قصتي الاجتماعية مع الباشمهندس هاشم علي الجزولي

زمن طويل جداً ما اتلاقينا... طول حياتنا دي إتلاقينا مرتين.. والمرتين أظن هاشم ناسيهم.. بداية دراسته هاشم كانت في مدرسة شري الأولية.. هم قدامنا بي دفعتين.. الداخلية كانت كبيرة لم نتقابل فيها والمدرسة كانت كبيرة لم نتعارف فيها...
السبب في ترك هاشم لمدرسة شري الأولية وراح أكمل في العاصمة هو( مرض أب قفاف) ما عارف هسه يسموهو شنو؟ نحن في المناصير كنا نسميه أب قفاف ليه؟ لأنو يورم الإضنين والجضم جضومك تصير زي القفة... كانت هنالك ثلاثة أمراض تظهر في الصيف وخاصة بين طلبة المدارس نسبة للازدحام هي
مرض أب قفاف
2 مرض السود بضم السين وفتح الواو وتسكين الدال وهو الحصبة الالمانية
3 البرجم أو البرجوب أوجيكين بوكس بالانجليزي
.............................
كان البي تجيهو حصبة وبرجم يكرتنوهو في أوضة في الداخلية القديمة التي صارت مؤخراً المدرسة المتوسطة.. الاوضه الطرفانية جنب الباب التي صارت مكتب معلمين لما تحولت الى وسطي
......................
أنا جاني أب قفاف من جملة الطلبة.. كان البي يجيهو اب قفاف يخلوهو يذهب في عطلة مرضية الي أهله اسبوعين.. بعد أن يأخذ جرعة دواء عند أحمد عليقى في الشفخانة قزازتين كبار كدة والدواء مشرتق عليهن بي بره زي هرار الرخمة ابيض من كترة الفتح والسد.. واحد مكتوب عليهو برتمول أو شى من هذا القبيل والتاني سائل أبيض زي الحليب.. معليش دخلت في تخصص محمد بروي ودراسته العليا في مجال الأشعة أظن او التشخيص.. مافي اي دواء تشيلو معاك أهلك حتى لو عايز تموت.. كل زول يقول ليك والله مرضتا مشيت أحمد عليقي أداني شربة... عندهم المزارعين واهالي المنطقة عقيدة في أحمد عليقي أكثر من اي دكتور يجيبوه حتى ولو تخرج من كلية الطب.. يقولوا ليك أحمد عليقي شاطر.. وأحمد عليقي هذا الشاطر مما تعين ولغاية ما نزل المعاش وغرقت الشفخانة ما ترقي ولا زادت ماهيتو فلس واحد..
أها أنا جيت مشرع عبد الله ود العجمي وأنا في أولى إبتدائي صايدني أب قفاف الدنيا صباح الساعة تمانية طردونا من طابور الصباح نحن مجموعة عندنا أب قفاف.. جيت المشرع لقيت ليك هاشم علي الجزولي مبطوح في رملة مشرع عبد الله ود العجمي في الرملة البيضا الساقطة ديك قلت ليهو مالك يا هاشم قال لى جضومي مسخنة ومسحتها بي طين بحر ورملة ساقطة.. منتظرين عبد الله ود العجمي المركب كانت في الغرب.. قلتا ليهو ارح معاي البيت نفطر بعد قطعنا الغرب.. قال لى شايف الحمارة المربوطة ديك في التمر معاها ولد مرسلنو لي من سور... أها من ديك وعيك بعد فترة سألنا وين هاشم شهرين ما جاء المدرسة قالوا ابوهو رسل ليهو عشان يقرا هناك في الخرطوم.. أظن الأسرة كلها سافرت

عمنا علي الجزولي من المناصير القلة الأزكياء الخرجوا من حفرة الطين الي التجارة ومنهم عدد كبير في العاصمة.. حيث كان بيت عم علي الجزولي ملاذاً
لكل ابناء المناصير وقت ما كان عندهم زول.. كان مفرغ ليهو غرفة في البيت مخصوص للطلبة والضيوف.. ناس عباس شلبي كانوا ساكنين فيها سكنة
.....................
أها المرة التانية أنا لما جيت العاصمة كنت بجي بيت عم علي الجزولي واقعد مع زين العابدين الحسن عثمان لما كان شغال في دكان علي الجزولي وانا وزين العابدين الإثنين فنانين وزين العابدين صوتو تمام.. بعد شوية يجوا من البيت ينادونا للعشاء تلاتة مرات كدة او اربعة ترددت على بيت عم علي الجزولي لاقيت فيهم هاشم مرة واحدة.. هسه هاشم أظن لو شاف شكلي ما بيعرفني.. برضو زواج هاشم حاولت أحضر ما قدرت كنت خارج العاصمة.. هاشم كانت له شقيقة بيننا في مدينة العين في الأمارات.. لهذه الأسرة المنصورية المشحونة بحب المناصير عاطر السلام والتحايا

من طرف **ابو مصطفى** الأربعاء 21 يوليو 2010, 7:11 pm

والله يا صديق اولا السلام عليكم ورحمة الله ونحن بالجد سعيدين كل السعادة ومحظوظين كل الحظ انو انت تطل علينا هسع انا ما هاشم الجزولى لكن والله ضحكت ضحك مقسم بالله لى فترة اقل حاجة تلاتة او اربعة اسابيع ما ضحكت ضحكت لامن بكيت طيب تسالنى البضحك شنو ؟؟؟ ضحكنى اسلوب الكتابة والكتابة نفسها وعيادة ودعليقى وهى بنفس الصورة لامن دخلنا المتوسطة عام 1988
غايتو الله لا يحرمنا منك وانت الان وين صدقنى لو بقيت فى اى مقطع داخل ولاية الخرطوم لاتيت لك هرولة وهذه والله ليست مبالغة
الطيب محمد عبد الرحيم
المناصير الجزيرة دماج
وعاوز تلفونك يا عزيز داخل او خارج السودان

تحياتى لك والاسرة الكريمة

هاشم علي الجزولي مليان بي محبة البلد لامن يترع

قصتي الاجتماعية مع الباشمهندس هاشم علي الجزولي

قصتي الاجتماعية مع الباشمهندس هاشم علي الجزولي

رد: قصتي الاجتماعية مع الباشمهندس هاشم علي الجزولي

رد: قصتي الاجتماعية مع الباشمهندس هاشم علي الجزولي