العيد فى البلد ( لحم طاعم مية المية ) ؟؟؟؟؟

عندنا هنا لانستطيع الحكم علي الطعم لاننا فاقدين الحواس الخمسة نري الناس تذهب تشتري الضحية ونشتري ...الناس تذهب الي المسلخ ونذهب الي المسلخ , يذبح العامل الخروف ويضعه في الكرتونة وناتي به الي البيت ولا نجد من ياكله وحتى العيال عندنا اسنانهم ليست حاده يمصوا اللحمة ويرموا ... وكل عام وانتم بخير

شكرا عبد الواحد جبريل على المرور وارد الله غربتك صديقى العزيز ؟؟؟ وتعيد انت واولادك فى شنكوكة بى مزاج انشاء الله





تحياتى

ابو مصطفى

سلام ابو مصطفى

وعودا حميدا لمنتداك بعد طول غياب

اذكر ان صديق ابو حنه تحدث مرة عن ان اللحم فى المناصير طعمه غيييير

وواضح من كلامك فعلا ان طعم اللحم والشية فى المناصير مختلف



يعني بصراحه شوقتنا يا ابو مصطفى نعيد مرة فى المناصير

ويكون عيد اضحى حتى نتذوق طعم اللحم فى بلدنا المناصير

سلام بت الارباب ؟؟؟ انتو دحين معانا هنا فى السودان ام خارجه ؟؟؟ لكن الشى المهم العيد فى البلد وان بقت فى طريقة تعالوا عيدوا معانا ؟؟؟؟ اسع انا مخمخم العيال البنوت التلاتة والولد مصطفى

وامهم الرباطابية حلفت كان تعيد فى امدرمان على طول تقول الا نعيد فى المناصير ونقولها لماذا تقول الاكل هناك عندو طعم ؟؟؟؟





تحياتى

ابو مصطفى

ابومصطفي عوافي

الليله جبت لينا زول عزيز علينا (الدكتور عبدالواحد جبريل ) والله ان له مكانه خاصة في القلب رد الله غربتك والي ديار شنكوكه

حمدالله علي سلامه العوده الاخت انتصار حجازي بعد الغيبه

سارى الليل سلام مطبوق وانتصار وعبد الواحد سلام مدبل ؟؟؟ كيف الحال ؟؟ انا معيد فى البلد وبى عيالى

ومن ام امدرمان اشيل الشطة والدكوة والليمون ويا المناصير جاكى زول ؟؟؟؟؟؟؟؟؟؟؟؟؟؟؟ظ







تحياتى

ابو مصطفى

ابو مصطفي سلامات

انا معيد في الكدرو لكن اشترينا الخرفان من بدري وزرعت ليهم اللوبا الطيب والعفن مع المريق بالاضافة لي البرسيم ديل بقالك يطلعوا كيف؟؟

الاخ الخبير سلام عليك

شنو كلام ابو مصطفى دا ما عاجبك

والله خرفانك مهما كتر لها اللوبا والبرسيم ما بتطعم

ياخى خمم عيالك واتوجه البلد عديل احسن من تحاول فى تطعيم اللحمة باللوبا والبرسيم

تحياتى لكل الاخوة المتداخلين

الاخ ابو مصطفى

وابن عمى عبد الواحد جبريل ارد الله غربته

وكل الاخوة من دون فرز

نقول لكم كل عام وانتم بخير

ود الاخت ابو مصطفي اكيد حنتقابل في المناصير اليوم الاول معيد هنا مع الاولاد وثاني يوم للمناصير وسوف تكون بين برتي وسور والبرجوب وسوف ازورك عند اهلك

كما ان هناك مناسبه زواج النذير وهي سادس يوم من العيد يعني سوف اخذ 5 الي 6 ايام في البلد

أبومصطفى كل عام وأنت بخير والعيد في البلد له طعم خاص ولحم البلد طعمه براه ولكن يبدو أنه بدأ يتغير خاصة وأن معظم الذبائح أصبت تستورد من الدامر ولكن المعروف عن مناصيرنا يربطوا الضحية من سنة وياحليل عيد البلد وصدقني يا أبو مصطفى آخر عيد عيدته في البلد كان عام 1988م وبعدها عييك غربه وعيد كانه لم يكن وعزاءنا ان في بعضها الواحد كان يحج ولك تحياتي وأوعك تكون ماشي تتطهر البنوت . وتحياتي لك ولأهل دماج وللوالدين ولك شكري أبو مصطفى.

عيد مبارك ابو مصطفى
العيد فى البلد طعمه خاص فعلا .اخر مره عيدنا فى البلد عام 2007 وكانت سفره طويله وصعبه .اتحركنا الساعه اربعه صباحا كنا مجموعه معانا عضوة المنتدى هبة الامباشى ,وصلنا الدامر سبعة ونص صباحا شربنا الشاى وغشينا سوق الدامر شلنا زوادتنا وقطعنا البنطون بعد مشيه مسافة ساعتين لقينا هايس مكسور شلنا جزء من الناس معانا بعد مسافه كسر عمود فى عربيتنا ونزلنا فى الخلا فى عز الشتاء والهواء شديد يشيل الزول .
بقينا فى نص الطريق منتظرين اى حاجة تشيلنا اولادى الا ماسكاهم على من شدة الهواء بعد ساعة تقريبا جوا صينيين سايقين عربية لاندكروزر ركبنا انا واولادى ومعانا عم الاولاد فى العربيه ورى يوصلونا قهوة محمد على .والعربية اتحركت وسايقين بسرعه تخوف بعد شويه ظهرت غزال فى الطريق قاموا الصينين جروا وراء الغزال واصروا يقبضوها الغزال تطلع مكان عالى هم بوراها تنزل حداره هم بوراها تلف اى لفه يلفوا بنفس الزاويه ونحنا بورى حالنا يعلم بيه الله بس اتعذبنا عذاب وخفتا خوفه شديه ولدى الكبير عرفنى خفتا وبقى يبكى. والغريبه نحنا فى عز الخوف بتى (اربعه سنوات)متابعه السباق ومبسوطه وتشجع فى الصينين.
السباق استمر مسافة ساعة او اكثر شويه الغزال وقع من شدة الاجهاد والجماعه وقفوا العربيه وشالوا صيدتهم.
طبعا مشوا عكس الاتجاه .وبعد داك رجعو تانى عشان يوصلونا القهوه وصلنا القهوه قريب المغرب وما صدقنا روحنا اتفكينا من الصينيين. وصلنا والبرد شديد ولا فطور ولا غداء اكلنا فول ومحمد على دخلنا غرفه عاملها بره البيت شويه نظام ديوان فيها سريرين مفرشين وقفلنا الغرفه والبرد موت .بعد كم ساعة وصل لورى فيه مجموعه من ناسنا السافروا معانا والبنات دخلوهم معانا فى الغرفه استمرينا يومين فى القهوه منتظرين العربيه تصلح. وبرد بالنهار نولع الحطب عشان ندفا والمويه مالحه, كانت ايام صعبه شديد . بعد يومين جاتنا عربيه وسافرنا بيها البلد

ياابو مصطفي العيد يا في البلد ياتشيلو بديل وما حا تنجح

شكرا الاخوة المرور وحقيقة الاخت هويدا سافرت وضاقت طعم السفر ؟؟؟ ورغم ان السفر للبلد كان زمان صعب لكن الان بقى اسهل بى كتير ؟؟؟ طبعا زمان اللوارى لكن الان الناس بقت تاجر ليموزين وبى عيالها للبلد ؟؟؟

الخال هاشم الجزولى اكيد حا نتقابل فى البلد ؟؟؟؟؟؟؟؟؟ وفى عروسات كتيرة فى البلد فى شيرى وفى ارج وفى بونى ؟؟؟ ديل العارفهم انا وخليك من الباقى ؟؟؟

الاخت بت الارباب انت اكتر زول محظوظ فى الدنيا ياريتنى اجد فرصة مرة اخرى حتى ازور فى الرسول صلى الله عليه وسلم وازور البلد البركة ؟؟؟

الاخ المجذوب اوعك من عيد فى الاسكان وفى اخر امدرمان ؟؟؟





تحياتى

ابو مصطفى

الاخوه الكرام كل سنه وانتو طيبين وانشاء الله العيد القادم الجميع علي عرفات
وانشاءالله تصل بالسلامه انت والاسره الكريمه وتقابلو الاهل وترجعو تامين لامين بادن الله
تقبل مروري000000

كنت ما زلت اعتقد اجمل ما في عيد البلد هو الفطير باللبن والزلابية والشاي الذي الذي نشربه الصباح. والعيد عندنا الان بعد صلاة الصبح بقليل نتوجه الي (المسجد نعم المسجد) لاداء صلاة العيد وبعد الصلاة لا تسلم علي احد لانك لا تعرف احد تبدا المعاناه مع مشوار الخروف واكبر المعاناه تكمن في زحمة الطريق مشوار 10دقائق ممكن يستمر ساعتين وبعدها نفس القصة الحكوتها سابقا

أخونا أبو مصطفى والماشين للعيد فى البلد كل سنه وإنتو بخير وربنا يوصلكم بالسلامه وتلاقوا الأهل والحبان وهم فى أتم صحه وعافيه ، بس أوعكم تخنقوا ، زمان المرحوم جدنا ودعبضول لما يلاقى أى واحد يقول ليهو أنا ماشى للباشى أو للسمايى ، كان يقول له : أوعك تخنق . غايتو نقول كما قال الغناى ـ يابختكم ، وا شوقنا نحن الفينا جمر الشوق وقد ’’’مع خالص تمنياتى لكم بعيد سعيد وعودا حميدا . ولا تنسوا سلموا لى على البلد وربنا يسهل لنا لى داير ....ا

مشكـــــــــــــــــــــــــــــــــــور أبومصطفى ، يااخوى نحن لسع {مَقعْمِزين}فى ليبيا والحمدلله ربنا سلمنا من ذلك الزلزال ، فهو زلزال بحق وليس مجاز، وكل مظاهر الحياة كانت قد توقفت ، والآن بدأت للأفضل . والتغيير سيكون 180 درجة فى كل شىء تقريبا ، إذن تخيل ماسيكون عليه حجم العمل فى مقبل الأيام إبتداء من الورق المروس والأختام مرورا باللوائح والقوانين والتشريعات والعلاقات الخارجيه وإنتهاء بالدستور الجديد ؟ على العموم نحن فى الإنتظار للعوم فى هذا الخضم الجديد . ويا إلهى أكون سعيد أجى لى شرى وألحق العيد . طبعا العيد ده مافى لينا طريقه ، وحتى الخروف الوطنى حضرناهو ، لأنه فى خراف مستوردة ، وده كلو مايساوى شى بالنسبه للحم دعولنا الطاعم . على كل نقول للجميع العيد مبارك عليكم وإنشاء الله من العايدين ، وللماشين البلد ربنا يوصلكم بالسلامه وتعودوا بالسلامه ...آمييييين...ا

التحايا والود لصاحب البوست أبومصطفى ولكل الإخوة المتداخلين والعيد مبارك مقدما ًللمسافرين وللقاعدين وكل سنة وإنتو طيبين وإن شاء الله ترجوه تامين وسالمين وينعاد علينا وعليكم سنين وسنين .... آمين يارب العالمين _

العيد فى البلد عندو نكهة خاصة غير طعم اللحم ولكن بالطبع طعومية اللحم من ضمنها
اكثر مايعجبنى المناسبات المصاحبة له من اعراس وطقوسها حاصه القعيدة ,والسفر الى البلد بالرغم من مشاقه فى بعض الاحيان الاانه يمتاز بمتعه لاندركها الابعد الوصول ويصبح ذكرى جميله بكل ماتحمله الكلمه من معنى
وفى السفر ايضا تغير لروتين الحياة اليومى حيث اننا ننتقل الى مكان احر اكثر هدؤا ونقاء
واكثر مالفت انتباهى وانا فى العيد الماضى منظر الغروب بعد رحيل اهلناالى اماكن اعلى
وهذا بعض من ملاحظاتى مع تجربتى القليله مع العيد فى البلد.

شكرا جزيلا الاخت اقبال بت عممنا سلمان الراجل السخن وشارع واحد ؟؟؟؟؟؟؟؟؟؟؟؟؟ظ التحية لكم والاسرة الكريمة حقيقة الغروب فى البلد عندو منظر خلاب ؟؟؟؟؟؟؟؟؟؟ظ والعروسات عندها تراث خاص ؟؟؟؟؟؟؟؟؟ظ





تحياتى

ابو مصطفى

[quote="ابو مصطفى"]

ahmed alkhabir كتب:ابو مصطفي سلامات

انا معيد في الكدرو لكن اشترينا الخرفان من بدري وزرعت ليهم اللوبا الطيب والعفن مع المريق ديل بقالك يطلعوا كيف؟؟
ابو مصطفى

حيطلعوا(طيبين ومعفنين ومريقين)مريقين يعنى بلا فطور
أبو مصطفى والخبير وكل المتداخلين
كل عام وأنتم بألف خير

الاخوه المعيدين في البلد
كل سنه وانتم طيبيين
نحن ننتظركم علي احر من الجمره
انشاء ربنا يحيينا لي داك اليوم تجيبوا لينا الاخبار بالكوما والفلسطوب
(يعني ماتخلوا دودي بين حجريين)
الله يكتب سلامتكم في الحل والترحال)

تصحبكم السلامة أخى أبومصطفى ونسأل الله لكم سلامة الأسفار وعيد سعيد بالديار وعودا ً حميدا ً إن شاء الله _

تقرر ان نعيد في البلد وذلك بعد ان حسبت الحكومه حساباتها فلقد اصر الولد ان يذهب الي البلد ويعيد هناك وأنا سوف اغادر الي البلد ثاني ايام العيد عندها قررت الحكومه ان تذهب هي الاخري للعيد هناك ولقد كانت معصلجه شويه اكيد العيد في البلد معروف وله طعم ثاني الا ان ما كتبته الاخت اميره وما عانته من تعب اجبرني ان ادلي بدلوي في هذا الامر حتي يستفيد الاخرين من التجربه فلقد كانت لي تجربه في العام الماضي عندما سافرت باالعربيه صالون الي برتي وتعطلت بسبب وعوره الطريق من نوري الي برتي معن الشارع يعتبر جيد جدا مقارنه مع طريق الشرق فهو مطروق والمسافه قريبه خمسين كيلو فقط الان سوف نغادر غدا صباحا يوم السبت وسوف نترك العربيه في كريمه بعد ان تم الاتفاق مع صاحب عربه دبل كبين علي المشوار من كريمه الي البلد وباالعكس والمشوار للعربيه في حدود 150 الي 200 يعني ماشي وجاي 300 الي 400 وافتكر يا اميره دي فكره ممتازه وبعدين اصحاب العربات في كريمه معظمهم مناصير اما في حاله السفر الي برتي ايضا توجد عربات ويوجد مكان لتقريش العربات الصغيره في نوري ما عليك الا الاتصال بصاحب الهايس الذي سوف يأخذك من نوري الي برتي ليرتب لك ذلك وفي حاله سفرك باالبص ماعليك الا الاتصال بصاحب الهايس ليقابلك في الموقف وياخذك الي برتي وفي العوده الاتصال به ايضا ليحجز لك في البص المغادر الي الخرطوم اما داخل برتي ياسلام ماتعرف تعمل شنو تمشي علي البحيره او تجلس علي الشاطيء مع الجماعه لتأكل السمك او تشرب الشاي او تأخذ ليك خفسه في مركب من المراكب لتمر علي الجزائر وتسمتع برحله من اجمل الرحلات النيليه او تقوم تغير وتركب العربيه عصرا بدري وتدخل وادي اب سباع حيث الاشجار التي اصبحت ظليله بعد ارتفاع مستوي المياه الجوفيه تأثرا ايجابيا من البحيره ومن اب سباع الي وادي الكربكان ويكون اجمل لو ذهبت وزرت بئر ام احمد في وادي اب سباع المسافه اربعين كيلو من برتي اما برنامجي في العيد فهو كا الاتي السفر صباح السبت الي البلد اول ايام العيد في سور وفي مساء نفس اليوم الذهاب الي الفرسيب لزياره ود العمه ابراهيم وثاني ايام العيد الذهاب الي برتي لحضور زواج ابن قريبنا الشيكي وزواج ابن الشيخ علي قمر واجمل الاوقات هي تلك التي تقضيها في المركب مرورا علي بعض المناطق ولقد بدأت المعالم توضح اعني المعالم التي سوف يكون لها البعد السياحي فهناك خيران واوديه استغلت في الزراعه واصبحت من اهم مصادر الرزق فبا الاضافه للزراعه فهي المكان الانسب لصيد الاسماك كما انها اصبحت مخضره واكتست باللون المحبب للنفوس (الماء والخضره والوجه الحسن وياسلام علي العيد في البلد وباالمناسبه سوف اقابل ابو مصطفي هناك فنحن جيران وطالب منه قليه يعني تسالي جرم

ايضا هناك النيه لزياره الجماعه في شري وكبنه وعصمه وسوف ازور العمده فنان للتشاور في بعض الامور التي تهم اخوانا المغتربين عشان يعملوا حاجه تدر ليهم دخل في البلد اعتقد مهم جدا لو امن الشخص مصدر دخل في البلد

اتصلت بنتنا زوبه والتي غادرت اليوم وسوف نقابلها عند نزولنا في الشرق وقبل ركوب المركب متوجهين الي سور

الي اللقاء وكل عام وانتم بخير

شكرا هندسة على هذا الوصف الدقيق للسفر وتفاصيله المصحوب بوصف ايضا لبعض برامج العيد—
انتو الفايزين اما نحنا شاءت الظروف ان نكون فى العقاب –
بالتوفيق ان شاء الله –
طبعا كما ذكرت فى بوست اخر كنت اول المسافرين للبلد ولكن الاخ نورالهادى باذن الله سوف يصل للبلاد فجر الاثنين (تانية العيد) –وسوف نكون بانتظاره
امنياتى للجميع بقضاء ايام سعيدة بالبلدوعلى رأسهم صاحب البوست --

شكرا سلمان بامناسبه اتصلت قبل شويه علي ود الاخت ابو مصطفي وهو الان في التمتام في طرقه الي البلد الا ان ابو مصطفي عنيد ما بسمع الكلام مثل هذه السفريه سوف تكون صعبه علي الاطفال من ام درمان الي البلد طوالي بعربه لموزين السفر جميل عندما تكون العربيه تحت تصرفك تماما ويكون ذلك بان تستأجر العربيه في حاله اللموزين بدون سواق وفي حاله الصالون او عربيه صغيره ان تكون المحطه كريمه او نوري وذلك لراحه المسافرين خاصه اذا كانوا اسره حتي يستمتع الاطفال باالرحله وان لاتكون الغايه الاساسيه هي الوصول الي البلد بغض النظر عن الطريقه ففي مثل هذه الحاله سوف تكون تجربه اميره تمثل بعبع للاخرين لابد من الترتيب الجيد جدا من بدايه الانطلاق من الخرطوم وحتي وصول المحطه القبل الاخيره كريمه او نوري يعني قبل السفر تحضر الزواده الظريفه ياحبذا لو كانت فطائر مع بعض الفواكه ومليء التريمس باالشاي والقهوه وان يكون الفطور قبل التمتام في وادي فيه شجر تخلي الشفع ينططوا في الوادي شويه ويفطروا وفي الطريق وبعد الملتقي وبعد وصولك لازم تذهب الي جبل البركل وتخلي الاولاد ينططوا ويتصوروا في جبل البركل وتعطيهم فكره عن هذا الجبل وماكان يمثل لاهلنا القدماء من رمزيه قدسيه عندما كان مزار للعباده عباده الاله امون رع ولو وجدت زمن تقطع باالعربيه سد مروي ومن فوق السد وامامك البحيره متراميه الاطراف تشرح للاولاد ماذا تعني هذه البحيره والربط بينها وبين جبل البركل فلقد كان في القديم تقدم القرابين البشريه للمعبد ولقد قدمت هذه القرابين لهذا السد مع الفارق الزمني وما تبعه من تغيير للمفاهيم الدينيه والثقافيه والانسانيه

كل هذا قبل ان تنطلق او تبدا المرحله الثانيه والاخيره لرحله البلد ولكن نقول شنو ماهو لازم يحصل تغيير في الفهم للسفر فهم ان السفر متعب لابد ان تتغير الي ان يكون السفر جاذبا ولكي يكون جاذب وحتي لايتدخل الجماعه الاثنين الكاشف والريس اقترح ان تكون هناك باسطه في الزواده وياسلام في قعده في وادي وتحت ظل شجره وبعدين في محلات جميله في الطريق بعد كريمه وبعد نوري بعد كريمه وبعد ان ياخذ الطريق الاتجاه للمناصير هناك ذراع جميل جدا للبحيره وفي جبل تمشي تأخذ جلسه علي هذا الذراع وهو ذراع وادي كبير منظر جميل جدا ولكن يجب ان تضع في حساباتك ان تصل المناصير قبل غروب الشمس وفي حاله سفرك بالغرب من نوري بعد ان تتعدي لفه نوري وبعد ان تفارق الظلط مسافه عشرين كيلو وبعد مفرق الطريق المؤدي الي عطبره يظهر امامك وادي اب سباع مباشره بعد ان تتعدي السد في هذا الوادي شجر ظليل جميل جدا وبه رمال تقعد بأسرتك في هذا الوادي وتشرب الشاي بي مزاج ايضا لو مشيت لي قدام شويه هناك ذراع للبحيره قريب من الطريق ممكن تأخذ جلسه فيه

ياجماعه لابد من جعل السفر متعه وبعدين تكون معاك كمره للتصوير والتوثيق مش طوالي كرديبه وجري وسوق سوق اصلو الحكايه شني

اهلنا زمان معذورين ونحن الان لابد من كبح جماح الجينات الوراثيه التي تخلي ابو مصطفي منطلق جري والشفع في ضيق الله وفي الختام نحن علي استعداد لتقديم المشوره مجانا وذلك لترغيب الناس في الاستمتاع باالسفر

اولا نتمنى لصاحب البوست عيد سعيد وسلامه الاسفار
الباشمهندس هاشم عيد سعيد وان شاءالله تصل بالسلامه
وانت تقترح طريقه السفر الجميله دى خليت الواحد يتمنى ان يسافر اليوم قبل باكر وان ادى الله العمر سوف نقوم بالفكره الرايعه دى باذن الله .
تحياتى

كل سنة والجميع بخير

وحكمة الله وقسمتو ما قدرنا نلحق العيد في البلد بالرغم من إعدادنا للعدة وكل التجهيزات

على كل حال

بالسلامة لكل المسافرين

وعيد سعيد

كل سنة والجميع بخير
بالسلامة لكل المسافرين

وعيد سعيد

والله يسلم من نطحة الضحية يا ابو مصطفى !!!

الأخ منوفلى .... كل سنة وأنت طيب .... الظاهر أنت يا منوفلى زولا قديم ... نطحة الضحية كانت زمان لما كانت البطون ما متعودة على اللحم .... اللحم كان من الضحية للضحية ولا يجينا عابر الضباح ...يا أخى السماية كنا نقطع ليها بالمراكب عشان نأكلنا شوية دنفريس ومن الفرحة إيدينا ماكنا بيى نغسلن ونقعد نشم فيهن طول النهار ... يا أخى العضم كنا نكدو لامن يعزف موسيقى !!! أذكر لما توفى الشيخ على الميرغنى الجماعة الخلفا فى شرى طبحوا تيران وعملو كابور ونحن الزمن داك صغار جينا من الودات عشان نأكلنا ليحمات وحتى اللحميات ما لقيناهن مع ولاد المتيرة !! دادق وشلتو كانوا يختفوا اللحم من صحن الدبكر ويقولو فر ويا العيش جاك زول .. يا خى الزمن داك جحر الصبرة ماتلقى فيهو عضم غير دلاقين وكشاكيش !!! الشبعة الوحيدة كانت فى الضحية وكانت تنطحنا لامن نقع على قفانا فى العقبة التالانا ....
عفوا ً على الإطالة والكلام يجيب الكلام _

شكرا يا النفر وعيد سعيد انشاء الله

احكى احكى ....

كل سنه والجميع بخير
ياجماعه شوفوا لينا
ناس البلد بدو يجي ولا لسع
بالاخ ابومصطفي
طبعا العيد في الغربه
يختلفاختلاف
ولافي شي
يشترك معيالعيد الواحد
الاحاجتين
الصلاه الخروف
اما الصلاه معروفه
اما الخروف لحمه يخيلف من لحم البلدرغم انه سوداني (سواكني

شكرا الاخوة المرور والشكر موصول لكل السادة وسوف اعود عليكم مرة اخرى حتى احكى لكم قصة الرحلة ذهاب واياب من والى المناصير انشاء الله ؟؟؟؟؟؟؟؟؟؟؟؟







تحياتى

ابو مصطفى