الخرطوم/ كريمة

تذكير بمساهمة فاتح الموضوع :

اليوم الجمعه فى قطار ركاب حيقوم من محطة الخرطوم إلى كريمة توجد أماكن على كل الدرجات والماعندو حق التذكره ماعندنا مانع ممكن يزاوغ من الكمسارى وكان زولا نشيط ويحب المغامره برضو مافى مانع ممكن يسطح على مسئوليته ، وسيمر قطارنا بالمحطات المذكورة أدناه ، أنا متأكد فى ناس كتار ماشافوها والمروا بيها قيل كده أنا برضو متأكد أنهم فى أشد شوق للسفر بالقطار مره تانية وتالته ، أنا شخصيا أحب السفر بالقطار ،
الآن تحركنا من محطة الخرطوم عموم وبالنوافذ نلوح للمودعين وماهى إلا لحظات ونحن نمر على كبرى النيل الأزرق وسلام يابحرى ، ماقعدنا فيها كتير قِـلة خير إنطلق قطارنا ميمما الكدرو التى تبعد 18كلم ومنها قلنا يامسهل ويالـقــُبة سلام ثم الجيلى حيث فيها الموز طازج ورخَيس وفيها السندوتشات بالفول وبالطعميه ، لكن القطر ماوقف فيها كتير رغم أنها محطة فطور ، وأحذر أن تكون بعيد لأن سواقنا ده مشهور بالقومة السريعه والشى التانى  من هنا ولاقدام كان القطر فرطك مافى تكاسى ولاعربات ممكن تأجرها وتلمك فيهو ، وبعد الجيلى ضربنا الصحارى فكانت محطة الرويان وبعدها جبل جارى والميجا وودبانقا والقوز ثم الكيلو 172 سلام ياشندى ، محطة كبيرة ومنظمة فيها رصيف ، وكان نشطين ممكن تمشوا السوق وتتغدوا وجبة سخنه فى المطاعم وتشربوا البارد ومن سوق المحطه ممكن تاكلو الطعميه بالـدُقه وتشربوا الشاى وبعد داك تشتروا المناديل والتياب البنقالى وكل وارد مصانع النوراب وشندى .
أنا شايف فى ناس كُبارات قاعدين فى السنطور وأمامهم الطاولات ذات المفارش البيضاء وياكلو بالملعقة والسكين وقدامهم كبابى عليها ـ  S.Rعلامة السكة حديد المشهورة . سامع الأذان نلتقى فيما بعد لنواصل رحلتنا بإذن الله تعالى ...

أهلا بيك وحبابك عشره ياسفيرنا ، يااخى إنت كان مالقيت حجز نشيلك فوق رؤوسنا ، وكان لسع إنت فى الخرتوم نعمل إشارة مستعجلة للإدارة بقسم الخرطوم يجيبوك بالأوتومبيل بتاع مامور القسم ، والأوتومبيل ده إسمو ربع الطياره من سرعتو ، حيلمك فى قطر كريمة فى عطبره فى ساعتين . وعندنا موافقه من قسم الحركه بعطبرة بإضافة عربه درجه أولى نسبة للعدد الكتير الحاجز من عطبره بقطار كريمة . ونحن فى إنتظارك على الرصيف ، تصل بالسلامة ...

الباشمهندس الفكى أنا بجيب لك أسماء المحطات من كريمة الى الخرطوم وعندى سؤال للناس الذين عملوا فى عهد الرئيس الراحل نميرى يقال أنه أصدر قرار بأن يحول تصريح الدرجة الأولى الى تذكرة طائرة بعد دفع ثلاثة جنيهات تركب بها الطائرة ويا حليل قطر كريمة ويا حليل الخطوط الجوية السودانية فى عهد الكيزان الحرامية .واليكم المحطات من كريمة الى الخرطوم .


محطة كريمة
محطة الكاسنجر
محطة ام رهو
محطة ام غربان
محطة ابو حراز
محطة الدغفيلي
محطة الكاب
محطة كحيلة
محطة محيسة
محطة نمرة عشرة
محطة أبو حمد
سنده الكرو
محطة دقــــش
سندة أمن
سندة كرقس
محطة أبو هــشيم
محطة ابو ديــس
محطة الشــريك
سندة الزويرة
محطة نــــــــــدي
محطة الكــــربة
محطة مبيريكــة
محطة العبيديــة
محطة بـــربــــر
محطة دار مــالي
سندة كنور
سندة خليوة
محطة عطبرة
محطة الدامر
محطة العالياب
محطة الزيداب
محطة المحمية
محطة أم علي
محطة كبوشية
محطة التراجمة
محطة شندي
محطة القوز
محطة بانقا
محطة جبل جاري
محطة الرويان
محطة الجيلي
محطة الكدرو
محطة الخرطوم بحري
محطة الخرطوم

الباشمهندس الفكى سؤال ثانى ما هو سر وجود السندات الكثيرة  بعد مدينة  عطبرة ؟ وهل سترجع السكة حديد الى سابق عهدها بعد ما فشل الكيزان فى طريقة لاستيراد اسبيرات القطارات وكانت آخر محاولة لهم عن طريق شركة فى جنوب أفريقيا وتم ايقاف هذه الصفقة بعد ما عرفت امريكا ذاهبة الى السودان ويا حليلك يا السودان فى عهد هذا الوسخ الإسمه الكيزان .

شكرا الأخ نور الهادى سفيرنا بأوروبا لك منا على البعد حار السلام وعاطر التحايا وكل عام وأنتم بألف خير ...
شكرا على هذه الإضافات والإسهامات الرائعة وعلى الصورة ... ياحليل قطار كريمه والإكسبريس والسكة حديد زمان ، بمناسبة السندات الكتيرة بعد عطبرة زى ماقلت ، هى بسبب الكثافة السكانية فى تلك المناطق حتى لاتكاد ترى مسافة بي قرية وأخرى ، ثم لعدم وجود وسيلة نقل برية بديلة غير السكة حديد فى ذلك الزمان ، ومعروف أن القطارات السريعة لاتقف بالسندات فقط قطارات المشتركات . وطبعا السكة حديد منذ أن استباحها النميرى ماقالت حى العافيه ، ولاأظن أن امريكا ستسمح لأى دولة بتجديد شباب السكة حديد السودانية وستمارس ضغوطها ومافى دوله تحب أن تخسر مصالحها مع أمريكا لخاطر عيون حكومة السودان ...

الباشمهندس الفكى أنا ما نسيت أهم سندة وهى السندة الوحيدة فى المناصير سندة بليلى وهى بين الكاب وكحيلة .

ابوحمد الحبيب زارا وعليهو خلايقو تنجارى
شريك بربر سريع مرة وبعطبرة دق صفارة

يا لها من زوغانات من الكمسارى انذاك

سلام علي البوست الجميل وذكريات القطر  ويالها من ذكريات غني وتغني بها الكثيرون  القطار المر الفيه مر محبوبي      ومن بف نفسك يالقطار  ان تشيل تجيبو يالقطار  الشفيع وزنقار  كانت ايام ويالها من ايام  لكن اود ان انقل الكم الي محطه  جديدة وحيويه جدا  وسوف يبني عليها مستقبل  كبير جدا  الا وهي محطه كحيله  هذه المحطه سوف يحيها مشروع زراعي كبير جدا وهو مشروع كحيله الزراعي الذي كان يفترض ان يكون وحسب مشاريع الدراسه التي اعدها يحي عبد المجيد كما انه بالاضافه الي هذا المشرع الزراعي هناك دراسه اعدت لقيام مصنع اسمنت من جبل كحيله حيث الخام متوفر وبكثره  الان وحسب المعلومات المتسربه ان هذا المشروع في طريقه للمستثمرين وسوف تصل الكهرباء الي هناك لهذا الغرض ومن خلف الكواليس  سمعنا ان هناك نقاش يدور حول حصه المناصير من هذا المشروع   بعد الاخبار التي وردت في الجرائد باالامس وتصريح مسؤل في الولايه ان قضيه المناصير في طريقها  للنهايه
كنت امني نفسي ان تستعيد السكه حديد رونقها في المناصير متمثله في محطه كحيله واخواتها  ابوغربان والكاب حيث  التنجيم في الذهب  وتكون المناصير قبله  للنمو والازدهار وتكون هديه من السماء  وعرفانا للمناصير بما قدموه من تضحيه في سبيل ارضهم وهاهي تجود عليهم بالخير ؟؟؟؟؟ ولكن هل فعلا سوف يكون العائد للمناصير  ام للمستثمرين علي حساب المناصير  واين المناصير من هذه النقطه الفيصليه الحاسمه والحاسمه جدا
كنت امني نفسي ان  اشرب شاي المغرب في محطه الكاب  في طريقي لمحطه كحيله لتحميل  ماجادت به الارض من برسيم بغرض تصديره الي شركه البان  ..... في السعوديه او تلك المنافسه لها في قطر او في الامارات  فهناك ماشاء الله  نسبه مقدره من اولادنا  يعملون في الصادر الي دول الخليج  ......
 هل يتحقق هذا الحلم  ام انه اضغاث احلام  فلسنا بقادرين ان نصل الي هذه الدرجه فلقد كتب علينا ان نكون عماله لهذه الشركات العابره للقارات  تماما كما حدث في دول امريكا الاتينيه  ولم تستطع الفكاك الا بعد مرور عشرات السنين  
ولكن عفوا  دعوني احلم بعوده السكه حديد علي طريقتي

سلام ...
الإخوة في المنتدى...
حقيقة قلت اشوف البوست دا بي اسمو وجدت فيه تلك الذكريات الجميلة للسفى عبر  القطار وحقيقة رايت فيه اشارات من الباشمهندس الجزولي لي بعض النقاط التي اشار اليها بطريقته العروفة دوما.........
حقيقة تلك المنطقة التي بها متسع من الأراضي الزراعية والتي سبق وان اختيرت كخيار للمناصير ...
وحتى لو رجعنا بالذاكرة للوراء نرى انها من استهداف السد لها عندما ايقنو ان المناصير متمسكون بأرضهم حاولوا ان يفصلوا تلك المنطقة بعدة سيناريهات:
 ..... لجنة مشروع الكيلة كي تكون شق لصف الخيار المحلي.
..... المشكلة المفتعلة بالرصاص .....
...... تجميل اسم الفداء بمشروع كحيل...
وأخيراً الاستثمار الزراعي ومحاولة شف ابناء تلك المنطقة...

وتطوووووووول.
ولكن دعنا من كل هذا نرى ان يكون هنالك ثوابت في تلك الاراضي التي هي ارض المناصير وأي استثمار بها لابد ان يكون عبر البلد ومصلحة المنطقة بعد تنفيذ مشروع الخيار المحلي فيها وا فاض عن ما يستوعب الجيال القادمة يمكن ان يكون في
قائمة دراسة الاستثمار بعد موافقة البلد.
ولنا عودة في هذا الشأن.......
تقبل مداخلي الاخ الفكي بعد التحية

ياسلاااااام علي الرحله الجميله دي
وحظنا المنيل شكلنا م حنلم في القطر دا
اصلو مالمينا فيهو لووووواري بس
وجع ضهر وكسير جسم
وهسي ظهر الصيني الصيني
يطلع من السكه ويقع وتاني يرفعو ويمشي ماصيني

شكرا باشمهندس علي الرحله الشيقه دي
تقبل مروري
في طريقه نحصلكم ؟؟؟؟؟؟؟؟؟؟؟

مشكووور ياسفيرنا نور الهادى على هذه الإضافات والإبداعات التى زينت هذه الصفحات .. والحكى من غير
توثيق بالصور والصوت يعتبر ناقص كتير ، لكن ماشاء الله عليك وربنا يخليك لينا ويحفظك ، بما أضفته
أصبحت الرحله أكثر وضوحا لمن لم يجرب سفر القطار . وعما قريب إن شاء الله نعاود رحلتنا بعد إنقطاع ...