منصوري فى هولندا يفوز بالدوره المدرسيه اربعه مرات على التوالى

مبروك للابن ماهر وخلى بالك عليهو عشان يكون خيار محلى

اخي الهادي الف مبرووووووووووووك لماهر
الظاهر الابن طالع لابوه

جنا الفار حفاااااااااااااااار

الف مبروك يانور الهادى وسلمان على على فوز ماهر وانشاء الله يكون بخير
بالمناسبة يانور الهادى اولادك شفتو
كان جو اجازة ومشينا انا وعسكورى وسلمنا عليهم
اظنو كانو جو لى وفاء فى الحاج يوف

الاخ نور تحيه وسلام مبروك للشيل ماهر هذا التفوق اما عن حديثك وملاحظاتك عن الدوره المدرسبه والبدايه تكون في مرحله الاساس لتنميه المواهب والقدرات هذا يحدث في الدول المتقدمه اما في دول العالم بتوعنا تاتي السياسه اولا يكفي ان تكون مسيس لتصل علي ماتريد بلاش تنميه قدرات ولادراسه ووجع راس اختصر الطريق وتسيس تركب عربيه فارهه وتملك عماره في حي راقي واذا قدرت تصاهر من هم في اوضاع سياسه مريحه خلاص تكون وصلت تب وباختصار يكون عمرك لم يصل الاربعين وتملك مال قارون وهذا هو الفرق

كتر خيرك نورالهادى ،الله يبارك فيك
وربنا يحفظ الابناء

الاخ نور الهادي تحيه طيبه واشكرك علي المرور والرد بخصوص العرب ياسيدي الموضوع اصبح فيه جوانب اخري وهي جانب المصالح المنطقه غنيه جدا بمواردها وهي الان خلاص علي وشك ان تكون تحت سيطره الشركات المسماه استثماريه والصراع الان والذي نحن بصدده هو ان نمكن العرب وذلك بحفر ابار ولكن الجماعه رافضين تماما بل باالعكس الان متجهين لحفر ابار في منطقه المروه وقالوا تابعه للحسانيه كل هذا بغرض اضعافنا ولقد حفرنا بئر واحده وهي الان والحمد الله تعمل بكفاه ممتازه ولكن حفر الابار وتركيب المضخه الكهربائيه عمل مكلف الصراع الان علي الموارد واهلنا جلهم ماقادر يستوعب او ينتقل لهذه المحطه ( يقول ليك ادونا حقوقنا والاستثمار ما بطال نشتغل عماله وهذه هي الكارثه لابد من ان يستوعبوا كيفيه دخول المعادله وان لايركنوا الامر الي جهات بعينها وهذه الجهات لها مصلحتها وبس ويقع الضرر الخطير والكارثي ويصبح المناصير عماله بدلا من امتلاك عناصر الثروه وهي الارض )
بخصوص عمل المنظمات اتفق معك تماما في هذا الطرح رغم ان هناك معاكسات لكن لايوجد حل لابد من المناطحه والمثابره ومنظمه الشلال الرابع النسويه مجتهدات جدا وفيهن كوادر ممتازه مراجع حسابات في الولايه وموظفات في ديوان الضرائب ومعلمات والحمدالله وهناك منظمه ايادر علي زأسها الشاب محمد خير والنذير مع مساعده من الربان عبد العاطي محمد خير
اما بخصوص فكره المنتدي وان يكون فيه صندوق خيري انا اتفق مع خالد ان هذه الفكره غير صائيه المنبر هو منبر حر للراي وفي حاله دخول المال سوف يفقد هذا المنبر دوره الاساسي اصلا دخول القروش معناه حضور المشاكل

اخى الباشمهندس هاشم على الجزولى احي فى روع الغيرة والوطنية وحبك الزائد للمناصير واتمنى من ربنا ان يكثر من امثالك . فلقد بح صوتك وانت تنادى بان المناصير مستهدفة ولكن لم تجد من يستمع نعم المناصير مستهدفة فى خيراتها التى بدأت تظهر على الافق ، عندى سؤال اتمنى ان اجد الاجابة عندك لقد تبرع عمر البشير بمبلغ ضخم للعرب الرحل اين هذا المبلغ ؟ اخشى ان يكون مشى لجهات ثانية والله اعلم .
ولكى نساعد عرب المناصير الرحل يجب اولا المطالبة بمد الطريق المسفلت من مسعود عن طريق السريحات حتى يصل البلد مرورا بسانى وعندها نكون قطعنا شوط . هل تعلم يا باشمهندس ان هنا كيلو الحجار المدروشه غالى جدا ويتفاوت فى الاسعار تخيل جبال سانى تجيب كم كيلوا دعك من المعادن . ولى عودة .

اللسان ذاتو اتعوج

والله يا سلمان نحن خايفين من حكاية اللسان ذاتو اتعوج دي.. بالذات لما يجي لى أهلو في النعوفاب
..........
لكن خلينا نقول مبروك لى ولدنا..
لما نور الهادي مشى يتزوج في الابيض.. جاء معاهو البرجوب والفكي محمد جيب الله.. وعمر حمدانه.كورجة من ابناء المناصير.. وأنا زوجتى الوكت داك إشتريت ليهم بيت في كوستي جار ناس جعفر عثمان.. وجعفر عثمان وفتح الرحمن ناس مشرع في كوستي حيث الثراء الشديد والكرم البي يشبه كرم البرامكة.. واخو زوجتي شريك معاهم في الدكاكين.. جعفر قال ليهو شوف خروف أخو بنات أضبحوا... واتلمن حريم المناصير في كوستي كلها.. ناس حسن محمد سعيد واولادو.. وولد سيد احمد ود تنادابي معرس بت خديجة بت البدينة في شري.. و وأولاد الدكاكين.. وناس جروف برتي.. وناس محمد عثمان ساعد وولادو.. وناس ود راجنو الفي كوستي داك..وناس سليمان خليفة وناس على قمر من برتي.. وناس عبد العاطي صديق من جزيرة أمري الكبيرة.. وناس عمر يس من برتي.. كان مجموعة إحتفلت بالعريس وهو في طريقه الى الأبيض. زوجتى قالت لى سلمت على نور الهادي من جملة الحريم وباركت ليهو لكن ما عرفني.. موش هو أخو زينب عقيد!! قلت ليها بلا هو اخو زينب عقيد.. هسي دي زينب عقيد ماها قاعدة تعرفك وتزورك وتزوريها في الثورة وهي في أم بده.. زينب عقيد تبقا فالحي تعرفك ونور الهادي ما يعرفك؟؟قلتا ليها معليش خليهو.. اصلو شايلاهو الهاشميي بالعرس فرحان ما بيتذكر زول هسي دي..
وقتها أنا كنت في الخليج موش حاضر المناسبة.. لكن حكوا لى..

الاخ نورالهادي اعجبنا كثيرا ان يفوز احد ابنائنا بجائزه في هولندا وربنا يحفظوا ليك ومزيد من التقدم

الف مبروك يانور الهادى وان جاءت متاخره لانى لم اطلع على هذا الموضوع ذى ماعارف الهم موزع بين المعايش والطامة الكبرىوهى اغراق البلد وماتبعها من مشاكل فى المعايش والسكن ولااظنك شفت شرى الخضرا اصبحت تزرف عليها الدموع ولكن عزانا فى هذا المنتدى نشكى له بدلا عن رمال حلتنا التى غمرتها المياة والف مبروك للابن واللهم احفظة والبلد محتاجة لامثالة ولك سلام حار منى محمد موسى واهل المناصير وشارغ واحدالمايقوما

مبروك لماهر ,, والله شرف لكل المناصير , وانشاء الله عقبال كل منصوري في اي دوله من دول الاغتراب يبرز لنا في تخصص , الطبيب , المهندس , التاجر , الموظف , الطالب , وكمان في اي مدينة واي ولاية داخل السودان , دايرين لمن يفتشو لي وزير الثقافة مايلقوا غير منصوري , ولمن يفتشوا لي بتاع السياسة مايلقوا غبر منصوري , ولمن يفتشوا لي بتاع الخارجية مايلقوا غير منصوري , دايرين ودايرين ودايرين ,,, والله بيدي الجنة . ( شكرا نورالهادي ) .

استاذنا صديق عبدالله تحياتى لك وللعيال وشكرا على المرور وانا طبعا رديت عليك فى مداخلة فى احد مواضيعك فى نفس اللحظة لأنك اعدت لنا ذكريات لن تمحوها هموم الغربة والحياة وانا والله ناس كوستى اخجلونى بكرمهم واستقبالهم وهم فعلا مثال لانسان المناصير خارج البلد فلهم ولك وللمدام خالص ودى واحترامى .

اخى طائف عبدالله على حدورى اشكرك على المرور ولك فائق الشكر والتقدير .

اخى وتوأم روحى محمد موسى تحياتى لك وللاخوان حسن وعلى والله مشتاقين لاعادة الذكريات . اخوك تعبان كبر فى السن والغربة هدت حيلنا. قلت لى هذه الايام جارى يوم فى البلد ويوم فى الخرطوم نتمنى ان تصرفوا حقوقكم ويهدأ بالكم ومزيدا من التطور والتنمية فى دار ود قمر .

الأخ اسامة تحياتى لك ولكل اهلنا فى شررى واشكرك على المرور وعندى طلب بسيط عليك الله اشرب لى كوز ليمون من الكشك بتاع ودالحيبة وقل له لواحد عطشان تتخيل انا مشيت البلد يوم واحد وغشيت عطبرة عشان اشرب ليمون عندة ولقيت معاهو خضر بخيت وسألت من واحد فى السكة حديد كان يبيع باسطة قالوا مات زمان ,ولكن للأسف عطبرة لم تنال نصيبها من التنمية كانت زمان عاصمة الحديد والنار واكبر مدينة فى الشمال ولكن قامت مدن جديدة وفاتت عطبرة نسأل الله ان تعيد عطبرة مكانتها فى الشمال .
اخى اسامة اشكرك على المرور الرائع ولك فائق الود والاحترام

الاخ الهادى عقيد
ربنا يوفقكم والصبية وماهر اضاف للمحصلة المنصوريه ..لغة ربما لانجدها
بجميع ولاية نهر النيل ..ناهيك عن المناصير
ومن صوادف الامور والاحوال ..اننى التقيت احد سائقى شركات الليموزين
بالقضارف ..وروى لى رحلتك للبلد وضهابك بين التمره المع الخور والضقوله وخورحنون
وياريت ترويها ...وسمح الكلام من خشم سيدو

الاخ الكريم على عيسى شكرا على المرور الرائع وقلت لى قابلت السواق الكلاموا كتير انت عارف من الحاجات الغريبة انا نزلت فوق الضقولة وقطعت خور حنون وشربت من خلوة حاج عبدالله الحنونى لكن الصغيراب ما عرفتها لقيت لوارى وبكاسى قلت للسواق نرجع نحن فى امرى رجعنا حتى مقابر الضقولة قلت له هذه مقابر الضقولة الصاح نرجع تانى وقفنا فى الضقولة ودخلت الخلوة وما لقيت فيها زول دقيت باب اول بيت الكلام هذا الساعة اتنين بالليل ما فى زول مرق قلت للسواق نمشى نبيت فى خلوة عبدالله الحنونى وبالمرة الصباح اعزى فى الوالد عمر عبدالله والصباح رباح ممكن نعرف معالم البلد قام السواق قال لى نفوت الصغيراب نجرب احتمال تتذكر الطريق المهم وصلت البيت الساعة الرابعة وكل هذا الزمن من الضقولة للنعوفاب ولكن الحمدلله الواحد شاهد الناس والاهل بالرغم من الساعات البسيطة التى قضيتها فى البلد .

الاخ الباشمهندس الفكى تحياتى لك وللاسرة الكريمة واشكرك على المرور الرائع ونسأل الله ان يرد غربتك وغربتنا يا رب .

عمنا نور الهادي اتفق معك فيما اشرت اليه ان عطبرة كموقع يسمح لها ان تكون من أجمل المدن
أتبره الاسم القديم كما يحلو للعطبراويين , أتبره القديم التاريخ الناصع ( الرشيد مهدي , حسن خليفة العطبروي , الصول داؤد ادم , هاشم حسن الطيب , عوض الله دبوره , الشاعر محمود ابوبكر,
وغيرهم مازالت اماكن عملهم ومنازلهم تقف شاهده علي انهم وغيرهم شكلوا تاريخ أتبره , نتمني ان نسمع ونسمع عن تاريخ عطبرة والسكة حديد جرس السكة حديد الذي لازل بدقاته القديمه ولكن هل من مستمع , الفترة والزمن القادم ان الاوان لمدينة عطبرة ان تلحق بركب المدن المتقدمة سياحيا واقتصاديا وعمرانيا , خصوصا وانها تربط ابوحمد كريمه بورتسودان الخرطوم , وارها تسير في الطريق الصحيح بس دايره شويه جكة من المسؤليين ورجال الاعمال وكبار التجار ,
فلقد وقعت يوم الإثنين من هذا الشهر اتفاقية في ولاية نهر النيل بين اتحاد كرة القدم وبنك أمدرمان الوطني، تقضي باستيراد نجيل صناعي لإستاد عطبرة، من دولة الإمارات العربية المتحدة بتكلفة 800 ألف جنيه، ووصفت عملية التنجيل بالأحدث عالمياً.
وأكد مدير بنك أم درمان الوطني فرع عطبرة أبوبكر جلي التزامهم باستيراد النجيل الصناعي في فترة لا تتجاوز 45 يوماً، معلناً عن تبرع البنك وتزويده لإستاد عطبرة بلافتة إلكترونية مضيئة لإعلان النتائج الفورية للمباريات التنافسية.
ففي الفتره القادمة ستشهد مدينه عطبرة افتتاح مجمع عطبرة الطبي , والميناء البري الذي هو افتتح بالفعل , ولقد تم افتتاح عدد من مصانع الاسمنت في الشهر الماضي , شويه حركة سياحيه ( نظافة وعمران ) ستصبح قبلة للانظار انشاء الله .