معتمد أبوحمد الآن قال( المناصير الرجالة وصلوها حدها)

قولة البشير دي تعني شنو؟
دي عايزة زول يوسعها شوية هذه الكلمة.. بس بعد ما يكون الخيار المحلى جنة الله في الأرض.. ويكون جاذب شديد..
الآن أهلكم من ناس أمرى والحامداب يتضورون جوعا.. وحالتهم تغنى عن السؤال.. وشجر برتقالهم مات.. وفواكه كثيرة ماتت والمياه تعسرت عندهم..
ممكن هذه المجموعات ندعوها للسكن في ارض المناصير ونندمج وندخل التاريخ المعاصر بذوبان هذه الكيانات الثلاث.. وشئ طبيعي يعلو اسم المناصير لأننا حوالي 67.7% من المتضررين نحن..
خاصة أننا كلنا عند الشايقة ( زوّارة ) دي خطة المستقبل لقائد فذ، يخلق بؤرة جديدة ينسب اليه تاريخ دمجها اجتماعياً.. والأمارة وناس الحامداب، خضنا معهم من ذي قبل دعوات قريبة من دي من بعض المصلحين من أبناء المناصير.. لكن فرق تسد حصلت بيننا.. وفرقتنا شذر مذر، وشغلت كل واحد بقضيته الخاصة.ز انشغلنا نحن في خط الكنتور.. ومشاريع إعاشة ومشاريع تعمير.. ومهجرين ومحلي... والصرف ينصرف .. وانشغلوا ناس الحامداب في العطش وموية الشراب يومين في الأسبوع للمساكن..

ممكن يقول قائل.. هو ناسنا ما راضين يسكنوا ناسهم معاهم من الخيارات الأخرى؟ يجوا يسكنوا ناس الحامداب وأمري؟
أراضي الحامداب غرقت كلها
وأراضي ناس أمري وهم ناسنا برضو غرقت كلها
واراضي المناصير ثلاثة أرباعها باقي
.............
الريس يبدو مشحون ضد الذي يحصل في المحلي
لأنو قال
ناس الخيار المحلي نحن ملتزمين ليهم بالمشاريع والطرق والإنارة
يا جماعة كمان برضو ناس الخيار المحلي يلتزموا لينا بالقانون.. مافي زول ياخد القانون في يدو..
الزول البي يفهم التحليل السياسي جيد.. يقدر يعرف الكثير الغامض من وراء كلام البشير
بس الوضع مطمئن الآن
بعد الحصل ده الآن مافي حد طمعان في أرضنا
ولا أسامة عبد الله طمعان فيناولا الولاية الشمالية طمعانة في حدودنا
يعني حقنا في المحلي ثبت
بس يبدوأننا محتاجين لتقليم الأظافر.. أظافر بعضنا البعض .. نقصها عشان ما نخربش بعضنا.. وعشان المولود الجديد هذا ما يخربش وشو بي ضفورو

النظرة القصيرة ما بتنفع
والنظرة الأحادية ما بتنفع
والنظرة الملونة بمنظار السياسة المعينة ما بتنفع
والزول الكان جعان لو مسكوه قوت الناس ممكن يكفر بالناس بعد ما يجد النعمة
..........
أول زمان زمن الفريق عبود كان لما يدوروا يعملوك ضابط أمن ..
يدرسوا حالتك الاجتماعية من رابع جد عندك
لازم تكون زول عز من أجدادك.. ما يجيبوك من الناس الوضيعين ، عشان ما يكون عندك حقد على المجتمع، لأنو القانون سوف يصير في يدك. عشان ما تتفشا في سادة المجتمع، وأنت تنفذ سخايم نفسك وأحقادك ، وتظن أنك تنفذ القانون...
برضو كمان عشان يعينوك ضابط أمن. لازم يدرسوا حالة أسرتك وعترتك من رابع جد.. أنك زول عينك مليانة وارثين على الأقل المعيشة المعتدلة.. ما ضقت الحرمان ولا ألم الجوع القاهر ولا المذلة ولا المسغبة..
برضو ما يكون عندك ميول ساسية صارخة نحو جهة معينة.. عشان أنت راح تكون مسؤول عن الشعب السوداني كلو بجميع فصايلو..
موش دي براها
زمان حتى لو عايزين يقبلوك في معهد التربية شندي سنتين بعد المتوسطة عشان تجي مدرس.. ينظروا فيك فسيولوجياً.. ونفسياُ.. لأنك راح تكون مسؤول عن النشأ والبراعم الأبرياء.. يعني الحكاية ما مطلوقة ساكت..
..........
أنا متفائل جدا بمستقبل باهر للمناصير بالجد يعني..
بس شوية فركة كعب كدة..
الزمن هو إحدي العوامل المساعدة..
قال صلى الله عليه وسلم ( ان الله لايعجل لعجلة أحدكم)وقد قال تعالى (خُلِقَ الْإِنسَانُ مِنْ عَجَلٍ ۚ سَأُرِيكُمْ آيَاتِي فَلَا تَسْتَعْجِلُونِ )

ميسرة والكليس تشكروا على المرور بي جاي.. وربنا دائما يجمعنا على المحجة البيضاء.. ليلها كنهارها... كلو من أجل مصلحة أهلنا.. وأن نكون خيار محلي.. شامل جامع نضيف من الأحقاد.. كدة راح نغري حتى غير المناصير يجونا أو يتزوجوا منا...
وكدة بالعمل الدؤوب نقدر نثبت لكل السودان أن الخيار المحلي ناجح مائة في المائة ولا يقدر ينكر ذلك أحد... بالبرهان العملي الذي لاتخطئه العين المجردة..
وقديما قال الشاعر
قد تنكر العين ضوء الشمس من رمد
وقد ينكر الفم طعم الماء من سقم..
وعندها سوف يزول الرمد والسقم..
ونرى الخيار المحلي جنة لكل السودان
وكدة نكون قدمنا لوحة مكتملة بمقاييس الرسم

بعد التحيه أهلي : شكرا عمنا صديق تحليل جميل وسرد ممنطق وعنوان بدايه للتعمير ,,نعم نريدها جنه وتحتوي الكل ..بالتعمير ننهض ..
بالاخوه الصادقه والنظره المستقبليه ننموا ..
نرجعها سيرتها الاولي ان شاء الله ...

تسلم يوسف زول النصيحة

شكرا الاخ صديق وتحليل شخص لايكتب بعاطفة او يميل او ينتمى لفئة بل تهمه المصلحة العامة للبلد--
رغم خطابات وقرارات السيد الرئيس فقدت مصداقيتها ولم يبطق الكثير منها ووضح للمرة التالتة انه يملى عليه دون التعمق فى المشكلة---ولكن مايهم فى الامر ومن خلال خطابه ودعوة الناس للرجوع للخيار المحلى لمن اراد--وان على اصحابه الالتزام بالقانون وسوف نوفر لهم الخدمات----الخ يعنى ان الخيار المحلى اصبح واقعا وانه جاذب بدليل دعى من اراد الرجوع اليه فليرجع---ونحن نقول الخيار المحلى يسع الجميع

سير سير يا البشير
امين امين يا البشير
صادق صادق يا البشير
دا مش كان هتافنا في الطويني قبل سنوات ؟
واعقبه اعتصام لعدم تنفيذا قرارات الريس ؟
يعني الجديد شنو ؟
ما لسع نحن في الترن ورن

هههههههههه
أحمد عبد الوهاب قلت لى لسه نحنا في التيرن ويرن... ههههه يحلنا الحل بلة
................

----الخ يعنى ان الخيار المحلى اصبح واقعا

أيوه يا سلمان كيف؟
خلاص الخيار المحلي أصبح واقع مفروض وملموس.. مافي كلام

الباشمهندس صديق التحية لك ولضيوفك الكرام والحكاية كلها يا هندسة صراع بين الشعبيين والمؤتمر الوطنى والحمد لله لقد جعل كيدهم فى نحرهم منذ متى كانت الدولة ترضى بأن يهجر انسان ويعوض عن كل ما خسر من أرض خارج أرضه الأم ثم تأتى نفس الدولة وتقول يمكن لهذا المهجر أن يعود لوطنه الأم ويمتلك مرة أخرى أرض ولذلك تجد كل شباب موقع المناصير بلدى ما عدا ود جيب الله وهذه حالة شاذة أيدوا فكرة الحل الوسط المناصير للجميع والزراعة لأصحاب الخيار المحلى .فيا باشمهندس اذا تم صرف كل من صرف فمحلية البحيرة ستكون المحلية الوحيدة فى السودان التى ليس بها عضوء فى المؤتمر الوطنى سوى المعتمد .!! فيا هندسة مناصير الاغتراب هم الأصل وهم الصفوة وهم الضحية وهم السيف المسلول من أجل المناصير والاعتصام خير دليل ألم تشاهد حماس دكتور حسين النافعابى بجمع التبرعات أم أنك لم تقرأ لشاعرنا الكبير ود بروى بالمشاركات وخليك مما كتبه قامتنا النفر .ومما كتبه بقية الشباب .وبوست الدامر هذا الصباح خير دليل للدفار الذى شحنه فارس الزين دعما للمعتصمين وفى النهاية يأتى ابن المناصير البار ود جيب الله ويفتح بوست باسم الكتاحة ويشن فيه حملة على المغتربين . فلو أردنا أن نختار قيادة رشيدة متعلمة للمناصير فسيكون للمغتربين نصيب الأسد ولكن القيادة قسم وعفن .والموت الأحمر لمن يتعرض للمهاجرين . ولنا عود ان شاء الله لهذا الموضوع الهادف .

تسلم الهادي على التحليل الجيد
نحن بالمناسبة فاهمين كل حاجة، حتى الدقايق من المخفي..ما بنحب نطلق الحقايق التى نعرفهاكلها دفعة واحدة.. الزمن ... الزمن .. عامل أساسي..
لكن الإصلاح سوف يتم بالدرجات.. والنور ماشي ساري والظلام ماشي منحسر..
وسوف يفهم المنصوري زول البلد العادي كل شئ وفي الوقت المناسب..

الباشمهندس صديق لك الف تحية
طرح موضوعى ونظرة ثاقبة بعيدة عن العاطفة والميول
لنرى حديث الرئيس مستقبلا والموية تكذب الغطاس

صديق عبدالله علي أبوحنة كتب:تسلم الهادي على التحليل الجيد
نحن بالمناسبة فاهمين كل حاجة، حتى الدقايق من المخفي..ما بنحب نطلق الحقايق التى نعرفهاكلها دفعة واحدة.. الزمن ... الزمن .. عامل أساسي..
لكن الإصلاح سوف يتم بالدرجات.. والنور ماشي ساري والظلام ماشي منحسر..
وسوف يفهم المنصوري زول البلد العادي كل شئ وفي الوقت المناسب..

معظم كلام نور الهادي ينصب حول ود جيب الله
يعني الكلام عن وجيب الله يعتبر تحليل جيد ؟

يا نور الهادي :
كلام ود جيب لله حسب فهمي يتناول جزئية الإحاطة بالمعلومات والمتابعة والوقوف على الأحداث
وخليك من المغتربين في ناس هني لافين ساكت
وثمة وقفة دقيقة: هل ما قدمه المغتربين كثير على اهلهم ؟
وهل المن والأذى يكون وارد في الحالة ؟؟

تسلم أحمد عبد الوهاب
التحليل الجيد هو ما تطرق فيه نور الهادي للقضية.. كلام ود جيب الله موش تحليل لى شى مافي. كلام ود جيب الله راى قالوا عديل هنا..موش تحليل خبري.... وبالمناسبة في هذه المرحلة أنا مع اي زول يفضفض ويطرش ما يتجرعه من ألم. عشان يتم الشفاء..
أنا عادتى لا أعترض على راي زول. ولا أحجر زول رايو.. وإن كان راى مخالف برضو خليهو يتشمس هنا.. والناس تعرفوا. انا لا معترض على ود جيب الله ولا معترض على نور الهادي، ولا معترض على اي منصوري، ألقى بوجهة نظري في خضم الأحداث، عشان ممكن يلتقطها أي واحد قارئ للمنبر .. اقدم لغة الوفاق على لغة التناحر عشان جايز اي زول في يدو قلم يمر بي هنا. يقرا. كان ظالمنا يحاول يعتدل ويتذكر ربو فيا.. وكان زول يفتش ويبحث كيف يرقى بأهله، يجد خطط ممكن تنور ليهو الطريق..وكان زول بيفتكر أولاد المناصير كلهم أغبياء ومتناحرين وسهل اصطيادهم يعرف في ناس مني ومن غيري هنا في المنبر أنو عندهم راى وفكر وتنقيب وتوافق أكثر من تشاجر مع المجموعات المنصورية..
.......
عشان كدة تحليل نور الهادي للقضية جيد.. ليه؟
عشان نور الهادي بيدعو للم الشمل، وموجوع بالقضية وهو ماعندو فيها خيار والله فقوس. حتى اسمو سقط في التعداد والتعويض.
يعني زول قلبو حار على أهلو يقتطع من زمن أسرتو الخاصة ويجي يخاطبنا هنا.. بغض النظر نختلف معه أو نتفق معه..
يعني مافي حجر على راى أي زول.. حتى نقدر نطلع بي نتيجة يا أحمد

احمد عبد الوهاب كتب:يا نور الهادي :
كلام ود جيب لله حسب فهمي يتناول جزئية الإحاطة بالمعلومات والمتابعة والوقوف على الأحداث
وخليك من المغتربين في ناس هني لافين ساكت
وثمة وقفة دقيقة: هل ما قدمه المغتربين كثير على اهلهم ؟
وهل المن والأذى يكون وارد في الحالة ؟؟

الاستاذ أحمد عبد الوهاب أنت جيب لينا خبر ناس لا تحت يعنى مشروع أم سرح وغيره ولكن زعلى من ود جيب الله ليس له حدود ولكن يعلم الله من أجل ماضيه المشرف من أجل المناصير فالرجل أحد قادة هذا الموقع ويكفى أنه عان الأمرين من أجل توصيل مصل العقارب لأهلنا الطيبين ولن أحكى قصة الطفشان داخل مياه البحيرة ليلا مع بقية العقد الفريد فرجل بهذه المواصفات كان من الأولى أن يكون فى مقدمة المسامحين ورجل بهذه المواصفات كان من الأفضل أن يتأنى فى تحديد قراره فهو قدوة للجميع ويؤسفنى أن أقول هذا الرجل أعجب بتسامح القامة عيسى بروى ونقل ما كتبه أستاذ الأجيال ود المناصير عن تسامح عيسى بروى ! وأنا والله حتى الآن لم أفهم الباشمهندس ود جيب الله ,مرة أراه يدعوا الى التسامح ومرة أراه من المتعصبين فمن أمثال هذا الرجل يجب أن يكون من الوسطيين المناصير للجميع والزراعية لأصحاب الخيار المحلى . وآسف جدا يا باشمهندس صديق ولكن من أجل ود جيب الله كان لا بد أن يطيل التوضيح .

والله يا الهادي قضية المناصير ما عارف ح تودينا وين ؟
تابعت صور الاحتفال بك
وتعجبت من ان تكون الخلافات في القضية يمكن ان تضيع حتى العلاقات بين الناس
امل ان يكون الذي بينك ود جيب الله دائما عامر بحب البلد
وانا اسف لودخلت غلط

احمد عبد الوهاب كتب:والله يا الهادي قضية المناصير ما عارف ح تودينا وين ؟
تابعت صور الاحتفال بك
وتعجبت من ان تكون الخلافات في القضية يمكن ان تضيع حتى العلاقات بين الناس
امل ان يكون الذي بينك ود جيب الله دائما عامر بحب البلد
وانا اسف لودخلت غلط

أستاذ أحمد اختلاف الرأى لا يفسد للود قضية فأنا اختلف مع سلمان أخوى فى بعض القضايا فهذا لا يعنى يجب أن نتخاصم فانا كنت أتمنى أن لا يظهر الباشمهندس ود جيب الله رائه بعد ما تأكد أن كل شباب المنتدى أيدوا فكرة الخيار المحلى للجميع والزراعة لأصحاب الخيار فود جيب الله ليس بعضو عادى فالرجل له صولات وجولات فى العمل الاجتماعى ومحبوب من الجميع فرجل بهذه المواصفات كان يجب أن يكون تقيل ولا يتسرع فى قراره هكذا يكونوا قادة العمل الاجتماعى والمثل بقول يا أستاذ أحمد . قالوا اللامك دارك .

هل فعلا حد الرجاله الحرب التى تدور بين المناصير أنفسهم وكثير الإتهامات فيما بينهم يا خال؟؟؟
هل فعلا المناصير الحاليين (أعنى قادة الراى والفكر )فى المنطقه قادرون على المحافظه على تاريخ من سبقوهم من الأجداد؟؟
هل فعلا المناصير يعملون للمنطقه بإخلاص ؟؟
أم لبنا ء أمجاد شخصيه!!وأطماع ماديه خلال وضع السودان الغابه الآن؟؟؟
هل كل من دافع عن البقاء حول البحيره يريد فعلا العز والتاريخ وأن يحافظ عليه من التلوث والخليط الذى يحدث فى المكابراب الآن؟؟
هل الفلوجه فعلا وفيه للمنطقه وتعمل بشفافيه؟؟
أم صارت طمس ومحاكاه ومرمطه؟؟؟
(وين ناس المجهاد فى المناصير البلد)وليس الإنتساب الذى تسبب فى الكثير من الأذى!!!!!!!!!
لا زلنا نحن ننتظر الفرج وقضيتنا عادله جدا فقط نخشى عليها من أنفسنا والشيطان!!
لك التحيه والود يا خال ولو لا أنت كتبت لاحتجبت ولكننى أتوافق معك فى الرؤى كثيرا والأخ الحبيب نور الهادى..ودعانى ذلك للتعبير عن بعض مكنوناتى والغصة التى فى حلقى...

يا ابو مصطفي

انت الناس دي جنت ولا قاعدين يعقبونا علي السعن قبل مايجو المنتدي

السيد الباشمهندس ود اب حنة كيف الحال والاحوال
بخصوص البوست هناك نقاط اساسية لا اختلاف عليها وهي موضوع أخذ القانون بااليد فعلا هذا خطأ لايعقل باي حال من الاحوال اخذ القانون بااليد وأخذ القانون بااليد سوف تترتب علية ردود افعال غاية في الخطورة منها نقل المشكلة الي المجتمع الداخلي وافرازات سالبة معروفة ايضا سوف تعطي الاخرين الفرصة للتدخل وتمرير اجندة كان الجميع يخافها
المستقبل ياسيد اب حنة الحمد اللة رغم كل الصعوبات والمشاكل استطاع المناصير او تمكنوا من العبور ويبقي التحدي هو كيفية تجاوز المرارات ومعالجة السلبيات بعيدا عن مبدأ الانتصار للذات وشخصنة المواضيع والتحزيب من حيث هو تحزيب سواء كان تحزيب يصب في مصلحة مجموعة ضد مجموعة او تحزيب مصلحة او تحزيب سياسي لابد من النظرة الكلية الشاملة النظرة الاستراتجية التي تصب في مصلحة الجميع حتي يكون الجميع معك والاسف هذة النظرة المفقودة لدي اصحاب القرار الممسكين باالامور السياسية الان في السودان لذا نجد المشاكل في جميع انحاء السودان والتي اتحولت الي بؤر نزاع تهدد امن واستقرار البلاد
موضوع عودة المهجرين الي ارضهم وتناول نور الهادي السلبية او الخطأ الذي وقع فية المسؤلين عن امر التهجير وهو لماذا التهجير من اساسة وما هي الجدوي التي قامت عليها هذة المشاريع من اصلو والان وبكل بساطة تنادي بعودة المهجرين لفشل هذة المشاريع هنا لابد من المسائلة هذا معناة ان الوقوف ضد الخيار المحلي كان خطأ ارتكبة المسؤلين عن التهجير وهناك نقطة ذكرها ابحنة عن موضوع عودة اهل امري والحامداب واحتمال ان لايرضي المناصير او يتخوفوا اولا يا اب حنة ان اراضي امري اكبر واحسن من اراضي المناصير خاصة باالشرق فهناك سهل كبير جدا يسع كل المتاثرين من مناصير واهل امر وحامداب ولقد كان هناك اجتماع مع اهل امري لمناقشة بعض الامور مثل صيد السمك وامور اخري حتي لايحدث احتكاك فاالجميع اهل واخيرا تحياتي للجميع

(القفل) بتضخيم القاف وضمها وضم الفاء أى المخلايه تعرفوها دى؟؟؟القفل المنصورى شكلو كدى فاضى أخى أبو مصطفى ما فضل فيهو حاجه..
خلاص المناصير عرفناهم كلهم النقعد نحل المشكله فى باقى فى دارفور!!
والله جد!!!!!!!!!!
أنا كنت هناك جلست مع الشيخ داخل مدينة نيالا والكلام ده موثق ومعاى شهود مناصير...
لسع فى باقى مناصير ما عرفناهم تايهين فى السودان القارة ده...
ما هى المشكلة دى بقت أى زول داير يعرف نفسو..
ولا رايك شنو يا ود(دماج)أموت فى دماج أنا وأم جغور.وحسن مبارك قريبى ..
كان عندو تمر عجيب تعاينلو من البحر تضحك بدون مناسبة!!لما يضفيه عليك من البهجه والسرور والخضرة.عليك الله دى بلد يفرطو فيها مش المفروض هسع تكون قامت من جديد بدل الكلام الكتير ده؟؟؟؟؟

يسلم المرور
عباس
وعلي الحمود
وأبو أحمد
أبو مصطفى
هاشم
إضافات مقدرة ومرور كريم من نفر كريم

هاشم علي الجزولي كتب:السيد الباشمهندس ود اب حنة كيف الحال والاحوال
بخصوص البوست هناك نقاط اساسية لا اختلاف عليها وهي موضوع أخذ القانون بااليد فعلا هذا خطأ لايعقل باي حال من الاحوال اخذ القانون بااليد وأخذ القانون بااليد سوف تترتب علية ردود افعال غاية في الخطورة منها نقل المشكلة الي المجتمع الداخلي وافرازات سالبة معروفة ايضا سوف تعطي الاخرين الفرصة للتدخل وتمرير اجندة كان الجميع يخافها
المستقبل ياسيد اب حنة الحمد اللة رغم كل الصعوبات والمشاكل استطاع المناصير او تمكنوا من العبور ويبقي التحدي هو كيفية تجاوز المرارات ومعالجة السلبيات بعيدا عن مبدأ الانتصار للذات وشخصنة المواضيع والتحزيب من حيث هو تحزيب سواء كان تحزيب يصب في مصلحة مجموعة ضد مجموعة او تحزيب مصلحة او تحزيب سياسي لابد من النظرة الكلية الشاملة النظرة الاستراتجية التي تصب في مصلحة الجميع حتي يكون الجميع معك والاسف هذة النظرة المفقودة لدي اصحاب القرار الممسكين باالامور السياسية الان في السودان لذا نجد المشاكل في جميع انحاء السودان والتي اتحولت الي بؤر نزاع تهدد امن واستقرار البلاد
موضوع عودة المهجرين الي ارضهم وتناول نور الهادي السلبية او الخطأ الذي وقع فية المسؤلين عن امر التهجير وهو لماذا التهجير من اساسة وما هي الجدوي التي قامت عليها هذة المشاريع من اصلو والان وبكل بساطة تنادي بعودة المهجرين لفشل هذة المشاريع هنا لابد من المسائلة هذا معناة ان الوقوف ضد الخيار المحلي كان خطأ ارتكبة المسؤلين عن التهجير وهناك نقطة ذكرها ابحنة عن موضوع عودة اهل امري والحامداب واحتمال ان لايرضي المناصير او يتخوفوا اولا يا اب حنة ان اراضي امري اكبر واحسن من اراضي المناصير خاصة باالشرق فهناك سهل كبير جدا يسع كل المتاثرين من مناصير واهل امر وحامداب ولقد كان هناك اجتماع مع اهل امري لمناقشة بعض الامور مثل صيد السمك وامور اخري حتي لايحدث احتكاك فاالجميع اهل واخيرا تحياتي للجميع

[/color] كلام من دهب

اليوم والاسف الشديد بدأ السيناريو الذي كنا نخشاة والمتمثل في نقل الصراع الي داخل المجتمع المنصوري ومايصاحب ذلك من افرازات خطيرة تتمثل في تهتك النسيج الاجتماعي والمرارات والحقد ومردود الغاء القانون وعلية سوف يرد الاخر بنفس الاسلوب وفي هذة الحالة سوف تكون ردة الفعل تحت مسمي الانتقام ويالها من كلمة سيئة وقبيحة ولكنها تعني للاخر رد كرامتة وفي مجتمع بسيط تصبح هذة الكلمة لها مدلولها وكعنوان البوست الذي يقول الرجالة وصلوها حدها هنا مربط الفرس وهنا تكمن الصعوبة في تناول مثل هذا الامر فكما ذكرت المجتمع بسيط والمراة والاسرة لها دورها في التحزب مما يزيد ويعمق من الجرح ماهو الحدث
قبل البارحة والناس نيام طاف بعضهم علي ممتلكات السيد حسين في منطقة السجني وتم تدمير الزرع اشجار البرتقال واشجار النخيل كما تم اغراق المركب والفاعل مجهول

وهذا هو المتوقع
اخى الباشمهندس اعتراضنا على ماقامت به ماتسمى بالفلوجه هو خوفنا على اعز ماتمتلكه منطقه المناصير وهو الامن والامان وقوه النسيج الاجتماعى والترابط الاسرى
الان قد مزقنا هذا بقوه وقد جندنا شبابنا لتكسير وهدم منازل اهليهم وزويهم دون مراعاه حتى لحق الناس على بعضهم البعض دينيا واجتماعيا
العلاج عند الساده اصحاب المعالى والسمو الملكى اعضاء لجتنا التنفيذيه
الموقره
لانهم هم من كانوا باستطاعتهم وقف هذا العمل الذى لايرضى الله ورسوله خاصه وقد نفذ عبر شخصيات كانت غير معروفه حتى للاهالى ويبدو انهم اصحاب احقاد شخصيه لم يحترموا حتى كبار السن وقد جعلوا لانفسهم سلطات تجعلهم يتحروا مع الاهالى ويجبروهم على التوقيع على التعهدات وهذا هو عمل شرطى ويدخلوا للمنازل دون اذن من اصحابها وهذا عمل لايقوم به الابامر نيابى ويهدموا المنازل وهذا عمل لاتقوم به الا السلطه القضائيه
بربكم ماذا كنتم تتوقعوا وكل هذا يحصل بالمناصير
هذا هو مسؤليه اللجنه لانها كان بمقدورها ان توقف هذا العبث
انكارهم بان لاعلاقه لهم بالامر يزيد من مسؤليتهم ويحملهم الامر كله ويجب عليهم ان يستنكروا هذا الامر ويتبروا منه امام المجتمع المنصورى
والا ماحصل بالبلد سيتكرر