عاوزين نقدم كبايه عصير ونتلما وندردش نحن ناس البيت مع اي عضو يجينا داخل جديد

شايفه جانا ضيف جديد وختا رحالو وخرج اسمو دكتور عطاالسيد عاوزين تاني اي ضيف يجي ينضمه لاسرتنا السمحه دي يجي ماري بي جاي يشرب معانا كبايه عصير ويتونس معانا شويه ونبدا بيك يادكتور عطا السيد فالتتفضل بالجلوس ومرحبا بك

فكره جميله اختي سهام منها نتعرف علي العضو وهو لا يحس بغربه معنا لانو خلاص اصبح زووول قديم والناس كلها عارفاهو الله يوفقك ويسدد خطاك

سهام علي محجوب كتب:شايفه جانا ضيف جديد وختا رحالو وخرج اسمو دكتور عطاالسيد عاوزين تاني اي ضيف يجي ينضمه لاسرتنا السمحه دي يجي ماري بي جاي يشرب معانا كبايه عصير ويتونس معانا شويه ونبدا بيك يادكتور عطا السيد فالتتفضل بالجلوس ومرحبا بك

 مشكوره اختى سهام على الفكره , واها عصيرك الكارب جاب عضو جديد (عهد الوفاء ) شيلى عصيرك وامشى عليهو جيبو خبرو . (اكفينا شر جيب الخبر)

سهام علي محجوب كتب:شايفه جانا ضيف جديد وختا رحالو وخرج اسمو دكتور عطاالسيد عاوزين تاني اي ضيف يجي ينضمه لاسرتنا السمحه دي يجي ماري بي جاي يشرب معانا كبايه عصير ويتونس معانا شويه ونبدا بيك يادكتور عطا السيد فالتتفضل بالجلوس ومرحبا بك

بس  ما عرفنا عصيرك دا ليل ولانهار
وفكري كويس في ناس يجيبوا الضغط ناس عندها السكري اعملي حساب تزودي الجرعه يمشي
يجيه اغمي يقول سهام لجنت الضيف
نقع في عشره وطيبين انا قلت وهو قال

والله ضحكتوني يانصرالدين وسفيان *انا خايفه نبقي عنصريين نخت الضيف لي غادي ونرجع نتونس برانا*بعدين مالك ياسفيان عاوز تخوفوني *بعدين الضيافه دي انا ماحااقوم بيها براي انتو كلكم اصحاب البيت حاتضيفو معاي عشان يولف علينا *ونعمل حساب رمضان والضغط والسكري عشان مانقع في مشاكل ياقول سفيان*مرحبا بضيفنا الجديد عهدالوفاء ويتفضل يدردش معانا شويه

اهلا وسهلا ياحسن في دارنا العامره بي وجودكم * اول حاجه لما اعتزرت كدي عاد النقوم اقدملك كبايه عصير بس مايكون عندك سكري كمان تقوم تقول سهام لجنتني *اول حاجه فكره الدردشه مع اي عضو يجي داخل جديد *هي فكره عشان يولف علينا ونقدر نشوف مساهمتو *يعني نتونس معاه هو من ياتو منطقه الخ*بعدين ياحسن عندنا لمه تانيه بتاعت حسين بس تاني ماتكرروها

تسلم سهام
وكبايه العصير مقبوله بس العصير بالجردل لانو معانا ضيوف
والحمد لله سكرى مافى
وانا عضو قديم لكن الظروف حالت بينى والمنتدى الراقى دا فى كثير من الاحاييين
ولمه حسين دا انشاء الله حضور بس ورونا الزمان والمكان
مع تحياتى

فكرة جيدة سهام وكثيرا من الأعضاء يسجلوا وثاني ما نسمع بيهم ولا نشوفهم أتمنى أن يقدم أي عضو جديدة سيرة مبسطة عن حياته نتعرف من خلالها عليه وعشان نعرف كيف نستفيد من إمكاناته العلمية والثقافية والمادية. كان و مازال في بوست اسمك وعنوانك للتعارف المبسط كمان انتصار بدأت تعارف واسع عن طريق بوست نجم من منتدانا ولكنها قطفت ثمرتين فقط . نسأل الله أن يلم شمل المناصير برابطة أكبر من المنتدى.

اسع يادكتور مصباح جيتنا صباح مالك *انت ماالزول البخلوه بلا كبايه عصير لكن نديك حلاوه ختها في جيبك لي بعد الفطور *تشكر علي المرور لكن لما جيتنا زائر وانت زول دكتور عاوزه اعرف حاجه عن مسيرتك الدراسيه وحاجات يمكن تنفعنا ونستفيد منها لي اولادنا*تويقه لي حسن:ياحسن تشكر كتير علي مرورك السمح انت عارف في لمه دكتور حسين من اجي داخلي حااقول نادو حسن عشان اشوفو *وحا يتم الاعلان عنها في المنتدي عن طريق الاخ سلمان عقيد اتمني ان تحضر انت والاسره والكريمه*اسعدني مروركم اخوتي الاعزاء وانشاء نتقابل في السمح *ومعا سويا نحو غدا افضل

مالي يا سهام تديني الحلاوة قالوا ليك أنا شافع أنا عايز عصير من غير سكر ويا حبذا لو كان عصير برتقال. سيرتنا الذاتية سوف تجدينها بحذافيرها في بوست نجم من منتدانا الذي قدمته انتصار حجازي. نتمنى أن يحوز عصيرك على رضا الجميع وأوعك تكتري السكر بس العصير يكون بارد والزمن ده كمان العصير صار يقدموه بحافظات الثلج ماركة ( جوت) . ولي سؤال عن كتاباتك ما هذه النجمة التي تظهر في كتاباتك هل تقصدي بها نقطة أم فاصلة وإذا احترتي اسألي ( نتيف قي ).

والله يادكتور مصباح لو باريت شلاقتي حاتتعب وسكريك يرتفع ودي نقطه عشان ماتزعل . انت عارف انا الظاهر علي لسع جديده في المنتدي ودي تعجب عشان ماترعل مننا يادكتورنا الغيور علي لغتنا!تصدق طوالي بسأل كيف المناصير قدرت تطلع دكتاتره ومهندسين بالرغم من صعوبه الحياه التي كان يمر بها الطالب ودي علامه استفهام حاارجع ليها في البوست بتاع انتصار؟ امابخصوص سوءالي لنتيف تصدق انو منتدي المناصير بلدي قد نشلنا من وسط المطبخ الي عالم المعرفه بعد انقطعت عنها مده ١٢ سنه حتي الجريده والكتاب يجي الشافع الصغير يقلعو منك ودي نجمه بس عشان مريحه واتعود عليها*اما بخصوص الحلاوه ماتزعل اول ماتجينا نازل احلي عزومه لي دكتورنا الينا غادر

ياجماعه زهره محمد وصلت شدو الملايات واقعدو مهذبين زي قعدة العصافير حقت ولاد ود بروي ومسؤلين من الخير إنتو الناس دي راحت وين؟عندي خبركم مندسين في الجكانيب دحن امرقو لي برا قبال انا وابو حنه نجيكم والمنتدي يبقي كرويه وبعدين عاوزه اسألكم صح عباس اخونا رزق بمولود ذكر دحن الخبر دا صح افيدونا وابارك للرشيد المشاكس الاموره وعازه شكلها شغل العيد هدا حيلا ونجلاء وعدتني تبقي معاي حضور الليله وين كان مقيلا وظهرت انتصار بعد الغيبه الطويله وانشاء الله يرجع كليسنا وتاني تخضر اشجارنا الوارفه الظليله وكل عام والجميع بخير والعفو والعافيه تحياتي الي ابو مصطفي لانو مسجل غياب وبكثره

والله ياااامحمد حجازي ماعارفه اقولك شنو تراني قاعده براي حارسي العقاب ان رضيت تحرس معاي بقولك اتفضل لي جوه نجري الجرف نزرع شويه وتاني نجري نشيل جوزنا نملا ازيارنا خلااااص بقت ازيار عيش

وحات الله اسوي في عصيري جردل جردل واكشح نان هي جنس خساره بس ماتقولو بركه الماقاعدي اضبح الناس ديل ياابو حنه تاني مافي زول بسألون عن حاجاتون الشخصيه بس اليجو داخلين لي جو ومرحب بقدوم ضيفنا الجديد محجوب عبد المعروف

اذيك ست البيت انشاءلله كويسه قلت امر عليكم وانشاءلله خير عصائرك كلها مكشحه في الشارع لما زلقتني انتي ياسهام يااختي الحساده العليك شنو لما تعزمي ضيوف ومايجوا ناديني انا عصائرك دي بجيهه ليكي لكن يااختي انتي جربي اضبحي عنبلوك صدقيني البوست دا حايكون عيطه شديده الناس كلها حاتسجل من جديد جيبي اضانك جاي اكان قريتي مرحب بي عشمانة دي انا ذاتي اكبر عنبلوك احجزيهوا لي .

عاد وقت جابتلها ضبيحه تلقينا مسجلين حضور من بدري يا سهام....
ماااااقصرتي تب حارسه العقاب  ........الله يديكي العافيه وكل عام وانتي بخير وصحه..
تشكري كتير.....

عاد وقت جابتلها ضبيحه تلقينا مسجلين حضور من بدري يا سهام....
ماااااقصرتي تب حارسه العقاب  ........الله يديكي العافيه وكل عام وانتي بخير وصحه..
تشكري كتير.....

عزه ونجلاء ياسلااااااام والله بالجد مشتاقين اخباركم شنو وكل سنه وانتو طيبين وشكرا عزه علي التهنئه الخاصه قلتي انزلقت في العصير بس ماتكوني اتكسرت ياأختي تاني عاد بي نكشحو هو بس نقعد ونكركعو برانا نحن لما عندنا ناس حلوين زيك انت ونجلاء اول بي نكشح مالنا والله يانجلاء بالغتي عديل كدي انت كنت عاوزه تعرفي معزتك عندنا والاشنو وتحياتي الي كل اعضاء منتدي المناصير بلدي ومرحب بضيفنا الجديد معاويه حسن الكليس وانشاء الله يطيب لك المقام معنا اتفضل لي جوا الدار دارك

تسلمي سهام...
والله مشتاقين (زي شوق المصريين لعوده مرسي)...باقي اليومين ديل الاخبار مسيطره علي شديد...خربت خدمتي خاصه بعد طردت الحبشيه وبقيت اقع واقوم برايي...عاد البت محاسن عملتها ف جنس عمله ...
السلام والاشواق والتحايا لكل اخواني واخواتي في منتدانا العامر...وانشاء الله دائما تامين ولامين....

سهام علي محجوب كتب:والله ياااامحمد حجازي ماعارفه اقولك شنو تراني قاعده براي حارسي العقاب ان رضيت تحرس معاي بقولك اتفضل لي جوه نجري الجرف نزرع شويه وتاني نجري نشيل جوزنا نملا ازيارنا خلااااص بقت ازيار عيش

انت يا ابوحنة يا اخوي نسوان دربي قاعدات يشيلن الجوز ولا دي شلاقة تانية من سهام؟؟؟؟؟؟!!!!!
برضو حكاية ازيار العيش توضح انه العمر القالتو وكتبتو مااااهو صحيح!!!!!!!
والله يا سهام فكرة البوست ممتازة

أنت ما عارف يا أ ب أحمد.. يا خوي  قبل ما تعرف  حريم لاتحت قاعدات يشيلن الجوز والله لا! لازم تعرف يا خوى حريم لاتحت قاعدات يشيلن ( المكرير ) العكاز.. ومرات عود الجوز ذاتو يفلقن بيهو الرجال!!! ما عارف دي عليك الله..
والله كم. كم  جننا حريم من لاتحت في محكمة سوق النعوفاب مفلقات ليهن رجال! تصدق! بي عود جوز..كمان
طبعا والحمد لله نحن المناصير وهذا شرف لنا مافي مرة بي تفلق ليها راجل في موضوع تاني.. لأنو بلدنا نحمد الله كلها أهل. لكن الفليق بي يجي من وين؟
يجي من دخل في حدي!
رفض يقسم لى حق أمي؟.. راجلي من الصعيد مرسل لى معاه مرسال نكرو .. وقال عندي عندو قروش!
أحماني أقلع شتلة من مشرقية الروكة!
عصر عليا في الحد!
ضييق المشرع البي يردن بيهو الحريم!
ربط مركبو في قطعتي ، خرب القش !
طالق دحشو فينا
تصدق المحكمة التى رئيسها  حاج الحسن على عون الله.. وحسن الفكي وأحمد الحسن.. وحسن كعدور.. وعثمان سليم.. في سوق النعوفاب ! كم شهدت قضايا مثل هذه!
 أما شيل الجوز ده عادي، عندهن حريم الجزاير.
هسه ما بتعاين فينا نحن كيف نتعامل مع حريم الجزاير في المنتدى!؟ راخين الوترة تب ! وندق لهن على كراعن.. وناخد المرخيي تب.. عاملين حسابنا. يا زول ديل لو قامن وحاتي وحاتك ما بيعرفن أي زول.ز لا فلييع دراب ولا فليع حجارة! بي عود الجوز فوق النافوخ!
والله مرة واحدي من حريم الجزاير قربت تكتل ليها واحد عم ولادا كمان! قالت ما قسم لينا الورثة! يا زول هييأحسن أنا وأنت نشرب عصيرنا ساكت في راكوبة سهام دي!
كمان أقول ليك حاجي
لو جيت بالأجواديي والخوة؟ كمان أحن منهن مافي! وأكرم منهن مافي.. ومنتهى الأريحية.. سبحان الله.. ما تقول كمان والله يدور في ذهنك أنو الحريم ديل البي يدقن الرجال ناشفات وكعبات وزي الرجال! تصدق العكس.. منتهى الروعة.. أحسن بكتير من حريمنا نحن اللافوق ناس القبلي.. تصدق! الجزاير دي مدفوق فيها جنس ذكاء وجمال! حد الوصف. حاجة إلهية فطرية..( ربنا شال من أحلى صفات ردم فوقا) دي القالا عيسى بروي تصدق تنطبق على ناس تحت.ز ناس الجزاير أكتر مننا نحن ناس القبليي..

محمد محمود انقاالعصير لو كمل تاني نصوطلك من جديد مرحب بيك في دياري وان بقيت جعان بعشيك بس ابقي واصل وماتخلي الايام تنسيك سهام بابه مفتوح لكل زائر حتي أنبقيت مسجل من قديم *أبوحنه انت عاوز تطفش العرسان من بنات الجزاير والاشنو شفتك سرحته شويه جابتلها دق بالمكارير . لكن زي مابيقولو سمح الكلام من خشم سيدو اه ياأبواحمد *انت ابو حنه دا بعد قصة جبل جاري تاني مااظن يقيف في صفك والله كل مااطراه اضحك

[rtl] والله يا باشمهندس الكلام القلتو كلو ماني ضهبان منو لكن دايرك توري ولاد الزمن ده عشان يعملوا حسابن!! اسع سهام دي خبارا شنو ؟ مالا ما قالت حاجة؟ اظنها شايل المكرير ورابطة لي في شارع الهوا!!!

[/rtl]
[rtl]لكن يا صاحبي حكاية جرارة العيش القالتا  في نص كلاما ما قلت فيها حاجة؟ وبرضو حكاية العمر محتاجة لمراحعة!!!

[/rtl]
[rtl]سهام انا ماقلت اي حاجة وختيت ليك باكتة بيبسى جنب خشم البوست لزوم استقبال الضيوف

[/rtl]
[rtl]والما شال الجوز ماهو منصوري كان مراة ولا راجل

[/rtl]
[rtl]تسلموا  يا رايعين

[/rtl]

 

والله يا أب أحمد اقول شنو عاد؟ في حكاية ( جرارة العيش) العيش البي يختوه في الجراري ده! أو قول القسـّيـبي ) زمن العيش يختوه في الجراري والقسيبي.. وقالت هي حاضراهو.. فعلا الموضوع ده يحتاج لمراجعة.. لأنو زول حاضر زمن العيش يختوه في القسيبي ده! أو الجراري ده معناهو زول كبير خلاص!
ويعني هي لما ختت عمرا 36 ده يكون كلام خارم بارم والله شنو؟
يازول كدي النشرب صندوق البيبسى ده! الأنت جبتو جنب خشم الباب.. بعدين نشوف الباقي!
برضو نرحب بالجايينا في دعوة سهام دى!
الموضوع ده بتاع الجراري بالذات عايز مناقشة حية وجه لوجه، وبحول الله أنا جاي قريب.. أيه رايك نناقشوا معاها وجهاً لوجه..
لأنو أكيد هي زودت المحلبية بي حكاية جرارة العيش دي؟
والله رايك شنو؟ يا أب أحمد أنت زولاً تعرف في الأصول!
لكن أيه رايك
الزولة دي زولةً قداميي.. وزولة جماعة، وست كرم.. وعارفي عزها! والعارف عزو مستريح!
عشان كدة عايزين أنا وأنت نفوت ليها حكاية جرارة العيش دي!

شكرا ابو احمد علي صندوق البيبسي كدي عاد النقوم اوزع الحضاره الجديده دي باقي انا ضيوفي فضقتهم بي شربة الحلبه فضق ودا كلو كوم وعصاير اخوكم انقا الرسله لي كوم اسع انا وناس حلتي نضوق في الهوايل دا تحدثو في الشجر الطوال ماحدثتوني الولد دا جاب الجكاكا دي من وين

عارف يا ابوحنة يا اخوي
سهام دي الظاهرعليها نجيضة ’ هي قالت (نشيل الجوز نملا ازيارنا خلاااص بقت ازيار عيش)
طبعا يا ابوحنة زير الموية لما يقدم ويبقي ما يسقط الموية بيغيروه بواحد جديد والزير القديم يعملوه بتاع تخزين للعيش  والتمر  وحاجات تانية ود بروي قاعد يزكرها كتير ويموت فيها موت .
حكاية زيارة سهام في البيت ومناقشتها فكرة كويسة ولما تكون جايي اديني خبر ونحاول نرتب معاها
لكن انا ملاوز من حكاية المكرير فلازم اول حاجة تدينا الامان

والله يا أب أحمد يا خوي حريم الجزاير ديل! المكرير عندهن عادي زي شراب الموية!
دحين  يا خوى الخوف واجب..

تحية لكم ايها الكبار
انتم الذين تدخلون الابتسامة  والبهجة  فى قلوبنا بكتاباتكم
الاخت سهام  مشكورة  جدا على تذكرك لمولودنا  الذى
ظهر الى  الحياة  يوم وقفة عيدالفطر وتم تسميته محمد
وعاشت الاسسماء وسط حضور كبير فى يوعقيقته
كما نود ان نرحب معك بكل عضو جديد قادم مع عصير الليمون والكركدى
القنقليس والبرتقال  بس ابعديلنا من الضبيحة

استاذنا عباس معليش اتاخرنا عليك في الضيافه عجبتني عصايرك البلديه والصحيه واللذيذه في نفس الوقت *ابو حنه وابواحمد سهام بيتها دوما مفتوح لكل ابناء قبيلتها *استاذ عباس زيارتك لينا دي ماهيني وماتحجزني من الضبيحه كري مليان كباشي ولاشكر علي علي واجب ورحبو معي بضيفنا الجديد دكتور حيدر انشاء الله يطيب لك المقام بيننا

نزار عمر يس مرحبا بك في منتدي المناصير بلدي وانشاء الله يطيب لك المقام بيننا وبعدين انبقيت ابو عيال في واحد اسمو الحاج شرف ابعدو من دربك واوعك تصادقو الزول دا مضر وفي واحد اسمو دكتور مصباح اي كلام يقولو تسوي حلقة في اضانك وانشاء تنضم لهذا العقد الفريد

[ندعوك للتسجيل في المنتدى أو التعريف بنفسك لمعاينة هذه الصورة]

سلام الاخت سهام صاحبه الدردشه وكبايه العصير
الله يعمرك بى ضيفانك واهلك
لكن شايف ديوانك دا عامر وفيهو ضيوف من العيار التقيل زى ود ابو حنه دا
وزى ما قالت ليك عازه تانى العصير براهو ما بيقضى الا العنبلوك
مع تحياتى

نحن عايزين عنبلوك زي ما قالوا عازة وحسن. العصير ما هو حاليك يا سهام..
عنبلوك ود لبون

هههههههههههههههه
الان وجب ضبح العنبلوك
وصاحبتو تكوس

أنت عارف يا حسن، سهام دي مما فارقت دربي، تاني ما حصل سعت ليها عنبلوك..
والله ياخي حياة المدينة أصبحت سجن كبير الآن
مافي أحلى من حياة القرى إذا صلحناها بمفهوم الحاضر.. تكون فيها كهرباء وماء ومستشفى قريبة.. مزرعتك جنبك
كر الغنم جنبك
زرعك جنبك
عنبلوك
خروف متواجد عندك
أكل فريش طاعم
بحر تعوم فيهو
تستمتع بالخريف
وموسم التمر
مافائدة حياة المدينة إن كانت هي كالسجن.. كل حاجة عايز تجيبا من برة البيت..
لذلك البحث عن عنبلوك.. ذاتو مشكلة في المدينة، في القرية رمشة عين تجد لحم العنبلوك الطاعم محمر في صاج بي نقاع الدهن فيهو وفطير بلدي ولا رغيف فاخر..

هههههها والله قرمتنا
يا اخى انت جايى بتين
والله انا اجهزلك عنبولك بج كدا
ونشيلوا ونمشى على سهام دى
بس التحضر الشربوت وحادا يكون مقرب لى حجره بى قادى
سهام هل تسمعنى؟

سامعاكم انت ورفيقك دا انا اشم في ريحة الشيه وماشي ماكنت قايلاك انت وابو حنه لابدين في بوستي وتسرقو من كري عنبلوك عنبلوك وتشو *انت ياابو حنه ماكنت ماشي كويس ورقدت العصائر رقاد مالك عاوز تغير رايك *غايتو الحكومه شكيناها لي الله العنبلوك دا يجرو الشافع ويضبحو لاكرام انداده وبدون اذن امه *حسن وصديق كدي عاد لما ضبحتو عنبلوكي ناولني صحن شيه لي ضيفنا الجديد علي فتح الرحمن محمد الحسن وانشاء شيتنا تعجبو ويجينا داخل لي جوه

البيت مكنوس ومرشوش وستو تكوس
اكيد العنابليك تروح فيها

حسن قدر ماعاوزه اجمع كلمة عنبلوك غلبني لما اسع لقيتك جمعتها الضحك شرطني الظاهر كلام عزه طلع صاح جربي اضبح عنبلوك تلقي الناس كلها جات*صديق رسمت بمخيلتك مدينه جميله نتمني ان تتحقق

سلام صاحبة البوست الرائع وكل المتواجدين والضيوف الجدد
 وحقيقة استوقفني هذا البوست كثيرا بكل تفاصيله  من كباية العصير ....الي العنبلوك
وجسد امام ناظري ذكري عزيزه محفورة بالقلب (زيارتي للمناصير) لكم التحيه جميعا
وماتنسي ياسهام بعد العشاء صحن (الفطير باللبن)
  ولكم من الود اطنان

الاخت الرائعة سهام ----سلام
   فكرة رائعة بالجد لانو الواحد لما يسجل جديد يكون كاشيي شوية ---وارجو ان ترحبي بكل جديد
    واديهو من عصيرك الباااارد دا اصلا الدنيا حارة ومولعي نار ----هسع انا طبقتا لي كم كبايي
    وكان ما خفت تطرديني برة البيت كان كملتو كلو 
 ******
هدية :
  انا ختيت لك شوال سكر جنب الباب خلي الوليدات يدخلوه لاجوه 
 سؤال :
ميزانية الضيافة البدفعا منو ----؟؟؟ انا خايف يجيكي واحد ناطي ويقول لك وين كشف الحساب --ودايرين الشفافية
    إستئذان : ــــــــــ
 نرحب بعلي فتح الرحمن
 *****
 شكري وتقديري بالقفاف والرحالي

والله ماشاء الله الديوان عامر والمزيره منو لابره جراراتا ده أصقط من ده
والحفاضات الكبيرة والترامس مليانة عصاير وشايات ، تشرب زين لامن
تروى ـ أصلى اليوم جيت مارى بى جاى لقت إنتباهى الضيوف الداخلين
ومارقين وكلهم يندشو شبعانين ورويانين ، بعدين دخلت لاجوه على الديوان
أصلو مفتوح ليل نهار ومكتوب عليهو إتفضل بلا إستئذان أنت فى دارك أمان
ولحسن الحظ وافيت شية عنبلوك دابو ضابحنو ، والعطاريب ماتديك الدرب .
وما قعدت كتير مرت علينا جريدة السلات وبعدها العصاير والشايات ...
تشكرى الأخت سهام على هذا البوست الجديد الفريد ، ودايما ديوانك عامر
إن شاء الله ... فى الرجعة تانى بغشاكم كان ربنا مد فى الأيام ...

المرور التلاته الفرحه قهمتني و لساني اتربط الكتاب الرائعون بضم الكاف يامن حباهم الله بملكة الكتابه مروركم اسعدني ودمتم ذخرا لمنتدي يعتبر واجهة قبيله باكملها اهلي الكرام دعوتكم كوبا من العصير فاتيتموني حاملين شوالات السكر وارسلتو لي من العصاير والمياه الغازيه مؤنة حول باكمله *الدنقلاوي لك التحيه وانت قد جبت ارض المناصير واكلت عنابليكنا *ود عون الله كل مايقال عنك انت والرائعه انتصار اراه قليل فلا تحرمونا من طلتكم وكونو معنا متواصلين *ولد زينب السمح طبعا دي مقولة ود بروي ونتمني هو الاخر عودته الي الساحه مرورك زادني اصرارا علي ضيفاتكم بكبش سمين ومافي زول يحجزني *بالجد مروركم اسعدني

والله يا سهام وكت الاعضاء الجداد ما دايرين العصير اخير ندنى عليهو برانا , كبى .
ودعون الله جاب السكر انا بجيب الفيرى لى غسيل الكبابى .
تشكرى يا فاكهة المنتدى .

نصرالدين ابوزيد حامد كرار كتب:والله يا سهام وكت الاعضاء الجداد ما دايرين العصير اخير ندنى عليهو برانا , كبى .
ودعون الله جاب السكر انا بجيب الفيرى لى غسيل الكبابى .
تشكرى يا فاكهة المنتدى .

التحية ليك الاخ نصر الدين والتحيه للاخت سهام (فاكهة المنتدي ) كمااطلقت عليها الاخ نصر الدين
بمساهماتها الشيقه  والمواضيع الجميله .
ود عون الله جاب السكر  وانت جبت الفيري وانا علي اوفر ليكم (ماء زمزم وثلاثة خرفان )
بس ياسهام انا عارف التلاته خرفان شويه وهسع ابراهيم النعمان ولا ابراهيم البرجوب واحد  فيهم
حيجيني ناطي ويقول لي ( تلاته خرفان ما حالنك قصاد العنابليك الاكلتهم في المناصير).
 وللجميع تحياتي واشواقي