وينو خال ابرار مالو طول غاب

صديق عبدالله علي أبوحنة كتب: وينو خال أبرار مالو غاب
باقي زولاً حلو الخطاب
مرة ناقد ومرة كتـّاب
غيرك المنبر كوم تراب
سكنتو أم هدهد والغراب
فتشوا ناس كبنة والكاب
كبنة فقره وكبنة حسناب
والعجولة وشيخنا شـنـّاب
روحوا برتي وحتى كمساب
فتشوا الخلا..حتى العـُقاب
أوع بس نقبض للسراب
والله بتاً كان ليها حاب
و يبقى في حبها ماع وذاب
أصلو قبل كدة مرة غاب
في زيارة شيخنا كركاب
وجاب لو عذراً فيهو كضاب
أصلو أمر الريدة غلا ّب
من زمان ممكون يا شباب
ويبقى مشغول شيلة وتياب
أصلو في زول لى خبرو جاب
والشغل بس مسكو يا داب
بيها مشغول عاد ياصحاب
وشافو منبرنا ضباب ضباب
وباعنا في سوق النعوفاب

سلمان عقيد النعوفابى كتب:مالو خال ابرار تانى غاب
ومن زمان الغناى ودى جاب-
ياحليل دارنا بقت عَقاب
واقف النجم القمر غاب
المشرف الاجتماعى اصدر خطاب
دعوة واضحة لكل الصحاب
الرشيد من عصمة لى عند الحسيباب
وبالشرق يس حدك الكاب
والحاج بسوى شنكوكة وحموداب
عادل شررى حلالا والعقاب
وبالغرب شلال وصابراب
والبقصر يلقى العقاب

ونحنا دفقنا مويتنا على رهاب
كنا قايلنو مريض و طاب
والله طشا وضرب العقاب
الا صديق لى خبرو جاب
اظنو قولو دا صح صواب
واختارلو حتاً سمحى وشباب
بعدين تكون الدعوة لى كل الحبايب والقراب
الفى البلد والهنا وحتى لى دول الاغتراب
ونقوى الصفقة وتنسجم على صوت الرباب
ويخدر منتدانا ويزدهر بعد اليباب

النفر كتب:سلام للصدوق وسلمان والسرور
والسلام موصول لعيال منصور
البيهم أباهى وأعتز و فخور
والتحية لخال أبرار الدكتور
العليهو سؤال الأخوان يدور
مالو غاتس ومابى الظهور
وليهو كم أيام وكم شهور
لا ظهر لا سجل حضور
ولا حتى يتاوق أو يزور
يا أخوانا خال أبرار معذور
ومن إشتغل مامرت شهور
ودابو يرتب وينظم فى الأمور
وزولنا لسع فى عمر الزهور
ولسع مازال بشبابو مبهور
تلقاهو بين المنتزهات يدور
وينتشى للنسيم وعبق الزهور
وعاد بالمنتدى شن يدور
ومالو مال قليب السطور
شيخنا النفر ماشاءالله عليك ما قصرت اتحفتنا بابياتك الرائعة وغيبتى طلعت بى فايده ع الاقل ما كان قرينا الدرر دى...
وعاد بالمنتزهات شن ادور
احسن لى قليب السطور
معاكم يا شيخنا الوقور