سلام يا أهلنا عوافي

ديار ود قمر الحبيبة
يلاقوك ديمة بالطيبة
.......
عجبتني في توقيع عادل شرري.. يا ريت يبثها بصورة واضحة ومتكاملة في قسم الصوتيات

أنا ذاتو يا باشمهندس عجبتني النغمة شديد. وكما قال نور الهادي خلينا نسمعها تاني.

من الطرائف واحد قريبنا مسجل مقطع لأغنية جميلة جدا من الأغاني الخالدات.وفي يوم واحد من الأخوان ايضاً هفت له أن يسمع هذا المقطع وعارفه انه مسجله في جواله.. فعندما رد على التلفون قال له يا اخي رادي ليه ما تخلينا نطرب.

لكم التحية.

هذا من اعمال المبدع ود محمود

الباشمهندس الرائع دائما صديق عبد الله

وابن عمي الزعيم عبد الغني الحسن

ورجل الترحال المبدع دائما الاخ الهادي

والشيخ عباس محمد

شكرا علي الاشادة في توقيعي

وهذا من ابداعات الشاعر ابن عمي محمد علي نصر الدين
وهو يغني لجزيرته شرري ويطوف حلالها
وغناء وتلحين الرائع الفنان ذو الحنجرة الحنينة

علي الحموووووووووووووووووووووووووووود

والصورة داخل التوقيع هما توماتي

شهد و ورغد

نسأل الله ان يحفظهما

وهذا العمل الرائع قام به ابن الخال

محمد محمود انقا

الاخ عادل
تحيه طيبه
والله يخلي ويبارك في شهد ورغد
لدي استفسار بسيط هل علي الحمود جنابو ولا اخر؟؟؟؟
اذا هو المقصود ...يعني طلع متعدد المواهب...الله يوفقه

مالك ماك قابضوا يا سلمان لازم تقبض الباقي
............
ايوه استاذة نجلاء هو علي الحمود قريبنا.ز وافتكر هو زي دفعة قريبة ليكم في الجامعة افتكر اتعاصرتو..
.........
نجلاء حكاية قابضو دي عند سلمان عقيد ذكرتنى .... البلد... قلتا ليك
تعرفي الكانكيج ماهو؟
وما هو الفرق بين الكانكيج القواقي.. والكانكيج أب ريغيسيمات؟؟؟
الإجابة 10 دولار

شكرا الاخ سلمان علي الافاده
يا صديق مع ارتفاع الاسعار الجائزه غير مغريه....وعشره دولار لا تعني لنا شئ هذه الايام...لذا ما في داعي للا جتهاد والفتيش....
لكن برضو اجاوبك....الكانكيج هو السمك الكبير...
علي الحمود الدفعه القدامنا في الجامعه .... هو و حسن سليمان ....نعم الشباب اطال الله في عمرهم

الاخت نجلاء

الله يبارك فيك

فعلا هو علي الحمود دفعة حسن سليمان

وهو كثير المواهب

اما اجابتك عن الكانكيج خطأ

وانا سوف اخذ الجائزه

هو سمك له شوكه كبيرة ورأسه كبير وفيه دمعه بي قراصة تاريخية

هات الدولارات ياهندسة

تسلموا

ههههههههه
عادل شرري طيب تم الإجابة ونرسل ليك العشرة دولار
قلنا الكانكيج نوعين.. عرفهما..
........
بالغتي يا نجلاء. كيف يعني الكانكيج هو السمك الكبير..
؟؟؟
يعني اي سمكة كبيرة يقولوا عليها كانكيج والله شنو؟
طيب السحيلي موش كبير ليه ما يقولوا عليهو كانكيج.. او الدشقوق.. أو الدقشوق.. برضو كبير ليه ما يقولوا ليهو كانكيج بالغتى فيها دي؟
قالت الكانكيج هو السمك الكبير قالت؟ ما سمعتك أميرة علي . المتربية في البلد. او لو سمعك محمد بروي.
.........
يا نجلاء بلغة اهل العاصمة الكانكيج هو القرقور..
ما بتسمعي فريق الموردة المورداب بيقولوا ليهم القراقير!!
ليه؟
عشان السمك والحوت وتجهيزه جنبهم في بحر الموردة

يابشمهندس

اديتك ساقية......

ساقة النعوفاب

نعم يا سلمان هناك حتة فارغة في الكانكيج بين عضام الراس. بين العيون. حتة صغيرة بس قدر النقطة. تقوم تدخل فيها شوكة تمر. في دقيقة يموت. وتغسلوا وتنضفوا في البحر. وزي ما قال ليك عادل شرري فيهو دمعة تجنن..
اما الكانكيج هو نوعين
1 كانكيج قواقي
2 كانكيج أب رغيسيمات
.............
وظااهر الإختلاف بينهما
القواقي لونو مايل للسواد وأب رغيسيمات عليه مادة لزجة من الخارج حتى لما تقبضو تعلق هذه المادة اللزجة في يدك. ولونو ابيض شوية.

الاخ الباشق اتاريك زعلت على شقيقك بى غادى
القصيدة معبرة لكن مكان كتابتها منتدى الشعراء
تسلم يا رائع

لكم التحية والود جميعا والحب..أولا فى خرمجة حصلت فى القصيدة وبعض الكلمات.إنتو ضايقين مالكن؟ أنا بظبتا ليكن كويس وحا تستمتعو بيها إنشاء الله.الشاعر (محمد على نصر الدين)من صلحة شررى النصورة.بعض الكلمات مكتوبة غلط مع أكيد التقدير للإهتمام بالإبداع والفن .الألحان إجتهد فيها شخصى الضعيف المكتول بحب المناصير وشررى.الأخ سلمان اؤكد لك إلتزامى بالبرنامج المزمع قيامه قبيل رمضان بإذن الله.تحية خاصة لعادل شررى وابن خاله أنقا الزعيم النشيط الحمش..تحايا ود وإحترام وتقدير للأخت الأستاذة نجلاء زمراوى..سلام يا أهلنا عوافى سلام منظوم بالقوافى
بعادنا وقلبنا الجافى متين نوصل لى دياركم
سلامى أبداهو بالقنى وحراز ود عمر أصلو جنى
شمومة بلاد المحنى بنقعد فيها ونغنى ونشرب كاس التمنى حليلكن وكيفن أخباركم.الخال الباشمهندس صديق هذه مناطق واسماء لشخوص داخل جزيرة شررى يعرفها عبد الغنى نصر الدين جيدا يمكن الرجوع إليه.الأغنية طويلة وهذه النسخة الموجودة طرف المنتدى لم تكن معدة جيدا سجلت بجوال من غير إعداد .أعدكم بان تكون واضحة الملامح والصوت والمخارج ومعها الكثير من التراث المنصورى الرايع ولن ننسى اى محل فى المنطقة بأكملها فنا وجمالا وإبداعا.

بالمناسبه القنى دى اسم حتة مع بداية جزيرة شررى مع نهاية شرى الغراء.العرق فيها حامى وقديح الجور يغرّق تب ..قال الجاهليون الشعراء فى الرجل الكريم..لا تمسك الماء( قنة)الجبل اى المكان المنحدر لا يمسك الماء فهى تنحدر بسرعة إذن القنى دى كلمة عربية جاهلية يحتج بها اللغويون شفتو اسماء مناطق المناصير كيفنها؟؟العرق الواردة أعلاه بكسر الراء..لازم تفخيم القاف أعلاه.

لك الف سلام وتقدير الاستاذ علي الحمود
بالمناسبه يا جماعه اول من قابلتهم في الجامعه ويا دوب كنا برالمه هم اهلي ناس شرري
وشري وحوش فرنيب
علي الحمود.....حسن سليمان....امنه خليفه وفاطمه خليفه وغيرهم من الانقياء والله نعم الشباب ....احترام..تقدير,,,,وقد استمرت علاقتنا طيله فتره الجامعه....فلهم التحيه والتقدير,,,,
وين الجماعه ديل يا علي؟؟؟

السلام والتحايا..موجودين أحياء يرزقون بحمد الله.الأستاذة فاطمة الخليفة تم عقد قرانها على أستاذ دنقلاوى معها بالمدرسة بمدينة دنقلا يعنى شقت القبائل وفى ذلك خير كتير بإذن الله.الأستاذة آمنة وكيلة مدرسة شرى الثانوية للبنات وهى تؤدى رسالتها فى الخيار المحلى بكل تجرد ونكران ذات وحججت أمها فى أحسن من كدة؟الحسن يحرس الثغور الغربية للبلاد ويكافح التهريب..كنت حاضرا فى عقد قران الاخت فاطمة.ونحن دائما نلتقى أنا والحسن وعلى العموم لم تنقطع حبال الود بيننا وكل من عرفنا نرجو بذلك الرحمة وصلة الرحم.السلام والتحية لكل أهل المنتدى الكرماء خاصة الطيور المهاجرة على رأسهم الأخ الشفيف نور الهادى وود البروى والخال صديق وكل الحبايب الحلوين المتواصلين عبر هذه الزاوية الكريمة الجميلة..

على الحمود حبوبتو طوالي شولمنه بت الحرم بت أب حنة..
شفتو الناس مقرنة كيف!
يا سلمان ما شفتا بورة محجوب كيف تمرا سمح في ( عاكريب ) اي حقينات..
اها ده حق ناس شولمنه في الطين وفي الجرف في الحنانين. مخلياهو لى أخوانا ناس محجوب ود حومااد تومي وناس يوسف ود حوماد تومي. وناس محمد يوسف ومجذوب يوسف من السلمات
محجوب ده؟ يا سلمان أخو شولمنه حبوبة ود الحمود لزم..
إنت يا سلمان ماك شايف ( بت الختم ) وهي من شرري وهي مرة محجوب ود حومااد تومي. ماك شايفا تجي تحش في خور سحارة تحتكم في حق الحنانين؟
عمرك ما قلتا بت الختم دي تجي من السلمات تحش في خور سحارة السبب شنو؟
السبب حق راجلا محجوب أمو الحرم بت أب حنة
بعدين محجوب ده شن بي يعرفو بي حريم شرري يعرس منهن بت الختم..؟
السبب هو شولمنه حبوبة ود الحمود رشحت ليهو بت الختم دي من شرري
وبت الختم دي محجوب جاب منها ولد واااحد بس ماعندو أخت ولا اخو.. وامو بت الختم مسمياه عيسى. على الزعيم عيسى ود عصمان خالنا.. الزمن داك عيسى كان عندو شنة ورنة . وكان زعيم الحسيباب. عشان كدة الناس يسمو عليهو
.................
اها يا سلمان هل تعلم محجوب ده جد ود الحمود معرس تلاتة حريم؟ وكلهن ولد منهن؟
كان راجل عاااتى محجوب وكان راجل نكتة وصارم وحازم . العمدة نعمان كان يحب ونستو شديد.. ودايما برنامج العمدة كان بالعصر لو عايز العمدة والله عندك قضية والله في ناس متشاكلين. تلقى العمدة بالعصير دائما في حي المكاب بالسلمات.. جالسين تحت دومة محجوب ومحتوشنو محجوب ود حومااد توم ويوسف ود حومااد توم وحمييرا بت حومااد توم. وحمييرا لغب طبعاً إسمها فرع الزين. شفتا يا سلمان الاسماء الراقية دي كيف في المناصير
يقعد كل يوم العمدة لغاية قريب المغيرب في المكاب مجلس البرامكة ويجي طالع يحضر صلاة المغرب في الخلوات..
محجوب كان يتلفح التوب والمركوب الاحمر. ورجل طويييل ومتين وعااتي ومافي زول كان بيقدر يختو في الواطة ومعظم الناس تخاف من لسانو وتعمل ليهو ألف حساب..
اها يا سلمان
زوجة محجوب الاولى:-
هي عمتنا آمني بت اب حنة.. آمنى القليص.. أي أمنى المدير.. جاب منها بت واحدي اسمها زينب مسمياها على امها زينب بت فرحين بت حمدين بت صبي.. زينب هذه ماتت عمرها 11 سنة
بعد كدة محجوب تزوج بت القريشي. اخت ناس مصطفى ود القريشي وحسن رب رب.. من شري
شفتا يا سلمان الناس مقرنة كيف؟
جاب منها ولدين وبت
جاب منها حسن محجوب
وخليفة محجوب ود الجدي
وجاب منها سعيدي دي متزوجنها في خوير ود نور
شفتا الجماعة دي مقرنة كيف؟ المناصير جافين في صلة الرحم.. منو البي يقول هسي دي خليفة ود الجدي وحسن محمد مصطفى من شري ده ود عمة ده وده ود خال ده؟ عمرنا ما شفناهن قاعدين يتزاوروا.ز إلا بت القريشي رحما الله كل تاني يوم في العيد تجي قاطعي شري تقول ماشي ابارك العيد على اخواني في العبابسة في شري.. حريم شري المعرسات في الغرب كتاار ما نشوفن إلا يوم العيد يقولن جايات يباركن العيد على اهلن في شري.. منهن بت القريشي دي المعرسا محجوب.. ومنهن عاشة بت حسب الله.. عمة عباس ود موحوماد ود حسب الله عضو المنتدى ده؟ ومنهن بتول معرسا الحسن ود قمر الدين في حوش فرنيب والدة الزعيم أبراهيم الحسن المتزوج معلمة الأجيال فاطمة حسن علي صديق.. بتول دي يا سلمان ما اهلا في بهيي طبعاً..
وبعدين ناس شري برضو معرسين في الغرب كتييير.. زي صفيي بت العمدة اخت ناس العمدة نعمان طوالي متزوجا العقيد في قرية أم لقاديب في شري قرية ناس دكتور مصباح.. ما نشوفن إلا يوم العيد عبد الله ود العجمي ينهزر فيهن ويشاكل فيهن عشان قال ما بيدنو حق المركب كامل وبعدين يسوجن بي شري لغاية المغرب يطلس.. وعبد الله ود العجمي عايز يتخارج منهن ويسلمن أهلن من ضو ..ويمشى يشوف القليلة تصغير قلة..
الكلام جاب الكلام كلو فوق ود الحمود
وزوجة محجوب التالتي من شرري بت الختم إختارتا ليهو اختو شولمنه بت حومااد توم بت الحرم بت اب حنة.. حبوبة على الحمود

ماشاء الله وتبارك الله

اها تراكم عرفتوا على الحمود كويس

وهنا ظهرت ملامح اضافته الحقيقية للمنتدى

رايك شنو باشمهندس صديق

اولا اعتذر لرواد المنتدى للمداخلة عبر عضوية ابنى عزام لانى نسيت الباص وورد وياالحاج شوف لى حل ****شكرا للذين ساهموا فى اظهار هذا العمل والاغنية الواردة بصوت الرائع على الحمود هى جزء من قصيدة طويلة عن جزيرة واهلى فى شررى وقد حاولت ان اذكر بقدر الامكان جل الاماكن ان لم يكن كلها وكذلك الاسر وخشوم البيوت اما بالذكر مباشرة(البرجوب ولاد كاشف- النصورة-البطارين) او بذكر احد الاشخاص *** وقد نظمت فى عام 2008 بعد زيارة قصيرة قمت بها للبلد قبيل الغراق

أبو عزام يا أروع زول يا شفيف لك الود والتحايا..الخال صديق أبو حنة فات محمد سليمان نصر الدين فى نسب المناصير .حظنا لقد عرفنا مرجع آخر يمكن الرجوع إليه .ولا بد من تدارك هذا التاريخ العريق قبل الإندثار وتعليمه لأجيال التكنلوجيا .أخى سلمان وأخى يس مصطفى والمدير خالد لكم الحب وأبارك لكم إنتظام الشاعر محمد على نصر الدين نايب المدير العام فى سالكا للنقل للمنتدى .الأيام القادمات حبلى بالجديد المثير ولا ننسى أن بالمنتدى لبيبا لا بد من تحيته الاخ الشفيف محمد البروى الرجل الرايع رد الله غربته..شكرا لكم جميعا الحب .

يا ود الحمود.
الحقيقة استغربت أن محمد علي نصر الدين شاعر!
الشاعر مرات كدة بي يكون زول عفريت شوية..
محمد علي نصر الدين لما زارني مع المجموعة في شقتنا بالرياض هو زول هااااادي وديع تقيل، لايتكلم في غير مناسبة.. زول مزود بالتكنولوجيا.. زول متدين. جنبنا في مسجد كبير في الرياض جنب مستشفى مكة، خرجنا صلينا صلاة المغرب كلنا فيه. أنا زمن ما شفتا محمد علي نصر الدين ده! من زمن سوق النعوفاب وهم صغار تاني ماشفتو، إلا الشوفة دي..
أها يا ود الحمود
محمد علي نصر الدين برضو قريبنا بي ابونا وبي ناس الشلال. محمد علي أمو من الشلال عرسوها ولاد نصر الدين..

وشولمنه حبوبة ود الحمود راجلا من شرري أب حجاب.. يقولوا ليهو اب حجاب.. اب حجاب ده مات بدري.. نحن شفناه صغاار
لكن ابوى يجي عندهم في شرري بحكم هو راجل بت عمتو شولمنه.. كان اب حجاب يشيلنا في راسو ويقسم لينا الحلاوة ونحن أطفال..
أها شولمنه دي سنة 1968 ونحن صغااار
لما أبوي جاب اللنش. وكان لنش كبير موش حاجة صغيرة.. فيهو غرفة اربعة في اربعة للحريم مفرشة بالمراتب وفيهو سطوح للرجال وكدة بعد وصل اللنش المناصير عملنا عزومة كبييييرة ضبحنا فيها خمسة خرفان.. إتلمت المناصير دي من الكاب لى غاية برتي في خلوتنا والبيوت المجاورة.. وابوي طبعا معروف يحب المديح جاب الدراويش يمدحوا من عصمة وكبنة والكاب.. وكان عندو خوة مع المقدم أحمد علي بخيت وناس زرقاني وناس النجييض والبصرا بتاعين الحييبي طبعا نحنا مناسبنهن.. وناس الكيييب وناس حجر البيضاء وناس السادي ولاد عمراني عندنا فيهم سرارة وود فرح موحومااد من الحيبي الغربيي والمادح ود حمودي وعوووووك الحنانين اتملت يومها لامن طرشت بالناس..
.........
أها جبتو ليك لى شولمنه جده ود الأخت ود الحمود
قامت جات يوم الكرامة شولمنه حبوبة ود الحمود. ابوي ود خالا لزم..
قالت ليهو يا حاج أم قله
أنا حريم شرري ديل فاقعات مرارتي.. وأنا الوحيدي الغريبي المعرسة في شرري.. تعز بت عمتك وتجيب اللنش تركزو تحت اهلى.ز معزة ليا. عشان حريم شرري ديل يقعدن في علبن ، ويعرفن مكانتي عندك..
تجيب لينا اللنش في شرري. تركز تحت أهلنا وانا ألم ليك حريم شرري من حدها لي حدها يتفرجوا في اللنش.. ونوقد شاينا في المتمر وغدانا.. وجمعت مساهمات من حريم شرري. بعدين ابوى رجعا ليهن..
قال لها الوالد يا شولمنه اللنش ده لسه جديد وانا خايف من شيمة خلولي البلد لى تحت ملياني حجار وخاصة مشرعكم. كدي لامن نسأل ( موحومااد العويد .. الحجر الفلاني يطلع متين عشان أركز فوق ليهو والله تحت ليهو ما اوكر فيهو؟ تصدق حتى الحجار لى غاية الكاب المركابة عندهم ليهم اسامي واسماء الشيم جمع شيمة.. شوف نحن نقول الشيمة وهي كلمة عربية فصحى بالله شوف مناصيرنا ديل كيف؟
الشيمة والشيمياء والشيماء هي العلامة البارزة وقد كانت حجار النيل والعرق هي علامة بارزة. وهي غير الشيمة بكسر الشاء شيمة يعني خصلة او صفة
..........
اها يا زول ما اكتروا ليك الراجل ابونا أوفى بعهد بت عمتو شولمنه ورحنا باللنش وانا كنت فيه. وهناك كان العميان شايل المكسر. قيلنا.. وبعدها مشينا لى صلحة ابوى زار صاحبو سليمان ود نصر الدين. هناك وتبادلوا الهدايا وجينا راجعين الحنانين المغيييرب
.........
كلو تعريف فوق ود الحمود الما ساهل
..........
عادل شرري سبب الموضوع والتوقيع
رسل لى في الرسائل بريدك الخاص عشان ارسل ليك صور تخصك ، حا تبسطك شديد لامن تامن..

سلام يا اهلنا عوافى صدحت بمسرح الباسقات فى اللقاء الاسرى
من الرائع على الحمود والناس تنقز على فرد كراع ياود ابحنة

سلام ياباشمهنس ويا فنان يارايع الحمود اشكر الباشمهنس صديق على هذه الكلمات الجميلة فى شخصى الضعيف بمناسبة الشعر نحن ورثناه من الوالدة ولى سبعة اخوات كلهن يقرضن الشعر والحاجة الوالدة حليمة عمر الحاكم الان عمرها زاد فوق التسعين وتتمتع بصحة جيدة وذاكرة قوية ومازالت تقول بعض الابيات على الماشى واخر ماسمعته منها فى زيارتى الاخيرة قبل اسبوع بمناسبة زواج بنات اختى )عرس ولاد ابوقرون )قالت وقد سمعت ان الزلط جايى المناصير ************************

يعيش عمر البشير

بالزلط ربط المناصير

ونمشى عند ابوعزام مقيل

نسال الله ان يمتعها بالصحة والعافية