الشاعر الاستاذ محمد بروى

سلمان عقيد النعوفابى كتب:شكرا استاذنا (الحمود) كما يحلو لاخونا صديق عبد الله تسميتك والشكر للاستاذ الرشيد -والله انا قريت الاشعار وسرحت فيها وياخى مبروك على هذا الابداع وهذه المفردات الرائعة وذكرتنا ايام الصبا -وبعد كده عليك المواصلة ونحنا معاك (بى نسوى الصفقة دنقير) وعجبنى كذلك المثل او المقولة الشهيرة (النعدى على بونى)
وانا ياود بروى بعد كده بى نقبل على الامثال وياريت يجينا الموسوعة صديق -اكرر شكرى لك والشكر والتهنئة للاخ الاستاذ خالد عابدين على انتعاش وتقدم هذا المنتدى0

المنصوري كتب:عاجزون عن الشكر والتعبير أستاذنا المبدع وعلمنا ود بروي
قصائد معبرة نفخر بها .
وبالمناسبة مرة زمن سفر اللواري كنت مسافر البلد وطشيت في سوق ام درمان وزريبة العيش حيث موقف اللواري ولفيت كتير فجأة شفت لوري مكتوب عليهو ( من أعز ديار) ماصدقت طرت عليهو طيران وسلمت على الجماعة الفيهو طوالي (الجواب يكفيك عنوانو ) وفعلا طلع لوري دادق وكانت رحلة جميلة الى المناصير
ربنا يديك الصحة والعافية ونحن في انتظار المزيد

الرشيد طه الافندى كتب:شاقى الخلا ووديانو
بالليل اقابل جانو
ملح الحجر رضاعنو
فرح القلب واحزانو
وانا من اعز ديار انا

مقيد وفات البحلو
وجبل من هم فوق سديرو وحليل الكان بيقلو

قبيلة القيم المورث
الاصيلة المعروف سلوكه
بلد راسمالها الرجالة
جنود البوغة وملوكه

المناصير نسمه باردى
وحنضل مر للبلوكه

مساحات الفرح حفرة
ومساحات الحزن ديقه
الامل فى احضان التامر
والخداع فى جوف الحقيقة

ارض عرض ما للعرض
حب الوطن سنه وفرض
لو قالوا لابد ننطرد
بيحالنا دونك ننقرض
الاستاذ محمد بروى متعك الله بالصحة والعافية وجعلك ذخرا للقبيلة والوطن وما زلنا عطاشا وننتظر المزيد
تحياتى

سلمان عقيد النعوفابى كتب:

الاخ ود بروى لك التحية مجددا واتمنى ان يدوم التواصل ومن على البعد لكل الطيور المهاجرة -ونحنا عارفين غيرتك وانتمائك الجارف والله ياحمود الخزان دا كان كارثة بالنسبة لنا رغم انو اضخم مشاريع التنمية فى البلاد ومن اكبر انجازات الانقاذ دى حقيقة لكن نحنا دمر لدينا الكثير وفقدنا الكثير ورغم التضحية الناس ديل -ماجدعوا لينا شكلوكة-زى ماورد فى قصيدتك يعوسوا بس-

واخونا سليمان الله يرحمه كان فعلا يحفظ الكثير رحمه الله- وبرضو اقول ليك انا معجب جدا للمفردات التى تتضمنتها قصائدك وتعنى عندى الكثير--فقد وردت الشكلوكة -الكانديقة الديقة وغيرها

بعدين حكاية اللورى يصل العتعت وتشوف التمر وخاصة لونازل بالسوق اول حاجة يظهر تمر كدر وقبلها طبعا جبل الشلال وهو المعلم الفاصل لنهاية الرحلة صوره اخونا حبيب بابكورى

داك جبل الشلال وضح النخيل تاوق بالبلح

والخلاوى تموج بالقدح العلى والبى اتمسح

مو سعيد المنك نزح حتى لوخزانك طمح)

المعذرو احيانا الزول يسرح بعيد والعلينا ماهين

ان شاء يتمسح زى ماقال حبيب-

-

خالد عابدين كتب:تحية عطرة أستاذنا ودبروي
وشكرا على كلماتك وفعلا الوالد ربنا يديهو العافيه مبدع في الرسم والخط يرسمك وانت قاعد قدامو بس للأسف أنا وأعوذ من الأنا مالقيت منو غير شوية رسم أما الخط درب نملاية ولا خط دكاترة ماعارف والبركة في الكي بورد
أما موية السعن دي للزول المجربا فحكاية لاتوصف زي ماقلت لو كان معلق في ضل تمرة ويجيك في الموية طعيم قطران عشان دابو جديد مااتفطر تمام وللا يكون مقدود محل الصرة وترزوهو بي قصيبة منقرشة (ده موضوع فوقو كلام كتير محول إلى أستاذنا سلمان )

أرض عرض ما للعرض
حب الوطن سنه وفرض
لو قالوا لابد ننطــــــرد
بيحالنا دونك ننقـــرض

والله بي حالنا دونك ننقرض يابلد
ابداع في قمة الروعة وخاصية التوقيع منشطة ماعليك الا فتح البينات الشخصية واضافته في خانة التوقيع ليظهر تحت المساهمات
لك الشكر والتقدير

سلمان عقيد النعوفابى كتب:الشكر لكل الإخوة المتداخلين وحقيقة ود بروى إضافة حقيقية للمنتدى ؛ودايما أنا بلقط من المفردات الغميسة فى قاموسنا العامي والدراجى وطوالى الواحد يجد عنوان لموضوع-وبعدين نحنا برضو لازم نعمل عممنوعالمثل الشهير القائل(الجفلن خلهن اقرع الواقفات) والذى يضرب لقضايا ومواضيع كثيرة مثلا للأيام المضت أو السنوات أو الظروف ولكن أساسه –لبهايم –أغنام –ابل وغيرها جفلن من الراعي أو صاحبها وعشان مايضيع الباقى أحسن يحرس الواقفات-نحنا نلقط ونجمع فى المفردات والأمثلة والأنساب والإشعار التي جفلت وطشت وواجبنا جمعها-اما السعن ياخالد المعلق فى تمرة وينز تجغم منو تشعر ان تلك الجغمات قد دخلت أعماقك وشعرت بالعافية تدب فى أوصالك ويكون السعن مدبوغ وتكرف ريحة القطران سيما لوكانت فوق خشمو مختوتة قرعة(شربوق) –وربما كان السعن معلق فى لقدابة الطير تاتيه الرياح من كل الجهات –لكن سعن اللقدابة لايكون بالبرودة المعروفة لان وقت اللقاديب دايما تكون الواطة قالبى جنوب والبحر قلب –والسعن دايما يبرد أيام السموم وياحبذ ان يكون معلق بى شعب سلم –وحميد قال (ياشعب عشقى التلاتى الساندة سعن الدنيا سيبى)-

كمان ظهرت قربة العربيات (اللوارى) يملوها من البحر بس تصل السلمى تلقاها زى التلج-

لكن ظهرت الان الحفاظات وموية الصحة –وياله من زمن

كما تذكرت في موضوع التتك ومواقيت الساقية والقراعى-(موضوع سابق) فكرت قلت لو كانت السواقي حضرت زمنا دا كان الواحد يعمل (مس كول) لصاحبه فيوقف الساقي ويحل تيرانه ويحل محله المزارع الذي يليه0

سلمان عقيد النعوفابى كتب:شكرا ودبروى على هذه القصيدة الرائعة والتي اتبعت فيها أسلوبك المعروف (السهل الممتنع ) وللذي يتتبعها بعمق يجدها الكثير من القيم الإنسانية منها والمجتمعية والروحية وغيرها فتجد الشجاعة والفراسة والتضحية والتعاون والكرم ---وكذلك العادات والتقاليد وأنشطة الحياة اليومية للإنسان وتاريخه الثر،،فمزيدا من الإبداع (ودا الكلام)

بعدين حكاية الشرح دى مهمة خاصة لغيرنا من الذين يدخلون المنتدى رغم انى قلت عايزين (نطلع من الكلام الكبار دا وناخدلنا ونيسة) لكن رضخت لرأى الجماعة بأنه لابد إن يكون هنالك شرح للمفردات( الغميسة)

برضو ذكرتنى اخونا عطشى الله يطراه بالخير زمان كان عندو شعر (خنفس)كثير ودايما مايهيش فى البوش-وبرضو اذكر هنا الزعيم والكلث الحبوب شقيقه على( بت عجيب)-وبالمناسبة عندما بدأت انت فى الكتابة كان معى فى المكتب اليوم الصباح أخونا احمد تيتو –كذلك عندما كتبت موضوع (شباب الذوق والنضارة) فى المنتدى الأول فاتنى ان اذكر شباب من شرى يمثلون المنطقة خير تمثيل فى الخرطوم وتجدهم فى كل مناسبات المناصير—على راسهم المنصورى الاصيل والمواصل والذى تجده فى راس كل ملم وفى المستشفيات الا وهو _عثمان همزة –ثم بت عجيب –موسى الامامى-محمد عثمان الحسن-الشيخ بروى-يوسف عثمان مصطفى-وغيرهم-وذكرت الشيخ هنا ليس للمجاملة والله نجده فى افراح وأتراح المناصير(ياحمود بقالى اطلت عليك) بعدين المعذرة للإخوة الباقين فمن أهم سمات المنتديات الاتصال والمشاهدة عبرها والتواصل خاصة مع الطيور المهاجرة-بعدين قريب سوف أرسل ليك تلفون صديق الراجل مرجع وكاتب وأديب وفنان-لو تذكر عندما غنى مع عيسى –شرى الغراء وكذلك –القبل اللتعوجلى دروبا شقيش امشي كان لازم تجى المكتوبة -وقبلها كان يغنى عندنا فى الغرب (وزين جانى عام بى صدرو)-

ان الله مهل فى الأيام يا محمد بى نتلاقى000

المنصوري كتب:الأخوان الأعزاء
شاعرنا ودبروي وأستاذنا النعوفابي
لكم مني أطيب التحايا ولا أملك سوى أن أقول سيروا وعين الله ترعاكم

خالد عابدين كتب:الاستاذ المبدع محمد بروي
سلامات
وينك مختفي اليومين دي ولعل المانع خير
إنت وسلمان تغيبو مرة واحدي وسوا كمان""؟

خالد عابدين كتب:مُحُْمد ويييييييييييييييييييين ؟؟؟؟؟؟؟؟؟

ود المناصير كتب:الشكر الجزيل لأستاذنا محمد بروي .. والله قاعد نصف ساعة عشان أكتب حاجة في حقك ما قدرت وكل ما أكتب حاجة ألقاها أدنى من مقامك السامي وبقيت أكتب وأمسح فلك العتبى ولك العذر فأنت أحد ثروات المناصير وأنت أكبر وأقيم من أن يتحدث عنك مثلي ...

سلمان عقيد النعوفابى كتب:والله ياخالد اشتقنا لى ودبروى (ومرات يجى يتاوق كدى ويمشى) وهى



مشاغل نحنا هنا فى السودان مرات الواحد يكون مشغول ومرات مدبرس-ودعنا نقتبس ليه البيت الاتى-

وينو الحبيب نور الظلام ليه انطفىء

ومالو القمر من دارنا ياناس اختفى-

بعدين ياحمود كتبت ليك الابيات التالية فى موقع اخر وكنت منتظر تعقيبك



داخلية السكة الحديد

الراقدة تحت الكبرى العتيد (و العتيق)

تلاته ابريل جاييها عيد

يملاها حس طمبور شديد الى الاخر----

ودى من زمان فى الذاكرة

الرشيد طه الافندى كتب:

نورالهادى كتب:تحياتى لكل الاخوه المتداخلين والتحيه لامير شعراء المناصير محمد بروى .والله يا محمد بروى تستحق التكريم والاحترام من كل منصورى .وانت علم من اعلام المناصير .ونحن جاهزين للقراءة ومستعدين .