها ، منذ زمن طويل كل سنين الغربه نيف وعشرون عام وبعد العوده للسودان قرابة العشر سنوات ، لم أستمتع بحياتي كما أستمتع بها الآن وبعد نزول المعاش وأصبح زمني حقي وأقضي فيه أمري على مزاجي بعد مشيئة الله عز وجل .... أنا الآن في كسلا أم تقاق منذ حوالي خمس أيام وقبلها أمضيت أسبوع في وقر الخضراء حيث مسقط رأسي والبصمه المنصوره وسط الاهل والعشيره ومراتع الطفوله والصبا والشباب وإجترار الذكريات والبكاء على الأطلال ، لم أنعم بمثل هذه السانحه منذ أمدٍ بعيد ، حضرنا ومعية بعض أفراد الأسره زواج أخي عبد الماجد محمد علي النافعابي من سليلة الحسب والنسب كريمة الاخ محمد محمود سليمان في وقر وكانت ليالي مليئه بالفرحه والمسره وسط الاهل والاقارب في تلك البقعه الحبيبه إلى نفسي ، وها أناذا في أحضان جبال التاكا توتيل ومكرام توكروف والحلنقه وديم المرغنيه وأصدقكم القول .... دعكم من سرير النوبه القديم .... أني مشرّك لسرير نوبه جديد يوائم المرحله ويبرد الشيب كما يقولون ومن ضفاف القاش هذه المرّه ، إخوتي الافاضل الحديث معكم ذو شجون والليل هوّد والفرقان كلابهم صاحو .... تصبحون على خير وإلى اللقاء حتى نكمل حديث الزراعه والمشاريع والمترات وهذا جزء مهم من وجودي حالياً في كسلا وبالله التوفيق

ابو الزفت ده الكلام   البعجب  صديق  وتحت وتحت دكتور ود عون الله   خطير  خطير سرير نوبه عام 2015  والله نقول شنو  الله يقدرنا علي خشمنا

ود الأخت المهندس عبدالحفيظ ما تنسى خالك من سرير النوبة أصله سرير النوية عنده ألوان مختلفة وشوف لخالك السرير المناسب لك التحية المهندس النشط وألف مرحب بالفكرة وأنت أصلك مطعم جاهز. ولا نامت أعين الجبناء ولا الخائفين والسادين خشومهم.

ههههههههههه شباب سووا المزارع والمترات القالا هاشم بعدين بصورة تلقائية بي يجي سرييير النوبة؟
 بس تمر الهبوب خبرو شنو؟ يا دكتور مصباح
...........
 أما يا هاشم فعلاً زولك حكومتو أقوى حكومة في حكوماتنا كلنا.. وما عندها لعب.. واحد زايد واحد يساوي اتنين... ما شفتوا قال مباري الحيطة في الكلام وخايف من شكشاكة تجي ترمي فوقو الحيطة
..................
 يا أخوانا الأراضي البي تتكلموا عنها دي وين؟  الأمن الغذائي دا وين؟ أظنو جيهة عطبرة ؟
 وأنت واطاتك وين يا هاشم؟  أظن جنب بربر..أفتكر عايزة ليها حفر ارتوازي صاح؟ كدي شوف لى جنبك يا هاشم لو سعرا رخيص.. بس ملاصق ليك.. وأنا وانت نحفر مترة واحدة ووابور واحد يسقى لينا..
...........
 ناس الخرطوم عشان كل جار من بلد.. كل واحد يتكلف الملاين المملينة عشان يعمل سايفون لى بيتو... مع إنو السايفون الواحد يكفي ستى بيوت؟
.........
 هسه أنا  عايز أشتري جنب هاشم..  عشان ننسق مع بعض..
 سلام على ود العمي علي الصحوني.... القارئ الجيد

وأنا معاكم ياهندسة عشان نستفيد من المهندسين أصلنا نحن مزارعين نعرف الاربل والواسوق

الاخوان صديق والمصباح  قطعا الناس لمن تكون قريبه من  بعض شيء كويس  لكن انا عندما طرحت هذا الموضوع  طرحته كشيء استثماري  ويكون راس خيط ليكم  وعليه ربط المزرعه او المتره بموقع معين  هذا يحتاج لزمن  وزمن كتير  ففي المنطقه التي اشتريت فيها  لم تكن لي سابق معرفه او درايه بهذه المنطقه  منطقه بربر  ولكن كما ذكرت طبيعه العمل هي التي ساعدت في ذلك  عليه ارجو ان تتصلوا بمعارفكم في السودان  هناك مناطق الان  تحت التقسيم في منطقه نوري  وتحديدا في الطريق الذي يربط مروي بعطبره ممكن تشوفوا واحد من معارفكم في منطقه نوري او كريمه للمتابعه
  شخصيا سوف افيدكم بالراي والراي ليس اكثر  ومن خلال  مفتاح الكمبيوتر

كل الاهل والعشيره
احببناكم
ومازلنا

لي عودة ان شاء الله .

شكرا ياهندسة الواحد حقيقة أصبح متخوف من توكيل فلان ومن مشروعات السفارة التي تعرضها مشروعات تمكث عشرات السنين حتى ترى النور وبعضها يظل قابعا. وأقرب مثال هو مشروع سندس ويمكن أنت حضرته في السفارة طلع مقالب وما اظن في مغترب استفاد منه عموما المترة أفضل وربنا يوفق الجميع وسوف نحاول الانصال بخصوص الموضوع.

الاخ مصباح  المعلومه قطعا سوف اعطيك اياها لكن المتابعه للتنفيذ صعبه جدا ان لم تكن مستحيله لكن الفكره  اري انها جيده وانا فعلا خدمتني ظروف  وهذه واحده من حسنات التواجد في البلد وبعدين يامصباح  من تجربتي  السودان مافي زيه  الفرص الموجوده هنا  لاتوجد في اي دوله بس دايره النفس الطويل  وباالتركيز علي موضوع بربر  كما ذكرت لك موضوع المتره 10 فدان  وحفرت البئر  وباالامس حضر لي الزول الكان سبب في اشتري في بربر وكان الحوار التالي  اها ياهاشم  انا جاهز ياياسر  بس داير انهي موضوع الكهرباء بان اشتري مولد كان رده ان الكهرباء تبعد عني مسافه 15 عمود  تكلفه العمود مع السلك مع التركيب  5000 جنيه  خمسه الف جنيه للعمود  وناس بنك المزارع جاهزين للتمويل 
شوف ينك المزارع  بمول  المشاريع الزراعيه  هذا غير  البنوك التجاريه  هناك توجه رسمي لتشجيع الزراعه  وزراعه البرسيم  والبستنه  المناصير  في الايام القادمه سوف يكون هناك تركيز في الاستثمار في البحيره ايضا وسوف يكون هناك اجتماع يوم الخميس القادم  في اب حمد سوف يتناول الخطوط العريضه   اري  ان الاوان قد حان لوضع ارجلكم داخل  السودان  وعدم الاكتفاء بتجميد الاموال  في اراضي سكنيه  او بيوت  من التجربه  هذا استثمار  لشخص غير طموح  وفي النهايه مابعيد من الوظيفه لانه دخل محدود

أفكار حلوة ياهندسة بس ربنا يوفقنا نجي إجازة ونظبط المواضيع

ايوه يادكتور اخير تجوا وتزبطوا المواضيع  اللخليج ده لي قدام اموره جايطه  المخارجه من بدري اخير  كراع جوه وكراع بره  الناس تتعظ من ماحدث في الكويت وليبيا وبعدين السودان ده مهما حصل  علي الاقل عطش مافي  المويه راقدي تب   النيل حدادي مدادي  غير الابار الجوفيه التي ملت البلد  السودان يعاني من مشكله اداره  لكن موارد  ماتقولي لاخليج ولاغيره  بلد موارده ضخمه جدا

شكرا المهندس هاشم فعلا السودان واسع ويسع الجميع سوء الإدارة لن يستمر وحواء والده وربنا يولي من يصلح. وكما قلت المخارجة من بدري أحسن.