ماهو صدى منتدى المناصير بلدي في البحيرة!

والله طمنتنى يا سلمان..
الفضل يرجع لإدارة المنتدى . العظيمة... العظمة لله
ثم لأعضاء المنتدى

ما تنسي انتصار حجازي
وحواء المنصورية عموما

وآدم المنصوري
هههههههههه

هو في الحقيقة حواء المنصورية هي التي فرضت نفسها هنا.. بأمانة نخاف منهن عديل كدة..
برضو الرجل المنصوري المتعلم المثقف حساس وخجول ومؤدب وود ناس..
ومعظم الناس الهنا الفي المنتدي هم زمن التربية الصاح في المناصير.. اشرف على تربيتهم جيل من الاباء يستحيل يتكرر. اتغرست في نفوس اولادهم هنا تربيتهم.. وتغلغلت في أعماق النشأ... لو عايز تخليها التربية دي ما تخليك..
المجتمع المنصوري زمان كان في العاصمة والله في البلد قاس جدا في مفارقة افراده. لايرحم..
ما شايفه ابو مصطفي مرة مرة بي هناك يكرر عبارة كان فلان غلط عليك ( نبطحوا ليك ) وحكاية يقول ليك فلان بطحوه دي.. كانت مشكلة وادب.. الحلة كلها والبلد كلها تسمع بيهو..
الفرد المنصوري طبعا موش ملاك يا انتصار
لكن محرم اي عمل يخل بالمجتمع في المنطقة... بعييييد بعيييد.. كان الزول يشرب ..
حتى الناس زمان البي يشربوا يمشوا بعيييد من الحلة.. بيت في التمر . بيت جنب البحر..
المجتمع المنصوري كان صعب شديد لايغفر ابدا..
عشان كدة معظم الناس ديل الهنا تربوا على يدي جيل من الصعب يتكرر..
.........
ولايعرف تربية المناصير لأولادهم إلا من يختلط مع مجموعات تانية... المناصير الكبار ناس أذكياء بالفطرة وصعبين في التربية شديد.. والأدب..
بالله يأدبوك لامن تقول بس
.......
معليش أنت بت عاصمة ويمكن ما تعرفي الكلام ده!
هسي الدحش دون مواخذة. لو ما أدبتيهو.. ولجام وصريمة لامن خشمو يكب الدم. كان ما عملتي ليهو كدة بعدين مافي زول يقدر يخت فوقو سرج..
الدحش لو خلوهو ساكت بلا أدب.. تاني يستحيل زول يقدر يخت فوقو سرج
.........
زمان شيوخ الخلوة والطرق الصوفية عندهم سلسلة تعريف
يقول ليك
تلقى الأدب على شيخ فلان
وتلقى التجويد على شيخ فلان
وتلقى الحديث على شيخ فلان
وقرأ الأجرومية على شيخ فلان
واعاد ( كرر أعادة التلاوة) على سمع شيخ فلان
........
شوفي اول حاجة الأدب... تلقى الأدب على شيخ فلان..

نعم يا سامي نعرف كان ممكن تكتب أكثر. لكن القيود..
لكن برضو ما قصرت في الإبداع الذي لايمس أحد ولايتضرر منه أحد..
لكل وقت كلام ولكل زمن رجال وانت منهم.

شكرا الباشمهندس صديق على فتح هذه النافذة لنتنفس منها هواءا عليلا .
وكم انا سعيد بهذه الاخبار عن اهلنا بالبحيرة وعلى اتصالهم وتواصلهم الكترونيا بابنائهم بالداخل والخارج عبرالمنتدى فنحمد الله على هذه النعمة , عندما قدمت الى الامارات فى التسعينات لم تكن هناك اى وسيلة اتصال بالسودان الا الراديو بعد الحادية عشره ليلا وروادى معينة , اليوم الحمدلله الاتصال بالمناصير مباشرة وبجميع طرق الاتصالات .
فان اهلنا بالمناصير عامة وبالبحيرة خاصة لهم حق علينا الا نجرح مشاعرهم باختلافاتنا وان نشعرهم باننا سندهم بعدالله وان نرفع من هممهم وان نوفر لهم ما يحتاجون حسب الاستطاعة انهم اهل الرباط فطوبى لهم .

نعم كلامك ده مهم جدا يا نصر الدين. أن لانزعجهم ولا نجرح مشاعرهم باختلافاتنا هنا..
ويجب الواحد يتحرى من اقواله، قبل اطلاقها عبر الفضاء..
لكن على كل ده هنا... تكل... مطبخ... محل عواسة.. والدوكة تعوس الشكلوكة.. والملياني عجين.. والبرادي العجينا مهرود.. والبرادي السالمي السمحي الحمراء ضهر غزال...
بعدين البرادي وقطعة الكسري السمحي بي يرصوها في صحن الخلوة البي يطلع على الضيوف والمشكلكة والكعبي بي يخلوها قبلا في الطبق... او يرجعوها يموصوها من جديد مع العجين... هكذا مساهماتنا هنا.. في منجمها
لذلك الناس ما يهتموا بالعواسة الفي تكلنا ده؟
ويهتموا بس بالصحن المملح الطالع للخلوة والديوان..( الني لى نارو) قالوا المناصير

ياجماعه في ناس كتيرة ماعندها فكره عن المنتدى في ناس كتيره في الفيس بوك فعاله شديد بتنشر في القروبات حاجات حلوه عن البلد
وبعدين معليش ياخوانا المنتدي نهائي مانشيط
وبرضو في البلد مافي ناس بتعرف في منتدى

رمال الكاب..
ناس الفيس بوك. قالوا ناس عشاق.. أو احباب.. عندنا بوست عن الفيس بوك هنا.. جابوا العضو أبو سفيان... تكلمنا فيه كثير عن الموضوع ده!
أما نحن هنا أخوانا على سرر متقابلين.. فينا جميع ألوان الطيف المنصوري
بعدين منتدانا ده ظاااهر على جيهتنا ديك. يا زولة... بس يمكن على جيهتكم رمال الكاب بالزحف الصحراوي غتتوا وكدة؟
شدي حيلك أظهريهو للناس على جيهتكم... إنت أمسكي من الدومات ولا فوق.. ونصر الدين ابوزيد يمسك بالغرب من السادي وحجر البيضا لى غاية القناويت... والباقي خليهو لى سلمان عقيد.. يعني أعملوا حملة دعوة لتعريف الناس بالمنتدى..