الخرطوم/ كريمة

اليوم الجمعه فى قطار ركاب حيقوم من محطة الخرطوم إلى كريمة توجد أماكن على كل الدرجات والماعندو حق التذكره ماعندنا مانع ممكن يزاوغ من الكمسارى وكان زولا نشيط ويحب المغامره برضو مافى مانع ممكن يسطح على مسئوليته ، وسيمر قطارنا بالمحطات المذكورة أدناه ، أنا متأكد فى ناس كتار ماشافوها والمروا بيها قيل كده أنا برضو متأكد أنهم فى أشد شوق للسفر بالقطار مره تانية وتالته ، أنا شخصيا أحب السفر بالقطار ،
الآن تحركنا من محطة الخرطوم عموم وبالنوافذ نلوح للمودعين وماهى إلا لحظات ونحن نمر على كبرى النيل الأزرق وسلام يابحرى ، ماقعدنا فيها كتير قِـلة خير إنطلق قطارنا ميمما الكدرو التى تبعد 18كلم ومنها قلنا يامسهل ويالـقــُبة سلام ثم الجيلى حيث فيها الموز طازج ورخَيس وفيها السندوتشات بالفول وبالطعميه ، لكن القطر ماوقف فيها كتير رغم أنها محطة فطور ، وأحذر أن تكون بعيد لأن سواقنا ده مشهور بالقومة السريعه والشى التانى  من هنا ولاقدام كان القطر فرطك مافى تكاسى ولاعربات ممكن تأجرها وتلمك فيهو ، وبعد الجيلى ضربنا الصحارى فكانت محطة الرويان وبعدها جبل جارى والميجا وودبانقا والقوز ثم الكيلو 172 سلام ياشندى ، محطة كبيرة ومنظمة فيها رصيف ، وكان نشطين ممكن تمشوا السوق وتتغدوا وجبة سخنه فى المطاعم وتشربوا البارد ومن سوق المحطه ممكن تاكلو الطعميه بالـدُقه وتشربوا الشاى وبعد داك تشتروا المناديل والتياب البنقالى وكل وارد مصانع النوراب وشندى .
أنا شايف فى ناس كُبارات قاعدين فى السنطور وأمامهم الطاولات ذات المفارش البيضاء وياكلو بالملعقة والسكين وقدامهم كبابى عليها ـ  S.Rعلامة السكة حديد المشهورة . سامع الأذان نلتقى فيما بعد لنواصل رحلتنا بإذن الله تعالى ...

يالله واصل ياهندسة--محطة محطة وسندة سندة-----بس نساعدك باسئلة---هل تم شحن عفش صحبة راكب ؟--جهزتو الزوادة ---(علب طحنية سعد --وفوقا علامة s كبيرة ورغيف حار)---التوالت مليانة --الازيار موجودة --ماتقعدوا جنبها--عشان ماكل مرة تناولوا الموية---هل فى هذه الرحلة سيرة--بكاء--هل هنالك جموع للمودعين ودموع يرددون مع الشمبانى يوم شالا القطار صفر--هل قطر ضحية ---جاييك راجع بعد ان تواصل الرحلة --

دي رحلة عجيبه مستفين عفشنا وزوادتنا جاهزه وفي الانتظار عشان نتحرك الله يوصلنا بالسلامه بسم الله مجراهو ومرساهو

اوعا من تقعدلك جم شايقى  اعصر على الرباطاب

سلمان عقيد النعوفابى كتب:يالله واصل ياهندسة--محطة محطة وسندة سندة-----بس نساعدك باسئلة---هل تم شحن عفش صحبة راكب ؟--جهزتو الزوادة ---(علب طحنية سعد --وفوقا علامة s كبيرة ورغيف حار)---التوالت مليانة --الازيار موجودة --ماتقعدوا جنبها--عشان ماكل مرة تناولوا الموية---هل فى هذه الرحلة سيرة--بكاء--هل هنالك جموع للمودعين ودموع يرددون مع الشمبانى يوم شالا القطار صفر--هل قطر ضحية ---جاييك راجع بعد ان تواصل الرحلة --

أواه ذكرتنى ياالأرباب ، يعنى إنت دايرا بضُبانتا ، اكان كدى دايرين لينا كام صفحة ، يااخوى إنتو كلكم فى الرحله دى ومن حقكم تقولوا مشاهداتكم وإنطباعاتكم عنها مهما كانت بسيطه واعتبرونى أنا سواق القطار مابكون فايق مافيه الكفاية وقد لاأرى ماترون ،
تشكر أربابنا النعوفابى الأصيل على المرور والمداخله القيمة دى مع خالص تحياتى وتمنياتى برحلة جميــــلة ...

عازه كتب:دي رحلة عجيبه مستفين عفشنا وزوادتنا جاهزه وفي الانتظار عشان نتحرك الله يوصلنا بالسلامه بسم الله مجراهو ومرساهو

أيوا ياأختى عازه طبعا ضرورى من تستيف العفش وأهم شى الزواده تكون مدنكله وماتنسى يكون معاك سعن للمويه يتعلق بالنافذة عشان يبرد لأن موية الأزيار دايما حاره وماها على العدل ، وقطارنا ده تمام موصى عليهو فى مرمة عطبرة وما حيكون عندو أعطال بإذن الله تعالى ، شكرا على مرورك  مع تحياتى وإنشاء الله تصلوا بالسلامة كلكم ...

اميره الحومرى كتب:اوعا من تقعدلك جم شايقى  اعصر على الرباطاب

مشكورة أختنا الفاضله أميره الحومرى على المرور وعلى الوصية ،
ورحلة موفقه إن شاء الله ...

هووي ياالفكي انا أول مره سافرت للبلد كان السفر باللواري وكنت في اوله متوسطه والسفر كان كيف ؟كنا مسطحين فوق الشحنه وانا سامعاهم يقولو اخير من سفر القطر زمان ،واستمرت الرحله ثلاثه ايام مابنساها مدة ماحييت بعد ماوصلنا تلاته يوم انا السرير جاري بي وماعارفه اوقفو كيف بس اغمض عيوني ادور انوم السرير يتحرك تعبت تعب ومن وصلت انا ابكي لي امي واقولها حانرجع كيف ؟سفري للبلد انذاك رحلة كشاف وقضينا اجازه جميله مدتها تلاته شهور ربطتني وجدانيا بذكريات وطعم خاص لاتجده الاهناك

أنا حجزت كنبة في القطر ده!
 بس متفرج بس.. وأسمع الحكي الممتع من الباش مهندس؟
 سهام سافرتو بي لوري منو؟ ونزلكم اللوري وين؟
.......

ياصديق سافرنا بي لوري الجبور ونزلنا وفطرنا في منزله ويقال له جبل الجبور وسائق اللوري يقال له ابكر وناس الجبور تربطنا بهم قرابه ببت جاموسه قريبة امي

ايوه يا سهام ناس الجبور معروفين.. وتربطهم علاقة مع شقيقي عمر رحمه الله.. عمر  أخوى كان عندو لوري واشتغل كتير في الترحيل بين الناصير وأم ردمان.. نعم بت جاموسة معروفة لدينا..

تسلمي اخي الفكي احمد 
انا لا ادري لسوء حظنا او لحسن حظنا اتولدنا واترعرنا في زمن الكيزان 
وعصر السرعة والتكلونجيا  الشوارع المسفلتة والسفر بالبصات الي البكاسي من كريمة 
انا حاجز تزكرتين بدل واحدة معاكم ممكن نطلق عليهو قطار الشوق حتي 
لاني عمري ماسافرت بقطر واتمني ذلك انا اراء سفر القطر والمحطات القديمة 
زي ماقال النصري 
اشواقنا والناس البعاد كل   المسافرين  يرجعو 
صوت القطارات من بعيد فوق الفلنكات نسمعو 
المح حبيبنا من بعيد  يهجم  قليبي   ويقطعو
حلم السنين الجاي انا وانت سواء سواء نكملو

نتمنيي من الله ان كل من لهو شوق لي اهله ان يراهم ويجلس وسطهم ويقرب للكل البعيد انشاء الله

حاجزين فى السفريه دى نوم بينو وبين المنامه السنطور
قبل السفر ولانك طولت من البلد اديك معلومه مهمه جدا
محطه الرويان التى ذكرتها والتى كانت بينها وبين محطه الخرطوم
محطه بحرى والكدرو والقبه والجيلى اصبحت داخل مصفاة الخرطوم ويبدا منها الكيلو رقم واحد فى الطريق الاسفلتى
المؤدى الى عطبره
نحن ياباشمهندس وبحكم دراستنا بعطبره تشبعنا بلغه السكه حديد وكنا نفهم معنى بلنجه عطبره وعربه شرك والساعه 24 وقطار مشترك وورشه المرمه والنغمه التى تقال دوما عندما يتاخر القطار داخل المحطه فتسمع فى مقابله
واصل ياباشمهندس نحن جنبك فى عربيه النوم ممكن نتقابل فى السنطور نشرب قهوه سوه

سهام علي محجوب كتب:هووي ياالفكي انا أول مره سافرت للبلد كان السفر باللواري وكنت في اوله متوسطه والسفر كان كيف ؟كنا مسطحين فوق الشحنه وانا سامعاهم يقولو اخير من سفر القطر زمان ،واستمرت الرحله ثلاثه ايام مابنساها مدة ماحييت بعد ماوصلنا تلاته يوم انا السرير جاري بي وماعارفه اوقفو كيف بس اغمض عيوني ادور انوم السرير يتحرك تعبت تعب ومن وصلت انا ابكي لي امي واقولها حانرجع كيف ؟سفري للبلد انذاك رحلة كشاف وقضينا اجازه جميله مدتها تلاته شهور ربطتني وجدانيا بذكريات وطعم خاص لاتجده الاهناك

حبابك عشره ياسهام بس إنت إتوكلى وتعالى سافرى معانا الرحلة دى وبعدين براكى بتحكمى بين سفر اللوارى وسفر القطار ، بس كترى الزواده لأنو الدنيا عقاب خريف ممكن يحصل قطوع للخط لاقدر الله ، وعشان ماتجيكى اللوبة ولفة الراس نحجز لك فى الأولى وللا النوم أيه رايك ؟

صديق عبدالله علي أبوحنة كتب:أنا حجزت كنبة في القطر ده!
 بس متفرج بس.. وأسمع الحكي الممتع من الباش مهندس؟
 سهام سافرتو بي لوري منو؟ ونزلكم اللوري وين؟
.......

عاد ده اسمو كلام ياأبو السرد ؟ قال إتفرج قال ، إنت اكت تتفرج الباقين يسووا شنو؟ وبعدين هو زاتو البريحك ويخليك تتفرج منو؟ الجماعة حيسووا لك الصوعه بالأسئله ، ده شنو وديك شنى وليه داك كدى وده سوهو متين ولشنو والبحر قريب من هنا وللا بعيد ويبعد حوالى كم وعطبره بعيدى وللا قريبى
وكريمة نصلا بتين  و..و.. .. مع خالص تحياتى والكل فى إنتظارك ياباشمهندس ...

انتصار حجازي كتب:

الله ... واضح انو ح يكون بوست ممتع ورهيييب

وواضح انو قطرك دا اخى الفكى احمد ح يكون فيه ركاب كتيرين

لروعه الرحلة

بس شايفا قطرك دا ماشي سرييييع ... يا خوي هدي .... وهدي كتييير فى المحطات .. عاوزين ادق التفاصيل

من اروع الروايات التى قراتها سواء كانت عربية او غربية مترجمه هى الروايات التى فيها سرد لتفاصيل رحلة بالقطار

فرجاءا حتى تكتمل متعتنا مدنا بادق تفاصيل المحطات

الباعه المتجولين بالمحطات وقصصهم

قصص وحكايا الركاب نفسهم

وطرافاتهم ... وصداقاتهم ... والمواقف الغريبة للناس بالمحطات

ويا اخي صديق ابو حنه .. لا لا ... متفرج لااااااا

صديق عبدالله علي أبوحنة
أنا حجزت كنبة في القطر ده!
 بس متفرج بس.. وأسمع الحكي الممتع من الباش مهندس؟

انت برضو استاذ في السرد والتفاصيل الحلوة

فرجاءا مدنا بكل تفاصيل رحلات هذا القطار

واصلا صاحب البوست قال

الفكي احمد
إنتو كلكم فى الرحله دى ومن حقكم تقولوا مشاهداتكم وإنطباعاتكم عنها مهما كانت بسيطه واعتبرونى أنا سواق القطار مابكون فايق مافيه الكفاية وقد لاأرى ماترون ،

وانت يا اخى الفكى برضو ما ح تكون سواق ... بما انك افردت هذه اللفته الجميلة لهذه الرحله فاكيييد لك ذكريات حلوووة مع القطار والسفر ... فمنتظرين روعة سردك للرحلة

ياهلا بيكى بت المنصورى الأصيل ، مرورك عجبنى واقتراحاتك جيدة وياليت نقدر عليها ونوفيها ، لكن زى ماقلنا من قبل معانا ركاب يوفوا ويكفوا ومالا أسرده أنا قد يحكيه آخر وهكذا تكتمل اللوحة بتوقيع الجميع ، مع عاطر تحياتى ...

عبدالدافع على سليمان كتب:تسلمي اخي الفكي احمد 
انا لا ادري لسوء حظنا او لحسن حظنا اتولدنا واترعرنا في زمن الكيزان 
وعصر السرعة والتكلونجيا  الشوارع المسفلتة والسفر بالبصات الي البكاسي من كريمة 
انا حاجز تزكرتين بدل واحدة معاكم ممكن نطلق عليهو قطار الشوق حتي 
لاني عمري ماسافرت بقطر واتمني ذلك انا اراء سفر القطر والمحطات القديمة 
زي ماقال النصري 
اشواقنا والناس البعاد كل   المسافرين  يرجعو 
صوت القطارات من بعيد فوق الفلنكات نسمعو 
المح حبيبنا من بعيد  يهجم  قليبي   ويقطعو
حلم السنين الجاي انا وانت سواء سواء نكملو

نتمنيي من الله ان كل من لهو شوق لي اهله ان يراهم ويجلس وسطهم ويقرب للكل البعيد انشاء الله

سلمت أخى عبد الدافع ماشاء الله عليك شايفك مشارك نشط ربنا يخليك ويعليك مايدليك ، كل ناس بزمانهم ، أنا شخصيا راضى كل الرضاء بزمانا داك سافرنا بالقطارات بتصاريح من الحاكومة لما كنا طلبة وبعد مااستوظفنا كذلك ، وكان السفر متعة لاتعادلها متعة حيث كنا يتم الحجز لنا بواسطة المدرسة
لما كنا طلبة ، فكنا ننسق فيما بيننا وتلقى عربية الحجز آخر ونسه وقرقراب وطنابير وغناء لأن كل الإجازات لكل المدارس فى وقت واحد عشان كدى يتلم الطلبه من كل صوب ويسافروا فى قطار واحد ، فيسمى حينها ذلك القطار ، قطر طلبه ــ كانت لنا أيام ، وكنا ولاد الحاكومه ...

[quote"(الحاج شرف)"]حاجزين فى السفريه دى نوم بينو وبين المنامه السنطور
قبل السفر ولانك طولت من البلد اديك معلومه مهمه جدا
محطه الرويان التى ذكرتها والتى كانت بينها وبين محطه الخرطوم
محطه بحرى والكدرو والقبه والجيلى اصبحت داخل مصفاة الخرطوم ويبدا منها الكيلو رقم واحد فى الطريق الاسفلتى
المؤدى الى عطبره
نحن ياباشمهندس وبحكم دراستنا بعطبره تشبعنا  بلغه السكه حديد وكنا نفهم معنى بلنجه عطبره وعربه شرك والساعه 24  وقطار مشترك وورشه المرمه والنغمه التى تقال دوما عندما يتاخر القطار داخل المحطه فتسمع فى مقابله
واصل  ياباشمهندس نحن جنبك فى عربيه النوم ممكن نتقابل فى السنطور نشرب قهوه سوه [/quote]مرحبتين حبابك ياود شيخنا وحجزك مؤكد ميه فى الميه بس إنت تعال وماتجيب معاك خير غياراتك لأنو السنطور الجماعة الفيهو والقايمين بأمرو أصحابا لينا من حلفا ، وبعدين السفريه دى باعتبار ماكان من سالف العصر والأوان لناس هذا الزمان ، ليروا ويسمعوا ماسيكون مماكان .
مظبوط هناك كلمات واختصارات لجمل ومسميات تخص السكه حديد لزوم التخاطب بلغة التلغراف ، فبلنجة مثلا تعنى قسم الهندسه المدنيه بالسكه حديد وسيمافورات تعنى قسم الإتصالات وهكذا ... لك ودى وحار تحياتى أخى الحاج ...

ياباشمهندس الفكي لك عاطر تحياتي وبارك الله فيك في فتح مثل هذا البوست الرائع لأنه وبصراحه يقلب المواجع لناس كثيره من الأجيال التي عاصرت ذلك الزمن من حيث الذكريات الجميله مهما كانت فيها صعوبه لكنها ممتعه للغايه . ويربط الجيل الحالي من الناس الما حضروا زمن القطارات بتاريخ هم في أمس الحوجه له لأنهم كانوا يسمعون من أهلهم ما كان يدور فيه من حكاوي وقصص وطرائف ممتعه . يا هندسه أجيالنا أنا وإنت والقبلنا زي ما قلت كنا أولاد الحكومه . لكن شوف من عهد الديمقراطيه الثالثه وإنت جاي ما أظن في زول قادر يتخيل ذلك النعيم وتلك المتعه السفر بالقطار . أول سفريه لي بالقطار كانت عام 1965 كنت في رابعه إبتدائي مع الوالد رحمه الله كانت للبلد من وقر لأروما عبر قوز رجب حتى عطبره كان ببصات اللواري السفنجه بدفورد أمضت الرحله نهار كامل وصلنا عطبره ليلا وفي صباح اليوم التالي بدأت الرحله للمناصير . رغم صغر سني وطول المشوار كانت أمتع رحله في حياتي وكاني مكتشف اراضي جديده وكل شي يمر علي أشاهدو لأول مره ده غير المتوقع أشاهدو في البلد ناسها نيلها نخيلها زروعها ... شي لا يوصف .أشكرك أخي الفكي أثرت فينا كوامن من الأشجان والذكريات الجميله .

خط كريمه
محطة الكاب توكيل بريد شيرى حسن احمد الفكى ومنه ليد حسن على الدقير

[ندعوك للتسجيل في المنتدى أو التعريف بنفسك لمعاينة هذه الصورة]

علي الكليس كتب:

لك التحيه الباشمهندس الفكي علي فتح هذا البوست الهام والذي يمثل حقبه عامره مهمه من تاريخ السكه حديد وعلي المستوي المحلي كان يمثل لنا كمناصير مرحله مازالت عامره بالذكريات الجميله وذالك بالرغم من مشقة السفر ولكنها مشقه كانت فيها متعه .نستلم التساريح ولكننا للاسف لانكلف نفسنا حتي عمل التاشيره عليها وعلي طول السطوح حيث المجموعات والونسه والمناظر الجميله والطنابير واخرها النوم الجميل في الهواء العليل ..حتي شراء الحوائج في بعض المحطات يتم عن طريق تصر القروش في اي حاجه للبائع ويقوم يجدع ليك ماتحتاجه ..علاقات ومعارف جديده كثيره وكمان احيانا حب يؤدي الي زواج ..ذكريات بربر وناس قرع ..قرع  ؟؟؟ وعطبره والليموناده اللذيذه  وابوحمد والقفشات الكثيره بين اهلنا الرباطاب بمساختهم المعروفه واهلنا الشايقيه بمحاولاتهم استفزاز الاخر واذكر واحده قد تكون معروفه للكثيرين وهي ان شايقيه ارادت ان تشتري قفة جردق من رباطابيه فسالتها عن السعر الرباطابيه قالت ليها بخمسه قروش واذا بالشايقيه قالت ليها الواطه بخمسه قروش قامت الرباطابيه قالت ليها ..طاطي العقرب الواطه ماتحتك ماتخمي منها
سنواصل معك اخي الفكي

تشكر أستاذنا على الكليس أسعدنى مرورك ومشاركتك الحلوة فهى زيادة وإثراء لهذا البوست وكماذكرت فالسكة حديد تاريخ وعطاء كانت ركن من أركان المواصلات التى لاغنى عنها وكان يستند ويقوم عليها إقتصاد البلاد مع شقيقها مشروع الجزيرة إلى أن حل بهما ماحل ، مع تحياتى ورجاء المواصلة ...

عبد الحفيظ النافعابي كتب:ياباشمهندس الفكي لك عاطر تحياتي وبارك الله فيك في فتح مثل هذا البوست الرائع لأنه وبصراحه يقلب المواجع لناس كثيره من الأجيال التي عاصرت ذلك الزمن من حيث الذكريات الجميله مهما كانت فيها صعوبه لكنها ممتعه للغايه . ويربط الجيل الحالي من الناس الما حضروا زمن القطارات بتاريخ هم في أمس الحوجه له لأنهم كانوا يسمعون من أهلهم ما كان يدور فيه من حكاوي وقصص  وطرائف ممتعه . يا هندسه أجيالنا أنا وإنت والقبلنا زي ما قلت كنا أولاد الحكومه . لكن شوف من عهد الديمقراطيه الثالثه وإنت جاي ما أظن في زول قادر يتخيل ذلك النعيم وتلك المتعه السفر بالقطار . أول سفريه لي بالقطار كانت عام 1965 كنت في رابعه إبتدائي مع الوالد رحمه الله كانت للبلد من وقر لأروما عبر قوز رجب حتى عطبره كان ببصات اللواري السفنجه بدفورد أمضت الرحله نهار كامل وصلنا عطبره ليلا وفي صباح اليوم التالي بدأت الرحله للمناصير . رغم صغر سني وطول المشوار كانت أمتع رحله في حياتي وكاني مكتشف اراضي جديده وكل شي يمر علي أشاهدو لأول مره ده غير المتوقع أشاهدو في البلد ناسها نيلها نخيلها زروعها ... شي لا يوصف .أشكرك أخي الفكي أثرت فينا كوامن من الأشجان والذكريات الجميله .

أهلا بيك أخى العزيز عبد الحفيظ بن محمد على النافعابى لعلك بخير ، شكرا على مرورك الجميل هذا وفعلا السفر بالقطارات بالرغم من معاناته أحيانا إلا أنه يظل سيد الإمتاع و الأسفار بلا منازع ، تمروأنت في قطارك بالكثير من البلدان والمناطق وتسمع الكثير من الروايات والحكايات من مختلف المسافرين معك
 وتتعرف خلال مدة السفر على مختلف السحن والملل ، وتتسمر ناظريك بالنوافذ يمينا ويسارا ، فمتعة السفر بالقطار لاتوصف ، شكرا ولك فائق تحياتى وسلامى ...

[quote"(الحاج شرف)"]خط  كريمه
محطة الكاب    توكيل بريد شيرى   حسن احمد الفكى ومنه ليد  حسن على الدقير

[ندعوك للتسجيل في المنتدى أو التعريف بنفسك لمعاينة هذه الصورة][/quote]شكرا أخى الحاج وصلت الشحنه ...

ذكريات قطار كريمة كثيرة وتشكر أخي الفكي على هذا السرد وإن شاء الله يكون تاريخ للسكة حديد التي نتمنى عودتها وعودة قطار كريمة وحلفا وبورتسودان والقرب والسعون مربطة فيه وطرود البلح والمنقة سادة الطريق. للقطار ذكريات ولكن لنا في هذه الأيام مشغوليات. نتمنى أن يساهم بقية الإخوة في إحياء ذكرى القطارات.

مصباح محمد مصباح كتب:ذكريات قطار كريمة كثيرة وتشكر أخي الفكي على هذا السرد وإن شاء الله يكون تاريخ للسكة حديد التي نتمنى عودتها وعودة قطار كريمة وحلفا وبورتسودان والقرب والسعون مربطة فيه وطرود البلح والمنقة سادة الطريق. للقطار ذكريات ولكن لنا في هذه الأيام مشغوليات. نتمنى أن يساهم بقية الإخوة في إحياء ذكرى القطارات.

تشكر شيخنا مصباح وأنا عارفك مشغول بالأستعداد للسفر للسودان الأسبوع القادم ربنا يكتب السلامه وطبعا ما أكثر ذكريات السفر بالقطر .
نحن لسع قطارنا فى شندى ممكن تلم فيهو فى عطبرة وحنحجز ليك قمره كاملة لتواصل معانا ، مع تحياتى لك وللأسرة ...

يللا ياجماعه العندو حاجه ما اشتراها يستعجل باقى شايف فى واحدين متلمين هناك فى بائع الـفِـرد ، هى والله سمحة تب للغطاء أنا شخصيا حتى فى الشتاء غطاى الفرده لأنها قطنيه وناعمه ودافئه وبعدين ثمنها معقول ثم أنا بكون شجعت الصناعات المحليه واليدويه ،
سامع القطار نقرولو الجرس وهناك كمسارى الفرمله رافع البيرق الأخضر وينفخ فى صافرته وشايف الناس بدأت تركض وتتجارى على السلالم وهناك وجوه جديده ركبت معانا من شندى ، طبعا شندى عاصمة دار جعل أما المتمة فتقع بالضفة المقابلة وتوجد جزر كثيره بنهر النيل فى مناطق الجعليين هذه .
وماهى إلا لحظات حتى حرك قطارنا عجلاته بتؤده وعلى مهل وفى هذه اللحظات ترى الناس يتزاحمون للركوب ، أوع من يقولوا فلان القطر فرطو ..
وبعد دقائق ازدادت سرعة قطارنا وصار ينهب الأرض نهبا وعلا الغبار والنقع ولف عربات القطار سيما الأخيره منها بالغبار الكثيف ، وأنا من داخل مقعدى أرى ظلال الجماعة المسطحين تتحرك ، وكنا نرى بين الـفينة والأخرى بعض الصبيه يبدو أنهم أطفال مدارس يؤشرون لنا بأن نرمى لهم الصحف والجرابد والمجلات فلملمت بعضا منها كان متناثرا فى عربتنا ورميت بها لهم وهاهم بهرولون ويتسابقون نحوها ، ياسلام إنهم يحبون القراءة والإطلاع السفرية القادمه سأحضر معى كميه من الصحف لأرميها لهم . وبعد 25 دقيقة من السير بدأت سرعة القطار فى التناقص حتى وقف تماما فى محطة التراجمه لعدة دقائق ثم غادرها ميمما صوب محطة كبوشية التى تبعد عن شندى عشرون كلم . وهى محطه كبيره فوصلناها بالسلامة ونزل فيها ركاب من قطارنا وارى هناك جمع غفير فى استقبالهم بالأحضان والسلام وقد أخذوا عنهم متاعهم ورافقوهم داخل البلد ، وهناك جمع آخر يبدو أنهم مودعون أحدا أو جماعة يتجهون ناحية احدى العربات ، بعد ربع ساعه تحرك قطارنا ووجهته هذه المره محطة أم على وقد مررنا مع تعرج خط السكة حديد بجبال أم على وصخورها ووديانها والنيل على يسارنا فوصلنا المحطة بعد زهاء النصف ساعة ولم يتوقف قطارنا فيها كثيرا حيث تحرك تجاه محطة المحميه وهى ليست ببعيدة من محطة أم على فقط تبعد عنها أحد عشر كلم  فوصلناها بالسلامة بعد دقائق معدودة { من الزيداب وقايم بك على المحميه يحميك الإله من شر يابنية } كانت هذه وغيرها ماكنا ندوبى به فى ليالى السمر فى مدرسة شيرى الأوليه .
توقف قطارنا كثيرا على غير عادته ولما سألنا قيل أن هناك مقابلة لقطار بضاعة قادم من محطة العلياب وسيصل بعد ربع ساعة ، عندها نزل جل الركان من عرباتهم وقمراتهم وأطلقوا لأرجلهم العنان فى المشى داخل سور المحطة ،
طبعا خطوط السكة حديد فى السودان كلها ذات نظام الخط الواحد أى ليست خطوط مزدوجة كماهى فى مصر مثلا حيث لاينتظر قطار فى محطه حتى يصل قطار آخر قادم على نفس الخط من الإتجاه المعاكس ، كل قطار وله الخط الذى يسير عليه ، وقد يلتقى قطاران فى نقطة ما فى إتجاهين متعاكسين بسسب إزدواجية الخطوط ، نقيف هنا حتى يصل قطار البضاعة وإلى لقاء بإذن الله تعالى ...

الصبيه الرميتلهم الصحف ديل اولاد حوش بنقا باقى لى كايسسين الزواده برضك ارميلم شويه وياربى هسى بجرو ولا ساكنيين كافورى ؟؟؟

ده بوست لا يضاهيه الا متعة السفر بالقطار اكيد لنا هنا صولات وجولات تسلم باشمهندس الفكي وضيوفك الكرام

اميره الحومرى كتب:الصبيه الرميتلهم الصحف ديل اولاد حوش بنقا باقى لى كايسسين الزواده برضك ارميلم شويه  وياربى هسى بجرو ولا ساكنيين كافورى ؟؟؟

مشكورة الأخت أميره على التعقيب والولاد ماحنقصر معاهم ، ماتستبعدى يكون منهم واحدين وللا واحد هناك ...

الرشيد طه كتب:ده بوست لا يضاهيه الا متعة السفر بالقطار اكيد لنا هنا صولات وجولات تسلم باشمهندس الفكي وضيوفك الكرام

تسلم أستاذنا الرشيد ، مرورك سرنى وفعلا ما أحلى السفر بالقطار ومتعته ، ونحن فى إنتظار صولاتك وجولاتك فى الأسفار يا أستاذ الرشيد
مع خالص تحياتى ...

والقطار يشق طريقه بعد الكبرى داخلا لمملكته وعرينه عطيره عاصمة الحديد والنار ومعقل الثوار ، وأنت داخل لعطبره تشعر بشىء من الرهبه والرغبه فى التجوال لاستكشاف هذه المدينه ذات الصيت والصوت ، أتبرا فهى القلب النابض الذى لايفتأ يضخ الحياة والتواصل عبر آلاف الكيلومترات من الخطوط الحديدية والموانىء النهريه والبحرية ردحا من الزمان والمعلوم أن شبكة الخطوط الحديديه فى السودان من أطول الخطوط فى أفريقيا إذ يبلغ طولها زهاء ال5800 كلم ويذكر لنا التاريخ أن أول خط أقيم فى السودان كان عام  1896 ــ 1897 وكان قد مَد حتى كرمه . وفى عطبره توجد رئاسة السكه حديد وورش الصيانة بأنواعها ، وقد كانت السكه حديد فى أوج عظمتها واتساعها وعطائها عندما كانت تضم كل من مصلحة المرطبات والنقل النهرى وهيئة الموانىء البحريه ...
وقطارنا يتهادى داخلا لعطبرة يبدو عن يميننا سوق عطبرة وعن يسارنا ورش السكة حديد ومكاتب الهندسة والعموم وعلى ذات الإتجاه وعلى ضفة النيل مدرسة عطبرة الثانوية العتيقة والاستاد والسودنه حيت منازل كبار إداريى السكه حديد والتى أنشأت على النمط البريطانى حيث الحدائق والسور القصير والطرق الواسعة المؤديه إليها ، حيث يحس الزائر وكأنه خارج السودان .
فى عهد الرئيس نميرى بدأ تقطيع أوصال السكة حديد واضمحلالها فتم فصل الموانىء البحريه والنقل النهرى ومصلحة المرطبات ونقلت الرئاسة للخرطوم فلم تعد السكة حديد بذات الكفاءة الفاعلة وبدأ التدهور السريع والمريع ، وتقلصت قطارات الركاب إلى الأدنى فأصبحت فى فترة من الفترات قطار واحد لكريمه كل أسبوع بعد أن كانت خمسه قطارات لكريمه وحدها   ــ قطار الزيادة وقطار المشترك فى أيام الأحد والأربعاء بفارق ساعة بينهما تقريبا ، وقطار ركاب يوم الجمعه ...
تتوسط محطة عطبرة تلك الأرصفة التى عن  يمينها ويسارها وهى من أجمل المحطات فى السودان وهناك شبكة خطوط كثيرة على جانبى المحطة للمناورة ورص العربات وتحضيرها إستعدادا للسفريات المختلفة ، حيث لاتكاد قطارات المناورة تكف عن الجلبة والضوضاء ليل نهار ، ومقابل المحطة تقريبا وعلى الجانب الأيسر يوجد مستشفى عطبره وعلى الجانب الأيمن توجد مدرسة عطبرة الصناعيه ، كلية الهندسة الميكانيكية حاليا ...

شكرا الاخ الفكى على هذا السرد الجميل --جاييك راجع لى عطبرة

مشكور الباشمهندس الفكى على هذا السرد
التاريخى الرائع والذى يترك جولة بخاطرنا
على مراحل الدراسة والطفولة
وهذا مايزيد هذا المنتدى حركة ونشاطا

شكرا الأخ سلمان عقيد ونحن فى إنتظار رجعتك لينا تانى بفارغ الصبر
أهــــــــلا وألـف مرحب ...
مشكور أخى عباس محمد على طلتك بى جاى وكان عندك شىء من
ذكريات السفر بالقطر أحكى لينا فكلنا آذان صاغية ...
الأخ سامى مرورك أسعدنى وحقا يالها من ذكريات جميلة تلك الحقبة
من العمل بهندسة السكة حديد ...

أنا غايتو متشعلق في سلم القطر ده1 جنب التصادم
ما لقيت لى محل لى جوة

صديق عبدالله علي أبوحنة كتب:أنا غايتو متشعلق في سلم القطر ده1 جنب التصادم
ما لقيت لى محل لى جوة

ها ها ها هوى ياود طيبة نحن كلمناك بالسفرية دى من الخرتوم تسو فى شنو لهسع
مالقيتلك مكان تركب فيهو إلا السلم والتصادم ماك عارف الركوب فيهن خطر ..
   لاتقف بالباب ولا تجلس على السلم
لكن أنا فى ظنى إنت داير الخبار ولم الشمار عشان كدى قعدت فى السلم .
بس أعمـــــل حسابك وخـلى بالك ...

أكثر مايلفت النظر للداخل لمدينة عطبرة هذا الكم الهائل من الدراجات الهوائية ـ العجلات ـ ومعروف عن عطبره أنها من أكثر المدن إزدحاما بالدراجات حيث نجد أن العمال والموظفين يعتمدون عليها كلية فى مواصلاتهم داخل المدينة فتبدو عطبرة وكأنها موقع ضخم لشركة كبيرة ، فكل السكان يبدأون يومهم فى وقت واحد حين سماعهم صافرة ورشة السكة حديد التى يعم دويها سائر مناطق عطبرة ، وكذلك نجد أن أوقات وجبات الفطور والغداء فى كل عطبرة واحده تقريبا .
فنسق الحياة فى المدينة يعتمد على إيقاع السكة حديد فلا فوارق تذكر بين السكان فجلهم من مستخدمى السكه حديد ، وبحكم الإختلاط فى العمل والسكن والمناسبات الإجتماعية يبدو أهالى عطبرة كأسرة واحدة . وفى عطبرة يقطن ويعمل الكثير من الأقباط فى السكة حديد وفى السوق .
ونحن فى رحاب أتبره تتبادر إلى أذهاننا الأغانى التى فيها ذكر القطار الذى كم وكم ودا ماجاب وكم وكم ودا وجاب ، فنذكر الأغنيه الشهيرة كلمات الأخ المهندس على محجوب خريج كلية الهندسة اليكانيكية بعطبرة ، قطار الشوق متين ترحل تودينا نشوف بلدا حنان أهلا ترسى هناك ترسينا ، نسايم عطبرة الحلوة تهدينا وترسينا ، نقابل فيها ناس طيبين فراقهم كان مبكينا . والتى لحنها وغناها أولا الفنان بابكر زكار بعطبرة وزادها ألقا وجمالا وأداء الفنان المخضرم إبن عطبرة المرحوم بإذن الله تعالى حسن خليفة العطيراوى وازدادت سحرا بأداء البلابل فيما بعد فى السبعينات من القرن الماضى ، وكذلك من الأغنيات المشهورة أغنية من بف نفسك يالقطار ورزم صدرك قلبى طار وينو الحبيب ؟ إنت شلتو جيبو يالقطار ، كلمات الشاعر المبدع أبوصلاح رحمه الله .حقا ما أطيب ناس عطبرة وعشرتهم ... كما ذكرنا كانت السكة حديد دولة قائمة بذاتها فلها شرطتها الخاصة ـــ شرطة السكة حديد ورئاستها بعطبرة . ولها مدرستها الخاصة بتدريب وتأهيل الفنيين والعمال المهرة والتلمذة الصناعية وتدريب وتخريج وتأهيل مفتشى الدريسه وإرسال بعثات لكسب الخبرات خارج الوطن ...

مع هكذا سرد لا أملك غير ان الملم عفشي وننتظر صافرة القطر والزواده جاهزه وكتيره اصلو صديق قبل كده وصف لينا طريقة عملا لكن ياالفكي صديق دا فتشلو محل جوه عشان الرحله تزداد متعه مع حكاويه ،يمين ياالفكي تجيني الوبه الاافلعك بالحجار الخاتاهوم في طرف هدمي،تحياتنا ليك وقد هيجت زكريات الركاب بهذا السرد الرائع.

الزوادة يا سهام ديك بلدي محمر لحمو وملفوف داخل فطير.. ومعاهو دقة. وكمان البكابة موجودة ريحة حلبتا ضاربة.. بس نحن قايمين من الخرطوم للبلد..
 لما نقوم من البلد للخرتوم الزوادة  تكون كما وصفتها
 ولما نكون قايمين من الخرطوم للبلد  الزوادة تكون
 الرغيف الأبيض داك الزمان السمح البي يموع في اللبن المفور لما السفار يجوا البلد مرة السفاري الطياني بعد ما ناخد حقنا في الحلاوة تروح تفتش كرتونة الزوادة تلملم باقي الرغيف تفور لينا فوقو لبن. يتهرد جنس هردة ويموع جنس موعة يا حلاتو؟
 والسافري ذاتو بيكون عامل حسابو إنو في عوينون  بي يتلقوه ومرتو ترش ليهم الرغيف باللبن المفور يعني يعمل حسابو في رغيف الخرتوم عشان تصلنا رغيفتين تلاتة سالمات..
.......
 بعدين كرتونة الزوادة بيكون فيها علبة مربة
 وعلبة طحنية حلويات سعد
 وفيها باقي طعمية شندي الكبارة ديك.. لحم ما فيها زوادة الخرتوم
 الطياني بيكون خاتي ليهو خمسة ترطال صعوط سورج ناجم عشان جنهن صعوط الطيانة عشان في البلد الصعوط الناجم مافي.. بس أنا ما معاهم في حكاية الصعوط ده؟ لكن نحن ناس تراث لازم نجيبا بي ضبانتا

حياك الله أستاذنا الفكى وأنت تعيد لنا ذكريات الزمن الجميل ....  سكك حديد السودان كان لها بريق ولمعان ووقع خاص على كل إنسان جرب السفر على قطاراتها ... سفر آمن ومتعة فى الترحال وأنس طيب فى حضرة رفاق الدرب ... نحن والحمدلله  من الجيل الذى تمتع بالسفر بالسكة حديد  وعاصر حقبة من عصرها الذهبى ... قطارات البخار { الفحم الحجرى } ثم القطارات الكهربائية ... سافرنا  بها ونحن طلاب ... جلسنا بمقاعدها وأعتلينا صهوتها أحيانا ... سافرنا بها ونحن موظفيين  بتصاريح سفر ممنوحة من الدولة ... مررنا بكل عرباتها من الرابعة وحتى الأولى ومن ثم النوم .... ليتها تعود لبريقها من تانى ... فلا بديل للسكة حديد إلا السكة حديد _   ما يحيرنى ويدهشنى لماذا همشت السكة حديد ؟؟؟ وهى من أكثر القطاعات ربحية وكانت تدعم قطاعات أخرى كالصحة والتعليم !!!

لك الشكر والتحايا العطره أستاذنا وشاعرنا عثمان النفر ، حقيقة نحن محظوظون
فقد واكبنا الكثير والذى لايتوفر نظيره اليوم والحمدلله ...
شايف الناس بعد العيد ده ماهن زى ماكانو قبالو ، إقبال ضعيف ومشاركة من القله ،
ياترى السبب شنو ؟ إجازة العيد بدل ماتديهم دفعة ونشاط خلت روسيهم تنجاط ...
فى إعلان بارز فى مكتب المحطه قالوا فيهو بكره الأول من نوفمبر ستكون فى حركه
قطارات فى محطة عطبره ...

شكرا أخى على الكليس على مشاركتك ، ومثل هذه المشاركات هى التى تثرى البوست
وترفده وتغذيه ليكون طاعما ...

مازلنا فى عاصمة الحديد والنار أم قطارةً حامى ليها شرار وديمه معبى بالسفار ، وقد ازدادت الحركة بالمحطه بسبب تلاقى قطار كريمة وقطار بورتسودان المتجه للخرطوم وبسبب كثرة المستقبلين والمودعين بالإضافة إلى العاملين بالمحطة ، سمعنا صوت جرس إيذانا بسفر أحد القطارين فتراكض المسافرون كل ناحية قطاره ، وبعد هنيهة قيل أن القطار المعنى هو قطار بورتسودان وأن قطار كريمة سيمكث بالمحطة ريثما يصل قطار بضاعة قادم من حلفا ...

الباشمهندس الفكى المثل يقول القدم ليه رافع ونحن محاولين نركب قطرك ومتابعين  ولكن قدمنا ما رفع وما أظن سيكون لنا مجال بين هولائى العمالقة الذين حجزوا مقاعدهم , فشكرا يا باشمهندس الفكى  على هذا السرد الرائع وعندما تصل الرحلة الى أبو حمد ممكن نلقى لنا مكان فى الممشى ان شاء الله بالرقم من أن الذاكرة أصبحت خربة حتى أسماء الناس نسيناها وبالرقم من أن الباشمهندس صديق درس فى أبو حمد قبلنا بمراحل يعنى زمن الوسطى ولكن متأكد تماما حتى أسماء حريم الشاى فى المحطة يكون عارفهم فللرجل ذاكرة رهيبة ولذلك نحن لا مجال لنا مع هولائى العمالقة .

أهلا بيك وحبابك عشره ياسفيرنا ، يااخى إنت كان مالقيت حجز نشيلك فوق رؤوسنا ، وكان لسع إنت فى الخرتوم نعمل إشارة مستعجلة للإدارة بقسم الخرطوم يجيبوك بالأوتومبيل بتاع مامور القسم ، والأوتومبيل ده إسمو ربع الطياره من سرعتو ، حيلمك فى قطر كريمة فى عطبره فى ساعتين . وعندنا موافقه من قسم الحركه بعطبرة بإضافة عربه درجه أولى نسبة للعدد الكتير الحاجز من عطبره بقطار كريمة . ونحن فى إنتظارك على الرصيف ، تصل بالسلامة ...