جمع الكتب المدرسيه

من طرف **نجلاء زمراوي** الخميس 30 مايو 2013, 3:08 pm

امل يجد هذا المشروع القبول وان لايدفن كغيره من المشاريع...حليفه بالله لو قمتا به لوحدي ما حا اخليهو...لكن يد علي يد تجدع بعيد
جمع جميع الكتب والمذكرات وارسالها الي البلد يمكن ان تساهم بعض الشي في العمليه التعليميه في المنطقه...اي واحد لو قام بجمع عدد من الكتب ويوم لاحتفال السنوي للمنتدي نجمعها ونرسلها....
رائكم شنو ياناس الاجتماعي....
وممكن ان ننشر الاقتراح بعد اخذ الاراء في مواقع التواصل الاخري

معاكى فى كل عمل خير استطيع القيام به

من طرف **عباس محمد** الخميس 30 مايو 2013, 8:49 pm

نحن من خلفك ونشد من ازرك
كلام جميل وهذا هوالبيان بالعمل ابلغ من كل
فصاحة فى قضية البلد بدون جدوى
فقط كيف السبيل الى شحذ الهمم

ماشاء الله عمل خير جميل الله يجعله ميزان حسانتكم
نحن معكم في اي خطوه والي الامام تسلمي ام وضاح
كمان لو في سبورات متحركه برضو كويس ي جماعات سبورات جمع سبوره ولا ماهي كدا احتمال احتمال سبابير الاصح لكن برضو جائزه

من طرف **نجلاء زمراوي** الخميس 30 مايو 2013, 10:29 pm

شكرا...سهام...عباس..سفيان
ولكي لايكون كلام وحكي ساكت...
انا بدات والان لدي كميه من الكتب والمذكرات والعندو رغبه المشاركه يبدا بالجمع ونشوف بعد تلاته يوم يعني يوم الاحد العدد وصل كم ...

ياسهام لازم تجدي في الموضوع ....عاد يابنوت ما تخذلني ...البعيده ترسل اشتراك والقريبه تقوم بجمع الكتب ولكن باسرع وقت المدارس علي الابواب

من طرف **(الحاج شرف)** الجمعة 31 مايو 2013, 2:10 am

شكرا الاخت نجلاء
فكره جميله تستحق ان نقتطع لها جزء من وقتنا
هنالك مجهودات مماثله تقوم بها مجموعه الشلال الرابع بقياده اختنا طيبه محمد خير
وقد حضرنا اجتماعا قبل يومين بمدارس الاحفاد مقر منظمه كاف
بالمشاركه مع منظمه الشلال الرابع
وفى كل خير
توسع الدائره
ونحن على استعداد بالمشاركه فى جمع الكتب من اطراف العاصمه المختلفه

من طرف **نجلاء زمراوي** الجمعة 31 مايو 2013, 2:47 am

شكرا الحاج شرف..
وعندما تتلاقي الافكار وتتوحد الرؤي سنجني النجاح باذن...

بقيه الاعضاء لما ذا الصمت هل الفكره غير مجديه ام هنالك شئ اخر
اي واحد يجيب كتاب واحد ويد علي يد تجدع بعيد

من طرف **نجلاء زمراوي** الجمعة 31 مايو 2013, 2:57 am

قابلت مجموعه من طلاب دارفور في مكان ما وكان عندهم احتفال وعزموني ولبيت الدعوه...
ياسبحان الله كان شرط حضور الاحتفال ان تجيب كتاب مدرسي معاك ..يعني بمثابه تذكره دخول وفعلا اتي الكل اطفالا وشبابا وشيوخا ونساء والكل يحمل في يده اكثر من كتاب وسرعان ما امتلا المكان بالكتب من مختلف الاقسام
قد اعجبت بهذه الفكره وامل ان تنال اعجابكم..ونتعاون في تنفيذها .

عندنا جارتنا استاذه فى مدرسه خاصه اقترحت على اننا نطلب من الاستاذه البيدرسوا فى مدارس خاصه سو كان منصورى او صديق ان يكلموا الطلبه بان يحضروا معهم كتبهم القديمه لكن الفكره الا المدارس تفتح عشان كدى نبدا بى فكرتك وبعد ما نلتقى تتواصل الافكار ومعا سويا نحو غدا مشرق باءذن الله

من طرف **نجلاء زمراوي** الجمعة 31 مايو 2013, 5:51 pm

تشكري سهام علي الاهتمام بالموضوع
انا طلبت من اولادي ان يجمعوا الكتب من اصدقائهم ...
ابني مشترك مع منظمه مجددون واخبرهم ووعدوه بان يحضروا له كميه من الكتب.

وانا على نطاق الاهل لقد بداءت ولكن اتمنى من بقيه المناصير الفى الخرطوم يقوموا معانا فى الفكره دى حتى تعم الفايده على جميع القطاع ولا تنحصر فى قطاع واحد زى ما قلتى قبل كده والناس دى اصلون يؤيدوا ويدوها صنا ما يدونا افكارهم ومقترحاتهم

ياسبحان الله سمعت ان هناك جهه تسعي في هذا التجاه...ياسبحان الله توارد خواطر عجيب...
اخوتي المناصير محتاجه للكل يسعي ويجتهد حتي ولو تشابهت الافكار فالهدف واحد...
علي العموم انا جمعت كميه من الكتب لاباس بها
ويا سهام اجتهدي وحددي لي يوم نتلاقي ونقوم بجمع الكتب ونرسلها الي الجهات المعنيه...
والباقين تسلمو علي الصمت المريب....
غايتو نحن اكتر قبيله تفلح في النضمي والكجار....اعان الله اهلنا ....

ضحكتينى يانجلاء لكن الكجار ده انا وانت بى نطيرون منو

الكتب المدرسية ده كتب المناهج الدراسية والله غيرها سبحان الله اعتقدتها الكتب الثقافية . لأني سبق وأن وضعت خطة لمدرسة شري الثانوية بنات لإنشاء وتزويد أكبر مكتبة مدرسية في السودان وبأقل التكاليف لكن يبدو أن كلامي شالو الهواء لأنني خاطبتهن من على مسرح المدرسة . كدي خليني استوعب الموضوع وأديكم رأي المتواضع . تسلمي للمناصير نجلاء.

مرورك اسعدني وزاد من حماسي ودي المحريه فيك دكتور المصباح...
ورائك مهم جدا جدا ...
نعم هي الكتب المدرسيه..فالمدارس الخاصه في العاصمه لاتجمع الكتب نهايه العا م من الطلبه ويوجد نقص في الكتاب الذي يوزع للمدارس الحكوميه فاذا قمنا بجمع الكتب القديمه وارسلناها للمدارس في البلد تساعد في ان يمتلك كل تلميذ كتابه الخاص واذا حافظ عليه يؤول لاخيه السنه الجايه....
وايضا مع الكتب قمت بجمع عدد من الاقلام والبوسترات والطباشير وعدد من الوسائل التعليميه لكي تدفع بالعمليه التعليميه في المنطقه.

من طرف **amira ali** الثلاثاء 04 يونيو 2013, 6:16 am

الفكرة رائعة جدا

وانا اقرا في الموضوع ده تالمت حين قارنت بين معاناة طلابنا بالوطن وبين الوضع في المملكة

هنا الكتب توزع على الطلبة على فترتين في العام الواحد والكتاب مصنوع من الورق عالي الجودة ومقوى وكل كتاب معه كتاب مخصص للتمارين

) وفي نهاية كل تيرم نتخلص من جميع الكتب بوضعها في سلال مخصصة للكتب في المساجد والحدائق العامة بي( جدته وشرايته

ولك الله يا وطن ويا مواطن-- وان شاء الله نشوف ده حاصل في بلدنا ياااارب

التحية لكي نجلاء دائما رائدة وسباقة للخير

اي مساعدة ممكنة جاهزين

يا نجلاء موضوع مفيد جدا
نسال الله ان تكلل مساعي الجميع لما فيه خير المناصير
ونسال الله اى مشروع خيري يبدا من هذا المنتدى ان يتم لصالح اهلنا

نجلاء زمراوي كتب:
سمعت ان هناك جهه تسعي في هذا التجاه...ياسبحان الله توارد خواطر عجيب

انا بعرف انو منظمة الشلال الرابع بقيادة الاخت الغالية طيبة محمد خير والاخت زووبا ما مقصرات
دايما فى حالة حملات للخير للبلد ... يا ريت لو يتم التواصل دوما معهن لانه عندهم وسائل التوصيل السريع لمناطق الحوجه .... وربي يجعل مساعيهن فى ميزان حسناتهن

مشكووورة الغالية نجلاء وربي يجعلة فى ميزان حسناتك انت وكل من يعمل خير لاهله

تخريمة : اليومين ديل نويت السفر وتانى دخولى للمنتدى ح يكون رهاب رهاب
ونتمنى نسمع حملات من المنتدى وليس حملة او اتنين
موفقييييين اخوتى الكرام

amira ali كتب:

) وفي نهاية كل تيرم نتخلص من جميع الكتب بوضعها في سلال مخصصة للكتب في المساجد والحدائق العامة بي( جدته وشرايته
ولك الله يا وطن ويا مواطن-- وان شاء الله نشوف ده حاصل في بلدنا ياااارب

تعرفي يا اميرة انا اكتر حاجة بتالمنى كتب الحاسب بالذاااات
كتبهم التانية على الاقل بقول منهج مختلف
بس كتب الحاسب مفييييدة وياريت لو يلقوها اهلنا فى السودان
بس يللا الواحد بيقول ربي رزقهم والله يزيدهم كمان وكمان
والله يرزق بلدنا السودان امييين يا رب العالمين

كلام سمح وفعل مافى هكذا نحن ، نحتاج لمعرفة كيف نحول الأقوال إلى أفعال

فكرت كثيراً فى هذا الأمر ووجدت أن إسقاطات قضية السد لها كبير الأثر

ومن الحلول الدار لأنها تجمع الأعضاء وتسهل القاء

شكراً الأخت نجلاء

جاهزين

يشكر الجميع..
سامي....اميره...انتصار
والله ياسا مي جاهزين وموضوع الدار مهم جدا وفي الدار تحل كل المشاكل ...
اخي سامي ....ارجو ان تكون لجنه وتختار الاعضاء وتفرص عليهم مهام ونحن علي استعداد
اي عمل لكي ينجح لابد ان يكون هناك رئيس يمسك بزمام الامور..انا ارشح سامي من يثني..
وتبرعي جاهز .....

شكراً الأستاذة نجلاء زمراوي على هذا المشروع القيم.. واجره كبير بإذن الله.. وما شاء الله الزوار كتروا عليه وكل ادلى بدلوه... بس لو عاوزة كتب المنهج السعودي نشبعكم فيها بجميع التخصصات والمراحل المختلفة... وعندنا واحد صاحبنا في الحراج عنده كتب اشكال وانواع ... بس كيف ترسل للسودان.. وانتم عارفين موضوع الشحن والرسوم وما ادراك ما ذلك؟؟
وذكرني الأخ سامي بموضوع الدار.. نحن الحمد لله يمكن نكون على نطاق السودان كله .. نحن مناصير الرياض قد نجحنا ولله الحمد في انشاء دار ؟؟؟
وربنا يوفقكم انتم في ذلك.. والتحية للمتداخلين..

من طرف **abuahmed** الأربعاء 05 يونيو 2013, 1:06 pm

نجلاء

سلام

مشروع جميل ومهم وبناء والحوجة له مستمرة وامكانية نجاحه كبيرة اذا تم اعداد آليات تنفيذه بترتيب وتنسيق جيد

اراك بدات البوست والمشروع بطريقة توحي بعدم الثقة في تجاوب الاعضاء ولذلك بدلا من شرح المشروع واهدافه وفوائده دخلت مباشرة في الحليفة (بالقسم المغلظ) انك حا تنفيذيه براك لو الناس ما تجاوبوا معاكي, ثم بعد يومين او ثلاثة وصفت الناس بالكجار علي الرغم من تجاوب الاعضاء فكان الاجدر بك ان تواصلي في استنهاض همم الاعضاء وتقديم المقترحات العملية بدلا من تسبيط الهمم بالنعوت السالبة

هنالك بعض الاعضاء اشاروا الي مبادرات مماثلة من بعض مؤسسات المنطقة وبالتحديد منظمة الشلال الرابع ويبدو ان مبادرتهم اكثر تنظيما ولهم خبرات سابقة في هذا المجال والمتوقع ان تضمي جهدك مع جهدهم ليكون الجهد مضاعفا ونتفادى التنافس السالب

اري ان يتم اختيار مندوب في كل حي من احياء العاصمة لجمع الكتب من ابناء المنطقة ومن غيرهم ثم تجمع الكتب من المناديب وترسل الي البلد الي لجنة خاصة لهذا الغرض ولا تنسوا ان هنالك اخوة لكم في المدن يحتاجون للمساعدة

يمكن ان يكون المشروع في كل مدن السودان

هذا المشروع يمكن توسيعه ليتبني مشروعات مكتبات عامة بالمنطقة

شكرا ابوحمد...
وتشكر علي النصيحه.......ولكن يا ابوحمد كما تري الحال يغني عن السؤال....والذي جعلني ابدا البوست بهذه الطريقه وهو عدم اكتمال اي موضوع او مشروع ....الا ما ندر...
علي العموم تشكر كتير علي النقد البناء منكم نستفيد...
وفعلا المشروع عامل نجاحه ميه في الميه وانا علي استعداد ان اتعاون مع منظمه الشلال ...وقد قطعت شوطا كبيرا....
بس منتظرين مساهمه الاعضاء الكرام
والاخوه المغتربين وعلي راسهم الاستاذ الكريم عبد الغني يمكن يكون اشتراككم مادي... وهذا يتم بالتنسيق بينكم ويجزيكم الله الف خير

انا معاك يا نجلاء فى موضوع الدار بس سامى موافق لانو سمعتا القصه دايره شويه سك وانا بزيد على ترشيحك ابراهيم محمد سليمان وانا عاوزه الناس ترشح تانى الحكايه دى عاوزه كم نفر يكونو نشيطين

سهام علي محجوب كتب:انا معاك يا نجلاء فى موضوع الدار بس سامى موافق لانو سمعتا القصه دايره شويه سك وانا بزيد على ترشيحك ابراهيم محمد سليمان وانا عاوزه الناس ترشح تانى الحكايه دى عاوزه كم نفر يكونو نشيطين

سامى جاهز ومستعد لبداية الحركة فوراً ، بس كيف نلتمس الجدية فى بقية الأعضاء

تحياتى للجميع

اصبرو لى شويه يا سامى اسع نسكهم ليك سك انا والحوايات النشيطات ديل ولو ما قدرنا حانستعين بالفقراء حقين خالد وابو حنه والله يسامحنا عاوزين رايك يا ابراهيم

الاخت الفضلى نجلاء هكذا العهد بك دوما سباقة الى الخير . وشكرنا للجميع وللاخت الفاضلة انتصار . وتشكري كثير على طرح هذا الموضوع والذي نحن فعلا شرعنا فيه .ولكن يحتاج تنفيذة للاستفادة منه اقصى فائدة تضافر الجميع لاتساع المنطقة.وخاصة ان المنتدي اصبح واحة للجميع .وان جمع الكتب لا يكلف كثيرا لان كما ذكرت ان المدارس الخاصة لا تسترد الكتب وعليه حتى تكلل المساعي بالنجاح لابد من. متبرعيين من المدن الثلاث فالالتزام وتحديد المسؤول لكل منطقة يساعد في نجاح المشروع كما ذكر الاخ ابو احمد .وشكرنا للاخ الحاج الذي تكفل ترحيل الكتب من الاطراف ولكن من خلال طرحنا لهذا الموضوع ]عرفنا ان موضوع الكراسات اصبح هم يؤرق الجميع ودستة الكراسات كما تعلمون جميعا تجاوزت العشرين جنيها.وكلم تدركون معاناة الناس ونستميحك ان يكون بالاضافة للكتب تجهيز شنطة طالب خاصة للطلاب الفقرا والايتام .. الاخت نجلاء
جديتك جعلتنا نرد علي هذا الموضوع الحيوي مع اننا اثرنا الانقطاع زمنا لان معظم نداءاتنا لم تكلل بالنجاح .سيري ونحن معكم .وخالص شكرنا وتقديرنا للجميع

من طرف **abuahmed** الخميس 06 يونيو 2013, 2:55 pm

نجلاء

سلام

موضوع الدار مهم

والطرح في هذا البوست فيه حماس من بعض الاعضاء

اقترح لجنة تمهيديه للدار

1- سامي احمد محمد رئيسا

2- نجلاء زمراوي عضوا ومقررا

3- ابراهيم محمد سليمان عضوا

4- سهام علي محجوب عضوا

5- طيبة محمد خير عضوا

6- عادل شرري عضوا

7- الحاج شرف الدين مشرفا

الاجتماع الاول للجنة يوم السبت القادم 8\6 الساعة الخامسة مساء

الاخت المقررة للاتصال بالاعضاء والتاكيد علي الحضور

معلومة؛

هنالك دار في شارع محمد نجيب جوار المغتربين تتبع للمناصير والرباطاب قام الاخ البرجوب بتاسيسها بمستوي جيد يمكن ان تستعينوا بالاخ اللواء عثمان خليفة والاخ عبد العاطي لمزيد من المعلومات وللتنسيق مع الاخوة في الهيئة الشعبية لتنمية محافظة ابوحمد حتي تعم الفائدة

السيد الفاضل ابو احمد :شكرا لترشيحك لى دا كلو من نجلاء مزازنا نحن لازم نكسر المثل المره كان فاس ما بتكسر الراس اه لامن سويتولنا المخلايه فوق رقبتنا ؛ كدى ناخذ راى الراجل دى ونديكم الاكيده ؛عاوزنك تدينا نبذه عن الموضوع ده والخطوات الممكن نتبعها والنا س الممكن نستعين بيها |

عذراً الزعيم أبو أحمد ، الأخوات سهام ونجلاء ، فقد قمت بتحويل ما كتب حول الدار لبوست الدار للمساعدة على التركيز ومعرفة ما كتب سابقاً

من طرف **نجلاء زمراوي** الخميس 06 يونيو 2013, 8:55 pm

يسلم الجميع...
الاخوات في منظمه الشلال الرابع لكم التجله وانتن دوما سباقات للخير في خدمه المنطقهفعلا بدات العمل في جمع الكتب والحمد الله وبتوفيق من المولي عوجل تكللت مساعي بالنجاح موضوع الكراسات مهم وهذا لابد ان يفتح باب للتبرعات من جميع الاعضاء حتي ولو كان الزامي اي عضو يدفع شئ معين حتي ولوبسيط..
البلد محتاجه للكل يعمل...فجميعنا نسعي ونجتهد وانشاء الله تكلل مساعينا بالنجاح..

عاوزين نعرف لو الناس دى جمعت الكتب والكراسات دى وشدو حيلوهم معاكم ولم تستطيعوا تغطيه كل القطعات من المحتاجين كيف يكون التصرف هذا السؤال مهم بالنسبه لى

من طرف **نجلاء زمراوي** الجمعة 07 يونيو 2013, 1:40 pm

من ملاحظاتي ياسهام..ان هنالك مناطق لم تصلها اي نوع من المساعدات ايا كانت
مثلا موضوع الامصال خدم مناطق معينه..
منظمه الشلال ايضا قدمت المساعدات لمناطق معينه...
عشان كده نشوف المناطق التي لم يقدم اليها اي نوع من من المساعدات..
مثلا موضوع الكتب هذه المره نقصد به منطقه الحيبه الشرقيه وام دويمه وما جاورها من قري.

من طرف **نجلاء زمراوي** الجمعة 07 يونيو 2013, 1:48 pm

اذا اي واحد اجتهد وقام بتبني مشروع وتنفيذه اكيد كل المناطق حتجد حظها ...
ونشكر منظمه الشلال الرابع لسعيعا في خدمه المنطقه
ولكن بلدنا محتاجه لمليون منظمه ومليون جمعيه ...
محتاجينامنظمات دعويه نسويه..
وثقافيه....
تعليميه..علاجبه...وزي ما بقولو االيد الواحده مابتصفق فبتكاتف الجهود نبني بلدنا ونعمرها برااااانا..

من طرف **abuahmed** الجمعة 07 يونيو 2013, 3:18 pm

نجلاء زمراوي كتب:من ملاحظاتي ياسهام..ان هنالك مناطق لم تصلها اي نوع من المساعدات ايا كانت
مثلا موضوع الامصال خدم مناطق معينه..
منظمه الشلال ايضا قدمت المساعدات لمناطق معينه...
عشان كده نشوف المناطق التي لم يقدم اليها اي نوع من من المساعدات..
مثلا موضوع الكتب هذه المره نقصد به منطقه الحيبه الشرقيه وام دويمه وما جاورها من قري.

نجلااااااااااااااااااااااء

سلااااااااااااام

اكثر ما يهزم المشروعات هو قصر النظر وضيق الافق والنظر تحت الكرعين والانااااااا

اي كتاب يدخل المنطقة من اي باب وفي اي مكان يخدم ابن من ابنائنا وليس مهما ان يسكن

تركيز الجهد والمقترحات علي كيفية الحصول علي الكتاب ومقترحات التوصيل والتوزيع اتركوها للمنظمين واللجان التي يرتضوها بالمنطقة

تسلميييييييي

من طرف **نجلاء زمراوي** الجمعة 07 يونيو 2013, 4:11 pm

ابو احمد..
سلااااااااااااااام
سمعا وطاعه...
بس ورونا المنظمين ديل وين...
عشان ننظم معاهم...ونرتب علي حسب الحوجه.....
تسلم.....الله يبعدنا من الانا والنظره التحتيه...

شايفاك متلحني تب.....لكن برضو نقبل بالنقد وخاصه لما يبقي نقد بناء ومثمر

من طرف **abuahmed** الجمعة 07 يونيو 2013, 5:45 pm

نجلاء زمراوي كتب:ابو احمد..
سلااااااااااااااام
سمعا وطاعه...
بس ورونا المنظمين ديل وين...
عشان ننظم معاهم...ونرتب علي حسب الحوجه.....
تسلم.....الله يبعدنا من الانا والنظره التحتيه...

شايفاك متلحني تب.....لكن برضو نقبل بالنقد وخاصه لما يبقي نقد بناء ومثمر

معقول يانجلاء تسالي عن المنظمين وين؟؟؟!!!!!!!؟

يانجلاء انا معجب جدا ومهتم جدا بكل الاخوات الاعضاء في المنتدي لاني اري فيهم توب مرقة القبيلة الذي نفتقده وكذلك هم ممكن يكونوا القيادات التي تساهم في التغيير

ولذلك نحب ان ننبهمكم الي اشياء وخبرات اكتسبناها بعامل السن حتي تكونوا قيادات شبابية وكبييييييييرة

عشان كده حا نتلحكم وكان شفنا فيكم زبلعة الشعراء قاعدين

شدو حيلكم وفتحو عينكم والمشوار طويييييييييييييل

وفي الموري ما انطحنت طاسى

تسلمي

التحية والتجلة لك الاخ ابو احمد نصائحك درر وهي مانحتاجه فعلا .الفاضلة نجلاء تسلم كثير فالمنظمة شأنها شان منظمات المجتمع المدني همها الانسان الاضعف دائما وماتقوم به المنظمة جهد يسير ونتمنى ان يعم الخير المنطقة باكملها . وللمنظمة تنسيق مع الرعاية الاجتماعية في المنطقة ونحسب ان القائمين عليها
ذو مهنية عالية جعل الله ما يقومون به في ميزان حسناتهم للاخت سهام ياريت تجمع الكتب التوزيع ساهل ويمكن التنسيق مع الجهات المعنية في المنطقة وحصر المدارس الاكثر حاجة وحسب مصادرنا كما ذكرنا ان موضوع الزي المدرسي والكراسات اكثر اهمية خاصة للايتام والاسر التي لديها عدد من الطلاب . ونؤكد من خلال التقارير التي تصلنا من المنطقة بالرغم من تحسن للاوضاع المعيشية لكن هنالك عدد من الايتام والفقراء .وكذلك اهلنا في منطة ساني .فهؤلاء الحديث عنهم يطول ...فالمنطقة تحتاج الجميع جعل الله ما تقوممون به في ميزان الحسنات والمهم التعجيل والمدارس علي الابواب .

نحن ناس بنعرف الحساب وكلما الناس اتحدت فى الاعمال الخيريه بدون انحياز لاى منطقه كانت هناك دفعه قويه من الخيرين حاجه بسيطه خالص انا اعرف الحا جه الانا اتحصلت عليها واقسمها على عدد القطاعات ويقوموا بالباقى المسؤلين فى المنطقه مع الاشراف من احد ابناء المنطقه تصقون به واذا كانت الاشياء بسيطه فى حاجه اسمها القرعه وممكن يتبعوها ايضا فى القطاع ويمنع منعا باتا اى عمل خيرى غير منظم وفى بعض المناطق ساهمو ووقفوا فى حل القضيه ولكن ليس لديهم متعلمين واثرياء يمدون لهم ايادوهم فى تنميه اقطاعتهم وهذه نظره مستقبليه حتى لا نقول الاقربون اولى بالمعروف لذلك سكتا ولم ارد حتى لا افسد الاشياء ولكن تشجعت عندما قرات ما كتب ابو احمدهى وجهه نظر فقط فقط وليس كجار

اسفه كتبتا موضوعى قبل ان ينزل موضوعكم

اولا شكرا لصاحبة البوست الجميل والفكرة الرائعة—ثانيا منعتنا ظروف العمل للمشاركة فى الراى –
اما الان فقد قطعت الناس شوطا كبيرا فى الموضوع—
اقترح ان بان تجتمع اللجنة المقترحة لتناقش موضوع الكتب والدار معا وطالما ان الاخ سامى قد نقل نفس الاسماء لتكون للدار—فيمكن ان تتجتمع اللجنة فى المواعيد والمكان المقترحين للتناقش المقترحين—وفق الله الجميع

من طرف **نجلاء زمراوي** السبت 08 يونيو 2013, 4:24 am

شكرا الاخوه الاعزاء....
وتشكر كتير ابو احمد...لاخير فيكم ان رايتمونا علي خطا ولم تدلونا...
يجب ان نستفيد من خبراتكم وتجاربكم في الحياه..
اتلح زي ماداير...انشاء الله ستجد اذنا صاغيه وعقلا متقبل للتليح....
تسلم

نشكر صاحبة البوست وآمل أن يكتمل المشروع وآمل أن لا تكلف المرأة أكثر من طاقتها والمرأة دورها المساعدة وآمل أن يتولى موضوع اللجان وغيره الرجال دون النساء ويمكن نستعين بآراء بنات حواء وشدوا حليكم ياشباب. وتقبلوا مروري

هذاء عمل خير جميل وبارع ورائع من نوعة نسال الله ان يوفقكم فيهو وان يصب لمصلحت اهلنا المناصير الطيبين وربنا يوفق الجميع في عمل الخير

نسال الله ان يوفق الجميع يا نجلاء والله كلامك واقتراحاتك عجبتييييييييييييين شدييييييييييد وياريت كل اهلنا المناصير يكون علي قلب رجل واحد ويكون همنا هو تنمية المناصير وانسان المناصير
انا قابلت دكتور في السعودية امس قالي انا استسماري في الحياء دي كلها كيف اعلم اولادي كان هذاء هدفي في المقام الاول والحمد لله ربنا وفقني وكلهم الان اطباء واساتذة جامعات داخل وخارج السودان .
وبعد ذلك كل ما املك وجهتو لاهلي وبلدي الصغيرة من اعمال خير وبر واحسان وقالي نحن عاملين جمعية وبي نشترك فيها نحن المغتربين وشاركنا في بنا طريق شريان الشمال وكل الاعمال الخيرية بدنقلا
نحن كمناصير ليس بعدد وتعليما وثقافتا قدر الدناقلا لكن تكاتف الناس ديل جي عن طريق التعليم نحن بس فالحييين في التربية عطبرة واساس الدامر ياريت يكون في توعية في البلد واعتنا بالناس الاوائل حتي يكون اطباء ومهندسسيين واساتذة جامعات
وهذاء هو دور الجمعيات والمنظمات الطوعية بالمنطقة وياريت تعم الافكار اهلي وعشيرتي نحن والله عانييين بانفسنا ولمن امتحنا من البلد كان هدفنا اي جامعة تخارجنا بس وكنا نقري اضاء لولادينا ربنا يديهم الصحة والعافية لكن لمن جينا البلد دي عرفنا قيمت التعليم شنو وياريت ياشباب بلدي تكاتفو يدا واحدة لكي تصب في جدول واحد وشكرا لكم علي هذا الموضوع الشيق الحساس الذي يصب في الموقع المناسب
وفي الختام ان اختيت فمن نفسي والشيطان فان اصيبت فمن الله

اخى عبد الدافع كلامك فى محلو انا لو عاوزه ابنى بيت ابديه من الساس ونحنا ساسنا سوف يكون ابنائنا وقصتك دى واقعيه

من طرف **نجلاء زمراوي** السبت 22 يونيو 2013, 7:02 pm

الاخوه الاكارم...
الحمد الله وبتوفيق من المولي عز وجل فقد جمعت عددا لاباس به من الكتب (جهد المقل).....
وسوف اقوم بتسليمها ا لي اداره المنتدي يوم اللقاء الاسري....وهم بدورهم سيقومون بالازم...اعاننا الله واياهم لفعل الخيرات.....

من طرف **(الحاج شرف)** السبت 22 يونيو 2013, 7:56 pm

نجلاء زمراوي كتب:الاخوه الاكارم...
الحمد الله وبتوفيق من المولي عز وجل فقد جمعت عددا لاباس به من الكتب (جهد المقل).....
وسوف اقوم بتسليمها ا لي اداره المنتدي يوم اللقاء الاسري....وهم بدورهم سيقومون بالازم...اعاننا الله واياهم لفعل الخيرات.....

اذن علينا ان نحضر مانستطيع تحضيره
ياريت كل واحد يجيب معاه كتاب كتابين انشاء الله يشتريهن
سوف تكون هنالك كرتونه على جانب اللقاء لجمع الكتب
شكرا الاخت نجلاء
فعلا فكرتك عمليه جدا

من طرف **نجلاء زمراوي** السبت 22 يونيو 2013, 9:10 pm

اخي الحاج....
تذاكر الدخول للباسقات كتاب واحد لكل فرد صغير اوكبير....او كراس كبير ...
الرجاء تعين عضو يقيف حنب الباب يستلم التذاكر اقصد الكتب او الكراسات..
والله يا جماعه الموضوع بسيط ومافيهو تكلفه القادر يشتري كتاب او كتابين والماقادر يجمعلو كم كتاب قديم ...واهم شئ الكتاب معاهو كراس..

مثلا قريبي الكليس يجيب معاهو كتابين ودسته كراسات..........
يعني زي ابومصطفي يشيل مهاد ومتاب ومصطفي .....اي واحد كتاب وكراس..وانا اشيل الوفد

المعاي اي واحد كتاب وكراس وهلمجرا...حتي االمعاهو ضيف يشيلو كتاب او كراس...ونسميها نفره الكتاب المدرسي....ولا ايه رايكم!!؟؟؟

من طرف **نجلاء زمراوي** الأحد 23 يونيو 2013, 3:06 pm

نجلاء زمراوي كتب:اخي الحاج....
تذاكر الدخول للباسقات كتاب واحد لكل فرد صغير اوكبير....او كراس كبير ...
الرجاء تعين عضو يقيف حنب الباب يستلم التذاكر اقصد الكتب او الكراسات..
والله يا جماعه الموضوع بسيط ومافيهو تكلفه القادر يشتري كتاب او كتابين والماقادر يجمعلو كم كتاب قديم ...واهم شئ الكتاب معاهو كراس..

مثلا قريبي الكليس يجيب معاهو كتابين ودسته كراسات..........
يعني زي ابومصطفي يشيل مهاد ومتاب ومصطفي .....اي واحد كتاب وكراس..وانا اشيل الوفد

المعاي اي واحد كتاب وكراس وهلمجرا...حتي االمعاهو ضيف يشيلو كتاب او كراس...ونسميها نفره الكتاب المدرسي....ولا ايه رايكم!!؟؟؟

تسلمي اختي ام وضاح علي الافكار البارعة الرائعة دوما وبكم
رايك عين الحقيقة والموضوع ما فيو تكلفة الكتاب في ام درمان البسطة ثمنة خمسة او عشرة جنيهات الواحد فينا يصرف في كلام فارق ساكت
وهذاء عمل الخير نسال الله ان يعين الجميع فيهو وربنا يوفقكم ويسدد خطاكم