الأمثال الشعبية والعبارات الشهيرة بالمنطقة (تراث الجمل )

نبدأ هنا للتوثيق للأمثال الشعبية والمقولات والعبارات التي كانت سائدة في المنطقة ومدلولاتها النفسية والاجتماعية والتربوية، ومازال بعضها يستخدم حتى الآن –

(1) الاتعدواعلى بوني:

أو إلا تعدى على بوني لمخاطبة المفرد –والمقصود هنا يجب أن تعمل حسابك من بدري وذلك في إشارة لصعوبة الأمر أو توقع حدث او أمر ما ،فيجب الانتباه مبكرا والعمل بجديه لتفادى تلك المشكلات أما قصة المثل لااتذكرها –لكن المضمون ان على الفرد أو الجماعة الذين يطلق عليهم المثل ان هناك تقصير أو إشكال حدث ولتفاديه يجب من وقت مبكر الاحتراس وإلا حدث ذلك الأمر أو المشكلة.

(2) سووا الصفقة دنقير

وتعنى هنا يجب العمل بجدية تامة وتضرب دائما للمجموعة لأنها أطلقت أصلا على المجموعة التي تقوم بالصفقة(ودائما فى الباشى –اللعب) والذى يكون فى شكل صف وليس فرداً واحداً،وتضرب أيضا لأشياء أخرى كثيرة في حفر البوغة –فى الفزع –دق العيش-وغيرها –مع ملاحظة على أنها قد يكون لها معناً آخر أو معنى بعيد طالما انها أطلقت على الناس الذين يؤدون الصفقة فقد يكون قائلها يريد من الصفاقين عدم النظر للمرأة أو البنت التى تقوم بالرقص حينها(لإعجابه بها أو لغيرته أو خوفا من أن الصفاقين سوف يرتبكون فى أدائهم-كذلك لو نظرنا لمفردة (دنقير) قد تكون فيها نوع من التأدب وعدم الإمعان فى النظر لتلك [s1] المرأة

(ودايما نلاحظ لوصف سلوك الفرد يقال فلان داك لايرفع رأسه أبدا كناية عن سلوكه القويم وتأدبه )-هذا مجرد تحليل-

أما المعنى الاساسى للعبارة كما ذكرت فهى الحث على انجاز المهمة بكل جدية وكذلك التأثير السيكولوجي لأداء المجموعة وكما يسمى (team work) ومما يبثه في نفوسها من دوافع وحماس-

وقد يظن البعض أن هنالك علاقة بينها وبين عبارة (سوا الصفقة براتية) والأمر مختلف تماما حيث يطلب هنا من الصفاقين إن يغيروا طريقة الصفقة التى يؤدونها لطريقة ناس برتى لان لديهم طريقة معينة فى الصفقة وخاصة فى حركات الرجلين –وكما غنى عادل السيد (سوا الصفقة براتية ياخلايا جاتكم ريا والله الجمال هندية الا اللهجة منصورية-

قد تقارب أيضا عبارة( ايد على ايد تجدع بعيد ) الا ان هذه العبارة تعنى الحث على التعاون لانجاز مهمة واستقطاب مجموعة كبيرة لانجاز الإعمال-وكما قال الشاعر-عثمان سلمان (اب امنى)فى افتتاح احدى مدارس شرى:

ايد على ايد تجدع بعيد

ياشرى مبروك الجديد

كل عام والتعليم يزيد

كل هذه الأمثال والعبارات توضح القيم التى كانت سائدة فى المجتمع حينها ولازالت من تعاون ومساعدة وتشجيع وغيرها –

(وكان الله مهل في الأيام لي عودة)

[s1]

من طرف **خالد عابدين** الثلاثاء 04 مايو 2010, 8:25 pm

ياخي تسلم يا سلمان
والله أمثالنا لها وقعها وطعمها الخاص وانتشرت كثيرا في المناصير لسهولتها ومدلولية كلماتها وقد قرأت ووجدت في احدى قصائد شاعرنا المرهف محمد بروي أنه قام بإدخال المثل (الاتعدوا علي بوني) بقوله :-
يعدو الناس علي بوني
ومركبنا تجرو الدريقة

فكانت الكلمات رائعة ومعبرة عن حالنا وحال بلدنا

وقد أجدت في الوصف بالذات في (الصفقة دنقير ) وزي ماقال ودبروي هو وصاحب عطشي ينزلوا في الصفقة جمب بعض في اغنية (ياود سمودة الدار... يالطامح أب دفار)
وتخيلت منظر الصفقة دنقير في الرتوتي وصف الصفاقين وهم يرجعوا ورا وفجاءة يجو مدنقرين وماشين لاقدام مع سرعة الايقاع والصفقة والدنقير وضرب الارجل وزي ماقلت اخي قد يكون الاخلاص قي الصفقة وبي بهمة ونشاط وفعلا الصورة تعبر عن معنى المثل المراد بهذا الوصف
وقد قرأت لأستاذنا الموسوعة صديق عبدالله الحنوني في منتدى المناصير org قرأت له الكثير من أمثالنا المحلية ونأمل منك أخي سلمان وشاعرنا (حمود) أن نستطيع عبركم التواصل معه
التحية لك أخي المبدع الاستاذ سلمان على البوست الرائع وأتمنى أن أستطيع أن أدلي بدلوي وحتى الآن عندي مثلين لكن كدي النتأكد منهن وبجيكم راجع

فى مواصلة للأمثال والعبارات التى اشتهرت بالمنطقة أورد هنا بعضا منها

(أ‌) يسوى في الشن-

ويقصد بها معاني كثيرة منها –دمو حار –زول كريم لايهدأ عندما يأتوه الضيوف ويقوم على ضيافتهم (وزى ماقال ود بروى –للضيف أتب حفيان- ) وكلمة (شن) صفة للنار(ان صح التعبير صوت) ودايما للشواء-(وكثير من الناس يكملون التعبيربصوت الشيء المراد وصفه او حركته-

و فى أغنية الله هوى نجد التعبير عن صوت الحركة واضح تماما

مثال:

داير أنط الحوش دردرب –(دردرب)-صوت وقع الأقدام عند النط أو القفز من على السور-

وداير أشوف اللابسة الدهب

وداير اضوق التين والعنب

والعكاكيز فوقى رب رب-(رب رب )صوت الضرب العصي-

يهمنا فى الأمر فى الأمر إن الشخص المنعوت بتلك الصفة زول كريم جدا لدرجة السخانة-وفى نفس المنحى نجد استخدام عبارة (2)(سوو الفر) ولكن يقصد هنا السرعة وقد يكون مقصود بها حركة الحصان أو الحمار) ونستبعد الجمل لان تسمية حركته (الكربيت)-

كما قيل :كربت ياجمل ---

وقد يكون التشبيه كذلك ببعض الطيوروالتى تحدث صوتا بجناحيها عند بداية الطيران(كالفرة –القطا أو القمرى وغيرها)

أيضا نرجع لنفس الأغنية

فقيل:

انا داير أكاسر الهبرة العصير

كان غفل أو كان لاحلك الدير

سوا فرالقمرى فى الطير

وخدرتا المزروع فى القرير

مانضج لليلى خدير

ومانقر بالسوس تمرو خير

ياالهى القول مو كتير

وسوا دارة الحلقة ام فقير

المهم المقصود هنا السرعة الشديدة-وقد قال احد شعراء المنطقة:

دار اخطفوا واطير بيهو فر

وما بخاف ان جانى القفر(القفر يعنى ان ياتى من يبحث عنه ليثنوه عن فعله ويستخلصوا منه المخطوف--

بندقى اب روحين معمر(وابروحين) احد الأسلحة الشهيرة فى تلك الفترة

ونواصل

شكرا أخوى خالد فتلك الأمثال تحمل الكثير من القيم ولها فلسفتها وأهدافها فى المجتمع-

وساعين نجيب أخونا صديق فهو مرجع وخاصة فى هذا الجانب-

وأشير بأنه فعلا قصايد ودبروى بها الكثير والذى يقراها بتعمق وفهم يخرج منها بالكثير-وانا بشيل منها واكتب-

أما بالنسبة للمثل (نعدى على بونى) لدى رواية غير متأكد من صحتها –وتقول ان المثل قاله احد الطوافة ،وكانت مهنة حيث تقوم مجموعة بالسفرلجهة نهر عطبرة ويجمعون حطب الدوم (جذوع أشجار الدوم) ويربطونها مع بعضها البعض بطريقة محكمة ويركبون عليها مع التيار من خلال نهر عطبرة ثم النيل إلى البلد ليتم بيعها وتستخدم كسقوف للمنازل والساقية وغيرها، وبما ان الرحلة تستغرق أياما كثيرة فكانت لديهم طرائف وحكاوي كثيرة ، وانا أتذكر كنا صغار عندما نرى الطوافة فى نص البحر نردد-الطوافة ولاد أم عين كل يوم جمعة يجونا أتنين-ومن الطرائف أيضا ان احد الطوافة ركز بالطوف فى الحجرة(الشاطئ) بقرب شجرة سنط كبيرة بقريتنا النعوفاب(بالمناسبة الشجرة هذه ظاهرة فى الجروف التى تظهر كصورة شخصية للبروفايل) وكان لاهل قريتنا بيت(اوضة ) وسط التمر يسمرون فيه) وشاهد احدهم هذا الطوافى متجها اليهم فاخبرهم بذلك فقاموا بقفل الباب والطاقات(الشبابيك) حتى لا يشاركهم ذلك الطوافى جلستهم، فتحير صاحبنا ورجع لطوفه وقال فى ذلك ابياتاً من الشعر منها:

زمان اكت جنب خشم بيت مانى تناب (تناب يقصد انه لم يتطفل يوما)

الا النفس غلابة غشونى النعوفاب

(ياجماعة لااريد ان اعتذر فى كل موضوع فى السرحان لكن اعمل ايه فانها الذكريات)

فموضوع المثل روى انه قاله احد الطوافة عندما تناقش معه زملائه فى طريقة التحرك ومايلاقونه من صعاب فقال لهم من الآن نعدى على بونى

من طرف **خالد عابدين** السبت 08 مايو 2010, 3:30 am

شكرا الأخ سلمان
وخارج النص ذكرتني أبيات الطوافي في النعوفاب بذكر قرية العشامين والتي قرأتها سابقا في تراث المناصير الشعبي للمرحوم الطيب محمد الطيب ولا أتذكر الأبيات بالترتيب لكن أتذكر قصة الأبيات بأن أحد المناصير أراد أن يتزوج إحدى الفتيات لكن سبقه عليها عريس من العشامين فإغتاظ الرجل من ذلك وقال الأبيات التاية يصف فيها البنت ويذم العشامين أهل العريس :-
نقيرة الدنقر الزرقن سحابا
وعلى العربان درك بلدك مهابا
قالو الإكسير ضرب بلد الخرابا
يغنيها ويزيل كرب التعابا
إنت ميمون إبن طالب في الصحابا
(موجعني العشامين يبقو لي أمك نسابا )
وكلمة (نقيرة الدنقر كما ذكر تعني الأرض المستوية حد البصر) وهطلت فيها الأمطار وتنبت فيها الحشائش فالمنظر يكون بديعا بعد نبات الأرض والإكسير طبعا معروف ويقال إنه يفتح العمايا (عود ضغير نادر يرد البصر للأعمى ومن المقولات إنه لايوجد إلا في عش (الرخمة ) وذلك لأنها تجلبه لفراخها التي تفقسها عمياء ولا أدري صحة ذلك
المهم باقي القصة كتير وخاصة هذه القصيدة التي أحدثت ضجة وزعل من العشامين ووصلت إلي محكمة العمدة والشاعر الكبير علي ودسلمان
وأعود لأصل الموضوع ويا سلمان ياخي أنا عندي مثلين سمعتهم لكن مابعرف قصتهم
الأول ( فج أم جعير والجر بلا شربوق
وأعتقد أنه يضرب للشخص الذي يتبوبر في الفاضي ومعاني كلمات المثل واضحة أو توضح أن هذه المرأه تتفوجج أي تتبوبر والزير في بيتها ماعندو شربوق أي قرعة كادق يشربو بها في ذلك الزمن بدلا عن الكوز
الثاني ( يقول ليك :- مرق عليكم أصبع ضوة
ودي مابعرفها شنو
مع التحية والتقدير

التحية اخوى خالد، وانت اذا قلت وكتبت خارج النص طلعتنى معاك وعارف صاحبك جنو وجن السحاب والوديان والقش ودايما اهرب من الكلام الكباركبار فى المنتديات الاخرى واتنفس مع الحاجات العامية دى –

وارجع لردك وبالمناسبة زى ماقلت الاستاذ الطيب محمد الطيب اكثر واحد وثق للمنطقة حتى انه سأل يوما اضاء الرابطة فى الثمانينات عن عن ذلك البيت الذى ذكرته الذى يوجد فى التمر-

بعدين بالنسبة لهذه الابيات الجملية التى ذكرتها ولقد شرحت البيت الاول على اكمل وجه-فانا افتكر النقيرة ككلمة –نوع من انواع القش والدنقر كما ذكرت الارض المنبسطة الممتدة –لانو لاقتنى النقيرة كتيرفمثلا قيل:

النقيرة الفوقا الغمام

من جبال الكاب وقدام

حارسا الاقرع والنعام

عبيها درب الراعى ماحام

وجبال الكاب دى انا مفتكرها حقتنا لكن قيل انها فى غرب السودان.لاحظ وجود النعام-والاقرع اظنه الثعبان-(فهى قشة فوق طوالى مطر مدور ومافى راى رعى غنمو ولاحام جنبها)

اما فج ام جعير غلبتنى تب زى سنة دو التى ذكرتها انت وانا لليلى ماعرفتها متين

من طرف **ahmed alkhabir** الأربعاء 19 مايو 2010, 8:13 pm

الاخوان سلمان وخالد مشكورين علي هذا الابداع التراثي الجميل والله دايرين نشارك الا (عودنا عود مرا في التراث ) والبركة فيكم واود ان اساهم بملاحظة بسيطة عن ( عدوا علي بوني ) وهي فعلا عن الطوافة ولان الطوف دايما يكون كبير ومشبع بالماء وثقيل لا يمكن جره عكس التيار اذا تجاوز المكان المراد ارساءه فيه لذلك اذا كنت تقصد بوني مثلا فعليك ان تجدف لها من شرري مثلا ومنها جاء المثل ايضا عبارة ( الطوف كان انحدر تاني ما بينجر ) وتضرف بمعني سبق السيف العذل وفوات الاوان علي الامر المقصود
اعذروني علي التطفل ودمتم

شكرا اخوى الخبير وفعلا انت خبير وبالضبط هذا هو المقصود فى مناسبة هذا المثل ومن ثم اصبح يضرب فى كل الاعمال المشابه-بعدين ياخبير لا انا ولاخالد يقدر يعطى كل موضوع او عبارة او شعر حقه كاملا فالردود المتواصلة تضيف له حتى يتكامل والكمال لله

من طرف **خالد عابدين** الخميس 20 مايو 2010, 2:26 am

الاخوان الخبير وسلمان سلامات
يالخبير يبقالي عود المرا دا ذاتو المهم الزمن دا ولو لاحظت عندنا بتلقى الحبوبات ملقطات كتير في القصص والحكاوي الزمان " وفعلا الطوف كان انحدر مابينجر ولا زلت أبحث عن الأبيات التي غناها جدنا الفكي ود الباهي (خال حبوبتنا الجاز بت الضيب) في قصة الطوف وتقريبا بدايتها
(الجواب مرسول لي خدر
وقول لو يقراهو ويفسر (سطر سطر)
الرجال الصاقعين العمة حدر(تحدير أي نوع لفة العمامة )
الخ ..........
بعدين يالزعيم سلمان منتظرين تفاصيل الرحلة والخمسة خمسة ماتكتروا لاعند الرجعة للخرتوم بي درب ساني وهدير نوقو زي ماقال استاذنا محمد بروي وطبعا بعد ماترتاح من هوزيز اللوري وريحة الغبار الملخبتة جاز خاصة لما يطلع الحدارة وللا يجي شاقي وادي الكربكان بي نمرة واحد بس كان العتمور شربان الا يكونو مساعدية معضلين تمام عشان يدقوا صاجات صاح " وأنا ماداير اخش قبلك في الموضوع لكن لو انت طولت من السفر بالغرب بي تكون لاحظت التطور خاصة في قهوة محمد علي طه ، الفرن والرغيف والفول وموية الصحة والبارد ، منو الكان يقول الحاجات دي تجي في ابسباع ؟ وفي انتظار سردك الرائع

والله ياخالد انت احدث منى بالبلد –يازول بعد وصلنا محمد على قلت لشقيقى وهو صاحب اللورى نحنا نسينا نجيب معانا زوادة او حتى رغيف من السوق وبعدين قلت يمكن بت الشيخ تكون جهزت ليها كرتونة فيها فراخ حمام وبيض وكسرى مرة ،لكن اخوى ضحك وقال لى ياخى فى القهوة هنا فى اى حاجة وجابو لينا الرغيف من الفرن وفعلا شربنا موية الصحة ، ويرحم الله الاستاذ ابراهيم الشاعر حين قال :

محمد ود على باقى راجلا زين

فشق فى الدرب قدام من اب سرجين

يعرف الكيف قبال رمشة العين

الى اخر القصيدة

من طرف **خالد عابدين** الأربعاء 26 مايو 2010, 2:26 am

من الأمثال التي ذكرها استاذنا المهاجر رد الله غربته صديق عبدالله وقرأتها الآتي :-
(جابتو المخموشة لي خير )وتفسيره كما ذكره الاستاذ صديق هو أن رجلا من ناس البحر تاه في العتمور تقريبا زمن الناس يسافروا الي بربر بالدواب وضل هذا الرجل أو لنقل ضهب بكسر الضاء ومات من العطش بالقرب من مضارب (خير ) وخير هذا من العرب الذي يسكنو في العتمور فقال خير قولته هذه لما وجد الرجل ميتا بالقرب منه وصارت مثلا .
بعدين ياسلمان هنالك مثل لا أدري هل هو خاص بنا أم عام وهو (ناقة شعيب الكلها عيب ) يمكن أن تطلق هذا المثل على شخص مريض أو يكثر من الشكوى بأمراض متعدده وماشابه ذلك

هنالك بعض التشبيهات النابعة من بيئة المنطقة –أوردها هنا كمواصلة لموضوع الأمثلة الشعبية وٍالمقولات –ومنها ما يوصف به الفرد سواء كان ذلك لسلوكه أو لجسمه اوجزء منه وهكذا ومنها ماهو فى شكل دعا(يداعى)-

وقد يكون هنالك تطابقا فى المضمون فى مناطق أخرى ولكن التشبيه هنا يتم على شيء موجود فى البيئة المحيطة-حيث لايمكن ان يقال انف فلان تشبه انف الفيل أو الخنزير لعدم وجود تلك الحيوانات بالمنطقة-

ومن تلك التشبيهات والأوصاف:

(1) فلان كراعو زى التبشوقة

وتقال للشخص الذى يتميز بان لديه قدم كبيرة –والتبشوقة هى أداة تستخدم لسحب وجر الطين من القوتى(والقوتى هى حفرة عميقة ترفع المياه منها بواسطة الساقية عن طريق القواديس ) وتكون على بعد مسافة من مجرى النيل متصلة به عن طريق لسان (خليج) فيغظى الطين القوتى واللسان فتسحب تلك الأطيان بواسطة التبشوقة وهو عمل شاق جدا.

(2) قلبو اخضر

الجميع يعرف بان السائد هو:قلبو ابيض-ضميرو ابيض وهكذا

ولكن قلبو اخضر (أخدر) تطلق على شخص كبير فى السن وغالبا مايطلقها الشخص على نفسه فيقول انا قلبى اخدر دفيقى ويقصد بأنه مازال بمقدوره الزواج وهو تفسير واحد ليس غيره.

(3) راسو زى الحجر:

وهذا ليست محتاجة لتوضيح وتعنى انه لايسمع الكلام والنصائح-عنيد وغيره-

كما يمكن ان تقال تلك التشبيهات لأمكنة تشتهر بأشياء معينة وقد تقال فى شكل عدم الرضا أو لمعرفة مسبقة بقصد السائل أو المتحدث ومن أمثلة هذه:

-تتغدى حجاربونى-سلم العرقوبى الينقطع فوق راسك-(لكثرة أشجار السلم فى وادى العرقوبى-

واختم بهذه التشبيهات :

يأكلنك ضباع الشرق (او يجرنك

عطش الكريتى

تشكك حربة جمولى العودا لولى

تقيل زى الرزى –وتقيل زى الرتجى0

ارجو من الأخ الأستاذ خالد دمج موضوعى الأمثال الشعبية والمقولات الشهيرة فى فى موضوع واحد مع الشكر000

من طرف **خالد عابدين** الأربعاء 26 مايو 2010, 5:16 pm

الاخ سلمان
سلامات
تم تنفيذ اقتراحك بدمج الموضوعين
بس سو الصفقة دنقير
تحياتي

من طرف **يس مصطفي** الأربعاء 26 مايو 2010, 8:22 pm

الاخوه سلمان وخالد والخبير السلام عليكم
ماهو دا شمهروت زاتو؟
قصه حصلت مع جدنا حسين طبيجي وحسن علي عون الله 0كان لهم تمر في منطقه الكحيله ماسكو شمهروت بعدين حصل خلاف 0اتفقوا انهم يغيروه وترك الامر لي جدنا الاول 0قام الصباح بدري ومشي كحيله ما ينزل الا عن زوجه شمهروت فقامت كربت الفطور تب هو طبعا ماعارف انها زوجه شمهروت 0قال ليها ياخي نحن عايزين نمسكم تمرنا دا 0هي طبعا واصله طرف الكلام 0قالت ليه جدا 0من غير ما تكلمو انها زوجه شمهروت 0لما رجع لي حسن علي وكلمو 0قاليه ياخي دا ما شمهروت زاتو
من هنا كانت الحكايه

هنالك بعض التسميات التى تطلق على التمساح ،وغالبا تكون تلك التشبيهات لقوته وجسارته وكذلك أحيانا لطوله أو لشكله عموما-منها :

الجاسر (الجاسر أبمحار)

الجاسر (الجاسر ابكروق)

التساعى (طوله 9 اذرع)

العشارى (طوله 10 اذرع)

الدود وغيرها

وظهرت تلك التسميات فى الإشعار والقصائد ويتضح ذلك جليا فى البلال حيث تصف الأم ولدها بتلك الصفات مثال :

الجاسر ابكروق الشتلو روق فوق روق

الجاسر أبمحار ياود سمودة الدار

(فى البيتين وصف بالشجاعة والأملاك الزراعية -

كما ظهر فى الشكر (المدح):

جونى يتصارخوا ناس صلاح وقالو لى البلد فيها تمساح

قتلهم اعل ماشاغلتو يا (سناح) دا التساعى الحجر المراح

شق من كته ولى رباح ودر الطين والجمل راح

(سناح) –السنيح هو سيء الحظ-

هنالك أيضا تسميات أخرى (الببلع بلا لوك) –(أب عاجات)وقد تشترك هذه مع صفات أو أسماء الأسد-

فقيل :

الدييسى الفى رأس مكوك حارسا الببلع بلا لوك

وأيضا:

أنا مانى صياد أم دريقات أنا البصيد الفوق ضنبو عاجات

ومسكو يتفاخرن بو البنات—

وأيضا قيل:

حنكو يضرب زى الهشيم واكلو من الناس مابهيم-

وارتبطت كلمة حجّر بالتمساح –حجر ورود النيل –حجر العوم وغيرها-

ويطلق على انثى التمساح ( الصفيرا)0

(رغم ان الموضوع فى التشبيهات والأمثلة ولكن ايدى اكلتنى للكاتبة شوية فى هذا الامر)

ونحنا كنا صغار السن نشاهد دايما التماسيح وخاصة فى أيام يكون البحر بدا فى المشى وقلب وكان أهلنا يمنعونا العوم إذا كان هنالك تمساح فى المنطقة وكانت كل الحلال تعرف بذلك وهو له ريحة مميزة –ايضا كنا نخاف حتى لو الواحد فوق للتمر وغالبا ما تكون كل أحلامنا (وهلاويسنا فى الجرى من التمساح وعدم القدرة على صعود الحدارة)-وقد شاهدت عدة حالات اصطياد تمساح (وغير التمساح كنا نخاف من البندق ذاتو) -

وويستفاد من المسك كما يقال وكذلك الجلد يباع ، وتعتبر لحمة التمساح الصغير(الفرخ) من اطعم اللحوم يمكن ان ياتى فى المرتبة الثانية بعد لحم الغزال فى الصيد-

كما كان يعتقد أيضا ان التماسيح بعضها (سحاحير) تنقلب وتتغير لإنسان ثم تمساح . ويأتوا من منطقة ناوا وبعد أن يضيقوا عليهم في الطلب ( الضرائب) يقعوا البحر، ويقال ان التماسيح (الساححير منهم) يحددون صيدهم ويختارون المرأة التى تلبس دهب كتير-كما يقال اذا قابلت شخصا غريبا أمعن النظر فى عينيه فان كانت (مقلوبة -مشاققة)راسية يعنى من أعلى لأسفل دل ذلك على انه سحارى –أو أتاك ضيفا ليلا مثلا وأحضرت له العشاء ولم تمتد يده الى اللبن فتأكد انه سحارى –رغم ذلك هنالك صيادين وهنالك طرق معينة لصيده وهنا ليس مجالها-

مية المية ياسين واصل

من طرف **خالد عابدين** الجمعة 28 مايو 2010, 3:05 am

يا سلام ياسلمان ياخي . موضوعك جميل والله أقرأ فيهو لكن انتهى سريع .
وابدأ من حيث انتهيت بحكاية السحاحير وكما ذكرت نسمع فيما يحكى لنا أنهم لايأكلوا اللبن .. والقصة دي أذكر حكاها لنا احد الاخوة زمن المتوسطه قال في واحده من حلال الشرق جهة أم بلجي - التكارنة -ام دويمه لاأذكر * المهم جا واحد ماشي درب زي مابيقولو هناك في البلد على الشخص الغريب . الزول نزل قريب المغرب في ديوان مطرف وجاهو صاحب الديوان واتونس معاهو وصلوا العشاء ومشى جاب العشاء فطير مغروق لبن ( تلغف بس ) أها الضيف نزل من العنقريب على البرش ومجرد مانزل يدو في الصحن لقى العشاء لبن طوالي قام وقال لي سيد البيت أنا ماباكل لبن ،، سيد البيت : يازول اكل العشاء ! الضيف : لالا ماباكل لبن
سيد البيت : آب تاكل لبن مي تبقى مارق ،، أجر ياولد جيب المضببة ترجاك في ركن البيت جوه (يقصد العكاز )
الضيف اتخارج
حكيت القصة أعلاه لإعتقاد الناس في البلد أن كل شخص غريب لايأكل اللبن هو من السحاحير وطبعا الزمن ده تقريبا الاعتقادات دي راحت

الحكاية التانية :
كان الوالد عندو مركب صغيره في نهاية التمانينات وذلك عندما كان مدير مدرسة الكراع . فكان راسم تمساح على جنبة المركب وكاتب جنبو (تمساح ام كبلو الضارب اللية ) ، جاء واحد قريبنا قرايتو شبه وقام قراها ( تمساح واحد ميلادية كيلو ضارب الليل)
والتمساح كماذكرت يستفاد من لحمه وجلده وحتى دهنه سمعت انه اذا وضعته على كفة يدك فانه يظهر من الجهة الثانية (تنز نزوزة يعني) ولا أدري صاح ان خطا

لي عودة لموضوعك الشيق ياسلمان وقصة خالنا عمر حماد وعثمان البقاري الملقب ب(فضلة التمساح ) واذا عندك تفاصيلا نزلا.

من طرف **(الحاج شرف)** الجمعة 28 مايو 2010, 3:29 am

,واصلو نحن نقرا بس
انا اشك بانكم تسكنون مع حبوباتكم
سلمان ده دفعتى ياخالد فى المدرسه ماكان بتاع حكاوى
لكن جنو كوره
اجمل حاجه انو الواحد يقرا ذكريات عاشه على الطبيعه
واصلو اما نحن ماعارفين امبارح يوم كم

من طرف **خالد عابدين** السبت 29 مايو 2010, 2:46 am

(الحاج شرف) كتب:,واصلو نحن نقرا بس
انا اشك بانكم تسكنون مع حبوباتكم
سلمان ده دفعتى ياخالد فى المدرسه ماكان بتاع حكاوى
لكن جنو كوره
اجمل حاجه انو الواحد يقرا ذكريات عاشه على الطبيعه
واصلو اما نحن ماعارفين امبارح يوم كم

والله ياستاذ الحاج من ناحية قعاد حبوبات قعدت كتير لكن الحكاوي الجميلة والقصص أغلبها اتمسحت بفعل الزمن وعوامل التعرية للذاكرة(بس ما اتفرمطت ) وطلعة الصباح ورجوع العصر
أما سلمان بكون قعد كتير مع الحبوبات ومع الناس الكبار العارفين وظاهر من سردو أضف الى ذلك لديه ماشاء الله قوة ملاحظة وذاكرة (بتكون كم قيقا ؟)
بعدين أذكرك اليومين دي آخر الشهر ولا ماك قارط

شكرا خالد والحاج وبالمناسبة الاثنين ملاحظاتكم صحيحة-اولا بالنسبة لى خالد فعلا الموضوع ناقص لانى شعرت بان الامر متعلق بالامثال والتشبيهات فاوقفته رغم انى استمتعت به –وياخى خالد (ماشى درب) كنت بفتش عليها مالاقيها والظاهر ان قعادك مع الحبوبات كان اكثر منى- اما للاخ الحاج انا فعلا متاثر بالحبوبات فضلا عن انى بحفظ الكثير من الشعر العامى للمنطقة او غيرها والمرة القادمة ياذن الله سوف اذكر ليكم سيرة وحكاية الحبوبات يادفعة

من طرف **ahmed alkhabir** السبت 29 مايو 2010, 2:05 pm

عاطر التحايا لكل المتداخلين رغم انو الموضوع عن الامثال ارجو ان ان تسمحوا لي بهذه التخريمة
زمان وانا في ثالثة ابتدائي كنت ماشي اسانق جبادتي المشركة في حصاية البرتيت وهو الوادي الذي يفصل بين قريتنا الحلة وقرية الفقراء ، كان الجو ساكنا وحارا في منتصف النهار تقريبا وعلي غير العادة كان النيل خاليا ما بتسمع صوت انسان لا شرق لا غرب ، توجست من هذا الهدوء المريب ،وصلت مربط الجبادة وامسكت بالخيط داير اشوفا فيها نتقة ولا ما فيها . ودق قلبي بعنف لحظة وصلتني النتقة القوية نتقة كلد ضنبو احمر شق الماء بقوة عكس التيار وخلي الجبادة مشدودة بس سلك طنبور ، في هذه اللحظة المثيرة وانا اتابع الكلد بعيني اليمين وقعت عيني الشمال علي اغرب منظر رايته في حياتي ، فعلي بعد امتار الي اليسار امتدت يد بيضاء شديدة البياض خارجة من الماء اصابعها مضمومة ماعدا السبابة وكانت تتحرك في اشارة تحذيرية كأنها تقول لا لا ، في البداية ظننته شخص من رفاق الطفولة يعبث معي , امعنت النظر في اليد المدودة ورميت خيط الجبادة في ذهول ، فقد كانت عروق اليد ظاهرة كانها قيطان درب ( توصيلة المحلول الوريدي ) تراجعت خطوات الي الوراء فيما كانت اليد الغريبة تقترب من الشاطي ، يازول الشئ بت بحر امرق رقبتك صرخ الهاتف في اعماقي بقوة وفي ثواني كنت في التمر وحين القيت نظرة خاطفة الي الوراء لدهشتي الشديدة وجدتها قد اختفت

هذه تجربة حقيقية عايشتها ولا تزال راسخة في ذاكرتي ، فما هي حقيقة ود البحر وبت البحر ؟؟؟؟؟؟؟

شكرا الخبيرانا عشت مع سردك للقصة والجبادة وتذكرت تلك الأيام –وبعدين الجبادة جيتا راجع وسانقتها ومرقت الحوتى ؟ وطبعا روايات بنات البحر اصدق من حكاية السحاحير ودايما أهلنا يمنعونا (الحوامة) أو القعاد عند البحر وخاصة العصيروالمغارب خوفا من بنات البحر وبالذات للشباب (عشان ماتجيك بت بحر تقول ليك عرسنى ) وهنالك الكثير من الحكايات والروايات –والحمد لله حكايتك ترويها بنفسك عشان الناس ماتقول دى أساطير-

وبالعودة للأخ خالد حكاية (ماشى الدرب ) أيضا جدنا ود الخليفة (رحمه الله) اتاه يوم ضيفا وقدمه له العشاء فشك فى أمره سواء كان بالامتناع عن اللبن اوملاحظة العيون وعضد ذلك (اللهجة ) أو نطق الحروف –وبنفس الطريقة حمل عصاه وطرده وأوصله حتى الدرب الرئيسي(درب السلطان)

عشان مايرجع للحلة –وذكرت لى هذه الرواية الوالدة رحمها الله ) عن والدها (ود الخليفة) فقالت –حينما أوصله لدرب السلطان عض ذلك الغريب طرف ثوبه وصرخ وانطلق جاريا، وعاد جدنا وغشا احد أبنائه وهو خالنا (سلمان) وكان في الدكان يجلس على مكنة الخياطة وقال له والده اقفل الدكان ويلا نسدر (الشىء دا مايجيك راجع) ويقال فى نفس اليوم وصل السلمات وطُرد أيضا بنفس الطريقة (سوف نعود بإذن الله لتلك الرواية)-

ويقال أيضا إن التمساح لايستطيع أحيانا ان يفتح فكه فيضرب به الحجر ويسمع ذلك الصوت ويميزه الناس –كما يقال أيضا إن احد التماسيح خطف شخصا وأهله مشوا لى فقير(شيخ) فقرأ عليه فلم يستطع فتح خشمه ووجدوه تانى يوم يرقد بجوار الضحية (ويمكن تشابه روايه يارحمن ارحم بى جودك لحاج الماحى

–أيضا حكاية ماعندو لسان وان لسانه (شالو الكلب ) والعداء الواضح بينه وبين الكلب وان الكلب إذا أتى للبحر ليشرب فهو يشرب بسرعة وبخوف –

ياجماعة طلعتونا بره الموضوع وعشان نتذكر بالموضوع الاصلى (الأمثلة والعبارات الشهيرة) إليكم هذه المقولات والعبارات السائدة :

(1) قلة خير-

وهى عبارة تقال فى إثناء الحديث أو اعتراضية –وتشابه عند الشايقية كلمة(بلا) مثلا يقول ليك كنت مندلى على البحر بلا لاقانى فلان وقعدنا نونس-وعندنا الأمر الذى اكسبها الشهرة حكاية حدثت أيام العمدة نعمان بينما كان احد الأشخاص يروى للعمدة اويسرد قضيته فى المجلس أو المحكمة ،فدخل احد الأشخاص بالشاى فانتبه الرجل للشاى وبدون مايشعر قال (قلة خير ياعمدة نعمان الشاى جا) وهى الرواية الصحيحة لان هنالك من يقول ان العبارة أتت فى إثناء السرد-

(2) حجة طير-

وتقال للحديث الذى ليست فيه فائدة (نضم مافيهو قندول) او كما يقال الان (كلام فارغ) أو يقولها الشخص لعدم اقتناعه بأمر ما –ويمكن إن تكون سميت بذلك لان الطيريخرج عدة أصوات فى وقت واحد –المهم فى الأمر ان هذا الأمر غيرمرغوب فيه –قال عمنا عثمان ودنعمان :

حجة طير الشمار

نسقى فيهو دورين ماقام خضار

كلو من ناس امرى الطوال

قالو سوقو يرقد المال

كما ان هنالك عبارة (بلدا طيرا عجمى) وكأن الطير عندنا يتحدث –وتقال لتوضيح ان هذه البلد التى أطلقت عليها العبارة بعيدة جدا-

يقال إن مجموعة من أهلنا سافروا للعمل بالطين(السلام الجمهوري آنذاك مع الاعتذار لود بروي) فنزلوا لبلدة جهة الجزيرة ليلا ولم يكن يعرفون اسمها وعند الصباح سمعوا أصوات طيور غريبة فقال احدهم ( يمكن تكون دى البلد الطيرا عجمى)----

من طرف **م بروي** السبت 29 مايو 2010, 7:26 pm

أخي سلمان وبقية الأحبة...سلامات
حجة طير الشمار ( سمعتك قلت كلام الشاعر ابراهيمــلكنها كلام خالك عثمان سلمان)
من أحسن ماقال المناصير في رأيي في هذا الصدد لدرجة تناوله الجيران ويعترفون
المثل القائل:
(الداب نفسو قصر) والمثل شارح نفسو
وزيادة في الشرح يعني أن تكون دابك قادر على تصريف أمور نفسك وأسرتك الصغيرة فأنت في غاية التقصير
.يعجبني هروبك من مراتع الفلسفة ياسلمان
لأن العاوز الحاجات دي راقده في النت وفي الكتب
لكن هنا أنا بفضل كلام التراث وما اشتمل من تفاصيل كثيرة والتواصل ونسه(صُرُف)مع الأخوة الكرام.
في مثل تاني يقول:
الزيت مابفتق الزيت
يعني مخالطتك الدائمة لأولاد عمومتك لا يزيد في ثقافتك وقدراتك شىء..ولكن هذا الموقع يكذب المثل
ودمتم دوت كوم

من طرف **م بروي** السبت 29 مايو 2010, 7:45 pm

خالد عابدين كتب:يا سلام ياسلمان ياخي . موضوعك جميل والله أقرأ فيهو لكن انتهى سريع .
وابدأ من حيث انتهيت بحكاية السحاحير وكما ذكرت نسمع فيما يحكى لنا أنهم لايأكلوا اللبن .. والقصة دي أذكر حكاها لنا احد الاخوة زمن المتوسطه قال في واحده من حلال الشرق جهة أم بلجي - التكارنة -ام دويمه لاأذكر * المهم جا واحد ماشي درب زي مابيقولو هناك في البلد على الشخص الغريب . الزول نزل قريب المغرب في ديوان مطرف وجاهو صاحب الديوان واتونس معاهو وصلوا العشاء ومشى جاب العشاء فطير مغروق لبن ( تلغف بس ) أها الضيف نزل من العنقريب على البرش ومجرد مانزل يدو في الصحن لقى العشاء لبن طوالي قام وقال لي سيد البيت أنا ماباكل لبن ،، سيد البيت : يازول اكل العشاء ! الضيف : لالا ماباكل لبن
سيد البيت : آب تاكل لبن مي تبقى مارق ،، أجر ياولد جيب المضببة ترجاك في ركن البيت جوه (يقصد العكاز )
الضيف اتخارج
حكيت القصة أعلاه لإعتقاد الناس في البلد أن كل شخص غريب لايأكل اللبن هو من السحاحير وطبعا الزمن ده تقريبا الاعتقادات دي راحت

الحكاية التانية :
كان الوالد عندو مركب صغيره في نهاية التمانينات وذلك عندما كان مدير مدرسة الكراع . فكان راسم تمساح على جنبة المركب وكاتب جنبو (تمساح ام كبلو الضارب اللية ) ، جاء واحد قريبنا قرايتو شبه وقام قراها ( تمساح واحد ميلادية كيلو ضارب الليل)
والتمساح كماذكرت يستفاد من لحمه وجلده وحتى دهنه سمعت انه اذا وضعته على كفة يدك فانه يظهر من الجهة الثانية (تنز نزوزة يعني) ولا أدري صاح ان خطا

لي عودة لموضوعك الشيق ياسلمان وقصة خالنا عمر حماد وعثمان البقاري الملقب ب(فضلة التمساح ) واذا عندك تفاصيلا نزلا.

أخوي خالد ازيك
كلامكم طاعم بالحيل
البقاري زولنا حق العمارين واللا في بقاره كتار؟؟
عندما عرس سليمان حامد (العمارين)
بدت القعيدة متأخرة ولأول مرة يربطو فيها مكرفون وغنى
صاحبك عيسى غنوة واحدة بس(معاهو كورس من الشايقية)
وصل متأخر من كريمه
الناس وقفوهو وقالوا خلاس نسير على شرري(العروس من هناك)
استغرب البقاري للكلام ده(وكان شالع) وقالهم توقفوا اللعب كيفن؟؟
قالوا ليهو شرري بعيدي.
قالهم مانصل في الليل
قالوا ليهو الناس ديك عادتن لازم السيرة تصلن قبل المغرب
قالهم:نان مالو؟؟ نصلهم باكر قبل المغرب
ومات الجميع بالضحك.
تحياتي ياعادل شرري

شكراً ودبروى وفعلا انا دايما بهوى الاشياء العامية شعرا ونثرا فى المنطقة او غيرها (وهاوى ) وليس محترف – وزى ماقلت فى حاجات تخص المنطقة موجودة ومتفق عليها عشان كده عايزين نظهر الجانب الخفى والغيرمطروق –بعدين عشان تعرف اخوك بحفظ الأشعار اهديك هذه الأبيات (كرت دعوة)

داخلية السكة الحديد

الراقدة تحت الكبرى العتيد (و العتيق)

تلاته ابريل جاييها عيد

يملاها حس طمبور شديد الى الاخر----

ودى من زمان فى الذاكرة

من طرف **خالد عابدين** الأحد 30 مايو 2010, 4:10 am

التحية لجميع الاخوة
يالخبير رجعتنا لي زمن الجبابيد وحفر الدقيرات وعويم الجبادة مرات بالطرورة ومرة عوم القفي وقبلها رمل الخيط للسنارات ولازم يكون عدد السنانير فردي من باب التفاؤل وبعدين بتعرفو (التليز ) ؟.
وطبعا الكلد معروف لو قبض في الجبادة يشرم سريع قبل يصل الحجرة وانت تسانق. ما يقدر عليهو الا زولا محترف وكنا لمن يقبض الكلد وزي ماذكر الخبير بتعرفو من ضربة ضنبو (جب ) وبعدين يقعد يشاقق لك في العرق ومرة ينتق يرجع ، فكنا نخليهو ياخد راحتو نسانق الجبادة ، ينتق .. نرخي الخيت ... يرخي ..نسانق ، لمن يفتر ... وبرضو تكون عامل حسابك ما يشرم لو شرم عليك فضيحتك فضيحة .
وبعدين يالخبير بت البحر دي انا ماشفتها لكن سمعتبا .. وعندكم في الحلي (عبد البحر ) وقصصو مشهورة مع عمك عبدالفتاح متعه الله بالصحه والعافية وبتكون عارفا ، ومنتظرينك .
الاخ سلمان وانت تتحدث عن ماشي الدرب والسحاحير .. فكان برضو اهلنا يقولولك .. ماشي الدرب ده مرات يكون نبي الله الخدر . عشان كدي تعمل حسابك وماتقصر معاهو يمكن تغشالك البركة .
استاذنا محمد البروي . البقاري القاصدو . اسمو عثمان خليفة شقيق احمد الخليفة (اب تمانية ) من البرجوب وعم لي خليفة البقاري السمو عليهو محطة خليفة الحارة 17 امدرمان .
والقصة إنو عمر حماد وعثمان كانو في جزيري يحشو في الديس وفجأة هجم التمساح وخطف عثمان وغتس . عمار ما كضب تلب بي منجلو فوقن . والتمساح لقاهن بقو اتنين ، غمت كل واحد في اباط وبقي غاتس بهن لاتحت . عمار اتصرف في لحظة التمساح قلع وغتس وبالمنجل تبظ التمساح في عينو قداها والتمساح فكاهن من الوجع ورجعو سالمين الامن جروح لعثمان خليفة ومن ديك الناس بقو يقولو عثمان فضلة التمساح . وربنا كتب له عمر جديد .ونتمنى له الصحة والعافية ولخالنا عمر الرحمة الرحمة والمغفرة

أود هنا أن أتطرق لظرفاء المنطقة والذين يتميزون بحلاوة الحديث والوصف وإضحاك الآخرين في شكل نكات أو تشبيهات أو تقليد الأشخاص أو الوصف (السحرى) –وهم كثر وتقريبا في كل القرى ، أحاول أن اذكر منهم وفى المناطق المجاورة وعلى بقية الزملاء الباقى –

فنجد فى شرى مثلا –عبدو اللمين والمقبول (عليهما رحمة الله) كذلك العم عمارة صاحب اللسان والحديث الجميل والطرفة الجميلة وكذلك الأستاذ عبيد موسى ،بالإضافة لنجم الوصف (السحري والتشبيه) عبد الفتاح كروم وغيرهم.

اما فى شررى فنجد الزعيم محمود تاج السر والذى يطلق التعابير أو الكلمات أو المصطلحات ويظل يرددها ناس شرري لفترة من الزمن ، وهنالك أيضا الشخصية المحبوبة دائما حسن سكينة والذى تجده مبتسما على الدوام ويحبه الجميع وهو شخصية مرحة ودايما مانجده فى المباريات ينال تركيز الجميع فهو يشجع ويغنى ويناكف الجميع ولا( يشاكل) أو يسيء لأحد مطلقا،

وفى سوروالتى يتميز أهلها بالرد السريع والذكاء ووصف الأشياء والمناكفات والمداعبات رغم إنها لاذعة –على رأسهم الشاعر المرحوم نور الهادى –وعمر السلومى وغيرهم واذكر هنا كانت هنالك مداعبات مع ناس الشلال حيث بدا احد أبناء الشلال بان قال ياناس سورعندكم أسماء عجيبة –السلومى –ود الستية ....فرد عليه ناس سور (اسكت ) انتو عندكم –أبو قرون-ود شنان-وود اللحمر- والبتنونى- والكلال -وود الملكى - والجكود- فعددوا له الكثير فسكت عنهم- أما مجاراتهم مع ناس شررى استمرت طويلا- والمرحوم نور الهادى من ابلغ الشعراء فى الهجاء إلا انه قال إن عمر الدمرى أحسن منى فى الهجاء-وصدق-

أيضا فى الجابيقة الشخص الطريف الذى يجيد الوصف وهو المهاجرى –الشخص الطريف الذى لا ينقطع عن الكلام ويجيد الوصف بصورة رائعة واذكرهنا قال فى وصف بابوره (يشكر فيها) بان لديه بابورتدور بسرعة فايقة وسهولة شديدة (هبشة) وذكر انه اذا أتى الصباح مثلا ليدورها الا يتلبد فى اللوبا عشان ماتشوفو لأنها أول ماتشوفو تدور براها .وله العديد من الأوصاف والشبيهات .

أما فى الغرب فهنالك إبراهيم فضل وعمنا سليمان الطرشان (رحمه الله) فى النعوفاب-والحمود فى الصغيراب وفى السلمات مجذوب ود يوسف وفى الحسيباب عباس ابقجى وفى المسراب الخال عبد الله بلل وغيرهم

هذه سياحة وجولة في العلاقات الاجتماعية و الإنسانية في المنطقة وظللنا نتحدث عن الأمثال والعبارات والمقولات الشعبية رأيت إن اكتب عن اؤلئك الأشخاص الذين يتصفون بتلك الصفات ويزرعون البسمة بين الناس ،ومنهم الكثير والكثير-0-

أضيف هنا لموضوع التشبيهات والأمثلة ،فبعد أن تطرقنا لوصف الشخص أو بعض أجزاء جسمه هنالك الأفعال أو السلوك الذي يقوم بت الفرد أو الجماعة فيقال مثلا:

خنس كذا القريفى (أو زى القريفى)

وخنس بمعنى سكت أو صمت-والقريفى حشرة صغيرة اذا لّمست باى شيء فإنها تصبح كأنها ميتة وحتى لو تم تحريكها ، وهى تقريبا وسيلة للدفاع وى أشبه بالنعامة التى تدفن رأسها فى التراب-وتضرب كأن يقال فلان خنس زى القريفى-

وذكرتني هنا أيضا ظاهرة (شدرة الفأس ) والتي عندما تمسكها اوتحرك غصنا فيها (تتضبل أو تهضلم-(عرفتوها دى)وهى ذاتها عايزة شرح ) تذبل أوراق أو صفق ذلك الغصن بسرعة وهذه ظاهرة علمية لها تفسيراتها ونحنا (ماناسا) ويمكن أيضا شدر الحراز وظاهرته المعروفة بان يخضر بعد أن يشرد البحر وبالعكس أول مايبدأ البحر بالمشي يبدأ فى اليباس -وطالما اننا فى الشدرايضا –انبريبى وطيرى –

وهذا يقال انه حوار دار بين الجرادة والشجرة وعندما زهجت الشجرة من الجرادة قالت ليها (انبيرنى وطيري) وأصبحت عبارة مستخدمة تضرب للشخص الذى ليست فيه فائدة أو مساعدة فيراد أن يتخلصوا منه بأقل الخسائر(لان الشجرة أرادت المخارجة من مضايقة الجرادة لها فقالت أحسن أخد النبرة وأتخلص منها-(والنبرة المقصود بها حركة الدفع لأرجل الجرادة التي تحدثها عند الطيران-

(آلتيك أوف) وأنا ذاتي بعمل (تيك أوف) ولى عودة إن الله مهل فى الأيام

من طرف **م بروي** الأحد 13 يونيو 2010, 2:42 pm

سلام يازعماء
مرة قاعد جنبي غلام العامل سمعنا سلام من بره عرفناهم ناس الحيكومه في شري غلام عمل نايم وقبل وشو على الحيطه.
دخلوا وسلمو ومعاهم عوين شايلين لوحة كبيرة للبنطون.
طلبوا مني أن أكتب عليها:
(مشرع شيري ـ الغرب ـ العمارين)
طلب واحد فيهم أن أكتب في صفحتها فوق (بسم الله الرحمن الرحيم)
قلت ليهو لو كتبت بسم الله لازم أكتب آيه في الركن التاني لزوم وزن وكده
فصاروا يقترحوا في الآيات المناسبة لمثل هذه الحالة.
وعندما لم يتفقوا على آية محدده والزمن طال.
زهج صاحبنا غلام وطبعاً عاوزن يمشوا سريع
قالهم اكتبوا:
( وإذا مروا بهم يتغامزون)
(وذلك لأنو عارفن قاعدين يقطعوا فوقو) خاصة لما يجي شالع وهم قاعدين كالعادة في ضل العصر.
ياسلام على ذلك الرجل الحلو.غلام

الأخ ود بروى أخونا غلام راجل ظريف وفاتح للدنيا واذكربرضو يوم سأل خالنا عبيد قمر وكان صاحبه شديد- أنت شغال وين فأجابه (فى رفاعة) بلهجة صعيد- فقال غلام فرفارة دى وين- وعبيد مر يحكى عنه كثير.بعدين انا نسيت شخصية مهمة فى الطرفة والحديث الجميل عمنا الماهل سليمان فهو أكثر الناس نكتة وسخرية وخاصة فى الخزان والحكومة ومنها ان حكوا له ان الحكومة سوف توصل الكهربا ء من سد مروى إلى الروصيرص فقال الرصيرص؟ والله الا يوصلوها بى حبال سعف-

وأيضا تذكرت عمنا النفر صاحب الحديث الجميل والطرفة –والتحية هنا للأخ عثمان النفر ودى فرصة نرحب به فى المنتدى –اذكر ان قال احدهم للنفر ان شاء الله السنة دى صيفك سمح فقال النفر: الحمد لله لكن مااظن لانو ترابلتى (الناس السايقين معاى) ناس تخافى تخافى- ويقصد مجموعة من الشباب من ضمن (كورس) الفنان عيسى بروى وكانت أغنية السمحة ومثيلك مافى مشتهرة حينها ---0

المثل الاول اخواني الاعزاء في منطقتنا الجماميع ينطق (أخير من بدري النعدي علي بوني) وهو يتماشي مع اصل القصه ومن الامثله التي تقال

اب علي عن جمله
وتعني اب علي عند جمله اي كل زول بما يهمه ويضرب للذي لا يتدخل في شؤون الاخرين قالت الشاعره
فوقن السيراب حلالي
وماهن العن جمل ابعلي

مواصلة-

هنالك بعض التشبيهات والأوصاف تطلق على الأشخاص فمثلا يقال :

عشا البايتات-

وهو شكر ومدح للشخص –وقد يقصد بالبايتات النسوة اللائي يبتن في المنزل وغالبا فى منزل اهل العريس وقد يقصد بهن الضيفات عموما وقصد النسوة اعزازا للنساء وأهمية إكرامهن –وغالبا ماتطلقه النساء لأبنائهن-على شاكلة –مقنع الكاشفات-كما قالت إحدى شاعرات دار جعل في احد فرسانها:

يابقة عقود السم يامقنع بنات جعل العزاز من جم

فرتاك حافلن ملاى سروجن دم

كذلك يقال فلان:

عكاز الضلمة-

وهو ايضا مدح وشكر ووصف الشخص بالفراسة والشجاعة وهو المنقذ من الإخطار وذلك من مفردة الضلمة تعنى انه يمكن الاعتماد عليه فى أحلك المواقف والمخاطروتاتى أيضا على هذا النمط-الضو- الضى –( كما يقال ضو قبيلة )ويقال أيضا فلان دا صباح خير،غيران المعنى هنا يقصدبه انه طيب ورزين وبشوش-

كما قال الراحل الدميرى فى النذير :

النذير ولده وصباح خير

وكما ذكرنا في الأوصاف الأخرى كالوصف بصفات التمساح أو السيل القوى الجارف المذكورة في هذا الموضوع والتي ترد غالبا في البلال مثل (الجاسر –الطامح ابدفار....) تقال للفراسة والشجاعة -ويقال أيضا:

بحر المســـــــــور :

ويقصد بها الدميرة أو اعلي درجات الفيضان وتدل على الكرم الفياض الغير منقطع والخير الوفير وكذلك العز-وقد صور ذلك احد شعراء الغناء الشعبى حيث قال:

يابحر المسور الما انقطع تراع

وياشدر المحنة المنك الفراع

وان الله مهل فى الايام بى نواصل

كان في مباراه بين فريق كبنه وهو فريق ممتاز جدا علي مستوي المنطقه وفريق الجماميع وهو ايضا فريق علي درجه من التمرين واللياقه وكعاده القوم ذهب ناس الجماميع لي عمنا سليمان حسن الهبيرمي وهو يتعامل بالعروق زول خلا يركب فوق جمله ويقلهن المباراه دي خلوها علي00 وناس كبنه مشوا لي فكي معه سبحي طويلي وقاعد في طرف الميدان ويسبح وفي النهايه فريق الجماميع غلب كبنه وجو حكوا لي عمنا النور علي حسيب الشاعر المعروف وقالو له غلبناهن لكن اتشكنا في النهايه فقال
ابجمل غلب اب سبح
والخبر للخرطوم نبح
لكن الكلب بيناتنا انضبح

شكرا هبرم على المرور ونأمل في المزيد

مواصلة فى الأمثال والمقولات الشهيرة بالمنطقة- يقال

قاطـــع الـدرجى-

ويقصد بها إن الشيء الذي تم وصفه سيء –وقد يكون الشىء ليس لديه اى درجة اى انه صفر عند تقييمه- وقد يوصف بها ايضا شخص –كما يقال للمرأ لغير جميلة(وحيشى) ويمكن ان تكون هذه الكلمة اتت من المصريين الذين يطلقون على الشىء الغير جميل بكلمة(وحش) وهنالك أيضا:

مافى لهجى او (افى لهجى)

وهى ايضا قريبة من من العبارة السابقة فقط هنا قد تكون راجعة بان الشىء ليس لديه طعم ووصف السوء هنا بطعم الشىء او مذاقه وتقود لنفس المعنى وان ليست هنالك فائدة من الأمر-وقد تقودنا أيضا للعبارة (مافيهو قندول ) كأن يقول احد للأخر (نضمك مافيهو قندول) اى لافائدة فيه –وكذلك الامر او الشىء مافيهو قنايى-وايضا بنفس المعنى لافائدة فيه0

كان الله مهل فى الايام لى عودة

من طرف **خالد عابدين** الإثنين 28 يونيو 2010, 4:43 pm

شكرا الاخوان سلمان ومحمد حبيب
وعلي ذكر ( النذير ولده وصباح خير ) وتحت شعار اكتب ولوسطرين
أذكر بعض ابيات المدح التي قالها عمنا الراحل المادح الحاج حمودي عليه الرحمة والد زميلنا قسم الله حمودي -
الممدوح - محمد حجازي -الحليلي صاحب البص نيسان محمد حجازي سفريات مكارم الاخلاق الخرطوم * كدباس * المناصير وبالعودة . كنا نقراها علي جنبة البص ونحن تلاميذ نجري خلفه اثر سماعنا لبوري الحمباقي الشهير في منتصف الثمانينات
قال الحاج حمودي مادحا ( محمد حجازي محمد احمد
ود رجالا قاضين غرض
المشلق عمر البلـــــــــد
الشمار غلاهو الخير رقد
هو الدبلوماسي وكحل الرمد

ومن مدحه لإبن اخته التاجر المشهور حسن علي عون الله

حسن علي للشكر مستحق
المناصير في شق وهو في شق
هم شقيق وانت المرق
جبتلنا التومين بي صدق
وخالك يضحك لامن شرق

وقال ايضا في الحلبي الكبيروالد دادق بعد ان اختلف معه في السوق وشراء سلعة وطلب منه ان لاياتيه تاني في السوق
جاء الحاج حمودي على حماره ووقف امام تربيزة الحلبي وقال مطيبا خاطره
احمدسليمان الرئيس بوش
نقيف بره ولانخش
الرجال غيرك بيضة في عش
ولي جماعتك بالخير ترش

فضحك وتطيبا
رحمهم الله جميعا

اتيت بهذه الابيات ووجدت فيها بعض الكلمات التي اعتقد انها ستستحق التنقيب وشرح معانيها .
وسوف نقوم بفتح بوست للحاج حمودي فور تمكنا منالحصول على مدائحة واشعاره

كان أحد أبناء عمومتنا العطولاب عريسا وجاء عمنا النور ود حسيب الشاعر المعروف في القعيده وفالوله لازم تقول شى فوق جارك دا ومن العاده ان تعطي الذي يشكرك شيئا ولو بسيطا ولكن العريس كان بخيل شديد ولم يعطيه شئ وقالهم بعد العرس ينتهي وبعد العرس انتهي مشوله ما اداهن شئ وقالهن لامن احسب العانه .. قام عمنا الصول قابل عمنا النور قاله أها العريس كيف وطبعا كان العريس مع نسيبته اسمها مكه......
فقال
دا نسيب مكه والمكوكه
المدفوس تحت الدوكه
يلقط من عجيني لي شكلوكه
دايرله مطرقن بي شوكه

يديكم العافيه ويخدر ضراعكم وانتم توثقون الى تراث المناصير واهمها الامثال . غايتو يبقالى مثل عد على بونى اتقال والطوافه يحاولوا تفادى علب كبرى نهر اتبره .
اما زمان فى خشم بيت مانى تناب
الا غشونى النعوفاب
ومن قولت سلام اتقفل الباب
فقالها الشاعر صموده وهو من شلال اب عوه .والظاهر دنعلو شى عند النعوفاب وقفلو الباب من شافو جاييهم.

ابننا نادر اكرر الترحاب الحار بك وشكر على المرور والمداخلة المفيدة–ونعدى على بونى ممكن- وعلى نفس النسق –اما الشاعر سمودة فهو معروف وله اشعار كثيرة نرجو منك انزالها هنا—اما قصة النعوفاب فالرواية او المناسبة فهى موضحة وصحيحة—وشكرا على الافادة باسم الشاعر –ويانادر عايزين منك اشعار ناس سور كما ذكرت لك فى موقع اخر والوالد رحمه الله كان شاعرا كبيرا خاصة فى مجال الهجاء-نحن فى امس الحوجة لك فى التوثيق للشعر والشعراء فى المنطقة فى هذا المنتدى---(سو الصفقة دنقير)

شكرا للاخوة المتداخلين
ويامحمد حبيب عجبتني كلمة (دنعلو) من دنع يدنع دي ويتخيل لي في ناس هنا ما بعرفوها
اما المطرق البي شوكا دي اذية شديدة

* الاخ نادر ادخل الدارة لاجوة وزي ماقالك سلمان سو الصفقة دنقير ارجع لاورا وتعال متحمي
تحياتي للجميع

من طرف **almansory@ooty** الثلاثاء 29 يونيو 2010, 9:29 pm

شباب والله ما قصرتو وانا حبوبتي الله يرحمها إتوفت وانا صغير شديد يمكن خال ابرار يتذكرها _ _
عشان كدة ما حافظ امثال كتير بس بحب إستفسر من امثال ومصادرها من وين زي
1‏_كعكولآ متمنيلو همزة
2_وكراع البقر جيابة
3_وغراق الحجرة
4_والخواف العكاكيزو مية
5‏_مو كل المدردم ليمون
إتمنى الإفادة ودي اول مساهمة لي

من طرف **almansory@ooty** الثلاثاء 29 يونيو 2010, 9:51 pm

صراحة موضوع مميز شديد يا شباب والأحلي انو الحاجات دي عشناها علي الواقع وانا كنت موهوب في الشريك وكت سد البوغة بس
كنت كادوك كبير في الجبابيد والكلد البشرم دا عمرو ما جاني في جباتدي
وكل مرة اقبض ام جرق والبردة او المقاقة

‏_‏
‏_‏
‏_‏
احب اطلب من الشباب البتعرف حسن سكينة انها تحكي من طرائفو لأني معجب شديد بي نطرايفو ونكاتو

الأخ منصوري شكرا ليك- وردودك وأسلوبك السهل الممتنع المعبر وماك هين ونحنا بنلقط الزولونعرفو من اول سطر وظاهر انك أيضا ود حبوبات وبعدين زى الركزت السوط علينا-فياخى :

كراع البقر جيابة أولا نعدلها لتكون (نعال السعف جيابة) بيقصد بها مثلا طلبت شيئا من زول بعدين رفض ليلك طلبك فتقول له نعال السعف جيابة –يعنى بى يجى يوم ويحتاج لك وحا تمنعه كما منعك –ويمكن تم اختيار السعف لانو حاينشف يوما ما وينقطع –ويقال ايضا حضيرى اب نعلين سعف ويمكن نسبة لسوء الحظ-–وهنا فى الصعيد يقولوا(يجى الخريف واللوارى تقيف)

كعكولا متمنيلو همرة -

انا افتكر هى كعكولا متنمنيلو هزة –او انا منذ سماعها فى رسخت فى ذهنى (كعكولا متمنيلو هزة)—ودفاعى لذلك لانو لوكانت (همزة) –تكون العبارة ---كعكولا متمنيهو همزه—ليرجع الضمير لهمزة ----دعونا نقول العبارة او المثل بالصياغة الاولى (كعكولا متمنيلو هزة) بذلك يكون المعنى : ناخذ مثال –مثلا ناس فى فزع دق العيش وهنالك واحد فتر خلاص ومالاقى طريقة للزوغان فيقول له صاحب الفزع يافلان امشى البيت شوف الفطور لو مرق (طلع ) جيبو وتعال فتكون تلك هى الفرصة التى كان يطلبا صاحبنا ويتمناها –فشبه بالكعكول الناشف الذى ينتظر اى حركة او هزة للشدر عشان يقع-

اما غراق الحجرة فهى اكثر وضوحا ومعروفة للجميع –وباختصار يكون هنالك امر كاد ان ينتهى وشارف على النهاية فيقوم شخص بعمل شىء من شأنه يأخر الامر فيقال له (دعك من هذ لاتسو لنا غراق الحجرة قربنا ننتهى –وشبه الامر بالغراق او بغراق المركب لان المنطق يقول ان الغراق لايحدث الا فى الغريق—فليست هنالك مسببات منطقية تجعل المركب او حتى الشخص الذي يعوم ان يغرق بعد ان يكون شارف الحجرة –

أتمنى أن أكون شاركت وأوفيت ---والبقية فى العدد القادم

شكرا منصورى ---امثالك جميلة وهو المطلوب –ليس هنالك شخص يعرف كل شيء وكلنا نكمل بعض زى ماذكرت الموضوع ينزل هنا ويتم تداوله لى حدى ما يتحسحس سمح اى ينجض –

بالنسبه للامثال كانك ركزت السيف علينا—فنبدأ بالمساعدة:

اولا (كعكولا متمنيلو همزة ) تضرب مثلا لشخص يكون داير شىء ويجده فى النهاية –مثال مجموعة ناس تدق فى العيش وفى واحد تعب خلاص وداير ليهو زوعة –فيقول له صاحب الفزع يافلان انت امش فوق شوف الفطور لو مرق جيبو وتعال – فصاحبنا يتكيف جدا وتكون جاتو فى جرح-وضرب هذا بالكعكول نسبة لان الكعكول يكون لين اول ما يعصروه يسيح(والهمزة هنا العصرة) وقد يكون ارتبط باسم شخص فى قصة المثل لااعرفها—وهنالك من يقول كعكولا متمنيلو هزة نفس المثل ورايهم بان يكون الكعكول ناشف منتظر اى هزة من الشدرة عشان يقع-

اما كراع البقر جيابة فهى على ما اعتقد (نعال السعف جيابة)—وتضرب مثلا تكون عايز شىء من زول وهو عنده فرفض ان يعطيك الشىء فتقول له نعال السعف جيابة—يعنى حا يحتاج ليك يوم وسوف تنسد فيه –وفى الصعيد هنا يقال تقريبا (بى جى الخريف واللوارى تقيف)—وضرب ذلك بالسعف نسبة لان السعف سوف ينشف (يبس) ويتكسر او يتقطع –ويقال ايضا (حضيرى اب نعلين سعف ) وهذا يطلق على الشخص سىء الحظ-- ونواصل-----

الاخوة الاعضاء عفوا الموضوع تكررولكن بالفائدة –وقد تم سرد المثل (كعكولا متمنيلوهمزة) ارجو المراجعة--

من طرف **خال ابرار** الإثنين 12 يوليو 2010, 2:32 am

سلام عليكم يا رايعين يا مبدعين الموضوع رايع ومن زمان بدخل واقرا وازوغ.....
لقطت لى كليمات بارك الله فى ooty ادانى فرصة حبوبتنا الله يرحمها يامقداد انا ما بتذكر منها شى غير وفاتها انت داير تكبرنى ولا شنو؟
بالنسبة لكعكولا متمنيلو همزة دى بتتقال للزول المتسبب واقف ع الهبشة.
وكراع البقر جيابة دى اصلا نعال السعف جيابةمعناها الزمن بيجيبك وتحتاج لى ودى فيها قصة حقيقية حصلت تقول القصة:
فى واحد بتاع مركب جاتو مرة من منطقة تانية فى ليل متاخر وقالت ليهو الا تقطعنى لى قرايبى قال ليها مابقطعك حنستو قال ليها ما بقدر قالتلو نعال السعف جيابة قال ليها انشالله نعالا تجيبنى ليك تتقطع زعلت ومشت ,مرت الايام وصاحبنا ماشيلو مشوار الواطة ضلمت عليهو شافلو ضو بيتات مشى عليهن قابلتو مرة ورحبت بيهو وضبحت ليهو وعشتلو حمارو ونام وصحى جابتلو الشاى قامت سالتو عرفتنى قال ليها لا قالتو قالتلو انا القلت لى نعال السعف جيابة يوم قلت ليك قطعنى صاحبنا اتجرس شديد وبكى وقال ليها سامحينى..شوفو سبحان الله
هوى يا عجايز انا بيحكى لى ابوى لكم مودتى ولى عودة.

من طرف **خالد عابدين** الإثنين 12 يوليو 2010, 8:23 pm

إنت ياخال ابرار
بتذكرك كويس ماسك في طرف هدم حبوبتك الله يرحمها وطالع ونازل وراها - دا كلو مسحتو - الحاصل شنو يادكتور
بعدين انا ماني كبير لمن بتذكرفي الحاجات دي اما اخونا حمدانه دا اسكت بس شايفو العيون طششن

اها ياسلمان
الكعكول انتهينا من قصتو
داير اسالك من اسم الحاجة السوداء زي زيت البابور تطلع من الشدرة وتنقط في الواطه وطعما مر مابتنضاق اسمها شنووووو ؟ عندكم- بعدين بوريك نحن نقلها شنو

من طرف **خال ابرار** الإثنين 19 يوليو 2010, 4:05 am

خالد تحياتى حبوبتى الله يرحمها غير طرف التوب ما لحقت اخد منها شى بس الحاج نورنى شوية وهاكم فسرو وح اتفرج فيكم بدل ما كنت اتفرج عليكم :
1.الفتران علوق السمين.
2.القرماضة ولا الرقادة او القحة ولا صمة الخشم.
3.كلو زول يعجبو الصارو
4.الشدر الكبار فيهو الكعاكيل
5.المكرقى اولابا بقرا
6.صراع المو قدرك يفتق سدرك
7.تنقطع محل رقيقى وتنقد محل رهيفى
8.فزع فقوس العشرة فى القادوس(يعنى مو جايب حق لقيماتو)
9.ان طرو الحديد اللبرى نطت
10.ومقولة مشهورة تقول انشاءالله يا افرى حلفاكى يقومنلو عروق.
خالد وسلمان باسلوبكم الظريف مرو ع النقاط دى وان احتجتونى فى حاجة انا قاعد ولى عودة بالمزيد.

من طرف **خالد عابدين** الإثنين 19 يوليو 2010, 4:04 pm

خال ابرار
سلامات
والله دي امثال من العينة الكايسنلها ذاتا
اها دحين هسع الواطا صباح ولسع نمد في راسنا ننتاوق للمنتدى ونرجع كل ما الواحد يلقالو فرقه
بجيك راجع بي رواقة
وان شاء الله سلمان يجي قدامي يفتها

من طرف **almansory@ooty** الأربعاء 21 يوليو 2010, 3:15 am

سلام هاكم دي مني يا خال ابرار والعقد الفريد لكن دي بالعامية السودانية:

الباب البجيب الريح سدو واستريح

الماشاف البحر تخلعوا الترعة

المال تلتوا ولا كتلتوا

القلم ما بزيل بلم

القرد في عين امه غزال

سمح الغنا في خشم سيدو

الولادة صغرة والمشي صباح

قلبي على جناى وقلب جناي على حجر

درب السلامة للحول قريب

تعيس الحظ يلاقي العضمة في الفشفاش

البيرقص ما بيغطي دقنو

بليلة مبشر ولا زبيحة مكشر

الما كلوا الدبيب يخاف من جر الحبل

الخير في الملعون زي الشرة في القندول

الجمرة تحرق الواطيها

المايهدي الكريم تعبان

البفكك من اكل التوم قل اكلو

الراجل افجخي بصلة قبل ما يبقي اصلة

رزقاً تكوسلوا ورزقا يكوسك

الحجـــر يقـــح-

وهى عبارة تقال لشخص لايتوقع منه سلوك معين او امر غالبا لعدم الاستطاعة ولكنه يحاول ان ان يقوم بالمحاولة ويكون محل استهزاء من الجميع حيث يقال الحجر يقح ومثل ذلك بالحجر لانه معروف بعدم الحركة والنضم –وليكون ابلغ ذكرت كلمة يقح –وذلك لصغر الفعل او العمل الذى سوف يقوم به-لانه كان من الممكن ان يقال (الحجر نضم او اتكلم)—وتقول هذه العبار النساء غالبا-- وتقابلها فى عدة مناطق عبارة –العشر قام ليهو شوك—

ويا صديق دايرين ننقل موضوع مفردة (مقق ) هنا فى بوست –الامثال والعبارات الشهيرة فى المنطقة—وذلك للنسيق—

من طرف **almansory@ooty** السبت 07 أغسطس 2010, 1:35 am

خال ابرار كتب:خالد تحياتى حبوبتى الله يرحمها غير طرف التوب ما لحقت اخد منها شى بس الحاج نورنى شوية وهاكم فسرو وح اتفرج فيكم بدل ما كنت اتفرج عليكم :
1.الفتران علوق السمين.
2.القرماضة ولا الرقادة او القحة ولا صمة الخشم.
3.كلو زول يعجبو الصارو
4.الشدر الكبار فيهو الكعاكيل
5.المكرقى اولابا بقرا
6.صراع المو قدرك يفتق سدرك
7.تنقطع محل رقيقى وتنقد محل رهيفى
8.فزع فقوس العشرة فى القادوس(يعنى مو جايب حق لقيماتو)
9.ان طرو الحديد اللبرى نطت
10.ومقولة مشهورة تقول انشاءالله يا افرى حلفاكى يقومنلو عروق.
خالد وسلمان باسلوبكم الظريف مرو ع النقاط دى وان احتجتونى فى حاجة انا قاعد ولى عودة بالمزيد.