الشاعر الاستاذ محمد الحسن قمر الدين

الأخوة بالمنتدى -الاخوة الزوار لقد شجعنى الاخ الرشيد وكذلك ود كبنة ولقد انزلت هذه القصيدة فى موضوع الجروف والتناقير وهى للاستاذ محمد الحسن قمر الدين ونسبة لفتح الكتابة فى منتدى شعراء المناصير رايت نقلها هنا مع زيادة بعض الابيات لم ترد فى الموضوع :

داير امر بى دارو العصير وأمشى بينات التناقير
ياصحاب قولوا ان شاء الله خير فى الجروف يرجانى الأمير
ويبقى فستا نو مع الحرير ويطفئ عنى أنا نارا لسعير
يقدر الله الحي القدير خلى ليلى تسكن الضمير
ومن جمالا البنوت تغير أنت ياخاطرى دوام كسير
يابا قمر الدين الفقير ود حجازى الجد الكبير
ويابا تاتيب فى المناصير وفى السهيب الصالح الشهير
تلحقونى يجينى السمير ومابطيقو رقاد السرير

الملاك الخلقوك ظريف يالجدى المرعاك الخريف
ياحسن يالشيخ الشريف قلبى زى فكة تعاريف
وقلبى زى هدامة فى القيف وزولى فات فى سحابة الصيف
يابه تلحقنى يجينى طيف ليلى قمرة منورة الريف
وعودا كالبانة وكت تقيف وشوف ضفايرا فوق الكتيف

ياسواقينا أبكى بالليل شيلي همي وشاركي الويل
خلى دمعك يجرى ويسيل يروى حيض زهرة الجيل
ويادباس أبكى على النخيل يمكن أنسى الزول الجميل
غيرو تب ماداير بديل إلا قلبى انهدا بالحيل

ياقميرية اندرجى وروحى للمحبوب عالجى
وفى جمالو أمشى اتفرجى ركى فوق فرشو وفجفجى
وماتناضمى وماتزعجى جيبى لى قلبو وماتحجبى
وجيبى لى خبرو بتين يجى عشت عمرى أنا كاو راجي

ياحبيبنا متين تعود تسكن ارض النيل والجدود
وتبقى مرتاح حسود وللبريدك تبقى محسود
وتبهر العشاق بالخدود انت لينا اعز مريود
وكل حى بى عمرو محدود وانت رمز الخيروالوجود

يلا نسكن فى العيتنوب نسرح الضأن ونشرب الروب
ونبقى مرتاحين ون حسود لا غبار فتنى ولا هبوب

ياجميل لو تم المراد نمشى بره نسيب البلاد
مابريحوا ناسا حساد يمشوا فى الواطة تقول قراد
كل واحدا لى سرجو شاد وللقوايل ماشى يصطاد
مافى واحدا فى عملو جاد الاعند اللخبيت شداد

قادر الله الخلق العباد ناس تنوم تنعم رقاد
وناس قلوبا اتخلطت رماد وكل ليليها بقت حداد
بى سبب ناسا بعاد ياجميل ليك انا حبى زاد
وغيرك انت كرهت القعاد لى متين ياربى المعياد

قادر الله الخلق البشر وصور ام حاجبا مدور
ام وجيهاً زى القمر بيك ياربى انا ماكفر
داير اعبد لون الدرر وداير اكرف عطر الشعر
انت ياقلبى بقيت خطر ولى نهايتك حكم القدر
ليك فى الالام كم شهرليلى مجنونك ماانستر
عقله طش وفقد البصر وديمة سكران من غير سكر
لافقير لادواء بى عشر يالهى تكافى كل شر

يا سلام عليك ياسلمان
قصيدة ولا أروع منها
الراجل شاعراً فحل معروف
وكما تعلم هذه القصيدة لا ينقص من قدرها شيء
كونها صادفت بحر وقافية عبدالله محمد خير__ يرحمه الله
وعلى ذكر ابن الرومي
فقد قال حكيم العرب زهير بن أبي سلمى في ذات السياق:
ثلاث يعز الصبر عند حلولها
_________________ويذهل عنها عقل كل لبيب
خروج اضطرار من بلاد يحبها
__________________وفرقة أخوان وفقد حبيب
مشكور يازعيم

هنا أورد نمطا جديدا في بوست الشاعر الأستاذ محمد الحسن –وهو نوع من أنواع الشعر موجودا في المنطقة –وهو هجاء لحدث طريف (كقتل حيوان –كلب قط أو ورر وغيره) أو هجاء لعريس لم ينسترمع شاعر فيقوم الشاعر بهجائه –فدايما عند قدوم الشاعر للعرس لابد للعريس ان يحترمه ويضّيفه بطريقة خاصة-والاهجاه الشاعر وان اكرمه مدحه ،كما كان سائدا أيضا قد يكون الهجاء عندما يتفق الجميع بان العريس كان مقصرا فيقوم أهل كل قرية بالغناء للعريس(المتلوم) ويمثلونه( كالرمة ويحدرونه ) بالبحر للقرية الاخرى .والذين يقولون فوقه ويوصلونه للقرية الاخرى-واذكر انه اذا لم تستطع القرية التى ركزت فيها الجثة أو (الرمة) تكون هنالك مداعبات من القرى الاخرى كأن يقال عندما يمرون بها (في ريحه ) ويضعون اياديهم على انوفهم حتى يتصدى أهل القرية ويقولون شعرا يحكون بت الجثة،نحفظ الكثير منها ولكن أكيد نحتفظ به وهذا ليس مكانه فقط نتعرف عليه كأدب ساد فى تلك الفترة-فكان الشعراء يتصيدون هفوات الناس ومزالقهم المضحكة ويأتون بشعر فيه الطرفة ويحمل أيضا بعض الأهداف التربوية والأخلاقية لغرسها في المجتمع-

أما اليوم فهذه لاتبعد كثير عن ذلك الشعر وقد اصر الشاعر ان انزلها وليست فيها تجريح –وإبطال القصة من قرية الشاعر (حوش فرنيب)-علموا بان هنالك ناقة ميتة فى احدى النتايل فتحركوا لها وكان هدفهم ان يأتوا منها بجلد (ليصّلحوا) به الطمبور فعلم شاعرنا بذلك فكتب القصيدة ادناه بعنوان (جماعة الناقة) فقال:

ناسا مابتعرف العيب

اثنين جوه حوش فرنيب

يشهد ربى عالم الغيب

على العديلى شقوا دريب

ناقة سيده قالوا لبيب

وصاحبه بله موهو الضيب

كاتله قلة الفوسيب



بعد شورة وكلام ترحيب

قالوا احسن نشوف ترتيب

نمشى ومن جليدا نجيب

جلد طمبور يدور كرّيب

قامونهار ودبوا دبيب

واقعين فى الحمير تعذيب

وجونا الواطة باقى مغيب



حليل دى الناقة موته غريب

حامد باقى ليها طبيب

واقع فى الجلد قليب

والتاج اصلوا امرو عجيب

يعاين قصدو يلقى حليب

ولا سلات بلا عطريب



ناقة جابته القسمة

والموت داسه بالجزمة

وبعد ماتت وبقت رمة

وريحته شالته النسمة

ودقة خباره لى عصمة

وحالا فى البلد عمه

حامد للجلد شمه

دستر وصادتو الحمه

والتاج للرفيق همه

باكر قالو نتلمه

وجنب الناقة ننجمه

ريقى انا فى الجلد جمه

والطنبور قدم ضمه

دغيشا صبحو مالمه

جماعة الناقة فى زحمه

ومرات تسمع النضمه

جيبى القربى يايمه

وشايلين الفوس ردمه

وسكاكين مابى تنخمه

وراحوا الناقه بى بسمه

ووصلوا هناكه ضهرا ضلو ما رمّه

عديلى عديله اللحمة

مناهم فى الجلد تمه

وعشان بس ماتكون صدمه

جابولن جلود حزمه

التربـال



التربال يسر البال وكل نفع

دوام شغال يخدر لليباس يزرع

يقوم من بدرى يسأل ربو يتركع

وبعد الشاي عديل ينزل على المشرع

وحس طوريتو فى الدراب يسوى الكع

نضف ارضو للحيضان عدل وقّع

وللتيراب رمى ودفن وسند تقنقو ورفّع

مبارى جداول الموية وقت شاف الفطور سرّع

حضّر شطتو الخدرا ومن بصلو الكبار قلّع

وشال صحنو الكبير ختاهو فى حيضانو وأتربع

يأكل وعينو فى الموية ويقوم ضايق وكت يشبع

ويرفع ايدو فى خشمو ويلحس مايخلى أصبع

وقصد الموية باستعجال برك فوق جدولو وكرّع

التربال مع طوريتو لو حر الشمس ولع

تلقه منضف الحيضان وزارع للخضار نوع

سوه البامية والجرجير والبطيخ رمى وفرّع

وفى عجور وفى شمّام ومرات برضو تلقه قرع

وعند الغيبة يسقى حميرو ناوى على البيوت يرجع

شايل عفشو قدامو وحزمة قش وكت يطلع

صلى صلاتو حرس الشاى وفوق العنقريب كوّع

يحكى ويسمع الأخبار وفارق للهموم ودع

وصبحا بدرى تانى يقوم ويمشى خدارو يتمتع

يلقا جميل نسميو عليل وزايد فى الجمال بدع

النوار جميل يلمع وبعضا فيهو شال فقع

ويحرس عيشو من الطير وللكوراك بعيد تسمع

ومرات لحبالو يهز ومرات بالحجار يجدع

ويوم الحش يلم الناس وللقندول يخم يجمع

وفى يوم الحصاد بنفيرو لملم لى تقاتو فزع

عبه وخيط المحصول وخته المونة للشفع

حامد وشاكر الرّازق اياهو البدّى والبمنع



وكان الله مهل فى الايام بى نواصل

مواصلة لقصائد الأستاذ محمد الحسن قمر الدين-قصيدة توضح أحوال أهلنا والحياة والأنشطة اليومية –بدأها بأهلنا العرب ثم ناس البحروالجروف –كتبها الشاعر في عام1991م

وهى بعنوان :



مناظــــــــــــر من بلــــــــــــــدنا



ان بقيت دا تعرف كتير

خل قعادك ويلا قوم سير

طوف على دار المناصير

ابدأ تجوالك بالعرب

وابقى صابر وراضى التعب

حاتشوف فى العتمور عجب

تلقه في وديان بين الجبال اوعه تضهب

والشجر مالى الجانبين مرّة شرّق ومرّة غرّب

والتبس واللرا والمرخ ولاتشوف برسيم لاقصب

واى عربى يحوم ويرعى بى قدومك تقله رحب

وقام سقاك من موية القرب

وفى كرارق من الحطب

وضيّفك وودّاك قنّب

وجاب لك الروب قال لك اشرب

والأكل قراصة حجر والسمن مكبوب فوقو كب

والعجيبه ان بقى فى فرح تلقى فى الجابودى الطرب



من هناك انزل للبحر

وفوت طويل لشاطىء النهر

طوفو جاى جاى اخد الخبر

تلقى مركابى هناك ظهر

وقام طلق للمركب دفر

واده حبلو اتنين جرو جر

وداك صياد داير السمك جنب شبكتو وقف وانتظر

والحريم مالات الجروف من هنا ولى مد البصر



وان طلع لافوق على البر

تلقى حاجات فيها منظر

التمر صفورى وام نص والخدار فى الساقى خدّر

وداكا تربال دنقر حفر

وداكا يحاحى الطير يقول كر

وداك تلميذ راكب الحمارادى ضربات قالو عرعر

ماشى للطابور يحضرو وخايف الدق لو تأخر

شايل البستلة فى الليد وقام صباح من اهلو بكر



وان سدرت مشيت البيوت

تلقه شلة شفع تجوط

وان دخل لا جوه عاين قبال تفوت

تلقه امات وتلقه بنوت

واحدى فوق البنبر تعوس وواحدى ماسكى المفراك تسوط

وواحدة ماشى تجيب اللبن وتحلب الغنماية كرّوت

والابو الحرس جبنتو جنبو موية وحقة صعوت

وكلهم في امن وأمان واى زول بى حالو مبصوط

ياسلام عليك يا استاذ سلمان على الابداعات دى .وانزالك بعض قصائد الشاعر الكبير محمد الحسن قمر الدين.وانشاء الله يكون اداك النوته الصغيرى ديك لنو عندو فيها اشعار معزله عزيل .

نمط اخر للشاعر محمد الحسن قمر الدين وهو فى الغزل

ويتضح ثقافة الشاعر واطلاعه كيف لا وهو معلم

والقصيدة بعنوان:







أبادر فوق طريق الخير وأطيب خاطر الحلوين

أبادر وكلى حنية عشان السمحة ليه تبين

ياست الجمال والريدة ريدك بين ضلوعي دفين

وغرامك قسمة مكتوبة لى إنا من سنين وسنين

أقابل فيكى كل صباح وماكفانى شوف العين

جمالك فى الخلق نادر وخدودك زهرة الياسمين

وبسماتك تضوى الليل وعيونك ترشد التايهين

ووصفك يعجز العقاد ويعجز برضو طه حسين

زليخا الليلى لو حاضراكى تقطع ايدا بالسكين

وروميو الليلى لوشافك كان استشهد المسكين

ايه تاجوج وكيلوباترا زيك انتى قاعد وين

نفتش نحنا فى الزيك ونسال وين قمر دورين

جميل لو مات بسبب الحب بى حبك كتار ميتين

ولو عنتر صبح فارس عشان عبلة وحسامو سنين

انا أصبح ليك نابليون نحكم العالم الاثنين

ولو كان شكسبير راوى أنا احكيلك غرام قلبين

حليلو الشاه بعد ممتازه ماماتت كان يبكيكى ديمة حزين

وبناله التاج محل ذكرى بنيانا جميل ومتين

وأنا ابنيلك قصور فارس تسكنى فيها من طابقين

وافرش ليكى قلبى بساط يأويكى وعليكى أمين

ويخضع لك ويطيع أمرك ويختك جوه في كل حين

وأرتل ليكى دعواتى لى الله العلينا حنين

يحفظك الله من عيون الناس وتصبحي ذكرى للجايين



-شكرا نادر –والنوته دى ماعندى خبرا

جميله القصايد وماشاء كل المجالات أبدع فيها والقصيدة الأخيرة فعلا تدل على إطلاعه الواسع
شكرا أخي سلمان وواصل
إنت يانادر وكت خابرلك فيها نوته ماتجيب منها

أورد اليوم هنا قصيدة لشاعرنا محمد الحسن قمر الدين –كتبها فى سنه 1979م –توضح صور العيد ومايقوم به الناس فى ايام العيد والطقوس التى تؤدى اثناء تلك الايام وبوصف دقيق—وهى بعنوان :

وهنا ايضا نمط اخر لشاعرنا محمد الحسن قمر الدين وهو فى الرثاء –قصيدة كتبها الشاعر فى رثاء والدته-

بعنوان:





رثـــــــــاء للوالـــــــــــدة





يا خالقنا بى حكمك رضينا

ورضينا القسمة والمقسوم علينا

ومابنقدر نفوت الكاتبو لينا

ومابنقدر نقول للدنيا مالك تظلمينا

ومن حبّانا ليه بتفرقينا

عارفين حاله ماتهنا ونسينا

مرات فى كرح والناس حزينه

ومرات فى فرح لمّات وزينه

ونحنا معاها ما ملنا وشكينا

نقول تسعدنا مرات ان شقينا

وتشقينا ان سعدنا وتبتلينا

نصلى عليكى يا قبلة نبينا

رضينا الحق قبلنا وما ابينا

وفراق الوالده اصلو صعب علينا

حليلة الريدة ضاوى على جبينا

ويمين يا يمه منك ما اكتفينا

ولسع من حنانك ما روينا

وكتير والله من بعدك بكينا

خليتينا يا يمه وبقت أحوالنا شينه

وطوالى الحزن مالينا غير فرحا يجينا

وينك لينا يا امى الحنينة

لو ما انتى ابدا ما ربينا

وفوق رمل الجروف جنبك جرينا

وفى النيل عمنا وانتى تراقبينا

وفى ضل التمر كلنا مشينا

وسقنا غنمنا فى الوديان رعينا

زمان يايمه رحنا شرى وقرينا

ولمان نجيكى كنتى تقابلينا

عليكى البسمة تفرحى بى مجينا

ويوم الجمعة تمشى تقديمينا

وبعد خطوات بعيدى تودعينا

الاخ الصدوق باذن الله سوف اسأل ليك الاستاذ ود قمر الدين وفى القصائد التى استلمتها القصيدة دى ماعندى—

لك التحية على المرور

ابداع متواصل ياسلمان
والاستاذ/محمد الحسن قمرالدين شاعر معروف
من اعلام بلادى فى الشعر
ما اريد ان اقوله ان ينقل هذا البوست الى بوست جديد باسم الشاعر
كما فعل الريس فى بعض الشعراء ولك حق التشاور معه
لاثراء هذا البوست المليان للتوثيق لمكانة الشاعر بيننا