سلام يا أهلنا يا ناس البحر طيبين

عوافى بيى أهلنا البيى فوق فى العتامير ... شرفت الدار وطالما جابك الدرب إعقل بعيرك وأبقى داخل لا جووا والدرب الجابك يجيب عقابك ... كدى أول تبادى هاك الشربوق دى بل عطشك وإتوهض فى القعدة وأدنا أخبارك ...دوبن ما سوى الجبنة .... والأكل ملحوق طالما جيتنا بيعدلك ... قر قر قر _

أووووووه ود أخت ود علي ود طه
ايوه عجبتني القصة
ده زولنا تب ود علي ود طه.
عندو صورة هنا أنا نشرتها في المنتدى دحين ما شفتها يا جناولو ما شفتها حاضر بنشرا ليك تاني
لاله ما بنقول العربي ده تعلم وين!
لانو قصتك معروفة عندي كلمنى بيها المرحوم عمر اخوى صاحب اللوري. وعندو صداقة وتجارة مع ود علي ود طه..
اصلو ياخوي العرب يشرفونا ويعزونا. والفي اصلو مافي عروبيي ماهو منصوري جد
والله يوم داك ضربت تلفون مخصوص اسأل من عبد الله.. عبدي اللاهي ود عمر ود حموريي لسه قاعد في ساني..! والله جاتو عوجي. قالوا لى في امان الله لكن شوفو بقا شبه.. اصلو عندو بت مسميها على امي طيبة..أها ديل كمان اصلهم من المهوة من شري واهل ابوهم من الجزيرات وعندهم حقيق وتميرات في المهوة لامن الغراق جاء يقطعوهن وتمرة في الجزيرات يقطعوها، وبعدين عوضوهم فيهم..
شرفت يا ود حاج

ما بنقول العربي ده قرا وين!
لانو العرب نجيضين وبصيرتن فاتحي اصلو من زمان يقروا معنا
قرا معانا عمر سعد من عرب اب سباع
وقرا معانا جبريل سليمان محمد من عرب كبنة
وقرا معانا علي تومابي رحمو الله وكلهم ناجحين
وبعدين مخصوص عملوا ليهم مدرسة في ساني.. دحين يا د حاج مدرسة ساني واقفي والله قاعدي تقري

مرحبا بك الأخ ود حاج ... ونتمنى أن نجدك دوما حيث نريدك ... سيفا بتارا .... ودرعا واقيا ... ونظما راقيا ..

ولنعمل معا من أجل كل المناصير ... لنعيشها أحلى مناصير ... بلا مشاكل بلا أزمات بلا مشادات ..

تسلم ود حاج. لا لا لا علي تومابي رحمو الله قدامنا كتير.. زي هو في رابعة وأنا في ثانية وهو دخل كبيييير..
عمر سعد ذاتو الدفعة القدامنا في شري
إنت تعرف يا ود حاج عمدة المناصير ذاتو متزوج مرتين من العتمور
مرة الرباحاب.. ومرة الحمامير( خيره) أخت ناس عبدي اللاهي.. أمها بت طه الله يرحما..
أها.. خيرة ولدا
حسين نعمان عثمان العمدة دفعتنا. وولد مرة الرباحاب
مبلول نعمان عثمان العمدة دفعتناأما ناس على تومابي رحمو الله دخلوا قدامنا شدييد رجال كباار كملوا رعية الغنم في العتمور وجوا

وكمان عبد الله الماحي عريبي زمان كانوا ساكنين الهريوب
يا زول زمن كتلة ود أخت الماحي .. اسمو خليفة وولاد تومابي. نحن الزمن داك عوينون مرفقين ساكت .. كم سنة كدة.أتذكرها بتفاصيل دقيقة لامن أخاف هسي دي جابوهم الكاتل والمكتول من الخلاء في خلوتنا
والله كل ما اتذكرا أخاف.. بعد ما جابوا المكتول من الحكيم.. خلاص من شري. جوا بردوه عندنا.. بردوا أبوي.. وكفنوا.. ولمان جوا من الخلا .. خليفة ده يومين ما أكل ويدو مجروحة.. امي لامن شافتوا بكت شديد وجرت على الخس ملت ليها كورية لبن فورتا قالت يا حليلو من البارح ما أكل مهيون مهجور مغلوب.. وجرت ماصت ليها فشقة كسري في كوريي وكبت فيها فيها سكر جابتا ليهو. شرب كورية اللبن وشرب كورية الكسري المعجونة. بعدين الحمد لله سجنوه في الدامر سنين عددا وبعدين طلع الله يكافي الشر الله ينعل إبليس.. يا ودخير
الوكت داك نحن جنوي ساكت نجري ورا أماتنا. لكن أنا زولاً البي تسلط في مخي ما بتمرق بي سهولة.. يا زول مرات اتذكر حاجات كنتا اقولا لى أمي لامن تنط وتندهش أظنو عمري اصغر من ثلاث سنوات .. يا حليل خيرات العتمور يا ود حاج

حباب ود حاج نضمك سمح بالحييل

حبابك عشرة من غير كشرة

تقبل مروري

تسلم ود حاج.. مبلول كسبة حبوبتو وليست أمو.. آدم متزوج بت طيبة وكان قاعد جنبنا في الضقولة يسوق ويحفر.. نعم خليفة متزوج بت الماحي ود العريبي وخليفة أمو أخت الماحي طوالي.. هم ناس طيبين وناس معايش..
طيبة اخت كسبة طوالي وآخر أيامهن تركن العتمور وعاشن في السلمات.. مبلول ولد كسبة برضو كان عايش وقاعد مع العرب ناس موسى ود القلع جنب السلمات.. ومبلول الصغير ود العمدة مسنو على خالو مبلول أخو أمو..
أما قروشكم دي والله يا ود حاج أنا بعيد من القضية ولا أعرف عنها شئ..
لكن حاشا أن يكون على العرب أوصياء.. العرب هم مكملين للمناصير وهم مناصير زي ناس البحر.. والما عندو اصل في ناس العتمور ما بيكون منصوري مائة المائة..
والعرب مفخرة لنا.. وهم ناس عينهم نجيضة واصلاء.. وناس البحر استفادوا من ناس الخلاء زمان وناس الخلاء برضو استفادوا من ناس البحر... العملية مكملة لبعض..
أنا شخصياً أحب ناس العتمور موت.. وهم رواد أساسين لى خلوتنا ويعزونا موت.. وأعراس وبوش كتيرة في العتمور كنا نذهب لها قبل زمن اللوري بتاع عمر وأثناءه وبعده..
لابد أن تشرق شمس للعتمور من جديد وينتعش يا ود حاج.. خاصة منطقة ساني.. لأنو هي زمان كانت واحة..
حتى عندما ظهرت فيها الوابورات والناس دقوا فيها مترات ارتوازي.. نحنا عملنا فيها وابور واشتغل كم سنة.. وكنا زارعين جرم وبطيخ.. صدرنا وفترنا منه الى عطبرة.. والجرم كنا نخليهو ينشف والعرب يساعدونا في تقشيره ونحمله في شوالات الى الخرطوم كحبوب تسالي. شقيقي المرحوم عمر قام بذلك وأنا شريكه.. وكانوا عندنا ناس في ساني مشرفين على الوابور..
لكن المسألة ما مشت عشان موية ساني سطحية. لكن قالوا ناس الجولوجيا تحت الموية السطحية دي بكم طبقة كدة هنالك بحيرة من المياه لاتجف الى يوم القيامة.. ودي عايزة شغل مكثف بإمكانيات أكثر.. وزمان كان الناس يدقوا ماسورة البابور عن طريق الشاكوش والمرزبة فقط.. لكن لابد من حفر علمي لتصل الطبقة التحتانية.. وده متروك للمستقبل بحول الله..

أهلا أهلا قريبنا ودالحاج شوب شوب شوب
كيفنك ياخي وعل طيبين وعربنا كلللهم ان شاء الله مبسوطين في عتاميرهم ناس ساني واب سباع وديم عون ولاعند جبال الكتله واب نحل وفج ام دون ودايرين خبر العرفاء ان شاء الله الخريف الفات شربت والناس زرعت
وسلامنا يصل لي اهلنا الفي العرقوبي ووادي عصمة وكبنة روض روض - نتيلي نتيلي وماننسى أهلنا ناس جوراء وود أب قايمي سيد الجنينة الفي الخلاء والسلام لاعند مناصيرنا في سوق الأربحاء
وخالك حمدعلي ودطه شفتو قاعد ماشاء الله في الاعتصام الا دايما قاعد مطرف أنا قايل مشتهى شايو الصاموتي وكرفة همبريب في العتمور
أها كيفني ليك
بعدين قريبك صديق اب حنه أظن نسى في حكاية كتلة ود تومابي - الحكايي دي تقريبا كانت في أواخر الستينات أو بداية السبعينات وقريبك صديق ودفعتو كللهم غالبيتهم مولودين على جهة الاستقلال يمكن واحدين فيهم سنة أزهري رفع البيرق
ودحاج شرفتنا والبكان بكانك

مرحب بالاخ شيخ العرب ود حاج ونحنا اهلنا معظمهم من الخلا--وسوف اكتب ليك عن ذلك لاحقا--

لان اليوم يوم ترحيب زغم انى تأخرت عليك ولكن اعفى لنا وسامحنى واهديك هذه الابيات التى نجرتها فرحة بقدومك:

حباب شيخ العرب مرحب حبابو

خريف العينى المبدر الاتردم وزرقن سحابو

العب سال واديهو وطفر فوق عقابو

الركب فوق جملو تلب فوق سنامو

ود حاج زول التراث ومليان جرابو

سعد بيك المنتدى وبيك شب دابو

دحين اخدلك خترة واقدل زى جنابو

انت مكسب للمنتدى وبيك ازداد نصابو

　

　

　

　

الف مرحب والدار دارك...
وانشاء الله تكون اضافه حقيقه للمنتدي

الف الف مرحب
بودحاج
انشاء الله تكون شيخ عرب حقيقي
ماك مزور

حبابك عشرة يا ود حاج اتفضل اتفضل

والجابك يجيب عقابك

الف مرحب ود حاج
اضافة نوعيه للمنتدى

ود حاج الما عربي في النعوفاب
إدريس ود أ بجقة قول واحد
محومااد ود الخليفة ود اب شوال قول إثنين
ابراهيم فضل.. قول تلاتة
المنى أخت دبلوب قول أربعة
حروز مرة الطرشان قول خمسة
نفيسة أحمد سليمان العمدة. قول ستة
حليمة بليليي قول سبعة
حليمة بت سالم قول تمانية
حاجة تفله أم معروف قول تسعة
أما الباقين كلهم عرب نعوفاب.. ناس سمد

الف الف مرحب .

شيخ العرب ود حاج ’’’ عوافي ’’’

ومرحب بيك

بس قول لي إنت كنت محترف في ياتو نادي ؟

شكلك كدي متمرس منتديات

بجيك راجع قلمك عجبني وزي القابلني قبل كدي

أبو هشام جاب ليناخبر دريبات ود حاج!

أيوة يا ود حاج الزول الظاهر في الصورة من السلمات
هو حسن محجوب محمد توم.. من حي المكّاب من السلمات زولاً كدي كان عندو( منداجة) يمندج.. جدهم من المكاب لكن هو حنوني من جهة أبوه
ابوه محجوب ود الحرم بت أب حنة عليه رحمة الله توفي ودفن في مقابر ودي شري وجرت عليه مياه البحيرة

اهلاااااااااااااااا بودحاج

شرفت ونورت المنتدى

استريح
يادفعه
وبعدين بجيك راجع نشوف خبرك

اهلا بشيخ العرب

حللت اهلا ونزلت سهلا اخي الكريم

مرحب ود حاج.
سليمان ابوشعر ملغوم.
ونوعيه ..متاكده انه فهمك ما تقيل لكن برضو اقولها يعنى كتابتك فى المنتدى شكلها ولونها مختلف من باقى كتابات المنتدى فيها ريحة العرب وانا بعتبر العرب هم عز المناصير وافتخر باعمامى فى وداى اب سباع وعموم خلا المناصير .

الف مرحب بشيخ العرب

ود حاج كتب: ,أسع يا الحاج يا أخوى الناس دى يأكلوا زينا كدى .

بالمناسبة دي الاسبوع الماضي جانا وفد زائر ومعه خواجة واحد

عملو الفطور في المشروع جوة الزراعة

انقر الخواجة ما جابو لي في صينيتي ؟؟ والله ياكل بيدو العيسرا

والله لليلي لما اتذكر الحادثة دي احس بالجوع

معليش يا شيخ العرب على المشاترة دي

قام الزمن داك صادف عرس ولدا ليهم ودائر أشوف قريبى صديق متذكر العرس داك والعريس منو .وفى العرس د غنى صديق ومعاهو ودالبركل وصديق د عينى باردى اليوم داك وحات الله تكون أمه بخرتو لبان طكر من العين ,وقالتلو عين الفتاه فيها واطة وعين العجوز فيها عود جلابيتو اللابسها اسموكن مخطط خطوط ما بتتفرز ولونها كأنها مظهرة ظهرة خفيفة والنوع د عند ناس البحر ما فى , عمتو عينى باردى زى ما قالت فنانة البندر العمة كاويها وفوق كتفه خاتيها وزولى فعلا فوق كتفوا خاتيها الطاقية ما المبنقره ديك موزونة والوشى فيه ركشه كدى , وعيون الناس كلها عليهو .أنا الخلانى أدقق فيه النظر لأنه جضومى كانت مشققه وسنونى كانت ناطة

أوووووه ود حاج الآن انت وضعت النقاط على الحروف.. لأني بحاول أتذكرك انت مين بالضبط في أولاد اخت ود علي ود طه.ز لأن ود علي ود طه عندو زي كم ولد أخت.. ايوه تذكرتك انت كنت قاعد في الحسيباب نعم
اما ذلك العرس هو عرس ود خالتنا سليمان احمد ابو علي رحمو الله. يومها فعلاً الأنظار كلها كانت عليا.ز وكنت اغني احسن من عبد الرحمن البركل بشهادة الجميع.. وبدون مبالغة كان عندي سحر كدة عجيب للغاية.. وكنت أغنى بالدس أحيانا كثيرة واغنى خارج المناصير في المدارس.. لأن الناس في البلد كانت تحترمني شديد وتعتبرني بكل تواضع فلتة زماني.. وكانوا ينظرون اليا بهالة غريبة وعجيبة. ولد على مرااا على راجل.. وكان ما اجد منهم غير الدعاء أن ربنا يحفظنى. ولما كان الغناء يعتبر صعلكة في المناصير. وانا كنت أحسبه غير ذلك.ز فن نابع من الذات.. ولكن كاخلاق ومعاملة لم ينجرف بي الفن لاي مستوى.ز عشان كدة الناس لما عرفوا صديق بدأ يغني في البوش! اندهشوا واندهش والدي الرجل الحاج زعيم القبيلة وزعيم الكرم المنصوري لم استطع أن اقاوم المجتمع، ففضلت أن أترك الغناء إمتثالاً للمجتمع الذي يحترمني غاية الإحترام. نعم تركت الغناء وكان ذلك مثار دهشة من الفنانين وقتها عبد الرحمن البركل وعيسى بروي وسر الختم محجوب من سور وغيرهم.. ولكن حتى الآن يعتمل جوفي بالفن لاطرب به ولكنه لايجرني للغناء بصورة مكثفة.. وحمدت للمجتمع المنصوري أن أخرجني من ساحة الغناء وأنا لا ازال طالباً في الثانوي..
اما العرس طبعا ناس سليمان احمد ابوعلى ابوه عندو عروبيي ومات مبكر وهو زوج خالتنا بت خال أمنا فاطني بت عثمان ود حاج قيلي أخت الزعيم رجل الجماعة خالنا عيسى عثمان حاج قيلي.

اوعه تقول انت الحاج بتاع الخواجات

؟؟؟؟؟؟؟؟؟؟؟؟؟؟؟؟؟