لما الريد يفوت حدو.. ويبقى مصيرنا في يدو.. وين عيونك وين بودو..

لما الريد يفوت حدو..
ويبقى مصيرنا في يدو
لما تسرح. كان بتعرف.. وين عيونك وين بودو
..............................
لما الريد يفوت حدو
واحد في المحلي كان يلغبوه يقولوا ليهو الريد.. عشان فرد واحد عند أمو.. ما جابت غيرو.. زي حكاية ود الزومة للبت الواحدي عند أمها.. قال ليها: بس انت أمك جابتك واحدي براكي كدي سبكتك بي مويتك براكي كدي واحدي ما شاء الله..(حله لحمة)
.........
لما الريد يفوت حدو..
كان الناس لما البحر يشرد. كل زول حدو في الطين معروف.. عشان بيكون البحر مشى وطلع ونزل ختا طين.. الحدود انطمست..
كان الناس بي يغززوا كروق تمر بين كل قطعي وقطعي. وتلقى الحريم يعبرن بالجريدي ويضرعن في الطين عشان يزرعن... الريد ده عشان واحد عند أمو. كان تلقاهو قايم قاعد مع الحريم يعبر في حقو..
لكن الريد كان حرامي
ما بيغز كروقة زي الحريم الباقيات في الطين اللوك.. ويدخل في حق الناس ويحب يدخل في حق الناس.. والحريم كانن يخافن منو؟ ويسكتن. لأنو زول ألـْـوَت.. واشتر.. وأبله.. وأحمق.. وارعن.. وأبلم.. وتلقاهو ماكل دي ضراعين وماكل ديك ضراع في الناس العندهم قطع محاددنو
......
لذلك مسكينات كنا نسمع منهم
الريد فات حدو.. الريد ما فات حدو وكدا
.........
يبقى مصيرنا في يدو.. العايز يسويهو يسويهو أمو تدقنا.. ورجالنا كلهم مسافرين في الطين.. زول بي يدافع عننا مافي...
..........
لو بتعرف لما تسرح كنا نسرح بالغنم في وادي الشلال ووادي خلولي ووادي الحنانين ووادي المديسيس
والعيون
هم الاولاد الأكبر مننا عيون ساهرة يعرفون الطريق
لما يدقسوا الغنم تمشي بينا فجأة نلقا نفسنا قريب جبل الشلال ونعطش ونفتر والناس تحت يضجوا يقولوا الولاد ضهبوا والقيامي تقوم
عشان كدة
لو بتعرف لما تسرح وين عيونك وين بودوا... يودوا جبل الشلال..
كلام مناسب في رمضان موش
تأويل راقي
يغني المغني وكل حسب هواه كما قيل
لو كلمات الأغاني كان تأويلها كدة
اكيد بيكون فيها أجر..

لله درك يا ودابوحنة
زكرتنا الطين والجماعة اليومين ديل زانقن البحر
يمشوا يحشو نصايص الليل