مالو بدوني السلم والخيدران في

مالو بـَـدّ ُوُنـِـي الـسـَـلـَـمْ والخيدران فـِـيْ
حـُـكـْمْ أبْ تـَـكـّـُـوْ لـَـىْ سويتو عـَـمـّـِـي
..............
لاحظ لهجة المناصير، ويشترك معهم فيها الشايقية..
بدوني.. اي بيدوني كما يقول ناس المدن
........
شرح البيت ومناسبته
ديل عرب ساني بالمناصير ناس( ولاد حموريي) واحد من احفادهم زمان. عندو مرة اخوه، توفي عنها وهي صغيرة وله منهابنت واحدي. المرة كانت سمحي شديد وجميلة وصغيري وجاهلي.. اقنع الحكومة بتاعتو إنو يرمي فوقا الحبل.. وإنو الزول يغتي ماعونو.. وإنو عايز يلم اولاد أخوه عليهو.. طبعا غصباً عنها الحكومة الأولى، عرس مرة اخوه.. وضم بت اخوه عليهو. لمان كبرت البنت، نشأت مثل امها في الجمال ونضارة العود.. راجل امها، اللي هو عمها.. عندو ولدين من مرتو الكبيري.. واحد سمح خلاص.. وواحد شين.. شناة مرة.تقطع القلب.. عمها جبرا إنو تعرس ولدو الشين ده!
رفضت البنت..وشردت، وراحت اترمت عند اخوالها وأنشدت شعراً..
البنت كانت غاوية ود اعمها السمح ده!
وغصباً عنها عمها كان داير يعرسا لى ولدو الشين داك!
لاحظ كلمة. غاوية.. وهي من الغواية.. كلمة عربية فصيحة صحيحة. يستخدمونها المناصير كثيراً ولايستخدمون كلمة حب.. يخجلوا منها.
أغنية الريلة صارت تراث منصوري كل شاعر بعد شاعرها الاصلى صار يقطع ابيات ويرمي فوقا.زى الله هوي ليلينا.
لاحظ كلمة غواية هنا
يا قشيش رداح أم سـِنـَـىّ
فوقو تـِـعـْلْ العيني قال دَىّ
ناس فريقك يضحكوا بـَـىّ
عاد تقول ما جربوا الغـَىّ
............
أم سني... يقصد ساني
لقد استخدم الشاعر كلمة غي من الغواية..
وقال الشاعر العربي في الغواية حول السيدة فاطمة رضى الله عنها لما ألهها الخوارج وهم ما شافوها ماتت قبل فتنتهم
قال شاعرهم
وألهك الغواة بغير علمِِ
ولو علموا لما اجترحوا الغواية
فيا بنت النبي كرمتِ اصلاً
وطبتِ وسيلةً وشرفتِ غاية
وكلمة غواية لها مترادفات في اللغة العربية.. الحب.. التتيم. الصبابة والوله. العشق. ويصاحبها الجوى.. وهو الم الفراق... والنوى وهو البعد عن الحبيب او البعد عامة. وتلازمها كلمة التباريح. اي تباريح الهوى ولواعج الحب من الذفرات..
.............
عرب مناصير الحمامير مشهورين بجمالهم ومنهم تزوج عمدة المناصير نعمان إحدى زوجاته وانجب منها ابنه حسين الذي لايزال على قيد الحياة مد الله في ايامه